Andri og Rúnar efstir og jafnir á Skákþingi Akureyrar

Það var mikið undir í sjöundu og síðustu umferð 81. Skákþings Akureyrar í dag. Rúnar Sigurpálsson, sem síðast varð Akureyrarmeistari árið 2010, hafði hálfs vinnings forskot á Andra Frey Björgvinsson, tvítugan pilt sem ennþá eftir að vinna stóran titil hjá Skákfélaginu. Rúnars beið hinsvegar það erfiða hlutskipti að verjast með svörtu mönnunum gegn Jóni Kristni Þorgeirssyni, stigahæsta manni mótsins og meistara síðustu tveggja ára.  Rúnari voru mjög mislagðar hendur í skákinni og mátti leggja niður vopnin eftir fremur stutta baráttu.   Andri stóð þá með pálmann í höndunum, hann myndi hreppa titilinn eftirsótta með sigri í sinni skák, en Andri atti kappi við Símon Þórhallsson, sem sannarlega var sýnd veiði en ekki gefin, enda búinn að velgja forustusauðum rækilega undir uggum fyrr á mótinu. Andri virtist um hríð eiga allskostar við Símon, en eftir snjallan leik hjá hinum síðarnefndra hallaði á Andra og var staða hans töpuð um tíma. Símon brenndi þó af í dauðafæri og gaf andstæðingi sínum kost á því að sigla taflinu í jafnteflishöfn. Í þriðju skák dagsins varð Haraldur Haraldsson sigur á  Benedikt Stefánssyni. Lokastaðan er því sem hér segir:

1-2. FM Rúnar Sigurpálsson og Andri Freyr Björgvinsson 4,5

3. FM Jón Kristinn Þorgeirsson 4

4-5. Símon Þórhallsson og Sigurður Eiríksson                     3

6. Haraldur Haraldsson 2
7. Benedikt Stefánsson 0

Þeir Rúnar og Andri þurfa því að heyja aukakeppni um meistaratitilinn. Sú keppni bíður þess að Íslandsmóti skákafélaga ljúki, en það verður háð í Reykjavík um næstu helgi. Það á Skákfélagið tvær sveitir í fyrstu deild og stendur í harðri baráttu.

Lokastöðuna má sjá hér

Undanrásir Barna-Blitz hjá Huginn mánudaginn 26. febrúar kl. 17.15

Undankeppni Skákfélagsins Hugins fyrir Reykjavík Open Barna-Blitz verður haldin mánudaginn 26.febrúar kl.17.15-19. Undankeppnin verður hluti af hefðbundinni mánudagsæfingu Hugins. Þrjú efstu börnin fædd 2005 eða síðar fá sæti í úrslitum sem tefld verða í Hörpu 11.mars.

Tefldar verða 6 umferðir með umhugsunartímanum 5+3 (5 mínútur auk 3 sekúndna viðbótartíma eftir hvern leik).

Bragi Þorfinnsson með lokaáfangann að stórmeistaratitli!

Bragi Þorfinnsson (2426) var rétt í þessu að tryggja sér sinn lokaáfanga að stórmeistaratitli. Hann var að leggja að velli ensku skákkonuna Jovanka Houska (2408) og hlaut 7 vinninga í 9 skákum á alþjóðlega mótinu í Kragaeyju á Noregi.

Bragi verður væntanlega útnefndur stórmeistari á FIDE-fundi í apríl nk.

Nánari fréttir í kvöld.

 

Bragi í öðru sæti fyrir lokaátökin í Kragaeyju

Alþjóðlegi meistarinn Bragi Þorfinnsson (2426) er í öðru sæti á alþjóðlega mótinu í Kragaeyju í Noregi fyrir lokaátökin sem fram fara í dag. Í fyrri skák gærdagsins réð hann ekki við öflug högg Jon Ludvig Hammer (2601). Í seinni skákinni vann hans afar mikilvægan og góðan sigur á norska alþjóðlega meistaranum Benjamin Arvola Notkevicch (2446). Bragi hefur 5,5 vinninga - hálfum vinningi á eftir Hammer.

Stefán Bergsson (2093) vann og tapaði í gær og hefur 4 vinninga. Hann er í góðum stigaplús og nálgast það að geta orðið CM. Hrannar Baldursson (2153) átti ekki góðan gærdag og hefur 2 vinninga.

Tvær skákir eru tefldar í dag. 

Staðan í b-flokki er ekki aðgengileg sem stendur. 

Mótið í Kragaeyju er alvöru. Þar eru tefldar níu skákir á fimm dögum. Á morgun verða því tefldar tvær umferðir.

• Heimasíða mótsins
• Norskt Chess-Results
• Beinar útsendingar (Chess24)

Skáklið 4. bekkjar Rimaskóla vann jafnaldra sína frá Osló í Noregi

Slegið var upp landskeppni í Rimaskóla þegar átta nemendur frá Rödtvet í Noregi heimsóttu jafnmarga jafnaldra sína úr 4. bekk Rimaskóla. Tefldar voru sex umferðir og keppnin jöfn og spennandi allan tímann.

Svo fór að Rimaskólakrakkar hlutu 28 vinninga gegn 21 vinningi gestanna frá Osló. Teflt var um einstök sæti og veitt sex verðlaun. Efstir og jafnir á mótinu með 5 vinninga urðu þeir Daníel Tal Mikaelsson og Arnar Gauti Helgason. Í 3. sæti varð Brynjar Dagur Árnason og efst stúlkna Sóley Kría Helgadóttir. Efstir Norðmanna urðu þeir Aleksander Ölnes og Ludvig Taraldsen með 4 vinninga af 6. Mótið gekk mjög vel fyrir sig enda góðir og áhugasamir skákmenn á öllum borðum. Skákstjóri var Helgi skólastjóri og hafði hann sér til aðstoðar öflugan foreldrahóp. (HÁ)

Barna- og unglingameistaramót Reykjavíkur fer fram í dag

Barna- og unglingameistaramót Reykjavíkur, sem jafnframt er Stúlknameistaramót Reykjavíkur, fer fram sunnudaginn 25. febrúar í félagsheimili T.R. að Faxafeni 12. Taflið hefst kl.13 og stendur til ca. kl. 17. Tefldar verða 7 umferðir eftir svissnesku kerfi með umhugsunartímanum 10 mínútur á skák, auk þess sem 5 sekúndur bætast við eftir hvern leik (10+5).

Mótið verður reiknað til alþjóðlegra atskákstiga.

Mótið er opið öllum börnum og unglingum, óháð taflfélagi eða búsetu, sem eru fædd árið 2002 eða síðar. Teflt verður í tveimur flokkum: opnum flokki og stúlknaflokki.

Verðlaun verða veitt fyrir þrjú efstu sætin í mótinu. Nafnbótina Unglingameistari Reykjavíkur 2018 hlýtur sá keppandi sem verður hlutskarpastur þeirra sem hafa lögheimili í Reykjavík eða eru meðlimir í reykvísku taflfélagi. Einnig verða veitt verðlaun fyrir þrjár efstu stúlkurnar. Nafnbótina Stúlknameistari Reykjavíkur 2018 hlýtur sú stúlka sem verður hlutskörpust þeirra stúlkna sem hafa lögheimili í Reykjavík eða eru meðlimir í reykvísku taflfélagi.

Til viðbótar verða veitt verðlaun fyrir efsta sætið í árgöngum 2002-2003, 2004-2005, 2006-2007, 2008-2009 sem og 2010 og yngri í báðum flokkum (opna flokknum og stúlknaflokknum).

Núverandi Reykjavíkurmeistarar eru Vignir Vatnar Stefánsson og Batel Goitom.

Skákmótið hefst kl. 13 og er aðgangur ókeypis. Skráning í mótið fer fram rafrænt og má nálgast skráningarformið hér. Einnig má finna skráningarformið í gula kassanum á skak.is. Upplýsingar um þegar skráða keppendur má nálgast hér

Skákþáttur Morgunblaðsins: Tvenn gullverðlaun Íslendinga á Norðurlandamótinu

Að vinna tvö gull í keppni fimm aldursflokka á Norðurlandamóti einstaklinga 20 ára og yngri er alltaf góð niðurstaða. Í Vierumaki í Finnlandi um síðustu helgi tókst Oliver Aron Jóhannessyni og Hilmi Frey Heimissyni að ná sigri í sínum aldursflokkum og Jón Kristinn Þorgeirsson nældi sér í bronsverðlaun.

Þessi frammistaða er einkar ánægjuleg og má geta þess að Alexander Oliver Mai var einnig í færum að vinna miðflokkinn en lenti þar í 5. sæti. Hann vanmat möguleika sína í næstsíðustu umferð mótsins er hann samdi jafntefli með hartnær unnið tafl.

Oliver Aron, sem er rólyndismaður, tefldi af mikilli keppnishörku og skákir Hilmis Freys Heimissonar voru afar viðburðaríkar. Hann missti af tækifæri á bráðsnjöllum biskupsleik til c7 í skák sinni við Einar Hjalta Jensson á Skákþingi Reykjavíkur og birtist hér í blaðinu á dögunum en tækifærið kom aftur til hans í Finnlandi! Þar var hið vinsæla Lundúna-afbrigði tekið til meðferðar:

NM 2018; 2. umferð:

Hilmir Freyr Heimisson – Milton Pantzar

Drottningarpeðsbyrjun

1. d4 Rf6 2. Bf4 d5 3. e3 c5 4. dxc5 Da5+ 5. Rc3 e6 6. a3 Dxc5 7. Rb5 Ra6 8. Rf3 Bd7 9. a4 Be7 10. Be2 0-0 11. 0-0 Hfc8 12. c3 Db6 13. Rfd4 Rc5?

Hann hefði betur valdað c7-reitinn með 13.... Re8.

14. Bc7!

Fangar drottninguna, 14.... Hxc7 er svarað með 15. a5 o.s.frv.

14.... Da6 15. a5!

Hann gat unnið drottninguna fyrir tvo létta með 15. Rd6 en þetta er enn betra.

15.... b6 16. axb6 Db7 17. Hxa7 Hxa7 18. bxa7 Re8 19. Bb8 Ra6 20. Da1 Hd8 21. Da5 Hxb8

 

22. axb8=D?

Mun sterkara var 22. Dxa6! sem vinnur strax.

22.... Rxb8 23. f4 f6 24. Ha1 Bc5 25. b4 Bb6 26. Da8 Dc8 27. Ha3 Kh8 28. f5 e5 29. Dxd5 exd4 30. Bc4? Rc7 31. Rxc7 Bxc7

Í tímahrakinu sást báðum keppendum yfir snjallan millileik, 31.... dxe3! sem heldur jafnvægi.

32. cxd4 Bxf5 33. b5 Bg6 34. Ha7 Bb6 35. Hb7 Ba5 36. Dd6!

– og svartur gafst upp.

Óopinber keppni milli Norðurlandaríkjanna fer einnig fram en þar er samanlagður vinningafjöldi keppenda frá hverju landi lagður til grundvallar. Skákbylgjan í Noregi talar þar sínu máli:

1. Noregur 38½ v. 2. Ísland 33½ v. 3.-4. Svíþjóð og Finnland 32½ v. Finnland 5. Danmörk 27 v. 6. Færeyjar 16 v. 

Jóhann og Helgi Áss efstir í A-flokki skákhátíðar MótX

Jóhann Hjartarson og Helgi Áss Grétarsson voru efstir í A-flokki skákhátíðar MótX fyrir lokaumferðina sem er á dagskrá næstkomandi þriðjudag. Þeir höfðu báðir hlotið 4½ vinning af sex mögulegum og ákváðu raunar að flýta viðureign sinni vegna utanferðar Jóhanns á skákmót í Austurríki sem hefst í dag. Úrslitaviðureignin fór fram sl. miðvikudag en úrslitunum er haldið leyndum fram á þriðjudag. Fyrir lokaumferðina eru Jón L. Árnason, Hannes Hlífar Stefánsson, Björgvin Jónsson, Þröstur Þórhallsson og Jón Viktor Gunnarson í 3.-7. sæti með 4 vinninga. 

Í b-flokki er Siguringi Sigurjónsson efstur með 5 vinninga af sex mögulegum. Í 2.-3. Sæti eru Gauti Páll Jónsson og Hilmir Freyr Heimsson með 4½ v. Meðal „hvítra hrafna“ dró til tíðinda í 4. umferð þegar forsprakki þessa móts, Jón Þorvaldsson, lagði Braga Halldórsson að velli og komst í efsta sætið ásamt Braga og Júlíusi Friðjónssyni. Þeir eru allir með 2½ vinning af fjórum mögulegum.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 17. febrúar 2018

Skákþættir Morgunblaðsins

Puffins etja kappi við lið með Nakamura og Caruana!

Óhætt er að segja að verkefni dagsins sé ansi erfitt hjá Reykjavik Puffins. Í dag klukkan 15:00 fer fram hinn svokallaði Super Saturday en þá mun lið Puffins etja kappi á fjórum borðum við 8 liðum úr öðrum deildum í PRO Chess League.

Liðin sem Puffins fá að þessu sinni skarta algjörum heimsklassaskákmönnum á borð við Hikaru Nakamura, Fabiano Caruana og Yu Yangyi svo einhverjir séu nefndir.

Mun það koma í hlut Jóhanns Hjartarsonar að þessu sinni að kljást við þessi skrímsli!

Uppstilling Puffins að þessu sinni er: 1. borð Jóhann Hjartarson, 2. borð Helgi Ólafsson, 3. borð Hannes Hlífar Stefánsson og á 4. borði í sinni fyrstu viðureign með Puffins er Davíð Kjartansson.

Fyrirkomulagið er þannig að þessi 16 lið sem kljást keppast við að safna vinningum. Sex efstu liðin fá svo 1 vinning í töfluna, næstu fjögur lið fá 1/2 vinning á töfluna en neðstu sex fá ekkert stig. Síðast þegar þetta fyrirkomulag var voru Puffins hálfum vinningi frá því að fá stig á töfluna en enginn náði sér á strik þá.

Mjög mikilvægt er fyrir Puffins að komast á blað í dag enda liðið í hörku baráttu um að komast í úrslitakeppnina. Að loknum Super Saturday eru eftir eftir tvær viðureignir gegn lakari liðum (allavega samkvæmt töflunni) sem verða að vinnast!

Hægt verður að fylgjast með útsendingu á:

http://www.twitch.tv/reykjavikpuffins

Útsending Chess.com má nálgast einnig á Twitch

Upplýsingar um deildina má nálgast á prochessleague.com

 

Við mælum að sjálfsögðu með Puffins útsendingunni þar sem FM Ingvar Jóhannesson mun fylgjast með gangi mála!

Barna Blitz: Undankeppni Víkingaklúbbsins

Undanrásir Víkingaklúbbsins fyrir Reykjavík barnablitz fóru fram miðvikudaginn 21. febrúar hjá Víking. 22. keppendur tóku þátt. Efstur varð Óskar Víkingur Davíðsson með 6 af 6 mögulegum. Annar varð Benedikt Þórisson með 5 vinninga og í 3-7 sæti urðu Rayan Sharifa,Gunnar Erik Guðmundsson. Stefán Orri Davíðsson og Soffía Arndís Berndsen með 4. vinninga. Ryan varð efstur á stigum og náði því þriðja sætinu, en þrír keppendur komast áfram í úrslitakeppnina í Hörpu.  Efstur Víkinga varð Einar Dagur Brynjarsson, Bergþóra Helga varð í öðru sæti og Gunnar Jóhannsson í þriðja sæti.  Tefldar voru 6. umferðir með 7. mínútna umhugsunartíma.  Skákstjórar á mótinu voru Sigurður Ingason og Gunnar Fr. Rúnarsson.

Úrslit:

1. Óskar Víkingur Davíðsson 6.0 vinninga 
2. Benedikt Þórisson 5.0
3. Ryan Sharifa 4.0
4. Gunnar Erik Guðmundsson 4.0
5. Stefán Orri Davíðsson 4.0
6. Soffía Arndís Berndsen 4.0 
7. Óttar Örn Bergmann 4.0
8. Ánna Katarína Thoroddsen 3.5
9. Bjartur Þórisson 3.5
10. Adam Omarson 3
11. Ísak Orri Karlsson 3
12. Einar Dagur Brynjarsson 3
13. Birgir Logi Stefánsson 3
14. Josep Omarsson 3
15. Andri Sigurbergsson 2.5
16. Gunnar Jóhannsson 2
17. Bergþóra Helga Gunnarsdóttir 2
18. Rigon 2
19. Róbert K 2
20. Sigurður Gunnarsson 1
21. Dagur Arason 1
22. Gabríela V 0.5

Nánar á heimasíðu Víkingaklúbbsins

 

Daði Ómarsson fór hamförum á Hraðskákmótaröð TR

Daði Ómarsson gaf engin grið á Hraðskákmótaröð TR þegar Mót 2 var teflt í kvöld. Daði nældi sér í 10,5 vinning í 11 skákum og var 1,5 vinning fyrir ofan sigurvegara fyrsta mótsins, Vigni Vatnar Stefánsson, sem varð annar með 9 vinninga. Hilmir Freyr Heimisson varð þriðji með 8 vinninga. Tefldar voru 11 umferðir, allir við alla, með tímamörkunum 3+2.

Lokastaða mótsins: