KR-Skák: Hörkumót á mánudagskvöldum

Skákvertíðin í Vesturbænum er nú hafin fyrir alvöru.  Enda þótt þar hafi verið teflt í allt sumar er nú að færast aukinn kraftur í starfsemina.

Hraðskákmótið á mánudaginn var er gott dæmi þar um. Slík mót er ekki heiglum hent.

Tefldar voru 13 umferðir með 7 mínútum á mann. Allir við alla að því sinni. 

Ótrúleg frammistaða aldursforsetans GUNNARS KR. GUNNARSSONAR (84) vakti mikla aðdáun og athygli en hann stóð uppi sem sigurvegari taplaus með 12.5 vinninga af 13 mögulegum og gott leyft sér brosa í kampinn í mótslok, líkt of svo oft áður á mótum Riddarans í sumar. 

Mótin á mánudagskvöldum hefjast kl. 19.30 en svo eru líka haldin árdegismót á laugardögum kl. 10.30 - 13, sem hafa  verið vel sótt og eru líka öllum opin. Um að gera að mæta til að hrista af sér slenið og máta mann og annan, ef vel tekst til. 

Sjá má öll úrslit móta á síðu KR Skákdeildar á Feisbúkk.

Og þá eru eftir átta á Heimsbikarmótinu

Vladimir Fedoseev, Maxime Vachier-Lagrave, Richard Rapport, Wesley So and Peter Svidler komust áfram í 5. umferð (8 manna úrslit) Heimsbikarmótsins í skák í gær. MVL vann Grischuk, Wesley So lagði heimamanninn Baadur Jobava sem erður sárt sáknað.

 

Árangur Rapport (2675) vekur athygli, sem vann Najer en hann er langstigalægstur áttmenningana sem eftir eru.

Úrslit 4. umferðar

Ítarlega frásögn og öll úrslit má finna á Chess.com.

Myndir (Maria Emelianova - Chess.com)

• Heimasíða mótsins (Ivan Sokolov aðalskýrandi)
• Chess.com (Yasser Seirawan og fleiri) 

Friðsamt á efstu borðum Haustmótsins

Einar Hjalti Jensson (2362) og Magnús Pálmi Örnólfsson (2227) eru efstir og jafnir á Haustmóti Taflfélags Reykjavíkur að loknum 4 umferðum með 3,5 vinning. Á hælum þeirra með 3 vinninga eru Hjörvar Steinn Grétarsson (2567), Þorvarður Fannar Ólafsson (2164), Oliver Aron Jóhannesson (2272), Jóhann H. Ragnarsson (2032) og Björgvin Víglundsson (2137).

Einar Hjalti tók yfirsetu í 4.umferð og missti þar með sinn fyrsta hálfa vinning eftir að hafa byrjað mótið óaðfinnanlega. Magnús Pálmi nýtti tækifærið og náði Einari Hjalta að vinningum með því að sigra Ólaf Guðmarsson (1721) með svörtu mönnunum. Á sama tíma varð Hjörvar Steinn að gera sér að góðu jafntefli gegn Þorvarði Fannari. Sömu úrslit urðu í viðureign Olivers og Björgvins. Á sjö efstu borðunum unnust einungis tvær skákir; áðurnefndur sigur Magnúsar Pálma á Ólafi sem og sigur Jóhanns gegn Tryggva K. Þrastarsyni (1325).

Joshua Davíðsson (1414) tefldi vel gegn Herði Aroni Haukssyni (1859) og uppskar fyrir vikið jafntefli, en á þeim munar 445 skákstigum. Joshua hefur 2,5 vinning. Benedikt Þórisson (1065) nældi sér í sterkan vinning gegn Ármanni Péturssyni (1288) og sýnir með því að góð æfingasókn og mikil taflmennska skilar sér alltaf í góðum árangri við skákborðið. Benedikt hefur hlotið 2 vinninga í skákunum fjórum.

Haustmótið heldur áfram næstkomandi föstudagskvöld er 5.umferð verður tefld. Þá mætast Magnús Pálmi og Oliver Aron á efsta borði, Björgvin og Hjörvar Steinn á öðru borði og loks Þorvarður Fannar og Jóhann á þriðja borði. Einar Hjalti tekur sína aðra yfirsetu í röð.

Skákir fyrstu fjögurra umferðanna hafa þegar verið slegnar inn af Daða Ómarssyni. 

Úrslit, staða og pörun #5 umferðar: Chess-results

Skákir HTR (pgn): #1, #2, #3, #4 (Skrá #3 umferðar inniheldur leiðréttar skákir #1 og #2 umferðar).

Heimasíða TR

Vignir endaði í 18. sæti

Ekki gekk sérstaklega vel í níundu og síðustu umferð EM ungmenna í dag. Gunnar Erik Guðmundsson (10) vann, Vignir Vatnar Stefánsson (u14) gerði jafntefli en aðrar skákir töpuðust.

Úrslit dagsins

Vignir hlaut 6 vinninga og endaði í 18. sæti í sínum flokki. Jón Kristinn Þorgeirsson (u18) og Batel Goitom Haile (u10) hlutu 4,5 vinning, Gunnar Erik Guðmundsson (u10) hlaut 4 vinninga og Bjartur Þórisson (u8) og Símon Þórhallsson (u18) hlutu 3 vinninga.

Lokastaða íslensku keppendanna

Batel, Jón Kristinn og Gunnar Erik hækka öll mjög á stigum. Batel um heil 74 stig en hún tefldi við stigahærri keppendur í átta skákum af níu, Jón Kristinn um 44 stig en rétt eins og Batel tefldi hann við stigahærri keppendur í átta skákum og náði að tryggja sér FIDE-meistaratitil með frammistöðu sinni. Gunnar Erik hækkar um 20 stig. Vignir var nánast á pari stigalega séð en Símon náði sér ekki strik á mótinu og lækkar töluvert. Bjartur er stigalaus á alþjóðlegum stig enda aðeins átta ára. Almennt góður árangur hjá íslensku skákmönnunum. Sér í lagi gekk vel seinni part mótsins nema þá í lokaumferðinni. 

Ingvar Þór Jóhannesson mun gera mótinu betri skil í pistli fljótlega.

• Chess-Results
• Beinar útsendingar (hefjast kl. 12 - 10 efstu skákir hvers flokks sýndar beint)

EM Ungmenna í Rúmeníu - Pistill #7

Síðasti keppnisdagur er runninn upp á EM ungmenna á Mamaia í Rúmeníu þegar þessi orð eru rituð.

Síðasta umferðin er aðeins fyrr á ferðinni en hinar en tafl hófst í dag klukkan 13:00 að staðartíma (10:00 íslenskum).

Loks fengum við Íslending aftur á sýningarborð en Vignir er í beinni útsendingu hér: https://chess24.com/en/watch/live-tournaments/european-youth-championship-2017/9/1/46

Lokaumferðin er auðvitað mikilvæg upp á að hoppa aðeins upp töfluna og ná góðu lokasæti. Verður gaman að sjá hvernig það gengur hjá okkar fólki. 

 

 Rennum yfir næstsíðustu umferðina, þá áttundu sem fór fram í gær (13.sept).

U8 

Bjartur fékk albanskan andstæðing og leit satt best að segja út á hans skákum að Bjartur væri mun lengra kominn í skáklistinni. Ég var allavega bjartsýnn á það sem ég las úr skákunum sem ég sá í skákgagnagrunnum. Við undirbjuggum aðeins leiðir í 1.e4 e5 og bjuggumst einna helst við ...Be7 ungversku vörninni en planið var að tefla svipað og við höfðum skoðað áður gegn ítalska leiknum.

Skákin var engan vegin fullkominn og mistök á báða bóga en Bjartur hafði alltaf frumkvæðið og var liði yfir. Furðulegt nokk fékk hann aftur Rb1xb7 á borðið eins og í umferðinni á undan og aftur var átakspunktur á f7. Bjartur greinilega lærði af reynslunni og braust í gegn á f7 reitnum sem brást honum í umferðinni áður. Sá albanski var svo mátaður.

Bjartur fær rúmenska strák með 1100 stig í dag.

 

U10

Gunnar atti kappi við serbneskan mótherja og upp kom kóngsindversk vörn eins og við höfðum búist við. Lagt var upp með Petrosian afbrigðið en andstæðingur hans valdi ekki algengustu leiðirnar sem við höfðum eytt mestu púðri í. Úr varð þó baráttuskák enda tryggði góður undirbúningur fína stöðu. Að þessu sinni hafði sá serberneski betur.

Gunnar fær svo einnig erfiðan andstæðing í dag en sá hefur verið á niðurleið í undanförnum umferðum eftir að hafa byrjað vel. Það væri sterkt, sanngjarnt og skemmtilegt ef Gunnar næði að klára mótið á sigri í þeirri skák.

U10 stelpur

Batel fékk enn einn erfiðan andstæðing. Andstæðingur hennar var tyrknesk stúlka og státaði af WCM titli. Ekki sú fyrsta sem hún fær með þann titil en það þýðir einfaldlega að þar eru á ferðinni sterkar og vel skólaðar stelpur og sýnir þetta kannski best hvað Batel hefur veirð að standa sig vel.

Í umferð gærdagsins tefldi hún nokkuð vel í miðtaflinu þó byrjunin hefði farið eilítið úrskeiðis. Hún hefur gjarnan verið að rétta sinn hlut í miðtaflinu í mótinu. Hún var við það að jafna taflið og eiga sína möguleika í skákinni þegar hún hrifsaði peð í fljótfærni og lenti í leppun sem kostaði mann. Hefði verið gaman að sjá hvernig skákin hefði þróast ef hún hefði náð að tefla stöðuna frá þeim punkti.

Mótið engu að síður enn mjög gott hjá Batel og mikilvæg skák í dag upp á að halda áfram að hala inn elóstigum og ná sem bestu sæti. 

U14

Um Vigni mætti segja að hann sé að tefla ca. á pari. Hann hefur ekki átt sitt besta mót en að sama skapi er alls ekki hægt að segja að það sé slæmt. Hann hefur sótt í þegar liðið hefur á mótið og er nú kominn á sýningarborð á 5. borði í síðustu umferð og eygir von um að enda í góðu sæti með sigri í lokaumferðinni.

Andstæðingur gærdagsins var hans sterkasti hingað til en Vignir lét það ekki á sig fá og vann sinn besta sigur til þessa.

Hann tók mig þó í bakaríið helvískur en þeir sem þekkja mig vita að ég get verið stríðinn og stutt í húmorinn. Að þessu sinni var komið að Vigni að plata mig hressilega. Ég hitti á hann og Jón Kristinn skömmu eftir að skákum þeirra lauk og fórum við yfir þær. Ég spurði hvernig fór og Vignir svaraði "jafntefli" með sannfærandi ekkert alltof kátur með lífið yfirbragði. Ég hugsaði jæja, ekkert svo slæmt svart á stigaháan gaur og allt í lagi.

Við förum því næst að skoða skákina og ég held á skorblaðinu og fer yfir leikina. Byrjunin var keimlík frægri skák Carlsen-Dolmatov 1.Rf3 f5 2.d3 og virtist hvítur snemma tafls vera kominn með yfirhöndina. Vignir þurfti að hörfa með kónginn til d7 og svo c8 og stóð verr en virtist svo verað að jafna taflið.

Ég hugsaði með mér jú....þetta er gott að ná að halda þessu og var ennþá á því að skákin væri jafntefli. Held áfram að skoða og allt í einu er drottningarendatafl og Vignir að vinna peð.....ég hugsa "wait a minute" og álpast loksins til að líta á úrslitin 0-1. Vignir gjörsamlega springur úr hlátri og ég blóta í sand og ösku ;-)

Flottur sigur með svörtu mönnunum hjá Vigni og nú væri gaman að ná sigri í lokaumferðinni og topp 10 sæti!

 

U18 

 Að ofan er mynd af viðureign Símons við Slobodan (Skottu). Símon hafði sigur eins og venja er!

 Jón Kristinn tefldi við mjög sterkan skákmann í 8. umferðinni. Slavi var vopn Jóns og fljótlega var það orðið að Stonewall uppbyggingu hjá svörtum. Króatinn hélt fullri stjórn á stöðunni og varðist trikkum Jóns sem reyndi að hræra í taflinu. Það dugði ekki til og Sven Tica hafði sigurinn að þessu sinni.

Jón Kristinn fær hvítt í síðustu umferðinni og gaman væri að klára þá skák og hafa 2300 elóstigin á birtum lista þegar FM titilinn er tryggður.

 

Úrslit 8. umferðarinnar

 

Pörun í síðustu umferðinni:

Linkur á Chess-Results

Eftir þennan síðasta keppnisdag bíður okkar erfitt ferðalag á morgun þar sem lagt verður í hann með rútu klukkan 09:00 að staðartíma (06:00 íslenskum) og verðum við komin til Íslands um miðnætti ef ég man rétt (ekki með pappírana með mér hér).

Ferðin hefur að mörgu leiti verið fín, staðurinn er skemmtilegur og veðurfar gott. Vissulega var hægt að setja mikið út á hótelið og maturinn á hótelinu skelfilegur en hópurinn hefur almennt verið jákvæður og við höfum bara borðað mikið utan hótelsins enda er ekki dýrt að lifa hér. Flestar máltíðir eru vel undir þúsundkallinum og þó við höfum verið að fara undanfarna daga í verslunarmiðstöðina í Constanta til að borða þá eru leigubílar (þeir sem svindla ekki) að láta okkur borga hálft startgjald í íslenskan leigubíl á meðan sá sem svindlaði á okkur líklega dreif örlítið yfir startgjaldið ;-)

Reyni e.t.v. að skrifa samantektarpistil um árangur okkar fólks á mótinu en ekki víst að það náist á ferðalaginu en það kemur þá í versta falli inn um helgina.

Takk fyrir lesturinn og stuðninginn,

Ingvar Þór Jóhannesson

Aronian, Ding og Ivanchuk komnir áfram í átta manna úrslit - teflt til þrautar í fimm einvígum

Levon Aronain (2802), Ding Liren (2771) og Vassily Ivancuk (2727) eru komnir áfram í fimmtu umferð (8 manna úrslit) Heimsbikarmótsins. Ding vann landa sinn Wang Hao (2701), Aronian lagði Daniil Dubov (2666) að velli í 97 leikja skák. Mesta athygli vekur frammistaða Ivanchuk en í gær sló hann Anish Giri (2777) úr leik.  

Maxim Rhodshetein (2695) náði að jafna metin Vladimir Fedoseev (2731). Heimamaðurinn Baadur Jobava (2702) teflir vel og setti Wesley So (2792) undir pressu í báðum skákunum. 

Teflt verður til þrautar í fimm einvígunum og hefst taflmennskan kl. 11 í dag. 

Staðan

 

Ítarlega frásögn og öll úrslit má finna á Chess.com.

Myndir (Maria Emelianova - Chess.com)

• Heimasíða mótsins (Ivan Sokolov aðalskýrandi)
• Chess.com (Yasser Seirawan og fleiri) 

Íslandsmót grunnskólasveita - stúlknaflokkur - fer fram á laugardaginn - skráningarfrestur rennur út á miðnætti

Íslandsmót grunnskólasveita – stúlknaflokkur fer fram í Rimaskóla laugardaginn 16. september kl. 11.00.  Mótið miðast við skólaárið 2016-2017.

Teflt verður í þremur flokkum.

Fyrsti og annar bekkur (miðað við skólaárið 2016-2017):  Fimm umferðir með fimm mínútna umhugsunartíma.

Þriðji til fimmti bekkur (miðað við skólaárið 2016-2017):   Sex umferðir með sjö mínútna umhugsunartíma.

Sjötti til tíundi bekkur (miðað við skólaárið 2016-2017):   Sex umferðir með tíu mínútna umhugsunartíma.

Umferðafjöldi getur breyst með tilliti til fjölda þátttökuliða.

Keppendur geta teflst upp fyrir sig, þ.e. með eldri sveit síns skóla.  Í hverri sveit skulu vera fjögur borð.  Varamenn mega vera allt að þrír.

Þátttökugjald á sveit:  5000 kr.  Hámark 10.000 kr. á skóla.

Skráning fer fram á Skák.is (guli kassinn) og þurfa að berast fyrir föstudaginn 15. september.

Upplýsingar um þegar skráðar sveitir má finna hér.

Haustmót SA hefst 17. september

Í ár verður Haustmót Skákfélags Akureyrar með nýju sniði. Í fyrri hluta mótsins verða tefldar atskákir, en kappskákir í síðari hlutanum. 

Fyrri hluti, umhugsunartími 20 mín + 10 sek. á leik:

• Sunnudaginn       17. september kl. 13.00,         1-4. umferð.  
• Fimmtudaginn     21. september kl. 18.00,         5-7. umferð.

Seinni hluti, umhugsunartími 60 mín + 30 sek. á leik:

• Fimmtudaginn     28. september kl. 18.00          1. umferð.
• Sunnudaginn         1. október kl. 13.00          2. umferð.
• Sunnudaginn         8. október kl. 13.00          3. umferð.
• Fimmtudaginn     12. október kl. 18.00            4. umferð.
• Sunnudaginn       15. október kl. 13.00           5. umferð.

Röðun verður eftir svissneska kerfinu, ef fjöldi þáttakenda leyfir.

Mótshaldari áskilur sér rétt til að gera lítilsháttar breytingar á fjölda skáka þegar fjöldi þáttakenda liggur fyrir.

Leyfilegt er að sömu keppendur tefli saman BÆÐI í fyrri- og seinni hluta. 

Vinningar verða reiknaðir sem hér segir:

• Í fyrri hluta, ½ vinningur fyrir jafntefli og 1 fyrir sigur.
• Í seinni hluta, 1 vinningur fyrir jafntefli og 2 fyrir sigur.

Sá sigrar sem fær flesta vinninga skv. þessu og hlýtur hann sæmdarheitið „Meistari Skákfélags Akureyrar 2017“

Núverandi meistari er Jón Kristinn Þorgeirsson. 

Þátttökugjald er kr. 3000 fyrir félagsmenn SA, en kr. 3500 fyrir aðra.

Unglingar f. 1996 og síðar greiða kr. 1500, en þeir sem greiða æfingajald fyrir haustmisseri greiða ekkert aukalega fyrir þátttöku í haustmótinu. 

Mótið reiknast til alþjóðlegra og íslenskra skákstiga. 

Skráning með tölvupósti á netfang formanns, [e-mail] eða með skilaboðum á Facebook-síðu félagsins. Tekið verður við skráningum á skákstað til kl. 12:50 þann 17. september

Þrír vinningar í hús í dag - lokaumferðin á morgun

Þrír vinningar af sex mögulegum komu í hús í dag á EM ungmenna. Bjartur Þórisson (u8), Vignir Vatnar Stefánsson (u14) og Símon Þórhallsson (u18) unnu sínar skákir en aðrar skákir töpuðust. Fjórða umferðina í röð sem íslensku keppendurnir fá 50% vinningshlutfall eða meira. Vignir Vatnar hefur 5,5 vinninga og er aðeins vinningi á eftir efstu mönnum, Jón Kristinn Þorgeirsson (u18) og Batel Goitom Haile (u10) hafa 4,5 vinninga og Bjartur, Gunnar Erik Guðmundsson (u10) og Símon hafa 3 vinninga. 

Vignir Vatnar verður í beinni á morgun en umferðin hefst fyrr en venjulega eða kl. 10. 

Úrslit dagsins

• Chess-Results
• Beinar útsendingar (hefjast kl. 12 - 10 efstu skákir hvers flokks sýndar beint)

EM Ungmenna í Rúmeníu - Pistill #6

Sjöunda umferð á Evrópumeistaramóti ungmenna lauk í gær hér á Mamaia í Rúmeníu. Þriðju umferðina í röð var íslenski hópurin yfir 50% og munar þar mestu um Jón Kristinn og Batel sem bæði eru með 3,5 vinning úr síðustu 4 skákum. Vignir Vatnar hefði í raun einnig átt að vera í þeim hópi en komum nánar að því síðar.

Litlu munaði að við fengjum sýningarborð í dag en segja má að óheppnin hafi elt okkur, við eigum keependur á tólfta, þrettánda og fjórtánda borði en 10 efstu í hverjum flokki eru á sýningarborðum en þó aðeins 5 efstu í þeim yngstu og því Batel fjær því að vera á sýningarborði en hinir.

 

 

Yfirferð 7. umferðar:

U8

Bjartur mætti rússneskum skákmanni, Lev Abdeev og upp kom ítalskur leikur eins og við var að búast. Bjartur átti ótímabæra framrás á miðborðinu snemma sem hefði mátt undirbúa betur. Þessi framrás kostaði peðstap og í kjölfarið laskaðist kóngsstaða Bjarts. Bjartur náði þó að mynda sér mótspil og var kominn með virkar hrók og andstæðingur hans var ekki að nýta sér veikleikana á kóngsvæng.

Hér kom krítíski punkturinn í skákinni. Andstæðingur Bjarts lék hér hinum skelfilega Hf8-a8. Þrátt fyrir að hafa tekið sér tíma hér var einhvern veginn blindspot hjá Bjarti að hann gæti bara tekið á f7 og mátað í næsta leik á g7. Þess í stað lék hann Rd2 en sá strax og hann hafði leikið að hann hefði getað mátað. Þar sem Rd2 er oní geri ég ráð fyrir að bjartur hafi ætlað að leika Re3 en viljað ginna andstæðing sinn í að taka á d2 eftir að hafa snert riddarann. Rússinn sá líka mátið núna og lék ...d5 og náði að hrifsa sigurinn til sín.

Grátleg mistök en eins og bent hefur verið á þá fer þetta í reynslubankann góða. Þessi mót eru dýrmæt keppnisreynsla fyrir þessa krakka og verður að líta á sem það og jafnframt að vinna vinnu eftir mótið í að laga það sem hægt er og halda áfram að fá bætingu hjá krökkunum.

 

U10

Gunnar mætti Rúmena sem við höfðum greint sem ákveðinn system skákmann (enn á ný!) og bjuggust við 1.e4 c5 2.c4 og Botvinnik setupi. Sá rúmenski hafði teflt þetta þrisvar nýlega og því eyddum við mestum tíma í það og vorum sáttir með okkar setup á móti því. Hinsvegar kom sá rúmenski okkur á óvart og fór í London systemið. Við höfðum kíkt á það aðeins fyrr í mótinu þannig að Gunnar vissi nokkurn veginn hvað ætti að gera en fór snemma útaf planinu sem við höfðum lagt upp með þá.

Sá rúmenski fékk vænlega sókn og hefði mögulega getað fórnað riddara á g6 á einum tímapunkti fyrir myljandi sókn. Hinsvegar var kominn tími á að það dytti eitthvað fyrir Gunnar sem átti svo sannarlega inni vinninga og hann hrakti sóknartilburði Rúmenans og nýtti sína séns til fulls og mátaði hvíta kónginn. Flottur sigur hjá Gunnari sem átti hann svo sannarlega inni!

 

U10 stelpur

Batel....Batel!!! Ég er eiginlega orðlaus yfir árangri Batelar það sem af er móti. Hún er að bæta um 100 stigum við sín elóstig á mótinu og hefur unnið hvern stórsigurinn á fætur öðrum. Hún er að fá reynda keppendur frá Rússlandi, Frakklandi og í dag Tyrklandi og hræðist ekki neinn.

Í skákinni í gær beitti hún Najdorfnum en lenti í smá vandræðum snemma þar sem hún er oft aðeins of föst í því að leika ...e5 í öllum stöðum. Andstæðingur hennar nýtti sér ekki sína sénsa og Batel var kominn með biskupparið og fína stöðu þegar hún leikur af sér peði. Skákin fór í endatafl en á ótrúlegan hátt náði Batel að innbyrða vinninginn. Því miður er skákin ekki inni á vef mótsins en ég mun bæta henni við .pgn skránna sem fylgir færslunni ef að verður lagað. Því miður er innsláttur skáka mjög ábótavant í þessu móti sem er miður því það er einn mikilvægasti þáttur mótsins að mínu mati!

Eins og ég benti á á Facebook í gær þá er rússneska stelpan sem Batel rústaði í fyrstu umferð búin að vinna allar sex skákirnar síðan sem sýnir hvað hún hefur verið að fá sterka andstæðinga!

Skemmtilegt verður að fylgjast með Batel á næstu árum en hún hefur mjög athyglisverða hæfileika sem þarf að rækta.

 

U14

Vignir valdi liklega skynsamlega í byrjuninni þegar hann kom andstæðingi sínum á óvart með 3.b3 gegn ...e6 Sikileyjarvörn. Vignir hafði meira skynbragð fyrir stöðunni og splundraði gjörsamlega peðastöðu andstæðings síns og var að taka hann í nefið í pósanum þegar honum yfirsást algjör killer leikur í stöðunni. Ekki var um fljótfærni að ræða þar sem Vigni bara yfirsást leikurinn. Líklegast augnablik til að draga lærdóm af og mögulega má eitthvað bæta útreiknings-algórithmann en auðvitað lenda allir í svona augnablikum.

Í stað liðsvinnings lenti Vignir eiginlega ósanngjarnt í vörn og satt best að segja sýndi hann mikinn karakter að bjarga skákinni í jafntefli. Svekkjandi úrslit þó þar sem vinningurinn var í seilingarfjarlægð og sýningarborð en þess í stað verður að bíða eftir síðasta séns á sýningarborðunum.

 

U18

Símon (vinstra megin á myndinni að gefa sig á tal við andstæðing Jokkó) lenti í sterkum andstæðingi þrátt fyrir tap í umferðinni áður. Símon beitti Katalan en andstæðingur hans virtist hafa allt á hreinu og beitti lokuðum Katalan og drap ekki á e4 eftir klassíska framrás hvíts þar. Eftir e5 framrás hvíts virtist svartur hafa allt á hreinu um hvernig sæki ætti fram á drottningarvæng á meðan að sókn Símons á kóngsvæng átti litla von. Góð skák hjá svörtum og að mörgu leiti lærdómsrík. Skákin er ekki í .pgn skrá á heimasíðu mótsins.

Jokkó tefldi lengstu skák dagsins í hópnum. Hann beitti Torre árás með 1.d4 2.Rf3 og 3.Bg5. Upp kom þungt miðtafl með tilfæringum og sannkölluðu dýnamísku jafnvægi. Jokkó átti séns á betra tafli en tók ekki sénsinn sinn og þess í stað var komið endatafl, líklega fræðilega örlítið betra á svart en jafntefli nánast öruggt. Jokkó bauð í raun jafntefli en andstæðingur hans hafnaði því og endaði á að sprengja sig.

Enn eina ferðina eru mótshaldarar ekki að standa sig með að slá inn skákir. Aðeins 200 skákir eru í .pgn skrá 7. umferðar en ætla má að í heildina eigi að vera um 500 skákir allavega.

Við fórum yfir skákina í gær og krítíska staðan er ca. hér að ofan. Ravi Hari með svart lék hér ...f4 og eftir gxf4-g4 þá lék Jokkó f5+ og svo e6 og tók frumkvæðið. Ég man ekki nákvæmlega stöðu hrókanna og kónganna en peðastaðan er rétt. Líklega var svarti hrókurinn ekki á 8. reitarröð (mögulega b3) og þurfti að eyða leik í að bakka sem mér finnst líklegast. Allavega tók Jokkó frumkvæðið þarna og í framhaldinu kom svo c4 og tvöfaldir frelsingjar eftir d5. Flottur baráttusigur í langri skák sem gefur Jokkó fína möguleika á góðu sæti.

Sigur í umferð dagsins myndi pottþétt færa Jokkó upp á sýningarborð. Rétt er einnig að óska honum Jóni Kristni til hamingju með FIDE-meistaratitilinn en sigurinn í gær færði hann yfir 2300 stigin þar sem hann á klárlega heima.

Símon fær skottu í umferð dagsins sem eru vonbrigði en nú er bara að klára síðustu umferðina með stæl hjá Símoni!

 

 

Annars er lífið að róast heldur mikið hér á Mamaia. Greinilegt er að mótið er svona síðasti snúningur á þessu ferðamannatímabili og búið er að loka í tívolíinu og billiardbarinn sem við höfum farið á mikið á kvöldin virðist vera að loka en þeir voru að taka saman stóla fyrir utan í gær.

Ég tók einn snúning á "hinni" körfuboltavélinni í gær og jú ég bætti mitt persónulega met en verð að játa mig sigraðan og Símon er körfuboltameistarinn í þessari ferð. Ég fæ víst ekki annan séns þar sem billiardbarinn er að loka :-(

Látum þetta gott heita að sinni...

 

bestu kveðjur,

Ingvar Þór Jóhannesson

Veljið skák (2 alls): 1: Thorisson, Bjartur - Abdeev, Lev 2: Revnik, Andrei-Radu - Gudmundsson, Gunnar Erik

[Event "EYCC Mamaia"] [Site "?"] [Date "2017.09.12"] [Round "7"] [White "Thorisson, Bjartur"] [Black "Abdeev, Lev"] [Result "0-1"] [ECO "C54"] [PlyCount "66"] 1. e4 e5 2. Nf3 Nc6 3. Bc4 Bc5 4. O-O Nf6 5. d3 h6 6. Be3 d6 7. c3 O-O 8. d4 Bb6 9. Nbd2 Bg4 10. Re1 exd4 11. cxd4 Nxd4 12. Bxd4 Bxd4 13. Nf1 Bxb2 14. Rb1 Be5 15. Rxb7 Qc8 16. Ba6 Qd8 17. Qc2 Bxf3 18. gxf3 c5 19. Rd1 Qa5 20. Qc4 Rab8 21. Rdb1 Rxb7 22. Rxb7 Ra8 23. Nd2 d5 24. Qd3 c4 25. Nxc4 Qxa6 26. Re7 Qxc4 27. Qxc4 dxc4 28. Rxe5 Rc8 29. Rb5 c3 30. Rb1 c2 31. Rc1 Nh5 32. Kf1 Nf4 33. Ke1 Nd3+ 0-1

[Event "?"] [Site "?"] [Date "2017.09.12"] [Round "7"] [White "Revnik, Andrei-Radu"] [Black "Gudmundsson, Gunnar Erik"] [Result "0-1"] [ECO "D02"] [PlyCount "58"] 1. d4 Nf6 2. Nf3 g6 3. Bf4 Bg7 4. e3 O-O 5. Nbd2 d5 6. h3 Nc6 7. Be2 a6 8. Ne5 Nxe5 9. Bxe5 b6 10. g4 e6 11. h4 Ne8 12. Bxg7 Nxg7 13. f4 Bb7 14. h5 Qd7 15. c4 dxc4 16. Rh2 b5 17. Nf3 Qd6 18. Ne5 f6 19. Nf3 g5 20. fxg5 Bxf3 21. Rh3 Bxe2 22. Qxe2 Qb4+ 23. Kd1 fxg5 24. h6 Ne8 25. Qc2 Rf1+ 26. Ke2 Rxa1 27. Qe4 Qxb2+ 28. Kf3 Rf1+ 29. Kg3 Qf2# 0-1