Hlemmur Square - mót nr. 2 haldið á sunnudaginn

Hlemmur Square mun í samstarfi við Vinaskákfélagið halda hraðskákmót á Hlemmur Square sunnudaginn, 24. september, klukkan átta.

Þetta er annað skákmótið í seríu mánaðarlegra móta þar sem teflt er í rúmgóðum heimkynnum veitingastaðar hótelsins, Pylsa/Pulsa Restaurant. Síðasta mótið lukkaðist vel en þar fór Ingvar Þór Jóhannesson með sigur af hólmi með fullt hús vinninga. .

Tefldar verða 8 umferðir með 4+2 mínútna umhugsunartíma. Skákstjóri og dómari er Hörður Jónasson frá Vinaskákfélaginu.

Þátttaka er ókeypis á mótið en Hlemmur Square gefur gjafabréf fyrir efstu þrjú sætin auk þess sem medalía verður veitt fyrir vinningshafann.

1. verðlaun: Gjafabréf á Pylsa/Pulsa Restaurant / bar fyrir 7.000 kr. +medalía
2. verðlaun: Gjafabréf á Pylsa/Pulsa Restaurant / bar fyrir 5.000 kr.
3. verðlaun: Gjafabréf á Pylsa/Pulsa Restaurant / bar fyrir 3.000 kr.

Gleðistundarverðlag á kranaveigum fyrir þátttakendur mótsins, ef þörf skyldi krefja í þeim annars harða skóla sem skákin er!

Gert er ráð fyrir því að skákmótið taki innan við þrjár klukkustundir.

Hægt er að skrá sig í gegnum skak.is á gula kassann, en einnig á staðnum.

Upplýsingar um þegar skráða keppendur má finna hér: https://docs.google.com/spreadsheets/d/1vhVGHktFHzq4809Bf6k2JnrLRscFGaLdnwWv0K5lQz0/

Haustmót TR: Stórmeistarinn hrifsar forystuna

Sjötta umferð Haustmót Taflélags Reykjavíkur fór fram í dag og var hart barist. Á efsta borði mætti hinn særði Hjörvar Steinn Grétarsson hinum úthvílda Einari

Hjalta Jenssyni. Samkvæmt heimasíðu TR var skákin tvísýn og börðust keppendur allt til loka. Að endingu hafði Hjörvar Steinn sigur og tók þar með forystuna í mótinu.

Á öðru borði gerðu Jóhann H. Ragnarsson og Oliver Aron jafntefli og á þriðja borði hafði Magnús Pálmi betur gegn Páli Snædal Andrasyni.

Óvæntustu úrslit umferðarinnar voru svo sigur Kristjáns Dags Jónssonar á Herði Aroni Haukssyni. Á þeim munar um 600 skákstigum og því glæsilega að verki staðið hjá hinum unga skákmanni.

Eins og áður segir er Hjörvar Steinn efstur með 5 vinninga en í humátt á eftir honum eru Jóhann H. Ragnarsson, Magnús Pálmi Örnólfsson og Oliver Aron með 4,5 vinninga. Sjöunda umferð mótsins fer fram á miðvikudagskvöldið 20.september kl.19.30. Þá mætast:

Oliver Aron - Hjörvar Steinn

Magnús Pálmi - Jóhann

Einar Hjalti - Kristján Örn

Loftur - Þorvarður Fannar.

Úrslit á Chess-results.com

Heimasíða mótsins

Heimsbikarmótið: Vachier-Lagrave sló Svidler úr leik

Franski ofurstórmeistarinn Maxime Vachier-Lagrave var rétt í þessu að slá kollega sinn, Rússann Peter Svidler úr leik í 8-manna úrslitum Heimsbikarmótsins í Tíblísi. Vachier-Lagrave hefur reynst rússneskum skákmönnum erfiður ljár í þúfu í mótinu því auk Svidlers þá hefur hann slegið Alexander Grischuk og Boris Grachev úr mótinu.

Vachier-Lagrave er eflaust himinlifandi með þennan sigur því Peter Svidler hefur náð frábærum árangri í heimsbikarmótum í gegnum tíðina. Hann varð heimsbikarmeistari árið 2011 og komst í úrslit mótsins árið 2015. Þar varð hann að lúta í gras gegn Sergey Karjakin eftir harða keppni.

Í dag mætti Svidler hinsvegar ofjarli sínum í Vachier-Lagrave sem náði að knýja fram sigur í atskákshluta bráðabanans. Frakkinn stýrði hvítu mönnunum í fyrri skákinni og hafði alltaf undirtökin í flókinni stöðu. Hann komst út í endatafl, peði yfir, en Svidler varðist afar vel og hélt jöfnu.

Í síðari skákinni endurtóku kapparnir sérstakt afbrigði í Enska leiknum þar sem kóngsriddari svarts stekkur sem óður maður um borðið, í sjö af fyrstu níu leikjum afbrigðisins er riddaranum leikið. Vachier-Lagrave hafði greinilega unnið heimavinnuna sína betur því hann jafnaði taflið auðveldlega og hrisaði síðan til sín frumkvæðið. Það lét hann aldrei af hendi og vann öruggan sigur.

Þar með er ljóst að Vachier-Lagrave mun mæta armenska stórmeistaranum Levon Aronian í undanúrslitum mótsins. Hitt einvígið verður milli Bandaríkjamannsins Wesley So og Kínverjans Ding Liren.

Mikið er í húfi því þeir tveir skákmenn sem komast í úrslit mótsins tryggja sér sæti í næsta kandídatamóti þar sem átta skákmenn munu tefla um réttinn til þess að skora á Magnus Carlsen í einvígi um heimsmeistaratitilinn.

Heimasíða mótsins

Skákirnar í beinni

 

Annað mótið í Bikarsyrpu TR hefst 29.september

Annað mót Bikarsyrpunnar hefst föstudaginn 29. september og stendur til sunnudagsins 1. október. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 29. september kl. 17.30 (fös)
2. umferð: 30. september kl. 10.00 (lau)
3. umferð: 30. september kl. 13.00 (lau)
4. umferð: 30. september kl. 16.00 (lau)
5. umferð: 01. október kl. 10.00 (sun)
6. umferð: 01. október kl. 13.00 (sun)
7. umferð: 01. október kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Nánari upplýsingar: http://taflfelag.is/bikarsyrpa-tr-heldur-afram-fostudaginn-29-september/

Skráðir keppendur: https://docs.google.com/spreadsheets/d/1WeidUjiUR3feCyQidQrdHVmTMqlXnbHb2oBlyG4XVa8/edit?usp=sharing

Heimsbikarmótið: Aronian, Ding og So komnir í undanúrslit

Seinni skákir í 8-manna úrslitum Heimsbíkarmótsins í Tíblísi fóru fram í dag. Eftir byltur dagsins er aðeins ein viðureign sem fer í bráðabana á morgun. Það er einvígi Peter Svidler gegn Maxime Vachier-Lagrave. Þeir tefldu athyglisverða skák í ítölskum leik og sömdu síðan jafntefli í afar tvísýnni stöðu. Líklega er Svidler með aðeins betra tafl og ekki er ólíklega að hann muni sjá eftir því að hafa slíðrað sverðin. Þeir félagarnir tefla bráðabanann á morgun.

Það vakti mikla athygli í fyrri umferðinni þegar ungverski stórmeistarinn Richard Rapport sættist á skiptan hlut eftir aðeins 11.leiki gegn kínverska stórmeistaranum Ding Liren. Sá ungverski hefur mögulega ætlað að freista þess að komast í bráðabana en Ding var ekki á þeim buxunum. Hann tefldi frábæra skák í dag og hafði verðskuldaðan sigur í 41.leik. Þar með sló hann ungverska undrabarnið úr keppni.

 

Úkraínska ólíkindatólið, Vassily Ivanchuk, var með bakið upp að vegg eftir skelfilega tap í fyrri skákinni gegn Aronian. Ivanchuk komst ekkert áfram gegn armenanum og mátti sætta sig við jafntefli í 71.leik. Þar með sló Aronian Ivanchuk út úr mótinu.

Lengsta skák mótsins var viðureign Bandaríkjamannsins Wesley So og Rússans Vladimir Fedoseev. So verður seint sakaður um að hafa líflegan stíl en hann teflir afar vel og á löngum töflum er stíllinn ekki ósvipaður stíl Anatolí Karpovs. Heimsmeistarainn fyrrverandi hefði að minnsa kosti verið fullsæmdur af skák dagsins þar sem So fékk örlitla yfirburði snemma tafls og kreisti síðan drulluna úr andstæðingnum á lærdómsríkan hátt.

Eins og áður segir munu Svidler og Vachier-Lagrave tefla bráðabana á morgun. Sigurvegari þeirrar byltu mun mæta Levon Aronian í undanúrslitum. Í hinni viðureign undanúrslitanna munu Ding Liren og Wesley So mætast. Spennan verður griðarlega um helgina!

Heimasíða mótsins

 

 

 

 

Skákþáttur Morgunblaðsins: Tefla 10 ára gamlar íslenskar stúlkur svona vel?

Það er hugsanlegt að rússneska stúlkan Galina Mikheeva – og trúlega þjálfari hennar líka – hafi velt fyrir sér spurningunni sem varpað er hér fram að lokinni skák sem sú rússneska tefldi við fulltrúa Íslands á Evrópumóti ungmenna í flokki stúlkna 10 ára og yngri, Haile Batel Goitom. Evrópumótið fer fram þessa dagana í Ramaia í Rúmeníu og Galina Mikheeva er skráð til leiks 350 elo-stigum hærri en Batel og er þriðja stigahæsta stúlkan í flokknum. Batel varð 10 ára þann 14. ágúst sl. og taflmennska hennar er án efa er einhver sú besta og kraftmesta sem sést hefur frá barni á þessum aldri. Hún flutti hingað til Íslands frá Eþíópíu árið 2009 en á ættir að rekja til nágrannaríkisins Erítreu. Hún hefur vakið athygli í skáklífinu fyrir skemmtileg tilþrif og mikið keppnisskap og er glæsilegur fultrúi Íslands á mótinu:

EM ungmenna; 1. umferð:

Galina Mikheeva (Rússland) – Haile Batel Goitom

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 a6

Najdorf-afbrigði sikileyjarvarnarinnar var skoðað sérstaklega í undirbúningi fyrir mótið.

6. Rb3 e5 7. Bg5 Rbd7 8. Rd5 Hb8 9. Dd3 h6 10. Bxf6 Rxf6 11. Rxf6+ Dxf6 12. O-O-O?

Það er hugsanlegt að hvítur hafi leikið af sér peðinu. Hafi þetta átt að vera fórn verður ekki séð að hvítur hafi miklar bætur.

12. ... Dxf2 13. Hd2 Db6 14. g3 Be7 15. Kb1 Be6 16. h4 Hc8 17. Bh3 O-O 18. Df3 a5!

Og er hér mættur „sendiboði eyðileggingarinnar“, svo maður noti hugtak fengið frá Friðriki Ólafssyni. Þetta peð á eftir að gera mikinn usla í herbúðum þeirrar rússnesku.

19. Hdd1 a4 20. Rd2

20. ... Bxa2+!

Glæsilega leikið. Ef 21. Kxa2 þá kemur 21. ... Hxc2 22. Da3 d5! og vinnur.

21. Kc1 Be6

Biskupinn snýr aftur og býður uppskipti á eigin forsendum!

22. Bxe6 fxe6 23. Da3 Dc6 24. Dd3 d5 25. exd5 exd5 26. Rb1 Hf2 27. c3 a3 28. bxa3

28. ... Bxa3+!

Nú lætur Batel hinn biskupinn af hendi en vinnur hann fljótlega aftur.

29. Rxa3 Dxc3+ 30. Dxc3 Hxc3+ 31. Kb1 Hb3+!

Nákvæmur þessi leikur. Eftir 32. Kc1 Hxa3 hótar svartur máti á a1.

32. Ka1 Hxa3+ 33. Kb1 d4 34. Hhe1 Ha5 35. Hd3 Hc5 36. Hb3 b5 37. Hc1 Hd5 38. Ha3 d3 39. Hd1 d2 40. Kc2 e4 41. He3 Hc5+ 42. Kb2 Hc4 43. Hb3 b4 44. He3 h5!

(Notar peðin af miklu listfengi. Hvítur er í leikþröng.)

45. Hb3 He2 46. Ka2 Hc1 47. Hb1 Hxd1 48. Hxd1 e3 49. Kb2 He1 49. Kc2 b3+!

– og hvítur gafst upp. Snarplega teflt.

Sex íslenskir krakkar taka þátt í mótinu en aldursflokkarnir eru 12 samtals hjá báðum kynjum; í aldursröð: Jón Kristinn Þorgeirsson, Símon Þórhallsson, Vignir Vatnar Stefánsson, Gunnar Erik Guðmundsson, Batel og Bjartur Benediktsson. 

Magnús Carlsen á sigurbraut í Tiblisi

Jóhann Hjartarson féll úr keppni í 1. umferð heimsbikarmótsins sem nú stendur yfir í Tiblisi í Georgíu. Hann tapaði báðum skákunum fyrir Tékkanum David Navara eftir að fengið slæmar stöður eftir byrjun beggja viðureigna. 128 skákmenn hófu keppni og ýmsir nafntogaðir stórmeistarar eru fallnir úr leik t.d. Wisvanathan Anand og Sergei Karjakin. Magnús Carlsen hefur unnið bæði einvígi sín 2:0, síðast Alexei Dreev, en meðal þeirra sem sl. fimmtudag tryggðu sér áframhaldandi keppnisrétt í 3. umferð eru Vachier-Lagrave, og Vladimir Kramnik.

 

 

Helgi Ólafsson [e-mail]

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 9. september 2017

Skákþættir Morgunblaðsins

Íslandsmót grunnskólasveita 2017 - stúlknaflokkur - Rimaskóli, Háteigsskóli og Álfhólsskóli Íslandsmeistarar

Íslandsmót grunnskólasveita – stúlknaflokkur, fyrir skólaárið 2016-2017, fór fram í Rimaskóla laugardaginn 16. september. Teflt var í þremur flokkum, flokki 1.-2. bekkjar, flokki 3.-5. bekkjar og flokki 6.-10. bekkjar.

Í yngsta flokknum, flokki 1.-2. bekkjar voru þrjár sveitir skráðar til leiks. Tefld var tvöföld umferð með 5 mínútna umhugsunartíma á skák. Skáksveit Álfhólsskóla í Kópavogi sýndi mátt sinn og sigraði af miklu öryggi með 15 vinninga af 16 mögulegum.

Lokastaðan

1. Álfhólsskóli 15 v.

2. Salaskóli 8 v.

3. Háteigsskóli 1 v.

Lokastaðan í flokki 1.-2. bekkjar á Chess-results

Sveit slandsmeistaranna í Álfhólsskóla í flokki 1. og 2. bekkjar skipuðu Sól Lilja Sigurðardóttir, Tinna Alexía Harðardóttir, Arna Kristín Arnarsdóttir og Júlía Húnadóttir. Liðsstjóri var Lenka Ptacnikova.

Í flokki 3.-5. bekkjar tóku sex sveitir þátt. Teflt var allir við alla með 7 mínútna umhugsunartíma á skák. Gríðarlega mikil spenna var í flokknum og réðust úrslitin í lokaskákunum. Skáksveit Háteigsskóla sigraði með 16,5 vinninga en skammt á hæla þeirra voru Salaskóli með 15,5 vinninga og Grunnskóli Grindavíkur með 15 vinninga. Þessar sveitir báru af í flokknum.

Lokastaðan

1. Háteigsskóli 16,5 v.

2. Salaskóli 15,5 v.

3. Grunnskóli Grindavíkur 15 v.

Lokastaðan í flokki 3.-5. bekkjar á Chess-results

Sveit Íslandsmeistaranna í Háteigsskóla í flokki 3.-5. bekkjar skipuðu Soffia Arndis, Anna Katarina, Ásthildur, Karen Ólöf og Katrín Anna. Liðsstjóri var Lenka Ptacnikova.

Í elsta flokknum, flokki 6.-10. bekkjar voru fimm sveitir skráðar til leiks. Teflt var allir við alla með 10 mínútna umhugsunartíma á skák. A-sveit Rimaskóla og skáksveit Salaskóla börðust af mikilli hörku um efstu tvö sætin en sveit Foldaskóla kom á hæla þeirra. Úrslitin réðust í lokaumferðinni þegar Rimskóli sigraði Landakotsskóla með fullu húsi og skaust upp fyrir Salaskóla af vinningum. Sigur Rimaskóla á mótinu er sá sjöundi í röð en skólinn hefur unnið mótið ár hvert frá árinu 2011!

1. Rimaskóli a-sveit 12 v.

2. Salaskóli 11,5 v.

3. Foldaskóli 9,5 v.

Lokastaðan í flokki 6.-10. bekkjar á Chess-results

Sveit Íslandsmeistaranna í Rimaskóla í flokki 6.-10. bekkjar skipuðu Nansý Davíðsdóttir, Embla Jóhannesdóttir, Valgerður Jóhannesdóttir og Sara Sólveig Lis. Liðsstjóri var Helgi Árnason og Björn Ívar Karlsson þjálfari.

Um skákstjórn í mótinu sáu Ingibjörg Edda Birgisdóttir og Kristján Örn Elíasson.

Mikil spenna á Haustmótinu - Fjórir efstir

Fjórir skákmenn eru efstir og jafnir á Haustmóti Reykjavíkur eftir fimm umferðir. Það eru þeir Hjörvar Steinn Grétarsson, Einar Hjalti Jensson, Oliver Aron Jóhannesson og Jóhann H. Ragnarsson. Boðið var upp á fullkomið blóðbað í fimmtu umferð mótsins sem fór fram í gær.

Á fyrsta borði mátti annar forystusauður mótsins, Magnús Pálmi Örnólfsson lúta í gras gegn Oliver Aroni. Á öðru borði komst síðan stórmeistarinn Hjörvar Steinn aftur á beinu brautina með sigri gegn Björgvini Víglundssyni. Á þriðja borði hafði síðan Jóhann betur gegn Þorvarði Fannari og komst þar með í hóp þeirra efstu.

 

Einar Hjalti hefur farið aðra leið en hann vann fyrstu þrjár skákir mótsins en tók síðan tvær hjásetur (bye) í röð. Hann hefur því verið „slaggur, að njódda og liffa“ á meðan aðrir keppendur hafa barist á banaspjótum.

 

Nánast engin óvænt úrslit áttu sér stað í fimmtu umferð en til marks um spennuna í mótinu þá eru fjórir skákmenn með 3,5 vinninga og narta í hæla fjórmenninganna. Það eru áðurnefndur Magnús Pálmi, Páll Andrason, Loftur Baldvinsson og Jón Úlfljótsson.

 

Sjötta umferð mótsins fer fram á morgun, sunnudag, kl.13.00:

Þá mætast á efstu borðum eftirfarandi skákmenn:

Hjörvar Steinn - Einar Hjalti

Jóhann - Oliver Aron

Páll - Magnús Pálmi

Þorvarður - Jón

Hér má nálgast nánari upplýsingar um úrslit 5.umferðar

Heimasíða TR

Haustmót SA hefst á morgun

Í ár verður Haustmót Skákfélags Akureyrar með nýju sniði. Í fyrri hluta mótsins verða tefldar atskákir, en kappskákir í síðari hlutanum. 

Fyrri hluti, umhugsunartími 20 mín + 10 sek. á leik:

• Sunnudaginn       17. september kl. 13.00,         1-4. umferð.  
• Fimmtudaginn     21. september kl. 18.00,         5-7. umferð.

Seinni hluti, umhugsunartími 60 mín + 30 sek. á leik:

• Fimmtudaginn     28. september kl. 18.00          1. umferð.
• Sunnudaginn         1. október kl. 13.00          2. umferð.
• Sunnudaginn         8. október kl. 13.00          3. umferð.
• Fimmtudaginn     12. október kl. 18.00            4. umferð.
• Sunnudaginn       15. október kl. 13.00           5. umferð.

Röðun verður eftir svissneska kerfinu, ef fjöldi þáttakenda leyfir.

Mótshaldari áskilur sér rétt til að gera lítilsháttar breytingar á fjölda skáka þegar fjöldi þáttakenda liggur fyrir.

Leyfilegt er að sömu keppendur tefli saman BÆÐI í fyrri- og seinni hluta. 

Vinningar verða reiknaðir sem hér segir:

• Í fyrri hluta, ½ vinningur fyrir jafntefli og 1 fyrir sigur.
• Í seinni hluta, 1 vinningur fyrir jafntefli og 2 fyrir sigur.

Sá sigrar sem fær flesta vinninga skv. þessu og hlýtur hann sæmdarheitið „Meistari Skákfélags Akureyrar 2017“

Núverandi meistari er Jón Kristinn Þorgeirsson. 

Þátttökugjald er kr. 3000 fyrir félagsmenn SA, en kr. 3500 fyrir aðra.

Unglingar f. 1996 og síðar greiða kr. 1500, en þeir sem greiða æfingajald fyrir haustmisseri greiða ekkert aukalega fyrir þátttöku í haustmótinu. 

Mótið reiknast til alþjóðlegra og íslenskra skákstiga. 

Skráning með tölvupósti á netfang formanns, [e-mail] eða með skilaboðum á Facebook-síðu félagsins. Tekið verður við skráningum á skákstað til kl. 12:50 þann 17. september

Heimsbikarmót: Aronian tók forystuna gegn Ivanchuk

Átta manna úrslit Heimsbikarmótsins í Tíblisi í Georgíu hófust í dag þegar fyrri skákir einvíganna fór fram. Dagurinn var frekar tíðindalítill ef undan er skilin skák armenska stórmeistarans Levon Aronian og úkraínska snillingsins Vassily Ivanchuk. 

 

Ivanchuk hafði teflt frábærlega í mótinu fram að viðureign dagsins en hann hafði slegið út ofurstórmeistarana Vladimir Kramnik og Anish Giri í síðustu umferðum. Sá úkraínski er þekktur fyrir afar sveiflukennda taflmennsku og skák dagsins var einn af hans verri. Ivanchuk gerði mistök snemma tafls sem varð til þess að hann eyddi 42 mínútum í sinn 10.leik. Ekki hjálpaði það til og að endingu þurfti hann að gefast upp eftir 24.leiki. 

Aronian leiðir því 1-0 og verður að teljast til alls líklegur í mótinu.

Hinar þrjár viðureignir dagsins voru afar litlausar og slíðruðu stórmeistararnir sverðin snemma. Eina undantekningin var skák Svidler gegn Vachier-Lagrave þar sem sá franski var undir smávægilegri pressu alla skákina. Hann leysti þó vandamálin auðveldlega og hélt jöfnu.

Úrslit dagsins:

Levon Aronian (Armeníu) - Vassily Ivanchuk (Úkraínu): Aronian vann í 24.leikjum

Vladimir Fedeev (Rússlandi) - Wesley So (Bandaríkjunum) : Jafntefli eftir 19.leiki

Richard Rapport (Ungverjalandi) - Ding Liren (Kína) : Jafntefli eftir 11.leiki

Peter Svidler (Rússlandi) - Maxime Vachier-Lagrave (Frakklandi) : Jafntefli eftir 41.leik. 

 

Síðari skákir einvígjanna fara fram á morgun kl.11 og má búast við mikilli spennu.

Ítarlega frásögn frá viðureign dagsins má lesa á Chess.com.

Mynd (Maria Emelianova - Chess.com)

Beinar útsendingar á heimasíðu mótsins