Héraðsmót HSÞ fer fram á sunnudaginn

Héraðsmót HSÞ í skák í flokki fullorðina verður haldið sunnudaginn 24. september kl 14:00  í Framsýnarsalnum að Garðarsbraut 26 á Húsavík.

Tefldar verða 7 umferðir eftir monradkerfi og verður umhugsunartíminn 10 mín á mann að viðbættum 5 sek á hvern leik.

Þátttökugjald er 500 kr á keppanda og er mótið opið fyrir alla áhugasama.
Börnum og unglingum 16 ára og yngri er heimil ókeypis þátttaka í mótinu.
(Héraðsmót HSÞ fyrir 16 ára og yngri verður haldið í nóvember)

Mótið verður reiknað til FIDE atskákstiga.

Verðlaun verða veitt fyrir þrjú efstu sætin og veittur verður farandbikar að auki fyrir sigurvegarann.

Smellið hér til að skrá ykkur í mótið.

Athugið að þetta er nýtt skráningarkerfi og nýtt mótskerfi sem við erum að prófa.

• Þið þurfið að smella á SIGN IN takkann og búa ykkur til notandanafn og lykilorð. (Þetta þarf bara að gera einu sinni)
• Þegar það er búið eru þið sjálfkrafa skráðir í mótið.
• Kerfið sækir sjálfkrafa allar upplýsingar sem til eru um ykkur hjá FIDE (eins og td. skákstig)
• Þið getið svo smellt á lista yfir skráða keppendur (Signed players) til að sjá útkomuna. Athugið að það getur tekið nokkrar mínútur fyrir skráninguna að birtast í listanum.

Forskráningu lýkur kl 13:30 á mótsdegi, en mögulegt verður að skrá sig til leiks á mótsstað.

Listi yfir skráða keppendur

Heimsbikarmótið: Bráðabanar framundan

Undanúrslit Heimsbikarmótsins í Tíblísi ráðast í bráðbana á morgun, miðvikudag. Viðureignir dagsins enduðu báðar með jafntefli og því var ljóst að bæði einvígin, milli Aronian og Vachier-Lagrave annarsvegar og hinsvegar Ding Liren og Wesley So, enduðu 1-1.

Aronian og Vachier-Lagrave virtust báðir mjög sáttir við að rugga ekki bátnum og halda í styttri skákirnar. Þeir úðuðu út leiðindarvaríanti í spænska leiknum og sömdu svo jafntefli eftir aðeins 19.leiki.

Annað gilti um Ding Liren sem reyndi til hins ítrasta að knésetja Wesley So og tryggja sér sæti í úrslitum mótsins. Kínverjinn fékk heldur þægilegra tafl og reyndi að setja pressu á Bandaríkjamanninn. So var hinsvegar vandanum vaxinn, nú sem endranær, og hélt auðveldlega jafntefli. Um það var þó ekki samið fyrr en aðeins kóngar kappanna stóðu eftir.

Bráðabanarnir fara fram á morgun, fimmtudaginn 21.september, og hefst taflmennskan kl.11.00 á íslenskum tíma.

(Mynd: Chess.com/Maria Emelianova)

Heimasíða mótsins

Beinar útsendingar Chess24

Hraðskáksmót Taflfélags Reykjavíkur hefst í kvöld

Hraðskákmót Taflfélags Reykjavíkur fer fram í kvöld,  miðvikudaginn 27. september kl. 19:30. og fer mótið fram í húsnæði félagsins að Faxafeni 12. Tefldar verða 11 umferðir eftir svissnesku kerfi og er umhugsunartíminn 4 mínútur auk þess sem 2 sekúndur bætast við eftir hvern leik (4+2). Mótið verður reiknað til alþjóðlegra hraðskákstiga.

Þátttökugjald er kr. 1.000 fyrir 18 ára og eldri, en kr. 500 fyrir 17 ára og yngri. Félagsmenn TR sem eru 17 ára og yngri fá frítt í mótið. Verðlaun verða veitt fyrir þrjú efstu sætin. Auk þess verður krýndur Hraðskákmeistari Taflfélags Reykjavíkur. Þátttakendur eru beðnir um að skrá sig í forminu hér að neðan.

Að loknu hraðskákmótinu fer fram verðlaunaafhending fyrir Haustmót Taflfélags Reykjavíkur.

Skráning í mótið

Hlemmur Square mót nr. 2 fer fram á sunnudagskvöldið

Hlemmur Square mun í samstarfi við Vinaskákfélagið halda hraðskákmót á Hlemmur Square sunnudaginn, 24. september, klukkan átta.

Þetta er annað skákmótið í seríu mánaðarlegra móta þar sem teflt er í rúmgóðum heimkynnum veitingastaðar hótelsins, Pylsa/Pulsa Restaurant. Síðasta mótið lukkaðist vel en þar fór Ingvar Þór Jóhannesson með sigur af hólmi með fullt hús vinninga. .

Tefldar verða 8 umferðir með 4+2 mínútna umhugsunartíma. Skákstjóri og dómari er Hörður Jónasson frá Vinaskákfélaginu.

Þátttaka er ókeypis á mótið en Hlemmur Square gefur gjafabréf fyrir efstu þrjú sætin auk þess sem medalía verður veitt fyrir vinningshafann.

1. verðlaun: Gjafabréf á Pylsa/Pulsa Restaurant / bar fyrir 7.000 kr. +medalía
2. verðlaun: Gjafabréf á Pylsa/Pulsa Restaurant / bar fyrir 5.000 kr.
3. verðlaun: Gjafabréf á Pylsa/Pulsa Restaurant / bar fyrir 3.000 kr.

Gleðistundarverðlag á kranaveigum fyrir þátttakendur mótsins, ef þörf skyldi krefja í þeim annars harða skóla sem skákin er!

Gert er ráð fyrir því að skákmótið taki innan við þrjár klukkustundir.

Hægt er að skrá sig í gegnum skak.is á gula kassann, en einnig á staðnum.

Upplýsingar um þegar skráða keppendur má finna hér: https://docs.google.com/spreadsheets/d/1vhVGHktFHzq4809Bf6k2JnrLRscFGaLdnwWv0K5lQz0/

Haustmót SA: Jón Kristinn efstur í hálfleik

EM-farinn Jón Kristinn Þorgeirsson trónir á toppnum eftir fjórar umferðir í Haustmóti SA. Sá eini sem náði af honum punkti var ferðafélagi hans, Símon Þórhallsson. Í 2-3.sæti eru þeir Smári Ólafsson og Sigurður Arnarson en þeir hafa báðir mátt lúta í gras gegn Jóni Kristni.

Í 5.umferð mætast:

Jón Kristinn (3,5) - Haraldur Haraldsson (2)

Smári Ólafsson (3) - Sigurður Arnarson (3)

Sigurður Eiríksson (2) - Símon Þórhallsson (2,5)

Áskell Örn Kárason (1,5) - Ulker Gasanova (1,5)

Arnar Smári Signýjarson (1,5) - Eymundur Eymundsson (1)

Ólafur Kristjánsson situr hjá.

Alls verða tefldar sjö umferðir á mótinu og er teflt með atskákstímamörkun. Mótið klárast sunnudaginn 24.september næstkomandi.

Staðan á Chess-results

 

Taflfélag Bolungarvíkur og Skákdeild Breiðabliks sameinast

Taflfélag Bolungarvíkur og Skákdeild Breiðabliks hafa ákveðið að sameinast undir nafninu “Skákdeild Breiðabliks og Bolungarvíkur.

Í fréttatilkynningu frá forsvarsmönnum félaganna er farið yfir sögu félaganna. Þar kemur fram að Taflfélag Bolungarvíkur eigi sér langa sögu og sé meðal annars fjórfaldur Íslandsmeistari skákfélaga (2009-2012).  Í dag sé aðalstarfsemi félagsins þátttaka sveitar í 1.deild Íslandsmóts skákfélaga með Norðurlandameistarann Jóhann Hjartarson og fyrrverandi heimsmeistara sveina Jón L Árnason í broddi fylkingar.

Skákdeildar Breiðabliks er þriggja ára og rekur öflugt barna og unglingastarf í Stúkunni við Kópavogsvöll. Skákdeildin stendur fyrir ýmsum mótum t.d. Gestamótinu og Elítukvöldunum í samvinnu við Taflfélagið Huginn og skólamót Kópavogs í samvinnu við skákkennara í Kópavogi. Breiðablik er með tvær sveitir í ÍS, önnur í þriðju deild og hin í þeirri fjórðu.

Tilgangur sameiningarinnar er að auka breidd, styrk, nýliðun og fjölbreytileika beggja aðila í nýju og spennandi samstarfi.

Sérkenni hvers aðila mun haldast og það góða starf sem bæði félögin standa fyrir.

Nýtt félag mun senda sameiginlegt lið í Íslandsmót skákfélaga og stefnt er að því að fjölga sveitum þess í fjórar á næstu árum.

Það er sýn beggja aðila að hið nýja félag verði spennandi vettvangur fyrir gróskumikið starf þar sem reynsla og æska koma saman.

Heimsbikarmótið: Friðsæld í fyrstu umferð

Undanúrslit Heimsbikarmótsins í Tíblísi hófust í dag með pompi og prakt. Þar mætast annarsvegar Levon Aronian (Armenía) og Maxime Vachier-Lagrave (FrakklandI og hinsvegar Wesley So (Bandaríkin) og Ding Liren (Kína). Gríðarlega mikið er undir fyrir skákmennina fjóra því sigurvegaranir í einvíginunum vinna sér rétt til þátttöku í kandídatamótinu á næsta ári. Þar munu átta skákmenn keppa um réttinn til þess að skora á Magnus Carlsen í einvígi um heimsmeistaratitilinn.

Það eru sérstaklega Aronian og Ding Liren sem hafa að miklu að keppa því andstæðingar þeirra, Vachier-Lagrave og So eiga enn möguleika á því að vinna sér þátttökurétt með öðrum hætti, til dæmis með því að hafa hæstu meðalstigin á FIDE-listanum yfir tiltekið tímabil eða með því að standa sig vel í Grand Prix seríunni. Það er þó ekki á vísan að róa í þeim efnum og því vilja tvímenningarnir eflaust tryggja sér sætið hið fyrsta.

Fyrri skákin til að klárast var viðureign Aronian og Vachier-Lagrave. Armenninn stýrði hvítu mönnunum og upp kom Grunfeld-vörn, sem er eitt helsta vopn Frakkans. Aronian komst ekkert áfram og svo virtist sem að sá franski hefði allt á hreinu og hann tryggði sér örugglega skiptan hlut með því að blíðka goðin með skiptamunsfórn. Jafntefli var samið eftir 32.leiki.

Wesley So beitti ítalska leiknum gegn Ding Liren og fékk lítið sem ekkert út úr byrjuninni. Hann reyndi hvað hann gat að búa sér til einhver vinningsfæri en kínverski stórmeistarinn varðist auðveldlega og tryggði sér jafntefli með þráskák.

Seinni skákir einvígjanna fara fram á morgun og hefst taflmennskan kl.11.00

Bein útsending Chess24

Heimasíða mótsins

Norðurlandamót grunn- og barnaskólasveita fer fram 22.-24. september

Norðurlandamót grunn- og barnaskólasveita fer fram að Laugum í Sælingsdal dagana 22.-24. september nk.

Um er ræða stórt verkefni enda heimsækja okkar margir tugir erlendra gesta. 

Fulltrúar Íslands verða:

NM grunnskólasveita

• Hörðuvallaskóli (Kópavogi)
• Rimaskóli (Reykjavík)

Liðsskipan liðanna má finna á Chess-Results.

NM barnaskólasveita

• Álfhólsskóli (Kópavogi)
• Ölduselsskóli (Reykjavík)

Liðsskipan liðanna má finna á Chess-Results.

Heimasíða mótsins

Meistaramót Hugsins: Þrír jafnir og efstir eftir 5.umferð

Fimmta umferð Meistaramót Hugsins fór fram í kvöld og var hart barist nú sem endranær. Sigurður Daði Sigfússon var einn efstur fyrir umferðina eftir óvæntan sigur á Hjörvari Steini í síðustu umferð. Andstæðingur hans var hinn vígamóði Vignir Vatnar sem er nýkominn heim frá EM ungmenna í Rúmeníu. Sá yngri hafði betur að lokum og opnaði þar með mótið upp á gátt.

 

Á öðru borði vann Hjörvar Steinn sannfærandi sigur gegn Lofti Baldvinssyni og á þriðja borði hafði Björn betur gegn Björgvini Víglunds í snarpri byltu þar sem sá síðarnefndi átti fín færi. Þar með náðu Vignir, Hjörvar og Björn forystunni í mótinu með 4 vinninga af fimm.

Snorri Þór Sigurðsson og Óskar Víkingur Davíðsson blönduðu sér svo í toppbaráttuna með sigrum gegn Jóni Úlfjótssyni og Tómasi Ponzi. Þeir eru með 3,5 vinninga eins og Sigurður Daði. Að öðru leyti voru úrslit því sem næst eftir bókinni.

Sjötta umferð fer fram mánudaginn 25.september næstkomandi. Þá mætast á efstu borðum:

1. Vignir Vatnar - Björn

2. Hjörvar Steinn - Snorri Þór

3. Óskar Víkingur - Loftur

Staðan á Chess-Results

 

 

 

 

 

Kynning á vetrarstarfi Skákdeildar Fjölnis - Æfingar, ævintýri og EM taflfélaga

Miðvikudagsæfingar

Skákdeild Fjölnis hóf vetrarstarfið með fjölmennri skákæfingu miðvikudaginn 13. september í tómstundasal Rimaskóla. Á fyrstu æfinguna mættu 34 grunnskólakrakkar úr Grafarvogi og fylltu salinn af áhugasömum og efnilegum drengjum og stúlkum. Á hverri æfingu er boðið upp á skákkennslu og skákmót undir kjörorðunum „Skák er skemmtileg“. Það vakti athygli á fyrstu æfingunni að í hópi 10 verðlaunahafa var jafnt kynjahlutfall í hópnum. Allir fóru glaðir heim eftir skemmtilega æfingu enda veitt 15 verðlaun, efnt til happadrættis og boðið upp á veitingar i skákhléi. Fjölnisæfingar verða í boði ókeypis hvern miðvikudag frá kl. 16:30 – 18:00 og er gengið inn um íþróttahús Rimaskóla. Umsjón með æfingunum í vetur hafa þeir Helgi Árnason, Leó Jóhannesson og Jóhann Arnar Finnsson.

Ævintýraferð á Västerås Open

Skákdeild Fjölnis býður nú í lok september 13 efnilegum skákkrökkum á aldrinum 10 – 21 árs til Svíþjóðar þar sem þeir taka þátt í fjölmennasta alþjóðlega skákmóti Norðurlanda hvert ár í bænum Västerås. Krakkarnir fá þarna einstakt tækifæri á áhugaverðri og skemmtilegri utanlandsferð og um leið að tefla við erlenda skákmeistara á öllum stigum og aldri. Í þessum 13 manna hópi eru sjö stúlkur og sex drengir. Stigahæst er Nansý Davíðsdóttir (1954) en hún kom , sá og sigraði stigalægri flokkinn á Västerås Open árið 2012, þá aðeins 10 ára gömul. Drengirnir í hópnum eru allir fæddir 2005 og mynda þétta skáksveit Rimaskóla á grunn-og barnaskólastigi. Þetta er sjötta árið í röð sem Skákdeild Fjölnis býður sínu áhugasamasta og efnilegasta skákfólki til Svíþjóðar og hefur skákdeildin verið í nánu samstarfi við skákfélagið í Västerås um þátttökuna. Flogið verður með WOW, gist á Stadtshótelinu í Västerås sem er skammt frá mótsstað.

 

Fyrsta Fjölnisliðið á Evrópumót félagsliða

Skákdeild Fjölnis tók þá ákvörðun í sumar að nýta þátttökurétt sinn á Evrópumót félagsliða í skák sem haldið verður í Tyrklandi vikuna 8. – 15. október. Þetta er í fyrsta sinn sem skákdeildin  tekur þátt í Evrópumótinu. Skákdeildin er líka fyrsta deildin innan Umf. Fjölnis sem öðlast keppnisrétt á Evrópumóti félagsliða í hópíþrótt. Skáksveit Fjölnis mun eingöngu telfa fram íslenskum skákmönnum á Evrópumótinu með Héðin Steingrímsson stórmeistara og stigahæsta skákmann landsins í fararbroddi. Verkefnastjóri þessarar ferðar er Sigurbjörn J. Björnsson í samstarfi við Helga Árnason formann skákdeildarinnar.

 

Evrópumeistarinn gekk til liðs við Fjölni í sumar

Nýkrýndur Evrópumeistari unglinga í skák U18, hinn 18 ára Jesper Söndergård Thybo frá Danmörku,  gekk til liðs við Skákdeild Fjölnis í sumar og mun tefla með hinni áhugaverðu  A sveit félagsins á Íslandsmóti félagsliða sem fram fer í Reykjavík dagana 19. – 22. október n.k. Það er greinilegt að Fjölnisferillinn leggst vel í þennan unga og stórefnilega danska skákmann og mikið fagnaðarefni hjá Fjölnismönnum að fá Evrópumeistara til liðs við A sveitina sem sl. tvö sl. hefur unnið til verðlaunasætis í 1. deild.