Skákþáttur Morgunblaðsins: Heimsmeistarinn féll úr leik

Á það var bent í sambandi við þátttöku heimsmeistarans Magnúsar Carlsen, sem óvænt skráði sig til leiks á heimsbikarmótinu í Tíblisi í Georgíu, að hann gæti teflt undir minna álagi en aðrir þátttakendur. Í Tíblisi er keppt um tvö sæti í áskorendamótinu sem fram á að fara á næsta ári og sigurvegarinn þar öðlast rétt til að skora á heimsmeistarann. Nú eru átta keppendur eftir af þeim 128 sem hófu keppni – og Magnús er ekki þeirra á meðal! Í Georgíu hafa stigahæstu skákmenn heims fallið úr leik hver á fætur öðrum; í tilviki Magnúsar var það Kínverjinn Xiangzhi Bu sem var þessi örlagavaldur og aðrir frægir sem pakkað hafa til heimferðar fyrr en reiknað var með eru Kramnik, Anand, Caruana, Nakamura, Giri og Grischuk.

Kínverjar eru hið nýja stórveldi skákarinnar og Bu hefur lengi verið í flokki þeirra fremstu og nokkrum sinnum teflt hér á landi. Hann virðist hafa gengið óttalaus til þess verkefnis að mæta heimsmeistaranum, vann glæstan sigur í fyrri skákinni og átti aldrei í erfiðleikum í þeirri síðari – jafntefli og niðurstaðan 1½: ½.

Heimsbikarmótið í Tiblisi 2017; 3. umferð:

Magnús Carlsen – Xiangzhi Bu

Ítalskur leikur

1. e4 e5 2. Bc4 Rf6 3. d3 Rc6 4. Rf3 Be7 5. O-O O-O 6. Bb3 d6 7. c3 Be6 8. He1 Dd7 9. Rbd2

Ítalski leikurinn nýtur mikilla vinsælda um þessar mundir.

9. ... Hab8!?

Dularfullur leikur.

10. Bc2 d5 11. h3 h6 12. exd5!?

Tekur af skarið og hirðir peðið en Bu er við öllu búinn.

12. ... Rxd5 13. Rxe5 Rxe5 14. Hxe5 Bd6 15. He1

15. ... Bxh3!

Án þessarar fórnar væri svartur einfaldlega peði undir með litlar bætur. Það kemur á daginn að það er erfitt að þróa hvítu stöðuna.

16. gxh3 Dxh3 17. Rf1 Hbe8 18. d4

„Vélarnar“ eiga erfitt með að finna bestu leið hvíts en þessi leikur er ekki lakari en 18. Bd2.

18. ... f5! 19. Bb3 c6 20. f4 Kh7 21. Bxd5?

Hér missir Magnús sitt besta tækifæri, 21. He2!, t.d. 21. ... Rxf4 22. Hh2! og svartur neyðist í drottningauppskipti með 22. ... Dg4+.

21. ... cxd5 22. He3 Hxe3 23. Bxe3 g5! 24. Kf2 gxf4 25. Df3

Að gefa manninn til baka bjargar engu en 25. Bd2 Dh4+ og 26. ... Hg8! er ekki betra.

25. ... fxe3+ 26. Rxe3 Dh2+ 27. Kf1 Hg8 28. Dxf5 Hg6 29. Ke1 h5?

Best var 29. ... Kg7! og svartur hefur vinningsstöðu. Nú varð hvítur að koma hróknum í spilið og leika 30. Hd1.

30. Kd1 Kh6! 31. Rc2 h4 32. Re1 h3 33. Rf3 Dg2 34. Re1 Dg4+ 35. Dxg4 Hxg4 36. Rf3

Reynir að stöðva h-peðið.

36. ... Hg1+!

- og hvítur gafst upp, 37. Rxg1 er svarað með 37. ... h2 og peðið rennur upp í borð.

 

Gott gengi á EM ungmenna

Íslendingar sendu sex keppendur á Evrópumót ungmenna sem lauk í Rúmeníu á fimmtudaginn. Árangur þeirra var með ágætum, en framan af vakti hin 10 ára gamla Haile Batel Goitom mesta athygli eins og rakið var í síðasta pistli. Hún var komin með 4½ vinning af sjö mögulegum en tapaði tveim síðustu skákum sínum. Hún hafnaði í 41. sæti af 93 þátttakendum en hækkaði um 74 Elo-stig.

 

Vignir Vatnar Stefánsson náði bestum árangri íslensku krakkanna, hlaut 6 vinninga af níu mögulegum í flokki keppenda 14 ára og yngri og varð í 18. sæti af 125 keppendum. Jón Kristinn Þorgeirsson hækkaði um 44 Elo-stig og og Gunnar Erik Guðmundsson 10 ára hlaut 4 vinninga og hækkaði um 20 Elo-stig.

 

 

Helgi Ólafsson [e-mail]

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 16. september 2017

Skákþættir Morgunblaðsins

Norðurlandamótið: Hörðuvallaskóli efstur ásamt Dönum

Að lokinni annarri umferð Norðurlandamótsins á Laugum í Sælingsdal er Hörðuvallaskóli í fyrsta til öðru sæti í eldri flokki ásamt danskri sveit. Báðar sveitirnar hafa sex og hálfan vinning af átta mögulegum. Hörðuvallaskóli vann 2.5 - 1.5 sigur á finnskri sveit þar sem Vignir Vatnar vann sigur í innan við tíu leikjum. Stephan Briem reyndi lengi vel að pressa jafnteflislega stöðu og tók á það ráð að bjóða jafntefli þegar það virtist fullreynt að reyna að vinna stöðuna. Skynsamleg ákvörðun og sigur með minnsta mun staðreynd.

Rimaskóli átti í fullu tré við dönsku sveitina sem er jöfn Hörðuvallaskóla að vinningum. Systkynin Joshúa og Nansý settu upp harða baráttu gegn stigahærri andstæðingum en aðeins hálfur vinningur kom í hús. Joshúa hafði teflt glimrandi vel eftir stórsókn í Grand-Prix áras Sikileyjarvarnar en missti stöðuna niður í jafntefli undir lokin.

Ölduselsskóli gerði 2-2 jafntefli við heldur stigahærri sveit. Góðir sigrar unnust á þriðja og fjórða borði hjá þeim Baltasar Mána og Birgi Loga sem unnið hefur báðar sínar skákir. Anstæðingur Baltasar var um 400 stigum hærri! Bræðurnir Stefán Orri og Óskar Víkingur töpuðu eftir góða baráttu.

Álfhólsskóli tefldi við norska sveit sem var töluvert stigahærri á öllum borðum. Alexander Már Bjarnþórsson tefldi glæsilega sóknarskák á þriðja borði og gaf tóninn með góðum sigri. Á efstu tveimur borðunum voru skákirnar tefldar í botn. Róbert Luu hafði passíva stöðu en Ísak Orri var jafnvel með betra um hríð. Fór svo að Róbert hélt jafntefli en Ísak tapaði. Ágætis úrslit hjá Álfhólsskóla gegn stigahærri sveit.

Staðan í yngri flokki er afskaplega jöfn og lítið sem ekkert um stóra sigra hingað til.

Nánar má sjá stöðuna í flokkunum hér: http://chhttp://chess-results.com/tnr299669.aspx?lan=1ess-results.com/tnr299669.aspx?lan=1

Þriðja umferð verður tefld klukkan 16:00. Beina útsending má nálgast á skaksamband.is

Haustmót TR: Sigur Hjörvars Steins blasir við

Hjörvar Steinn Grétarsson er með vinningsforskot fyrir síðustu umferð Haustmóts Taflfélags Reykjavíkur. Áttunda umferð fór fram í gær og í henni lagði stórmeistarinn Jóhann H. Ragnarsson að velli á fyrsta borði. Hjörvar Steinn er því með 7 vinninga af 8 mögulegum.

 

Á öðru borði fór fram lykilskák í baráttunni um verðlaunasæti. Einar Hjalti Jensson hafði hvítt gegn Magnús Pálna Örnólfssyni. Skákinni lyktaði með jafntefli og því heldur frábært gengi Bolvíkingsins áfram. Magnús Pálmi er með 6 vinninga í deildu öðru sæti ásamt Björgvini Víglundssyni sem lagði Þorvarð Fannar Ólafsson að velli í gær.

Á fjórða borði hafði Oliver Aron Jóhannesson betur gegn Ólafi Guðmarssyni.

Í síðustu umferð mótsins, sem fram fer sunnudaginn 24.september kl.13.00, mætast eftirfarandi skákmenn:

1. Loftur (5) - Hjörvar Steinn (7)
2. Magnús Pálmi (6) - Björgvin (6)
3. Oliver Aron (5,5) - Einar Hjalti (5,5)

Heimasíða TR

Staðan á Chess-Results

NM grunn- og barnaskólasveita: Hörðuvellingar byrja vel

Norðurlandamót grunn- og barnaskólasveita hófst í kvöld að Laugum í Sælingsdal. Í hvorum flokki tefla sex sveitir. Íslendingar eiga sem heimamenn tvær sveitir í hvorum flokki. Fóru þær misjafnlega af stað nú í fyrstu umferð sem kláraðist rétt undir miðnættið.

Hörðuvallaskóli og Rimaskóli mættust í eldri flokki. Fyrirfram mátti telja Hörðuvallaskóla leiddan áfram af Vigni Vatnari töluvert sigurstranglegri. Á fyrsta borði mætti Vignir Nansý Davíðsdóttur og ekki var það nú í fyrsta skiptið sem þau tefla. Nansý hefur í gegnum tíðina átt í fullu tré við Vigni og svo var einnig í kvöld. Snemma tafls byggði Vignir upp álitlega sóknarstöðu en Nansý náði með vandaðri taflmennsku að jafna taflið. Vignir brá þá á það ráð að fórna skiptamun fyrir smá frumkvæði og öflugt biskupapar. Staða Nansýjar var þó enn góð en biskuparnir sögðu fljótt til sín enda praktískir möguleikar miklir, skiptamunurinn vannst tilbaka og vinningurinn kom fljótlega eftir það í hús. 

Á fjórða borði tefldi Arnór Gunnlaugsson Rimaskóla afar vel gegn Sverri Hákonarsyni sem er all reyndari en Arnór. Í tvöföldu hróksendatafli átti Arnór um tíma þvingaða vinningsleið en kom ekki auga á hana og sigurinn varð Sverris.

Á öðru og þriðja borði unnu Arnar Milutin Heiðarsson og Stephan Briem nokkuð örugglega sigra og því fjórir vinningar í hús fyrir Hörðuvallaskóla. 

Ölduselsskóli hefur á að skipa þéttri sveit í yngri flokknum. Sveitin vann góðan 2.5 - 1.5 sigur á dönsku sveitinni. Óskar Víkingur og Birgir Logi unnu góða sigra og Baltasar Máni náði fínu jafntefli.

Álfhólsskóli tapaði sinni viðureign með minnsta mun fyrir finnskri sveit.

Á morgun laugardag fara fram umferðir tvö og þrjú og má ætla að línur skýrist nokkuð eftir þrjár umferðir.

Á chess-results.com má finna úrslit allra skáka, myndir og pgn-skrá með tefldum skákum.

Önnur umferð hefst 10:00 á laugardagsmorgni.

 

Isle of Man: Bárður Örn mætir Magnúsi Carlsen

Á morgun hefst alþjóðlega mótið á Mön og tekur stór hópur Íslendinga þátt í mótinu með Helga Ólafsson, skólastjóra Skákskólans, í broddi fylkingar.

Þau frábæru tíðindi voru að berast að Bárður Örn Birkisson teflir við ríkjandi heimsmeistara, sjálfan Magnus Carlsen í fyrstu umferð. Stórkostleg pörun fyrir hinn unga skákmann sem hefur svart gegn Norðmanninum.

Bróðir hans Björn Hólm mætir annarri goðsögn, sjálfum Alexei Shirov!

Dagur Ragnarsson mætir GM Narayanan frá Indlandi, Íslandsmeistarinn Guðmundur Kjartansson mætir GM Vishnu Prasanna einnig frá Indlandi, Gauti Páll Jónsson mætir GM Perelhsteyn, Helgi mætir Íslandsvininum Alan Byron og Hilmir Freyr Heimisson mætir þýskum skákmanni með rúm 2200 stig.

Mótið hefst á morgun og þá má fylgjast með Bárði í beinni útsendingu gegn heimsmeistaranum!

Pörun fyrstu umferðar

Jóhann og Jón Viktor gengnir til liðs við Víkingaklúbbinn

Stórmeistarinn Jóhann Hjartarson og alþjóðlegi meistarinn Jón Viktor Gunnarsson eru gengnir til liðs við Víkingaklúbbinn. Jóhann var áður liðsmaður Taflfélags Bolungarvíkur og Jón Viktor kemur frá Taflfélagi Reykjavíkur.

Á Facebook-síðu Víkingaklúbbsins birtist áðan eftirfarandi tilkynning frá formanni klúbbsins, Gunnari Frey Rúnarssyni.

Nýr félagi í litla klúbbinn. Við vorum að fá Norðurlandameistarann í skák Jóhann Hjartarson í félagið. Óþarfi er að rekja glæsilegan feril kappans, en ritstjórinn hlakkar til að vinna með Jóhanni, en þeir voru saman í skákfélagi síðast árið 1981 þegar TR-NV varð Íslandsmeistari. Einnig voru við saman í liði Álftamýraskóla sem Norðurlandameistari 1980 og 1981. Annað legend, Alþjóðlegi meistarinn Jón Viktor Gunnarsson (2460 eló) er genginn til liðs við Víkingaklúbbinn. Hann hefur undanfarin ár verið liðsmaður Taflfélags Reykjavíkur, en þar á undan var Jón Viktor í Taflfélagi Bolungarvíkur. Jón Viktor sem hefur einn áfanga að stórmeistaratitli og varð Íslandsmeistari í skák árið 2000 og var í sigurliði Íslands á Ólympíumóti undir 16 ára á Kanaríeyjum árið 1995.

 

U-2000 mótið hefst miðvikudaginn 11. október

Hið sívinsæla U-2000 mót Taflfélags Reykjavíkur hefst miðvikudaginn 11. október.

Þátttökurétt hafa allir þeir sem hafa minna en 2000 Elo-stig. Tefldar eru sjö umferðir eftir svissneska kerfinu og er umhugsunartími 90 mínútur fyrir alla skákina auk 30 sekúndna sem bætast við eftir hvern leik. Leyfðar eru tvær yfirsetur í umferðum 1-5 sem skal tilkynna fyrir lok umferðarinnar á undan en 1/2 vinningur fæst fyrir yfirsetu. Teflt er einu sinni í viku, á miðvikudagskvöldum kl. 19.30, í Skákhöll félagsins að Faxafeni 12.

Mótið verður reiknað til alþjóðlegra skákstiga og verða allar skákir mótsins birtar.

Sigurvegari u-2000 mótsins 2016 var Haraldur Baldursson.

Dagskrá1. umferð: 11. október kl. 19.30
2. umferð: 18. október kl. 19.30
3. umferð: 25. október kl. 19.30
4. umferð: 1. nóvember kl.19.30
5. umferð: 8. nóvember kl. 19.30
—————-HLÉ——————
6. umferð: 22. nóvember kl. 19.30
7. umferð: 29. nóvember kl. 19.30

Sjálfkrafa tap dæmist á keppanda sem mætir á skákstað meira en 30 mínútum eftir upphaf umferðar.

Tímamörk: 90 mín á alla skákina + 30 sek viðbót eftir hvern leik

Verðlaun: 1. sæti kr. 30.000, 2. sæti kr. 20.000, 3. sæti kr. 10.000. Hort-kerfi gildir.

Röð mótsstiga (tiebreaks): 1. Innbyrðis viðureign 2. Buchholz (-1) 3. Buchholz

Þátttökugjöld: 18 ára og eldri kr. 5.000, kr. 3.000 fyrir félagsmenn í TR. 17 ára og yngri kr. 2.000, kr. 1.000 fyrir félagsmenn í TR.

Skráning í mótið

Skráðir keppendur

 

Norðurlandamót grunn- og barnaskólasveita hefst í kvöld

Norðurlandamót grunn- og barnaskólasveita fer fram að Laugum í Sælingsdal dagana 22.-24. september nk.

Um er ræða stórt verkefni enda heimsækja okkar margir tugir erlendra gesta. 

Fulltrúar Íslands verða:

NM grunnskólasveita

• Hörðuvallaskóli (Kópavogi)
• Rimaskóli (Reykjavík)

Liðsskipan liðanna má finna á Chess-Results.

NM barnaskólasveita

• Álfhólsskóli (Kópavogi)
• Ölduselsskóli (Reykjavík)

Liðsskipan liðanna má finna á Chess-Results.

Skák.is mun fylgjast með gangi mála um helgina.

Heimasíða mótsins

Heimsbikarmótið: Ding og Aronian mætast í úrslitum

Kínverski stórmeistarinn Ding Liren og hinn armenski kollegi hans, Levon Aronian, tryggðu sér í dag sæti í úrslitum Heimsbikarmótsins í Tíblísi. Ding Liren bar sigurorð af Wesley So í fjórum skákum, 2,5-1,5 og var sigurinn nokkuð öruggur. Ding tefldi yfirhöfuð betur í bráðabananum og var með gjörunnið tafl í fyrstu skák dagsins. Hann fór hinsvegar á taugum í úrvinnslunni og klúðraði skákinni í jafntefli.

Liren var auðsýnilega miður sín eftir klúðrið og brá á það ráð að bjóða stutt jafntefli í næstu skák. Sagði hann eftir einvígið að So hefði gert mistök með því að samþykkja það boð.

Í þriðju skák bráðabanans yfirspilaði Ding síðan andstæðing sinn og hélt að lokum örugglega jafntefli í lokaskákinni.

Fyrsta Armageddon-skákin

Einvígi Aronian og Vachier-Lagrave var stórkosleg skemmtun. Vachier-Lagrave vann fyrstu skák einvígisins en Aronian jafnaði metin í frábærri skák.

Næstu tvær skákir voru vel tefldar af báðum stórmeisturunum og enduðu báðar með skiptum hlut.

Í fimmtu skákinni valtaði Aronian síðan yfir Vachier-Lagrave en lék síðan skákinni niður á ótrúlegan hátt þegar sigurinn blasti við. Frakkinn stóð þá uppi með pálmann í höndunum en hann virtist þá fara á taugum og klúðraði unnu tafli niður í jafntefli.

Sjötta skákin endaði loks með jafntefli eftir harða baráttu og þá var komið að Armageddon-skák, þeirri fyrstu í öllu Heimsbikarmótinu.

Vachier-Lagrave vann hlutkestið og valdi svörtu mennina. Eins og allir heilvita menn vita þá eru það mistök! Þar með fékk Maxime 4 mínútna umhugsunartíma gegn 5 mínútum hjá Aronian og dugði jafntefli til að komast áfram. Franski stórmeistarinn var á góðri leið með að tryggja sér að minnsta kosti skiptan hlut en síðan kom hann sér í vandræði sem hann náði ekki að leysa yfir borðinu. Aronian tryggði sér síðan sigurinn á snyrtilegan hátt og þar með var Armeninn kominn í úrslit.

Eftir einvígið sagði Levon að hann hefði ekki getað afborið það að tapa skákinni enda var þjóðhátíðardagur Armena haldinn hátíðlegur sama dag.

Þrír öruggir með sæti á Kandídatamótið

Þessi úrslit þýða að Levon Aronian og Ding Liren hafa tryggt sér sæti á Kanídatamótinu sem fram fer í Berlín á næsta ári. Þeir munu tefla um Heimsbikartitilinn um helgina og 120 þúsund dollara fyrstu verðlaun en kandídatasætin voru án nokkurs vafa stærstu verðlaunin

Sergey Karjakin er einnig með tryggt sæti í kandídatamótinu eftir tapið í heimsmeistaraeinvíginu gegn Magnúsi Carlsen en önnur sæti eru óráðin og ríkir mikil spenna um hverjir hljóta þau.

Tvö sæti fara til þeirra sem ná bestum árangri í Grand Prix-seríu FIDE. Síðasta mótið í þeirri seríu fer fram um miðjan nóvember á spænsku eyjunni Mallorca. Mamedyarov stendur best að vígi þar en Grischuk, Radjabov og Vachier-Lagrave fylgja í humátt á eftir.

Tvö sæti fara til þeirra sem hafa hæstu meðalstigin yfir tiltekið tímabil. Þar standa Caruana, So og Kramnik best að vígi en aðeins munar sjónarmun á þremenningunum svo að sú keppni verður spennandi allt til loka.

Þá fá mótshaldarar í Berlín eitt boðssæti og aldrei að vita hver hlýtur það.

Frábær pistill á Chess.com um lokadaginn

Heimasíða mótsins

 

 

 

Haustmót TR: Hjörvar Steinn lagði Oliver Aron

Stórmeistarinn Hjörvar Steinn Grétarsson er einn í forystu Haustmóts TR þegar sjö umferðum af níu er lokið. Í gæ´r lagði hann Oliver Aron Jóhannesson að velli og státar því af 6 vinningum af sjö mögulegum.

Magnús Pálmi Örnólfsson bar sigur úr býtum gegn Jóhanni H. Ragnarssyni og er í öðru sæti með 5,5 vinninga. Í 3-5.sæti með 5 vinninga eru Einar Hjalti Jensson, Þorvarður Fannar Ólafsson og Björgvin Víglundsson með 5 vinninga. 

Einar Hjalti lagði Kristján Örn Elíasson að velli, Þorvarður Fannar bar sigur úr býtum gegn Lofti Baldvinssyni og Björgvin Víglundsson knésetti Pál Andrason í skemmtilegri skák.

Áttunda og næstsíðasta umferð fer fram á föstudagskvöldið kl.19.30. Þá verða eftirfarandi viðureignir á boðstólnum:

Hjörvar Steinn (6) - Jóhann H. (4,5)

Einar Hjalti (5) - Magnús Pálmi (5,5)

Þorvarður Fannar (5) - Björgvin (5)

Ólafur Guðmarsson (4,5) - Oliver Aron (4,5)

Haustmótið á Chess-results

Heimasíða TR