Hilmir Freyr efstur á Meistaramóti Skákskóla Íslands

Hilmir Freyr Heimisson (2151) er efstur með fullt hús að loknum tveimur fyrstu umferðunum á Meistaramóti Skákskóla Íslands sem hófst í gær. Jón Trausti Harðarson (2157) og Bárður Örn Birkisson (2146) koma næsti með 1½ vinning. Mótið hófst með því að nýkrýndur Íslandsmeistari í skák, Guðmundur Kjartansson, lék fyrsta leik mótsins, 1. b2-b3, fyrir Björn Hólm Birkisson. 

Átta skákmenn tefla í flokki skákmanna með 1600 skákstiga eða meira og tefla þeir fimm umferðir. Þriðja umferð hefst kl. 10 í dag. 

Stöðuna má nálgast í Chess-Results. 

Töluverðar sviptingar hafa verið í flokki þeirra sem hafa minna en 1600 skákstig. Þar hafa fjórir keppendur fullt hús. Það eru Ísak Orri Karlsson (1341), Gunnar Erik Guðmundsson (1167), Batel Goitom Haile (1253) og Örn Alexandersson (1159).

Óvænt úrslit hafa svip sinn á mótið og þar nefna að Tómas Möller (1122) vann Stefán Orra Davíðsson (1354) á fyrsta borði í fyrstu umferð og Batel vann svo Þorstein Magnússon (1387) á sama borði í annarri umferð. 

Alls tefla 19 skákmenn í flokknum og þar verða tefldar átta umferðir. Þriðja umferð einnig þar kl. 10.

Stöðuna má nálgast á Chess-Results.

Meistaramót Skákskóla Íslands hefst í dag

Meistaramót Skákskóla Íslands fyrir starfsárið 2016/2017 fer fram dagana 26.–28. maí og verður í tveim styrkleika/stigaflokkum.  Annar flokkurinn verður skipaður keppendum sem hafa 1600 alþjóðleg elo-stig eða meira en hinn flokkurinn er skipaður keppendum sem er undir 1600 elo stigum eða stigalausir. 

Skráning fer fram hér á Skák.is (guli kassinn efst). Upplýsingar um þegar skráða keppendur má finna hér.

Vakin er athygli á því að tímamörk eru mismunandi í flokkunum og færri umferðir verða tefldar í efri styrkleikaflokknum en þar er teflt um sæmdarheitið Meistari  Skákskóla Íslands. Núverandi meistari Skákskólans er Dagur Ragnarsson. 

Þátttökurétt hafa nemendur skólans og allir þeir sem tekið hafa þátt í námskeiðum á vegum skólans eða hlotið þjálfun á vegum skólans.  

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku. 

Mótsnefnd mun jafnframt taka afstöðu til óska þeirra sem ekki ná stigalágmörkum en vilja líka tefla í stigahærri flokknum.  

Flokkur undir 1600–elo-stigum og stigalausir: 

1. umferð: Föstudagur 26. maí kl. 18
2. umferð: Föstudagur 26. maí kl. 20 

3. umferð. Laugardagur 27. maí kl. 10-13.
4. umferð: Laugardagur 27. maí 13 –16
5. umferð: Laugardagur 27. maí 16-19 

6.. umferð: Sunnudagur 28. maí kl. 10-13.

7. umferð: Sunnudagur 28. maí kl. 13 –16
8. umferð: Sunnudagur 28. maí kl. 16-19 

Tímamörk í öllum umferðunum 30 30. 

Keppendur geta tekið eina eða tvær ½ vinnings yfirsetur í fyrstu fimm umferðunum en tilkynna verður um yfirsetuna fyrir umferð og áður en raðað er í þá næstu. 

 

Flokkur keppenda með 1600 – elo stig og meira. 

 

Tefldar verða sex umferðir eftir svissneska kerfinu í báðum flokkum.

Dagskrá mótsins verður með eftirfarandi hætti:

 

Flokkur 1600 alþjóðleg elo – stig og ofar:

 

1. umferð: Föstudagur 26. maí kl. 16
2. umferð: Föstudagur 26. maí kl. 20

 

3. umferð. Laugardagur 27. maí kl. 10
4. umferð: Laugardagur 27. maí 15

 

5. umferð: Sunnudagur 28. maí kl. 10
6. umferð: Sunnudagur 28. maí kl. 15

 

Tímamörk í öllum umferðunum 90 30.

 

Keppendur geta tekið eða tvær ½ vinnings yfirsetu í fyrstu fjórum umferðunum en verða að tilkynna um yfirsetuna fyrir umferðina og áður en raðað er í næstu umferð.

Skákmenn sem eru með minna en 1600 elo- stig geta óskað eftir því að tefla í flokki stigahærri keppenda og mun mótsnefnd taka afstöðu til þess og skila niðurstöðu með góðum fyrirvara. 

 

Verðlaun í flokki 1600 elo +

 

1. verðlaun: farmiði á skákmót að verðmæti kr. 50 þús + uppihaldskostnaður kr. 35 þús.
2. verðlaun: Farmiði á skákmót að verðmæti kr. 40 þús.
3. – 5. sæti Vandaðar skákbækur.

Auk þess verða veitt stigaflokkaverðlaun í mótinu:

 

1800 – 2000 elo:

1. verðlaun: Farmiði á skákmót að verðmæti kr. 40 þús.

 

1600-1800 elo:

1. verðlaun: Farmiði á skákmót að verðmæti kr. 40 þús.

 

Verðlaun í flokki 1600 elo og minna  og stigalausra:

 

1. verðlaun: farmiði á skákmót að verðmæti kr. 40 þús:
2. – 3. verðlaun: vandaðar skákbækur að eigin vali.

 

Verðlaun keppenda sem eru undir 1200 elo stig eða stigalausir:

1. verðlaun: Vandaðar skákbækur.
2. verðlaun: Landsliðstreyja „tólfunnar“.
3. verðlaun: Landsliðstreyja „tólfunnar“.

 

Mótsstig úrskurða verði keppendur jafnir að vinningum í báðum flokkum - nema í keppni um 1.  sæti í stigahærri flokknum . Þá skal teflt um titilinn: 

Meistari Skákskóla Íslands 2017. 

Aðalstyrktaraðili Meistaramóts Skákskóla Íslands 2017 er  GAMMA. 

 

Pistill: Þjáningar Þorfinnsbræðra í Þelamörk

 

Á dögunum héldum við bræður í víking til smábæjarins Kragerø í Þelamörk í Noregi.  Þar tókum við þátt í alþjóðlegu skákmóti sem skákfrumkvöðullinn Truls Jörgensen stóð fyrir. Truls er framkvæmdastjóri í öflugu fyrirtæki þar í bæ en er einnig ástríðufullur skákáhugamaður.  Hann heldur úti viðamiklu unglingastarfi á svæðinu og það mátti glöggt sjá á þátttakendalista mótsins þar sem ungir skákmenn voru áberandi. Mótinu var að sjálfsögðu skipt í A, B og C-flokk enda Truls víðsýnn og skynsamur maður í alla staði. [Aths. ritstj. Bjössi stríðinn]

Ferðin kom upp með skömmum fyrirvara hjá okkur bræðrum. Ástæðuna má helst rekja til þess að undirritaður var pirraður eftir sveiflukennt gengi í tveimur innlendum mótum í byrjun árs og vildi ólmur freista þess að hamra járnið á meðan það var heitt. Bragi hafði aftur á móti lítið teflt í nokkra mánuði og það var ekki ákjósanlegt því framundan var seinni hluti Íslandsmóts skákfélaga þar sem hann var í dauðafæri til þess að landa stórmeistaraáfanga eftir einstaklega gott gengi í fyrri hluta mótsins. Ferðin til Noregs var því hugsuð sem einskonar upphitun fyrir Íslandsmót skákfélaga.

Mótsstaður var Kragerø Resort sem er í alla staði glæsilegt hótel. Umhverfið er einstaklega fallegt og má segja að um einskonar heilsuhótel sé að ræða því  að fjölmargir valkostir eru í boði á staðnum varðandi hreyfingu, meðal annars glæsilegur 18 holu golfvöllur.  Lítill tími gafst til þess að njóta þess ef undan er skilin stórkostleg spa-aðstaða hótelsins sem var mikið notuð af okkur bræðrum. Þar var hægt að slaka á eftir erfiðan dag í sundlaug sem var með útsýni yfir stórbrotinn fjörð.

Mótið sjálft var með túrbó-sniði, níu umferðir á fimm dögum. Það er kannski ekki eftirsóknaverðasta fyrirkomulagið á alþjóðlegum skákmótum en hentaði okkur bræðrum afar vel í þetta sinn. Fimm stórmeistarar voru skráðir til leiks í mótinu og voru það góðkunningjar okkar Rozentalis og Kveinys frá Litháen, Miezis frá Lettlandi, Catalbashev frá Búlgaríu og Lie frá Noregi.  Að auki tóku þátt fimm alþjóðlegir meistarar en keppendur í A-flokki voru 26 talsins.

Við flugum út að morgni miðvikudags og vorum lentir um hádegisbilið. Fyrsta umferð átti að hefjast kl.19.00 og ráðgert var að rútuferðin á mótsstað myndi taka rúmlega þrjár klukkustundir. Það var öðru nær og þökk sé stórkostlegri umferðateppu út úr Osló þá vorum við rúmlega sex klukkustundir á leiðinni. Vorum við bræður nokkuð framlágir eftir þetta en fengum smá tíma til þess að úða í okkur kvöldverði og svo var hafist handa. Blessunarlega voru andstæðingarnir ekki mikil fyrirstaða í fyrstu umferð og því hófum við báðir mótið með sigri. Við vorum afar fegnir að komast klakklaust frá þessu ævintýri og vorum hvíldinni fegnir.

Næsti dagur var tekin snemma. Glæsilegt morgunverðarhlaðborð beið okkar og Norðmennirnir mega eiga það til hrós að boðið var upp á úrvals kaffi og te í hverri umferð. Það er ekki alltaf svo í skákmótum og vorum með bræður afar kátir með það enda miklir kaffiunnendur.  Andstæðingarnir í 2.umferð voru stórneistarnir Kveinys (Björn) og Catalbashev (Bragi).

Mér hefur gengið bölvanlega með Kveinys og var 3-0 undir þegar að þessari skák kom. Það skýrði mögulega linkulega og áhættufælna taflmennsku sem að endaði með leiðindajafntefli.  Skák Braga var öllu fjörugri en þó fékk hvorugur keppandinn tækifæri til þess að snúa henni sér í vil. Að lokum leystist staðan upp í jafntefli. 

Í seinni umferð dagsins tefldi ég við norska alþjóðlega meistarann Kristian Stuvik Holm sem er alræmdur hérlendis eftir að gerst sekur um svindl á Alþjóðlega Reykjavíkurskákmótinu fyrir nokkrum árum. Kristian var þá barnungur en höfuðpaurinn var Ragnar, faðir hans, sem fékk að sjálfsögðu bann við frekari heimsóknum á mótið. Þeir feðgar mættu saman á mótið í Kragerø og verð ég að viðurkenna að það var afar óþægilegt þegar Kristian var að drita út öflugum leikjum og labba fram á gang þar sem að faðir hans var að leika sér í snjallsímanum sínum! Sem betur fer fann ég lausnir á vandamálunum yfir borðinu og skákin leystist upp í jafntefli. Kristian  útskýrði þá fyrir mér að hann hefði verið með nákvæmlega sömu stöðu gegn Piu Cramling nýlega og var því öllum hnútum kunnugur . Ég var því í raun bara dauðfeginn að hafa sloppið með jafntefli.

Bragi var afar ófarsæll gegn Kveinys og tapaði illa. Hann tefldi byrjun sem Kveinys hafði stúderað vel með íranska kvennalandsliðinu nokkrum vikum fyrr og var því öllum hnútum kunnugur. Á meðan þekkti Bragi fínni blæbrigðri stöðunnar illa og fékk þungan skell. Vinur okkar Kveinys nánast skríkti af gleði eftir skákina yfir því að heilladísirnar hafi verið á hans bandi. Ekki annað hægt en að þykja vænt um þennan kall!

Í fjórðu umferð tefldum við bræður við mun stigalægri andstæðinga. Ég tefldi við ungan dreng sem hafði nýverið teflt á Norðurlandamóti ungmenna, Mads Vestby-Ellingsen að nafni. Í græðgi minni hirti ég peð snemma tafls og líklega hefði drengurinn getað refsað mér fyrir það. Hann fann hinsvegar ekki bestu leiðina og ég sveið endataflið af öryggi. Bragi bróðir mætti heldri skákmanni að nafni Oddvar Ull og verður honum tileinkaður sérstakur kafli.

Oddvars saga  Ull

Áður en við bræður héldum af stað til Þelamerkur leit allt út fyrir að ég myndi tefla við Oddvar í fyrsta umferð en hann var skráður með 1988 FIDE-stig. Ég hafði því aðeins rannsakað hugsanlegan andstæðing og meðal annars flett honum upp á Facebook. Þar blasti við mér langur pistill eftir Oddvar þar sem að lýsir andlegum veikindum og meðal annars tilraunum til sjálfvígs.  Varð ég nokkuð tómur við lesturinn en þessi vitneskja gerði það að verkum að ég fylgdist vel með framgöngu Oddvars í mótinu.

Talsverðar breytingar urðu á keppendalistanum rétt fyrir fyrstu umferð og svo fór að Oddvar tefldi við ungstirnið Tor Fredrik Kaasen. Sá ágæti drengur hafði á skömmum tíma rokið upp FIDE-stigalistann og státaði nú af 2468 stigum. Oddvar mætti ferskur í fyrstu umferð, greinilega spenntur fyrir viðureigninni og tefldi byrjunina af krafti með svörtu mönnunum.

Eftir 13.leik hvíts var staðan svona:

Oddvar var einfaldlega að tefla skák lífs síns og allir sem voru á mótsstað hópuðust að borðinu. Það fór greinilega ekkert sérstaklega vel í okkar mann því augljóst var að hann var nokkuð stressaður. Í ofangreindri stöðu er hvítur einfaldlega óverjandi mát þó að það sé alls ekki augljóst. Fallegasta lausnin felst í 13. – Bd6+ 14.Kg4 Bf5+! 15. Kxf5 Dh4! 16. g4 He8 og mátið blasir við. Ég var nokkuð spenntur fyrir hönd Oddvars þegar hann lék 13. – Bd6+ eftir langa umhugsun.  Eftir hinn þvingaða leik 14. Kxg4 lék Ull hinsvegar 14. – Dd7+ sem er að mörgu leyti skiljanlegur leikur. Framhaldið varð 15. Kh4 g5+ 16. Dxg5 Be7 og hvíta drottningin fellur.  Svartur er að sjálfsögðu með gjörunnið tafl en smátt og smátt fór Oddvar að leika skákinni niður. Að lokum tókst honum að tapa skákinni á ótrúlegan hátt.

Það var ekki laust við að allir keppendur hafi vorkennt Oddvari eftir þessa niðurstöðu. Daginn eftir mætti hann frekar þreytulegur í morgunumferðina og vann sigur á stigalægsta manni mótsins. Mátti greina ljúfan angann af ótilgreindum kaupstað í loftinu. Í seinni umferð dagsins var okkar maður orðinn frekar þreytulegur en það stöðvaði hann ekki í því að tefla af krafti gegn nýkrýndum Norðurlandameistara Andreas  G. Tryggestad, 2316.  Óhætt er að segja að báðir keppendur hafi teflt frekar illa. Að lokum plataði Ull hinn unga andstæðing sinn upp úr skónum og eftirfarandi staða leit dagsins ljós.

 

Oddvar var með hvítt og átti leik. Hann er að sjálfsögðu með gjörunnið tafl en greinilegt er að hann hefur óttast framrás f-peðs svarts. Hann lék því hinum fyrirbyggjandi og ígulmenntaða leik 59. Bd4. Það væri frábær leikur í alla staði ef að svartur ætti ekki hinn óþægilega svarleik 59. – Dc1 skák og mát.

Síðar um kvöldið gekk undirritaður framhjá hótelbarnum á leiðinni í háttinn. Þar var einungis einn viðskiptavinur eftir, Oddvar Ull. Hann sat með drykk og horfði út í tómið. Í þessari stund fólst harmræn fegurð.

Andstæðingur Oddvars í fjórðu umferð var síðan enginn annar en Bragi bróðir. Við bræður höfðum skellt okkur í sund snemma morguns til þess að öðlast nauðsynlegan ferskleika fyrir strembinn dag. Það hafði Oddvar Ulll ekki gert. Hann var úfinn og þreytulegur í meira lagi. Hann tefldi þó vel gegn Braga og þrátt fyrir að vera peði undir þá var ekki augljóst hvernig Bragi ætlaði að fara að því að vinna skákina. Skelfilegur afleikur gerði þó að lokum út um skákina.

Eftir þessa skelli var Oddvar brotinn á bak aftur. Taflmennskan fór versnandi og aðeins kom eitt jafntefli í hús það sem eftir var móts. Hann endaði í deildu neðsta sæti í móti þar sem glæstir sigrar voru innan seilingar.

Í fimmtu umferð tefldi ég við alþjóðlega meistarann Espen Lie. Ég var með hvítt og beitti svonefndu London-kerfi sem er afar traust og einfalt. Ég ákvað að skipta upp í hundleiðinlegt endatafl eins og Kamsky hefur stundum gert í sömu stöðu en skyndilega fékk ég þá herfilegu hugmynd að sleppa drottningaruppskiptum. Afleiðingarnar voru þær að ég tapaði peði en öllu verri fréttir voru þær að mótspilið var minna en ekki neitt. Í örvæntingafullri leit minni að moldviðri framdi ég síðan virðulegt harikiri á borðinu, gafst upp, strunsaði niður í heilsulindina og refsaði sjálfum mér með ítrekuðum heimsóknum í kalda pottinn með tilheyrandi skrækjum. Eftir svona frammistöðu eiga menn ekkert gott skilið.

Frammistaða Braga var öllu betri. Hann vann góðan sigur með svörtu gegn alþjóðlega meistaranum Petter Haugli og var hinn kátasti þegar bugaður bróðir hans kom úr heilsulindinni.  Héldum við bræður þá í matsal hótelsins sem var glæsilegur í alla staði. Útsýni til allra átta og hlaðborðið sem boðið var uppá öll kvöld var frábært. Þá léttist lund okkar nokkuð þegar íslensk stúlka, sem búið hafði í Kragerø í rúman áratug, heilsaði upp á okkur. Hún hafði um nokkurt skeið unnið á hótelinu og var mætt á sína fyrstu vakt eftir að við bræðurnir mættum á staðinn.

Sjötta umferð hófst eldsnemma daginn eftir og framundan voru óþægilegir andstæðingar. Bragi fékk hvítt á ungstirnið Kaasen (2468) sem hafði farið mikinn í mótinu eftir heppnina gegn Oddvari í fyrstu umferð. Ég tefldi við með svörtu gegn nýkrýndum Norðurlandameistara, Andreas G. Tryggestad (2316). 

Hjá mér kom upp uppskipta afbrigði spænska leiksins og fórnaði ég peði á velþekktan hátt. Ég gaf færi á mér snemma tafls með yfirborðskenndri og vanhugsaðri hugmynd en hinn ungi mótherji minn treysti mér um of og greip ekki gæsina. Eftir það átti hann ekki möguleika og ég valtaði samviskusamlega yfir pjakkinn. Skák Braga var öllu flóknari og skipti nokkrum sinnum um eigendur. Bragi yfirspilaði Kaasen í byrjun tafls en síðan missti hann marks og endaði í nauðvörn. Sem betur fer hafði litli bróðir það af en síðan kom upp æsilegt tímahrak. Sem betur fer tefldi Bragi seinni hluta skákarinnar allt að því óaðfinnanlega og hafði afar mikilvægan sigur.  Voru Þorfinnsbræður vígreifir eftir þessa niðurstöðu. Hádegishléið var nýtt í velútlátinn hádegisverð, hressandi göngutúr og afar mikilvægan blund!

Síðar sama dag fór fram sjöunda umferð og vorum við bræður komnir í bullandi toppbaráttu. Bragi tefldi á fyrsta borði gegn stórmeistaranum Kjetill A. Lie og ég mætti goðsögninni Eduardas Rozentalis. Bragi tefldi nokkuð góða skák gegn Lie þar sem að þræðir valdsins voru alltaf í hendi litla bróður. Staðan batnaði jafnt og þétt hjá okkar manni og mátti Lie teljast heppinn að sleppa út í endatafl peði undir. Þar náði hann hinsvegar góðri blokkeringu með riddaranum sínum og jafnteflið varð ekki umflúið. Með örlítið meiri nákvæmni hefði Bragi vel getað unnið þessa skák.

Ég tefldi langa og flókna skák gegn Rozentalis. Ég var kominn með yfirburðatafl eftir byrjunina en þá réðst stórmeistarinn öflugi til atlögu svo um munar og fórnaði liði fyrir ógnvekjandi sókn. Var ég afar stressaður um að ég myndi enda sem fórnarlamb í einhverju ódauðlegu listaverki á hinum 64 reitum en það eru skelfileg örlög í alla staði. Sem betur fer fann ég hinsvegar ágæta varnarleiki og slapp síðan frá öllu saman með betra tafl. Rozentalis ætlaði hinsvegar ekki að tapa án baráttu og hann varðist af miklum krafti lengi vel. Í tímahraki lék hann hinsvegar af sér peði á afar klaufalegan hátt sem endaði með því að ég komst út í endatafl manni yfir. Slæmu fréttirnar voru hinsvegar þær að ég gat í raun ekki komið í veg fyrir að ég myndi missa öll mín peð og þyrfti þá að máta stórmeistarann með riddara og biskup.  Þetta var í fyrsta skipti á ferlinum, jafnvel í hraðskákum, sem að þetta endatafl kom upp hjá mér og var ég því nokkuð smeykur. Sem betur fer þá náði ég að muna aðferðina og Rozentalis gafst upp eftir 120.leiki.

Ef að við vorum montnir eftir fyrri umferð dagsins þá héldu okkur engin bönd eftir þessa umferð. Vorum við bræður í öðru sæti mótsins fyrir tvær síðustu umferðirnar með fimm vinninga. Efstur var Kjetill A. Lie með 5½. Héldum við í koju sannfærðir um að miklir sigrar væru yfirvofandi síðasta daginn. Það varð ekki raunin.

Lie-bræður voru andstæðingar okkar í 8.umferð. Ég tefldi við efsta manninn, Kjetil og Bragi tefldi við bróður hans Espen sem einnig státaði af fimm vinningum. Hann hafði teflt við aðeins sterkari andstæðinga en við bræður og var því hársbreidd frá sínum síðasta stórmeistaraáfanga. Til þess þurfti hann 1½ vinning í síðustu tveimur umferðunum.

Skemmst er frá því að segja að Bragi hélt uppteknum hætti varðandi gjafmildi okkar bræðra gagnvart Espen. Skákin var arfaslök í alla staði og Espen vann öruggan sigur og stórmeistaraáfangi hans því nánast gulltryggður.

Skák mín gegn Kjetil var talsvert meira spennandi.  Kjetil tefldi enska leikinn og ég svaraði því með kraftmikilli taflmennsku. Ég afréð að fórna peði fyrir talsverðar flækjur og mat tölvan stöðuna þannig að ég væri með úrvalsbætur. Staðan var þó vantefld og öllu verra var að ég kom mér í tímahrak sem að gerist sjaldan. Eftir smá ónákvæmi fórnaði Kjetil síðan skiptamuni og komst út í afar vænlegt endatafl. Mín tilfinning var sú að ég hefði átt að geta haldið jafnteflinu en með engan tíma á klukkunni var það nánast ógjörningur. Lie-bræður rassskelltu því Þorfinnsbræður 2-0.

Það voru þung skref í hádegisverðinn þennan síðasta dag.  Allir draumar að engu orðnir. Ekki léttist lund okkar þegar að pörun síðustu umferðar leit dagsins ljós en þar blasti við viðureignin Þorfinnsson – Þorfinnsson.  Þetta var stutt skák, án sviptinga, sem endaði með skiptum hlut.

Lokaniðurstaða mótsins var sú að stórmeistarinn Kjetill A. Lie vann glæsilegan sigur og hlaut 7 vinninga af 9 mögulegum.  Ekki síður var árangur bróður hans, Espen, glæsilegur en hann náði sínum síðasta stórmeistaraáfanga með því að hljóta 6,5 vinninga  af 9 og fór taplaus í gegnum mótið. Hann þarf núna aðeins stigin til þess að ná titlinum eftirsótta og með taflmennsku eins og hann sýndi í Kragerø mun það gerast innan tíðar. Í 3-4.sæti voru síðan stórmeistararnir Kveinys og Catalbashev með 6 vinninga. Kveinys vann hinn unga Kaasen í 15.leikjum með hvítu í síðustu umferð og var svo kátur eftir mótið að annað eins hefur vart sést.

Við bræður deildum 5-8.sæti ásamt Tryggestad og Miezis. Veitt voru peningaverðlaun fyrir sjö efstu sætin og var notast við athyglisvert kerfi. Í stað þess að deila þremur verðlaunum með okkur fjórmenningunum þá var sá stigalægsti skilinn út undan. Það kom í hlut stórmeistarans Miezis sem hafði átt arfaslakt mót en unnið sig upp í lokin. Fengum við bræður um 25 þúsund krónur á kjaft sem að er vissulega betra en ekki neitt! Við vorum þó frekar ósáttir með lokaniðurstöðuna og töldum að með smá stríðsgæfu þá hefði árangurinn getað orðið betri.  Ég græddi sjö stig í mótinu en Bragi heltraust 1 stig! Nokkrum dögum síðar landaði Bragi stórmeistaraáfanga í Íslandsmóti skákfélaga í Rimaskóla og því má segja að heimsóknin til Noregs hafi skilað sínu.

 

 

Mótshaldarinn Truls Jörgensen er staðráðinn í að halda annað sambærilegt mót næsta ár. Það er mín skoðun að íslenskir skákmenn ættu að að íhuga það alvarlega að kíkja í heimsókn. Hótelið er fyrsta flokks, maturinn frábær og öll skipulagning mótsins til fyrirmyndar. Sérstaklega hefðu ungir skákmenn á bilinu 1600-1800 gott af því að mæta til leiks og spreyta sig í B-flokki mótsins. Þar voru góð tækifæri til þess að moka inn skákstigum og öðlast keppnisreynslu og sjálfstraust á erlendri grundu.

Björn Þorfinnsson með aðstoð Braga Þorfinnssonar.

 

Íslandsmeistarinn skýrir frá leyndardómum velgengni sinnar

Skákmeistarinn geðþekki, Guðmundur Kjartansson, sem á dögunum varð Íslandsmeistari í skák eftir æsispennandi lokasprett og frábærlega vel teflda úrslitaskák, hyggst veita skákáhugamönnum innsýn í hugarheim sinn miðvikudagskvöldið 24.maí kl.20-22 í húsnæði Taflfélags Reykjavíkur.

Guðmundur ætlar að skýra úrslitaskák Íslandsmótsins fyrir gestum, en þar stýrði hann hvítu mönnunum gegn stórmeistaranum Héðni Steingrímssyni og þurfti Guðmundur nauðsynlega sigur til þess að tryggja sér Íslandsmeistaratitilinn. Gárungarnir hafa haft á orði að þessi skák kunni að vera ein sú besta sem Guðmundur hefur teflt á ferlinum. Íslandsmeistarinn lætur ekki þar við sitja heldur mun hann jafnframt sitja fyrir svörum og gefst skákáhugamönnum því gullið tækifæri til þess að forvitnast um leyndardómana á bakvið árangur Guðmundar í mótinu.

Guðmundur Kjartansson er sem kunnugt er alþjóðlegur meistari og hefur undanfarin misseri lagt hart að sér til þess að verða stórmeistari. Hann hefur þegar náð öllum þremur stórmeistaraáföngunum en vantar aðeins að ná 2500 stiga markinu til að verða útnefndur stórmeistari. Guðmundur ætlar að hamra járnið á meðan það er heitt og hyggst tefla í útlöndum næstu mánuði til þess að freista þess að ná 2500 stiga markinu.

Taflfélag Reykjavíkur hvetur alla skákáhugamenn til þess að líta við og hlýða á Íslandsmeistarann skýra frá leyndardómum velgengni sinnar. Aðgangseyrir er enginn. Þeir sem á hinn bóginn vilja styrkja Guðmund fyrir framtakið og í baráttunni við stórmeistaratignina er góðfúslega bent á að hann mun taka við frjálsum framlögum.

Verið velkomin í félagsheimili Taflfélags Reykjavíkur miðvikudagskvöldið 24.maí kl.20.

Æsispennandi Íslandsmót í skák

Íslandsmótið í ár var í senn æsispennandi og skemmtilegt. Fjörlega var teflt í Hraunseli í Firðinum við frábærar aðstæður. Mótinu lauk svo með æsispennandi úrslitaskák þar sem Guðmundur Kjartansson vann Héðin Steingrímsson eftir afar val teflda skák þar sem hann hélt pressu á stórmeistaranum frá fyrsta leik til þess síðasta. Ein besta skák Guðmundar á ferlinum að hans eigin sögn. 

Ekki byrjaði Guðmundur vel á mótinu því hann gerði jafntefli í fyrstu umferð gegn Bárði Erni Birkissyni (2162) stigalægsta keppenda mótsins. Í fjórðu umferð sleppti hann Degi Ragnarssyni (2320) með jafntefli en vann fimm síðustu skákirnar. Árangur Guðmundar samsvaraði 2723 skákstigum og hækkar hann um 27 stig fyrir hana. 

Héðinn Steingrímsson (2562) varð annar með 7½ vinning. Í langflestum tilfellum hefði slík vinningatala a.m.k. dugað í úrslitakeppni um Íslandsmeistaratitilinn. Héðinn var ávallt efstur á mótinu - einn eða ásamt öðrum - frá fyrstu umferð mótsins til þeirrar næstsíðustu. Hann gerði jafntefli við Vigni Vatnar Stefánsson (2334) í fjórðu umferð en hafði svo unnið fimm skákir í röð þar til kom að tapskákinni gegn Gumma. Héðinn hækkar um 8 stig og nær efsta sætinu á íslenska stigalistanum 1. júní nk. Fer upp fyrir bæði Hjörvar og Hannes.

Dagur Ragnarsson (2320) varð þriðji með 5½ vinning. Frábær árangur hjá Degi í sínum fyrsta landsliðsflokki. Dagur náði jafnframt sínum fyrsta áfanga að alþjóðlegum meistaratitli og hækkar um 35 skákstig. Dagur gerir sig líklegan til að komast á landslið Íslands á næstu árum haldi hann áfram sömu ástundum. 

Hannes Hlífar Stefánsson (2566), tólffaldur Íslandsmeistari, varð aðeins fjórði með 5 vinninga. Hannes hefur oft teflt betur en núna - nánast undantekningalaust - og lækkar um 18 stig.

Davíð Kjartansson (2389) varð fimmti með 4½ vinning. Davíð byrjaði illa en beit heldur betur í skjaldarrendur í lokaumferðunum. Hann tapaði aðeins 3 skákstigum en um tíma var útlitið mun dekkra. Davíð keyrði oftsinnis til vinnu sinnar á Kirkjubæjarklaustri. 

Sigurbjörn Björnsson (2268) og Björn Þorfinnsson (2407) urðu jafnir í 6.-7. sæti með 4 vinninga. Báðir stefndu þeir hærra. Sigurbjörn hækkar um 9 stig en Björn, sem vann nánast fulla vinnu með mótinu, lækkar um sömu stigatölu.

Guðmundur Gíslason (2336) átti slakt mót og hlaut 2½ vinning. Hann lækkar um 29 skákstig og getur miklu mun meira. 

Það var ávallt ljóst að mótið gæti orðið ungu mönnunum Bárði Erni Birkissyni (2162) og Vigni Vatnari Stefánssyni (2334) erfitt og svo varð raunin. Þeir náðu þá báðir góðum úrslitum. Bárður gegn Gumma og Vignir gegn Héðni. Þeir mun koma sterkir til leiks á komandi Íslandsmótum.

Verðlaunaafhendingin var í boði Hafnarfjarðarbæjar að loknu móti. Þar tók Rósa Guðbjartsdóttir, formaður bæjarráðs, á móti gestum og bauð þá velkomna. Meðal gesta kvöldsins var Friðrik Ólafsson, sem vann sinn fyrsta Íslandsmeistaratitil fyrir 65 árum síðan!

Kristján Örn Elíasson, var skákstjóri mótsins, og sýndi því hlutverki að mikilli lipurð og alúð. Engin vandamál komu upp í mótinu. Björn Ívar Karlsson sá um beinar útsendingar sem gengu snurðulaust fyrir sig frá fyrsta leik mótsins til þess síðasta. Ingvar Þór Jóhannesson sá um heimasíðu mótsins. 

Skáksamband Íslands færir Hafnarfjarðarbæ kærar þakkir fyrir frábærar móttöku. Bærinn stóð vel að öllum sem hann tók sér fyrir hendur. Sérstakar þakkir fá Rósa, Geir Bjarnason, íþrótta- og tómstundafulltrúi bæjarins, og Jónína Björk Óskarsdóttir, forstöðumaður í Hraunseli.

Fjórtán ár eru síðan síðast var haldið Íslandsmót í Hafnarfirði. Allir eru sammála um tíminn í næsta mót verði mun styttri.

Á næsta ári er svo kannski kominn tími á nýtt Icelandic Open? Þá verða fimm ár síðan afar vel heppnað slíkt mót var haldið í Turninum í Borgartúni.

• Heimasíða mótsins
• Chess-Results

Frestur til að sækja um styrki til SÍ rennur út um næstu mánaðarmót

Stjórn SÍ veitir styrki til skákmanna þrisvar á ári. Næsti frestur til að sækja um styrki rennur út um næstu mánaðarmót.

Styrktarreglur SÍ má finna hér.

Umsóknareyðublað má finna hér.

 

Ding Liren vann Grand Prix-mótið í Moskvu

Grand Prix-mótið í Moskvu, sem lauk í gær, féll nokkuð í skuggan á spennandi Íslandsmóti í Hafnarfirði. Kínverski stórmeistarinn Ding Liren (2773) kom sá og sigraði á mótinu en hann hlaut 6 vinninga í 9 skákum. Annar varð Aserinn brosmildi Shakhriyear Mamedyarov (2772) með 5½ vinning. Sjö skákmenn fengu 5 vinninga.

Stutt jafntefli setja því miður nokkurn svip á Grand Prix-mótin og svo var einnig nú. Skák Mamedayrov og Maxime Vachier-Lagrave í lokaumferðinn tók t.d. aðeins 13 mínútur.

Mamedyarov hefur átt frábært tímabil síðustu mánuði og er eftir mótið með slétt 2800 skákstig. Hann er sá þrettándi í sögunni til að fara yfir 2800 skákstig. Hann er nú á fimmta sæti á heimslistanum. Ding Liren fór uppí níunda sæti heimslistans.

Norway Chess-mótið, sem kynnt var sögunnar sem sterkasta skákmót sögunnar með 10 stigahæstu skákmenn heims lendir í því að þar vantar nú þá sem eru 5. og 9. sæti!

Mamedyarov er áakaflega góðum málum þegar kemur að heildarstöðunni í Grand Prix-seríunni og er þar efstur. 

 

Nánar má lesa um Grand Prix-mótið á Chess.com. 

 

Guðmundur Íslandsmeistari í skák

Alþjóðlegi meistarinn Guðmundur Kjartansson (2437) varð rétt í þessu Íslandsmeistari í skák eftir magnaða sigurskák gegn Héðin Steingrímssyni (2562). Fyrir skákina hafði Héðinn 7½ vinning en Guðmundur 7 vinninga. Guðmundur þurfti því nauðsynlega að vinna skákina. Frá upphafi setti Guðmundur pressu á Héðinn sem brást í bogalistin þegar hann bauð uppá drottningauppskipti í kringum í 40. leik sem þýddi sem leiddi til tapaðs endatafls. Guðmundur innbyrti svo vinninginn af miklu öryggi. Gríðarlega vel teflt hjá Guðmundi sem tefldi frábærlega á mótinu. Héðinn tefldi einnig afar vel á mótinu og hreint ótrúlegt að 7½ vinningar í 8 skákum dugi ekki til sigurs.

Dagur Ragnarsson varð þriðji með 5½ vinning á sínu fyrsta Íslandsmóti. Einstaklega góður árangur. Með frammistöðu sinni tryggði Dagur sér sinn fyrsta áfanga að alþjóðlegum meistaratitli.  

Lokastaðan: 

1. Guðmundur Kjartansson (2437) 8 v.
2. Héðinn Steingrímsson (2562) 7½ v.
3. Dagur Ragnarsson (2320) 5½ v.
4. Hannes Hlífar Stefánsson (2566) 5v.
5. Davíð Kjartansson (2389) 4½ v.
6.-7. FM Sigurbjörn Björnsson (2268) og Björn Þorfinnsson (2407) 4 v.
8. Guðmundur Gíslason (2336) 2½ v. 
9.-10. Bárður Örn Birkisson (2162) og Vignir Vatnar Stefánsson (2334) 2 v.. 

 

• Heimasíða mótsins
• Chess-Results
• Beinar útsendingar (Chess24) - hefjast kl. 17 á virkum dögum og kl 13 um helgar.

Héðinn eða Guðmundur? - Úrslitin ráðast í dag - lokaumferðin hefst kl. 13

Úrslitin ráðast í dag á Íslandsmótinu í skák. Það skýrðist í næstsíðustu umferðinni í gær að ekki muni koma til úrslitakeppni heldur munu úrslitin ráðast á sjálfu mótinu. Héðinn Steingrímsson leiðir mótið með 7½ vinning en Guðmundur hefur 7 vinninga. Guðmundur stýrir hvítu m0nnunum gegn Héðni í dag og þarf sigur til að tryggja sér Íslandsmeistaratitilinn. Héðni dugar jafntefli til þess sama.

Umferðin hefst kl. 13. Teflt er í Hraunseli, Flatahrauni 3, Hafnarfirði. Afar góðar aðstæður eru fyrir áhorfendur til að fylgjast með mótinu á skákstað.  

Dagur Ragnarsson (2320) er þriðji með 5 vinninga. Hann þarf jafntefli gegn Birni Þorfinnssyni til að tryggja sér sinn fyrsta áfanga að alþjóðlegum meistaratitli. 

 

Umferð dagsins:

• AM Guðmundur Kjartansson (7) - Héðinn Steingrímsson (7½)
• FM Dagur Ragnarsson (5) - Björn Þorfinnsson (3½)
• SM Hannes Hlífar Stefánsson (4½) - FM Davíð Kjartansson (4)
• FM Sigurbjörn Björnsson (3) - Bárður Örn Birkisson (2)
• FM Guðmundur Gíslason (1½) - Vignir Vatnar Stefánsson (2) 

Staðan: 

1. Héðinn Steingrímsson (2562) 7½ v.
2. Guðmundur Kjartansson (2437) 7 v.
3. Dagur Ragnarsson (2320) 5 v.
4. SM Hannes Hlífar Stefánsson (2566) 4½ v.
5. FM Davíð Kjartansson (2389) 4 v.
6. AM Björn Þorfinnsson (2407) 3½ v.
7. FM Sigurbjörn Björnsson (2268) 3 v.
8.-9. Bárður Örn Birkisson (2162) og Vignir Vatnar Stefánsson (2334) 2 v.
10. Guðmundur Gíslason (2336) 1½ v. 

 

• Heimasíða mótsins
• Chess-Results
• Beinar útsendingar (Chess24) - hefjast kl. 17 á virkum dögum og kl 13 um helgar.

Úrslitaskák um Íslandsmeistaratitilinn á morgun - Héðinn hefur hálfan vinning á Guðmund

Það er ljóst að það verður úrslitaskák um Íslandsmeistaratitilinn í skák á morgun þegar Héðinn Steingrímsson (2562) og Guðmundur Kjartansson (2437) tefla. Héðni dugar jafntefli en Guðmundur, sem stjórnar hvíta heraflanum, þarf að vinna. Báðir unnu þeir í dag. Héðinn vann Sigurbjörn Björnsson (2268) og Guðmundur hafði sigur á Birni Þorfinnssyni (2407) í lengstu skák umferðarinnar. Báðir hafa þeir ótrúlegt skor. Héðinn hefur 7½ vinning í átta skákum en Guðmundur hefur 7 vinninga sem í "venjulegu árferði" myndi þýða efsta sætið.  

Önnur úrslit urðu þau að Hannes Hlífar Stefánsson (2566) vann Vigni Vatnar Stefánsson (2334), Davíð Kjartansson (2389) heldur áfram á beinu brautinni eftir slaka byrjun og vann nú Dag Ragnarsson (2320). Bárður Örn Birkisson (2162) lyfti sér af botninum með góðum sigri á móti Guðmundi Gíslasyni (2336).  

Lokaumferðin á morgun hefst kl. 13. 

Staðan: 

1. Héðinn Steingrímsson (2562) 7½ v.
2. Guðmundur Kjartansson (2437) 7 v.
3. Dagur Ragnarsson (2320) 5 v.
4. SM Hannes Hlífar Stefánsson (2566) 4½ v.
5. FM Davíð Kjartansson (2389) 4 v.
6. AM Björn Þorfinnsson (2407) 3½ v.
7. FM Sigurbjörn Björnsson (2268) 3 v.
8.-9. Bárður Örn Birkisson (2162) og Vignir Vatnar Stefánsson (2334) 2 v.
10. Guðmundur Gíslason (2336) 1½ v. 

• Heimasíða mótsins
• Chess-Results
• Beinar útsendingar (Chess24) - hefjast kl. 17 á virkum dögum og kl 13 um helgar.