Anish Giri með klukkufjöltefli á morgun í GAMMA - fjármálaráðherra meðal andstæðinga

Ofurstórmeistarinn Anish Giri (2771) verður með klukkufjöltefli á morgun. Meðal andstæðinga hans verður fjármálaráðherrann Benedikt Jóhannesson. Fjölteflið fer fram í höfuðstöðvum GAMMA, Garðastræti 37, og hefst kl. 13:00. Ráðherrann var um skeið meðal efnilegustu skákmanna landsins áður en önnur hugðarefni tóku við. Friðrik Ólafsson, fyrrverandi forseti FIDE, leikur fyrsta leik fjölteflisins.  

Andstæðingar Giri í fjölteflinu verða engin lömb að leika sér við. Elstur þeirra verður Gunnar Gunnarsson, 83 ára, fyrrum Íslandsmeistari í skák (árið 1966) og fótbolta með Val (árið 1956) og landsliðskonurnar Guðlaug Þorsteinsdóttir og Hrund Hauksdóttir. 

Andstæðingar Giri í fjölteflinu verða sem hér segir:

1. Benedikt Jóhannesson
2. Bragi Halldórsson
3. Gauti Páll Jónsson
4. Guðlaug Þorsteinsdóttir
5. Gunnar Björnsson
6. Gunnar Kr. Gunnarsson
7. Haraldur Haraldsson
8. Hrund Hauksdóttir
9. Óskar Víkingur Davíðsson
10. Stephan Briem
11. Svava Þorsteinsdóttir

Umhugsunartíminn verður 45 mínútur á mann.

Áhorfendur eru hjartanlega velkomnir! 

Birkir Karl endaði í þriðja sæti

Birkir Karl Sigurðsson (1851) endaði í þriðja sæti á skákmóti í Ástralíu sem lauk í gær. Birkir Karl hlaut 5½ vinning í sjö skákum.

Lokastöðuna má finna á Chess-Results.

Heimasíða mótsins.

Mads Andersen skákmeistari Danmerkur

Færeyingar og Danir hafa haldið þeirri venju að hafa sín meistaramót um páska. Landsliðsflokki Dananna lauk í gær. Danski stórmeistarinn Mads Andersen (2565) kom sá og sigraði og hlaut 7½ vinning í 9 skákum. Annar varð Allan Stig Rasmussen (2533) með 7 vinninga og þriðji varð Jesper Söndergard Thybo (2739) með 5½ vinning.

Heimasíða mótsins

Páskamót SA fer fram í dag

Sælir félagar í lok páskaveislunnar mánudaginn 17 apríl kl 13:00 bjóðum við upp á Skákveislu. Páskahraðskáksmótið. Nú ríður á að menn láti sig ekki vanta, heldur mæti hressir og kátir eftir páskeggjaátið og brenni nokkrum kaloríum við skákborðið. Það mættu 17 keppendur á Bikarmótið og nú stendur til að slá þá tölu út. Mótið er opið öllum sem kunna mannganginn.

Sjá nánar á heimasíðu SA.

Helgi Dam skákmeistari Færeyja

Helgi Dam Ziska varð í gær skákmeistari Færeyinga. Helgi vann öruggan sigur en hann hlaut 4½ vinning í 6 skákum. Fjórir skákmenn tóku þátt í landslisðflokki og tefldu tvöfalda umferð. Høgni Egilstoft Nielsen varð annar með 3 vinninga og John Rødgård þriðji með 2½ vinning.

Þetta er þriðji meistaratitill Helga en hann hefur ekki teflt svo oft á mótinu. Hann vann mótið síðast 2011.

Um 40 skákmenn tóku þátt í mótinu sem fram fór um páskana. 

Nánar á heimasíðu færeyska skáksambandsins.

 

GRENKE-mótið hófst í gær - Carlsen með nýtt útlit

GRENKE-mótið hófst í Karlsruhe í Þýskalandi í gær. Átta skákmenn taka þátt og þar af bæði heimsmeistarar karla og kvenna. Carlsen mætti með "nýtt útlit" og gerði jafntefli við Þjóðverjann Matthias Bluebaum (2634) í fyrstu umferð. Hou Yifan gerði sér hins vegar lítið fyrir og vann Fabiano Caruana (2817) í fyrstu umferðinni. Caruana hefur ekki náð sér strik undanfarið og er nú kominn niður 2800 skákstig á lifandi listanum. 

 

Önnur umferð hefst kl. 13 og þá teflir Carlsen við Levon Aronian (2774). 

GRENKE-mótið fer fram í Karlsruhe og Baden Baden dagana 15.-22. apríl. Takmörkuð umfjöllun verður um mótið á Skák.is vegna árekstur þess við GAMMA Reykjavíkurskákmótið. Áhugasömum er bent á Chess.24. 

GRENKE-mótið í ár varð til þess að Henrik Carlsen, faðir heimsmeistarans, getur að þessu sinni ekki tekið þátt í Reykjavíkurskákmótinu þar sem hann fylgir syni sínum á flest mót. Hann lofar hins vegar komu sinni að ári!

• Heimasíða mótsins
• Beinar útsendingar (hefjast kl. 13)

 

Skákþáttur Morgunblaðsins: Guðmundur Gíslason efstur í áskorendaflokki Íslandsmótsins

Í keppni áskorendaflokks Skákþings Íslands sem fram fer í Stúkunni á Kópavogsvelli þar sem keppt er um tvö sæti í landsliðsflokki hefur Ísfirðingurinn Guðmundur Gíslason unnið allar skákir sínar og er 1 ½ vinningi á undan Jóhanni Ingvasyni og Lenku Ptacnikovu sem eru með 3 ½ vinning. Með þrjá vinninga eru nokkrir, þ.ám. Jón Kristinsson, eini keppandinn sem orðið hefur Íslandsmeistari en það gerðist árin 1971 og aftur 1974. 

Óvænt úrslit á bandaríska meistaramótinu

Spænski leikurinn er eins og margir vita nefndur eftir spænskum presti, Ruy Lopez. Hann var samfara miklum breytingum sem urðu á iðkun skákar þegar styrkur drottningarinnar var aukinn á skákborðinu en breytingin er rakin til hylli Ísabellu Spánardrottningar sem eins og sagan greinir frá greiddi götu Kristófers Kólumbus. Eftir níu algengustu leiki þess spænska á svartur marga valkosti og einn þeirra sem virkar svolítið skringilega er afbrigði Ungverjans Breyer og byggist á því að riddara er leikið upp í borð. 

Vinur okkar Boris Spasskí, sem varð áttræður 30. janúar sl., tefldi Breyer-afbrigðið af slíkum þokka að unun var á að horfa. En þar kom að hann tapaði; í 10. einvígisskák gegn Fischer í Laugardalshöllinni um verslunarmannahelgina 1972 og aftur 20 árum síðar í fyrstu skák endurkomueinvígis þeirra í Júgóslavíu. Spasskí lagði meira til þróunar afbrigðisins með hvítu en flesta grunar; í áskorendaeinvígi sem hann háði við Lajos Portisch árið 1977 vann hann lykilskák með slíkum glæsibrag að mótspyrna Ungverjans hrundi. Á bandaríska meistaramótinu í St. Louis kom eiginlega „systurskák“ þessarar viðureignar. Wesley So heldur naumri forystu en stórskytturnar Hikaru Nakamura og Fabiano Caruana hafa átt í basli og sá síðarnefndi missti sennilega af lestinni í keppni um efsta sætið þegar hann tapaði í 7. umferð fyrir lítt þekktum Úkraínumanni sem náði við það efsta sæti ásamt So. Staðan á toppnum:

1. – 2. So og Zherebukh 4 ½ v. (af 7) 3. – 4. Akobian og Nakamura 4 v. 5. – 9. Robson, Caruana, Shankland, Naroditsky og Onischuk 3 ½ v. Keppendur eru 12 talsins.

Bandaríska meistaramótið 2017:

Zherebukh – Caruana

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O Be7 6. He1 b5 7. Bb3 d6 8. c3 O-O 9. h3 Rb8 10. d4 Rbd7 11. Rbd2 Bb7 12. Bc2 He8 13. Rf1 Bf8 14. Rg3 g6 15. a4 c5 16. d5 c4 17. Bg5 h6 18. Be3 Rc5 19. Dd2 h5 20. Bg5 Bg7 21. Hf1 Dc7

Allt saman þekkt en drottningin gæti verið betur geymd á e7 til að eiga f8-reitinn.

22. Bh6 Bh8 23. Rg5 Rh7 24. Rxh7 Kxh7 25. Be3 De7 26. f4!

Þessi framrás reynir á burðarveggi kóngsstöðunnar en riddarinn fær e5-reitinn.

26. ... exf4 27. Bxf4 Kg8 28. Hf3 Bg7 29. Haf1 Rd7 30. Bh6 Bxh6 31. Dxh6 Df8 32. Dd2 Re5 33. Hf6 Had8 34. Dg5 Dg7 35. Bd1! Bc8 36. Dh4 Kf8 37. Df4 Dg8 38. Kh1 He7 

39. Bxh5!

Þessi biskup sem stundum rekst á eigin peð í spænska leiknum tekur nú til óspilltra málanna. Það er ekki hollt að taka hann: 39. ... gxh5 40. Rxh5 og „Houdini“ segir mér að svarta staðan sé óverjandi.

39. ... bxa4 40. Bd1 Dg7 41. Bxa4 Dh7 42. Dg5 a5 43. Kg1 Dh8 44. H1f4 Dg7 45. Hh4 Rd3 46. Hh6 Re5 47. Hf4 Bd7 48. Dh4! Kg8 49. Dxe7 He8 50. Dg5 Bxa4 51. Hf6

- og svartur gafst upp.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 8. apríl 2017

Skákþættir Morgunblaðsins

GAMMA Reykjavíkurskákmótið hefst á miðvikudag - Giri teflir við fjármálaráðherra á þriðjudaginn

Upphitun fyrir Reykjavíkurmótsveislan hefst í höfuðstöðvum GAMMA, þriðjudaginn 18. apríl nk. kl. 13:00. Þá teflir ofurstórmeistarinn Anish Giri, helsta stjarna Reykjavíkurskákmótsins, klukkufjöltefli við 10-12 skákmenn. Meðal andstæðinga hans þar verður fjármálaráðherrann Benedikt Jóhannesson en ráðherrann var um skeið meðal efnilegustu skákmanna landsins áður en önnur hugðarefni tóku við. Friðrik Ólafsson, fyrrverandi forseti FIDE, mun vera viðstaddur og leika fyrsta leik fjölteflisins. Upphitunin heldur áfram kl. 18 þegar opnunarpartý mótsins verður haldin í Smurstöðunni í Hörpu. Þangað eru allir keppendur og skákáhugamenn velkomnir. 

Andstæðingar Giri í fjölteflinu verða engin lömb að leika sér við. Elstur þeirra verður Gunnar Gunnarsson, 83 ára, fyrrum Íslandsmeistari í skák (árið 1966) og fótbolta með Val (árið 1956). Þá munu landsliðskonurnar Guðlaugu Þorsteinsdóttur og Nansý Davíðsdóttur meðal annars etja kappi við Giri. 

Fjölteflið verður forsmekkurinn að sjálfu Alþjóðlega Reykjavíkurskákmótinu sem fram fer í Hörpu 19.-27. apríl. Mótið verður hið  sterkasta og fjölmennasta í 53 ára sögu þess. 

Alls eru um 280 skákmenn skráðir til leiks frá um 45 löndum. Þar af eru 35 stórmeistarar og hafa þeir aldrei verið fleiri. 

Ofurstórmeistararnir 

Ofurstórmeistarar eru þeir taldir sem hafa 2700 skákstig eða meira. Áðurnefndur Anish Giri, sem hefur 2771 skákstig, er einn besti skákmaður heims og sá stigahæsti sem nokkurn tímann hefur teflt á Reykjavíkurskákmóti í hálfrar aldar sögu mótanna. 

Georgíumaðurinn Baadur Jobava er einn frumlegasti skákmaður heims og vekur taflmennska hans jafnan athygli.

Dmitry Andreikin er þekktur fyrir að tefla ávallt til sigurs og vakti kraftmikil taflmennska hans í mótinu í fyrra mikla athygli. 

Goðsagnir

 

Lettinn Alexei Shirov er einn allra skemmtilegast skákmaður heims, þekktur fyrir sinn leiftrandi stíl,  og hefur hefur margoft verið líkt landa sinn, Mikhail Tal, sem sigraði á fyrsta Reykjavíkurskákmótinu árið 1964. Shirov sigraði á Reykjavíkurskákmótinu 1992 ásamt Jóhanni Hjartarsyni og hefur síðan haldið sér í hópi bestu skákmanna heims. Hann er fjórði í stigaröð keppenda.

 

Gata Kamsky tefldi síðast á Reykjavíkurskákmótinu 1990. Þá var hann 15 ára að aldri og þótti undrabarn. Kamsky komst næstum því á topp skákheimsins því hann tefldi heimsmeistaraeinvígi við Karpov sem hann tapaði.

 

Eugene Torre hefur löngum verið besti skákmaður Filippseyinga. Torre er sá skákmaður, sem teflt hefur á flestum Ólympíuskákmótum allra skákmanna í skáksögunni, eða alls 22 sinnum. Á Ólympíuskákmótinu í Bakú í fyrra hlaut hann 10 vinninga í 11 skákum og hefur sjaldan verið í betra formi.   

Óvæntir sigurvegarar tveggja síðustu ára Abijeet Gupta og Erwin L´Ami eru svo að sjálfsögðu meðal keppenda.

Skákdrottningar 

 

Indverska skákdrottningin Tania Sadchev stal senunni í fyrra með frábærri frammistöðu og geislandi framkomu. Hún er fastagestur hér. Landskona hennar Harika Dronavalli tekur einnig þátt en hún er meðal bestu skákkvenna heims.

 

Meðal annarra gesta má nefna hina mongólsku Tuvshintugs Batchimeg en hún verður þar með fyrsti skákmaðurinn frá Mongolíu sem teflir á Reykjavíkurskákmótinu.

 

 

Einnig má nefna hina írönsku Dorsa Derakhshani sem hefur vakið athygli fyrir það að neita að tefla með slæðu og hefur gerð brotræk úr landsliði Írans fyrir þá sök.

 

 

Undrabörnin

Það hefur ávallt verið lögð mikil áhersla á að fá hingað til landsins undrabörn. Í áranna rás hafa t.d. Magnus Carlsen, Gata Kamsky, Fabiano Caruana og Hikaru Nakamura,  sótt landið sem kornungir skákmenn.

 

Á mótinu nú er vert að benda á tvo unga indverska drengi sem báðir eru taldir geta orðið meðal bestu skákmanna heims - jafnvel heimsmeistarar. Praggnanandhaa Rameshbabu er annar þeirra. Sá er aðeins 11 ára og sá yngsti í heimi sem náð hefur titli alþjóðlegs meistara.

 

Hinn er Nihal Sarin, 12 ára, og er líka alþjóðlegur meistari. Sarin þessi lagði Helga Ólafsson t.d. nýlega að velli í hraðskák í Moskvu.  Þeir eru báðir talda hafa möguleika á því að verða yngsti stórmeistari sögunnar. Nýlega grein má lesa um kappann í Chessbase. Hann er þessa stundina að tefla í Fagranesi í Noregi og er að gera þar mjög góða hluti.  

Heimavarnarliðið 

Nærri 100 íslenskir skákmenn taka þátt í mótinu nú og þar á meðal þrír stórmeistarar. Stigahæstur þeirra er Hannes Hlífar Stefánsson, sigursælasti skákmaður í sögu Reykjavíkurskákmótanna. Hannes hefur sigrað fimm sinnum á mótinu.

Það sætir tíðindum að Jóhann Hjartarson tekur nú þátt í mótinu nú í fyrsta skipti í 21 ár og er það mikið fagnaðarefni.  Sá þriðji er svo Þröstur Þórhallsson.  Sjö íslenskar skákkonur taka þátt. Fyrir þeim fer Lenka Ptáncíková, stórmeistari kvenna og margfaldur Íslandsmeistari.

 

Alþjóðulegu meistararnir Guðmundur Kjartansson, Bragi og Björn Þorfinnssynir taka þátt og það gerir einnig Vignir Vatnar Stefánsson, okkar efnilegasti skákmaður. 

Íslenska heimavarnarliðið er skemmtilegt blanda af atvinnumönnum, áhugamönnum, eldri skákmönnum og ungum ljónum sem eru að stíga sín fyrstu skref. Akureyringar fjölmenna á Reykjavíkurskákmótið nú og er það gleðilegt og vitnar um skákgrósku norðan heiða. 

Færeyingar fjölmennir 

Um 180 erlendir skákmenn taka þátt í mótinu og hafa þeir aldrei verið fleiri. Flestir þeirra koma frá Bandaríkjunum, Indlandi og Kanada.  Góð þátttaka Færeyinga vekur athygli en þeir eru 12 talsins. Fyrir þeim hópi fer Helgi Dam Ziska, fyrsti stórmeistari okkar góðu frændþjóðar. 

Ekki bara skákmót

 

Reykjavíkurskákmótið er miklu frekar skákhátíð  en skákmót. Efnt er til alls konar sérviðburða meðan mótið fer fram. Áður hefur verið minnst á fjöltefli Anish Giri. Meðal annarra sérviðburða má nefna: 

Opnunarpartý, fyrirlestur um skákþjálfun, fyrirlestur um það sem gerist bakvið tjöldin í heimsmeistaraeinvígum, hraðskákmót, barnahraðskákmót, spurningkeppni (pub quiz), fótbolta, gullna hringinn með viðkomu við leiði Fischers og kotrumót. 

Þesir viðburðir eru opnir gestum og gangandi. 

Umferðir hefjast yfirleitt kl. 15. Boðið verður upp á skákskýringar alla daga í Hörpu og hefjast þær um tveimur tímum eftir upphaf umferðar eða um kl. 17. Um skákskýringar sjá okkar fremstu skákmenn af þeim sem ekki taka þátt í mótinu að þessu sinni.

Beinar útsendingar á netinu verða í umsjón Simon William og Fionu Antoni-Steil. 

Ítarlegur fréttaflutningur frá mótinu verður alla daga á www.skak.is.

Heimasíða mótsins

Páskamót SA fer fram á mánudaginn

Sælir félagar í lok páskaveislunnar mánudaginn 17 apríl kl 13:00 bjóðum við upp á Skákveislu. Páskahraðskáksmótið. Nú ríður á að menn láti sig ekki vanta, heldur mæti hressir og kátir eftir páskeggjaátið og brenni nokkrum kaloríum við skákborðið. Það mættu 17 keppendur á Bikarmótið og nú stendur til að slá þá tölu út. Mótið er opið öllum sem kunna mannganginn.

Sjá nánar á heimasíðu SA.

Áskell tapaði fæstum á Bikarmótinu

Þegar Bikarmótinu var fram haldið í dag, föstudaginn langa, kom fram tillaga um að lengja skákirnar. Skákstjóri lagðist þó gegn því og sættust keppendur að tefla enn 15 mínútna skákir, þótt dagurinn væri langur. Eins og vera ber fækkaði keppendum smám saman þegar á leið og eftir níundu umferð voru einungis þrír eftir. Ólafur Kristjánsson gekk svo af skaptinu eftir tap fyrir Jóni Kristni og settust þá að tafli Jón og Áskell, einir eftir. Var Jón með tvö töp (fyrir Sigurðum A og E), en Áskell með eitt og hálft (fyrir Jóni sjálfum og hálft gegn Eymundi). Skákina vann Jón eftir nokkrar sviptingar og nægði nú jafntefli í síðustu skák mótsins. Hann fékk þó snemma lakara tafl og mátti að lokum játa sig sigraðan. Þar með var hann kominn í þrjú töp, en Áskell hékk í tveimur og hálfu og fær nafn sitt á bikarinn að launum. Lauk mótinu í tólftu umferð og þótti á allan máta vel heppnað. Þó má vera að reglum verði breytt lítillega til að minnka hættuna á að sami keppandi sitji yfir fleiri en eina umferð í röð, eins og gerðist nú í dag. 

Sjá nánar á heimasíðu SA.