Íslandsmót skákfélaga hefst í kvöld

Fyrri hluti Íslandsmóts skákfélaga 2017-2018 fer fram dagana 19.–22. október nk. Mótið fer fram í Rimaskóla. Fyrsta umferð (eingöngu í 1.deild) mun hefjast kl. 19.30 fimmtudaginn 19. október. Aðrar deildir munu hefja taflmennsku föstudaginn 20. október kl. 20.00 og síðan tefla laugardaginn 21. október kl. 11.00 og kl. 17.00 sama dag. Síðasta umferðin í fyrri hlutanum hefst kl. 11.00 sunnudaginn 22. október. 

Umhugsunartími er 90 mín. á skákina + 30 sek. viðbótartími bætist við eftir hvern leik.

Skákstjórar: Ingibjörg Edda Birgisdóttir (yfirdómari), Kristján Örn Elíasson, Hallfríður Sigurðardóttir, Ólafur Ásgrímsson og Bragi Kristjánsson.

Liðsstjórar eru minntir á að skila inn styrkleikaröðum listum fyrir fyrstu umferð. Þá má senda á netfangið [e-mail]. Allar upplýsingar um mótið má nálgast á heimasíðu Skáksambandsins. 

Jóhann, Björgvin og Patrick efstir á Skákþingi Garðabæjar

Önnur umferð Skákþings Garðabæjar fór fram síðastliðið mánudagskvöld. Á efsta borði gerðu Vignir Vatnar og Björn Hólm tilþrifalítið jafntefli. Á næsta borði áttust við Björgvin Víglundsson og Gauti Páll. Gauti Páll mætti til leiks með skyr dós í farteskinu. Líklega hefur hann ætlað að koma andstæðingi sínum úr jafnvægi, þar sem Björgvini mun þykja skyrið gott.

Björgvin kom með krók á móti bragði og var vopnaður þrem banönum. Það er skemmst frá því að segja að Björgvin lét herkænsku Gauta ekki trufla sig og vann skákina fumlaust. Patrick Karcher vann Pál Andra örugglega, þar sem Patrick nýtti sér veikleika í stöðu andstæðing síns til að plokka af honum hvert peðið á fætur öðru. Jóhann Ragnarsson vann Páli Sigurðsson örugglega með svörtu, Páll lék peði sínu snemma á f4 og gaf riddara Jóhanns þannig færi á að nýta sér g4 reitinn og planta drottningu sinni á b6. Þannig nýtti hann skálínuna g1-a7 til að gera Páli lífið leitt.

Að loknum tveim umferðum eru Jóhann, Björgvin og Patrick með fullt hús vinninga og á hæla þeirra koma svo Vignir Vatnar, Björn Hólm og Bárður Örn.

Nú verður gert hlé á mótinu fram yfir deildakeppnina og fer næsta umferð fram mánudagskvöldið 30. október kl. 19:30.

Úrslit og skákir er að finna á : http://chess-results.com/tnr307354.aspx…

Unglingameistaramót Íslands fer fram 27.-29. október

Unglingameistaramót Íslands fer fram dagana 27.-29. október nk. Íslandsmeistarinn tryggir sér sæti í næsta landsliðsflokki. Efsti keppandi undir 2100 skákstigum fær keppnisrétt á Norðurljósamótið. 

Dagskrá:

• 1.-4. umferð: Föstudagskvöldið 27. október. Fyrsta umferð hefst 19:00.
• 5. umferð 11:00 á laugardegi.
• 6. umferð 17:00 á laugardegi.
• 7. umferð 13:00 á sunnudegi. 

Mótið er opið skákmönnum fæddum á bilinu 1995-2003. Jafnframt er yngri skákmönnum heimilt að taka þátt hafi þeir 1800 stig eða fleiri, íslensk eða FIDE-stig, miðað við nýjustu stigalista. Íslandsmeistarar u16, u14 og u12 eiga einnig þátttökurétt.  

Teflt verður um Íslandsmeistaratitilinn verði menn jafnir að vinningum. Stig eru látin gilda um önnur sæti verði menn jafnir að vinningum.  

Tímamörk í fyrstu fjórum umferðunum er 20+5 og 90+30 í seinni þremur. 

Mótið er reiknað til alþjóðlegra skákstiga. 

Mótið fer fram í Skáksambandi Íslands að Faxafeni 12. Skráning er til hádegis 27. október á Skák.is. Þátttökugjald er 1.500 kr. 

Upplýsingar um þegar skráða keppendur má finna hér. 

Unglingameistari 2016 varð Bárður Örn Birkisson.

Fyrsta deild Íslandsmóts skákfélaga hefst á fimmtudaginn - aðrar deildir á föstudaginn

Fyrri hluti Íslandsmóts skákfélaga 2017-2018 fer fram dagana 19.–22. október nk. Mótið fer fram í Rimaskóla. Fyrsta umferð (eingöngu í 1.deild) mun hefjast kl. 19.30 fimmtudaginn 19. október. Aðrar deildir munu hefja taflmennsku föstudaginn 20. október kl. 20.00 og síðan tefla laugardaginn 21. október kl. 11.00 og kl. 17.00 sama dag. Síðasta umferðin í fyrri hlutanum hefst kl. 11.00 sunnudaginn 22. október. 

Umhugsunartími er 90 mín. á skákina + 30 sek. viðbótartími bætist við eftir hvern leik.

Skákstjórar: Ingibjörg Edda Birgisdóttir (yfirdómari), Kristján Örn Elíasson, Hallfríður Sigurðardóttir, Ólafur Ásgrímsson og Bragi Kristjánsson.

Liðsstjórar eru minntir á að skila inn styrkleikaröðum listum fyrir fyrstu umferð. Þá má senda á netfangið [e-mail]. Allar upplýsingar um mótið má nálgast á heimasíðu Skáksambandsins. 

Bikarsyrpa TR fer fram 27.-29. október

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað fjórða árið í röð. Líkt og síðastliðinn vetur verða mót syrpunnar fimm talsins og verða tefldar sjö umferðir í hverju móti. Mótin fara fram í Skákhöll TR að Faxafeni 12.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2002 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Þriðja mót Bikarsyrpunnar hefst föstudaginn 27. október og stendur til sunnudagsins 29. október. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 27. október kl. 17.30 (fös)
2. umferð: 28. október kl. 10.00 (lau)
3. umferð: 28. október kl. 13.00 (lau)
4. umferð: 28. október kl. 16.00 (lau)
5. umferð: 29. október kl. 10.00 (sun)
6. umferð: 29. október kl. 13.00 (sun)
7. umferð: 29. október kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Skráning fer fram í gegnum skráningarform hér að neðan. Hlökkum til að sjá ykkur!

Skráningarform

Skráðir keppendur

Mót Bikarsyrpunnar í vetur: 25.-27. ágúst, 29. sep-1. okt, 27.-29. okt, 16.-18. feb, 6.-8. apr

Haustmót SA: Jón Kristinn hélt titlinum!

Síðari hluta Haustmóts SA lauk nú í gær. Móðið var tvískipt; í fyrri hlutanum voru tefldar sjö atskákir og fimm kappskákir í síðari hlutanum og var gildi kappskáknanna tvöfalt meira en atskákanna í lokaúteikningnum. Það breytti þó litlu um úrslitin í þetta sinn, þar sem Jón Kristinn Þorgeirsson (alias FM Jokko Thorgeirsson) fékk flesta vinninga í báðum hlutum mótsins.  Úrslitin í lokaumferðinni urðr þessi:

• Arnarson-Jón Kristinn     0-1
• Áskell-Arnar Smári        1-0
• Smári-Eymundur            1/2
• Eiríksson-Jón Magg        1-0

Hart var barist í öllum skákum, einkum hjá þeim Arnarsyni og Þorgeirssyni, þar sem sá fyrrnefndi þjarmaði að fidemeistaranum sem þá náði að klóra sig fram úr vandanum að lokum og sigra. Skaust Áskell við þetta upp í annað sætið og naut þess þá að hafa sloppið við eiga við nokkra af grimmustu stríðsmönnunum í þetta sinn.

Lokastaðan á mótinu varð því þessi (stig reiknu skv. því sem að framan er sagt):

1. Jón Kristinn Þorgeirsson         15,5
2. Áskell Örn Kárason               12,5
3. Sigurður Arnarson                11
4. Ólafur Kristjánsson              10
5. Smári Ólafsson                    9
6. Sigurður Eiríksson                8,5
7. Eymundur Eymundsson               7,5
8. Arnar Smári Signýjarson           6,5
9. Símon Þórhallsson og
10. Haraldur Haraldsson               4
11. Jón Magnússon                     2
12. Ulker Gasanova                    1,5

 

• Heimasíða SA
• Chess-Results (síðari hluti)
• Chess-Results (fyrri hluti)

 

 

Hraðskákmót Hugins fer fram í kvöld

Hraðskákmót Hugins í Mjóddinni verður haldið mánudaginn 16. október nk. Teflt er í félagsheimili Hugins í Álfabakka 14a og hefst taflið kl. 20. Tefldar verða 7 umferðir tvöföld með umhugsunartímanum 4 mínútur + 2 sekúndur á hvern leik.

Mótið verður reiknað til hraðskákstiga. Heildarverðlaun á mótinu eru kr. 20.000.

Núverandi hraðskákmeistari Hugins er Hjörvar Steinn Grétarsson. Þetta er í tuttugasta og annað sinn sem mótið fer fram. Björn Þorfinnsson, Davíð Ólafsson og Hjörvar Steinn Grétarsson hafa hampað titlinum oftast eða fjórum sinnum. Verðlaunaafhending vegna Meistaramóts Hugins (suðursvæði) sem lauk í síðustu viku verður í lok hraðskákmótsins.

Verðlaun skiptast svo:

1. 10.000 kr.
2. 6.000 kr.
3. 4.000 kr.

Þátttökugjöld eru kr. 400 fyrir félagsmenn en kr. 600 fyrir aðra. Fyrir unglinga í Huginn eru þau kr. 300 en kr. 400 fyrir aðra.

Góður árangur Fjölnis í lokaumferðinni - Davíð með alþjóðlegan áfangaA

Skákdeild Fjölnis náði afar góðum 3-3 úrslitum gegn lettnesku sveitinni Riga Tecnical University í lokaumferð EM taflfélaga. Héðinn Steingrímsson, Sigurbjörn Björnsson og Davíð Kjartansson unnu sínar skákir. Davíð vann sína fjórðu skák í röð og tryggði sér um sinn leið sinn þriðja áfanga að alþjóðlegum meistaratitli. Jafnframt fór hann yfir 2400 skákstigin. Davíð þarf hins vegar einn áfanga til viðbótar en það er bara tímaspursmál hvenær hann næst.

Fjölnir endaði í 20. sæti og en fyrirfram var sveitinni raðað í 19. Davíð stóð sig best Fjölnismanna með 5 vinninga. Héðinn Steingrímsson hlaut 4 vinninga og Sigurbjörn Björnsson 3½ vinning. Allir þrír áttu þeir frábæran endaspretti. Davíð hækkaði um 18 stig en Sigurbjörn næstmest eða um 7 stig. 

Árangur Fjölnismanna

Fjölnismenn unnu 4-2 á sveit SK Elektroprivreda frá Svartfjallalandi. Björn Þorfinnsson, Gunnar Freyr Rúnarsson og Halldór Pálsson unnu sínar skákir. 

Sveitin endaði í 29. sæti en fyrirfram var henni raðað í 32. sæti. Halldór Pálsson stóð sig frábærlega og hlaut 4½ vinning. Eftir tapaði í fyrstu umferð tapaði hann ekki skák. Björn Þorfinnsson og Páll Agnar Þórarinsson hlutu 3½ vinning. 

Árangur Víkinga

Halldór Pálsson hækkaði um 35 stig og Gunnar Freyr Rúnarsson um 30 stig.

Nánar verður sagt frá niðurstöðu mótsins síðar. Án efa eiga báðar sveitirnar eftir að birta ítarlega pistla á sínum vefsíðum. 

 

• Heimasíða mótsins
• Chess-Results
• Beinar útsendingar

 

Skákþáttur Morgunblaðsins: Úrslitasigur á eyjunni Mön

Nokkrum mínútum áður en úrslitarimman um efsta sætið á opna mótinu á Mön milli Fabiano Caruana og Magnúsar Carlsen hófst sást til þess fyrrnefnda á gangi ásamt félaga sínum og hjálparkokki, Úsbekanum Rustam Kazimdzhanov. Framhjá þeim tölti vingjarnlegur hestur og dró á eftir sér vagn eftir fyrirfram markaðri braut. Frá hafinu umhverfis eyjuna barst alveg dásamleg lykt af þangi. Þó að Caruana gæti á göngu sinni ekki verið viss um hvaða vopn heimsmeistarinn kynni að velja gegn kóngspeðinu hafði hann lagt hart að sér við undirbúning og þegar þeir settust að tafli kom upp afbrigði spænska leiksins sem áður hefur sést í skákum Magnúsar og Caruana var ekki seinn á sér að skjóta fram afrakstri undirbúningsvinnu sinnar; í 15. leik lék hann g-peði sínu fram um tvo reiti. Árás peða á kóngsvæng lá í loftinu. Ólíkt höfðust þeir að; í tvo klukkutíma kvöldið áður undirbjó Magnús sig með því að stunda innanhússfótbolta m.a. við nokkra íslensku piltanna sem tóku þátt í mótinu. Það reyndist betri undirbúningur. Hann mætti til þessarar mikilvægu viðureignar ferskur og frjáls:

Mön 2017; 8. umferð:

Fabiano Caruana – Magnús Carlsen

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O b5 6. Bb3 Bc5 7. c3 d6 8. a4 Hb8 9. d4 Bb6 10. a5 Ba7 11. h3 O-O 12. Be3 Ha8 13. He1 h6 14. Rbd2 He8

Í 7. umferð fékk Caruana þessa stöðu upp gegn Gawain Jones sem lék 14. ... exd4 15. cxd4 Rb4 og eftir 16. e5! Rfd5 17. Re4 Rxe3 18. Hxe3 Bb7 19. e6! Rd5 20. Exf7+ Kh8 21. He1 Hxf7 22. Hc1 Hc8 kom óþægilegur hnykkur, 23. Rfg5! Caruana vann í 32 leikjum.

15. g4!? 

Og hvernig skyldi nú vera best að svara þessari „stríðsyfirlýsingu“. Magnús kýs að halda uppi vörnum að baki víglínunnar.

15. ... De7 16. Rf1 Rd8 17. Rg3 c5 18. Dd2?!

Beinir spjótum sínum að h6-peðinu en betra var 18. Bd5 eða 18. Rh4.

18. ... c4 19. Bc2 Rh7 20. b4 cxb3 21. Bxb3 Be6 22. Bc2?

Missir þráðinn, 22. Bd5! var prýðilegur leikur.

22. ... Hc8 23. Bd3 Rb7 24. Hec1 Dd8!

Nú fellur a-peðið og allar góðar fyrirætlanir Caruana.

25. Db2 Rxa5 26. Rd2 d5 27. He1 Bb8 28. exd5 Bxd5 29. Bf5 Hc6!

Valdar a6-peðið. Það örlar ekki á mótspili.

30. Da3 Rb7 31. Had1 exd4 32. Bxd4 Rg5 33. c4 Hxe1 34. Hxe1 Be6 35. De3 Bf4! 

Lokahnykkurinn. 36. Dxf4 strandar á 36. ... Rxh3+ og vinnur drottninguna. Caruana gafst upp.

Nakamura reyndi ekki að vinna heimsmeistarann í lokaskákinni. Jafntefli dugði fyrir góðu sæti. Lokaniðurstaða efstu manna:

1. Magnús Carlsen 7 ½ v. (af 9) 2. – 3. Anand og Nakamura 7 v. 4. Kramnik, Caruana, Adams, Eljanov, Vidit, Sutovsky, Rapport, Shirov og Swapnil 6 ½ v.

Þrír íslenskir skákmenn unnu til verðlauna, Gauti Páll Jónsson náði bstum árangri keppenda á stigabilinu 2000-2100 elo í efsta flokki. Alexander Mai varð í 2. sæti í keppnisflokki (major) undir 1900 elo-stigum með 5 ½ vinning af sjö mögulegum og Freyja Birkisdóttir varð í 7. sæti í keppnisflokki (minor) undir 1800 elo-stigum. Hún hækkaði mest allra íslensku þátttakendanna eða um 129 elo-stig. Greinarhöfundur, sem var fararstjóri, náði besta árangri íslensku skákmannanna í efsta flokki með 5 v. af 9 mögulegum og 59. sæti af 160 keppendum en Dagur Ragnarsson endaði í 68. sæti með sömu vinningatölu. 

Helgi Ólafsson [e-mail]

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 7. október 2017

Skákþættir Morgunblaðsins

Skákþing Garðabæjar hafið

Fyrsta umferð Skákþings Garðabæjar var tefld í gær. Mótið er vel skipað í ár og flestir þátttakanda eru með ELO stig á bilinu 1900 – 2200 stig, sem gefur væntingar um spennandi mót. Mótið jaðrar líka við að vera alþjóðlegt, þar sem Þýskaland og Rúmenía eiga sinn fulltrúa hvor. Hart var barist á reitunum 512 og mátti ekki alltaf sjá hvor væri hærri á stigum. Úrslitin fóru samt eftir bókinni fyrir utan að Páll Andrason bar sigurorð af Hilmi Frey og Jón Úlfljótsson gerði jafntefli við Bárð Örn Birkisson. 

 
Vignir Vatnar bar sigurorð af Eiríki Björnssyni, þar sem Eiríkur var með vænlega stöðu á tímabili, en fataðist flugið með lítinn tíma á klukkunni. Páll Andri tefldi mjög vandaða skák við Hilmi Frey og saumaði jafnt og þétt að honum og þar kom að varnir Hilmis brugðust, enda var hann orðinn tæpur á tíma undir lokin. Jón Úlfljótsson og Bárður Örn gerðu jafntefli í skák sem var í jafnvægi mestan tíma, þótt Bárður hafi misst af dauðafæri til að vinna skákina eftir fingurbrjót Jóns í endataflinu. Það var ekki lognmolla í skák þeirra Sverris Hákonarsonar og Björgvins Víglundssonar. Sverrir tefldi djarft og fórnaði manni fyrir (á að líta) vænlega sókn. Björgvin reyndist hins vegar vandanum vaxinn og stóðst áhlaupið og vann að lokum örugglega.

Kjölfesturnar í Taflfélagi Garðabæjar þeir Páll Sigurðsson og Jóhann Ragnarsson unnu þægilega sigra eftir leiðinda afleiki andstæðinga þeirra. Björn Hólm og Gauti Páll máttu prísa sig sæla að hafa borið sigurorð af sínum andstæðingum, þrátt fyrir mikinn stigamun. Sérstaklega held ég að Gauti varpi öndinni léttar, en á tímabili var andstæðingur hans Dorin Tamasan með unnið tafl. 

Staðan og skákir fyrstu umferðar eru aðgengilegar hér: 

http://chess-results.com/tnr307354.aspx…