Hraðskákkeppnin: Garðbæingar fara austur fyrir fjall

Í dag var dregið í fyrstu umferð Hraðskákkeppni taflfélaga. Sautján lið og taka þátt og því fer ein viðureign fram í forkeppni. Í fyrstu umferð má nefna að Selfyssingar taka á móti Garðbæingum og Skákfélag Akureyrar mætir Skákdeild Fjölnis. 

Pörun forkeppni:

• TRuxvi - Kvennalandsliðið

Pörun fyrstu umferðar (16 liða úrslit)

• Skákfélagið Huginn-b - Skákgengið
• Vinaskákfélagið - Bolungarvík
• Skákfélagið Huginn-a - Skákfélag Reykjanesbæjar
• Skákfélag Selfoss og nágrennis - Taflfélag Garðabæjar
• Víkingaklúbburinn - Skákfélag Íslands
• Skákfélag Akureyrar - Skákdeild Fjölnis
• Ungmennasamband Borgarfjarðar - Taflfélag Reykjavíkur
• Skákdeild Hauka - TRuxvi/Kvennalandsliðið

Fyrstu umferð á að vera lokið eigi síðar en 15. ágúst nk.

Borgarskákmótið fer fram 14. ágúst í Ráðhúsinu

Borgarskákmótið fer fram föstudaginn 14. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa  Taflfélag Reykjavíkur og Skákfélagið Huginn, að mótinu, eins og þau hafa gert síðustu ár. Gera má ráð fyrir að margir af sterkustu skákmönnum þjóðarinnar taka þátt í því. Skákmenn eru hvattir til að skrá sig sem fyrst eftir að opnað verður fyrir skráningu. Mótið er öllum opið og er þátttaka ókeypis en skráning mun fara fram á Skák.is

Einnig er hægt að skrá sig í í síma 866 0116 (Vigfús) og 899 9268 (Björn). Tefldar verða 7 umferðir með 7 mínútna umhugsunartíma. Þetta er í 28. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Jón Viktor Gunnarsson, sem þá tefldi fyrir Jómfrúnna.

Markus Ragger sigurvegari Politiken Cup

Politiken Cup lauk í dag í Helsingør í Danavaldi. Tíu skákmenn urðu efstir og jafnir með 8 vinninga. Efstur þeirra eftir stigaútreikning og þar með sigurvegari mótsins varð Austurríksmaðurinn Markus Ragger (2688). Ragger mun fara fyrir liði Austurríkis á EM landsliða sem fram fer hér í Laugardalshöll í haust. Þess má reyndar geta að átta af þeim tíu sem urðu efstir koma til Íslands á haust!

Lokastöðuna má nálgast hér.

G. Sverrir Þór var eini fulltrúi landans á Politiken Cup. Hann hlaut 4,5 vinning. Metþátttaka var á mótinu en ríflega 400 keppendur tóku þátt.

Politiken Cup

 

 

Ný alþjóðleg skákstig: Hannes stigahæstur - Páll hækkar mest

Ný alþjóðleg skákstig komu út í gær. Hannes Hlífar Stefánsson er sem fyrr stigahæsti skákmaður landsins. Þrír nýliðar eru á listanum. Þeirra stigahæstur er Bjarki Ólafsson. Páll Agnar Þórarinsson hækkar mest frá júlí-listanum. Tiltölulega litlar breytingar eru á ferðinni nú enda aðeins eitt innlend mót reiknað til stiga í júlí en það var Sumarsyrpa Breiðabliks.

Topp 20

Hannes Hlífar Stefánsson (2593) er sem fyrr stigahæsti skákmaður landsins. Hjörvar Steinn Grétarsson (2567) og Héðinn Steingrímsson (2550) koma næsti.

Nr.	Skákmaður	Stig	Sk	Mism
1	Stefansson, Hannes	2593	0	0
2	Gretarsson, Hjorvar Steinn	2567	10	8
3	Steingrimsson, Hedinn	2550	9	-12
4	Olafsson, Helgi	2546	0	0
5	Hjartarson, Johann	2529	0	0
6	Petursson, Margeir	2521	0	0
7	Danielsen, Henrik	2510	0	0
8	Arnason, Jon L	2499	0	0
9	Kristjansson, Stefan	2485	0	0
10	Gunnarsson, Jon Viktor	2458	0	0
11	Thorsteins, Karl	2453	0	0
12	Gretarsson, Helgi Ass	2450	0	0
13	Kjartansson, Gudmundur	2447	9	-5
14	Gunnarsson, Arnar	2425	0	0
15	Thorhallsson, Throstur	2415	0	0
16	Thorfinnsson, Bragi	2414	0	0
17	Thorfinnsson, Bjorn	2411	0	0
18	Jensson, Einar Hjalti	2394	0	0
19	Olafsson, Fridrik	2392	0	0
20	Johannesson, Ingvar Thor	2377	9	5
21	Ulfarsson, Magnus Orn	2377	0	0

 

Nýliðar

Þrír nýliðar eru á listanum. Þeirra stigahæstur er Bjarki Ólafsson (1300).

Þe	Skákmaður	Stig	Sk	Mism
1	Olafsson, Bjarki	1300	7	1300
2	Bjarnthorsson, Alexander Mar	1273	7	1273
3	Jonsson, Kristjan Dagur	1192	7	1192

 

Mestu hækkanir

Páll Agnar Þórarinsson (41) hækkar mest allra eftir frábæra frammistöðu á opna skoska meistaramótinu. Næstir eru Birkir Ísak Jóhannsson (20) og Nikulás Ýmir Valgeirsson (12) eftir frammistöðu sína í Sumarsyrpu Breiðabliks.

Þe	Skákmaður	Stig	Sk	Mism
1	Thorarinsson, Pall A.	2249	8	41
2	Johannsson, Birkir Isak	1333	4	20
3	Valgeirsson, Nikulas Ymir	1209	2	12
4	Gretarsson, Hjorvar Steinn	2567	10	8
5	Johannesson, Ingvar Thor	2377	9	5
6	Baldursson, Atli Mar	1289	1	2

 

Hannes vann í fyrstu umferð í Eisenstein

Stórmeistarinn Hannes Hlífar Stefánsson (2593) hóf í gær þátttöku á alþjóðlegu móti í þýska fjallaþorpinu Bayerisch-Eisenstein. Í gær vann hann Martin Fenner (1936) og í 2. umferð, sem fram fer í dag, teflir hann við FIDE-meistarann Stefan Gottuk (2104).

Skákir mótsins virðast ekki vera sýndar beint. 

96 skákmenn taka þátt í mótinu og þar af eru sjö stórmeistarar. Hannes er stigahæstur keppenda.

Heimasíða mótsins

 

 

Óskar og Sigurður tefldu í Pardubice

Óskar Haraldsson (1766) og Sigurður Ingason (1842) tóku báðir þátt í Czech Open sem lauk í Pardubice í Tékklandi í gær. Óskar hlaut 3½ vinning en Sigurður fékk vinningi minna. Þeir tefldu í b-flokki. Óskar hækkar um 18 stig en Sigurður lækkar um 19. 

Það var tékkneski stórmeistarinn Viktor Laznicka (2657) sem sigraði á mótinu. Annar varð Armeninn Sergei Movsesian (2653). Þeir munu báðir tefla á EM landsliða sem fram í Höllinni í nóvember nk. Báðir væntanlega á öðru borði með sínum þjóðum en sveitirnar munu leiða þeir Levon Aronian og David Navara.

Heimasíða mótsins

Skákkeppni unglingalandsmótsins

18. unglingalandsmót UMFÍ stendur nú yfir hér á Akureyri. Í gær var keppt í skák og að sjálfsögðu fór keppnin fram í Skákheimilinu í umsjón Skákfélags Akureyrar. Stór hópur var skráður í keppnisgreinina skák, en forföll urðu allmikil þegar á hólminn var komið, líklega helst vegna þess að sumir voru skráðir í fleiri en eina grein samtímis.Keppt var í tveimur aldursflokkum, 11-14 ára og 15-18 ára.

Úrslit í yngri flokki:

1. Birkir Ísak Jóhannsson, UMSK    6,5 

2. Óliver Ísak Ólason, UFA         5,5

3. Sverrir Hákonarson, UMSK        5,5

Kristján Davíð Jónsson HSÞ og Gabríel Freyr Björnsson ÍBA 4,5

Sunna Þórhallsdóttir UFA, Friðbjörn Árni Sigurðarson UÍA, Aðlabjörn Leifsson UFA og Elvar Ingi Þorsteinsson ÍBR 4

Aron Birkir Guðmundsson HSK, Gunnar Breki Gíslason ÍBA og Ragnheiður Jónsdóttir HSK 3,5

Auðunn Elfar Þórarinsson ÍBA, Bjarni Ísak Tryggvason UMSE og Karen Ósk Kjartansdóttir 3

Þorfinnur Freyr Þórarinsson HSK og Benjamín Jón Stefánsson HSÞ 2

Eva María Ólafsdóttir Kolbeins USVS 0.

Úrslit í eldri flokki:

Jón Kristinn Þorgeirsson UFA 7

Gauti Páll Jónsson (TR)      6

Atli Geir Sverrisson UÍA     5

Guðmar Magni Óskarsson USAH  4

Bjarney Birta Atladóttir USVS, Þór Wium Elíasson ÍBA og Baldur Bergsveinsson (Draupnir) 2

Þórhlidur Lilja Þórarinsdóttir HSK 0

Í báðum flokkum voru telfdar 7 umferðir með 10 mínútna umhugsunartíma.

Skákþáttur Morgunblaðsins: Pólverjar minnast Miguel Najdorfs

Nokkrir af bestu virku skákmönnum okkar hafa verið að tefla talsvert undanfarið. Íslandsmeistarinn Héðinn Steingrímsson tók á dögunum þátt í Opna New York-mótinu en þar tefldu 70 keppendur níu umferðir. Eftir sex umferðir var Héðinn í fararbroddi með 4½ vinning en á lokasprettinum gaf hann eftir og endaði að lokum í 10.-15. sæti með 5½ vinning. Gata Kamsky sigraði, hlaut 7 vinninga.

Hannes Hlífar Stefánsson hóf í gær taflmennsku á skákhátíðinni í Pardubice í Tékklandi og Guðmundur Kjartansson í sterku lokuðu móti í Pétursborg, hlaut þar 4 vinninga af níu mögulegum og hafnaði í 7.-8. sæti af tíu keppendum. Þá ber að geta frábærs árangurs Páls Agnars Þórarinssonar sem varð í 2.-5. sæti á opna skoska meistaramótinu sem lauk á dögunum en þar voru keppendur 102 talsins. Páll hlaut 7 vinninga af níu mögulegum en sigurvegari var Oleg Korneev frá Rússlandi sem hlaut 7½ vinning.

Eitt sterkasta opna mót sumarsins fór svo fram í Varsjá í byrjun júlí og þar tefldu Ingvar Þ. Jóhannsson og Sigurbjörn Björnsson. Mótið var haldið til minningar um Miguel Najdorf en um hann hefur verið sagt að skákin hafi bjargað lífi hans. Najdorf sat að tafli fyrir Pólverja á Ólympíuskákmótinu í Buenos Aires hinn 1. september 1939 þegar Þjóðverjar réðust á Pólland og seinni heimsstyrjöldin hófst. Þrátt fyrir ítrekaðar tilraunir tókst honum ekki að ná sambandi við fjölskyldu sína og í hildarleiknum sem á eftir fór missti hann konu sína og barn og stórfjölskylduna alla. Í Argentínu stofnaði hann tryggingafyrirtæki og efnaðist vel, setti mikinn svip á skáklíf þar í landi og á alþjóðvettvangi. Hann tefldi á Reykjavíkurskákmótinu árið 1976.

Á minningarmótinu í Varsjá hlaut Ingvar 5 vinninga og varð í 24.-35. sæti af 83 keppendum en Sigurbjörn hlaut 3 vinninga og varð í 70.-77. sæti. Sigurvegari varð Rússinn Igor Kovalenko, hlaut 8 vinninga af níu mögulegum. Í hverri einustu umferð mættu Ingvar og Sigurbjörn verðugum andstæðingum. Í 2. umferð tefldi Sigurbjörn við Búlgarann Cheparinov, stigahæsta mann mótsins. Sá hefur afar beittan skákstíl og lokaflétta hans í þessari skák var lagleg:

Varsjá 2015; 2. umferð:

Ivan Cheparinov – Sigurbjörn Björnsson

Slavnesk vörn

1. d4 d5 2. c4 c6 3. Rf3 e6 4. Dc2 Rf6 5. Rbd2 Be7 6. g3

Með því að snúa taflinu yfir í afbrigði katalónskrar byrjunar tekst Cheparinov að ná betri stöðu án þess að hafa mikið fyrir hlutunum.

6. ... 0-0 7. Bg2 b6 8. 0-0 Bb7 9. e4 c5?

Sigurbjörn bregst hart við að venju en betra var sennilega að bíða átekta og leika 9. ... Ra6. Uppskipti á e4 koma einnig til greina en vandinn er að losa um sig.

10. cxd5 exd5 11. e5 Re4 12. dxc5 Rxd2 13. Bxd2 bxc5 14. Had1 Ra6 15. Hfe1 Rc7 16. Ba5!

Hangandi peðin eru ekki burðug eftir þennan leik.

16. ... Dd7 17. Bxc7 Dxc7 18. Rd4 Hac8 19. Rf5 Hfd8 20. e6 fxe6 21. Hxe6 Bf8 22. De2 Hd7 23. He1

Yfirburðir hvíts eru augljósir en þó ekkert rakið fyrr en eftir næsta leik svarts.

23. ... d4 24. He8! Bxg2 25. De6+ Kh8

26. Rh6!

Slagkraftur mikill. Hótunin er 27. Dg8 mát og 26. ... gxh6 strandar á 27. Df6+ og mátar.

26. ... Bd5 27. Df5! Bf7 28. Hxc8 Dxc8 29. Rxf7 Kg8 30. De6!

Enn er mát á g8 yfirvofandi og leppun hróksins gerir útslagið. Svartur gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 25. júlí 2015

Skákþættir Morgunblaðsins

Þorsteinn Þorsteinsson á vit Hugins

Fidemeistarinn öflugi, viðskiptafræðingurinn og hvalfangarinn, Þorsteinn Þorsteinsson, er genginn í skákfélagið Hugin. Þorsteinn er sannkallaður hvalreki fyrir félagið enda bæði snjall skákmaður og ötull félagsmálamaður. Þannig mun Þorsteinn jöfnum höndum tefla fyrir hönd Hugins, annast liðsstjórn og taka sæti í öldungaráði félagsins.

Þorsteinn  hóf feril sinn í TR á Grensáveginum árið 1971, þá 11 ára. Hann tilheyrir þeirri kynslóð ungra skákmanna sem stigu sín fyrstu skref í TR eftir heimsmeistareinvígi Fischersog Spassky. Þar má m.a. nefna Margeir Pétursson, Jón L. Árnason, Jóhann Hjartarson,Karl Þorsteins, Sævar Bjarnason, Ómar Jónsson, Elvar Guðmundsson, Benedikt Jónasson, Gísla Hjaltason, Ásgeir Þ. Árnason, Ögmund Kristinsson, Kristján Guðmundsson, Róbert Lagermann, Guðna Sigurbjarnarson, Jón. S. Halldórsson og Þröst Bergmann en þrír hinir síðastnefndu eru látnir.

Þorsteinn ólst upp í Safamýrinni eins og Jóhann Hjartarson og fleiri sterkir skákmenn enda hrifsaði Álftamýrarskóli til sín svo til alla skólatitla á þessum árum. Mikil skákmenning blómstraði í hverfinu og nánast var teflt í hverju hús, enda nálægðin við TR á gullaldarárum félagsins til þess fallin. Árið 1977 varð Þorsteinn unglingameistari Íslands undir 20 ára en Jóhann Hjartarson og Karl Þorsteins höfnuðu í 2. 3 sæti. Þorsteinn tefldi lítið næstu árin þar á eftir en 10 árum síðar var Jóhann hins vegar orðinn einn af allra bestu skákmönnum heims.

Þorsteinn stundaði háskólanám í Svíþjóð á árunum 1991-1996 og lauk þar meistaragráðu í rekstrahagfræði. Þorsteinn tefldi mikið á þessu tímabili, bæði í sænsku deildarkeppninni, sænska meistaramótinu og á fjölmörgum mótum eins og Rilton Cup. Hann vann nokkur mót á þessum árum og var oftar en ekki í toppbaráttunni í öðrum.

Árið 1997 fluttist Þorsteinn aftur heim til Íslands. Hann tók þátt í landsliðsflokknum á Akureyri sama ár og hafnaði í miðjum hópi en Þorsteinn hefur alls teflt 5 sinnum í landsliðsflokki. Hann var í sigursveit TR í deildarkeppninni 1998-1999. Árið 2009 gekk Þorsteinn í raðir Taflfélags Vestmannaeyja (TV) þar sem hann tefldi með liðinu og var liðsstjóri. Sama ár vann félagið sig upp í efstu deild og síðan þá hefur félagið orðið í 2. eða 3. sæti ár hvert. Segja má að Þorsteinn hafði átt hvað mestan heiður af því að byggja upp það sterka lið sem TV varð á þessum árum.

Þorsteinn tefldi síðast á alþjóðlegu móti í Ortisei á Ítalíu árið 2012 og var þar hársbreidd frá því að ná áfanga að alþjóðlegum meistaratitli. Hann hefur síðan þá snúið sér í auknum mæli að bréfskák og er í dag með stigahæstu bréfskákmönnum landsins.

Hernámsminjar á Hvítanesi: „Það kostar“ útskýrir Þorsteinn – „menn vaða ekkert í vélarnar“

Þorsteinn segist kveðja TV með vissum trega en að allt hafi sitt upphaf og endi, minningarnar séu margar og góðar sem skipti mestu. Hann vill þakka öllum liðsmönnum félagsins fyrir skemmtilegan tíma þau ár sem hann stýrði liðinu. Þorsteinn segist hlakka til að byrja í Hugin. Það félag hafi orðið fyrir valinu þar sem skipulagið sé gott, liðsandinn til fyrirmyndar og glaðværð í öndvegi. Einnig hafi skipt máli að ákveðin virðing sé borin fyrir skákmönnum sem komnir eru til vits og ára.

Þorsteinn er þekktur fyrir smíðar á kostulegum orðatiltækjum sem tengjast skákinni. Hér má m.a. nefna; „skákin er harður skóli“, „menn vaða ekkert í vélarnar“, „stigin tefla ekki“, „það kostar“, „pósaþjappa“og síðast en ekki síst „smé“ en öll þessi orðatiltæki hafa náð ákveðinni fótfestu í tungutaki íslenskra skákmanna.

Stjórn Hugins býður Þorstein hjartanlega velkomin til félagsins og væntir mikils af atfylgi hans og skemmtilegum uppátækjum.

Heimasíða Hugins