Skáknámskeið fyrir fullorðna

Skákakademían í samstarfi við Laugalækjarskóla stendur fyrir skáknámskeiði fyrir skákmenn 16 ára og eldri dagana 9. og 16. janúar. Námskeiðið fer fram í Laugalækjarskóla. Fyrirlesarar verða GM Hannes Hlífar Stefánsson, FM Ingvar Þór Jóhannesson og IM Einar Hjalti Jensson. Hver þeirra mun fjalla um mismunandi efni sem hjálpar mönnum að bæta sig í skáklistinni.

Landsliðseinvaldurinn Ingvar Þór hefur á síðustu árum lagt mikla vinnu í að kynna sér „þekkt mynstur“ í skák. Skilningur á „mynstursþekkingu“ er gríðarlega mikilvægur fyrir skákmenn. Rétt eins og enski skákþjálfarinn og rithöfundurinn Nigel Davies segir: „Mynstursþekking er LEIÐIN til að vita hvað þú átt gera í skák. Það er vonlaust að ætla sér að finna áætlun í skák beint út frá frumreglum eða með því að reikna afbrigði. Þú þarft einhvern tíma áður  að hafa séð hvernig á að bregðast við í stöðum sem þú lendir í og nota þessa þekkingu til að beina þér í rétta átt þegar þú velur þér plan.“

Landsliðsþjálfari kvenna Einar Hjalti hefur á fáeinum árum hækkað um nálægt 200 skákstig og varð fyrr á árinu útnefndur alþjóðlegur meistari. Til að ná þessum árangri lagðist Einar Hjalti í miklar skákstúderingar og hefur tileinkað sér árangurríka aðferðarfræði, ekki síst þegar kemur að byrjanarannsóknum. Einar Hjalti var aðstoðarmaður Þrastar Þórhallssonar stórmeistara þegar sá síðarnefndi tryggði sér Íslandsmeistaratitilinn árið 2012. Einar mun fjalla um hvaða aðferðir og vinnubrögð virka til að taka framförum í skák. Hann mun útskýra hvernig á að taka hagnýtar ákvarðanir yfir borðinu, stjórna tíma sínum rétt og reikna út afbrigði á réttan hátt. Einnig mun hann kynna til sögunnar mismunandi aðferðir til að bæta byrjanaþekkingu sína.

Hannes Hlífar Stefánsson, margfaldan Íslandsmeistara, í skák þarf ekki að kynna neinum skákáhugamanni. Hannes mun á námskeiðinu fara yfir valdar skákir af atvinnumannaferli sínum sem spannar nú yfir 20 ár.

Kennt er báða laugardagana, 9. og 16. janúar, frá 12:00 – 16:00, með kaffihléum. Kennslan verður í formi fyrirlestra og fá þátttakendur efni fyrirlestrana að námskeiði loknu.

Liðsmenn stórefnilegrar unglingasveitasveitar Laugalækjarskóla, sem sigraði nýlega á Jólamóti Taflfélags Reykjavíkur með fullu húsi, munu einnig sitja námskeiðið.

Námskeiðsgjald: Kr. 13.900. Kaffi og með því innifalið.

Skráning á [e-mail]

Sé greitt fyrir 16. desember kostar námskeiðið kr. 9.900.

Leggist inn á reikning Skákakademíunnar: 0101-26-083280, kt. 700608-3280.

ATH: Hámarksþátttökufjöldi miðast við átján.

Þriðja mót Bikarsyrpu TR hefst í dag

Bikarsyrpa Taflfélags Reykjavíkur heldur áfram þegar þriðja mót syrpunnar fer fram helgina 4.-6. desember og hefst fyrsta umferð föstudaginn 4. desember kl. 17.30. Mótum syrpunnar hefur verið fjölgað og telur hún alls sex kappskákmót sem eru ætluð börnum á grunnskólaaldri (fædd 2000 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar TR (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (4. desember)
2. umferð 10.30 á laugardegi (5. desember)
3. umferð 14.00 á laugardegi (5. desember)
4. umferð 10.30 á sunnudegi (6. desember)
5. umferð 14.00 á sunnudegi (6. desember). (Lokaumferð + verðlaunaafhending).

Ein yfirseta (bye) er leyfð í umferðum 1-3 og fæst fyrir hana 1/2 vinningur.  Tilkynna þarf skákstjóra um yfirsetu fyrir lok umferðarinnar á undan.

Vinsamlegast skráið þátttakendur sem fyrst, það hjálpar við undirbúning mótsins!

Skráningarform

Skráðir keppendur

Bikarsyrpan samanstendur af sex mótum í vetur. Bikarar og medalíur eru í verðlaun fyrir efstu sætin í
hverju
 móti auk áskrifta á Chess.com eða Chesskid.com.  Þá verða veitt sérstök verðlaun fyrir samanlagðan árangur á mótunum.

Sigurvegari fyrsta móts Bikarsyrpunnar var Róbert Luu og í öðru mótinu sigraði Halldór Atli Kristjánsson.

Hlökkum til að sjá ykkur!

Næstu mót syrpunnar:

• Mót 3: 4.-6. desember 2015
• Mót 4: 12.-14. febrúar 2016
• Mót 5: 1.-3. apríl 2016
• Mót 6: 27.-29. maí 2016

Haraldur sigurvegari U-2000 mótsins

Haraldur Baldursson hefur tryggt sér sigurinn í U-2000 móti Taflfélags Reykjavíkur en hann hefur fullt hús vinninga að loknum sex umferðum og 1,5 vinnings forskot á næstu keppendur nægir til sigurs þar sem aðeins ein umferð lifir af móti. Sigur Haraldar er afar öruggur en hann hélt forystu frá fyrstu mínútu og það var aðeins vegna frestaðrar skákar sem hann lét hana tímabundið af hendi. Toppsætið endurheimti hann snarlega og lét það ekki aftur frá sér.

Fyrir lokaumferðina hefur Haraldur því 6 vinninga en næstir með 4,5 vinning koma Friðgeir Hólm og Tjörvi Schiöth og þá Gauti Páll Jónsson með 4 vinninga. Í umferð gærkveldsins lagði Haraldur Björn Hólm Birkisson í verulega spennandi viðureign þar sem Björn saumaði hressilega að Haraldi með hvítu mönnunum. Sá síðarnefndi varðist hinsvegar fimlega og Birni tókst ekki að finna lokahnykk sem varð til þess að eftir uppskipti komst Haraldur út í unnið hróksendatafl. Góður varnarsigur og fyrsta sætið í höfn.

Á öðru borði vann Friðgeir öruggan sigur á Arnaldi Bjarnasyni en nokkuð hefur borið á því að skákmenn þekkja ekki hinn hvassa skákstíl Friðgeirs sem ósjaldan verður til þess að andstæðingar hans “fara niður í logum”. Arnaldur hefur hinsvegar átt gott mót en pistlahöfund rekur ekki minni til þess að hafa áður orðið var við hann í kappskákmóti.

Á þriðja borði vann Tjörvi góðan baráttusigur með svörtu gegn Sigurjóni Haraldssyni eftir að sigla endatafli með peð yfir örugglega í höfn. Ekki er hægt að tala um óvænt úrslit í umferðinni enda stigamunur keppenda oftar en ekki lítill sem enginn. Einkenndust margar viðureignirnar af mikilli baráttu og algengt var að allt “væri upp í loft” á reitunum 64 en þegar svo er lýkur orrustunum gjarnan með miklum flugeldasýningum þar sem menn falla hver um annan þveran og eftir stendur lítið annað en sviðin jörð.

Þó svo að toppsætið sé frátekið er baráttan um næstu sæti hörð en úrslit ráðast næstkomandi miðvikudagskvöld þegar sjöunda og síðasta umferðin fer fram í húsnæði TR að Faxafeni 12. Klukkurnar verða ræstar á slaginu 19.30 en þá mætast á efstu borðum Tjörvi og Haraldur, Gauti Páll og Friðgeir sem og Björn Hólm og Halldór Atli Kristjánsson.

Áhorfendur velkomnir – heitt á könnunni og kruðerí með!

• Heimasíða TR
• Chess-Results
• Skákir mótsins
• Myndir má finna á heimasíðu TR

Meistaramót Víkingaklúbbsins fer fram í kvöld

Meistaramót Víkingaklúbbsins verður haldið fimmtudaginn 3.desember, í Víkinni Víkingsheimilinu og hefst taflið kl 20.00.  Tefldar verða sex umferðir með 11. mínútna umhugsunartíma.  Sigurvegari mótsins hlýtur titilinn Skákmeistari Víkingaklúbbsins 2015. Þátttaka er ókeypis. Núverandi Skákmeistari Víkingaklúbbsins (Atskákmeistari Víkingaklúbbsins) er Davíð Kjartansson.

 

Skráning fer fram á Skák.is. Upplýsingar um þegar skráða keppendur má nálgast hér.

 

Mótið er reiknað til alþjóðlegra atskákstiga.

 

Mótið 2014 hér:

Mótið 2013 hér:
Mótið 2012 hér:

 

Stórmeistarinn mætti á fjölmenna félagsæfingu

Stórmeistarinn Héðinn Steingrímsson sem leitt hefur skáksveit Fjölnis í 1. deild sl. átta ár mætti á fjölmenna skákæfingu skákdeildarinnar í Rimaskóla og var með klukkustundar kennslu fyrir krakkana. Héðinn sem er núverandi Íslandsmeistari í skák og tefldi með íslenska landsliðinu í Evrópukeppninni kom vel undirbúinn og hélt athygli Fjölniskrakka allan tímann.

 

Skákæfingar Fjölnis hafa verið afar vel sóttar í haust allt frá byrjun í september og nánast "uppselt" á þær allar, 30 - 40 börn og unglingar í hvert skipti. Áhuginn á skákinni í Grafarvogi hefur sjaldnast verið meiri og sást það glöggt á jólaskákmóti grunnskóla um sl. helgi þegar skáksveitir Rimaskóla og Foldaskóla náðu helmingi allra verðlaunasæta í drengja-og stúlknaflokki. 

Ný íslensk skákstig

Ný íslensk skákstig eru komin út. Hannes Hlífar Stefánsson (2582) er stigahæstur. Í næstum sætum eru Héðinn Steingrímsson (2576) og Jóhann Hjartarson (2565). Baldur Heiðar Sigurðarson (1407) er stigahæstur nýliða og Arnar Milutin Heiðarsson (240) hækkr mest frá september-listanum.

Topp 20

Nr.	Name	RtgC	Diff	Cat	Tit	Club
1	Hannes H Stefánsson	2582	2	-	GM	TR
2	Héðinn Steingrímsson	2576	7	-	GM	Fjölnir
3	Jóhann Hjartarson	2565	8	-	GM	TB
4	Hjörvar Grétarsson	2564	11	-	GM	Huginn
5	Margeir Pétursson	2561	-21	-	GM	TR
6	Helgi Ólafsson	2547	-2	-	GM	Huginn
7	Henrik Danielsen	2500	3	-	GM	TR
8	Jón Loftur Árnason	2497	-10	-	GM	TB
9	Helgi Áss Grétarsson	2481	1	-	GM	Huginn
10	Stefán Kristjánsson	2458	-15	-	GM	Huginn
11	Karl Þorsteins	2448	-5	-	IM	TR
12	Jón Viktor Gunnarsson	2447	-4	-	IM	TR
13	Friðrik Ólafsson	2441	-18	SEN	GM	TR
14	Þröstur Þórhallsson	2419	7	-	GM	Huginn
15	Guðmundur Kjartansson	2419	-2	-	IM	TR
16	Björn Þorfinnsson	2409	11	-	IM	TR
17	Bragi Þorfinnsson	2407	4	-	IM	TR
18	Dagur Arngrímsson	2402	5	-	IM	TB
19	Arnar Gunnarsson	2397	3	-	IM	TR
20	Magnús Örn Úlfarsson	2356	-4	-	FM	Huginn

Nýliðar

Nr.	Name	RtgC	Diff	Cat	Tit	Club
1	Baldur Heiðar Sigurðsson	1407	1407	-		Skákgengið
2	Jón Ragnarsson	1385	1385	SEN		TV
3	Vignir Einarsson	1317	1317	-		UMSB
4	Garðar Ingólfsson	1312	1312	SEN		UMSB
5	Úlfur Orri Pétursson	1288	1288	-		Áttaviltir
6	Jón Magnússon	1184	1184	-		SA
7	Steinþór Örn Gíslason	1146	1146	U12		Breiðablik
8	Samuel Thornton  Rees	1135	1135	-		Huginn
9	Hilmir Arnarson	1096	1096	U10
10	Ágúst Ívar Árnason	1000	1000	U10		Fjölnir
11	Benedikt Þórisson	1000	1000	U10		TR
12	Ylfa Ýr Welding Hákonardóttir	1000	1000	U10

Mestu hækkanir

Nr.	Name	RtgC	Diff	Cat	Tit	Club
1	Arnar Milutin Heiðarsson	1326	240	U12		TR
2	Alexander Oliver Mai	1349	153	U12		TR
3	Björn Magnússon	1134	134	U10		TR
4	Jón Þór  Lemery	1324	123	U14		TR
5	Bárður Örn Birkisson	1908	113	U16		TR
6	Gauti Páll Jónsson	1799	110	U16		TR
7	Vignir Vatnar Stefánsson	1968	98	U12		TR
8	Hjörtur  Kristjánsson	1251	91	U12		Breiðablik
9	Kristján Dagur Jónsson	1098	89	U10		TR
10	Guðlaug U Þorsteinsdóttir	2016	88	-	WFM	TG

Jólapakkamót Hugins fer fram 19. desember

Jólapakkaskákmót Hugins verður haldið laugardaginn 19. desember nk. í Ráðhúsi Reykjavíkur. Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 18. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.

Keppt verður í allt að 6 flokkum:

• Flokki fæddra 2000-2002
• Flokki fæddra 2003-2004
• Flokki fæddra 2005-2006
• Flokki fæddra 2007-2008
• Flokki fæddra 2009 síðar
• Peðaskák fyrir þau yngstu.

Tefldar verða 5 umferðir með 10 mínútna umhugsunartíma á mann.

Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig.

Mikil stemning á Jólamóti SFS og TR

Mikið var um dýrðir í skákheimili Taflfélags Reykjavíkur dagana 29.-30.nóvember þegar hið geysivinsæla Jólamót SFS og TR var haldið. Þetta árlega samstarfsverkefni Skóla- og Frístundasviðs Reykjavíkurborgar og Taflfélags Reykjavíkur heppnaðist með miklum ágætum nú sem endra nær og voru fjölmörg skólabörn saman komin þessa tvo snjóþungu daga til þess að njóta ánægjulegra stunda við skákborðin.

Líkt og undanfarin ár þá var mótinu skipt í yngri flokk (1.-7,bekkur) og eldri flokk (8.-10.bekkur). Yngri flokknum var svo jafnframt skipt í hefðbundna tvo riðla (suður og norður) til að mæta mikilli eftirspurn yngstu barnanna. Þá voru veitt sérstök stúlknaverðlaun líkt og undanfarin ár.

Yngri flokkur

Í opnum flokki Suður riðils bar A-sveit Ölduselsskóla ægishjálm yfir keppinauta sína, enda skáksveitin sú römm að bæði afli og reynslu. Sveitin vann alla sex andstæðinga sína en jafnframt gerðu piltarnir sér lítið fyrir og unnu allar 24 skákir sínar. Geri aðrir betur! Keppnin um 2.sæti riðilsins og sæti í úrslitum mótsins var æsispennandi og réðust úrslit ekki fyrr en í síðustu umferð. B-sveit Ölduselsskóla stóð best að vígi og hafði tveggja vinninga forskot á A-sveit Háteigsskóla, en sveitirnar mættust í umferðinni á undan þar sem niðurstaðan varð æsispennandi 2-2 jafntefli. Í lokaumferðinni vann A-sveit Háteigsskóla mikilvægan 4-0 sigur, á meðan B-sveit Ölduselsskóla atti kappi við B-sveit Háteigsskóla. Svo fór að piltarnir í B-sveit Háteigsskóla reyndust A-sveit sinni mikill styrkur því þeir náðu 2-2 jafntefli í þessari viðureign sem tryggði A-sveit Háteigsskóla 2.sætið. B-sveit Ölduselsskóla varð að gera sér 3.sætið að góðu þrátt fyrir frækna frammistöðu.

Í stúlknaflokki Suður riðils reyndist Melaskóli hlutskarpastur með 12,5 vinning. Í 2.sæti varð Breiðagerðisskóli með 10 vinninga. Í 3.sæti með 6 vinninga varð hin unga sveit Háteigsskóla.

Í opnum flokki Norður riðils mætti til leiks feykivel skipuð A-sveit Rimaskóla og vann hún sannfærandi sigur með 20 vinninga. Eina skáksveitin sem veitti þeim keppni var þeirra eigin B-sveit, og er það til marks um þá miklu breidd sem Rimaskóli hefur yfir að ráða. B-sveit Rimaskóla hlaut 17 vinninga sem dugði þeim í 2.sæti riðilsins. B-sveitin gerði sér jafnframt lítið fyrir og náði 2-2 jafntefli gegn A-sveitinni. Það var svo A-sveit Ingunnarskóla sem nældi sér í 3.sætið og bronsverðlaun, en sveitin hlaut 15 vinninga.

Í stúlknaflokki Norður riðils var mikil spenna. Rimaskóli og Foldaskóli öttu kappi um efsta sætið og örlögin höguðu því þannig að sveitirnar mættust í lokaumferðinni. Baráttan um Grafarvoginn var því í algleymi í þessari lokaumferð þar sem Rimaskóli hafði fyrir umferðina eins vinnings forskot á Foldaskóla. Eftir mikinn barning, afleiki og mátfléttur hafði Foldaskóli 3-1 sigur í viðureigninni. Foldaskóli hlaut því 1.sætið en Rimaskóli varð í 2.sæti. Stúlknasveit Árbæjarskóla endaði í 3.sæti.

Í úrslitum opna flokksins mættust Ölduselsskóli, Háteigsskóli og tvær sveitir Rimaskóla. Kom fáum á óvart er Ölduselsskóli lagði alla andstæðinga sína að velli og hlaut alls 10,5 vinning í 12 skákum. A-sveit Rimaskóla hlaut silfurverðlaun eftir harða baráttu við B-sveit sína sem nældi sér í bronsverðlaun.

Í úrslitum stúlknaflokks háðu Foldaskóli og Melaskóli harða baráttu um gullverðlaunin. Er upp var staðið munaði aðeins einum vinningi á skólunum tveimur. Foldaskóli hafði betur með 10 vinninga en Melaskóli hlaut 9 vinninga. Munaði þar mestu um að Foldaskóli lagði Melaskóla að velli 3-1. Rimaskóli tryggði sér bronsverðlaunin með 4,5 vinning.

Eldri flokkur

Í opnum flokki eldri flokks mættu til leiks, gráir fyrir járnum, sigurvegarar síðasta árs, A-sveit Laugalækjarskóla. Ef einhverjir keppinautar þeirra ólu von í brjósti um að geta skákað Laugalækjarskólapiltum þá var sú von kæfð í fæðingu. A-sveit Laugalækjarskóla gerði sér lítið fyrir og vann allar skákir sínar tuttugu og fjórar að tölu. Hin sterka A-sveit Rimaskóla stóð sig einnig með miklum sóma þó svo Laugalækjarskóli hafi reynst of stór biti. Þó svo Rimaskóli hafi tapað 4-0 fyrir sigursveit Laugalækjarskóla, þá gerði sveitin sér lítið fyrir og vann allar hinar tuttugu skákir sínar. Rimaskóli hafnaði því í 2.sæti mótsins. Mikil spenna hljóp í keppnina um bronsverðlaunin og réðust úrslitin í síðustu umferðinni. Langholtsskóli kom í mark sjónarmun á undan Fellaskóla, og tryggði sér bronsverðlaun með 14 vinninga.

Í stúlknaflokki eldri flokks reyndist Rimaskóli hlutskarpastur með 12 vinninga. Laugalækjarskóli hlaut 8 vinninga í 2.sæti og Breiðholtsskóli varð í 3.sæti með 5 vinninga.

Lokastaða yngri flokks: Suður riðill * Norður riðill * Úrslit opins flokks * Úrslit stúlknaflokks

Lokastaða eldri flokks: Opinn flokkur og stúlknaflokkur

Jólamót Víkingaklúbbsins fer fram 9. desember

Jólamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 9. desember.  Telfdar verða 5. umferðir með 7 mínútna umhugsunartíma á mann.  Mótið hefst mótið kl. 17.00. Allir krakkar eru velkomnir og þátttaka er ókeypis. Allir fá verðlaun, auk þess sem veitt verða auakverðlaun í hverjum aldursflokki.  Yfirskákstjóri verður hinn reynslumikli Stefán Bergsson. 

Keppt verður nokkrum aldursflokkum á mótinu.  

A flokkur keppendur fæddir 2000-2004 (6-10 bekkur).
B flokkur keppendur fæddir 2005-2006 
C flokkur 2007-2008 
D flokkur 2009
E flokkur peðaskák (2010 og yngri)

Barna og unglingaæfingar voru vikulega í vetur, en næsta æfing eftir jólafríð verður miðvikudaginn 13. janúar og verða æfingar vikulega fram á vor. 
Skráning á mótið fer m.a fram á netfangið:  vikingaklubburinn(hjá)gmail.com og á skak.is (guli kassinn)

Skráningu lýkur miðvikudaginn 16. des kl 12.00.  NAUÐSYNLEGT ER AÐ SKRÁ SIG TIL AÐ TRYGGJA ÞÁTTTÖKU.  Nánari upplýsingar veitir Gunnar (gsm:  8629744).

Í fyrra sigraði Vignir Vatnar Stefánsson eldri flokk, en Alexander Bjarnþórsson sigraði í yngri flokki.

Úrslit jólamótsins 2014 hér:
Úrslit jólamótsins 2013 hér:
Úrslit jólamótsins 2012 hér:

Haraldur efstur á U2000 mótinu

Haraldur Baldursson endurheimti efsta sætið á U2000 móti Taflfélags Reykjavíkur þegar hann lagði Friðgeir Hólm í fimmtu umferð. Haraldur er með fullt hús en næstir með 3,5 vinning koma Friðgeir, Arnaldur Bjarnason, Björn Hólm Birkisson og Tjörvi Schiöth. Haraldur er því í góðri stöðu fyrir tvær síðustu umferðirnar.

Sjötta og næstsíðasta umferð fer fram á miðvikudagskvöld og hefst kl. 19.30. Þá mætast m.a. Björn Hólm og Haraldur, Friðgeir og Arnaldur, sem og Sigurjón Haraldsson og Tjörvi. Með sigri tryggir Haraldur sér sigur í mótinu.

• Heimasíða TR
• Chess-Results
• Skákir mótsins