Undanrásir fyrir Reykjavik Open Barna Blitz halda áfram í dag

Þriðja undankeppni Barna Blitz verður mánudaginn 3. mars kl. 13. Hún verður haldin í Rimaskóla. Allir þátttakendur fá mjólk og ókeypis bollu í skákhléi. Teflt er í hátíðarsal Rimaskóla á neðri hæð og gengið er inn um aðalsal.

Fjórðu og síðustu undanrásir Reykjavk Barna Blitz fara svo fram í Hörpu föstudaginn 7. mars klukkan 14:30. Mótið er opið skákmönnum fæddum 2001 og síðar.

Tefldar verða fimm umferðir með fimm mínútna umhugsunartíma. Tveir efstu komast í úrslitin sem verða tefld degi síðar.

Skráning í [e-mail] fyrir fimmtudaginn 6. mars. Ekki verður hægt að skrá sig á staðnum.

Fjórir skákmenn eru þegar komnir í undarnúrslit. Það eru Vignir Vatnar Stefánsson, Guðmundur Agnar Bragason, Hilmir Freyr Heimisson og Bjarki Arnaldarson.

Skákþáttur Morgunblaðsins: Ísland Norðurlandameistari í skólaskák

Norðurlandamóti barna og unglinga, sem fram fer ár hvert, er skipt upp í fimm aldursflokka og þjóðirnar eiga tvo keppendur í hverjum flokki þar sem tefldar eru sex umferðir eftir svissneska kerfinu. Samanlagðir vinningar ákvarða síðan lokaniðurstöðuna hvað varðar keppni milli þjóðanna. Við unnum þessa keppni í fyrra þegar hún fór fram í Bifröst í Borgarfirði og vörðum titilinn í ár. Danir settu mikinn metnað í að vinna keppnina í ár - en það tókst ekki. Við héldum forystunni frá upphafi en naumt var það í lokin. Lokaniðurstaðan varð þessi:

1. Ísland 35 ½ v. 2. Danmörk 34 v. 3. Svíþjóð 33 v. 4. Noregur 32 ½ v. 5. Finnland 30 v. 6. Færeyjar 15 v.

Íslenski hópurinn var að mestu skipaður þeim sömu og í fyrra: Mikhael Jóhann Karlsson og Nökkvi Sverrisson tefldu í A-flokki, Dagur Ragnarsson og Oliver Aron Jóhannesson í B-flokki, Jón Kristinn Þorgeirsson og Dawid Kolka í C-flokki, Hilmir Freyr Heimisson og Felix Steinþórsson í D-flokki og Vignir Vatnar Stefánsson og Mikhael Kravchuk í E-flokki.

Íslendingar unnu til verðlauna í öllum flokkum, Jón Kristinn og Vignir Vatnar fengu silfur, Hilmir Freyr, Dagur og Nökkvi brons. Við höfum yfirleitt tekið gull í a.m.k. einum flokki og lengi vel áttu Vignir Vatnar, Jón Kristinn og Mikhael Jóhann Karlsson möguleika á því að landa sigri í sínum flokkum en andstæðingar Vignis Vatnars tefldu stíft upp á jafntefli. Frammistaða Jóns Kristins, sem er 14 ára, er aldeilis frábær; á dögunum varð hann Skákmeistari Akureyrar, sá yngsti í sögunni.

Hilmir Freyr Heimisson hlaut 4 vinninga en sigur hans yfir dönskum andstæðingi í lokaumferðinni var afar mikilvægur, því eins og mál þróuðust hefðu Danir unnið flokkakeppnina með sigri í þeirri skák. Miklar sviptingar og óbilandi bjartsýni einkenndu skákir Hilmis:

Sjá stöðumynd 1

Hilmir Freyr - Arun Ananthan

Hilmir hafði ekki teflt byrjunina nægilega vel, tapaði peði, gaf síðan skiptamun fyrir „spil" en staðan er samt erfið og beinast liggur við að berjast áfram með 31. Rb5. Hann lék hinsvegar:

31. Rf5+?! gxf5 32. Bxf5

Nú vonaðist Hilmir eftir „traustum" varnarleik, 32. ... De7 sem hann hugðist svara með 33. Dh6+!! Kxh6 34. Rg4+ Kgf7 (eða 34. .. Kg5 35. f4 mát) 35. Hh7+ Kg8 36. Rh6 mát. En svartur fann bestu vörnina og lék ...

32. ... Rg6!

Hvíta staðan er töpuð en baráttan hélt áfram og Hilmir var ekkert á því að „kasta inn handklæðinu". Eftir 42 leiki kom þessi staða upp:

Ekki er ástandið björgulegt en mikil taugaspenna enda sigur Íslands eða Dannmerkur undir. Svartur lék...

42. ... Dd7??

og Hilmir kom samstundis með:

43. f6+!

Drottningin á d7 fellur og svartur gafst upp.

Keppnin fór fram við frábærar aðstæður í Legolandi í Billund. Danir eiga mikinn heiður skilið fyrir bestu aðstæður sem boðið hefur verið uppá í þessari keppni. Fyrir mótið gaf Tuborg 25 tölvusýningarborð og voru allar skákirnar sýndar í beinni útsendingu. Skólaskáksamband Danmerkur sá um framkvæmdina en lítið samband er milli þess og danska skáksambandsins. Athygli vakti að öflugustu stórmeistarar Dana, Curt Hansen og Peter Heine Nielsen, höfðu hlutverkum að gegna á skákstað en samband þeirra við danska skáksambandið hefur löngum verið stirt.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 23. febrúar 2014

Skákþættir Morgunblaðsins

N1 Reykjavíkurskákmótið hefst á þriðjudag - 50 ára afmælismót - Helgi Ólafsson tekur þátt

• Kasparov kemur
• Metþátttaka
• Helgi Ól tekur þátt
  
• Ofurstórmeistarar
• Undrabörn
• Gamlar hetjur

Fyrsta Reykjavíkurskákmótið fór fram 1964 í Lídó og fagnar mótið því hálfrar aldar afmæli í ár. N1 Reykjavíkurskákmótið er elsta hátíðin sem kennd er við höfuðborgina og reyndar ein elsta skákhátíð heims sem enn er haldin reglulega. N1 Reykjavíkurskákmótið nýtur mikillar virðingar um allan heim og var til að mynda valið þriðja besta opna skákmótið árið 2012, en alþjóðleg skákmót skipta hundruðum ef ekki þúsundum ár hvert.

N1 Reykjavíkurskákmótið nú fer fram í Hörpu dagana 4.-12. mars. Í tilefni afmælisins verður mótið nú um margt sérstakt. Heiðursgestur verður sterkasti skákmaður allra tíma, Garry Kasparov, sem verður á landinu 9.-11. mars næstkomandi. Hann mun meðal annars heimsækja leiði Bobby Fischer, á 71. fæðingardegi Fischers, 9. mars, og mun árita bækur fyrir skákáhugamenn í Hörpu hinn 10. mars. Kasparov er í framboði sem næsti forseti FIDE - alþjóðlega skáksambandsins. Útsendingar á netinu frá mótinu verða betri og flottari en nokkru sinni fyrr.  

Metþátttaka verður á mótinu. Gera má ráð fyrir að keppendur verði á bilinu 260-270, frá um 45 löndum, en í fyrra voru þeir 227 talsins, sem þá var met! Meðal keppenda eru 27 stórmeistarar og 30 alþjóðlegir meistarar. Um 70% keppenda mótsins koma að utan og þar eru Norðmenn (28), Þjóðverjar (26) og Bandaríkjamenn (16) fjölmennastir.

Margir sterkir skákmeistarar eru meðal keppenda. Stigahæstur keppenda er þýski stórmeistarinn Arkadij Naiditsch með 2706 skákstig. Sá er af lettneskum uppruna en leiddi þýska landsliðið til afar óvænts sigur á EM landsliða 2011 og er fastagestur á ofurmótum. Næststigahæstur keppenda er kínverski landsliðsmaðurinn Chao Li með 2700 skákstig. Kínverska landsliðið er eitt það sterkasta í heimi og hlaut brons á síðasta Ólympíuskákmóti. Chao Li er ákaflega skemmtilegur skákmaður.

N1 Reykjavíkurskákmótið hefur ávallt státað af efnilegum skákmönnum, svo er einnig nú. Þar má nefna Richard Rapport, 17 ára Ungverja sem er ekki aðeins efnilegur heldur fjórði stigahæsti keppandi mótsins. Richard þessi náði því að verða sá sjötti yngsti í sögunni til þess að hampa stórmeistaranafnbótinni, en því náði hann aðeins 13 ára. Hann teflir ákaflega fjörlega og frumlega og vakti gríðarlega athygli á ofurmótinu í Wijk aan Zee nýlega, þar sem hann vann meðal annars Boris Gelfand.

Meðal annarra ofurstórmeistara má nefna Egyptann Bassim Amin, sem var meðal sigurvegara í fyrra, og Rússann Mikhail Kobalia, sem er yfirþjálfari rússneska unglingalandsliðsins og verður með fyrirlestur hérlendis um skákþjálfun.

Margir aðrir áhugaverðir keppendur eru meðal þátttakenda. Tveir koma alla leiðina frá Íran. Annar þeirra, Pouya Idani, varð heimsmeistari 18 ára og yngri í fyrra. Sá sigur vakti mikla athygli enda var Íraninn aðeins 20. stigahæsti keppandi mótsins. Einnig kemur frá Íran landsliðs- konan Sarasadat Khademalsharieh sem er stórmeistari kvenna og fyrrum heimsmeistari stúlkna 12 ára og yngri

Helsta undrabarn mótsins er hins vegar hinn 10 ára Awonder Liang. Sá er heimsmeistari 10 ára og yngri og varð jafnframt heimsmeistari 8 ára og yngri. Hann er sá yngsti í sögunni sem hefur unnið alþjóðlegan meistara í langri skák, þegar hann var 9 ára, og jafnframt sá yngsti sem hefur unnið stórmeistara, en þá var hann 10 ára! Menn skulu leggja nafn hans á minnið og fylgjast vel með þessum unga meistara, sem margir telja líklegt ofurstórmeistaraefni. Hann er á forsíðu nýjasta tölublaðs Chess Life Magazine.

Gamlar stjörnur láta sig ekki vanta. Ber þar hæst þátttöku Walter Browne, sem sigraði á mótinu 1978, einu sterkasta Reykjavíkurskákmót sögunnar. Browne þótti hafa ákaflega fjörlega framkomu og margir minnast hamagangs í tímahraki nokkurra viðureigna hans frá fyrri Reykjavíkurmótum.

Að sjálfsögðu eru margar sterkar skákkonur meðal keppenda - nokkrar teljast til þeirra sterkustu í heimi. Má þar nefna indversku skákdrottninguna Tania Sadchev, sem sló í gegn fyrir frábærar skákskýringar frá heimsmeistaraeinvígi Anand og Carlsen, en einnig bandarísku skákkonuna Irina Krush, sem er núverandi skákmeistari Bandaríkjanna sem eru eitt sterkasta skákland heims. Sterkar skákkonur koma svo frá löndum eins og Kasakstan og Íran.

Einn áhugaverðasti keppandi mótsins er ekki meðal þeirra stigahæstu. Um er að ræða Elihaj Emjong sem kemur alla leiðina frá Úganda. Hann er sterkasti skákmaður lands síns og núverandi skákmeistari Vestur-Afríku. Einnig má nefna að meðal keppenda verður Henrik Carlsen en sá er faðir heimsmeistarans Magnusar Carlsen en teflir hér fyrst og fremst ánægjunnar vegna. 

Heimavarnarliðið lætur sig ekki vanta. Helgi Ólafsson tekur þátt í sínu fyrsta Reykjavíkurskákmóti í einu 10 ár! Að öðru leyti ber að sjálfsögðu hæst þátttaka Hannesar Hlífars Stefánssonar, sem er í senn sigursælasti skákmaður Reykjavíkurskákmótanna og tólffaldur Íslandsmeistari í skák. Meðal annarra keppenda eru stórmeistararnir Hjörvar Steinn Grétarsson, Henrik Danielsen, Stefán Kristjánsson og Þröstur Þórhallsson. 

Og svo má ekki gleyma hinum hefðbundna skákáhugamanni sem eru á öllum aldri. Má þar nefna að meðal keppenda eru Páll G. Jónsson (fæddur 1933), og er elstur keppenda, og Óskar Víking Davíðsson og Robert Luu (fæddir 2005) og eru yngstir keppenda. Aldursmunurinn er 72 ár! Segja má með sanni að skákin brúar bil!

Sérstakar þakkir fá helstu styrktaraðilar mótsins sem gera þessa skákhátíð mögulega. Má þar sérstaklega nefna N1, Reykjavíkurborg og Icelandair.

Mótið hefst með setningarathöfn í Hörpu 4. mars kl. 16 en sjálft mótið hefst kl. 16:30.

• Heimasíða N1 Reykjavíkuskákmótsins
• Keppendalistinn

Víkingaklúbburinn Íslandsmeistari skákfélaga

Víkingaklúbburinn varð fyrr í kvöld öruggur Íslandsmeistari skákfélaga eftir stórsigur á b-sveit Taflfélags Reykjavíkur í lokaumferðinni. Skákfélagið GM Hellir varð í öðru sæti og Taflfélag Vestamannaeyja varð í þriðja sæti.  Skákfélag Reykjanesbæjar varð sigurvegari annarar deildar, B-sveit Skákfélag Akureyrar sigraði í þriðju deild og b-sveit Skakfélags Reykjanesbæjar sigraði í þeirri fjórðu.

Verðlaunaafhending hefst kl. 22 í Billiardbarnum kl. 22.

Lokastaðan í fyrstu deild:

1. Víkingaklúbburinn 55 v.
2. Skákfélagið GM Hellir 50,5 v.
3. Taflfélag Vestmannaeyja 50 v.
4. Taflfélag Bolungarvíkur 44,5 v
5. Taflfélag Reykjavíkur 44 v.
6. Skákfélag Akureyrar 37 v.
7. Skákdeild Fjölnis 33,5 v.
8. Skákfélagið GM Hellir b-sveit 25, v.
9. Vinaskákfélagið 10 v. (2 stig)
10. Taflfélag Reykjavíkur 10 v. (0 stig)

Mótstöflu má finna á Chess-Results

Röð efstu liða í 2. deild:

1. Skákfélag Reykjanesbæjar 27 v.
2. Skákfélag Íslands 25 v.
3. Skákdeild Hauka 23,5 v.

C-sveit GM Hellis og b-sveit Taflfélags Vestmannaeyja féllu niður í þriðju deild.

Mótstöflu má finna á Chess-Results.

Röð efstu liða í þriðju deild

1. Skákfélag Akureyrar b-sveit
2. Skákdeild KR
3. Briddsfjelagið

Skáksamband Austurlands, b-sveit Skákdeildar KR og Skákfélags Sauðárkróks féllu niður í fjórðu deidld.

Mótstöflu má finna á Chess-Results.

Röð efstu liða í fjórðu deild

1. Skákfélag Reykjanesbæjar b-sveit
2. Skákfélag Akureyrar c-sveit
3. Skákfélag Akureyrar d-sveit 

Mótstöflu má finna á Chess-Results.

Nánar á morgun.

Víkingaklúbburinn efstur fyrir lokadag Íslandsmóts skákfélaga - ráðast úrslitin í fyrramálið?

Enn á ný tekur nýtt félag forystuna Íslandsmóti skákfélaga í MH. Eyjamenn voru efstir eftir fimm umferðir, GM-Hellismenn eftir sex umferðir. Það var svo Víkingaklúbburinn sem náði forystunni eftir sjöundu umferð sem fram fór í kvöld í MH. Sveitin vann b-sveit GM Hellis 7-1 og náði þar með hálfs vinnings forskoti á GM Hellir sem vann Skákfélag Akureyrar naumlega 5-3.

Eyjamenn unnu stórsigur, 8-0, á Vinaskákfélaginu og eru í þriðja sæti, 1½ vinningi á eftir GM Helli. Bolvíkingar eru í fjórða sæti eftir stórsigur, 8-0 á b-sveit Taflfélags Reykjavíkur, öðrum 1½ vinningi á eftir Eyjamönnum.

Það er engin smá umferð á morgun en þá mætast fjórar efstu sveitirnar innbyrðis. Víkingaklúbburinn teflir við Bolvíkinga og GM-Hellismenn tefla við Eyjamenn.

Úrslit sjöundu umferðar má nálgast á Chess-Results.

Staðan í fyrstu deild

1. Víkingaklúbburinn 41½ v.
2. Skákfélagið GM Hellir 41 v.
3. Taflfélag Vestmannaeyja 39½ v.
4. Taflfélag Bolungarvíkur 38 v.
5. Taflfélag Reykjavíkur 34 v.
6. Skákfélag Akureyrar 28½ v.
7. Skákdeild Fjölnis 23½ v.
8. GM Hellir b-sveit 17½ v.
9. Taflfélag Reykjavíkur b-sveit 9½ v.
10. Vinaskákfélagið 7 v.

Mótstöflu má nálgast á Chess-Results.

Staða efstu liða í 2. deild:

1. Skákfélag Reykjanesbæjar 18½ v.
2. Taflfélag Garðabæjar 18 v.
3. Víkingaklúbburinn b-sveit 16 v.

Mótstöflu má nálgast á Chess-Results.

Staða efstu liða í 3. deild:

1. Skákdeild KR 9 stig
2. Skákfélag Akureyrar 8 stig (21 v.)
3. Taflfélag Reykjavíkur 7 stig (16 v.)
4. Briddsfjelagið 7 stig (15½ v.) 

Stöðuna má nálgast á Chess-Results.

Staða efstu liða í 4. deild:

1. Skákfélag Reykjanesbæjar b-sveit 10 stig
2. Skákfélag Akureyar c-sveit 8 stig
3. Skákdeild Fjölnis 6 stig (19½ v.) 
4. Skákfélag Akureyrar d-sveit 6 stig (19½ v.)

Stöðuna má nálgast á Chess-Results.

Mótinu lýkur á morgun (laugardag) með tveimur síðustu umferðunum. Sú fyrri fer fram á milli 11-15 og sú síðari á milli 17-21.

Íslandsmót skákfélaga er stærsta einstaka mót hvers árs á Ísland. Í ár tefla 308 skákmenn í hverri umferð, allt frá sex ára til ríflega áttræðs. Í keppninni tefla nánast allir sterkustu skákmenn landsins, erlendir sterkir stórmeistarar, sterkustu skákkonur landsins auk hins almenna skákáhugamanns í stórum stíl.