N1 Reykjavíkurskákmótið: Hjörvar vann undrabarnið

Nýjasti stórmeistari Íslendinga Hjörvar Steinn Grétarsson lét ekki hið 10 ára undrabarn Awonder Liang stöðva sig og vann öruggan sigur með hvítu í vel tefldri og snarpri skák. Hjörvar hefur 2 vinninga ásamt 33 öðrum keppendum. Auk Hjörvars hafa Guðmundur Kjartansson, Björn Þorfinnsson, Dagur Arngrímsson og Henrik Danielsen fullt hús vinninga.

Lenka Ptácníková og Sigurður Páll Steindórsson náðu bæði eftirtektarverðum úrslitum, það er gerðu jafntefli við stórmeistara.

Umferðin tafðist nokkuð í dag þar sem brunavarnarkerfið fór í gang í Hörpu með tilheyrandi látum. Þurftu skákmennirnir að yfirgefa salinn í um hálftíma áður en taflmennska hélt áfram. Vegna þess seinkar þriðju umferð um hálftíma og hefst kl. 17:00.

Þá teflir Guðmundur við ofurstórmeistarann Richard Rapport, Björn við hollenska stórmeistarann Robin Van Kampen.

• Heimasíða N1 Reykjavíkurskákmótsins
• Beinar útsendingar
• Skákskýringar í beinni útsendingu
• Chess-Results

Hjörvar mætir 10 ára undrabarni kl. 9:30 á N1 Reykjavíkurskákmótinu

 

 

 

 

 

 

 

 

 

Framundan er stór dagur á N1 Reykjavíkurskákmótinu. Tvær umferðir í dag! Fyrri umferð dagsins er kl. 9:30. Aðalskák umferðarinnar er skák nýjasta stórmeistara Íslendinga Hjörvars Steins Grétarssonar sem mætir bandaríska undrabarninu Awonder Liang. Sá er heimsmeistari 10 ára og yngri og er sá yngsti í skáksögunni sem sigrað hefur stórmeistara en það gerði hann aðeins 9 ára!

Rétt er að benda á þráðbeinar skákskýringar frá skákstað í umsjón Ingvars Þórs Jóhannessonar og fleiri á Internetinu. Án efa verður skák Hjörvar og Liangs þar í aðalhlutverki.

• Myndir á Facebook
• Heimasíða N1 Reykjavíkurmótsins

Oliver Aron skákmeistari Rimaskóla 2014. Mykael og Nansý komust í úrslit á Barna-blitz

Skákmót Rimaskóla var haldið í 21. skipti í hátíðarsal skólans og bar að þessu sinni upp á bolludag. Líkt og í fyrra var mótið opið öllum skákkrökkum á grunnskólaaldri og teflt um titilinn Skákmeistari Rimaskóla 2014. Einnig var teflt um um tvö laus sæti í úrslitum á Barna-blitz mótinu, en úrslit þess móts ráðast Hörpunni n.k. laugardag. Það voru tæplega 70 krakkar sem tóku þátt í veglegu skákmóti þar sem öllum þátttakendum var boðið upp á rjómabollu í tilefni dagsins og veitt 20 verðlaun. Meðal keppenda voru allir sterkustu skákmenn Rimaskóla auk þess sem skákmeistarar úr Álfhólsskóla og Ölduselsskóla mættu til leiks og gerðu mótið mun sterkara. Oliver Aron Jóhannesson í 10. bekk Rimaskóla vann mótið örugglega enda langhæstur allra þátttakenda á stigum (2200). Oliver Aron sem varð núna skákmeistari Rimaskóla þriðja árið í röð vann allar sínar sex skákir. Í næstu sætum með 5 vinninga voru þau Mykael Kravchuk Ölduselsskóla, Nansý Davíðsdóttir, Joshua Davíðsson og Jóhann Arnar Finnsson Rimaskóla og þeir Felix Steinþórsson og Dawid Kolka Álfhólsskóla. Önnur í stúlknaflokki á eftir Nansý varð Heiðrún Hauksdóttir Rimaskóla og Tinna Björk Rögnvaldsdóttir í Rimaskóla varð þriðja, báðar með 3 vinninga.

Í keppninni um tvö laus sæti í úrslitum á Barna-blitz urðu þau Mykael og Nansý efst og voru stigamun á undan Felix og Joshua, en öll fengu þau 5 vinninga á mótinu.

Mótsstjóri var Stefán Bergsson og afhenti hann Oliver Aroni farandbikar skólans til varðveislu næsta árið. Aðeins Hjörvar Steinn Grétarsson hefur oftar orðið skákmeistari Rimaskóla en stórmeistarinn nýkrýndi  varð skólameistari í sjö ár. Alls voru veitt 20 verðlaun, pítsur, bíómiðar og sælgætispokar.

Ingimar Halldórsson sterkastur í Stangarhyl

Það mættu tuttugu og sjö höfðingjar til leiks í gær hjá Ásum. Ingimar Halldórsson var öruggastur og leyfði aðeins eitt jafntefli, það var við Björgvin Víglundsson sem er nú oftast nær efstur. Björgvin tapaði einni skák í dag, og gerði tvö jafntefli og varð í öðru sæti. Það var Valdimar Ásmundsson sem vann það afrek að vinna  kappann. Stefán Þormar varð svo í þriðja sæti með sjö og hálfan vinning. Valdimar kom svo í fjórða með sjö vinninga

Oftast eru þetta sömu mennirnir sem raða sér í tíu efstu sætin en þó kemur það nú fyrir að einhverjir af minni spá mönnunum skjótast upp í topp tíu hópinn.

 

N1 Reykjavíkurskákmótið hófst í dag - ofurstórmeistarinn gerði jafntefli

N1 Reykjavíkurskákmótið - 50 ára afmælismót Reykjavíkurskákmótsins hófst í dag í Hörpu. KK flutti tónlistaratriði við setningu mótsins, Eggert Benedikt Guðmundsson, forstjóri N1, Illugi Gunnarsson, mennta- og menningarmálaráðherra og Dagur B. Eggertsson, formaður borgarráðs héldu ræður. Dagur setti svo mótið með orðunum "Reykjavik Open has been opened" og lék fyrsta leikinn í skák þýska landsliðmannsins Arkedij Naiditch og Guðlaugar Þorsteinsdóttur, 1. e2-24. Veislan var hafin.

Alls taka 254 skákmenn þátt í mótinu nú sem er metþátttaka. Í fyrra voru þeir 227 svo fjölgunin er umtalsverð. Þessir keppendur eru frá 35 löndum. 28 stórmeistarar taka þátt og 24 alþjóðlegir meistarar. Íslendingarnir eru 99.  Norðmenn eru fjölmennastir gestanna með 28 skákmenn. Þeirra á meðal er "áhugamaðurinn" Henrik Carlsen, faðir Magnúsar heimsmeistara. Næstir eru Þjóðverjar með 25 keppendur.

Sumir keppendur koma langt frá. Má þar nefna Suður-Afríku, Argentínu, Brasilíu, Indland og Kína. 

Margir fátíðir gestir mættu á mótið. Má þar sérstaklega nefna Helga Ólafsson, sem teflir á sína fyrsta Reykjavíkurskákmóti í 10 ár, Walther Browne, sem sigraði á mótinu 1978 sællar minningar og Jón Kristinsson sem var meðal keppanda á fyrsta mótinu fyrr hálfri öld síðar. Síðast tefldi Jón hins vegar á Reykjavíkurskakmóti árið 1974 eða fyrir 40 árum síðan.

En það að úrslitunum. Langflest úrslitin voru fyrirsjáanleg, það er hinir stigahærri unnu hina stigalægri enda styrkleikamunurinn mikill í fyrstu umferð svo stórra móta. En ekki vantaði samt óvæntu úrslitin og þau óvæntustu næstefsta borði!

Kanadamaðurinn Daniel Abrahams (2055) gerði jafntefli við kínverska ofurstórmeistarann Chao Li (2700) en mjög sjaldgæft er að svo stigaháir menn geri jafntefli við svo stigalága menn.

Meðal annarra óvæntra úrslita var að Jón Kristinn Þorsteinsson (1883) gerði jafntefli við norska alþjóðlega meistarann Maxim Devereaux (2345). Hinn 72 ára Karl Egill Steingrímsson (1663) sem teflir á sínu fyrsta alþjóðlega skákmóti gerði jafntefli við Þjóðverjann Sebastian Gueler (2208). 

Landskonan Tinna Kristín Finnbogadóttir (1921) vann ungverska FIDE-meistarann Mate Bagi (2385). Önnur landsliðskona Elsa María Kristínardóttir (1822) gerði jafntefli við áðurnefndan Jón Kristinsson.

Afar góðar aðstæður eru á skákstað. Góðar aðstæður fyrir áhorfendur. Beinar útsendingar eru á netinu bæði af skákum og skákskýringar í umsjón Ingvars Þór Jóhannessonar.

Tvær umferðir eru á morgun. Sú fyrri hefst kl. 9:30 og sú síðari kl. 16:30.

Myndir á Facebook

Heimasíða N1 Reykjavíkurmótsins

N1 Reykjavíkurskákmótið hefst í dag - 50 ára afmælismót - einn keppendanna tefldi á fyrsta mótinu

Fyrsta Reykjavíkurskákmótið fór fram 1964 í Lídó og fagnar mótið því hálfrar aldar afmæli í ár. N1 Reykjavíkurskákmótið er elsta hátíðin sem kennd er við höfuðborgina og reyndar ein elsta skákhátíð heims sem enn er haldin reglulega. N1 Reykjavíkurskákmótið nýtur mikillar virðingar um allan heim og var til að mynda valið þriðja besta opna skákmótið árið 2012, en alþjóðleg skákmót skipta hundruðum ef ekki þúsundum ár hvert.

Á síðustu dögum hafa bæst við áhugaverðir keppendur. Má þar sérstaklega nefna Helga Ólafsson sem nú tekur þátt í fyrsta skipti í 10 ár og Jón Kristinsson, sem tefldi á fyrsta mótinu 1964 og mætti þar Mikhail Tal í fyrstu umferð og tapaði í frægri skák.

N1 Reykjavíkurskákmótið nú fer fram í Hörpu dagana 4.-12. mars. Í tilefni afmælisins verður mótið nú um margt sérstakt. Heiðursgestur verður sterkasti skákmaður allra tíma, Garry Kasparov, sem verður á landinu 9.-11. mars næstkomandi. Hann mun meðal annars heimsækja leiði Bobby Fischer, á 71. fæðingardegi Fischers, 9. mars, og mun árita bækur fyrir skákáhugamenn í Hörpu hinn 10. mars. Kasparov er í framboði sem næsti forseti FIDE - alþjóðlega skáksambandsins. Útsendingar á netinu frá mótinu verða betri og flottari en nokkru sinni fyrr.  

Metþátttaka verður á mótinu. Gera má ráð fyrir að keppendur verði á bilinu 260-270, frá um 45 löndum, en í fyrra voru þeir 227 talsins, sem þá var met! Meðal keppenda eru 27 stórmeistarar og 30 alþjóðlegir meistarar. Um 70% keppenda mótsins koma að utan og þar eru Norðmenn (28), Þjóðverjar (26) og Bandaríkjamenn (16) fjölmennastir.

Margir sterkir skákmeistarar eru meðal keppenda. Stigahæstur keppenda er þýski stórmeistarinn Arkadij Naiditsch með 2706 skákstig. Sá er af lettneskum uppruna en leiddi þýska landsliðið til afar óvænts sigur á EM landsliða 2011 og er fastagestur á ofurmótum. Næststigahæstur keppenda er kínverski landsliðsmaðurinn Chao Li með 2700 skákstig. Kínverska landsliðið er eitt það sterkasta í heimi og hlaut brons á síðasta Ólympíuskákmóti. Chao Li er ákaflega skemmtilegur skákmaður.

N1 Reykjavíkurskákmótið hefur ávallt státað af efnilegumskákmönnum, svo er einnig nú. Þar má nefna Richard Rapport, 17 ára Ungverja sem er ekki aðeins efnilegur heldur fjórði stigahæsti keppandi mótsins. Richard þessi náði því að verða sá sjötti yngsti í sögunni til þess að hampa stórmeistaranafnbótinni, en því náði hann aðeins 13 ára. Hann teflir ákaflega fjörlega og frumlega og vakti gríðarlega athygli á ofurmótinu í Wijk aan Zee nýlega, þar sem hann vann meðal annars Boris Gelfand.

Meðal annarra ofurstórmeistara má nefna Egyptann Bassim Amin, sem var meðal sigurvegara í fyrra, og Rússann Mikhail Kobalia, sem er yfirþjálfari rússneska unglingalandsliðsins og verður með fyrirlestur hérlendis um skákþjálfun.

Margir aðrir áhugaverðir keppendur eru meðal þátttakenda. Tveir koma alla leiðina frá Íran. Annar þeirra,Pouya Idani, varð heimsmeistari 18 ára og yngri í fyrra. Sá sigur vakti mikla athygli enda var Íraninn aðeins 20. stigahæsti keppandi mótsins. Einnig kemur frá Íran landsliðs- konan Sarasadat Khademalsharieh sem er stórmeistari kvenna og fyrrum heimsmeistari stúlkna 12 ára og yngri

Helsta undrabarn mótsins er hins vegar hinn 10 ára Awonder Liang. Sá er heimsmeistari 10 ára og yngri og varð jafnframt heimsmeistari 8 ára og yngri. Hann er sá yngsti í sögunni sem hefur unnið alþjóðlegan meistara í langri skák, þegar hann var 9 ára, og jafnframt sá yngsti sem hefur unnið stórmeistara, en þá var hann 10 ára! Menn skulu leggja nafn hans á minnið og fylgjast vel með þessum unga meistara, sem margir telja líklegt ofurstórmeistaraefni. Hann er á forsíðu nýjasta tölublaðs Chess Life Magazine.

Gamlar stjörnur láta sig ekki vanta. Ber þar hæst þátttöku WalterBrowne, sem sigraði á mótinu 1978, einu sterkasta Reykjavíkurskákmót sögunnar. Browne þótti hafa ákaflega fjörlega framkomu og margir minnast hamagangs í tímahraki nokkurra viðureigna hans frá fyrri Reykjavíkurmótum.

Að sjálfsögðu eru margar sterkar skákkonur meðal keppenda - nokkrar teljast til þeirra sterkustu í heimi. Má þar nefna indversku skákdrottninguna Tania Sadchev, sem sló í gegn fyrir frábærar skákskýringar frá heimsmeistaraeinvígi Anand og Carlsen, en einnig bandarísku skákkonuna Irina Krush, sem er núverandi skákmeistari Bandaríkjanna sem eru eitt sterkasta skákland heims. Sterkar skákkonur koma svo frá löndum eins og Kasakstan og Íran.

Einn áhugaverðasti keppandi mótsins er ekki meðal þeirra stigahæstu. Um er að ræða Elihaj Emjong sem kemur alla leiðina frá Úganda. Hann er sterkasti skákmaður lands síns og núverandi skákmeistari Vestur-Afríku. Einnig má nefna að meðal keppenda verður Henrik Carlsen en sá er faðir heimsmeistarans Magnusar Carlsen en teflir hér fyrst og fremst ánægjunnar vegna. 

Heimavarnarliðið lætur sig ekki vanta. Helgi Ólafsson tekur þátt í sínu fyrsta Reykjavíkurskákmóti í einu 10 ár! Að öðru leyti ber að sjálfsögðu hæst þátttaka Hannesar Hlífars Stefánssonar, sem er í senn sigursælasti skákmaður Reykjavíkurskákmótanna og tólffaldur Íslandsmeistari í skák. Meðal annarra keppenda eru stórmeistararnirHjörvar Steinn Grétarsson, Henrik Danielsen, Stefán Kristjánsson og Þröstur Þórhallsson. 

Og svo má ekki gleyma hinum hefðbundna skákáhugamanni sem eru á öllum aldri. Má þar nefna að meðal keppenda eru Páll G. Jónsson (fæddur 1933), og er elstur keppenda, og Óskar Víking Davíðsson og Robert Luu (fæddir 2005) og eru yngstir keppenda. Aldursmunurinn er 72 ár! Segja má með sanni að skákin brúar bil!

Sérstakar þakkir fá helstu styrktaraðilar mótsins sem gera þessa skákhátíð mögulega. Má þar sérstaklega nefna N1, Reykjavíkurborg og Icelandair.

Mótið hefst með setningarathöfn í Hörpu 4. mars kl. 16 en sjálft mótið hefst kl. 16:30.

• Heimasíða N1 Reykjavíkuskákmótsins
• Keppendalistinn

Fyrirlestrar í Fischersetri 9. mars nk.

Sunnudaginn 9. mars n.k. verður afmæli heimsmeistarans Bobby Fischers minnst sérstaklega í Fischersetri, en þá hefði hann orðið 71 ára hefði hann lifað.

Guðmundur G. Þórarinsson og Óli Þ. Guðbjartsson verða með fyrirlestra í Fischersetri. Guðmundur G. Þórarinsson mun fyrst svara spurningunni „Af hverju er skákeinvígið 1972 svona frægt"? Þá mun Óli Þ. Guðbjartsson tala um móður Fischers, hennar líf og áhrif á Fischer."

Fischersetrið verður opið almenningi frá kl. 15:30 - 19.00, og frítt verður inn þennan dag. Fyrirlesturinn hefst kl. 16:00 og eru allir velkomnir.

Varðandi frekari upplýsingar þá vinsamlegast hringið í síma 894-1275 eða sendið tölvupóst á netfangið [e-mail]

Fischersetrið á Selfossi.

N1-veislan hefst kl. 16!

N1 Reykjavíkurskákmótið hefst kl. 16 í dag með setningarathöfn mótsins. Í dag voru mótshaldarar að undirbúa skáksalinn eins og lesa má um á heimasíðu mótsins. Nánast allt er tilbúið fyrir mótið en um 260-270 skákmenn taka þátt sem er þátttökumet.

Í kvöld var opnunarpartý í Sky Bar sem tókst vonum framar. Þar voru um 80-100 gestir sem hlustuðu á Björn Þorfinnsson segja frá mótinu. Langflestir erlendu keppendurnir eru komnir til landsins.

Sjálf aðalveislan hefst svo kl. 16 með setningu mótsins. Umferðin hefst kl. 16:30.

 

Vigfús sigraði á hraðkvöldi

Vigfús Ó. Vigfússon sigraði á atkvöldi GM Hellis sem fram fór 24.  febrúar sl. Vigfús fékk fékk 6v í sjö skákum og kom tapið strax í fyrstu umferð gegn Kristjáni Halldórssyni. Kristján varð svo annar með 5,5v eins og Örn Leó Jóhannsson sem var þriðji en Kristján var hærri í þriðja stigaútreikningi. Örn Leó leiddi mótið lengst af fékk aðeins betra endatafl á móti Vigfúsi í lokaumferðinni með riddara á móti biskupi þótt peð væru á báðum vængjum þar sem hann hafði virkari kóngstöðu. Jafntefli hefði dugað Erni Leó til sigurs en hann teigði sig of langt í vinningstilraunum og vopnin snérust í höndunum á honum og efsta sætið skipti um eigendur í lokin. Í lok hraðkvöldsins dró Vigfús í happdrættinu og tala 2 sem stóð fyrir Kristján Halldórsson og fá þeir báðir gjafamiða á Saffran.

Hlé verður gert á skákköldum í Hellisheimilinu meðan á Reykjavíkurskákmótinu stendur þannig að næsta æfing í félagsheimili GM Hellis í Álfabakka 14a verður mánudaginn 17. mars kl. 20 og þá verður hraðkvöld.

Lokastaðan á atkvöldinu:

Röð	Nafn	Vinn.	TB1	TB2	TB3
1	Vigfús Vigfússon	6	22	17	16,5
2	Kristján Halldórsson	5,5	23	17	16,3
3	Örn Leó Jóhannsson	5,5	23	17	13,8
4	Sverrir Sigurdsson	3,5	25	19	7,75
5	Jón Eggert Hallsson	3,5	25	19	6,75
6	Hjálmar Sigurvaldason	2,5	26	20	4,25
7	Hörður Jónasson	1,5	27	21	1,25
8	Björgvin Kristbergsson	0	28	21	0

Myndir og pistill frá Íslandsmóti skákfélaga

 

 

Fjöldi mynda voru teknar á Íslandsmóti skákféalga. Pálmi R. Pétursson tók fjölda mynda frá verðlaunaafhendinunni en Einar S. Einarsson tók mikið af myndum á skákstað.

 

 

Fyrsti pistill er kominn í hús en hann er frá Taflféalgi Bolungarvíkur og er skrifaður af Guðmundi Daðasyni.

• Myndir frá Pálma
• Myndir frá Einari
• Pistill frá TB