Einkaviðtal við Magnus Carlsen í Tímaritinu Skák

Tímaritið Skák kemur út 7. mars næstkomandi. Ýmislegt forvitnilegt efni er í tímaritinu. Ber þar hæst einkaviðtal við sjálfan heimsmeistarann í skák, Magnus Carlsen, og umboðsmann hans, Espen Agdestein.

Meðal annars efnis má nefna umfjöllun um Reykjavíkurskákmótið 1964 eftir Helga Ólafsson (verður í afmælisbókinni um Reykjavíkurskákmótið) umfjöllun um mótið í fyrra eftir Ingvar Þór Jóhannesson og Stefán Bergsson, umfjöllun um Opna Íslandsmótið í skák (100 ára afmælismótið) eftir Sigurbjörn Björnsson, Heimsmeistararaeinvígið í Chennai eftir Björn Þorfinnsson, EM landsliða eftir Gunnar Björnsson og íslensk kvennaskák eftir Andreu Margréti Gunnarsdóttur.

Fyrir þá örfáu skákunnendur sem ekki er áskrifendur má skrá sig í áskrift hér.

,,Gleðin að leiðarljósi!" -- Tólfta starfsár Hróksins á Grænlandi að hefjast

Skákfélagið Hrókurinn byrjar tólfta starfsár sitt á Grænlandi með leiðangri til þorpa og bæja á austurströnd Grænlands 19. til 26. febrúar. Skólar, barnaheimili og athvörf í Tasiilaq, Kulusuk og Tiniteqilaaq verða heimsótt, efnt til kennslu, fjöltefla og skákmóta. Fjölmörg fyrirtæki og einstaklingar senda gjafir, vinninga og verðlaun með leiðangursmönnum Hróksins. 

Skáklandnám Hróksins á Grænlandi hófst árið 2003, en skák var þá nánast óþekkt hjá okkar næstu nágrönnum. Ferðir Hróksins til Grænlands eru nú orðnar fleiri en 30 og þúsundir barna og ungmenna á Grænlandi hafa kynnst töfraheimi skákíþróttarinnar.

Leiðangurinn til Austur-Grænlands 19. til 26. febrúar hefur kjörorðið: ,,Gleðin að leiðarljósi". Flugfélag Íslands er sem fyrr helsti samstarfsaðili Hróksins á Grænlandi við að útbreiða fagnaðarerindi skákarinnar, en meðal annarra bakhjarla að þessu sinni ber að nefna Úrsus hf. og Íslenska fjallaleiðsögumenn. Fyrirtæki sem senda gjafir til grænlensku barnanna eru m.a. Bónus, N1, Sólarfilma, Arion banki, Landsbankinn, Tiger, Íslandsbanki, Henson, Regatta útivistarverslun, 10. október nefndin, Prentsmiðjan Oddi, Bobbý skákverslun, Tólf tónar og Vinaskákfélagið.

Þá hafa fjölmargir einstaklingar og félög lagt sitt af mörkum. Börnin í skákdeild Fjölnis söfnuðu þannig fjölda vinninga og gjafa, auk þess að safna upphæð sem dugar fyrir 15 taflsettum á Grænlandi. Björg Haraldsdóttir, fv. starfsmaður í Vin athvarf sendir börnunum í Kulusuk taflsett og Marta Matthíasdóttir, starfsmaður Háskóla Íslands, efndi til söfnunar meðal háskólafólks og barna þeirra. Mireya Samber myndlistarkona færir grænlensku börnunum eðalprjónavörur og þannig mætti lengi áfram telja um rausn og góðvild Íslendinga á öllum aldri í garð okkar góðu nágranna.

Fréttir verða sagðar af leiðangri Hróksins á Facebook síðu félagsins:  Skákfélagið Hrókurinn.

Leiðangursmenn Hróksins til Austur-Grænlands eru Hrafn Jökulsson, Róbert Lagerman, Stefán Herbertsson og Jón Grétar Magnússon.

Vernandi leiðangursins til Austur-Grænalands er Jóhanna Kristjónsdóttir, sem frá upphafi hefur stutt starf Hróksins á Grænlandi með ráðum og dáð.

Björgvin Víglundsson sigrar enn á ný í Stangarhyl

Það var mikið fjör hjá Ásum í dag  þegar 32 öðlingar mættu til leiks í Stangarhylnum og tefldu sér til gamans og ánægju. Þarna mættu nokkrir sem hafa ekki komið áður og láta vonandi sjá sig aftur. Við verðum alltaf kátir þegar við sjáum nýja menn ganga í salinn. Björgvin Víglundsson breytti ekki út af vananum og varð efstur eins og hann er oftast, hann fékk 9 vinninga af 10 mögulegum.

Friðgeir Hólm tók annað sætið með 8½ vinning. Þór Valtýsson varð svo einn í þriðja sæti með 7½ vinning. Einar Ess var í essinu sínu og varð í 4.-5. sæti með 6½ vinning ásamt Albert Geirssyni ágætum Austfirðingi sem kemur við þegar hann er í bænum.

Sjá nánar úrslit og myndir frá ESE.

 

 

Atskákmót Víkings

Atmót Víkings verður haldið í Víkinni miðvikudaginn 19. febrúar og hefst mótið kl. 20.00.  Tefldar verða 7. umferðir.  Þrjár fyrstu umferðirnar eru hraðskákir með 5. mínútna umhugsunartíma, en síðustu fjórar umferðirnar verða atskákir með 15. mínútna umhugsunartíma.  Mótið er ágætis æfing fyrir Íslandsmót skákfélaga og Reykjavíkurskákmótið, en Íslandsmót skákfélaga verður haldið í Menntaskólanum við Hamrahlíð dagana 27. febrúar til 1. mars.  

Reykjavík Open hefst 4. mars og stendur til 12. mars.  Margir skákmenn Víkingaklúbbsins er skráðir til leiks á Reykjavík Open.

Dagskrá fram á vor:

19. febrúar. Skákmót Vìkings. Víkin. kl 20.00 (7. umferðir, 3 umf 5. min og 4 umf 15. mínútur)
27. febrúar-1. mars. Íslandsmót skákfélaga
4. mars - 12. mars. N1 Reykjavíkurmótið 2014.
5. mars. Æfing fellur niður vegna Reykjavíkurskákmótsins.
19. mars. Víkingaskákæfing.  Staðsetning óákveðin. kl. 20.00
2. april. Hraðskákmót Víkings. (11. umferðir, 5. mínútur). Víkin. kl. 20.00.
16. april. Meistaramót Víkingaklúbbsins í Víkingaskák. Víkin. Kl. 20.00
30. apríl. Víkingaskákæfing. Staðsetning óákveðin. Kl. 20.00.
14. mai. Íslandsmót Víkingaskákfélaga. Víkin. kl. 20.00.

Áætlun þessi getur tekið breytingum. Reynt er að láta ekki æfingar rekast á aðra viðburði í skákinni, sjá mótaáætlun S.Í, hér:

Stórmeistaramót Vildarbarna

Stórmeistaramót Vildarbarna fer fram sunnudaginn 23. febrúar á Hótel Hilton klukkan 14:00. Mótið er haldið til styrktar Vildarbörnum. Mótshaldari er Hjörvar Steinn Grétarsson og fjölskylda með stuðningi styrktaraðila Hjörvars Steins, Icelandair Cargo.

Hjörvar Steinn er nýjasti stórmeistari Íslendinga en útnefninguna hlaut hann í desember. Með mótshaldinu vill hann koma fram þökkum til allra þeirra aðila sem hafa stutt hann á sínum skákferli um leið og góðu málefni er lagt lið.

Tíu stórmeistarar munu tefla hraðskákir í lokuðum flokki þar sem þeir mætast allir innbyrðis. Mótið er  sterkasta hraðskákmót sem haldið hefur verið á Íslandi í nokkur ár.

Fyrstu verðlaun nema 100.000 krónum.

Keppendur:

• GM Friðrik Ólafsson
• GM Hannes Hlífar Stefánsson
• GM Helgi Áss Grétarsson
• GM Helgi Ólafsson
• GM Hjörvar Steinn Grétarsson
• GM Jóhann Hjartarson
• GM Jón L. Árnason
• WGM Lenka Ptácníková
• GM Stefán Kristjánsson
• GM Þröstur Þórhallsson
  

Í viðtali við Hjörvar Stein kom fram að undirbúningur mótsins hafi gengið vel:

Það hefur allt gengið vel. Fyrirtæki og einstaklingar hafa nú þegar lagt til sitt af mörkum og það verður ánægjulegt að afhenda Vildarbörnum styrkinn. Ég hlakka svo mikið til að tefla í móti með öllum þessum stórmeisturum. Þetta er eins konar uppskeruhátíð í kjölfar titilsins sem ég náði í desember. Það hafa ansi margir hjálpað mér í gegnum tíðina á mínum ferli og nú vill ég gefa tilbaka í verki.

Stórmeistaramótið verður sett klukkan 14:00 á sunnudaginn. Búast má við að mótið standi til um 17:00. Skákskýringar verða í hverri umferð í höndum Ingvars Þórs Jóhannessonar, Björns Þorfinnssonar og Stefáns Bergssonar.

Áhorfendur hjartanlega velkomnir.

Barna-og unglingameistaramót Reykjavíkur fer fram á sunnudag

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 23. febrúar í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir Monrad-kerfi með umhugsunartímanum 15 mín. á skák. Teflt verður í einum flokki.
Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2014, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2014, sé hún búsett í Reykjavík eða félagi í reykvísku taflfélagi.

Til viðbótar verða veitt verðlaun fyrir þrjú efstu sætin í aldursflokknum 12 ára og yngri (fædd 2001 og síðar).

Mótið er opið öllum krökkum 15 ára og yngri (fædd 1998 og síðar).

Skráning fer fram á [e-mail] (vinsamlegast gefið upp nafn, fæðingarár, símanúmer, skóla og taflfélag (ef við á)) og einnig er hægt að skrá sig á mótsstað sunnudaginn 23.  febrúar frá kl. 13.30- 13.45. Skákmótið hefst kl. 14.

Aðgangur á mótið er ókeypis.

Skákæfing hjá Skákdeild Breiðabliks

Skákæfing hjá Skákdeild Breiðabliks í kvöld Mæting  kl 19:45 og hraðskákmótið byrjar stundvíslega kl 20:00!

Átta umferða hraðskákmótið (5mín + 2sek) verður reiknað til FIDE hraðskákstiga eins og öll þriðjudagsmótin í vetur!

Allir velkomnir ókeypis í einn glæsilegasta skáksal landsins óháð því í hvaða taflfélagi þeir eru.

Æfingin er í Stúkunni við Kópavogsvöll (3ju hæð). Gengið inn um kjallarahæð bakatil.

Vetrarleyfisskákmót Fjölnis og Gufunesbæjar næsta föstudag

Næsta föstudag 21. febrúar verður haldið hið árlega Vetrarleyfisskákmót Skákdeildar Fjölnis og Gufunesbæjar í Hlöðunni við Gufunesbæ.

Mótið hefst kl. 13:00. Tefldar verða 6 umferðir og umhugsunartíminn er 7 mínútur. Fjöldi verðlauna verður í boði: bíómiðar, pítsur, aðgangskort að skíðasvæðum og sundstöðum. Í fyrra mættu 30 keppendur til leiks og nýttu vetrarleyfistímann til skákiðkunar. Mótstjórar á Vetrarleyfismótinu verða þeir Stebbi Bergs og Björn Ívar frá Skákakademíu Reykjavíkur.

 

Jón Kristinn yngsti meistari sögunar - Haraldur og Andri Freyr næstir

Í gær lauk Landsbankamótinu, sem jafnframt var Skákþing Akureyrar, hið 76. í röðinni. Eins og áður hefur komið fram var sigur Jóns Kristins þegar orðinn staðreynd fyrir lokaumferðina. Hann sat reyndar að tafli á Norðurlandamótinu í skólaskák í Danmörku þennan dag en skák hans við Tómas Veigar Sigurðarson í lokaumferðinni sem var flýtt vegna utanfarar Akureyrarmeistarans hafði þá lokið með jafntefli.  

Baráttan í gær stóð því öðru fremur um annað og þriðja sætið á mótinu og var þar ekkert gefið eftir frekar en fyrri daginn.  Lyktaði þeim slag þannig, að Haraldur meistari fyrra árs náði öðru sætinu eftir að hafa lagt Símon að velli í flókinni skák. Sigurður Eiríksson, sem var jafn Haraldi fyrir umferðina, mátti hinsvegar játa sig sigraðan af Jakobi Sævari og missti þá fram úr sér Andra Frey, sem sneri töpuðu endatafli sér í vil gegn Rúnari. Loks lagði Hjörleifur Loga rúnar að velli.

Sigur Jóns Kristins Þorgeirssonar á þessu gamalgróna móti er sögulegur.  14 ára gamall er hann langyngsti Akureyrarmeistari sögunnar, rúmum þremur árum yngri en Rúnar Sigurpálsson var þegar hann vann sinn fyrsta meistaratitil árið 1990. Jón var vel að sigrinum kominn og sýndi nú meiri yfirvegun í skákum sínum en áður; var aðeins í taphættu í einni skák.   Það var einmitt gegn Andra Frey, sem þarna átti líklega sitt besta mót. Þriðji yngismaðurinn sem lét til sín taka í toppbaráttunni var svo Símon Þórhallsson, sem missti naumlega af verðlaunasæti með töpum í síðustu skákum sínum tveimur. Allir eru þessir ungu menn í hraðri framför. Kollega þeirra, Logi Rúnar var hinsvegar of mistækur í þetta sinn. Hann sýndi það þó með taflmennsku sinni að hann á fullt erindi í mót af þessu tagi þótt vinningarnir létu á sér standa. Þeir koma næst.  

Annað sætið fékk Haraldur verðskuldað. Hann missti þráðinn þegar hann lagði of mikið á stöðuna í hinni mikilvægu skák við Jón Kristin og tapaði svo á tíma í óljósri stöðu gegn Sigurði í næstu umferð. Aðrar skákir tefldi hann af miklu öryggi.  Sigurður hóf mótið með fjórum sigrum, en þá snerist gæfuhjólið honum í óhag.  Skákir hans eru jafnan mjög skemmtilegar og fjörugar.

Í heild var mótið mjög skemmtilegt og mikið um góðar skákir. Þökkum við keppendum þátttökuna og Landsbankanum stuðninginn við mótshaldið. Að venju lýkur Skákþinginu formlega með afhendingu verðlauna að loknu hraðskákmóti Akureyrar nk. sunnudag 23. febrúar.

• Heimasíða SA
• Chess-Results

Kasparov áritar 10. mars í Hörpu - hægt að panta eintök

Í tilefni af komu Kasparovs til landsins þá er stefnt að því að Kasparov áriti bækur sínar mánudaginn 10. mars í Hörpunni. Kasparov hefur á undanförnum árum skrifað 11 bækur um skáksöguna sem Everyman Chess hefur gefið út. Þessar bækur hafa mér vitanlega ekki verið fáanlegar á Íslandi áður.

Fyrstu fimm bækurnar hétu My Great Predecessors og fjölluðu eins og nafnið gefur til kynna um heimsmeistarana áður en Kasparov varð heimsmeistari.

Næsti bókaflokkur hét Garry Kasparov on Modern Chess og þriðji flokkurinn, sem er enn í skrifum, heitir Garry Kasparov on Garry Kasparov og hafa 2 bækur af 3 komið út í þeim flokk.

Þeir sem hafa áhuga á að panta eitthvað af þessum bókum hjá Bóksölu Sigubjörns þá endilega sendið honum línu á [e-mail] Verðið á þeim er á bilinu 5.000-6.500. Hann mun ekki panta mikið umframmagn og því er mikilvægt að forpanta til að tryggja sér eintak.

Bækurnar má finna hverja og eina á Skákbækur.com.