Íslandsmót skákfélaga frá sjónarhóli TR

Þórir Benediktsson, stjórnarmaður í TR, hefur skrifað pistil um gengi TR-sveitanna á Íslandsmóti skákfélaga. Hann má í heild sinni hér:

http://taflfelag.is/?c=frettir&id=1171&lid=&pid=&option 

B-sveit TR sigurvegari 2. deildar eftir úrskurð Mótsstjórnar

Mótsstjórn Íslandsmóts skákfélaga felldi í gær úrskurð um Robert Ris með Fjölni. Var það niðurstaða meirihluta nefndarinnar að TR ynni málið og viðureignin dæmd 4,5-1,5 þeim í vil en Fjölnir hafði unnið viðureignina á sjálfu Íslandsmótinu með sama mun.

Við þær breytingar tekur b-sveit TR efsta sætið í efstu deild, Goðinn-Mátar dettur niður í það annað og Fjölnir í það þriðja.

Rétt er að taka fram að Fjölnir getur áfrýjað málinu til Dómstóls SÍ og því þarf þessi niðurstaða ekki að vera endanleg. Niðurstaða Mótsstjórnar SÍ fylgir hér með í heild sinni:

 

ÚRSKURÐUR
MÓTSSTJÓRNAR ÍSLANDSMÓTS

SKÁKFÉLAGA
2012-2013

Ár 2013, föstudagur 8. mars, er
tekið fyrir mál nr. 2/2013; kæra Taflfélags Reykjavíkur vegna lögmætis Robert
Ris (FIDE-kennitala 1011480) sem keppanda með Skákdeild Fjölnis í síðari hluta Íslandsmóts
skákfélaga 2012-2013. Í málinu úrskurða Sverrir Örn Björnsson, Áskell Örn
Kárason og Einar S. Einarsson.

Framangreind kæra TR barst
mótsstjórn eftir upphaf 7. umferðar Íslandsmóts skákfélaga 2012-2013 laugardaginn
2. mars 2013 þar sem Robert Ris tefldi á 1. borði fyrir a-sveit Skákdeildar
Fjölnis í viðureign félagsins við b-sveit Taflfélags Reykjavíkur í 2. deild
mótsins. Í erindinu kemur fram að þar sem Robert Ris sé ekki skráður í
Keppendaskrá Skáksambands Íslands sem félagsmaður Skákdeildar Fjölnis sé hann
ekki löglegur keppandi með Fjölni í viðureign félagsins við Taflfélag
Reykjavíkur, sbr. 19. gr. skáklaga Skáksambands Íslands. Verður að líta svo á
að af hálfu Taflfélags Reykjavíkur sé þess krafist að félaginu verði
úrskurðaður sigur í framangreindri viðureign b-sveitar félagsins við a-sveit
Skákdeildar Fjölnis í lokaumferð Íslandsmóts skákfélaga 2012-2013.

Af hálfu mótsstjórnar var formanni Skákdeildar
Fjölnis kynnt kæra Taflfélags Reykjavíkur á mótsstað 2. mars 2013 og honum
gefinn kostur á að koma á framfæri athugasemdum í tilefni af kærunni, sbr. 20.
gr. skáklaga. Af hálfu formanns Fjölnis var bent á að Robert Ris væri getið sem
félagsmanns Skákdeildar Fjölnis í styrkleikaröðuðum lista yfir keppendur
Fjölnis sem lagður hafi verið fram fyrir upphaf 1. umferðar Íslandsmóts
skákfélaga haustið 2012. Þá hafi Robert teflt með félaginu í fyrri hluta
mótsins.

Með tölvupósti mótsstjórnar 4. mars
2013 var formanni Skákdeildar Fjölnis á ný gefinn kostur á að koma á framfæri
athugasemdum í tilefni af kæru Taflfélags Reykjavíkur. Svar barst frá formanni Fjölnis
með tölvupósti sama dag. Þar kemur fram að Robert Ris sé tilgreindur sem
félagsmaður Fjölnis á styrkleikaröðuðum lista yfir keppendur félagsins sem
lagður hafi verið fram fyrir upphaf 1. umferðar Íslandsmóts skákfélaga í
október 2012. Hafi Robert teflt athugasemdalaust með a-sveit Fjölnis í fyrri
hluta keppninnar og öllum verið ljóst frá upphafi að hann væri félagsmaður í
Fjölni. Robert hafi teflt með Fjölni frá því í mars 2009. Þá er bent á að
skrifstofa Skáksambands Íslands hafi jafnan haft frumkvæði að því að tilkynna
félögum um þá skákmenn sem væru að falla út af listanum þannig að félögin gætu
gert athugasemdir. Er vísað til úrskurðar mótsstjórnar Íslandsmóts skákfélaga
frá 2. mars 2013 í máli nr. 1/2013 varðandi lögmæti keppanda með Taflfélagi
Bolungarvíkur.

Niðurstaða:

Atkvæði
meirihluta, Sverris Arnar Björnssonar og Áskels Arnar Kárasonar:

Eins og fram kemur í málavaxtalýsingu
hér að framan telur Taflfélag Reykjavíkur að Robert Ris sé ólöglegur keppandi
með Skákdeild Fjölnis í viðureign félaganna í 7. umferð Íslandsmóts skákfélaga
2012-2013 (2. deild) þar sem Robert sé ekki skráður í Keppendaskrá Skáksambands
Íslands sem félagsmaður Fjölnis.

Samkvæmt 20. gr. skáklaga Skáksambands Íslands skulu keppendur í
Íslandsmóti skákfélaga vera skráðir í Keppendaskrá Skáksambandsins sem
félagsmenn þeirra félaga sem þeir tefla fyrir. Í 1. mgr. 19. gr. skáklaganna
kemur fram að aðeins þeir sem eru í Keppendaskrá SÍ teljist löglegir með
viðkomandi félagi í Íslandsmóti skákfélaga (fyrri og seinni hluta). Þó eru þeir
skákmenn sem eru án skákstiga og án félags undanþegnir því að þurfa að vera í
Keppendaskránni. Þessi undantekning á ekki við um Robert Ris sem er skráður með
2412 alþjóðleg skákstig á stigalista Alþjóðaskáksambandsins (FIDE). Samkvæmt 3.
mgr. 19. gr. skáklaganna skulu athugasemdir vegna Keppendaskrárinnar hafa
borist Skáksambandi Íslands viku fyrir mót og Skáksamband Íslands að úrskurða í
síðasta lagi fimm dögum fyrir upphaf Íslandsmóts skákfélaga.

Fyrir liggur í málinu að Robert Ris
er ekki skráður í Keppendaskrá SÍ sem félagsmaður Skákdeildar Fjölnis, en
samkvæmt upplýsingum um félagaskipti í Keppendaskránni var Robert afskráður 6.
júlí 2010. Ekki verður séð að neinar athugasemdir hafi verið gerðar við
skráninguna að þessu leyti af hálfu Skákdeildar Fjölnis fyrir upphaf fyrri
hluta Íslandsmótsins 2012-2013, sbr. 3. mgr. 19. gr. skáklaga. Samkvæmt þessu telst
Robert Ris óhjákvæmilega ekki vera löglegur keppandi með a-sveit skákdeildar
Fjölnis í viðureign sveitarinnar við b-sveit Taflfélags Reykjavíkur í 7. umferð
Íslandsmóts skákfélaga 2012-2013. Getur ekki breytt þeirri niðurstöðu þótt
Robert sé talinn með keppendum Fjölnis á styrkleikaröðuðum lista sem skilað var
fyrir upphaf 1. umferðar Íslandsmótsins í október 2012, enda eru skáklög
afdráttarlaus um nauðsyn á skráningu keppenda í Keppendaskrá SÍ til að þeim sé
heimilt að tefla með hlutaðeigandi félagi í Íslandsmóti skákfélaga. Þá er rétt
að taka fram að í máli því, sem lauk með úrskurði mótsstjórnar 2. mars sl.
(máli nr. 1/2013), var um að ræða keppanda sem skráður var í Keppendaskrá SÍ.

Í 21. gr. skáklaga kemur fram að sé keppandi úrskurðaður ólöglegur, skuli
viðkomandi viðureign tapast 2-6 hið minnsta þegar um er að ræða 8 manna lið en
1,5-4,5 þegar um er að ræða 6 manna lið. Tapist viðureignin hins vegar enn
stærra standi þau úrslit og skal skák ólöglegs keppanda ávallt teljast töpuð.
Fyrir liggur að viðureign a-sveitar Skákdeildar Fjölnis og b-sveitar Taflfélags
Reykjavíkur í 7. umferð Íslandsmóts skákfélaga 2012-2013 lauk með 4,5-1,5 sigri
Skákdeildar Fjölnis. Samkvæmt þessu og með vísan til 21. gr. skáklaga telst
a-sveit Skákdeildar Fjölnis hafa tapað umræddri viðureign 1,5-4,5. Breytist
lokastaða 2. deildar Íslandsmóts skákfélaga 2012-2013 til samræmis.

 

Ú r s k u r ð a r o r ð :

Robert Ris telst hafa verið
ólöglegur keppandi með a-sveit Skákdeildar Fjölnis í 7. umferð 2. deildar
Íslandsmóts skákfélaga 2012-2013. Telst Skákdeild Fjölnis því hafa tapað
viðureign 7. umferðar gegn b-sveit Taflfélags Reykjavíkur 1,5-4,5. Lokastaða 2.
deildar breytist til samræmis.

Atkvæði minnihluta, Einars S.
Einarssonar:

Undirritaður varamaður í Mótstjórn Íslandsmóts Skákfélaga fellst ekki á
megin niðurstöðu og úrskurðarorð 
meirihluta nefndarinnar og skilar því eftirfarandi sératkvæði :

Vísað er til umfjöllunar  um  framangreinda kæru í málskjölum þar sem
forsendur hennar og málsvarnir kæruþola eru ítarlega raktar.

Eins og þar kemur fram er það ómótmælanleg staðreynd að nafn meints
ólögmæts keppenda Sd. Fjölnis, Robert Ris, kemur fram á keppendalista sem
afhentur var mótshaldara (SÍ) tímanlega áður en keppnin hófst í september í
fyrra. 

Kallað er eftir þessum gögnum af SÍ frá öllum þátttökufélögum til að hægt
sé fylgjast með og fullreyna að keppnin fari rétt fram í hvívetna og engin
brögð séu í tafli.  Með því að kalla
eftir þessum gögnum tekur mótsaðili á sig eftirlitsskyldu.

Því verður að teljast að úr því að umræddur keppandi fékk að tefla fyrir
SF allar sex umferðir mótsins athugasemdalaust hafi hann verið viðurkenndur sem
gildur þátttakandi.   Slík atvik að
ólögmætur teflandi taki þátt geta eðli málsins samkvæmt komið upp í einstökum
umferðum sem taka verður fyrir eftir á með eða án kæru mótherja, en ef slíkt
tekur til allra umferða er ábyrgðin tvímælalaust  mótshaldara (dómara og skákstjóra).  Því er óeðlilegt að skella skuldinni á
félagið sem teflir fram umræddum keppanda í góðri trú og af bestu vitund.  

Gerð er krafa um að nöfn allra keppenda sé að finna á rafrænni
Keppendaskrá Skáksambandsins  sem
skrifstofa SÍ ber ábyrgð á, eins og segir í 
lögum og reglugerð um hana.  Fyrir
liggur að nafn umrædds keppenda var afmáð af skránni árið 2010 án vitundar SF
sem var ekki tímabært né lögmætt miðað við þriggja keppnistímabila regluna og
hefði í fyrsta lagi átt að gerast árið 2012 og þá með eðlilegum fyrirvara og
tilkynningu til SF.

Fráleitt er að ætla að SF hafi vísvitandi teflt fram ólöglegum keppanda í
öllum umferðum mótsins heldur er hér um tæknileg og mannleg mistök að ræða sem
mótshaldari ber jafn mikla ábyrgð á og kæruþoli.

Í ljósi þess að mottó keppninnar og skákmóta yfirleitt er að þau fari
fram í drengskap og góðum íþróttaanda verður eftir atvikum að teljast að Robert
Ris hafi verið löglegur með SF og úrslitin í viðureign  TR-b og Sd. Fjölnis verði því látin standa.

Um málskot:

Úrskurði þessum má skjóta til Dómstóls SÍ. Kærufrestur er þrír
sólarhringar frá upphafi þeirrar umferðar sem keppandi var á meðal þátttakenda.

KR-ingar að tafli

Það er jafnan þröng á þingi í KR-heimilinu í Frostaskjóli þegar valinkunnir skákgeggjarar alls staðar að af höfuðborgarsvæðinu hittast þar til tafls á mánudagskvöldum. Síðustu hraðskákmótin þar hafa verið einkar lífleg og þrír fræknir sigurvegarar verið krýndir og fagnað með dúndrandi lófataka í leikslok. Núna síðast

Hrannar Baldursson, heimspekingurinn hugumstóri, fyrrum KR-ingur. Ingimar Jónsson þar næst á undan og svo öldungurinn sigurreifi Gunnar Kr. Gunnarsson, sem vann 2 mót í röð, eftir að hafa náð  opnum sínum á ný. 

Fyrir þorstláta og fróðleiksfúsa skákunnendur fylgja hér með myndskreyttar mótatöflur síðustu þriggja móta þar sem sjá má helstu úrslit og frammistöðu einstakra keppenda, sem segja sína sögu um baráttu þeirra við ofjarla sína sem að ofan er getið.  Frekari lýsingar á vopnaviðskiptum verða að bíða
betri tíma, enda tekur eitt mót við af öðru og vonlaust að gera þeim öllum skil í löngu máli.

 

"Betra er það sem styttra reynist", var einu sinni sagt.
 /ESE 

Jón Kristinn vann fjórða mót TM-mótaraðarinnar

Í gær lauk fjórðu umferð TM-mótaraðarinnar. 12 keppendur mættu til leiks og var tefld hraðskák, allir við alla. Jón Kristinn Þorgeirsson sigraði og jók forystu sína í mótinu. Það var enginn annar en Sveinbjörn Sigurðsson sem lýsti úrslitum og stjórnaði hverjum bæri að klappa fyrir í lokin. Fórst honum það vel úr hendi.

Helstu úrslit:

Jón Kristinn 9,5 vinningar af 11

Smári Ólafsson 8,5 vinningar

Sveinbjörn Sigurðsson og Sigurður Arnarson  7 vinningar

Andri Freyr 6,5 vinningar

Einar Garðar og Haki 6 vinningar.

Á sunnudaginn fer fram skylduleikjamót og hefst það kl. 13.

Skákmót öðlinga hefst á miðvikudaginn

Skákmót öðlinga 40 ára og eldri hefst miðvikudaginn 13. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina + 30 sekúndna viðbótartími á hvern leik.

Skákmót öðlinga verður nú haldið í 22. sinn. Sigurvegari á Skákmóti öðlinga 2012 var Þorvarður F. Ólafssonn.

Dagskrá:

• 1. umferð miðvikudag 13. mars kl. 19.30
• 2. umferð miðvikudag 20. mars kl. 19.30
• Hlé gert á mótinu vegna Páska
• 3. umferð miðvikudag 3. apríl kl. 19.30
• 4. umferð miðvikudag 10. apríl kl. 19.30
• 5. umferð miðvikudag 17. apríl kl. 19.30
• 6. umferð miðvikudag 24. apríl kl. 19.30
• 7. umferð miðvikudag 1. maí kl. 19.30

Mótinu lýkur miðvikudaginn 8. maí kl. 19:30 með hraðskákmóti og verðlaunaafhendingu. Keppt er um veglegan farandbikar,en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Þátttökugjald er kr. 4.000 fyrir aðalmótið og kr 500 fyrir hraðskákmótið. Innifalið er frítt kaffi allt mótið ásamt rjómavöfflum og öðru góðgæti á lokakvöldi.

Skráning fer fram á skráningarformi á heimasíðu T.R.

Ný íslensk skákstig

Ný íslensk skákstig eru nýkomin út en þau koma út fjórum sinnum á ári. Jóhann Hjartarson er sem fyrr langstigahæstur íslenskra skákmanna. Ellefu nýliðar eru á listnum og þeirra stigahæstur er Andri Steinn Hilmarsson. Símon Þórhallsson hækkar mest allra frá desember-listanum.

Röð stigahæstu manna:

No.	Name	RtgC	Diff	Cat	Tit
1	Jóhann Hjartarson	2628	0	-	GM
2	Margeir Pétursson	2589	0	-	GM
3	Hannes H Stefánsson	2587	6	-	GM
4	Héðinn Steingrímsson	2551	0	-	GM
5	Helgi Ólafsson	2542	0	-	GM
6	Henrik Danielsen	2524	-10	-	GM
7	Jón Loftur Árnason	2511	0	-	GM
8	Helgi Áss Grétarsson	2501	0	-	GM
9	Stefán Kristjánsson	2486	4	-	GM
10	Friðrik Ólafsson	2481	-11	SEN	GM
11	Bragi Þorfinnsson	2474	0	-	IM
12	Hjörvar Steinn Grétarsson	2470	11	U20	IM
13	Karl Þorsteins	2470	1	-	IM
14	Þröstur Þórhallsson	2449	11	-	GM
15	Jón Viktor Gunnarsson	2412	-6	-	IM
16	Arnar Gunnarsson	2403	0	-	IM
17	Sigurbjörn Björnsson	2392	16	-	FM
18	Dagur Arngrímsson	2377	11	-	IM
19	Magnús Örn Úlfarsson	2374	0	-	FM
20	Guðmundur Kjartansson	2371	5	-	IM

Nýliðar:

 

No.	Name	RtgC	Diff	Cat
1	Andri Steinn Hilmarsson	1636	1636	U20
2	Arnfinnur Bragason	1395	1395	-
3	Alec Sigurðarson	1360	1360	U14
4	Brynjar Bjarkason	1197	1197	U12
5	Björn Hólm Birkisson	1182	1182	U14
6	Helgi Svanberg Jónsson	1044	1044	U12
7	Aron Ingi Woodard	1000	1000	U12
8	Burkni Björnsson	1000	1000	U12
9	Ísak Logi Einarsson	1000	1000	U10
0	Oddur Þór Unnsteinsson	1000	1000	U14
10	Sigurður Fannar Finnsson	1000	1000	U14
11	Þorsteinn Emil  Jónsson	1000	1000	U10

 
Mestu hækkanir:

 

No.	Name	RtgC	Diff	Cat
1	Símon Þórhallsson	1476	158	U14
2	Vignir Vatnar Stefánsson	1640	140	U10
3	Dawid Kolka	1643	115	U14
4	Óskar Víkingur Davíðsson	1116	99	U08
5	Veronika Steinunn Magnúsdóttir	1532	96	U16
6	Bjarni Þór Guðmundsson	1138	92	U12
7	Óskar Long Einarsson	1530	91	-
8	Jón Trausti Harðarson	1997	89	U16
9	Mikael Jóhann Karlsson	2100	82	U18
10	Bjarki Arnaldarson	1080	80	U10

 Stigahæstu skákkonur landsins:

 

No.	Name	RtgC	Diff	Cat	Tit
1	Lenka Ptácníková	2219	-29	-	WGM
2	Hallgerður H Þorsteinsdóttir	2025	78	-
3	Guðlaug U Þorsteinsdóttir	2024	5	-	WFM
4	Jóhanna Björg Jóhannsdóttir	1935	44	U20
5	Tinna Kristín Finnbogadóttir	1904	39	-
6	Guðfríður L Grétarsdóttir	1824	0	-	WIM
7	Harpa Ingólfsdóttir	1805	0	-
8	Sigríður Björg Helgadóttir	1786	6	-
9	Elsa María Krístinardóttir	1763	24	-
10	Geirþrúður Anna Guðmundsdóttir	1685	0	U20

 
Stigahæstu ungmenni landsins (fædd 1993 og síðar):

 

No.	Name	RtgC	Diff	Cat	Tit
1	Hjörvar Steinn Grétarsson	2470	11	U20	IM
2	Mikael Jóhann Karlsson	2100	82	U18
3	Dagur Ragnarsson	2081	50	U16
4	Patrekur Maron Magnússon	1999	0	U20
5	Jón Trausti Harðarson	1997	89	U16
6	Nökkvi Sverrisson	1996	38	U20
7	Örn Leó Jóhannsson	1995	-14	U20
8	Oliver Aron Jóhannesson	1942	28	U16
9	Jóhanna Björg Jóhannsdóttir	1935	44	U20
10	Páll Andrason	1875	-2	U20

 
Stigahæstu öðlingar landsins (fæddir 1953 eða fyrr):

 

No.	Name	RtgC	Diff	Cat	Tit
1	Friðrik Ólafsson	2481	-11	SEN	GM
2	Kristján Guðmundsson	2275	0	SEN
3	Áskell Örn Kárason	2211	-12	SEN
4	Magnús Sólmundarson	2178	0	SEN
5	Jón Torfason	2175	0	SEN
6	Bragi Halldórsson	2171	-9	SEN
7	Björn Þorsteinsson	2171	-14	SEN
8	Júlíus Friðjónsson	2159	-13	SEN
9	Gunnar Magnússon	2137	0	SEN
10	Björgvin Víglundsson	2132	0	SEN

 Reiknuð mót:

• Skákþing Akureyrar
• Fastus-mótið - Gestamót Goðans
• NM í skólaskák (a-e flokkar)
• KORNAX-mótið - Skákþing Reykjavíkur
• N1 Reykjavíkurskákmótið
• Skákþing Garðabæjar (einvígi í a-flokki og b-flokkurinn) 
• Vetrarmót öðlinga

Íslensk skákstig á Chess-Results

 

Miðgarðsmótið - keppni skóla í Grafarvogi haldin á morgun

Miðgarðsmótið í skák á föstudaginn hefst kl. 10:00 og verður haldið í íþróttasal Rimaskóla. Mótið er sveitakeppni milli grunnskólanna í Grafarvogi. Hver skóli má senda eitt eða fleiri lið til keppninnar. Reiknað er með 8 skáksveitum. Áætlað er að mótinu ljúki um hádegi.

Keppendum verður boðið upp á létta hressingu um miðbik mótsins (gos og súkkulaðistykki). Sigursveitin fær til vörslu glæsilegan farandbikar, eignabikar og verðlaunapeninga. Aðrir þátttakendur fá viðurkenningarskjal.

Haraldur Axel og Sæbjörn Larsen efstir í Ásgarði.

Tuttugu og sjö skákmenn tefldu í dag hjá Ásum í Ásgarði. Haraldur Axel Sveinbjörnsson og Sæbjörn G Larsen deildu efsta sætinu, fengu báðir átta og hálfan vinning af tíu

Haraldur var aðeins hærri á stigum og telst því Hrókur dagsins. Ari Stefánsson varð í þriðja sæti með sjö vinninga.

Sjá meðfylgjandi töflu:

 

 

 

Íslandsmót grunnskólasveita 2013

Íslandsmót grunnskólasveita 2013 fer fram Rimaskóla  dagana  16. og 17. mars nk.  Tefldar verða 9 umferðir eftir Monradkerfi - umhugsunartími 20 mín. á skák fyrir hvern keppenda.

Hver skóli getur sent fleiri en eina sveit - en hver sveit er skipuð fjórum nemendum 1. - 10. bekkjar grunnskóla (auk varamanna).

Dagskrá:                    

• Laugardagur 16. mars kl. 13.00        1. - 5. umferð
• Sunnudagur  17. mars kl. 11.00        6. - 9. umferð

Liðsstjórar skulu mæta 12.30 á laugardag og skila inn liðum sínum á Monrad-spjöldum.

Þátttökugjöld kr. 5.000.- á sveit.  Þó ekki hærri en kr. 10.000.- fyrir hvern skóla.

Sigurvegari mótsins hlýtur rétt til þátttöku á Norðurlandamóti grunnskólasveita sem fram fer í Noregi eða Svíþjóð í september næstkomandi.  

Skráning fer fram hjá Skáksambandi Íslands í síma 568 9141 virka daga kl. 10-13 og í tölvupósti [e-mail].   Skráningu skal lokið í síðasta lagi 15. mars.

Með skráningu skal fylgja gsm og netfang liðsstjóra.

Ath.:  Áríðandi er að sveitirnar séu skráðar fyrirfram.

N1 Reykjavíkurskákmótið 2012 tilefnt sem eitt besta opna mót heims

ACP, samtök atvinnuskákmanna, hafa tilnefnt  8 skákmót sem besta opna skákmót heims árið 2012. Kosning fer nú fram meðal félagsmanna. Opnu mótin sem eru tilnefnd eru sem besta opna mót ársins eru:

• Aeroflot Open, Moscow
• Baku Open
• Biel Master Tournament
• Czech Open,  Pardubice
• Moscow Open
• Reykjavik Open
• Tradewise Gibraltar Festival
• World Open, Philadelphia

Ekki amalegur félagsskapur þarna á ferðinni og mikil viðurkenning fyrir Reykjavíkurskákmótið!

Sjá nánar á heimasíðu ACP.