Fjölnir áfrýjar niðurstöðu mótsstjórnar Íslandsmóts skákfélaga

Skákdeild Fjölnis hefur áfrýjað úrskurði mótsstjórnar Íslandsmóts skákfélaga þar sem úrslitum í viðureign þeirra og TR-b var breytt í 4½-1½ þar sem mótsstjórn taldi Robert Ris ólöglegan eftir kæru þess efnis frá TR. Skákdeild Fjölnis krefst þess að úrslit í viðureign Fjölnis og TR-b, 4½-1½ standi óhögguð og nefna þar m.a. "ábyrgð mótshaldara" eins og nefnt var í minnihlutaáliti mótsstjórnar.

Niðurstaða þessa mála skiptir umtalsverðu máli. Vinni TR málið, fer b-sveitin upp í 1. deild en Fjölnir endar í því þriðja. Verði niðurstaðan Fjölni í vil heldur Fjölnir öðru sæti og fær sæti í efstu deild að ári.

 

 

N1 Reykjavíkurskákmótið 2012 í þriðja sæti sem besta opna skákmót ársins

Eins og áður hefur komið fram á Skák.is er N1 Reykjavíkurskákmótið meðal átta skákmóta sem tilnefnd eru sem besta opna skákmót ársins á vef ACP (samtök atvinnumanna í skák).

Búið er að birta fyrstu tölur, frá í gær, og þar er N1 Reykjavíkurskákmótið í þriðja sæti. Aðeins ofurmótin í Gíbraltar og Aeroflot Open eru ofar. Kosningunni er ekki lokið en hún stendur til 25. mars. 

Sjá nánar hér og hér.

Skákmót öðlinga hefst á morgun

Skákmót öðlinga 40 ára og eldri hefst miðvikudaginn 13. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina + 30 sekúndna viðbótartími á hvern leik.

Skákmót öðlinga verður nú haldið í 22. sinn. Sigurvegari á Skákmóti öðlinga 2012 var Þorvarður F. Ólafssonn.

Dagskrá:

• 1. umferð miðvikudag 13. mars kl. 19.30
• 2. umferð miðvikudag 20. mars kl. 19.30
• Hlé gert á mótinu vegna Páska
• 3. umferð miðvikudag 3. apríl kl. 19.30
• 4. umferð miðvikudag 10. apríl kl. 19.30
• 5. umferð miðvikudag 17. apríl kl. 19.30
• 6. umferð miðvikudag 24. apríl kl. 19.30
• 7. umferð miðvikudag 1. maí kl. 19.30

Mótinu lýkur miðvikudaginn 8. maí kl. 19:30 með hraðskákmóti og verðlaunaafhendingu. Keppt er um veglegan farandbikar,en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Þátttökugjald er kr. 4.000 fyrir aðalmótið og kr 500 fyrir hraðskákmótið. Innifalið er frítt kaffi allt mótið ásamt rjómavöfflum og öðru góðgæti á lokakvöldi.

Skráning fer fram á skráningarformi á heimasíðu T.R.

"SKÁK ER LÍFIÐ" - Skáksýning í anda Bobby Fischer opnuð formlega á Icelandair hótel Reykjavík Natura Loftleiðum í tengslum við 70 ára afmæli hans 9. mars sl.

Opnun sýningarinnar  og afmæli Fischers eru gerð ítarleg skil á Chessbase.com. Slóðin er http://en.chessbase.com/    

Hér fylgir með almenn kynning og umfjöllun um sýninguna ásamt myndum frá fjölmennu og höfðinglegu opnunarhófi fyrir helgina þar sem Sólborg Steinþórsdóttir, hótelstjóri bauð gesti velkomna, Einar S. Einarsson ræddi um sýninguna og lýsti hana opnaða og Guðmundur G. Þórarinsson flutti gagnmerkt erindi um Bobby Fischer og heimsmeistaraeinvígið sögulega 1972.

Heimsmeistaraeinvígið í skák árið 1972 milli bandaríska áskorandans BOBBY FISCHER og hins rússneska heimsmeistara B0RIS SPASSKY vakti gífurlega athygli um veröld alla á sínum tíma og kom Íslandi á heimskortið í fyrsta sinn.

Það fór fram í Laugardalshöllinni í Reykjavík í anda kalda stríðsins. Fyrst var um það rætt sem EINVÍGI ALDARINNAR en síðar sem EINVÍGI ALLRA TÍMA eftir að BBC valdi það sem einn af 10 fréttnæmustu viðburðum liðinnar aldar. Nú er jafnvel talið af sumum að sigur Bobby Fischers í því hafi verið upphafið að falli Sovétríkjanna.

Á þessari sýningu hér má sjá skákborð frá einvíginu ásamt veggspjöldum með myndum af keppinautunum Fischer og Spassky ásamt ýmsum munum frá einvíginu og mörgu fleira sem tengist sögu Bobby Fischers, skáklistinni og Hótel Loftleiðum (nú Icelandair Hotel Reykjavík Natura) sem sögufrægum skákstað.   Borðið er eitt af þremur sem smíðuð voru í tengslum við það eftir teikningu Gunnars Magnússonar, arkitekts.

BOBBY FISCHER dvaldi á Hótel Loftleiðum meðan á einvíginu stóð, nú Icelandair Hótel Reykjavík Natura. Eftir að hann hlaut íslenskan ríkisborgararétt árið 2005 og kom „heim" úr 9 mánaða fangavist í Japan, eftir að vegabréf hans hafði verið ógilt honum af óvörum af Bandaríkjastjórn, gisti hann hér á hótelinu um tíma og það meira að segja í sömu svítunni nr. 470 og árið 1972.

Goðsögnin Bobby Fischer, mesti skákmeistari sem uppi hefur verið að margra áliti, lést í Reykjavík árið 2008 langt um aldur fram aðeins 64 ára.  Mörgum þykir það táknrænt á sinn hátt því reitirnir á skákborðinu eru einmitt 64 talsins. Hann hvílir í Laugardælakirkjugarði í í grennd við Selfoss.

Þetta sögulega skákborð er í einkaeigu Páls G. Jónssonar, forstjóra og skákunnanda, sem var svo rausnarlegur að lána það á þetta nýja safn hótelsins. Páll fylgdist sjálfur með einvíginu á sínum tíma sem Skáksamband Íslands hafði veg og vanda af.  Var m.a. leiðsögumaður Fischer við laxveiðar.   Einar S. Einarsson, fyrrv. forseti SÍ og formaður RJF-nefndarinnar sem barðist fyrir frelsi hans hefur einnig verið svo vinsamlegur að lána alls kyns fágæta muni og minjagripi, kort, teikningar, ljósmyndir ofl.  sem hér eru til sýnis, en hann var formaður RJF-nefndarinnar sem vann að frelsum Fischers á sínum tíma.   

ICELANDAIR HÓTEL REYKAVÍK NATURA kann þeim báðum hinar bestu þakkir og vonar að gestir og gangandi njóti þessarar einstöku sýningar.

Velvirðingar er beðist á neðangreindum villum sem hafa verið leiðéttar. 

 

Fréttatilkynning

Myndaalbúm (ESE)

Áskell brögðóttastur akureyskra skákmanna

Í gær fór fram skylduleikjamót hjá Skákfélagi Akureyrar. Að þessu sinni voru tefldar stöður úr ýmsum þekktum gambítum eða brögðum þar sem annar keppandinn fórnar peði í byrjuninni fyrir einhvern ávinning, svo sem skjótari liðskipan eða öflugt peðamiðborð. Fyrir hverja umferð var dregið um hvaða bragð yrði fyrir valinu og síðan voru tefldar tvær skákir þannig að keppendur tefldu stöðurnar bæði með hvítu og svörtu.

Níu keppendur mættu til leiks og því voru tefldar  níu upphafsstöður og hver keppandi tefldi 16 skákir. Gambítarnir eða brögðin hafa allir nöfn og stöðurnar sem tefldar voru koma upp eftir  Blumenfeldbragð, Vaganianbragð, Albin gagnbragð, Blackmar-Diemerbragð, Budapestarbragð, Evansbragð, Smith-Morabragð, Danskt eða Norrænt bragð og Lithaugabragð.

Brögðóttastur Skákfélagsmanna reyndist vera formaðurinn sjálfur, Áskell Örn Kárason. Hann hlaut 15 vinninga af 16 mögulegum og sigraði örugglega. Í öðru sæti varð Sigurður Arnarson með 12 vinninga en Sigurður Eiríksson og Haki Jóhannesson komu næstir með 11 vinninga hvor. Þar á eftir kom afmælisbarn gærdagsins, hinn síungi Sveinbjörn Sigurðsson með 8 vinning og Símon Þórhallsson hlaut 7 en aðrir minna.

Íslandsmót grunnskólasveita fer fram næstu helgi

Íslandsmót grunnskólasveita 2013 fer fram Rimaskóla  dagana  16. og 17. mars nk.  Tefldar verða 9 umferðir eftir Monradkerfi - umhugsunartími 20 mín. á skák fyrir hvern keppenda.

Hver skóli getur sent fleiri en eina sveit - en hver sveit er skipuð fjórum nemendum 1. - 10. bekkjar grunnskóla (auk varamanna).

Dagskrá:                    

• Laugardagur 16. mars kl. 13.00        1. - 5. umferð
• Sunnudagur  17. mars kl. 11.00        6. - 9. umferð

Liðsstjórar skulu mæta 12.30 á laugardag og skila inn liðum sínum á Monrad-spjöldum.

Þátttökugjöld kr. 5.000.- á sveit.  Þó ekki hærri en kr. 10.000.- fyrir hvern skóla.

Sigurvegari mótsins hlýtur rétt til þátttöku á Norðurlandamóti grunnskólasveita sem fram fer í Noregi eða Svíþjóð í september næstkomandi.  

Skráning fer fram hjá Skáksambandi Íslands í síma 568 9141 virka daga kl. 10-13 og í tölvupósti [e-mail].   Skráningu skal lokið í síðasta lagi 15. mars.

Með skráningu skal fylgja gsm og netfang liðsstjóra.

Ath.:  Áríðandi er að sveitirnar séu skráðar fyrirfram.

Hraðkvöld hjá Helli í kvöld

Taflfélagið Hellir heldur hraðkvöld mánudaginn 11. mars nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþáttur Morgunblaðsins: Glæsilegt Reykjavíkurskákmót

Úkraínumaðurinn Pavel Eljanov, Filippseyingurinn Wesley So og Bassem Amin frá Egyptalandi eru sigurvegarar 29. Reykjavíkurskákmótsins sem lauk í Hörpu á miðvikudaginn. Þeir hlutu 8 vinninga af 10 mögulegum en með 7 ½ vinning komu kempur á borð við Giri, Cheparinov, Yi Wei, Liren Ding, Sokolov, Jones, Dziuba og Morowitzch. Samkvæmt nýrri úthlutunarreglu, kenndri við Tékkann Vlastimil Hort, hlaut Eljanov hæstu verðlaunin en frammistaða hans reiknast upp á 2799 elo-stig. Hann vann bæði Cheparinov og Kínverjann Liren Ding.

Af frammistöðu okkar bestu manna í móti ber hæst að Hannes Hlífar Stefánsson náði sér vel á strik. Hann tapaði að vísu fremur klaufalega fyrir Ivan Sokolov í lokaumferðinni en tefldi margar góðar skákir og hlaut 6 ½ vinning. Guðmundur Kjartansson, Þröstur Þórhallsson og Hjörvar Steinn Grétarsson áttu góða spretti; þegar stutt var eftir þurfti Hjörvar að vinna Guramashvili frá Georgíu sem hann átti að hafa í fullu tré við. Undir var lokaáfangi að stórmeistaratitli en byrjunartaktík Hjörvars í þessari mikilvægu skák var ekki góð og hann tapaði.

Margir ungir skákmenn og konur stóðu sig vel. Má þar nefna landsliðskonurnar Hallgerði Helgu Þorsteinsdóttur og Tinnu Kristínu Finnbogadóttur, Akureyringana Jón Kristin Þorgeirsson og Símon Þórhallsson, Eyjamanninn Nökkva Sverrisson, Daða Ómarsson, Dag Ragnarsson, Jón Trausta Harðarson, Nansý Davíðsdóttur og ýmsa aðra.

Stóri innlendi sigurvegarinn var mótið sjálft, sem fram fór við frábærar aðstæður í Hörpunni. Tæknibúnaður er mikill og flókinn en sú deild var vel mönnuð. Gagnrýna mætti þó aðstæður áhorfenda en sýningarborðum þarf að fjölga. Þá liggur fyrir að hið mikla styrkleikabil milli keppenda gerir mótið ekki sérlega „áfangavænt". Yfirumsjón var í höndum Gunnars Björnssonar, forseta SÍ, en stefnan er að fjölga enn meira erlendum keppendum á næsta móti, sem jafnframt er 50 ára afmælismót.

Siurvegarinn Wesley So er besti skákmaður Filippseyinga í dag og augljóslega afar hæfileikaríkur skákmaður, aðeins tvítugur að aldri en árangur hans var uppá 2753 elo-stig. Hann fór létt með að vinna Pólverjann Dziuba í 9. umferð:

Wesley So _ Marcin Dziuba

Caro Kann

1. e4 c6 2. d4 d5 3. e5 Bf5 4. Rf3 e6 5. Be2 Re7

Einn af fjölmörgum leikjum sem til greina koma en 5. ... c5 er algengast, t.d. 6. Be3 cxd4 7. Rxd4 Re7.

6. O-O c5 7. c4 Rbc6 8. Ra3 dxc4 9. Rxc4 Rd5 10. Bg5 Dd7 11. Hc1 h6 12. Be3!

Góður staður fyrir biskupinn. Hann hyggst svara 12. ... Rxe3 með 13. Rxe3 cxd4 14. Rxf5 exf5 15. Bb5 o.s.frv.

12. ... b5 13. Ra3 a6 14. dxc5 Be4 15. Rc2 Rxe3 16. Rxe3 Be7 17. a4 Db7 18. Rd2 Hd8 19. axb5 axb5 20. Rxe4!

Hárrétt ákvörðun. Hvítur fær nægar bætur fyrir drottninguna: hrók, léttan og frípeð.

20. ... Hxd1 21. Hfxd1 Rxe5 22. c6! Dc7

Ekki 22. ... Rxc6 vegna 23. Bf3! og vinnur riddarann.

23. Bxb5 O-O 24. Rc4 Bd8?

Meira hald var í 24. ... f5.

25. Rc5 Rxc4 26. Hxc4 De5 27. Hc2 Bc7 28. g3 Hb8 29. Ba4 Ha8 30. b4 Df5 31. Hdc1 h5 32. Bb5 Bb6 33. Bf1 h4 34. Rd7 Bd4 35. c7 Hc8 36. Hd2 hxg3 37. hxg3 Dg5?

Hér mátti enn verjast með 37. ... Ba7.

38. Hxd4! Dxc1 39. Rf6+!

Glæsilegur lokahnykkur.

39. ... Kf8

Eða 39. ... gxf6 40. Hd8+ Kg8 41. Hxc8 ásamt 42. b5 sem vinnur létt.

40. Hd8+ Ke7 41. Rg8 mát!

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 3. mars 2013.

Skákþættir Morgunblaðsins

[Event "Reykjavik Open"] [Site "Reykjavik ISL"] [Date "2013.02.26"] [EventDate "2013.02.19"] [Round "9"] [Result "1-0"] [White "Wesley So"] [Black "Marcin Dziuba"] [ECO "B12"] [WhiteElo "2684"] [BlackElo "2602"] [PlyCount "81"] 1. e4 c6 2. d4 d5 3. e5 Bf5 4. Nf3 e6 5. Be2 Ne7 6. O-O c5 7. c4 Nbc6 8. Na3 dxc4 9. Nxc4 Nd5 10. Bg5 Qd7 11. Rc1 h6 12. Be3 b5 13. Na3 a6 14. dxc5 Be4 15. Nc2 Nxe3 16. Nxe3 Be7 17. a4 Qb7 18. Nd2 Rd8 19. axb5 axb5 20. Nxe4 Rxd1 21. Rfxd1 Nxe5 22. c6 Qc7 23. Bxb5 O-O 24. Nc4 Bd8 25. Nc5 Nxc4 26. Rxc4 Qe5 27. Rc2 Bc7 28. g3 Rb8 29. Ba4 Ra8 30. b4 Qf5 31. Rdc1 h5 32. Bb5 Bb6 33. Bf1 h4 34. Nd7 Bd4 35. c7 Rc8 36. Rd2 hxg3 37. hxg3 Qg5 38. Rxd4 Qxc1 39. Nf6+ Kf8 40. Rd8+ Ke7 41. Ng8# 1-0

Rimaskóli sigraði Miðgarðsmótið í skák

Miðgarðsmótið í skák var haldið í íþróttahúsi Rimaskóla undir stjórn Heru Hallberu Björnsdóttur frístundaráðgjafa. Keppnin varð algjört einvígi á milli Rimaskóla og Vættaskóla en þrjár 8 manna sveitir mættu frá hvorum skóla. Rimaskóli A sveit hafði þó nokkra yfirburði og hlaut samtals 39 vinninga af 40 mögulegum. B sveit Rimaskóla varð í öðrru sæti með 31 vinning.

Allir bestu skákmenn Rimaskóla tóku þátt í mótinu þar af fimm drengir úr 10. bekk sem hafa verið með á þessu móti meira og minna frá upphafi. Þetta eru þeir Dagur Ragnarsson, Andri Jökulsson, Hafþór Andri Helgason, Jón Trausti Harðarson og Theodór I. Rocha. Þeir eru ófáir verðlaunagripirnir sem þessir strákar hafa unnið f. h. skólans í gegnum árin. Auk þeirra voru

í A sveit Rimaskóla OliverAron Jóhannesson, Kristófer Jóel Jóhannesson og Jóhann Arnar Finnsson. Í B sveit Rimaskóla náði Joshua Davíðsson bestum árangri en hann vann allar sínar 5 skákir.

Skákmót öðlinga hefst á miðvikudaginn

Skákmót öðlinga 40 ára og eldri hefst miðvikudaginn 13. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina + 30 sekúndna viðbótartími á hvern leik.

Skákmót öðlinga verður nú haldið í 22. sinn. Sigurvegari á Skákmóti öðlinga 2012 var Þorvarður F. Ólafssonn.

Dagskrá:

• 1. umferð miðvikudag 13. mars kl. 19.30
• 2. umferð miðvikudag 20. mars kl. 19.30
• Hlé gert á mótinu vegna Páska
• 3. umferð miðvikudag 3. apríl kl. 19.30
• 4. umferð miðvikudag 10. apríl kl. 19.30
• 5. umferð miðvikudag 17. apríl kl. 19.30
• 6. umferð miðvikudag 24. apríl kl. 19.30
• 7. umferð miðvikudag 1. maí kl. 19.30

Mótinu lýkur miðvikudaginn 8. maí kl. 19:30 með hraðskákmóti og verðlaunaafhendingu. Keppt er um veglegan farandbikar,en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Þátttökugjald er kr. 4.000 fyrir aðalmótið og kr 500 fyrir hraðskákmótið. Innifalið er frítt kaffi allt mótið ásamt rjómavöfflum og öðru góðgæti á lokakvöldi.

Skráning fer fram á skráningarformi á heimasíðu T.R.