Vigfús vann hraðkvöld

Vigfús Ó. Vigfússon sigraði á hraðkvöldi Hellis sem fram fór 11. mars sl. Vigfús fékk 6 vinninga í sjö skákum. Annar varð Vignir Vatnar Stefánsson með 5,5 vinning. Vignir Vatnar leiddi mótið lengst af en hleypti Vigfúsi fram úr sér með jafntefli í næst síðustu umferð gegn Gauta Páli og tapi í lokaumferðinni gegn Elsu Maríu.

Í þriðja og fjórða sæti með 5v voru svo Gauti Páll Jónsson og Elsa María Kristínardóttir. Dagur Andri Friðgeirsson var dreginn í happdrættinu og fékk eins og sigurvegarinn gjafabréf frá Saffran.

Næsta skákkvöld í Hellisheimilinu verður næstkomandi mánudag 18. mars kl. 20. Þá verður einnig hraðkvöld.

Lokastaðan á hraðkvöldinu:

Röð   Nafn                       Vinningar

  1   Vigfús Ó. Vigfússon,           6 
  2   Vignir Vatnar Stefánsson,      5.5 
 3-4  Gauti Páll Jónsson,            5 
      Elsa María Kristínardóttir,    5 
 5-7  Sverrir Sigurðsson,            4 
      Dagur Andri Friðgeirsson,      4   
      Jón Úlfljótsson,               4   
  8   Gunnar Nikulásson,             3.5 
  9   Finnur Kr. Finnsson,           3 
10-12 Gunnar Ingibergsson,           2   
      Óskar Víkingur Davíðsson,      2 
      Alec Elías Sigurðarson,        2   
13-14 Pétur Jóhannesson              1.5   
      Björgvin Kristbergsson         1.5

Andri vann fimmtu lotu í TM-mótaröðinni

Enn var glímt um Tryggingarmiðstöðvartitilinn í Skákheimilinu í gærkvöldi. Í þetta sinn létu 9 kappar sjá sig, sem var vonum minna. Þreyttu þeir taflið við undirleik handboltamanna sem léku við Val í næsta sal og máttu þola tap. Það gerði Andri Freyr hinsvegar aðeins í einni skák en vann allar hinar. TM-forystusauðurinn Jón Kristinn kom svo á hæla honum og virðist heldur draga sundur með honum og öðrum þátttakendum í þessu langhlaupi. 

Hér koma svo úrslitin:

 

1	Andri Freyr Björgvinsson	7
2	Jón Kristinn Þorgeirsson	6
3	Smári Ólafsson	4½
4	Sigurður Eiríksson	4
	Ari Friðfinnsson	4
6	Haki Jóhannesson	3½
7	Símon Þórhallsson	2½
	Logi Rúnar Jónsson	2½
9	Hreinn Hrafnsson	2

 

Viltu tefla á EM öldungasveita?

EM öldungasveita fer fram í Dresden í Þýskalandi, dagana 20.-28. júlí nk. Öldungar teljast þeir sem eru 60 ára og eldri (f. 1953 eða fyrr) auk þess sem sérreglur gilda fyrir konur en nægjanlegt er að þeir séu 50 ára eða eldri (f. 1963 eða fyrr).  Gunnar Finnlaugsson, fulltrúi SÍ í öldungaráði Skáksambands Norðurlanda beinir eftirfarandi skilaboðum til áhugasamra:

Undirritaður er fulltrúi SÍ í "öldungaráði" Skáksambands Norðurlanda og var liðsstjóri Íslands í Dresden 2010  og í Grikklandi 2011. Í fyrra var ekki send sveit til Slóveníu, en nú þarf að gera bragarbót og senda a.m.k. eina sveit.

Finna má allar upplýsingar hér:

http://www.schachfestival.de/www_festival/3e0ce87560cc1e32353de7d1eedb58f9.php

Vinsamlegast látið mig vita sem fyrst hvort þið hafið áhuga. Endanlega þarf að ganga frá þátttöku 2013-06-20. Læt mótshaldara vita þegar fjórir verða komnir á lista yfir hugsanlega þátttakendur. Skáksambandið mun greiða þátttökugjald en annan kostnað bera keppendur sjálfir.

Netfang Gunnars er [e-mail]

Nýtt fréttabréf SÍ

Nýtt fréttabréf Skáksambands Íslands út kom út í dag en bréfið kemur út tvisvar á mánuði yfir vetrarmánuðina og er sent í tölvupósti til viðtakenda. Hægt er að skrá sig fyrir fréttabréfinu hér á Skák.is (ofarlega til vinstri).

Meðal efnis er:

• Eljanov, So og Amin sigurvegarar N1 Reykjavíkurskákmótsins
• Víkingaklúbburinn Íslandsmeistari skákfélaga
• Tímaritið Skák fær glimrandi móttökur
• Íslandsmót grunnskólasveita fer fram um helgina
• N1 Reykjavíkurskákmótið tilefnt sem besta opna mótið 2012!
• B-sveit Goðans-Máta fékk flesta vinninga í 2. deild
• B-sveit Víkingaklúbbsins sigurvegar 3. deildar
• Briddsfjelagið sigurvegari 4. deildarinnar
• N1 Reykjavíkurskákmótið 2014
• Mót á döfinni

Fréttabréfið má nálgast hér.

Hægt er að nálgast eldri fréttabréf hér.

Erlingur Jensson vann Marsmót SSON

Erlingur fór mikinn og hafði mjög svo góðan sigur á 10 mínútna Marsmóti SSON sem fram fór í gærkveldi.  Mótið skipað átta valinkunnum hraðskákmeisturum sem engin grið vildu gefa en Erlingur sigraði þá alla utan einn sem nái jafntefli við skákvélina.

Lokastaðan:

1. Erlingur Jensson  6,5
2. Páll Leó               5,5
3.Björgvin               5,5
4. Ingimundur         4
5. Úlfhéðinn            2,5
6. Magnús               2,5
7. Grantas              1,5
8. Ingvar Örn          1

Skákmót öðlinga hófst í gær

Skákmót öðlinga hófst í gær. Alls tóku 30 skákmenn þátt sem telst prýðisgóð þátttaka. Úrslit gærdagsins voru hefðbundin, þ.e. hinir stigahærri unnu almennt hina stigalægri. Aðeins ein undantekning var á því en Magnús Kristinsson (1665) gerði jafntefli við Pál Sigurðsson (1970). Önnur umferð fer fram á nk. miðvikudagskvöld. 

Stigahæstur keppenda er FIDE-meistarinn Sigurður Daði Sigfússon (2324) en meðal annarra keppenda má benda á sigurvegara síðasta árs, Þorvarð F. Ólafsson (2225) og alþjóðlega meistarann Sævar Bjarnason (2132).

Öll úrslit 1. umferðar má finna hér.

Röðun 2. umferðar sem fram fer á miðvikudagskvöld má finna hér.

• Heimasíða TR
• Chess-Results

Gallerý Skák - Vignir Vatnar lék menn grátt

Þegar degi hallar á fimmtudögum liggur leið skákþyrstra í Bolholt 6 þar sem Gallerýið er  til húsa í leit að hugrænni atferlismeðferð og einstaklingsbundnu hópefli í góðra vina hópi.

Haft er fyrir satt að heilabrot sé heilsubót. Sömuleiðis að það kunni að bæta geð guma að sjást og kljást tafls í stöðum flóknum.  Það skipti líka miklu máli að rækja félagslega þáttinn og blanda geði við mann og annan á hverju sem gengur.   Svo er líka öllum nauðsynlegt að hrista annað slagið af sér slenið og leiða hugann frá hinu daglega hversdagslega amstri.

Í vikunni sem leið var keppnin nokkuð jöfn með örfáum undantekningum. Fyrir kom að menn væri slegnir skákblindu, sæju ofsjónir, mát eða mannsvinning í hillingum,  gerðust glámskyggnir mjög. Nokkuð sem hátæknileg augasteinaskipti bæta ekki úr enn sem komið er, þó þau geti veitt blindum sýn.  

Lengi vel stóð baráttan um efsta sætið milli aldursforsetans þaulreynda Gunnars  Kr. Gunnarssonar (79) og hins leiftursnjalla ungmennis Vignis Vatnars Stefánssonar (10)  sem gert hefur garðinn frægan undanfarið og unnið góða sigra innanlands og utan.  Sveinninn ungi státar nú þegar af nokkrum frækilegum meistaratitlum og mótssigrum.

Tannlæknirinn  og veiðihetjan hugumprúða Þórarinn Sigþórsson, nýorðinn 75 ára, blandaði sér á tímabili í toppbaráttuna sem og Ingimar Jónsson, fræðaþulur, gerði það einnig  gott.      

Úrslitin réðust þó ekki fyrr en í síðustu umferð þegar Guðfinnur, staðarhaldari, velti Gunna Gunn úr sessi og litla þúfan Vignir þungu hlassi þar sem Gunnar Birgisson var. Skákgetan fer ekki altaf eftir hæðinni eða sentímetrunum nú frekar en fyrri daginn þegar Friðrik Ólafsson var að máta menn í Taflfélaginu ungur að árum á sinni tíð.  Gunnar Birgisson hefur verið afar sigursæll að undanförnu bæði í Gallerýinu og KR-klúbbnum en engin má sköpum renna.

Nánari úrslit má sjá á meðf. mótstöflu og það styttist í næsta mót í óháða söfnuðinum, þar sem allir eru velkomnir til tafls. 

 

 

ESE- skákþankar 13.3.2013

Skákmót öðlinga hefst í kvöld

Skákmót öðlinga 40 ára og eldri hefst miðvikudaginn 13. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina + 30 sekúndna viðbótartími á hvern leik.

Skákmót öðlinga verður nú haldið í 22. sinn. Sigurvegari á Skákmóti öðlinga 2012 var Þorvarður F. Ólafsson.

Upplýsingar um þegar skráða keppendur má nálgast hér.

Dagskrá:

• 1. umferð miðvikudag 13. mars kl. 19.30
• 2. umferð miðvikudag 20. mars kl. 19.30
• Hlé gert á mótinu vegna Páska
• 3. umferð miðvikudag 3. apríl kl. 19.30
• 4. umferð miðvikudag 10. apríl kl. 19.30
• 5. umferð miðvikudag 17. apríl kl. 19.30
• 6. umferð miðvikudag 24. apríl kl. 19.30
• 7. umferð miðvikudag 1. maí kl. 19.30

Mótinu lýkur miðvikudaginn 8. maí kl. 19:30 með hraðskákmóti og verðlaunaafhendingu. Keppt er um veglegan farandbikar,en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Þátttökugjald er kr. 4.000 fyrir aðalmótið og kr 500 fyrir hraðskákmótið. Innifalið er frítt kaffi allt mótið ásamt rjómavöfflum og öðru góðgæti á lokakvöldi.

Skráning fer fram á skráningarformi á heimasíðu T.R.

Íslandsmót grunnskólasveita fer fram um helgina

Íslandsmót grunnskólasveita 2013 fer fram Rimaskóla  dagana  16. og 17. mars nk.  Tefldar verða 9 umferðir eftir Monradkerfi - umhugsunartími 20 mín. á skák fyrir hvern keppenda.

Hver skóli getur sent fleiri en eina sveit - en hver sveit er skipuð fjórum nemendum 1. - 10. bekkjar grunnskóla (auk varamanna).

Dagskrá:                    

• Laugardagur 16. mars kl. 13.00        1. - 5. umferð
• Sunnudagur  17. mars kl. 11.00        6. - 9. umferð

Liðsstjórar skulu mæta 12.30 á laugardag og skila inn liðum sínum á Monrad-spjöldum.

Þátttökugjöld kr. 5.000.- á sveit.  Þó ekki hærri en kr. 10.000.- fyrir hvern skóla.

Sigurvegari mótsins hlýtur rétt til þátttöku á Norðurlandamóti grunnskólasveita sem fram fer í Noregi eða Svíþjóð í september næstkomandi.  

Skráning fer fram hjá Skáksambandi Íslands í síma 568 9141 virka daga kl. 10-13 og í tölvupósti [e-mail].   Skráningu skal lokið í síðasta lagi 15. mars.

Með skráningu skal fylgja gsm og netfang liðsstjóra.

Ath.:  Áríðandi er að sveitirnar séu skráðar fyrirfram.

Jóhann Örn efstur í Ásgarði í dag

Jóhann Örn Sigurjónsson var sigursæll í Ásgarði í dag þar sem tuttugu og sex heiðursmenn skemmtu sér á hvítum reitum og svörtum eins og þeir eru vanir að gera á þriðjudögum. Jóhann Örn fékk 9 vinninga af 10 mögulegum, hann leyfði aðeins tvö jafntefli, við þá Stefán Þormar og Valdimar Ásmundsson. Guðfinnur R Kjartansson varð í öðru sæti með 7 vinninga.

Síðan komu þeir fjórir og jafnir í 3-.6. sæti með 6 ½ vinning, það voru þeir Stefán Þormar, Páll G Jónsson, Valdimar Ásmundsson og Trausti Pétursson. Stefán reyndist vera með flest stig.

Næsta þriðjudag halda Æsir sitt meistaramót, þá verða tefldar níu umferðir með 10 mín. umhugsunartíma. Jóhann Örn vann þetta mót á síðasta ári. Allir skákmenn sem verða 60 ára á árinu velkomnir til leiks.

Sjá meðfylgjandi töflu dagsins og myndir frá ESE.