Áskell fremstur fjórðunga

Meðan helstu skákmenn heimsins þjáðust á áskorendamóti í London réði léttleikinn ríkjum í Skákheimilinu. Það nægði keppendum stundarfjórðungur til þess að skapa meistaraverk í hverri skákinni á fætur annarri. Góðmennt var en fámennt og mættu aðeins þeir sem þegar höfðu skilað inn skattframtali. Svo fór þetta svona:

1. Áskell Örn Kárason        5

2. Haki Jóhannesson         3

3-4. Sveinbjörn Sigurðsson og

Andri Freyr Björgvinsson  2,5

5. Sigurður Eiríksson         2

6. Jón Magnússon            0

Næsta stórmót verður á fimmtudagskvöld þegar sjötta mót TM-raðarinnar fer fram.

Heimasíða SA

Hraðkvöld hjá Helli í kvöld

Taflfélagið Hellir heldur hraðkvöld mánudaginn 18. mars nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþing Norðlendinga - opinn flokkur

Skákþing Norðlendinga verður haldið á Sauðárkróki helgina 19-21. apríl n.k.  Samkvæmt venju verða tefldar 7 umferðir. Fjórar atskákir með 25 mín. umhugsunartíma á föstudagskvöldi. Tvær umferðir með umhugsunartímanum 90 mín + 30 sek á leik og lokaumferðin á sunnudegi með sama umhugsunartíma. Á lokinni 7. umferð á sunnudeginum verður  haldið Hraðskákmót Norðlendinga. Kappskákirnar verða reiknaðar til alþjóðlegra stiga.

Mótsgjöld eru kr. 2.000 en ekkert kostar að taka þátt í hraðskákmótinu. Innifalið í verði er kaffi og meðlæti á stundum.

Skráning fer fram í netfanginu: [e-mail] og er þar hægt að fá nánari upplýsingar um framkvæmd mótsins.

Frekari upplýsingar um mótið eru birtar á heimasíðu Skákfélags Sauðárkróks www.skakkrokur.blog.is

Skákþing Norðlendinga hefur verið haldið frá árinu 1935, en þá sigraði Sauðkrækingurinn Sveinn Þorvaldsson. Þingið hefur um langt skeið verið vel sótt af norðlenskum skákmönnum sem gestum þeirra.

Á Sauðárkróki búa um 2.600 manns og er staðurinn miðstöð verslunar og þjónustu í Skagafirði. Á staðnum eru þrír  skemmtistaðir, sem verða að venju með dagskrá þessa helgi þegar Skagfirðingar eru að undirbúa Sæluviku Skagfirðinga sem fram fer í lok apríl.

Heimasíða Skákfélags Sauðárkróks

Skákþáttur Morgunblaðsins: Víkingaklúbburinn er Íslandsmeistari skákfélaga

Víkingaklúbburinn, félagsskapur sem stofnaður var í kringum „víkingaskák", er Íslandsmeistari skákfélaga eftir harða baráttu í Hörpunni um síðustu helgi. Víkingaskák hefur aldrei náð mikilli útbreiðslu en komst í fréttirnar við slit „einvígis aldarinnar" 1972 þegar þeim Fischer og Spasskí var gefið sitt eintakið hvorum af taflinu. Forsprakkar Víkingaklúbbsins eru kunnir meistarar, Gunnar Freyr Rúnarsson og Davíð Kjartansson og halda þeir tryggð við stofnskrána sem höfundur víkingaskákarinnar, Magnús Ólafsson, samdi.

Þegar Magnús lést lét hann eftir sig umtalsverðar eignir sem m.a. renna til þátttöku Víkingaklúbbsins á Íslandsmóti skákfélaga. Sigurliðið sem hlaut 41 ½ vinning af 56 mögulegum var skipað Úkraínumanninum Pavel Eljanov, Pólverjunum Bartosz Socko, Gregorz Gajewskii og Marcin Dziuba og Hannesi Hlífar Stefánssyni, Stefáni Kristjánssyni, Birni Þorfinnssyni og Magnúsi Erni Úlfarssyni. Átta lið kepptu í efstu deild og varð Taflfélag Reykjavíkur í 2. sæti með 38 vinninga, Skákfélag Bolungarvíkur í 3. sæti með 3 6 ½ vinning og Taflfélag Vestmanneyja í 4. sæti með 34 ½ vinning. Þessi fjögur lið héldu öll möguleikum á sigri fram á lokadag keppninnar.

Í 2. deild sigraði Goðinn-Mátar, b-sveit, í 3. deild b-sveit Víkingaklúbbsins og í 4. deild Bridsfjelagið. Um 400 skákmenn tefldu í Hörpunni um helgina og lauk þar magnaðri skákveislu í stórkostlegum húsakynnum.

Óvæntustu úrslit mótsins voru þegar Andri Áss Grétarsson vann Jóhann Hjartarson. Skákir úr Íslandsmótinu liggja enn ekki fyrir en af mörgu er að taka frá Reykjavíkurskákmótinu. Eins og fram hefur komið náði Hannes Hlífar sér vel á strik og vann marga góða sigra. Hann lagði t.a.m. félaga sinn úr Víkingaklúbbnum í áttundu umferð:

29. Reykjavíkurskákmótið 2013:

Hannes Hlífar Stefánsson - Bartosz Socko (Pólland)

Spænskur leikur

1. e4 e5 2. Rf3 Rc6 3. Bb5 a6 4. Bxc6

Uppskiptaafbrigði Spænska leiksins. Hannes tefldi síðast gegn því á Reykjavíkurmótinu 2010.

5. ... dxc6 5. O-O Dd6 6. Ra3 b5 7. c3 c5 8. Rc2 Bb7 9. a4

Tiltölulega máttlaus leikur en 9. d4 sem er algengast gefur heldur ekki mikið.

9. ... Rf6 10. axb5 axb5 11. Hxa8 Bxa8 12. Ra3 Bxe4 13. Rxb5 Dc6 14. Ra3 Bd6 15. Rc4 Bxf3 16. Dxf3 Dxf3 17. gxf3 Kd7 18. He1 Ha8!?

Byggir á hugmyndinni 19. Rxe5+ Bxe5 20. Hxe5 Ha1 21. He1 c4! o.s.frv.

19. d3 Ha1 20. Kf1 Rd5 21. Ke2 Ha8 22. Kd2 f6 23. Kc2 h5 24. Be3 g5

Vinningsmöguleikar svarts eru aðeins betri í þessari stöðu því peðin á kóngsvæng gefa ýmsa möguleika.

25. Rd2 g4 26. Re4 Kc6 27. Bd2 Hf8 28. Rg3 gxf3 29. c4 Rf4 30. Rf5

30. Bxf4 exf4 31. Rxh5 kom til greina en eftir 31. .. Be5 er riddarinn á villigötum.

30. ... Re2 31. Rh4 Rd4 32. Kd1 Ha8 33. Bc3 Re2 34. Rxf3 Rxc3 35. bxc3 Ha3 36. Kd2 Ha2 37. Ke3 f5 38. Hg1 Hc2 39. Hg6 Kd7 40. Hf6 f4 41. Ke4 Hxf2 42. Rxe5 Ke7 43. Kf5 f3

-sjá stöðumynd-

44. h4??

Það er ekki útilokað að Socko hafi talið sig getað teflt til vinnings í þessari stöðu. Jafntefli og ekkert meira var að fá með 44. Rg6+ Kd7 45. Ke4 o.s.frv.

44. ... Bxe5 45. He6+ Kf7 46. Hxe5 He2!

- Laglegur hnykkur í lokin. Socko gafst upp þar sem hann ræður ekki við f-peðið, t.d. 47. Hf6+ Ke7 48. Kg5 He5+ 49. Kg6 He6 með uppskiptum á hrókum.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 10. mars 2013.

Skákþættir Morgunblaðsins

[Event "Reykjavik Open"] [Site "Reykjavik ISL"] [Date "2013.02.25"] [EventDate "2013.02.19"] [Round "8"] [Result "0-1"] [White "Bartosz Socko"] [Black "Hannes Stefansson"] [ECO "C69"] [WhiteElo "2643"] [BlackElo "2496"] [PlyCount "92"] 1. e4 e5 2. Nf3 Nc6 3. Bb5 a6 4. Bxc6 dxc6 5. O-O Qd6 6. Na3 b5 7. c3 c5 8. Nc2 Bb7 9. a4 Nf6 10. axb5 axb5 11. Rxa8+ Bxa8 12. Na3 Bxe4 13. Nxb5 Qc6 14. Na3 Bd6 15. Nc4 Bxf3 16. Qxf3 Qxf3 17. gxf3 Kd7 18. Re1 Ra8 19. d3 Ra1 20. Kf1 Nd5 21. Ke2 Ra8 22. Kd2 f6 23. Kc2 h5 24. Be3 g5 25. Nd2 g4 26. Ne4 Kc6 27. Bd2 Rf8 28. Ng3 gxf3 29. c4 Nf4 30. Nf5 Ne2 31. Nh4 Nd4+ 32. Kd1 Ra8 33. Bc3 Ne2 34. Nxf3 Nxc3+ 35. bxc3 Ra3 36. Kd2 Ra2+ 37. Ke3 f5 38. Rg1 Rc2 39. Rg6 Kd7 40. Rf6 f4+ 41. Ke4 Rxf2 42. Nxe5+ Ke7 43. Kf5 f3 44. h4 Bxe5 45. Re6+ Kf7 46. Rxe5 Re2 0-1

Aronian efstur í London - Carlsen vann Gelfand

Aronian (2809) er efstur á áskorendamótinu í London eftir sigur á Ivanchuk (2757) í skrautlegri skák þar sem sá síðarnefndi féll á tíma. Carlsen (2872) vann Gelfand (2740), Svidler lagði Radjabov (2793). Aronian er efstur með 2,5 vinning en Svidler og Carlsen koma næstir með 2 vinninga. Frídagur er á morgun.

Í fjórðu umferð, sem fram fer á þriðjudag, mætast meðal annars Carlsen-Grischuk og Aronian-Svidler.

Staðan:

• 1. Aronian (2809) 2,5 v.
• 2.-3. Svidler (2747) og Carlsen (2872) 2 v.
• 4.-6. Kramnik (2810), Grischuk (2764) og Radjbov (2793) 1,5 v.
• 7.-8. Gelfand (2740) og Ivanchuk (2757) 0,5 v.

Tenglar:

• Heimasíða mótsins
• Chessbomb (beinar útsendingar með tölvuskýringum)

Rimaskóli öruggur Íslandsmeistari grunnskólasveita

 

Skáksveit Rimaskóla vann öruggan sigur á Íslandsmóti grunnskólasveita sem fram fór um helgina í Rimaskóla. Sveitin hlaut 34 vinninga af 36 mögulegum og hafði átta vinninga forskot á skáksveit Laugarlækjarskóla sem endaði í öðru sæti. Skáksveit Álfhólfssskóla varð svo í þriðja sæti 1,5 vinningi þar á efstir.

 

Óskar Víkingur Davíðsson, sem er aðeins sjö ára gutti úr Ölduselsskóla, átti óvæntustu úrslit mótsins þegar hann lagði unglingalandsliðsmanninn Jón Trausta Harðarson.

B-sveit Rimaskóla varð efst b-sveit en sveitir Salaskóla urðu efstar c-, d- og e-sveita.

Lið Íslandsmeistara Rimaskóla:

1. Dagur Ragnarsson 8 v. af 9
2. Oliver Aron Jóhannesson 9 v. af 9
3. Jón Trausti Harðarson 8 v. af 9
4. Nansý Davíðsdóttir 9 v. af 9

Liðsstjóri sveitarinnar var Hjörvar Steinn Grétarsson

 

 

Lið silfursveitar Laugarlækjarskóla:

1. Rafnar Friðriksson 5 v. af 9
2. Jóhannes Kári Sólmundarson 7 v. af 9
3. Garðar Sigurðsson 6 v. af 9
4. Arnar Ingi Njarðarson 8 v. af 9

Liðsstjóri var Svavar Viktorsson.

 

 

 

Lið bronssveitar Álfhólsskóla:

1. Dawid Kolka 8 v. af 9
2. Felix Steinþórsson 6,5 v. af 9
3. Guðmundur Agnar Bragason 6 v. af 9
4. Oddur Þór Unnsteinsson 4 v. af 9

Liðsstjóri var Lenka Ptácníková

 

 

Borðaverðlaun:

1. Vignir Vatnar Stefánsson, Hörðuvallarskóla, 9 v.
2. Oliver Aron Jóhannesson, Rimaskóla, 9 v.
3. Óskar Víkingur Davíðsson, Ölduselsskóla, 9 v.
4. Nansý Davíðsdóttir, Rimaskóla, 9 v.

 

• Chess-Results
• Myndaalbúm (HÁ)

Íslandsmót skákfélaga frá sjónarhóli Víkingaklúbbsins

Gunnar Freyr Rúnarsson, formaður Víkingaklúbbsins, hefur skrifað pistil um gengi Víkingaklúbbsins á Íslandsmóti skákfélaga.

Hann mánn nálgast á heimasíðu klúbbsins.

Rimaskóli langefstur á Íslandsmóti grunnskólasveita

Rimaskóli er langefstur á Íslandsmóti grunnskólasveita þegar fimm umferðum af níu er lokið. Rimaskóli hefur hlotið 19 vinninga í 20 mögulegum. Aðeins Jakob Alexander Petersen (Árbæjarskóla) hefur náð að marka á Rimaskóla er hann lagði Dag Ragnarsson.

Álfhólsskóli er í öðru sæti með 14 vinninga. Laugarlækjaskóli og Árbæjarskóli eru í 3.-4. sæti með 13 vinninga.

Mótinu lýkur á morgun með 6.-9. umferð. Taflmennskan hefst kl. 11.

• Chess-Results
• Myndaalbúm (HÁ)

Aronian og Radjabov efstir í London

Önnur umferð áskorendamótsins í London fór fram í dag. Aronian (2809) vann Gelfand (2740) og Radjabov (2793) lagði Ivanchuk (2757). Öðrum skákum lauk með jafntefli og þar með skák tveggja stigahæstu skákmanna heims, Carlsen (2872) og Kramnik (2810). Öllum skákum fyrstu umferðar, sem fram fór í gær, lauk með jafntefli.

Á morgun fer fram þriðja umferð. Þá mætast:

1	2740	GM	Gelfand Boris		GM	Carlsen Magnus	2872
2	2757	GM	Ivanchuk Vassily		GM	Aronian Levon	2809
3	2747	GM	Svidler Peter		GM	Radjabov Teimour	2793
4	2810	GM	Kramnik Vladimir		GM	Grischuk Alexander	2764

Keppendalistinn:

1. Magnus Carlsen (2872)
2. Vladmir Kramnik (2810)
3. Levon Arionian (2809)
4. Teimor Radjabov (2793)
5. Alexander Grischuk (2764)
6. Vassily Ivanchuk (2757)
7. Peter Svidler (2747)
8. Boris Gelfand (2740)

Tenglar:

• Heimasíða mótsins
• Chessbomb (beinar útsendingar með tölvuskýringum)

Áskorendamótið hefst í London kl. 14

Áskorendamótið hefst í London í dag. Þar tefla átta af sterkustu skákmönnum heims tvöfalda umferð um réttinn til að tefla við heimsmeistarann Anand í heimsmeistaraeinvígi. Magnus Carlsen þykir langsigurstranglegastur keppenda enda langstigahæsti skákmaður heims og reyndar stigahæsti skákmaður sögunnar.

Í fyrstu umferð, sem hefst nú kl. 14, mætast Aronian og Carlsen.

Eitthvað töluvert ólag virðist vera á heimasíðu mótsins en vonandi að það verði allt komið í gott lag í tæka tíð.

Keppendalistinn:

1. Magnus Carlsen (2872)
2. Vladmir Kramnik (2810)
3. Levon Arionian (2809)
4. Teimor Radjabov (2793)
5. Alexander Grischuk (2764)
6. Vassily Ivanchuk (2757)
7. Peter Svidler (2747)
8. Boris Gelfand (2740)

Tenglar:

• Heimasíða mótsins
• Chessbomb (beinar útsendingar með tölvuskýringum)