EM: Jafntefli gegn Sviss og tap fyrir Pólverjum

Íslenska liðið í opnum flokki tapaði 1,5-2,5 fyrir þriðja liði heimamanna á EM landsliða en þriðja umferð fór fram í kvöld í Varsjá. Liðið ber nafnið Pólland "Goldies" og er skipað sterkum skákmönnum sem eru hættir atvinnumennsku. Guðmundur Kjartansson vann góðan sigur - hans fyrsti sigur með íslenska landsliðinu, Hannes Hlífar Stefánsson gerði jafntefli en Hjörvar Steinn Grétarsson og Henrik Danielsen töpuðu.

Kvennaliðið gerði 2-2 jafntefli gegn liði Sviss. Tinna Kristín Finnbogadóttir vann, Lenka Ptácníková og Hallgerður Helga Þorsteinsdóttir gerðu jafntefli en Jóhanna Björg Jóhannsdóttir tapaði.

Bæði íslensku liðin hafa 1 stig.

Frakkar sem unnu Úkraínu og Tékkar sem véluðu Tyrki eru með fullt hús stiga í opnum flokki. Rússar máttu teljast heppnir að sleppa 2-2 gegn Englendingum. Ísraelsmenn unnu óvæntan sigur á Hollendingum.

Umferðin var ekki umferð Norðurlandanna sem töpuðu öll.

Nánari frétt síðar í kvöld.

Vakin er athygli á því að umferðin á morgun byrjar tveimur tíðar síðar en venjulega eða kl. 16 þar sem þjóðhátíðardagur Pólverja er á morgun.

• Heimasíða mótsins
• Chess-Results
• Beinar útsendingar
• Myndir frá þriðju umferð (GB)

EM-pistill nr. 3 - Lenka vann Evrópumeistarann!

Íslenska liðið í opnum flokki gerði 2-2 jafntefli við finnsku sveitina í gær. Hannes Hlífar vann góðan sigur á öðru borði en hefur gengið vel á móti finnskum skákmönnum síðustu misseri. Virðist Finna sig vel á móti finnum. Lenka var hetja dagsins en hún hann Evrópumeistara kvenna í mjög vel tefldri skák. Í dag eru það þriðja lið Pólland og Svisslendingar. Hallar á stigalega í báðum viðureignum.

Viðureignir gærdagsins

Héðinn var fyrstur að klára í gær. Hann fékk ekkert útúr byrjuninni og smá saman hallaði á hann og tap staðreynd. Engu að síður bundum við vonir um sigur í viðureigninni. Hannes hafði unnið og Hjörvar vænlegt tafl. Hannes vann en Hjörvar náði ekki að kreista fram vinning þrátt fyrir ríflega 100 leikja skák. Henrik gerði öruggt jafntefli á fjórða borði með svörtu. 2-2 staðreynd. Ásættanleg úrslit en að sjálfsögðu var stefnt á sigur enda heldur sterkari.

Hjá stelpunum var það fljótlega ljóst að Tinna myndi tapa - fékk fljótt skítastöðu. En allar hinar skákirnar litu vel. Hallgerður lék af sér skákinni niður í tap í einum leik peði yfir þegar henni yfirsást 29. He8+! Elsa María vann peð í  byrjuninni en andstæðingurinn hafði hættulegt frípeð. Elsu yfirsást riddara-fitta en þess má geta 46...f4! hefði unnið skákina þar sem þá eru e3 og g3-reitirnir valdaðir. Stelpurnar drullusvekktar eftir viðureignina en fyrirfram hefði 1 vinningur þótt ásættanlegur. Lukkan ekki með okkur í liði.

Viðureignir dagsins

Í dag eru það þriðja lið Pólland í opnum flokki. Liðið ber nafnið Pólland Goldies. Í liðinu eru skákmenn sem hafa lagt atvinnumennsku á hilluna. Sjálfur man ég vel eftir Gdanski sem teflir við Henrik í dag. Hann var oft andstæðingur Þrastar á unglingamótum hér áður fyrr og iðulega meðal efstu manna.  Pólski fyrrverandi forseti pólska skáksambandsins, sem á mestan heiður að fá mótshaldið til Varsjár, Tomek Silicka, sagði að þetta lið skipuðu „amatörar"! Held að það sé hæpin nálgun því þetta er stórhættulegt lið með þrautreynda skákmenn og fyrrum landsliðsmenn innanborðs.

Guðmundur kemur aftur inn en Héðinn hvílir.

Við höfum aðeins einu sinni mætt Pólverjum á EM. Það var árið 2007 en þá vann íslenska liðið mjög óvæntan  3-1 sigur á Pólverjum sem var mun stigahærra á öllum borðum en við. Þá var ég liðsstjóri liðsins. Hannes, Héðinn og Stefán Kristjánsson unnu en Henrik tapaði. Ég minnist þess að Áskell Örn hafi sagt á Horninu að þetta væru ein bestu einstöku úrslit sem íslenskt lið hafi náð.  Sjá pistil frá 2007.

Við höfum mætt Pólverjum tíu sinnum á Ólympíuskákmóti á tímabilinu 1930-1986. Með liðinu 1930 þá tefldu meðal annars Tartakower og Rubenstein! Sú viðureign tapaðist 0-4. Þar hallar verulega á okkur. Staðan er 14-26. Við höfum unnið tvær viðureignir en höfum tapað fimm. Þrjú jafntefli.

Kvennaliðið, sem teflir á sína þriðja EM-móti, mætir Svisslendingum í þriðja skipti! Þær eru haldir sterkari en við og veikasta sveitin sem höfum hingað til fengið. Jóhanna kemur aftur inn en Elsa hvílir.

Töpuðum fyrir þeim 0,5-1,5 árið 2001 (þá aðeins teflt á tveimur borðum) og töpuðum aftur 1,5-2,5 árið 2005. Höfum teflt við þá fimm sinnum á Ólympíuskákmótum. Þar höfum við unnið þær þrisvar en tapað tvisvar.

Toppbaráttan

Það urðu verulega óvænt úrslit í gær þegar Tyrkir unnu Rússa með 2,5-1,5. Grikkir unnu svo Englendinga örugglega 3-1. Til fullkomna ólán þessara liða sem bæði eru fyrrverandi Evrópumeistarar mætast þau í dag!

Hitti Nigel Short í lyftunni í dag sem sagðist vera að upplifa Deja Vu. Á EM 2011 töpuðu einmitt Englendingar fyrir Grikkjum í 2. umferð og mættum Armenum í þeirri þriðua. Nigel Short sagði lessíuna - ekki tapa fyrir Grikkjum!

Englendingar eru með fimmta stigahæsta liðið. Frakkar og Úkraínumenn mætast á efsta borði.

Fimm lið hafa fullt hús stiga en auk Frakka og Úkraínumanna eru það Tékkar, Grikkir og Tyrkir.

Í kvennakeppninni hafa sjö lið enn fullt hús stiga og þar á meðal tvö pólsk lið.

Norðurlandamótið

Danir, sem unnu Belga, leiðir Norðurlandamótið með 2 stig. Við, Svíar og Finnar höfum 1 stig. Norðmenn reka lestina - ekki enn komnir á blað.

Í gúanóinu (borð 12-19) er nú allar norrænu sveitirnar !

Finnar eru efstir í kvennakeppninni með 1 stig. Við og Norðmenn eru ekki komnir á blað.

Mótshaldið

Íslensku fulltrúarnir erum óðum að ná sinni rútínu. Á svona mótum verða allir dagar eins hvort sem er að ræða helgi eða virka daga.

Dagurinn á morgun verður þá öðruvísi en þá verður þjóðhátíðardagur Pólverja. Skrýtin þjóðhátíðardagur en mér skilst að Pólverjar noti til móttæla! Það komu tilmæli frá yfirdómara til keppenda að vera ekki úti eftir kl. 13 á morgun. Við Davíð stefnum ótrauðir út!

Verður fróðlegt að fylgjast með en við erum hér í miðbæ Varsjár. Umferðin á morgun byrjar tveimur tímum síðar en vanalega eða kl. 16 að íslenskum tíma.

Einhverjum vandræðum voru mótshaldarar í gær með pörunina en hún skilaði sér þó fyrir rest. Róbert sagði mér að skákstjórnin væri farin að róast og hlutirnir að komast í fastari skorður hjá þeim.

Ég sjálfur lenti í smávandræðum að komast inn í skáksalina í gær. Skákstjórarnir eru orðnir strangari og sumir full strangir enda sumir reynslulitlir á stærri mótum (á engan við þá Omar og Róbert).  Ég er búinn að verða mér útum betri aðgang og á nú að geta komist inn í skáksalina án þess að eiga hættu á því að vera rekinn út.

Rólegt er á hótelinu og keppendur lítið á hótelbarnum. Frakkarnir sitja þó þar á kvöldin, sötra rauðvín, og spila Bridge sýnist mér.

Í gær var hér diskótek hér í gær og voru víst sumir þar í stuði.

Mótið hér virðist vekja töluvert athygli og hér má sjá pólska ríkissjónvarpið á hverjum degi. Í dag var tekið viðtal við áðurnefndan Tomek Silecki og í gær við Aronian.

Skákkennsla er einnig á staðnum. Pólverjarnir eru að sstanda sig vel.

Skák.is

Áhorfið á Skák.is var mikið í gær. Stærsti dagurinn á Skák.is þar síðan 27. febrúar sl. sem var lokadagur Reykjavíkurskákmótsins. Kemur ekki á óvart í ljósi EM og Heimsmeistaraeinvígisins.

Nóg í bili.

Kveðja frá Varsjá,
Gunnar

Heimsmeistaraeinvígið: Annað tilþrifalítið jafntefli

Annarri einvígisskák Anand (2775) og Carlsen (2775) lauk með jafntefli í aðeins 25 leikjum í fremur tilþrifalítilli skák. Staðan er því 1-1. Frídagur er á morgun.

Þriðja skák einvígisins verður tefld á þriðjudag og hefst kl. 9:30. Þá hefur Carlsen hvítt.

• Vefsíða mótsins
• Bein útsending á vefsíðu mótsins
• Verdens Gang
• Chessbomb

EM landsliða: Viðureignir dagsins

Þá er liðsuppstilling dagsins tilbúin. Héðinn Steingrímsson hvílir í opnum flokki en Elsa María Kristínardóttir í kvennaflokki.

Opinn flokkur:

Bo.	28	ICELAND	Rtg	-	24	POLAND GOLDIES	Rtg	0 : 0
13.1	GM	STEFANSSON, Hannes	2539	-	GM	TAZBIR, Marcin	2555
13.2	IM	GRETARSSON, Hjorvar Steinn	2511	-	GM	BULSKI, Krzysztof	2538
13.3	GM	DANIELSEN, Henrik	2502	-	GM	GDANSKI, Jacek	2518
13.4	IM	KJARTANSSON, Gudmundur	2455	-	IM	MASTERNAK, Grzegorz	2333

Kvennaflokkur:

Bo.	26	Switzerland	Rtg	-	32	Iceland	Rtg	0 : 0
16.1	WIM	Seps, Monika	2260	-	WGM	Ptacnikova, Lenka	2238
16.2	WIM	Heinatz, Dr. Gundula	2169	-		Thorsteinsdottir, Hallgerdur	1951
16.3	WFM	Stoeri, Laura	2102	-		Johannsdottir, Johanna Bjorg	1901
16.4	WFM	De Seroux, Camille	2066	-		Finnbogadottir, Tinna Kristin	1882

• Heimasíða mótsins
• Chess-Results
• Beinar útsendingar
• Myndir frá annarri umferð (GB)

EM: Pólland III og Sviss á morgun - slæmt gengi Rússa

Íslenska liðið í opnum flokki mætir Póllandi III á morgun. Liðið ber nafnið Pólland "Goldies" en það skipa stórmeistarar sem ekki stunda atvinnumennsku lengur. Liðið er heldur sterkara á pappírnum en það íslenska, með meðalstigin 2542 á móti 2524 skákstigum okkar liðs. Kvennaliðið mætir sveit Sviss sem hefur meðalstigin 2149 á móti 1993 íslenska liðsins.

Dagurinn í dag var sérdeilis ekki dagur Rússa. Liðið í opnum flokki tapaði mjög óvænt fyrir Tyrkjum og kvennaliðið tapaði fyrir sveit Ísraels. Í báðum tilfellum var lið Rússa mun sterka á pappírnum.

Úkraínumenn, Tékkar og Grikkir sem unnu afar óvæntan sigur á Englendingum eru efstir með 4 stig og 6 vinninga í opnum flokki Íslenska liðið er í 29. sæti af 38 liðum með 1 stig og 3,5 vinning.

Í kvennaflokki er íslenska liðið í 27. sæti af 32 með 0 stig og 2 vinninga. Armenía og Georgía eru efst á mótinu með 4 stig og 7 vinninga.

 

• Heimasíða mótsins
• Chess-Results
• Beinar útsendingar
• Myndir frá annarri umferð (GB)

Jafntefli gegn Finnum - Lenka vann Evrópumeistarann

Íslenska liðið í opnum flokki gerði 2-2 jafntefli gegn sveit Finna. Hannes Hlífar vann sína skák, Hjörvar Steinn og Henrik gerðu jafntefli en Héðinn tapaði. Íslenska liðið í kvennaflokki tapaði 1-3 fyrir sterkri sveit Ungverja. Lenka gerði sér lítið fyrir og vann sjálfan Evrópumeistarann í skák  Thanh Trang Hoang (2495). Lukkan var ekki með Íslendingum í þeirri viðureign en bæði Hallgerður og Elsa léku illa af sér með vænlegar stöður.

Eins og í gær virðast vera töluvert um óvænt úrslit. Tyrkir hafa 2-1 yfir gegn Rússum og flestir bendir til sigurs í viðureigninni. Grikkir unnu Englendinga 3-1. 

Nánari fréttir síðar í kvöld.

 

• Heimasíða mótsins
• Chess-Results
• Beinar útsendingar
• Myndir frá annarri umferð (GB)

Oliver Aron, Vignir Vatnar og Sóley Lind urðu TORG-skákmeistarar 2013

Skákdeild Fjölnis hélt TORG-skákmót félagsins í 10. sinn í Foldaskóla og mættu 45 efnilegir skákkrakkar á öllum aldri til leiks. Teflt var í þremur flokkum og var áhugavert að sjá hversu kornungir skákkrakkar voru með í slagnum um efstu sætin. Tefldar voru sex umferðir og undir öruggri stjórn Páls Sigurðssonar og Helga Árnasonar gekk mótið vel fyrir sig auk þess sem aðstæður á mótsstað í Foldaskóla voru alveg til fyrirmyndar.

Mótið var spennandi frá upphafi til enda voru þarna á ferðinni Norðurlandameistarar úr Rimaskóla og Álfhólsskóla auk Evrópumeistarafara frá því í haust til Slóveníu. Oliver Aron Jóhannesson Rimaskóla/Fjölni var talinn líklegastur til sigurs og byrjaði á 1. borði. Því sæti hélt hann við borðið út allt mótið og kom í mark sem sigurvegari TORG-skákmótsins þriðja árið í röð. Hann gerði jafntefli við Vigni Vatnar Stefánsson í lokaumferð en hafði áður unnið allar sínar skákir. Í 2. - 5. sæti með 5 vinninga komu þeir Felix Steinþórsson Álfhólsskóla/TM Helli, Þorsteinn Magnússon Tjarnarskóla/TR, Vignir Vatnar Stefánsson Hörðuvallaskóla/TR og Mykhaylo Kravchuk Ölduselsskóla/TR.

Sóley Lind Pálsdóttir í Hvaleyrarskóla/TG varð ein í 6. sæti með 4,5 vinninga og vann með því stúlknaflokkinn. Fjölnisstúlkurnar Nansý Davíðsdóttir og Alisa Helga Svansdóttir urðu næstar á eftir Sóleyju í stúlknaflokki. Hina glæsilegu NETTÓ eignarbikara hlutu Oliver Aron Jóhannesson fyrir sigur á mótinu og í eldri flokk, Vingir Vatnar Stefánsson sigurvegari í yngri flokk og Sóley Lind Pálsdóttir stúlknameistari TORG-mótsins.

Hrafn Jökulsson forseti Hróksins og Grænlandsfari var heiðursgestur mótsins. Hann ávarpaði þátttakendur í upphafi, lék fyrsta leik mótsins fyrir Oliver Aron og afhenti sigurvegurunum NETTÓ bikarana í mótslok.

Fyrirtæki í verslunarmiðstöðinni Hverafold gáfu alla 23 vinninga mótsins og á meðal áhugaverðra vinninga voru gjafabréf fyrir hamborgara, pítsur, bækur og blóm, súkkulaðitertur frá bakaríinu og skartmunir frá tískuvöruversluninni CoCo´s. Nettó - Hverafold gaf veglega bikara til keppninnar líkt og undanfarin ár auk þess að bjóða öllum þátttakendum upp á ljúfar veitingar. Foreldrar fjölmenntu og fylgdust af stolti með börnunum sínum sem öll stóðu sig með mikilli prýði.

Lokastöðu mótsins má finna á Chess-Results.

Myndaalbúm (HÁ)

EM-pistill nr. 2 - Töp í gær

Báðar viðureignir gærdagsins töpuðust. Strákarnir töpuðu með minnsta mun fyrir Tékkum en stelpurnar 1-3 fyrir Litháum.  Tinna Kristín vann góðan sigur. Það var vitað fyrirfram að viðureignirnar væru erfiðar.  Í dag eru það Finnar í opnum flokki og Ungverjar í kvennaflokki. Strákarnir eru eilítið sterkari en stelpurnar tefla við mun sterkari sveit. 

Viðureignir gærdagsins

Guðmundur var fyrstur að klára í gær. Hann lenti í erfiðleikum en tefldi vörnina taktíst og var kominn með mjög aktíva vörn. Á einum stað átti hann vinningsleik (32. Hxf7!) sem er reyndar ekki auðveldur leikur að sjá yfir borðinu með lítinn tíma. Guðmundur lék hins vegar ónákvæmt í tímahrakinu og tapaði. Hjörvar Steinn tefldi skemmtilega Sikileyjar-skák, virtist um tíma vera í erfiðri vörn en hélt jafntefli. Hannes lék af sér peði en tefldi vörnina vel og hélt jafntefli. Héðinn tefldi afar vel á fyrsta borði, jafnaði taflið auðveldlega gegn Navara og var sennilega með eitthvað betra í lokastöðunni. Tap 1,5-2,5 verður að teljast viðunandi gegn sterkri sveit Tékka.

Lenka tapaði fyrst gegn Litháum. Hún fékk á sig afar fallega drottningarfórn (21. Dxf6!) gegn Cmylite. Jóhanna lenti fljótlega í beyglu og tapaði einnig. Hallgerður tefldi lengi vel erfiða vörn en tókst ekki að halda jafntefli. Tinna Kristín vann hins vegar góðan sigur. Leikurinn 38. He5! er mjög flottur.  Tap gegn Litháum 1-3 er ásættanlegt. Krúttbangsinn Kveynis, sem er liðsstjóri kvennaliðs Litháa, var afar brosmildur í lok umferðar.

Viðureignir dagsins

Í dag tefla strákarnir við sveit Finna. Við höfum tvívegis teflt við þá EM og leiðum 4,5-3,5. Fyrst við árið 2001 en þá fór 2-2. Hannes vann sína skák. Svo árið 2007 þegar við unnum 2,5-1,5 í lokaumferðinni. Þröstur vann þá sína skák.

Talandi um Þröst - þá er hann fyrsti Íslendingurinn sem tefldi við Anand og reyndar Carlsen einnig. Tefldi við hann árið 2000 í Bergen þegar sá norski var á tíunda ári og mátti hafa sig allan við að halda jafntefli og botnaði ekkert í því!

Við höfum hins vegar teflt við Finna 14 sinnum á Ólympíuskákmóti síðast árið 1986. Þar höfum við lagt þá fimm sinnum, tapað jafnoft og gert fjórum sinnum jafntefli.  Staðan þar er 29,5-26,5 okkur í vil.

Henrik kemur inn í dag og Guðmundur hvílir. Finnar töpuðu 1-3 fyrir Ítölum í gær. Agapov (2435), sem teflir við Hjörvar í dag, vann Rombaldoni (2530).

Stelpurnar mæta Ungverjum í dag. Þeir hafa aldrei teflt við þær á EM en þrívegis á Ólympíuskákmótinu 1978, 1982 og í fyrra. Þar er skorið ekki uppörvandi eða 0,5-9,5! Hálfi vinningurinn náðist í fyrra þegar Jóhanna Björg gerði jafntefli við Anitu Gara. Bæði Jóhanna og Anita Gara hvíla hins vegar í dag. Ég vona að vinningshlutfall okkar gegn Ungverjum hækki eftir umferð dagsins!

Ungverska sveitin er sú áttunda sterkasta hér. Á fyrsta borði teflir Thanh Trang Hoang (2511) sem er núverandi Evrópumeistari kvenna. Hoang þessi hefur náð þeim einstaka árangri að vera bæði heimsálfumeistari Evrópu og Asíu. Lenka mætir í fyrstu tveimur umferðum fjórðu og áttundu sterkustu skákkonu mótsins.

Skákstaðurinn

Aðstæður á skákstað eru að flesti leyti góðar og greinilegt að Pólverjar hafa lagt á sig mikla vinnu. Helsti gallinn er sá að keppendurnir eru í 4 herbergjum. Eitthvað sem verður mikla mun betra í höllinni 2015.

Fyrir framan salina er gott miðrými þar sem meðal annars má fá frítt kaffi og vatn. Eitthvað sem hefur alls ekki verið sjálfgefið í gegnum tíðina í landsliðskeppnum.

Á skákstað er komið málmleitarhlið. Það hefur venjulega ekki verið á EM en iðulega á Ólympíuskákmótum. Eins og er fatta ég ekki tilganginn. Í gær pípaði tækið á mjög marga en ég sá aldrei leitað á viðkomandi.  Í dag sýndist mér hliðið óvirkt.

Stelpurnar tefla í dag í aðalsalnum en strákarnir í minni sal. Áhorfendur eiga ekki auðvelt með að vera nálægt skákunum en sem betur fer er mér hleypt alls staðar. 

Í gærkveldi tókum við Omar og Róbert smá spjall. Omar hefur tekið að sér að skrifa upp gátlista yfir hluti sem við þurfum að hugsa fyrir EM 2015. Mjög mikilvægt að hafa hér tvo skákstjóra upp á mótið 2015.

Varðandi beinu útsendingarnar þá eru þær ekki alveg beinar - því hér er 15 mínútna áður en skákirnar koma á netið.

Nóg í bili. Áfram Ísland og Magnús!

Kveðja frá Varsjá,
Gunnar

• Heimasíða mótsins
• Chess-Results
• Beinar útsendingar
• Myndir frá annarri umferð (GB)

Viðureignir dagsins: Finnar og Ungverjar

Önnur umferð EM landsliða hófst kl. 14. Liðið í opnum flokki mætir liði Finna en kvennaliðið mætir liði Ungverja.

Viðureignir dagsins:

Bo.	28	ICELAND	Rtg	-	32	FINLAND	Rtg	0 : 0
18.1	GM	STEINGRIMSSON, Hedinn	2543	-	GM	NYBACK, Tomi	2586
18.2	GM	STEFANSSON, Hannes	2539	-	IM	SIPILA, Vilka	2463
18.3	IM	GRETARSSON, Hjorvar Steinn	2511	-	IM	AGOPOV, Mikael	2435
18.4	GM	DANIELSEN, Henrik	2502	-	FM	EBELING, Daniel	2365

Bo.	32	Iceland	Rtg	-	8	Hungary	Rtg	0 : 0
9.1	WGM	Ptacnikova, Lenka	2238	-	GM	Hoang, Thanh Trang	2511
9.2		Thorsteinsdottir, Hallgerdur	1951	-	WGM	Gara, Ticia	2350
9.3		Finnbogadottir, Tinna Kristin	1882	-	WGM	Papp, Petra	2300
9.4		Kristinardottir, Elsa Maria	1819	-	WGM	Rudolf, Anna	2281

 

• Heimasíða mótsins
• Chess-Results
• Beinar útsendingar
• Myndir frá fyrstu umferð (GB)

Tilþrifalítið jafntefli í fyrstu skák

Tilþrifalítið jafntefli var í fyrstu skák heimsmeistaraeinvígis Carlsen (2870) og Anand (2775). Carlsen hafði hvítt og var tefld Réti-byrjun. Þrátefldu þeir eftir aðeins 16 leiki.

Önnur skák einvígisins verður telfd á morgun og hefst kl. 9:30. Þá hefur Anand hvítt.

• Vefsíða mótsins
• Bein útsending á vefsíðu mótsins
• Verdens Gang
• Chessbomb