Einvígismunirnir seldir á 18,5 milljónir

Skákmunir sem Páll G. Jónsson setti á sölu voru seldir í dag á uppboði hjá Bruun Rasmussen í Kaupmannahöfn.  Samtals fóru munirnir á 850.000 danskar krónur sem eru um 18,5 milljónir íslenskra krónur. Sjá nánar á vef RÚV. 

Borgþór Arnþórsson fréttaritari RÚV fjallar um uppboðið og er með frásögn um hvernig það fór fram í fjögur-fréttum RÚV.   Mjög líkega verður enn nánar um málið fjallað í kvöldfréttum RÚV.

Einar S. Einarsson, fyrrverandi forseti SÍ, skrifaði grein um skákmunina sem birtist á Chessbase í fyrradag.

Útiskákmót Goðans

Hið árlega útiskákmót Goðans verður haldið annað kvöld, föstudagskvöld kl 20:30 við Goðafoss. (Bílaplanið við fossinn) Tefldar verða 5 mín skákir allir við alla.

Ekkert þáttökugjald og engin verðlaun, bara gaman saman.

Félagar fjölmennið á mótið.

Stjórnin.

Stærsti skákviðburður í sögu Íslands

Stjórn Evrópska skáksambandsins samþykkti á stjórnarfundi fyrir skemmstu að EM landsliða verði haldið í Reykjavík árið 2015.   
 
Um er að ræða langstærsta skákviðburð sem haldinn hefur verið hérlendis.  Gera má ráð fyrir að um 500 skák- og skákáhugamenn komi til landsins vegna þessa.  Þar á meðal væntanlega flestir af sterkustu skákmönnum heims eins og t.d. Magnus Carlsen, Levon Aronian, Vladimir Kramnik, Veselin Topalov og Fabiano Caruana.
 
Keppt verður bæði í opnum flokki og kvennaflokki svo einnig munu mæta hingað til lands langflestar sterkustu skákkonur heims eins og Evrópumeistari kvenna, Valentina Gunina, Alexandra Kosteniuk, Pia Cramling og Antoaneta Stefanova.   
 
EM landsliða er einn allri stærsti skákviðburður heims.   Mótið er haldið annað hvort ár, þau ár sem ekkert Ólympíuskákmót fer fram.  Ríkisstjórnin hefur lofað öflugum stuðningi við mótshaldið.   
 
Gunnar Björnsson, forseti SÍ:  „Þetta er stórkostlegt tækifæri fyrir íslenskt skáklíf og gífurleg viðurkenning fyrir innlenda skákhreyfinguna að fá mótið til landsins. Það verður frábært að fá hingað nánast alla sterkustu skákmenn heims í nóvember 2015".
 

Sjóðurinn Fischer Selfoss Foundation hefur verið stofnaður

Sjóðurinn Fischer Selfoss Foundation (fsf) var stofnaður í Lundi í Svíþjóð þann 6. júní síðastliðinn. Tilgangur sjóðsins er að safna fé og munum fyrir fyrirhugað safn á Selfossi. Safnið er einnig hugsað sem félagsheimili fyrir Skákfélag Selfoss og nágrennis (SSON).

Í stjórn sjóðsins eru: Gunnar Finnlaugsson, Calle Erlandsson og Magnús Matthíasson

Opnaður hefur verið reikningur hjá MP banka. Reikningsnúmer er 0701-15-252800. Á reikningnum er nú þegar 1 000 000 ISK. Tengiliður er Valgerður Friðriksdóttir viðskiptasjóri.

Magnús Matthíasson formaður SSON tekur við munum tengdum Fischer.
Heimilisfang Dælengi 15 800 Selfoss, sími 691 2254. Gunnar Finnlaugsson formaður sjóðsins tekur einnig við munum. Heimilisfang Mellanvångsv. 23 223 55 Lund Sverige. Símar [phone] og  [phone]. Tölvufang Gunnars er [e-mail].

Lund Chess Academy (chesslund.com ) var stofnað fyrir tveimur árum og er tilgangur félagsins að styrkja unga skákiðkendur. Nýlega settu svíinn Calle Erlandsson og Daninn Per Skjoldager á fót netsíðu fyrir uppboð og sölu á skákbókum og öðru teingt skákinni (sjá chesslund.com). Lund Chess Academy (LSAK) mun styrkja Fischer Selfoss Foundation.

Það er ekkert launungarmál að uppboð það sem fer fram í dag hjá Bruun Rasmussen gengur þvert á það sem við sem stöndum að Fischer Selfoss Foundation höfum verið að vinna að undanfarin ár.

Viðræður um húsnæði standa nú yfir við heimamenn á Selfossi.

Með skákkveðju
Gunnar Finnlaugsson

Morozevich efstur á Tal Memorial - Carlsen vann Radjabov

Morozevich (2769) vann Aronian (2825) í fimmtu umferð Tal Memorial sem fram fór í dag.   Moro hefur nú vinningsforskot á næstu menn sem eru Magnus Carlsen (2835), sem vann Radjabov (2784), Kramnik (2801) og Radjabov. 

 

 

Úrslit 5. umferðar:

Alexander Grischuk	½-½	Fabiano Caruana
Teimour Radjabov	0-1	Magnus Carlsen
Levon Aronian	0-1	Alex. Morozevich
Hikaru Nakamura	½-½	Vladimir Kramnik
Ev. Tomashevsky	½-½	Luke McShane

Staðan:

• 1. Morozevich (2769) 4 v.
• 2.-4. Carlsen (2835), Kramnik (2801) og Radjabov (2784) 3 v.
• 5. Caruana (2770) 2,5 v.
• 6.-9. Grischuk (2761), Nakamura (2775), Aronian (2825) og McShane (2706) 2 v.
• 10. Tomashevsky (2738) 1,5 v.

Mótið er ægisterkt en meðalstig eru 2776 skákstig.  Taflmennskan hefst kl. 11 á daginn nema að lokaumferðin hefst kl. 9.  Frídagar eru 11. og 15. júní.

• Heimasíða mótsins
• Beinar útsendingar
• Beinar myndútsendingar
• ChessBomb

Íslandsmeistarinn í Goðann

Þröstur Þórhallsson, stórmeistari og nýbakaður Íslandsmeistari í skák, hefur gengið til liðs við skákfélagið Goðann. Vart þarf að orðlengja að félaginu er mikill akkur í liðsinni svo öflugs skákmeistara, ekki síst í ljósi þess að hin eitilharða A-sveit Goðans þreytir frumraun sína meðal bestu skáksveita landsins í 1. deild Íslandsmótsins á næstu leiktíð. Hermann Aðalsteinsson, formaður Goðans: „Okkur er í senn heiður og styrkur að komu Íslandsmeistarans í okkar raðir og hlökkum til að njóta snilldar hans, reynslu og þekkingar. Með inngöngu Þrastar í Goðann færumst við nær því markmiði að festa Goðann í sessi meðal fremstu skákfélaga á landinu."  

Skákferill Þrastar er langur og afrekin mörg. Hann var útnefndur alþjóðlegur stórmeistari í skák árið 1996. Fyrsta áfanganum náði Þröstur í Gausdal í Noregi árið 1991 og annar áfanginn vannst í Oakham í Englandi árið 1994. Þriðji áfanginn kom strax í kjölfarið með sigri á Péturs Gauts mótinu í Gausdal árið 1995 en meðal þátttakenda þar voru kunnir kappar á borð við Margeir Pétursson og Emil Sutovsky sem Þröstur lagði eftirminnilega.
 
Þröstur hefur orðið Reykjavíkurmeisari í skák alls 6 sinnum og hefur einnig áunnið sér titilinn haustmeistari TR nokkrum sinnum. Hann er margfaldur Norðurlandameistari í skólaskák, bæði í keppni sveita og einstaklinga, en þann titil vann hann fyrstur Íslendinga er hann sigraði í flokki 11-12 ára árið 1982 í Asker í Noregi. Þröstur varð einnig þrásinnis Íslandsmeistari í skólaskák með sveitum Hvassaleitisskóla, Verslunarskóla Íslands og Menntaskólans í Hamrahlíð. Hann hefur teflt alls 9 sinnum fyrir Íslands hönd á Ólympíuleikunum í skák og stefnir að því að tefla í 10 skiptið fyrir hönd þjóðar sinnar á Ólympíuleikunum í Istanbul í haust, en Þröstur vann sér sæti í landsliðinu með sigrinum í Íslandsmótinu á dögunum.
 
Þröstur Þórhallsson: ´"Ég hef hrifist af uppgangi Goðans á undanförnum misserum, því skemmtilega félagsstarfi sem þar fer fram og góðum liðsanda. Einnig er mikil rækt lögð við skákfræðin undir forystu Einars Hjalta Jenssonar, sem aðstoðaði mig einmitt í einvíginu um Íslandsmeistaratitilinn. Ég hlakka til að leggja mitt af mörkum í hópi vaskra skákmanna Goðans sem ég þekki marga hverja mjög vel allt frá unglingsárum".    
 
Stjórn og liðsmenn Goðans bjóða Þröst Þórhallsson velkominn í sínar raðir.  

Stjórn SÍ hefur valið landslið Íslands á Ólympíuskákmótinu

Á stjórnarfundi Skáksambands Íslands í gær voru landslið Íslands sem tefla munu á Ólympíuskákmótinu í Istanbul í Tyrklandi 27. ágúst - 10. september valin.  Í báðum tilfellum voru tillögur liðsstjóra samþykktar.   

Liðið í opnum flokki:

1. GM Héðinn Steingrímsson (2560)
2. GM Hannes Hlífar Stefánsson (2516)
3. GM Henrik Danielsen (2498)
4. IM Hjörvar Steinn Grétarsson (2477)
5. GM Þröstur Þórhallsson (2425)

Liðsstjóri er GM Helgi Ólafsson.

Liðið í kvennaflokki:

1. WGM Lenka Ptácníková (2275)
2. Hallgerður Helga Þorsteinsdóttir (1957)
3. Jóhanna Björg Jóhannsdóttir (1885)
4. Tinna Kristín Finnbogadóttir (1832)
5. Elsa María Kristínadóttir (1737)

Liðsstjóri er Davíð Ólafsson

Rétt er að taka fram að endanleg borðaröð liggur ekki fyrir en verður ákveðin í byrjun næsta mánaðar.  

Fararstjóri og fulltrúi á FIDE-þinginu verður Gunnar Björnsson.

Omari Salama hefur verið boðið að verða einn skákstjóra á Ólympíuskákmótinu sem er mikill heiður fyrir Ísland sem hefur aldrei átt dómara á Ólympíuskákmóti.  

Heimasíða Ólympíuskákmótsins

Myndir frá uppskeruhátíð Skákakademíunnar

 

 

Uppskeruhátíð Skákakademíu Reykjavíkur fór fram sunnudaginn 10. júní í Ráðhúsi Reykjavíkur.  Þar fór meðal annars fram skákuppboð aldarinnar.  Hrafn Jökulsson og Ríkharður Traustason tóku margar myndir og má þær finna í sérstöku myndaalbúmi. 

Stöð 2 var einnig með frétt frá uppskeruhátíðinni.

Davíð - Hjá Dóra sigurvegari Mjóddarmóts Hellis

Davíð Kjartansson sem tefldi fyrir Hjá Dóra ehf, sigraði örugglega með 6,5v vinninga í sjö skákum á  vel sóttu Mjóddarmóti Hellis sem fram fór 6. júní sl.   Í 2. sæti, með 5,5 vinning, varð Sigurbjörn Björnsson (Brúðakjólaleiga Katrínar). Jafnir í  3. - 7. sæti með 5v voru Þorvarður Fannar Ólafsson (Olís), Einar Hjalti Jensson (Pósturinn), Dagur Ragnarsson (Lyfjaval ehf, Mjódd), Stefán Bergsson (Kaupfélag Skagfirðinga) og Kristófer Ómarsson (Arion Banki).

30 skákmenn tóku þátt sem telst ágætis þátttaka. Ágætar aðstæður voru á skákstað en það var sól með köflum og vindurinn stóð upp  á hinn enda göngugötunnar þannig að Monradspjöldin fuku ekki af borðum.

Lokastaðan:

• 1.   Hjá Dóra ehf, Davíð Kjartansson                             6,5v/7
• 2.   Brúðakjólaleiga Katrínar, Sigurbjörn Björnsson       5,5v
• 3.   Olís, Þorvarður Fannar Ólafsson                              5v
• 4.   Pósturinn, Einar Hjalti Jensson                                5v
• 5.   Lyfjaval ehf, Mjódd, Dagur Ragnarsson                   5v
• 6.   Kaupfélag Skagfirðinga, Stefán Bergsson                5v
• 7.   Arion Banki, Kristófer Ómarsson                              5v
• 8.   G.M.Einarsson múrarameistari, Helgi Brynjarsson   4,5v
• 9.   Kornax, Kjartan Másson                                          4,5v
• 10. HS Orka, Birkir Karl Sigurðsson                                4v
• 11. BV 60, Gunnar Björnsson                                         4v
• 12. Sorpa, Vigfús Ó. Vigfússon                                       4v
• 13. Subway Mjódd, Hilmir Freyr Heimisson                     4v
• 14. Suzuki bílar, Hallgerður Helga Þorsteinsdóttir          4v
• 15. Íslandsbanki í Breiðholti, Elsa María Kristínardóttir   4v
• 16. Íslensk erfðagreining, Gunnar Nikulásson                3v
• 17. Samkaup hf v/Nettó, Jóhanna Björg Jóhannsdóttir  3v
• 18. Garðheimar, Jón Birgir Einarsson                              3v
• 19. Bjarni Guðmundsson                                                 3v
• 20. Gámaþjónustan, Jón Úlfljótsson                               3v
• 21. Heimir Páll Ragnarsson                                             3v
• 22. Mikael Kravchuk                                                        3v
• 23. Óskar Long Einarsson                                               2,5v
• 24. Svandís Rós Ríkharðsdóttir                                        2,5v
• 25. Árni Thoroddsen                                                        2v
• 26. Pétur Jóhannesson                                                   2v
• 27. Óskar Víkingur Davíðsson                                          2v
• 28. Jakob Alexander Petersen                                         2v
• 29. Björgvin Kristbergsson                                               1v
• 30. Hildur Berglind Jóhannsdóttir                                     1v

Myndaalbúm (Vigfús Ó. Vigfússon og  Erla Hlín Hjálmarsdóttir)

Myndir frá heimsókn úrvalsliðs SR í Landsbankann

Úrvalslið Skákakademíu Reykjavíkur kom í heimsókn í aðalútibú Landsbankans í síðustu viku og mætti þar sveit bankans á 10 borðum eins og áður hefur fjallað um hér á Skák.is.  Bankamenn höfðu nauman sigur í spennandi viðureign þar sem gleðin var í fyrrirúmi.   Stefnt er að annarri keppni í lok sumars eða næsta haust.  Myndasmiður bankans tók allmargar myndir sem finna má í myndaalbúmi heimsókninnar.