Íslandsmótið í skák hafið - það er gott að tefla í Kópavogi

Íslandsmótið í skák hófst kl. 16 í Stúkunni við Kópavogsvöll.  Ármann Kr. Ólafsson, bæjarstjóri, setti mótið og lék fyrsta leikinn, riddara á f3, í skák stórmeistaranna Henriks Danielsens og Stefáns Kristjánssonar.   Sú skák sem stolið hefur athygli fjölmargra áhorfenda í fyrstu umferð er skák Guðmundar Gíslasonar og Björns Þorfinnsonar er Guðmundur fórnaði riddara á f7 strax í áttunda leik.

 

• Heimasíða mótsins
• Chess-Results
• Beinar útsendingar
• Myndaalbúm mótsins (HJ)

Gallerý Skák: Jón Þorvaldsson kom sá og sigraði

Í gærkvöldi var þröng á þingi í Gallerýinu þar sem fram fór EftirPáskaMótið um SAMBÓ NammiBoltann, sem keppt var um að nýju þar sem gefandinn GRK vann hann sjálfur í síðustu viku.  Ekkert var gefið eftir í baráttunni fyrir sætum sigri  -nema síður væri - rétt eins og vanalega og mörg óvænt úrslit litu dagsins ljós, enda orðið bjart frameftir kvöldi.

Jón Þorvaldsson úr Goðum kom í heimsókn til hrista af sér slenið og velgja öðrum þátttakendum undir uggum í leiðinni eftir bestu getu. Ekki verður annað sagt en að  honum hafi tekist það bærilega með smáheppni að vísu, en ekki er spurt að vopnaviðskiptum heldur leikslokum.  Hann kom sjálfum sér á óvart með því að vinna mótið með 9.5 vinningi af 11 mögulegum, rétt á undan Jóni Þ. Þór sem kom næstur með 9 vinninga.  Gunnar Gunnarsson varð þriðji með aðeins 7.5 vinninga og  hefur oft gengið betur.  Síðan komu nokkrir aðrir í hnapp eins og oft vill verða raunin á þegar allir geta unnið alla og teflt er fyrir fegurðina.

Heilabrot eru heilsubót:  Ekki verður með sanni sagt að skákmenn sitji bara á rassinum og geri ekki neitt þegar taflmennska er annars vegar eins og oft er haldið fram.   Alls voru tefldar 198 skákir þetta kvöldið að jafnaði 50 leikir hver eða um 10.000 leikir alls.  Það er því deginum ljósara að skákiðkun er  bæði andleg og líkamleg heilsurækt. Það reynir mikið á jafnt  andlegt og líkamlegt atgervi að úthugsa alla þess leiki og síðan að hreyfa taflmennina tíu þúsund sinnum á stuttum tíma 

Að venju gerðu menn sér alls konar kruðerí að góðu og snæddu síðan Hróa Hattar pizzur með góðri list í taflhléi og ræddu um daginn og veginn eins og sjá má á meðf. myndum.

Myndaalbúm (ESE)

 

 

 

Íslandsmótið í skák hefst í Kópavogi á morgun

Íslandsmótið í skák hefst á morgun en mótið fer fram í glæsilegum húsakynnum í Stúkunni á Kópavogsvelli.   Mótið er geysisterkt, fjórir stórmeistarar taka þátt, en meðalstig eru 2398 skákstig og er mótið það sterkasta á þessari öld.  Umferðir hefjast kl. 16 á daginn.   Ármann Kr. Ólafsson, bæjarstjóri í Kópavogi, setur mótið og leikur fyrsta leik þess.

Stefnt er að skákskýringum alla daga sem verða meðal annars í umsjón Helga Ólafssonar og Ingvars Þór Jóhannessonar. 

Á skákstað verður líka góð aðstaða fyrir áhorfendur þar sem hægt verður að fylgjast með skákunum á skjá, grípa í tafl og þiggja kaffiveitingar.  Einnig er hægt er að nálgast skákirnar á netinu en þar verða þær sýndar með 30 mínútna seinkun.

Þetta er í annað skiptið sem mótið fer fram í Kópavogi.  Mótið fór þar fram árið 2000 og þá varð Jón Viktor Gunnarsson Íslandsmeistari.  

Hannes Hlífar Stefánsson, ellefufaldur Íslandsmeistari í skák, og Henrik Danielsen, Íslandsmeistari 2009, eru einu keppendurnir nú sem áður hafa orðið Íslandsmeistarar. 

Hannes hefur sigrað í 11 síðustu skipti sem hann hefur á annað borð tekið þátt eða frá árinu 1998 en hann tók ekki þátt árin 2000, 2009 og 2011.  Núverandi Íslandsmeistari í skák er Héðinn Steingrímsson sem ekki tekur þátt í ár.  

Mikið verður um að vera í Kópavogi á meðan mótinu fer fram.  Meðal annars verður Kópavogsmótið í skólaskák haldið í Salaskóla 17. apríl, Íslandsmótið framhaldsskóla fer fram í Stúkunni 18. apríl og einnig er stefnt að keppni á milli "eldri skákmanna" úr Taflfélagi Kópavogs og ungra og efnilegra skákmanna úr Kópavogi sem eru fjölmargir.  

Keppendalisti mótsins:

1. SM Hannes Hlífar Stefánsson (2531)
2. SM Henrik Danielsen (2504)
3. SM Stefán Kristjánsson (2500)
4. AM Bragi Þorfinnsson (2421)
5. AM Björn Þorfinnsson (2416)
6. SM Þröstur Þórhallsson (2398)
7. FM Sigurbjörn Björnsson (2393)
8. AM Dagur Arngrímsson (2361)
9. AM Guðmundur Kjartansson (2357)
10. Guðmundur Gíslason (2346)
11. FM Davíð Kjartansson (2305)
12. Einar Hjalti Jensson (2245) 

Í fyrstu umferð mætast meðal annars: Henrik-Stefán og Davíð-Hannes.  

• Heimasíða mótsins
• Chess-Results
• "Beinar útsendingar" (hálftíma seinkun)

Hannes Hlífar gengur í Víkingaklúbbinn

Stórmeistarinn Hannes Hlífar Stefánsson (2531) einn sigursælasti íslenski skákmaður síðustu ára gekk i dag til liðs við Víkingaklúbbinn. Öþarfi er að telja upp öll afrek Hannesar á síðustu árum, en hann er margfaldur Íslandsmeistari og hefur jafnframt unnið Reykjavíkurskákmótið oftar en nokkur annar skákmaður. Hannes á eftir að styrkja Víkingaklúbbinn gríðarlega í baráttunni í efstu deild á Íslandsmóti skákfélaga.

Landsmótið í skólaskák fer fram í Stórutjarnaskóla í Þingeyjarsveit

Landsmótið í skólaskák fer fram í Stórutjarnaskóla í Þingeyjarsveit dagana 3.-6. maí nk.   Þetta er í fyrsta skipti að mótið fer fram í Þingeyjarsveit og jafnframt er þetta fyrsta mótið undir stjórn nýs landsmótsstjóra, Ingibjörgu Eddu Birgisdóttur sem tekur við Páli Sigurðssyni sem hefur skilað af sér af sér afar farsælu starfi.  

Þessa dagana eru hin ýmsu skólamót að fara fram og á næstu vikum skýrist hverjir eiga keppnisrétt á Landsmótið.

 

 

Íslandsmót framhaldsskólasveita fer fram 18. apríl

Íslandsmót framhaldsskólasveita 2012 fer fram miðvikudagskvöldið 18. apríl (athuga breytt dagsetning) klukkan 20:00.  Teflt verður í Stúkunni í Kópavogi (Við Kópavogsvöll). Sama stað og Landsliðsflokkur Skákþings Íslands fer fram.

Fjórir skákmenn skulu vera í hverri sveit og 0-4 til vara.  Tefldar verða 6-9 umferðir með 10 mínútna umhugsunartíma. Skráning á netfangið; [e-mail]

Hafnarfjarðarmót í skólaskák

Hafnarfjarðarmót í skólaskák verður haldið þriðjudaginn 17. apríl, kl 17:00 til 19:00 á Ásvöllum. (Æfingatími skákdeildar Hauka, ath. tvöfaldur tími)

Haldin verða 2 mót samtímis.

• 1.-7. bekkur
• 8.-10. bekkur

Umhugsunartími er 7-10 mín á skák og hefst taflið stundvíslega kl 17:00.
Tefldar verða 7 umferðir skv. Svissnesku kerfi.

Mikilvægt að fá send nöfn keppenda fyrir hádegi Þriðjudaginn 17 april.
Fullt nafn - bekkur - skóli - sendist á [e-mail]

Hver skóli má senda hámark 6 keppendur í hvern flokk. (ath undanskildir eru sérstaklega krakkar sem stunda reglulegar æfingar hjá Skákdeild Hauka, en athugið að mótið er yfir báða æfingatímana.)

Efstu 2 úr flokknum 8.-10. bekkur komast á kjördæmismót Reykjaneskjördæmis hins forna.
Efstu 2 úr flokknum 1.-7. bekkur komast á kjördæmismót Reykjaneskjördæmis hins forna.

Veitt verða bikar, silfur og brons í hvorum flokki.

sjá má reglur mótsins með því að smella á þennan hlekk.
http://www.skaksamband.is/?c=webpage&id=244

 

Þorvarður efstur öðlinga

Þorvarður Fannar Ólafsson (2175) er efstur með fullt hús á Skákmóti öðlinga að lokinni þriðju umferð mótsins sem fram fór í kvöld eftir sigur á Magnús Pálma Örnólfssyni (2175).  Bjarni Hjartarson (2038) og Sigurður Daði Sigfússon (2346) eru í 2.-3. sæti með 2,5 vinning.  Skák Vignis Bjarnasonar (1828) og Þór Valtýssonar (1973) er frestað fram á mánudagskvöld og pörun 4. umferðar ekki væntanleg fyrr en að henni lokinni.

Úrslit 3. umferðar má finna hér og stöðu mótsins má finna hér. 

• Heimasíða mótsins 
• Chess-Results

 

Björn Þorfinnsson gengur í Víkingaklúbbinn

Alþjóðlegi meistarinn Björn Þorfinnsson (2416) gekk í kvöld í raðir Víkingaklúbbsins. Björn verður klúbbnum gífurlegur liðstyrkur fyrir átökin í efstu deild næsta keppnistímabil, en Björn var áður félagsmaður í Taflfélagi Helli og hefur auk þess unnið gott starf fyrir skákhreyfinguna.  Meðal annars var hann forseti Skáksambands Íslands en hann tók við embættinu í maí 2008 af Guðfríði Lilju Grétarsdóttur.

Kópavogsmótið í skólaskák

Kópavogsmótið í skólaskák verður í Salaskóla þann 17. apríl kl 17:00 til 20:00. Hugmyndin er að halda þrjú mót samtímis.

• 1.-4. bekkur
• 1.-7. bekkur
• 8.-10. bekkur

Umhugsunartími er 12 mín á skák og hefst taflið stundvíslega kl 17:00.

Tefldar verða 7 umferðir skv. Monrad kerfi.

Mikilvægt að fá send nöfn keppenda fyrir hádegi mánudaginn 16. apríl.  

Fullt nafn -  bekkur -  skóli  -  sendist á [e-mail]

 

 

Hver skóli má senda hámark 12 keppendur í hvern flokk.

Efstu 2 úr flokknum 8.-10. bekk komast á kjördæmismót Reykjaneskjördæmis hins forna.

Efstu 2 úr flokknum 1.-.7. bekk komast á kjördæmismót Reykjaneskjördæmis hins forna.

Þeir krakkar sem eru í 1. til 4. bekk geta fengið að keppa í flokkinum 1.-7. bekk ef þeir telja sig eiga erindi í baráttuna um 2 efstu sætin þar, sem gefa rétt til keppni á kjördæmismeistarmótinu í flokki 1.-7. bekk sem verður síðar í apríl-mánuði.

Þetta er ekki alveg í anda reglugerðarinnar um skólaskák en alveg tilraunarinnar virði að vera með sérstakan flokk fyrir þau yngstu.

Unglingar úr Salaskóla munu selja veitingar meðan á keppni stendur.

Veitt verða gull silfur og bros í hverjum flokki að auki er farandbikar fyrir efsta sætið.