Skák.is

Bloggfærslur mánaðarins, apríl 2012

15.4.2012 | 14:50

Fréttabréf Krakkaskákar

Krakkaskák.is er byrjað með fréttabréf sem kemur út mánaðarlega og er ætlað skákkennurum og foreldrum. Fyrsta fréttabréfið má sjá á http://us4.campaign-archive2.com/?u=a844511018943881a92bf3c10&id=7bb061ef73. Það er auðvelt að gerast áskrifandi að bréfinu á heimsíðunni krakkaskák.is.

Heimasíða Krakkaskákar

Spil og leikir | Breytt s.d. kl. 15:30 | Slóð | Facebook | Athugasemdir (0)

15.4.2012 | 12:10

Héðinn með sigur í lokaumferð Bundesligunnar

Héðinn Steingrímsson (2562) vann slóvakíska stórmeistarann Peter Michalik (2529) í 15. og síðustu umferð þýsku deildakeppninnar (Bundesligunnar) í dag. Héðni gekk vel í keppninni. Hann hlaut 7 vinninga í 13 skákum og tefldi 6 þessara skáka á fyrsta borði.

Árangur Héðins í keppninni samsvaraði 2643 skákstigum og hækkar hann um 14 stig fyrir frammistöðu sína.

Spil og leikir | Slóð | Facebook | Athugasemdir (0)

15.4.2012 | 07:00

Kópavogsmótið í skólaskák

Kópavogsmótið í skólaskák verður í Salaskóla þann 17. apríl kl 17:00 til 20:00. Hugmyndin er að halda þrjú mót samtímis.

1.-4. bekkur
1.-7. bekkur
8.-10. bekkur

Umhugsunartími er 12 mín á skák og hefst taflið stundvíslega kl 17:00.

Tefldar verða 7 umferðir skv. Monrad kerfi.

Mikilvægt að fá send nöfn keppenda fyrir hádegi mánudaginn 16. apríl.

Fullt nafn - bekkur - skóli - sendist á tomas@rasmus.is

Hver skóli má senda hámark 12 keppendur í hvern flokk.

Efstu 2 úr flokknum 8.-10. bekk komast á kjördæmismót Reykjaneskjördæmis hins forna.

Efstu 2 úr flokknum 1.-.7. bekk komast á kjördæmismót Reykjaneskjördæmis hins forna.

Þeir krakkar sem eru í 1. til 4. bekk geta fengið að keppa í flokkinum 1.-7. bekk ef þeir telja sig eiga erindi í baráttuna um 2 efstu sætin þar, sem gefa rétt til keppni á kjördæmismeistarmótinu í flokki 1.-7. bekk sem verður síðar í apríl-mánuði.

Þetta er ekki alveg í anda reglugerðarinnar um skólaskák en alveg tilraunarinnar virði að vera með sérstakan flokk fyrir þau yngstu.

Unglingar úr Salaskóla munu selja veitingar meðan á keppni stendur.

Veitt verða gull silfur og bros í hverjum flokki að auki er farandbikar fyrir efsta sætið.

Spil og leikir | Breytt 12.4.2012 kl. 08:45 | Slóð | Facebook | Athugasemdir (0)

14.4.2012 | 21:13

Sigurbjörn efstur á Íslandsmótinu í skák - Þröstur vann Hannes

FIDE-meistarinn Sigurbjörn Björnsson (2393) er efstur með fullt hús að lokinni 2. umferð Íslandsmótsins í skák sem fram fór í dag í Stúkunni á Kópavogsvelli. Sigurbjörn vann Dag Arngrímsson (2361) í dag. Fimm skákmenn koma humátt á eftir Sigurbirni með 1,5 vinning, þar á meðal stórmeistarinn Þröstur Þórhallsson (2398) sem vann hinn ellefufalda Íslandsmeistara Hannes Hlífar Stefánsson (2531) í stórskemmtilegri skák. Aðrir með 1,5 vinning eru stórmeistararnir Stefán Kristjánsson (2500) og Henrik Danielsen (2504) og alþjóðlegu meistararnir og bræðurnir Bragi (2421) og Björn (2416) Þorfinnssynir.

Afar fjörlegra er teflt á Íslandsmótinu og ekkert um stutt jafntefli! Þriðja umferð fer fram á morgun. Og þá vantar ekki stórviðureignirnar því þá mætast meðal annars: Sigurbjörn-Hannes, Henrik-Björn og Þröstur-Bragi.

Rétt er að minna á að það eru afar góðar aðstæður á skákstað og auðvelt að fylgjast með gangi mála þar. Þar er skákunum varpað upp á skjá þar sem sterkustu skákmenn þjóðarinnar af þeim sem ekki taka þátt spá í spilin!

Úrslit 2. umferðar:

Björn Þorfinnsson - Guðmundur Kjartansson 0,5-0,5
Dagur Arngrímsson - Sigurbjörn Björnsson 0-1
Hannes Hlífar Stefánsson - Þröstur Þórhallsson 0-1
Bragi Þorfinnsson - Davíð Kjartansson 1-0
Stefán Kristjánsson - Einar Hjalti Jensson 1-0
Guðmundur Gíslason - Henrik Danielsen 0-1

Staðan:

1. FM Sigurbjörn Björnsson (2393) 2 v.
2.-6. SM Stefán Kristjánsson (2500), SM Henrik Danielsen (2504), SM Þröstur Þórhallsson (2398), Bragi Þorfinnsson (2421) og Björn Þorfinnsson (2416) 1,5 v.
7.-11. Einar Hjalti Jensson (2245), AM Guðmundur Kjartansson (2357), AM Dagur Arngrímsson (2361), FM Davíð Kjartansson (2305) og SM Hannes Hlífar Stefánsson (2531) 0,5 v.
12. Guðmundur Gíslason (2346) 0 v.

Spil og leikir | Breytt s.d. kl. 21:37 | Slóð | Facebook | Athugasemdir (0)

14.4.2012 | 21:12

Skáklist án landamæra á þriðjudag

Þar sem List án landamæra hefst í vikunni tekur Skákfélag Vinjar forskot á sæluna, þriðjudaginn 17. apríl, og heldur mót, „skáklist án landamæra" í Læk, sem er athvarf Rauða kross Íslands fyrir fólk með geðraskanir í Hafnarfirði. Mótið hefst klukkan 13:15.

Þetta er fyrsta alvörumótið sem haldið er í Læk, sem er við Hörðuvelli 1, alveg við lækinn og fyrir framan Lækjarskóla.

Tefldar verða 7 umferðir með 7 mínútna umhugsunartíma og boðið verður upp á kaffiveitingar í hléi.

Bókavinningar fyrir efstu sætin og happadrætti, allir eiga séns.

Bara mæta tímanlega og skrá sig. Síminn í Læk er 566-8600.

Nánar um athvarfið: http://redcross.is/page/rki_hafnarfjardardeild_laekur

Spil og leikir | Breytt 15.4.2012 kl. 06:58 | Slóð | Facebook | Athugasemdir (0)

14.4.2012 | 17:03

Íslandsmótið í skák: Beinar útsendingar frá 2. umferð

Beinar útsendingar frá 2. umferð Íslandsmótsins í skák sem fram fer í Stúkunni á Kópavogsvelli eru hafnar. Í umferð dagsins mætast m.a. stórmeistararnir Hannes Hlífar Stefánsson og Þröstur Þórhalsson. Forystusauðirnir Björn Þorfinnsson og Sigurbjörn Björnsson mæta Guðmundi Kjartanssyni og Degi Arngrímsson.

Eðalaðstæður eru skákstað og hægt að fylgjast með skákunum á tjaldi.

Beinar útsendingar úr 2. umferð má nálgast hér.

Spil og leikir | Slóð | Facebook | Athugasemdir (0)

14.4.2012 | 15:46

Sundskák í Kópavogi!

Landsliðsflokkur í skák fer nú fram í Kópavogi og í tengslum við hann fara fram ýmsir skemmtilegir skákviðburðir. Í morgun var sundlaugum Kópavogs færð að gjöf skáksundlaugarsett frá Skákakademíu Reykjavíkur.

Félagarnir úr skáksveit Salaskóla, þeir Róbert Örn Vigfússon og Hilmir Freyr Heimisson, vöknuðu snemma í morgun. Þeir höfðu fengið það verkefni að vígja skáksundlaugarsettin.

Í Salalaug tók Guðmundur forstöðumaður á móti köppunum og fylgdarliði þeirra. Guðmundur sagðist hafa sem ungur piltur fylgst vel með einvígi Friðriks og Larsens í Sjómannaskólanum. Drengirnir tefldu snarpa skák í Sikileyjarvörn sem endaði með sigri Hilmis.

Svo var haldið í Sundlaug Kópavogs. Þar var vel tekið á móti öllu fylgdarliðinu sem fékk fært kaffi í pottinn. Landsliðsflokkurinn var svo vel kynntur í hátalarakerfinu. Einhver galsi var hlaupinn í drengina sem tefldu nú kóngsbragð en aftur sigraði Hilmir eftir snarpa vörn Róberts.

En semsagt; nú skal teflt í sundlaugum Kópavogs.

Myndaalbúm (HJ)

Spil og leikir | Breytt s.d. kl. 17:06 | Slóð | Facebook | Athugasemdir (0)

14.4.2012 | 15:25

Jafntefli hjá Héðni gegn Zherebukh

Héðinn Steingrímsson (2562) gerði jafntefli við úkraínska stórmeistarann Yaroslav Zherebukh (2642) í 14. umferð þýsku deildakeppninnar sem fór í dag. Í lokaumferðinni, sem fram fer á morgun og hefst kl. 8, teflir Héðinn að öllum líkindum við slóvakíska stórmeistarann Peter Michalik (2529).

Spil og leikir | Slóð | Facebook | Athugasemdir (0)

14.4.2012 | 12:30

Héðinn teflir um helgina í þýsku deildakeppninni

Héðinn Steingrímsson (2562) teflir um helgina í þýsku deildakeppninni (Bundesliga). Í 14. og næstsíðustu umferð, sem hófst nú kl. 12, teflir hann við úkraínska stórmeistarann Yaroslav Zherebukh (2642). Héðinn teflir á 2. borði fyrir Hansa Dortmund sem harðri botnbaráttu. Þeir mæta í dag sveit Hamborgar.

Spil og leikir | Slóð | Facebook | Athugasemdir (0)

13.4.2012 | 21:22

Íslandsmótið í skák: Birnir unnu Guðmunda

Sigurbjörn Björnsson (2393) og Björn Þorfinnsson (2416) byrjuðu best allra á Íslandsmótinu í skák sem hófst í dag í Stúkunni á Kópavogsvelli. Björn vann Guðmund Gíslason (2346) en Sigurbjörn vann Guðmund Kjartansson (2357). Öðrum skákum lauk með jafntefli og þar á meðal gerði Davíð Kjartansson (2305) jafntefli við ellefufaldan Íslandsmeistara, Hannes Hlífar Stefánsson (2531).