Frábær skákheimsókn til Grænlands: Skákgyðjan hefur numið land í Nuuk

,,Skák er svo kúl!" sagði grænlensk grunnskólastúlka, eftir að hafa fengið að kynnast undraheimi taflistarinnar. Liðsmenn Hróksins, Henrik Danielsen og Hrafn Jökulsson, heimsóttu Nuuk, höfuðstað Grænlands, fóru í nokkra grunnskóla, leituðu uppi skákklúbb heimamanna, voru boðnir í fjölsmiðju fyrir unglinga og hittu borgarstjórann.

Ferðin var í alla stóði stórkostleg og Henrik sýndi enn og aftur hversu vel hann nær til krakka -- hvort sem þeir eru í Grænlandi, Íslandi, Færeyjum, Danmörku eða Afríku.

Heimamenn tóku liðsmönnum Hróksins tveim höndum. Hjónin Benedikte og Guðmundur Þorsteinsson höfðu skipulagt heimsóknina, en Benedikte var einmitt manneskjan sem átti allan heiður af skipulagningu sögufrægu heimsóknarinnar til Suður-Grænlands 2003, þegar skáklandnámið hófst hjá okkar góðu nágrönnum og vinum.

Skólastjórnendur og kennarar í Nuuk voru ánægðir með heimsóknir hinna íslensku sendiboða, og bæjarstjórinn, Asii Chemnitz Narup, tók afar vel í hugmyndir um að öll börn í Nuuk fengju að kynnast skákíþóttinni. Bæjarstjórinn hafði líka heyrt af jákvæðum áhrifum skákkunnáttu á námsárangur og félagslega færni barna, og hét fullum stuðningi við áframhaldandi skáklandnám.

Draumur Hróksmanna er að skipuleggja stórt alþjóðlegt atskákmót í Nuuk á næsta ári, í minningu Jonathans Motzfeldts, hins  mikla landsföður  leiðtoga Grænlendinga, sem einmitt tók þátt í fyrsta mótinu í Qaqortoq 2003, ásamt kempum á borð við Friðrik Ólafsson, Jóhann Hjartarson, Sævar Bjarnason, Ivan Sokolov, Reginu Pokorna, Predrag Nikolic, Róbert Lagerman, Stefán Kristjánjsson, Tomas Oral, Nick de Firmian -- og ótal íslenska og grænlenska skákáhugamenn.

Síðasta áratuginn hafa Hróksliðar einbeitt sér að starfinu á Austur-Grænlandi og haldið ótal skákhátíðir í Tasiilaq og litlu þorpunum þar um kring, auk þess að fara um hverja páska til  Ittoqqortoormiit, sem er trúlega einangraðasta þorp á norðurhveli.

Drifkrafturinn á bak við landnám íslenskra skákmanna á Grænlandi eru einkunnarorð FIDE, alþjóðasambands skákmanna: Við erum ein fjölskylda.

Við trúum því líka að grannþjóðirnar í norðri eigi að hafa sem mesta samvinnu, og besta leiðin til þess er vitaskuld að ná til ungu kynslóðarinnar.

Það er ekki sjálfsagt að fara til Grænlands á jólaföstunni og færa gleði skákarinnar til okkar góðu granna. Henrik Danielsen sýndi enn einu sinni að hann er alltaf tilbúinn að leggja sitt af mörkum. Verkfræðifyrirtækið Mannvit hjálpaði okkur mikið, sem og okkar góðu vinir hjá Flugfélagi Íslands. Forlagið, Henson, Sögur útgáfa og Nói Sírus gerðu okkur kleift að færa börnunum margar góðar gjafir. Skáksambandið, Skákakademían og Skákfélag Vinjar létu taflbúnað af mörkum -- svo nú er hægt að tefla á mörgum borðum í Nuuk.

Nú er bara næsta mál á dagskrá: Að fá sem flesta íslenska skákáhugamenn til að taka þátt í Minningarmóti Jonathans Motzfeldts í Nuuk 2013.

Í millitíðinni gæti ég vel trúað því að Arnar Valgeirsson og fleiri góðir vinir skipuleggi enn eina skákhátíð á 70. breiddargráðu, því börnin í Ittoqqortoormiit vilja sína skák um páskana og engar refjar.

Djúpar þakkir til allra sem hjálpuðu við að gera þetta ævintýri að veruleika!

 

Myndir frá Nuuk  HJ

Enn fleiri skemmtilegar myndir frá Nuuk

Facebook-síðan: Skák á Grænlandi

Fjögur jafntefli í London

Öllum skákum sjöundu umferðar London Chess Classic lauk með jafntefli í kvöld. Þar á meðal gerði Carlsen (2848) jafntefli við Nakamura (2760). Carlsen, sem hefur 5 stiga forystu á Kramnik (2795), situr yfir á morgun.

Áttunda og næstsíðasta umferð fer fram á morgun. Þá mætast meðal Kramnik-Jones og Aronian-Adams.

Níu skákmenn taka þátt í mótinu og því situr alltaf einn yfir. Viðkomandi sér um skákskýringar í þeirri umferð. Veitt eru 3 stig fyrir sigur og 1 fyrir jafntefli.

Birkir Karl Sigurðsson (1725) gerði sitt sjötta jafntefli í átta skákum í opna flokknum. Hann hefur 3 vinninga en hefur teflt upp fyrir sig allt mótið.

Úrslit 7. umferðar:

Gawain Jones	½-½	Levon Aronian
Mickey Adams	½-½	Luke McShane
Judit Polgar	½-½	Vishy Anand
Hikaru Nakamura	½-½	Magnus Carlsen

 

 

Staðan:

• 1. Carlsen (2848) 17/7
• 2. Kramnik (2795) 12/6
• 3. Adams (2710) 11/6
• 4. Nakamura (2760) 9/6
• 5. Anand (2775) 7/6
• 6. Aronian (2815) 6/6
• 7. McShane (2713) 5/6
• 8. Jones (2644) 3/7
• 9. Polgar (2705) 2/6

• Heimasíða mótsins
• Beinar útsendingar (hefjast almennt kl. 14)

Friðrik tapaði fyrir Evrópumeistaranum í dag

Friðrik Ólafsson (2419), sem teflir nú í keppni heldri skákmanna gegn skákkonunum tapaði fyrir Evrópumeistara kvenna og einum ólympíumeistara Rússa Valentina Gunina (2514) í fyrstu umferð, sem fram fór í dag í Podebredy í Tékklandi í dag. Heldri skákmönnum gegn reyndar illa í dag Romanishin (2530) sá eini sem náði jafntefli og lokatölur fyrstu umferðar því 0,5-3,5 konunum í vil.

Í 2. umferð, sem fram fer á morgun, teflir Friðrik við tékknesku skákkonuna Kristyna Havlikova (2310), sem er næststigahæsta skákkona Tékklands.

Í liði heldri skákmanna eru auk Friðriks þeir Romanish (2530), Hort (2455) og Uhlmann (2310) en kvennaliðið skipa þær Gunina (2514),  Sachdev (2400), Kaslinskaya (2344) og Havlikova (2310).

Tefld er tvöföld umferð, þ.e. allir heldri skákmennirnir tefla tvisvar við hverja skákkonu.

• Heimasíða mótsins 
• Beinar útsendingar (hefjast almennt kl. 14).

Jólahraðskákmót Æsa

Æsir halda sitt Jólahraðskákmót þriðjudaginn 11. desember og hefst það kl. 13. Mótstaður er Stangarhylur 4. Tefldar verða níu umferðir með 7 mín. umh.t.

Þrír efstu fá verðlaunapeninga.

Síðan verður dregið í nokkurskonar happdrætti, þar sem allir þátttakendur fá einhvern vinning óháð því hvað marga vinninga þeir fá í mótinu.

Allir skákmenn 60+ hjartanlega velkomnir.

Friðrik teflir við Evrópumeistara kvenna í dag - bein útsending að hefjast

Í dag í Podebredy í Tékklandi hefst skákmót þar sem heldri skákmenn mæta skákkonum. Í liði heldri skákmanna er sjálfur Friðrik Ólafsson, sem þessa dagana, virðist tefla meira en flestir innlendir kollegar hans í stórmeistarastétt þrátt fyrir að verða 78 ára í byrjun næsta árs!

Í liði heldri skákmenna eru auk Friðriks Tékkinn Vlastimil Hort (2455), Þjóðverjinn Wolgang Uhlmann (2319) og Oleg Romanishin (2530). Upphaflega átti Korchnoi að tefla en hann forfallaðist og tók Uhlmann hans sæti.

Kvennaliðið er sterkt. Þar ber hæst, Evrópumeistara kvenna og ólympíumeistarann Valentina Gunina (2514), sem Friðrik mætir henni í fyrstu umferð sem hefst nú kl. 14.

Einnig tekur indverska skákdrottningin Tania Sachdev (2400), sem hefur verið fastagestur á Reykjavíkurskákmótinu, rússneska skákkonan Alina Kaslinskaya (2344), sem var um tíma yngsti stórmeistari kvenna, aðeins 15 ára. Alina, sem er unnusta Alexander Ipatov, heimsmeistara 20 ára og yngri, en þau munu báði taka þátt í Reykjavíkurskákmótinu. Minnst þekkti keppandinn er tékkneska skákkonan Kristyna Havlikova (2310).

Tefld er tvöföld umferð, þ.e. allir heldri skákmennirnir tefla tvisvar við hverja skákkonu.

• Heimasíða mótsins 
• Beinar útsendingar (hefjast almennt kl. 14).

MAGNUS CARLSEN

Judit Polgar (2705) var lítil hindrun fyrir Magnus Carlsen (2848) í sjöttu umferð London Chess Classis sem fram fór í gær. Magnus heldur því áfram ótrúlegri sigurgöngu sinni. Hann hefur nú 16 stig (5,5 vinning) og er langefstur. Sem fyrr hækkar hann á tifandi stigalistanum og hefur nú þar 2864 skákstig og þegar ljóst að á áramótalistanum verði hann stigahæsti skákmaður allra tíma, þótt hann myndi báðum skákunum sem etftir eru.

Aronian (2815) og Kramnik (2795) gerðu jafntefli. Adams (2710) vann Anand (2775) sem tapar yfirleitt ekki mörgum skákum og McShane (2713) lagði Jones (2644).

Í sjöundu, sem fram fer í dag og hefst nú kl. 14 mætast meðal annars Nakamura-Carlsen. Vinnur Carlsen enn? Verður hér á ferðinni einn besti árangur sögunnar?

Níu skákmenn taka þátt í mótinu og því situr alltaf einn yfir. Viðkomandi sér um skákskýringar í þeirri umferð. Veitt eru 3 stig fyrir sigur og 1 fyrir jafntefli.

Birkir Karl Sigurðsson (1725) teflir í FIDE-Open, sem fram fer samhliða. Eftir 7 umferðir hefur Birkir Karl 2,5 vinning en hann hefur hins vegar teflt upp fyrir sig allt mótið. Hann hefur hins vegar ekki sigraði skák en hefur 2 umferðir til að breyta því!

Úrslit 6. umferðar:

Magnus Carlsen	1-0	Judit Polgar
Vishy Anand	0-1	Michael Adams
Luke McShane	1-0	Gawain Jones
Levon Aronian	½-½	Vladimir Kramnik

Staðan:

• 1. Carlsen (2848) 16/6
• 2. Kramnik (2795) 12/6
• 3. Adams (2710) 10/5
• 4. Nakamura (2760) 8/5
• 5. Anand (2775) 6/5
• 6. Aronian (2815) 5/5
• 7. McShane (2713) 4/5
• 8. Jones (2644) 2/6
• 9. Polgar (2705) 1/5

• Heimasíða mótsins
• Beinar útsendingar (hefjast almennt kl. 14)

Fjölmenn Fjölnisæfing eftir flottan árangur á jólaskákmóti SFS og TR

Eftir frábæra frammistöðu Grafarvogskrakka á jólaskákmóti SFS og TR um síðustu helgi,  þar sem sveitir Rimaskóla og Kelduskóla urður í 4 af 5 efstu sætum mótsins, þá var það viðbúið að fjölmennt yrði á næstu æfingu skákdeildarinnar. Sú varð raunin því að tæplega 40 krakkar mættu á aldrinum 7 - 15 ára.

Skipt var upp í þrjá hópa. Tverir hópar fóru í kennslu en fjölmennasti flokkurinn tók þátt í 5 skáka móti. Það voru þau Sigríður Björg, Oliver Aron og Jón Trausti sem sáu um kennsluna og gekk hún mjög vel.

Rúmlega 20 krakkar tóku þátt í skákmótinu sem Rimaskólakrakkarnir Kristófer Jóel og Nansý unnu með 4,5 vinninga. Auk þeirra lentu í verðlaunasætum þeir Kristófer Halldór,  Jóhann Arnar, Joshua, Mikolaj og Kacper frá Rimaskóla, Hilmir úr Kelduskóla og Þorsteinn úr Sæmundarskóla, allir með góða æfingasókn hjá skákdeildinni.

Nettó, Ásbjörn ehf og Nói - Síríus sáu um að gefa veitingar og verðlaun á æfinguna. Í lokin voru tveir áhugaverðir happadrættiasvinningar dregnir út úr potti allra þátttakenda, 16" pítsur frá Pizzunni Hverafold.

Síðasta æfing skákdeildar Fjölnis á þessu ári verður næsta laugardag, 15. des. í Rimaskóla kl. 11:00. Þar með lýkur árangursríku starfsári deildarinnar hvað varðar fjölda þátttakenda og glæsilegra sigra.

Elsa María sigraði á hraðkvöldi hjá Helli

Hraðkvöldi Hellis sem fram fór 3. desember sl var jafnt og spennandi eins og það næsta á undan. Í þetta sinn voru það Elsa María Kristínardóttir og Jóhanna Björg Jóhannsdóttir sem voru í aðalhlutverkum. Þær enduðu efstar og jafnar með 6v og þurfti stigaútreikning til að skera úr um sigurvegarann og þar hafði Elsa María betur þegar hún  tryggði sér sigurinn í öðrum útreikningi. Þær voru einnig jafnar og efstar fyrir síðustu umferð en þá var Jóhanna efst á stigum þannig að þær höfðu sætaskipti á stigum í lokaumferðinni. Þriðji varð svo Örn Leó Jóhannsson með 5v. Elsa María vandaði svo í úrdrættinum og dró Jón Úlfljótsson.  

Skákkvöld í Hellisheimilinu eru þá komin í smá jólafrí en næst verður bikarmót Hellis föstudaginn 28. desember og á nýju ári verður atkvöld mánudaginn 7. janúar og síðan hraðkvöld á hverjum mánudegi fram að Reykjavíkurskákmótinu.

Lokastaðan á hraðkvöldinu:

Röð   Nafn                        Vinningar M-Buch. Buch. Progr.

 1-2  Elsa María Kristínardóttir,      6      19.5  28.0   24.0
      Jóhanna Björg Jóhannsdóttir,     6      19.5  25.5   26.0
  3   Örn Leó Jóhannsson,              5      19.0  27.5   17.0
 4-5  Kristófer Ómarsson,              4      21.0  29.0   18.0
      Jón Úlfljótsson,                 4      19.0  27.0   16.5
  6   Vigfús Ó. Vigfússon,             3.5    19.0  25.0   14.0
 7-9  Finnur Kr. Finnsson,             3      16.5  22.5   11.0
      Gunnar Nikulásson,               3      15.5  21.5   10.0
      Kristján Halldórsson,            3      14.5  19.5   11.0
 10   Hermann Ragnarsson,              2.5    19.0  25.0   11.5
 11   Björgvin Kristbergsson,          2      16.5  20.5    9.0
 12   Pétur Jóhannesson,               0      15.0  23.0    0.0

Forgjafarmót á morgun sunnudag hjá SA

Enn brydda Skákfélagsmenn upp á nýjungum og vona að í hjarta sínu að það veki áhuga þeirra sem hafa gaman af manntafli.

Nú á sunnudag verður efnt til forgjafarmóts með þeim hætti að forgjöfin gefst á klukkunni (áhald sem var samviskusamlega kynnt hér fyrir nokkrum færslum).

Aðferðin er þessi:

Samanlagður umhugsunartími er 14 mínútur, sem þýðir að báðir hafa 7 mínútur ef þeir eru jafnsettir, en eftir því sem stigamunur eykst er umhugsunartímanum breytt þeim í hag sem er stigalægri. Svona verður þetta gert:

Stigamunur                        Tímaskipting í mínútum

0-150                                              7-7

151-300                                          8-6

301-450                                          9-5

451-600                                        10-4

601 og meiri munur                       11-3

Stuðst verður við íslenski skákstig og reiknast stigalausir með 1500 stig, ef þeir mæta.  Menn eru beðnir um að brýna kuta sína hóflega og mæta tímanlega. Helst er búist við að 7 umferðir verði tefldar, ef þær verða fleiri ná þær í mesta lagi 9.  Í það minnsta vonumst við eftir að fá sem flesta og nú fá hinir stigalægri einstætt tækifæri til að klekkja á hinum skelfilegu stigamönnum í röðum félagsins.

Mótið hefst kl. 13 á sunnudag og aðgangseyrir er að venju kr. 500.

Gallerý Skák: Teflt í anda Larsen

Friðsöm átaka taflmennska einkenndi Minningarskákvöldið um hinn goðsagnakennda skákmeistara og Íslandsvin BENT LARSEN, sem fram fór í Gallerý Skák í gærkvöldi með nokkrum hátíðarblæ.  Hins fallna meistara var minnst í upphafi mótsins, höfð stutt þögn, kveikt á kertum í minningu hans og gömul skákklukka sem hann notaði gegn Boris Spassky í heimahúsi á sinni tíð látin ganga út.

Larsen sem heimsótti Ísland oftar en tölu verður komið á lagði drjúgan skerf til íslensks skáklífs og menningar. Honum var veitt Fálkaorðan í þakkar- og virðingarskyni af forseta Íslands árið 2003.  Viðureignir hans við okkar mann Friðrik Ólafsson „besta áhugaskákmann heims að mati Larsens" eru eldri skákmönnum mjög minnisstæðar enda ófáir hildarleikirnir sem þeir háðu með sér.  Einvígi þeirra um Norðurlandameistaratitilinn í skák í Sjómannaskólanum 1956 vakti þjóðarathygli og æ síðar þegar þeir áttust við hér heima og erlendis eða í sjónvarpi stóð þjóðin jafnan á öndinni af spenningi og metnaði.  

Bent Larsen var einn albesti skákmeistari heims á 7. og 8. áratug liðinnar aldar, vann hvert millisvæðamótið á fætur öðru.  Hann var mikil hugsuður, skemmtilaga orðhagur og afar hress í tilsvörum.   Þegar hann var spurður að því á Hótel Borg  í miðju heimsmeistaraeinvígi Fischers og Spasskys 1972 af Gunnari Finnsyni, þá blaðamanni Vísis,  "Hver væri sterkasti skákmaður heimsins í dag"?  stóð ekki á svarinu, hann benti með þumalfingri á brjóst sér og sagði „Að sjálfsögðu ég"   Hann hafði þó tapað 6-0 fyrir Bobby Fischer árið áður sem frægt varð í Denver, en það var bara hitasvækjunni að kenna.  Þau eru ófá hin hnittnu tilsvör meistara Larsens aðdáendum hans, sem og öllum þeim sem honum kynntust mjög eftirminnilegur maður og stórmeistari.  

Fjölbreyttur og fjölmennur keppendahópur var mættur til heiðra meistarann.  Óskað var eftir því og þung áhersla lögð á að menn tefldu í anda hins mikla skákmanns og helst af þeirri leiftrandi ljóslifandi snilld sem einkenndi skákstíl Larsens heitins.  Þrátt fyrir tilþrifamikla taflmennsku tókst það því miður ekki fyllilega enda vart við að búast. Ýmsir úr hópnum höfðu mætt Larsen í fjöltefli og tveir haft árangur sem erfiði, þeir Gylfi Þórhallsson, sem vann hann á Akureyri og Kristján Stefánsson, KR-ingur sem náði jafntefli við hann í klukkufjölteflinu á loftinu Ísafold hjá Gunna Gunn 1989, því sama og þegar Larsen náði frægu tveggja biskupamáti á M. Pétursson, sem lesendur Extrablaðins tóku fyrir Margeir, en var Magnús V. Pétursson í Jóa Útherja. Reyndar útskýrði Larsen það óbeint í grein sinni því þar segir að ef Pétursson hefði leikið öðru en hann lék í 17. leik hefði legið beint við að þeir hefðu hlutverkaskipti í lífinu, hann gerðist milliríkjadómari í knattspyrnu en Magnús stórmeistari í skák.  Gamansemi og skopskyn Larsens var oft á tíðum óborganlegt.

Norðanmaðurinn geysigóði Gylfi Þórhallsson sýndi gamla Larsens takta í mótinu og var  langefstur fyrir elleftu umferð með aðeins hálfan vinning niður. Hann tapaði hins vegar óvænt í síðustu umferðinni æsilegri skák fyrir Guðfinni R. Kjartanssyni, en vann mótið engu að síður glæsilega með 9.5 vinningi.  Annar skákmaður af norðlenskri rót, Stefán Bergsson, skákæskulýðsleiðtogi, varð í öðru sæti með 8.5 v.  Hinn ótrúlega erni Gunnar Kr. Gunnarson (79) varð þriðji með 8v og Ingimar Jónsson, af Akureyskri rót líka,  jafn honum að vinningum í fjórða sæti.  Því má segja að norðlenskir skákjaxlar  hafi komið, séð og sigrað í þessu minningarmóti um hinn magnaða meistara, sem er fagnaðarefni þeim sem þaðan eru ættaðir.

Þrátt fyrir metnaðarfulla taflmennsku vildu glæstir vinningar stundum ganga gegnum mönnum slysalega úr greipum. Því segir meðf. mótstafla segir ekki alla söguna af mikilfenglegum vopnaviðskiptum heldur einungis tæknilegum leikslokum.

 

 

Þeir „fórnfúsustu" verða stundum að sýna raunverulega fórnfýsi með því axla sæti fyrir neðan miðju í mótum eða jafnvel þá virðingarstöðu að verma neðsta sætið af þegnskap öðrum til yndisauka.

Myndaalbúm (ESE)

ESE - Skákþankar 7.12.2012