Ivanchuk vann í fyrstu umferð Kónga-mótsins - jafntefli hjá Topalov og Caruana

Kóngamótið, "Kings Tournament", hófst í gær í Búkrapest í Rúmeníu.  Fjórir skákmenn taka þátt í mótinu og tefld er tvöföld umferð.  Ivanchuk (2763) vann heimamanninn Nisipeanu (2668) en Topalov (2769) og sigurvegari N1 Reykjavíkurskákmótsins Caruana (2786) gerðu jafntefli.  Mótinu er framhaldið í dag.

• Heimasíða mótsins
• Beinar útsendingar (hefjast 13:30)
• ChessBomb

Júlíus, Sverrir Örn, Halldór og Gylfi efstir á Vetrarmóti öðlinga

Önnur umferð Vetrarmóts öðlinga fór fram í gær.  Júlíus Friðjónsson (2187), Sverrir Örn Björnsson (2154), Halldór Pálsson (2064) og Gylfi Þórhallsson (2156) eru efstir með fullt hús.  Lítið var um óvænt úrslit en helst má nefna að Siguringi Sigurjónsson (1959) gerði jafntefli við stigahæsta keppenda mótsins, Þorvarð F. Ólafsson (2202).   Tveimur skákum var frestað og því liggur pörun 3. umferðar ekki enn fyrir.

Úrslit annarrar umferðar má finna hér. Stöðu mótsins má finna hér.

• Heimasíða TR
• Chess-Results

Dagur vann í fimmtu umferð í Búdapest

Alþjóðlegi meistarinn Dagur Arngrímsson (2368) vann rússneska alþjóðlega meistarann Ernest Kharous (2367) í 5. umferð SM-flokks First Saturday-mótsins sem fram fór í Búdapest í gær. 

Dagur hafði áður tapað þremur skákum í röð svo þetta var langþráður sigur.  Dagur hefur 1,5 vinning og er í 5. sæti og situr yfir í dag.

Sjö skákmenn taka þátt í SM-flokki og eru meðalstigin 2426 skákstig.  Dagur er nr. 5 í stigaröð keppenda.  Tefld er tvöföld umferð, alls 12 skákir.

• Heimasíða mótsins
• Chess-Results

Unglingameistaramót Íslands (20 ára og yngri) hefst á morgun

Unglingameistaramót Íslands 2012 fer fram í Faxafeni 12, Reykjavík dagana 9.- 10. nóvember nk.  Þátttökurétt eiga þeir sem verða 20 ára á almanaksárinu og yngri.

 

Sigurvegari á mótinu hlýtur titilinn "Unglingameistari Íslands 2012" og í verðlaun farseðil - að hámarki kr. 50.000.-  á skákmót erlendis.  Farseðilinn gildir í eitt ár.

Mótið átti að fara fram síðustu helgi en var frestað vegna veðurs. Þeir sem skráðu sig fyrir helgina þurfa ekki að endurskrá sig.    

Umferðatafla:             

Föstudagur 9. nóv.:

kl. 20.00                                  4 atskákir

Laugardagur 10. nóv.:

kl. 17.00                                  3 atskákir

Að móti loknu verður verðlaunaafhending og lokahóf.

Tímamörk:                   25 mín + 10 sek. viðbótartími á hvern leik     

Þátttökugjöld:             kr. 2.000.-

Skráning: http://www.skak.is og [e-mail].

Upplýsingar um þegar skráða keppendur má nálgast hér.  

Íslandsmót 15 ára og yngri fer fram á laugardag og sunnudag

Skákþing Íslands 2012 -  drengja-og telpnameistaramót (15 ára og yngri)

Skákþing Íslands 2012 -   pilta-og stúlknameistaramót (13 ára og yngri)                                                          

Keppni á Skákþingi Íslands 2012 - 15 ára og yngri (fædd 1997 og síðar) og 13 ára og yngri (fædd 1999 og síðar) verður haldið í félagsheimili Taflfélags Reykjavíkur dagana 10. og 11. nóvember nk.  Tefldar verða 9 umferðir eftir monrad kerfi og er umhugsunartími 20 mín. á skák fyrir keppanda.  Teflt verður í einum flokk.

Mótið átti að fara fram síðustu helgi en var frestað vegna veðurs. Þeir sem skráðu sig fyrir helgina þurfa ekki að endurskrá sig.  

Skákstaður: Faxafen 12, Reykjavík

Umferðartaflan:

Laugardagur 10. nóvember      

• kl. 13.30                      1. umferð
• kl. 14.30                      2. umferð
• kl. 15.30                      3. umferð
• kl. 16.30                      4. umferð
• kl. 17.30                      5. umferð

Sunnudagur 11. nóvember       

• kl. 11.00                      6. umferð
• kl. 12.00                      7. umferð
• kl. 13.00                      8. umferð
• kl. 14.00                      9. umferð

                                               

Þetta eru áætlaðar tímasetningar, en hver ný umferð hefst að þeirri fyrri lokinni.

Að því loknu verðlaunaafhending og mótsslit.

Þátttökugjöld: kr. 1.000.- (hámark kr. 1.500.- fyrir fjölskyldu)

Verðlaun:  Verðlaunabikarar fyrir þrjú efstu sætin í hvorum flokki.

Skráning: http://www.skak.is og [e-mail].  Fyrri skráning

Upplýsingar um þegar skráða keppendur má nálgast hér. 

Yfirlýsing frá stjórn SÍ vegna úrskurðar Dómstóls SÍ um kæru Héðins Steingrímssonar

Yfirlýsing frá stjórn SÍ

Dags. 7. nóvember 2012

Dómstóll SÍ felldi úrskurð um mál Héðins Steingrímssonar gegn Skáksambandi Íslands 2. nóvember sl.

Í úrskurðarorðum segir:

Ákvörðun um brottvikningu Héðins Steingrímssonar úr ólympíusveit Íslands í skák 2012 var ekki nægilega rökstudd samkvæmt lögum og reglum Skáksambands Íslands.

Málinu er vísað til Skáksambands Íslands til frekari umfjöllunar.

Stjórn SÍ er gert að taka málið fyrir á stjórnarfundi og var það gert 6. nóvember 2012. 

Í dómnum er bæði fjallað um formlegan og efnislegan þátt málsins. 

Stjórn SÍ harmar að formlega hliðin skuli ekki hafa verið betri en raun var á.  Það  var engu að síður almennur skilningur bæði stjórnarmanna SÍ og landsliðsnefndar að nefndin og landsliðsþjálfari velji liðið í raun.  Liðsuppstilling hefur ávallt verið borin undir stjórnarfund en því varð ekki við komið að þessu sinni vegna tímaskorts, þar sem breytingin á uppstillingu liðsins var gerð hálfum sólarhring fyrir brottför.  Jafnframt er vert að taka fram að forseta var fullkomlega ljóst, eftir óformleg samtöl við stjórnarmenn, að mikill meirihluti stjórnar væri á bak við allar ákvarðanir landsliðsnefndar.  Engu að síður hefði strangt til tekið átt að fá fram formlegt umboð stjórnarmanna til að ljúka málinu.

Dómstóll SÍ nefnir hagsmuni Héðins í því að halda sæti sínu í liðinu.  Það er bæði satt og rétt.  Enginn kostur var góður í stöðunni og þar gerði tímahrakið illt verra, en þegar  ljóst var að liðið gæti ekki farið óbreytt út, völdu landsliðsþjálfari og landsliðsnefnd þá leið sem talin var best frá heildarhagsmunum liðsins.

Vitaskuld var ákvörðunin nefndinni og landsliðsþjálfara mjög erfið og aðilum ljóst að hún væri Héðni þungbær.  Stjórn SÍ harmar að þurft hafi að koma til þessarar ákvörðunar. 

Á fundi þar sem Héðni var tjáð að liðið yrði endurvalið án hans var honum jafnframt tilkynnt að hann myndi halda þeim dagpeningum sem þegar væri búið að greiða honum fyrirfram vegna ólympíuskákmótsins.  Þá var Héðni  boðið að flug til og frá Texas, þar sem hann stundar nú nám, yrði greitt af SÍ og hefur sú greiðsla verið innt af hendi.  Þessu til viðbótar var honum boðið að forsvarsmenn SÍ hefðu samband við skóla Héðins í Texas honum til fulltingis ef hann teldi að þessi ákvörðun gæti valdið honum einhverjum erfileikum þar.

Stjórn SÍ fagnar því að úrskurður dómstólsins liggi nú fyrir og þakkar dómurum þeirra starf. Að dómnum fengnum, sem fylgir hér að neðan, getur vinna hafist um framtíðarfarveg landsliðsmála í þessum efnum.  Nefnd undir forystu Jóns Þorvaldssonar mun fara yfir  ferlið í heild sinni og leiðir til úrbóta svo minnka megi líkur á að atburðir sem þessi endurtaki sig.  Stjórn SÍ bindur miklar vonir við þá vinnu. 

Stjórn Skáksambands Íslands

---------------------------------------------------

 

Ú R S K U R Ð U R

Hinn 2. nóvember 2012 kom dómstóll Skáksambands Íslands saman í húsakynnum sambandsins að Faxafeni 12, Reykjavík, og tók fyrir kærumál nr. 1/2012:

Héðinn Steingrímsson

gegn

Skáksambandi Íslands

Dóminn skipa:

Friðjón Örn Friðjónsson, hrl., formaður,

Jón Rögnvaldsson og Ólafur H. Ólafsson.

Gögn málsins liggja fyrir en þau eru:

Nr. 1.          Kæra dags. 17.09.2012.

Nr. 2.          Greinargerð kæranda (Lýsing á atburðarás).

Nr. 3.          Bréf Gunnars Björnssonar forseta Skáksambands Íslands ódags.

Nr. 4.          Erindi skákdómstólsins dags. 15.10.2012.

Nr. 5.    Greinargerð Skáksambands Íslands dags. 24.10.2012.

Hinn 12. október 2012 kom skákdómstóllinn saman og tók afstöðu til frávísunarkröfu Skáksambands Íslands. Krafan var á því reist að kæruefnið væri óljóst og enn fremur að Skáksamband Íslands ætti ekki aðild að málinu.

Frávísunarkröfunni var hafnað með þeim rökum að ekki léki á því vafi að kæran lyti að þeirri ákvörðun landsliðsnefndar að breyta liðskipan íslensku ólympíusveitarinnar daginn fyrir brottför liðsins til Istanbúl hinn 27. ágúst sl., þannig að Héðni Steingrímssyni var vísað úr sveitinni.  

Landsnefndin heyrir undir Skáksamband Íslands og er það því réttur aðili að málinu.

Skákdómstóllinn ákvað að taka efnislega til úrlausnar, hvort nægjanlegt tilefni og grundvöllur hafi verið fyrir þessari ákvörðun samkvæmt lögum og reglum Skáksambands Íslands. Að mati dómsins standa lögvarðir hagsmunir kæranda til þess að fá úr því skorið.

Þar sem fyrir lá ákvörðun um að taka kæruna til efnislegrar úrlausnar var Skáksambandi Íslands gefinn kostur á að skila efnislegri greinargerð í málinu og liggur hún fyrir dags. 24.10.2012.

Málsatvik

Í kæru er lýst atvikum eins og þau horfa við kæranda og er vísað til kærunnar og fylgiskjals með henni sem ber yfirskriftina Lýsing á atburðarás.

Kjarni máls er óumdeildur og kom hann m.a. fram í fréttatilkynningu Skáksambands Íslands um málið. Þar segir m.a.:

 " upp hafi komið ósættanlegur ágreiningur innan ólympíuliðsins, sem varð þess valdandi að ómögulegt reyndist að senda liðið til keppni í þeirri mynd sem það hafði verið valið."

Ennfremur segir í bréfinu að þetta hafi orðið til þess,

" að landsliðsnefnd að fengnu áliti liðstjóra taldi sig því miður tilneydda að draga kæranda út úr liðinu."

Í bréfi Skáksambands Íslands dags. 24. október 2012 er nánar lýst þeim atvikum að á fjáröflunarmóti sem fram fór í Kringlunni hinn 25. ágúst sl. urðu deilur á milli kæranda og annars nafngreinds liðsmanns sveitarinnar. Skáksamband Íslands hafi hins vegar enga afstöðu tekið til þeirrar deilu.

Því er svo lýst í bréfinu að umræddur liðsmaður hafi haft samband við landsliðsþjálfarann og tjáð honum að hann myndi ekki gefa kost á sér í landsliðið vegna hegðunar kæranda. Atvik sem upp kom í Kringluskákmótinu hafi verið það korn sem fyllti mælinn en áður hafi kærandi verið áminntur af landsliðs- og afreksnefnd Skáksambands Íslands þann 3. nóvember 2010 í kjölfar ólympíuskákmóts í Khanty Mansiysk.

Í bréfi Skáksambands Íslands er því lýst að landsliðsnefnd og landsliðsþjálfari hafi ítrekað reynt að ná sáttum með aðilum en án árangurs. Segir svo í bréfinu:

" Landsliðsnefnd ákvað samkvæmt umboði sínu frá stjórn SÍ, að fenginni tillögu frá liðstjóra og þjálfara liðsins, að endurvelja landsliðið, þ.e. að draga Héðinn úr liðinu.....

 Umrædd ákvörðun var tekin með heildarhagsmuni liðsins í huga, en byggir í því efni á huglægu mati eins og ætíð er um val á liðum til keppni. Stuðst var við 15. gr. skáklaga SÍ en þar kemur fram að stjórn SÍ velji landslið Íslands hverju sinni. "  

Niðurstaða

Í samræmi við 1. mgr.15. gr. skáklaga Skáksambands Íslands (SÍ) velur stjórn SÍ landslið Íslands í skák hverju sinni svo og þátttakendur Íslands í alþjóðlegum mótum á vegum FIDE.  Skv. 4. mgr. sömu greinar skal stjórn SÍ fela sérstakri nefnd eða þjálfara að gera tillögu til hennar um skipan landsliðs.

Fyrir liggur að kærandi var valinn í lið Íslands fyrir Ólympíumótið í skák í Istanbúl 2012. Var sú ákvörðun formlega tekin af stjórn SÍ.

Samkvæmt greinargerð Gunnars Björnssonar fyrir hönd SÍ dags. 24.10.2012 tók landsliðsnefnd ákvörðun um breytta liðskipan skv. umboði frá stjórn SÍ.

Fyrir dóminum liggur ekki sérstakt og formlegt umboð stjórnar SÍ til landsliðsnefndar um að gera breytingar á skipan ólympíusveitarinnar.

Að mati landsliðsnefndar komu upp ósættanlegur ágreiningur innan liðsins rétt fyrir brottför þess til keppni. Brást landsliðsnefndin við með þeim hætti sem áður er lýst  og breytti skipan liðsins. Var sú ákvörðun tilkynnt með tölvupósti til stjórnar SÍ.

Samkvæmt 15. gr. skáklaga SÍ er það stjórnar SÍ að skipa í landsliðið og af eðli máls leiðir að liðskipan verði aðeins breytt af sama aðila. Áhöld eru að mati dómsins hvort stjórn SÍ geti framselt slíkt vald til landsliðsnefndar, enda felur ákvörðun um að víkja landsliðsmanni úr skáksveitinni í sér íþyngjandi ákvörðun sem taka verður með rökstuddum hætti af þar til bærum aðila. Að mati dómsins þarf a.m.k. að liggja fyrir skýrt umboð frá stjórninni en svo er ekki í máli þessu.

Skákdómstóllinn kallaði sérstaklega eftir rökstuðningi frá Skáksambandi Íslands fyrir þeirri ákvörðun að breyta skipan liðsins. Vísað var sérstaklega til áminningar sem kærandi sætti í kjölfar keppni á ólympíumóti 2010. Að mati dómsins kemur sú áminning ekki til álita við mat á breyttri liðskipan nú, vegna þess að í millitíðinni nánar tiltekið þann 9. júní 2011, valdi stjórn SÍ kæranda í ólympíuliðsveit Íslands til keppni 2012.

Ekki verður ráðið af gögnum þessa máls að háttsemi kæranda að öðru leyti í aðdraganda ólympíufararinnar hafi verið slík að hann hafi gerst brotlegur við 13 gr. laga Skáksambands Íslands eða eitthvað annað hafi réttlætt brottvísun hans úr ólympíusveit Íslands.

Hagsmunir kæranda af því að halda sæti sínu í ólympíusveitinni eru eðli málsins samkvæmt verulegir og brottvikning hans úr liðinu til þess fallin að skaða orðstír hans.

Það er niðurstaða dómstóls Skáksambands Íslands að hvort tveggja hafi skort, form- og efnisskilyrði til brottvikningar kæranda úr ólympíusveit Íslands 2012.

Beinir dómstóllinn því til stjórnar Skáksambands Íslands að í kjölfar þessa úrskurðar verði málið tekið til umfjöllunar á stjórnarfundi og hlutur kæranda réttur að því marki sem hægt er.

Úrskurðarorð

Ákvörðun um brottvikningu Héðins Steingrímssonar úr ólympíusveit Íslands í skák 2012 var ekki nægilega rökstudd samkvæmt lögum og reglum Skáksambands Íslands.

Málinu er vísað til Skáksambands Íslands til frekari umfjöllunar.

Í skákdómstól Skáksambands Íslands.

Friðjón Örn Friðjónsson, formaður

Jón Rögnvaldsson

Ólafur H. Ólafsson                                                                                                

 

 

Sýnishorn úr kennsluskákbók Krakkaskákar

Hér fyrir skemmstu á Skák.is voru kynntar kennslubækur frá Krakkskák.  Sjá nánar hér.

Siguringi Sigurjónsson, forsvarsmaður Krakkaskákar hefur lagt í þetta heilmiklu vinna og hér sem PDF-viðhengi má finna má sýnishorn úr bókinni.

Skrár tengdar þessari bloggfærslu:

• Sýnishorn úr skákbók

Atskákmót Icelandair - sveitakeppni

Atskákmót Icelandair 2012 verður haldið á Reykjavík Natura, gamla Hótel Loftleiðir 8.-9. desember. Þetta mót verður með svipuðu sniði og í fyrra en fjöldi þátttakenda hefur einhver áhrif á keppnisfyrirkomlagið.

Mörg merkileg skákmót hafa verið haldin á Hótel Loftleiðum í gegnum tíðina og hafa margir heimsþekktir skákmenn teflt þar ásamt okkar stórmeisturum og því má búast við að þessi staður rifji upp gamlar minningar hjá mörgum skákmanninum og skapi skemmtilegt andrúmsloft. Einnig má nefna að Fischer heitinn gisti á Hótel Loftleiðum forðum daga og fyrst þegar hann kom aftur til landsins.

Þetta er opin sveitakeppni með fjögurra manna liði en leyfilegt er að hafa 3 varamenn. Þó að þetta sé opin sveitakeppni eru fyrirtæki, stofnanir, klúbbar, eða önnur félög hvött til að senda lið til keppni.  Markmiðið er að hafa jafna og skemmtilega keppni og því er sá hátturinn hafður á að hver sveit má ekki hafa fleiri en 8.500 skákstig í hverri umferð.

Vissulega er hægt að setja saman allskonar sveitir sem væru innan við 8.500 stig en það væri gaman að sveitir væru skipaðar bæði stigaháum annars vegar og stigalægri hins vegar,  "Gens Una Sumus" - "Við Erum Ein fjölskylda"

Miðað er við alþjóðleg stig en ef alþjóðleg stig eru ekki til staðar er miðað við íslensk stig og stigalausir reiknast með 1.500 stig. Miðað er við nóvember lista FIDE en september lista íslenska listans.

• Reykjavík Natura, áður Hótel Loftleiðir
• 8.-9. desember, byrjað klukkan 13:00 báða dagana
• 4 í liði, leyfilegt að hafa 3 varamenn
• Þátttökufjöldi 16-24 sveitir, en það verður hægt að setja lið á biðlista.
• 8.500 stig á sveitina í hverri umferð.
• Stigalausir og þeir sem hafa færri en 1.500 stig verða skráðir með 1.500 stig
• Miðað er við nóvember lista FIDE og september listann í íslensku stigunum
• 9-14 umferðir, þetta ræðst af þátttöku.
  • Miðað er við að taflmennska verði á milli 13:00-18:00 báða dagana.
• 15 mínútur á mann, þátttökufjöldi gæti haft áhrif á þetta.
• Keppnisfyrirkomulagið er svissneskt kerfi.
• Flestir vinningar gilda.
• Þátttökugjald: 16.000 á sveitina og greiðist á skákstað.
• Þátttakendur eru hvattir til að skrá sig tímanlega þar sem að þátttökufjöldinn er takmarkaður.

Verðlaun:*

Sveitakeppni:

• 1. sæti: 4x farmiðar fyrir tvo til Evrópu með Icelandair
• 2. sæti: 4x gjafabréf fyrir tvo á veitingastaðnum Satt
• 3. sæti: 4x gjafabréf fyrir tvo í Fontana

Borðaverðlaun.

Borðaverðlaunin eru farmiðar innanlands fyrir tvo í boði Flugfélags Íslands og Sagaklúbbs Icelandair og gisting í  2 nætur fyrir tvo á Icelandair Hótelum  ásamt morgunverðarhlaðborði. Hægt verður að velja um gistingu á Hótel Akureyri eða á Hótel Héraði.

Óvæntasti sigurinn
Sá aðili sem vinnur óvæntasta sigurinn mun fá gjafabréf á veitingastaðnum Satt sem gildir fyrir tvo. Miðað er við stigamun.

Besti varamaðurinn
Besti varamaðurinn fær gjafabréf á veitingastaðnum VOX fyrir tvo.

Útdráttarverðlaun - einvígi, teflt á meðan er verið að taka saman lokaúrslit.

Einnig eru glæsileg útdráttarverðlaun en þau eru hvorki meira né minna en farmiðar fyrir tvo til Bandarríkjanna með Icelandair.

Tveir verða dregnir út til að tefla hraðskák um þessi verðlaun.10 mínútum verða skipt á milli skákmannanna og verður notast við ákveðna tímaforgjafarformúlu til að gefa þeim stigalægri meiri möguleika og auka spennuna. Tímaforgjafarformúlan verður útskýrð á skákstað fyrir einvígið.

Sá sem er dreginn fyrr fær hvítt.

Sá sem tapar fær gjafabréf á veitingastaðnum VOX fyrir tvo. Ef það verður jafntefli skipta skákmennirnir vinningunum á milli sín nema að það sé áhugi hjá báðum aðilum að tefla bráðabanaskák með sama fyrirkomlagi en með minni tíma og öfugum litum.

* ATH. Sami aðili getur ekki unnið til fleiri en einna ferðavinninga, ef slíkt kemur upp mun viðkomandi aðili velja hvaða vinning hann vill, útfærist nánar á skákstað!
- Greiða þarf flugvallarskatta af öllum flugmiðum.

Skráning fer fram hér.

Hægt er að fylgjast með skráningum hér.

Á Facebook er hægt að skiptast á skoðunum og auglýsa sig eða eftir liðsmönnum  

Skráningu lýkur aðfaranótt laugardagsins 1. desember.
Frekari upplýsingar er hægt að fá með því að senda póst á Óskar Long; [e-mail]

Þór Valtýsson Hrókur dagsins í Ásgarði

Þór Valtýsson sigraði með nokkrum yfirburðum í dag í Ásgarði, þar sem tuttugu og sex heldri skákmenn skemmtu sér með trékörlunum.

Þór leifði aðeins eitt jafntefli og fékk 9,5 vinning af tíu mögulegum og kallast því Hrókur dagsins í dag. Í öðru sæti varð Sæbjörn G Larsen með 7,5 vinning og Össur Kristinsson náði þriðja sætinu með 7 vinningum.

Næsta þriðjudag ætlum við að tefla til heiðurs Birgi Sigurðssyni  fráfarandi formanni og heiðra hann fyrir frábær störf í þágu skáklistarinnar um marga áratugi.

Þetta mót verður kallað Birgismótið.

Allir skákmenn 60 ára og eldri hjartanlega velkomnir til leiks.

Það verða tefldar níu umferðir með 10 mín. umhugsun.

Mótið hefst kl.13.00

Fyrir þá sem hafa ekki komið til okkar áður, þá teflum við í Stangarhyl 4.

Nánari úrslit í dag:

• 1          Þór Valtýsson                                      9.5
• 2          Sæbjörn G Larsen                               7.5
• 3          Össur Kristinsson                                7
• 4-5       Þorsteinn  Guðlaugsson                      6.5
•             Jón Víglundsson                                 6.5
• 6-7       Valdimar Ásmundsson                       6
•             Birgir Ólafsson                                    6
• 8-10     Haraldur Axel                                     5.5
•             Magnús V Pétursson                           5.5
•             Ásgeir Sigurðsson                               5.5
• 11-16   Halldór Skaftason                               5
•             Garðar Guðmundsson                         5
•             Friðrik Sófusson                                  5
•             Óli Árni Vilhjálmsson                         5
•             Birgir Sigurðsson                                5
•             Einar S Einarsson                                5
• 17-21   Sigurður Kristjánsson                          4.5
•             Finnur KR Finnsson                            4.5
•             Jónas Ástráðsson                                 4.5
•             Bragi G Bjarnarson                             4.5
•             Gísli Sigurhansson                              4.5

Næstu fimm skákmenn fengu aðeins færri vinninga.                                    

Dagur með jafntefli í 3. umferð í Búdapest

Alþjóðlegi meistarinn Dagur Arngrímsson (2368) gerði jafntefli við ungverska stórmeistarann Zoltan Varga (2456) í 2. umferð First Saturday-mótsins sem fram fór í dag.  Í gær tapaði  hann fyrir indverska stórmeistarann Tejas Bakre (2481).  Dagur hefur 1 vinning og er í 4.-5. sæti.

Sjö skákmenn taka þátt í GM-flokki og eru meðalstigin 2426 skákstig.  Dagur er nr. 5 í stigaröð keppenda.

• Heimasíða mótsins
• Chess-Results