Af Riddurum reitaða borðsins

Reglubundir skákfundir Riddarsns, skákklúbbs eldri borgara á Stór-Hafnarfjarðarsvæðinu,  eru jafnan líflegir, velsóttir og lukkaðir.  Hinir vígreifu riddarar, kenndir við Bjarna Riddara, hittast þar alla miðvikudaga árið um hring til að tefla sér til ánægju og yndisauka,  lika fyrir félagsskapinn, meðan aldurinn færist enn frekar yfir þá og aðra samferðamenn í tíma og rúmi, því skák er þeirra líf og yndi.

Reyndar er það ekki tekið út með sældinni að tefla skák. Það útheimtir heilmikið álag  bæði andlegt og líkamlegt að sitja að tafli og rembast við (að þegja)  að leggja einn andstæðing á fætur öðrum að velli í heila 4 tíma, en tefldar eru 11 umferðir -10 mínútna skákir. Heilabrot eru þó sögð af hinu góða og vera úrvals forvörn gegn ótímabærum elliglöpum sem bætir mjög úr skák og réttlætir tímaeyðsluna því skákáráttupersónuleikastreituröskunarbakterían er ansi lífseig, sumir segja ólæknanleg.    

Úrslit af vikulegum innanfélagsmótum eru kannski ekki neitt sérstakt fréttaefni  á landsvísu á vef SÍ enda þau birt á heimasíðu klúbbanna fyrir áhugasama. Að þessu sinni  fylgir þó síðasta mótstafla Riddarans frá vikunni sem leið með til fróðleiks fyrir fréttaþyrsta ásamt myndum af helstu þátttakendum úr því að skríbentinn er sestur við lyklaborðið á annað borð.

Eins og sjá má er þar mikið mannval á ferðinni, dulúðlegir dánumenn, sem ekki láta sér allt fyrir brjósti brenna þegar að því kemur að leggja skáknet sín og gildrur fyrir íbyggna mótherja sína eða forðast gagnsóknir þeirra, fórnir og brellur.  Á þessu hausti hefur hinn eitilharði Ingimar Halldórsson af Skaganum verið einna sigursælastur unnið 5 mót, Guðfinnur R. Kjartansson 4, Páll G. Jónsson, Ingimar Jónsson, Jóhann Örn Sigurjónsson,  Friðgeir Hólm hafa allir unnið sitt mótið hver til tilbreytingar, sem og Sigurður Herlufsen og Jón Þ. Þór síðla sumars. Aðrir eru sjaldan langt undan.  
Riddarinn stendur auk „Skákmóts kynslóðanna", sem nýlokið er, fyrir tveimur mótaröðum yfir veturinn „SkákSeglinu" og „SkákHörpunni" báðum til minningar um fallna félaga. Hin fyrri hefst á miðvikudaginn kemur  þar sem 3 bestu mót hvers keppanda af 4 telja til stiga.  Mótið er helgað minningu Gríms Ársælssonar, skákmanns og trillukarls.  Það er jafnan  á dagskrá í nóvember ár hvert, sem er fæðingar- og dánarmánuður hins láta heiðursmanns. SkákHarpan er helguð minningu Fjölnis Stefánssonar, tónskálds og er tefld í mars.  Grímur heitinn var einn af frumherjum að stofnun Riddarans fyrir 14 árum og formaður klúbbsins frá fyrstu tíð til hinsta dags 2008.   Útbúinn var einkar fallegur farandgripur "SkákSeglið" sem um er keppt og tileinkaður er  minningu hans eða Mr."Grímzó",  eins og hann var stundum kallaður í góðra vina hópi.

Þeir sem vilja leggja leið sína í Vonarhöfn, skáksalinn góða í Strandbergi, Safnaðarheimili Hafnarfjarðarkirkju, í von um vinning, eru að sjálfsögðu boðnir velkomnir. Þar er jafnan heitt kaffi á könninni til að hressa sig á og bæta hugarflugið  milli átakaskáka því jafnteflistaflmennska á þar ekki upp á pallborðið. Það að reyna að fiska í gruggugu vatni til vinnings eða patts er þó jafnan látið óátalið. Sjáumst og kljáumst.

www.riddarinn.net /ESE 5.11.12

Skákæfingar T.R. á fullri ferð!

Þrátt fyrir vonskuveður á laugardaginn var, 3. nóvember, mætti hátt á fjórða tug barna og unglinga á skákæfingu í félagsheimili T.R. Að þessu sinni var sameiginleg æfing hjá afrekshóp T.R. og yngri hópnum. Það var skemmtilegt tækifæri fyrir þau yngri að reyna sig á móti eldri og reyndari skákkrökkunum. Salurinn er um þessar mundir uppraðaður fyrir Vetrarmót öðlinga, þannig að krakkarnir tefldu við kjöraðstæður. 

Skákæfingar fyrir stelpur og konur á öllum aldri eru kl. 12.30 til 13.45 og er þátttakan þar að glæðast eftir rólega byrjun í haust. Umsjón með þeim æfingum hefur Sigurlaug Regína Friðþjófsdóttir. Skákæfingarnar fyrir börn og unglinga fædd 1997 og síðar eru svo kl. 14-16. Það eru tveir hópar sem æfa samhliða, annars vegar afrekshópur T.R. sem Daði Ómarsson þjálfar, en hann er bæði Skákmeistari T.R. 2012 og Hraðskákmeistari T.R. 2012. Umsjón með yngri flokknum hefur svo Torfi Leósson, margreyndur skákþjálfari T.R.-inga. 

Á skákæfingunum er skákþjálfun og taflmennsku blandað saman. Á hverri æfingu er boðið upp á hressingu, sem krökkunum finnst vera ómissandi! Þátttakendur á skákæfingum Taflfélags Reykjavíkur koma úr öllum hverfum Reykjavíkurborgar svo og úr Kópavogi, Garðabæ og Hafnarfirði. Sjá nánar um skákæfingar T.R. og mót á vegum félagsins á heimasíðu T.R. www.taflfelag.is

Pistill: Sigurlaug Regína Friðþjófsdóttir.

Myndir frá Laugardagsæfingu T.R. 3. nóv.Björn Jónsson  

Myndaalbúm

Róbert Harðarson efstur á Nóvemberskákmótinu í VIN

Á meðan Guðirnir grétu ákaft, sveif andi Caissu í húsnæði VINJAR. Nóvemberskákmótið í VIN var haldið til heiðurs Hrafni Jökulssyni sem varð fjörtíu og sjö ára fyrsta nóvember sl. Þórdís forstöðufrú VINJAR fékk það hlutverk að leika fyrsta leik mótsins, í öllum tilvikum segir keppandinn sem hefur hvítt viðkomandi hvað hann vilji leika í fyrsta leik, en nú fékk Þórdís alfarið að ráða fyrsta leik mótsins, hún lék 1.Rf3 sem dugði vel til jafnteflis í viðureign Hrafns og Róberts.

Þórdís átti einnig frábæran leik er kom að veisluborði VINJAR í hálfleik mótsins, þótti það einkar glæsilegt í dag. Heiðursgesturinn Hrafn náði bronsinu og lék síðasta leik mótsins er hann afhenti sigurvegarum afmælisbikarinn. Skák og mótsstjórn var í öruggum höndum Róberts Lagermans. Lokastaða mótsins er hér fyrir neðan.

  1   Róbert Harðarson                     5.5      
  2   Birgir Berndsen                      5        
  3   Hrafn Jökulsson                      4.5      
  4   Ásgeir Sigurðsson                    4        
5-6   Aðalsteinn Thorarensen               3.5      
      Hjálmar Sigurvaldason                3.5       
7-10  Grímur Daníelsson                    3              
      Haukur Halldórsson                   3        
      Ingi Tandri Traustason               3              
      Jón Gauti Magnússon                  3         
11    Hörður Jónasson                      2        
12-13 Viðar Eiríksson                      1              
      Aðalgeir Jóhannsson                  1         
14    Gunnar Gestsson                      0        

Myndaalbúm (RL og RH)

Atskákmót Íslands 2012 - Minningarmót um Sturlu Pétursson

Atskákmót Íslands 2012 - Minningarmót um Sturlu Pétursson

Verður haldið daganna 16.-18. nóvember n.k

Mótið verður  í senn minningarmót um Sturlu Pétursson skákmeistara.

Staðsetning Hlaðan Gufunesbæ Gufunesvegi 112 Reykjavík (sjá á korti)

http://ja.is/kort/#q=index_id%3A1488810&x=363331&y=407608&z=9

Tímamörk eru 25 mín á skák

Þátttökugjald er 1.000 krónur fyrir 16 ára og yngri, 2.000 krónur fyrir 16 ára og eldri

Fyrirkomulag verður með sama sniði og í fyrra. Fyrst verða tefldar 7 umferðir. Fjórir efstu tefla síðan í undanúrslitum tvær skákir með sitthvorn litinn.

Verðlaun

1.      100.000

2.      50.000

3.      25.000

4.      25.000

Einnig verða veittir bikarar fyrir bestan árangur unglinga, kvenna og öldunga. 

Aðalstyrkaraðli mótsins er Gúmmívinnustofan Skipholti

Sigurvegari mótsins hlýtur nafnbótina Atskákmeistari Íslands.

 

Dagskrá mótsins

Föstudag 16.11

19:30 - 22:30 1-3 umferð

Laugardagur 17.11

13:00 -16:30 4-7 umferð

Sunnudagur 18.11

13:00 - 15:00 Undanúrslit

Stefnt er að því að úrslitaeinvígið fari fram í beinni útsendingu á RÚV

Hægt er að skrá sig á https://docs.google.com/spreadsheet/viewform?formkey=dHJyRG4zZXdmdWxZa0ZJMTJuSU5zaUE6MQ

Hægt er að sjá skráða keppendur hérna

https://docs.google.com/spreadsheet/ccc?key=0AiyZI3bNVvoCdHJyRG4zZXdmdWxZa0ZJMTJuSU5zaUE#gid=0

TORG - skákmótið 2012 verður í Foldaskóla á laugardaginn

Skákdeild Fjölnis heldur hið árlega TORG - skákmót næsta laugardag, 10. nóvember og verður mótið að þessu sinni haldið í Foldaskóla í Grafarvogi.

TORG-mótið stendur frá kl. 11:00 - 13:00 og lýkur með veglegri verðlaunaafhendingu. Fyrirtækin á Torginu í Hverafold gefa yfir 20 góða vinninga og verslunin NETTÓ býður öllum þátttakendum upp á ókeypis veitingar og gefur þrjá glæsilega verðlaunabikara.

Heiðurðsgestur TORG-mótsins 2012 verður sjálfur Íslandsmeistarinn Þröstur Þórhallsson og mun hann leika fyrsta leikinn.

Tefldar verða sex umferðir með 7 mínútna umhugsunartíma. TORG-skákmót Fjölnis eru bráðskemmtileg skákmót ætluð öllum grunnskólanemendum og tilvalið fyrir nemendur sem notið hafa kennslu í skólum t.d. á vegum Skákakademíu Reykjavíkur. Flestir af öflugustu skákrökkum landsins hafa í gegnum árin fjölmennt á Torg- skákmót Fjölnis. Mótið hefst eins og áður segir kl. 11.00 en þátttakendur eru beðnir um að mæta fimmtán mínútum fyrr til skráningar.

Unglingameistaramót Íslands (20 ára og yngri) fer fram á föstudag og laugardag

Unglingameistaramót Íslands 2012 fer fram í Faxafeni 12, Reykjavík dagana 9.- 10. nóvember nk.  Þátttökurétt eiga þeir sem verða 20 ára á almanaksárinu og yngri.

 

Sigurvegari á mótinu hlýtur titilinn "Unglingameistari Íslands 2012" og í verðlaun farseðil - að hámarki kr. 50.000.-  á skákmót erlendis.  Farseðilinn gildir í eitt ár.

Mótið átti að fara fram síðustu helgi en var frestað vegna veðurs. Þeir sem skráðu sig fyrir helgina þurfa ekki að endurskrá sig.    

Umferðatafla:             

Föstudagur 9. nóv.:

kl. 20.00                                  4 atskákir

Laugardagur 10. nóv.:

kl. 17.00                                  3 atskákir

Að móti loknu verður verðlaunaafhending og lokahóf.

Tímamörk:                   25 mín + 10 sek. viðbótartími á hvern leik     

Þátttökugjöld:             kr. 2.000.-

Skráning: http://www.skak.is og [e-mail].

Upplýsingar um þegar skráða keppendur má nálgast hér.  

Íslandsmót 15 ára og yngri fer fram á laugardag og sunnudag

Skákþing Íslands 2012 -  drengja-og telpnameistaramót (15 ára og yngri)

Skákþing Íslands 2012 -   pilta-og stúlknameistaramót (13 ára og yngri)                                                          

Keppni á Skákþingi Íslands 2012 - 15 ára og yngri (fædd 1997 og síðar) og 13 ára og yngri (fædd 1999 og síðar) verður haldið í félagsheimili Taflfélags Reykjavíkur dagana 10. og 11. nóvember nk.  Tefldar verða 9 umferðir eftir monrad kerfi og er umhugsunartími 20 mín. á skák fyrir keppanda.  Teflt verður í einum flokk.

Mótið átti að fara fram síðustu helgi en var frestað vegna veðurs. Þeir sem skráðu sig fyrir helgina þurfa ekki að endurskrá sig.  

Skákstaður: Faxafen 12, Reykjavík

Umferðartaflan:

Laugardagur 10. nóvember      

• kl. 13.30                      1. umferð
• kl. 14.30                      2. umferð
• kl. 15.30                      3. umferð
• kl. 16.30                      4. umferð
• kl. 17.30                      5. umferð

Sunnudagur 11. nóvember       

• kl. 11.00                      6. umferð
• kl. 12.00                      7. umferð
• kl. 13.00                      8. umferð
• kl. 14.00                      9. umferð

                                               

Þetta eru áætlaðar tímasetningar, en hver ný umferð hefst að þeirri fyrri lokinni.

Að því loknu verðlaunaafhending og mótsslit.

Þátttökugjöld: kr. 1.000.- (hámark kr. 1.500.- fyrir fjölskyldu)

Verðlaun:  Verðlaunabikarar fyrir þrjú efstu sætin í hvorum flokki.

Skráning: http://www.skak.is og [e-mail].  Fyrri skráning

Upplýsingar um þegar skráða keppendur má nálgast hér. 

Nóvemberhraðskákmót hjá VIN hefst kl.13 í dag

Nóvemberhraðskákmótið verður haldið í VIN, Hverfisgötu 47, á morgun mánudag kl. 13.00.

Tefldar verða sex umferðir og umhugsunartími sjö mínútur á keppenda.

Boðið verður upp á óvæntar uppákomur, heiðursgest, glæsilega vinninga og hið margrómaða VINJAR-veisluborð í hálfleik. Mótstjórn og skákstjórn verður í höndum Róberts Lagerman,  Allir hjartanlega velkomnir.

Atskákmeistaramót Reykjavíkur fer fram í kvöld

Atskákmót Reykjavíkur sem jafnframt er atskákmót Hellis fer fram mánudaginn 5. nóvember, þ.e. viku fyrr en áætlað var skv. dagskrá.  Mótið fer fram í félagsheimili Hellis, Álfabakka 14a í Mjódd. Tefldar verða 6 umferðir með Svissnesku-kerfi og hefur hvor keppandi 15 mínútur á skák. Mótið hefst kl. 19:30.

Verði tveir jafnir í baráttunni um annanhvorn titilinn verður teflt tveggja skáka hraðskákeinvígi. Verði jafnt að því loknu verður tefldur hraðskákbráðabani. Verði fleiri en tveir jafnir verður tefld einföld umferð, hraðskák. Verði enn jafnt, þá bráðabani.  

Núverandi atskákmeistari Reykjavíkur er Einar Hjalti Jensson og atskákmeistari Hellis er Hjörvar Steinn Grétarsson.

Verðlaun:

1. 15.000

2. 7.500 

3. 4.000

 Þátttökugjöld:

16 ára og eldri: 1000 kr

15 ára og yngri: 500

Skákbækur frá Krakkaskák

Krakkaskák.is hefur gefið út vinnubók sem er sú fyrsta í seríunni: Gulur,Rauður,Grænn og Blár og inniheldur æfingar í skák. Bókin er hugsuð til notkunar í skákkennslustund með skákkennara. Skákkennarinn getur látið börnin vinna verkefnin saman í fámennum hópi eða kosið að vinna með öllum hópnum samtímis.

Hvernig kennarinn kýs að nota bókina er algerlega undir honum sjálfum komið.  Nemandinn þarf ekki að skrifa neinn texta, heldur aðeins merkja við satt eða ósatt? Bókin inniheldur fullyrðingar sem eru sannar eða ósannar um mikilvæg skákatriði. Það eru fullt af stöðumyndum og æfingar sem eru góðar fyrir byrjendur. 

Í stórum blönduðum krakkahóp þar sem skilningur og geta er mjög misjöfn er oft erfitt að gera æfingar sem þjóna öllum hópnum og ganga úr skugga um að allir hafi skilið allt. Þarna hefur kennarinn líka tækifæri á að koma krökkum í hópa til að vinna misjöfn verkefni og börnin ekki óvön að vinna svipuð verkefni í skólanum. 

Þessi bók leysir marga aukasnúninga eins og ljósritun og margt annað. Bókin kostar einungis 450 kr.stk. og er til eignar fyrir nemandann hvort sem hann fer með hana heim eftir hverja æfingu eða kennarinn geymir bókina sem ég mæli frekar með að gera þar til hann hefur klárað bókina. Hún er í A5 stærð og telst fremur til bæklings en bókar því blaðsíðufjöldi er einungis 16 síður. 

Þessi Gula bók er um hreyfanleika og getu mannanna ásamt taflborðinu. Hún styðst við þá kennslu sem er trúlega dæmigerð ungum byrjendum sem eru á 1.stigi skáklistarinnar.

Rauða bókin mun svo vera sniðin fyrir þá sem eru komnir á 2.stig skáklistarinnar og þannig mun það halda áfram ef nægileg eftirsókn verður eftir fleiri bókum.  Guli bæklingurinn verður tilbúin úr prentun í lok vikunnar og þeir sem hafa áhuga á að panta bækling er bent á að senda Siguringa Sigurjónssyni tölvupóst í netfangið [e-mail].