Skákþáttur Morgunblaðsins: Vildi stytta sér leið

Jón Viktor Gunnarsson vann öruggan sigur á Tölvuteks-mótinu, hinu hefðbundna haustmóti Taflfélags Reykjavíkur, sem lauk í síðustu viku. Hann hlaut 7 ½ vinning af níu mögulegum og var sigur hans aldrei í hættu. Jón Viktor hefur lítið teflt undanfarin ár en auki hann taflmennsku sína hlýtur hann fyrr eða síðar að banka á dyr hjá landsliðinu. Lenka Ptacnikova varð í 2. sæti með 6 ½ v. og Sævar Bjarnason varð í 3. sæti með 6 vinninga. Sævar hefur verið manna duglegastur við að taka þátt í opinberum mótum hér á landi.

Þar sem enginn efstu manna er félagi í TR hlýtur Daði Ómarsson nafnbótina Skákmeistari Taflfélags Reykjavíkur en hann varð í 5. sæti, hlaut 4 ½ vinning af níu mögulegum.

Í b-riðli sigruðu Dagur Ragnarsson og Jón Trausti Harðarason með 6 ½ v. af átta mögulegum en félagi þeirra úr Rímaskóla, Oliver Jóhannesson, kom næstur með 6 v. Í c-riðli vann Dawid Kolka með 7 v. af 9 mögulegum en Hilmir Freyr Heimisson og Bjarnsteinn Þórsson komu næstir með 6 ½ v.

Jón Viktor hóf mótið af miklum krafti og lagði þar grunninn að sigri sínum. Hann mætti Daða Ómarssyni í 2. umferð en Daði, sem er feikilega vel að sér í byrjunum, gáði ekki að sér á mikilvægu augnabliki og Jón Viktor náði að spila út óvæntum leik sem lagði stöðu Daða í rúst í einu vetfangi:

Daði Ómarsson - Jón Viktor Gunnarsson

Frönsk vörn

1. e4 e6 2. d4 d5 3. Rc3 Rf6 4. e5 Rfd7 5. f4 c5 6. Rf3 Rc6 7. Be3 Be7 8. Dd2 O-O 9. dxc5

Þetta afbrigði sem kennt er við Wilhelm Steinitz nýtur mikilla vinsælda um þessar mundir.

9. ... Bxc5 10. O-O-O Da5 11. Bxc5 Rxc5 12. Kb1 Bd7 13. h4 Hfd8 14. Be2 Hac8 15. h5 Be8 16. h6?

Daði vildi stytta sér leið að settu marki en leikurinn er afar ónákvæmur. Hann varð að skorða d-peðið og leika 16. Rd4 eða 16. Rb5 strax.

16. ... d4! 17. Rb5

17. ... d3!

Hvítur er bjargarlaus því 18. Dxa5 er einfaldlega svarað með 18. ... Rxa5 og vinnur mann.

18. cxd3 Dxb5 19. D4 Da4 20. Hxg7 Re4 21. De1 Rb4 22. a3 Rc3+!

Laglegur lokahnykkur, 23. bxc3 er svarað með 23. ... Db3+ og mát í næsta leik.

Friðrik tefldi á minningarmóti um Bent Larsen

Friðrik Ólafsson varð í 6. - 17. sæti á minningarmótinu um Bent Larsen sem lauk í Álaborg í Danmörku um síðustu helgi. Nokkrir aðrir öflugir skákmenn af kynslóð Larsens tóku þátt auk Friðriks, t.d. Wolfgang Uhlmann. Friðrik varð í 6. - 17. sæti af 61 keppanda, hlaut 4 ½ vinning af sjö mögulegum, vann tvær skákir og gerði fimm jafntefli. Sigurvegari varð Jens Kristiansen. Taflmennska Friðriks í sigurskákunum tveimur var þróttmikil en hann var fullmikill diplómat er hann mætti minni spámönnunu0m. Markmið hans var vitaskuld að heiðra minningu Larsens en þeir Friðrik háðu marga hildi á meira en 50 ára tímabili. Larsen steig sín fyrstu skref í skákinni í Álaborg og Danir minnast hans ávallt með mikilli virðingu og hlýju.

Jóhanna efst á Íslandsmóti kvenna

Eftir þrjár umferðir á Íslandsmóti kvenna hefur Jóhanna Björg Jóhannsdóttir náð forystu með fullu húsi vinninga. Tinna Kristín Finnbogadóttir kemur næst með 2 ½ vinning og í 3. - 5. sæti eru þær Lenka Ptacnikova, Elsa María Kristínardóttir og Nancy Davíðsdóttir með 2 vinninga. Keppendur eru 12 og tefla sjö umferðir eftir svissneska kerfinu.

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 28. október 2012.

Skákþættir Morgunblaðsins

[Event "TR"] [Site "Reykjavík"] [Date "2012.09.28"] [Round "3.5"] [White "Omarsson, Dadi"] [Black "Gunnarsson, Jon Viktor"] [Result "0-1"] [ECO "C11"] [WhiteElo "2206"] [BlackElo "2410"] [PlyCount "44"] [EventDate "2012.??.??"] 1. e4 e6 2. d4 d5 3. Nc3 Nf6 4. e5 Nfd7 5. f4 c5 6. Nf3 Nc6 7. Be3 Be7 8. Qd2 O-O 9. dxc5 Bxc5 10. O-O-O Qa5 11. Bxc5 Nxc5 12. Kb1 Bd7 13. h4 Rfd8 14. Be2 Rac8 15. h5 Be8 16. h6 d4 17. Nb5 d3 18. cxd3 Qxb5 19. d4 Qa4 20. hxg7 Ne4 21. Qe1 Nb4 22. a3 Nc3+ 0-1

Hjörvar með jafntefli gegn Wells

Alþjóðlegi meistarinn Hjörvar Steinn Grétarsson (2512) gerði jafntefli við enska stórmeistaranum Peter H. Wells (2488) í 2. umferð bresku deildakeppninnar sem fram fór í dag.  Hjörvar fékk hálfan vinning í skákum helgarinnar en Hjörvar tefldi á fyrsta borði fyrir klúbbinn Jutes of Kent.

Á ýmsu gekk á hjá klúbbi Hjörvars.  Í gær vannst góður sigur 5,5-2,5 en í dag var stórtap 1-7 fyrir Hvítu rósinni (White Rose).

Bresku deildakeppninni verður framhaldið 12. og 13. janúar nk.

• Heimasíða mótsins 
• Beinar útsendingar

 

Nóvemberskákmótið í VIN

Nóvemberhraðskákmótið verður haldið í VIN, Hverfisgötu 47, á morgun mánudag kl. 13.00.

Tefldar verða sex umferðir og umhugsunartími sjö mínútur á keppenda.

Boðið verður upp á óvæntar uppákomur, heiðursgest, glæsilega vinninga og hið margrómaða VINJAR-veisluborð í hálfleik. Mótstjórn og skákstjórn verður í höndum Róberts Lagerman,  Allir hjartanlega velkomnir.

Framundan hjá Taflfélagi Reykjavíkur

Þegar vetur konungur virðist genginn í garð er ekki úr vegi að líta á hvað er framundan í mótahaldi félagsins.  Vetrarmót öðlinga er nýhafið og fer önnur umferð fram næstkomandi miðvikudagskvöld en að venju er teflt í húsnæði T.R. að Faxafeni 12 og eru áhorfendur velkomnir.  Heitt á könnunni!

2. og 3. desember fara fram Jólaskákmót T.R. og Skóla- og frístundasviðs, yngri flokkur fyrri daginn og eldri flokkur þann seinni.  Metþátttaka var í yngri flokki í fyrra þegar Rimaskóli sigraði bæði í opnum flokki og stúlknaflokki. Rimaskóli sigraði einnig í eldri flokki en sveit Engjaskóla varð efst stúlknasveita.

27. desember fer fram hið árlega jólahraðskákmót félagsins.  Kjörið mót til að líta á mitt í öllum hátíðleika jólanna.  Ágætis þátttaka er gjarnan á jólahraðskákmótinu og í fyrra tóku þrjátíu skákmenn þátt.  Nýkrýndur skákmeistari T.R., Daði Ómarsson, sigraði með yfirburðum en hinn ungi og efnilegi Vignir Vatnar Stefánsson varð annar ásamt Arnaldi Loftssyni.

Kornax mótið - Skákþing Reykjavíkur hefst svo á þrettándanum en mótið er það stærsta í árlegu mótahaldi skákfélaganna og hafa um 70 skákmenn tekið þátt síðustu ár.  Í fyrra urðu fjórir skákmenn efstir og jafnir; Bragi og Björn Þorfinnssynir, Guðmundur Kjartansson og Ingvar Þór Jóhannesson.  Svo fór að Björn hafði betur í aukakeppni og er því núverandi Skákmeistari Reykjavíkur.  Líkt og undanfarin ár verður móthald allt hið veglegasta og verðlaun glæsileg.

Hraðskákmót T.R. fylgir í kjölfarið á Skákþinginu þann 27. janúar en í fyrra urðu Davíð Kjartansson og Gunnar Freyr Rúnarsson efstir og jafnir.  Davíð varð ofar á stigum og er því núverandi Hraðskákmeistari Reykjavíkur.

Það er síðan ástæða fyrir forsvarsmenn fyrirtækja og stofnanna að taka 1. febrúar frá því þá fer fram Skákkeppni vinnustaða.  Félagið endurvakti þessi keppni í fyrra og er um liðakeppni að ræða en nánara fyrirkomulag verður auglýst síðar.

11. febrúar fer fram Reykjavíkurmót grunnskólasveita sem T.R. og SFS standa að.  Sveit Laugalækjarskóla sigraði í fyrra eftir spennandi keppni þar sem aðeins munaði 2,5 vinningi á fjórum efstu sveitunum.  Þrjátíu sveitir tóku þátt svo það var mikið fjör í Faxafeninu.

Skömmu á eftir eða 17. febrúar fer fram Barna- og unglingameistaramót Reykjavíkur en mótið er jafnframt Stúlknameistarmót Reykjavíkur.  Mótið er opið börnum og unglingum 15 ára og yngri og er einstaklingskeppni.  Jón Trausti Harðarson er núverandi Unglingameistari og Svandís Rós Ríkharðsdóttir Stúlknameistari.  Líkt og önnur ungmennamót var mótið mjög fjölmennt með á sjötta tug keppenda.

1. og 2. mars tekur T.R. þátt í síðari hluta Íslandsmóts skákfélaga þar sem félagið er í toppbaráttunni svo að miklu verður að keppa.

Þegar nálgast fer hlýnandi veður hefst Skákmót öðlinga þann 13. mars en mótið er opið öllum fertugum og eldri.  Spurning er hvort farið verði að nefna mótið „Vormót öðlinga" þar sem félagið hóf nýverið að halda annað öðlingamót að vetri sem hefur fengið góðar viðtökur.  Mótið er einkar hentugt þeim sem eiga erfitt með að tefla oft í viku því umferðir fara fram vikulega.  Núverandi Öðlingameistari er Þorvarður Fannar Ólafsson.

Síðasta mótið á mótaáætlun félagsins er síðan Hraðskákmót öðlinga sem fylgir í kjölfarið þann 8. maí.  Sigurvegari síðasta árs var Tómas Björnsson.

Á vef T.R. má nálgast mótaáætlunina í heild sinni ásamt myndum frá mótahaldi félagsins.  Einnig eru þar fluttar fréttir um gang mála ásamt öllum úrslitum og ýmsu öðru.  Fyrirspurnir má senda á[e-mail] og er þeim svarað að vörmu spori.  Að auki má minna á laugardagsæfingarnar sem ætlaðar eru börnum og unglingum.  Nánari upplýsingar um æfingarnar má finna hér.

Gallerý Skák: Gunnar og Vignir efstir og bestir

Metþátttaka var í Kappteflinu um Patagóníusteininn á fimmtudagskvöldið var í Gallerýinu. Þetta var 4 mót af 6 í mótaröðinni.  23 kappsfullir keppendur voru mættir til tafls. Húsfyllir allt að því svo tefla varð  „hinumegin" líka, þ.e. handan gangsins í bakherberginu.

Haft var á orði að sumir þátttakendurnir brygðu sér annað slagið  „yfir um" og kæmu síðan skælbrosandi til baka  „að handan"  með vinning  í farteskinu, ekki eftir að hafa teflt við Páfann, heldur sjálfan KriSt, þ.e. Kristján Stefánsson, sem sat þar lengstum. Aðrir nutu þess betur að tefla  „hérnamegin" gangsins eða grafar og fylgjast með atganginum á öðrum borðum í „framhjáhlaupi" enda margar fjörugar 10 mínútna atskákir í gangi á öllum borðum og líflegar orðræður og  skeytasendingar í bland þó það sé bannað.   

Ekki girnast þó allir keppendur grjótið góða heldur láta sér nægja að tefla sér til ánægju og fyrir fegurðina eins og stundum er sagt. Þeir skipta ekki skapi þó stöku vinningar gangi þeim slysalega úr greipum, láta svokallaða „áfallapersónuleikastreituröskun" eða tapsærindi lönd og leið, gæta þess vandlega að láta engin merki „skaphambrigðapersónuleikaheilkennis" skjóta upp kollinum þó þeir missi drottninguna eða kóng þeirra sé kálað fyrirvaralaust í gjörunninni stöðu. Geðprýði er þeirra aðalsmerki og hugsunin um að það gangi bara betur næst er þeim efst í huga eins og í Valhöll í árdaga.

Hinn ungi skáksnillingur Vignir Vatnar var miðdepill mótsins eins og svo oft áður. Hann gerði sér lítið fyrir og vann hvern gamalreyndan meistarann á fætur öðrum eftir að hafa lútið í gras fyrir  Gunna Gunn í fyrstu umferð.  Vann hann þó fyrir ári síðan í þeirra fyrstu skák.  Þegar yfir lauk voru það  „Ellin og Æskan", þ.e.a.s. aldursforsetinn og ungmennið, sem urðu hlutskarpastir, báðir með 9½  vinning af 11 mögulegum. Sá eldri reyndist þó vera örlítið hærri á stigum og fékk því tíu GrandPrix prik í kaupbæti en Vignir Vatnar átta, en sá ungi leiðir nú keppnina um grjótið.   

Úrslit í skákum þess stutta er merkileg saga út af fyrir sig en flestir mótherjar hans, margfalt eldri að árum, guldu fyrir honum mikið afhroð líkt og Gretti forðum:  Gunni Gunn  0-1; Sigurður E. 1-0; Óskar Long 1-0; Jón Þ. Þór 1-0; Stefán Már 1-0; Baldur Hermanns 1-0; Friðgeir Hólm 1-0; Stefán Baldurs ½- ½ ; Guðf. Kjartans 1-0; Páll G. 1-0; Kristinn Johnson 1-0, sem gerir 9 ½ vinning af 11 mögulegum. Glæsilegur árangur það.

Nánari úrslit má sjá á meðf. mótstöflu og myndum og á www.galleryskak.net

 

 

Staðan í Kappteflinu um Patagóníusteininn, eftir 4 mót af sex er nú þessi:

        (4 bestu mót hvers keppanda telja til vinnings)

1.    Vignir Vatnar Stefánsson ..... 24 stig (3)

2.    Harvey Georgsson ................21 stig (3)

3.    Gunnar Kr. Gunnarsson ....... 20 stig (2)

4.    Guðf. R. Kjartansson............. 19 stig (4)

Hlé verður gert á mótaröðinni næstu 2 vikur meðan hinn ungi sveinn bregður sér til Slóveníu til að tefla fyrir Íslands hönd í heimsmeistaramóti ungmenna 10 ára  (12; 14; 16; 18) og yngri. Er honum óskað velfarnaðar í þeirri hörðu keppni og mikla darraðardansi sem þar býður hans.

Eftir sem áður mæta taflþyrstir skákunnendur grjótharðir til leiks í Gallerýinu, þó kappteflið um  steinninn bíði, næstu fimmtudagskvöld kl. 18.  Þar verður vafalaust hart tekist á „ef að líkum lætur", eins og Eiríkur grafari fyrir vestan hafði að orðtæki en hjá honum lét allt að líkum.

Myndaalbúm 

Pisitill og myndir: Einar S. Einarsson

Hjörvar í beinni frá bresku deildakeppninni

Alþjóðlegi meistarinn Hjörvar Steinn Grétarsson (2512), sem teflir á fyrsta borði fyrir Jutes of Kent, situr nú að tafli í bresku deildakeppninni sem fer fram Sunningdale í Englandi.  Í fyrstu umferð í gær tapaði hann fyrir alþjóðlega meistaranum Andrew Greet (2438).

Nú situr Hjörvar að tefla gegn enska stórmeistaranum Peter H. Wells (2488).  Skákin er í beinni.

• Heimasíða mótsins 
• Beinar útsendingar

 

Dagur með jafntefli í fyrstu umferð í Búdapest

Alþjóðlegi meistarinn Dagur Arngrímsson  (2368) gerði jafntefli við danska alþjóðlega meistarann Andreas Skytte Hagen (2418)  í fyrstu umfeð GM-flokks First Saturday-mótsins í Búdapest sem fram fór gær.

Sjö skákmenn taka þátt í GM-flokki og eru meðalstigin 2426.  Dagur er nr. 5 í stigaröð keppenda.

• Heimasíða mótsins
• Chess-Results

 

 

Atskákmót Reykjavíkur fer fram á mánudag

Atskákmót Reykjavíkur sem jafnframt er atskákmót Hellis fer fram mánudaginn 5. nóvember, þ.e. viku fyrr en áætlað var skv. dagskrá.  Mótið fer fram í félagsheimili Hellis, Álfabakka 14a í Mjódd. Tefldar verða 6 umferðir með Svissnesku-kerfi og hefur hvor keppandi 15 mínútur á skák. Mótið hefst kl. 19:30.

Verði tveir jafnir í baráttunni um annanhvorn titilinn verður teflt tveggja skáka hraðskákeinvígi. Verði jafnt að því loknu verður tefldur hraðskákbráðabani. Verði fleiri en tveir jafnir verður tefld einföld umferð, hraðskák. Verði enn jafnt, þá bráðabani.  

Núverandi atskákmeistari Reykjavíkur er Einar Hjalti Jensson og atskákmeistari Hellis er Hjörvar Steinn Grétarsson.

Verðlaun:

1. 15.000

2. 7.500 

3. 4.000

 Þátttökugjöld:

16 ára og eldri: 1000 kr

15 ára og yngri: 500

Vignir Vatnar snýr aftur í TR

Eftir skamma fjarveru hefur Vignir Vatnar Stefánsson gengið aftur í raðir Taflfélags Reykjavíkur ásamt föður sínum, Stefáni Má Péturssyni.  Félagið fagnar endurkomu þeirra feðga og býður þá velkomna í elsta og stærsta skákfélag landsins en þess má til gamans geta að langa langa afi Vignis, Pétur Zophaníasson, var einn af stofnendum þess fyrir 112 árum.

Næst á döfinni hjá Vigni Vatnari er þátttaka í Heimsmeistaramóti ungmenna sem fer fram í Maribor, Slóveníu, dagana 7.-19. nóvember og verður spennandi að fylgjast með gengi hans þar.  Nánari upplýsingar um mótið má finna hér.

Hilmir Freyr unglingameistari Hellis

Hilmir Freyr Heimisson sigraði á unglingameistaramóti Hellis sem lauk sl. þriðjudag og er þar með unglingameistari Hellis 2012. Hilmir fékk 6 v í sjö skákum og tryggði sér sigurinn í mótinu með því að vinna Jakob Alexander í lokaumferðinni meðan helsti keppinauturinn í mótinu Heimir Páll tapaði fyrir Felix.

Hilmir lenti í smá vandræðum fyrri keppnisdaginn þegar allar skákir hans einkenndust af þungri og langri stöðubaráttu sem tóku mikinn tíma þannig að hann var alltaf annað hvort síðastur eða með þeim síðustu að klára. Þessar skákir tóku mikla orku þannig að það var í raun vel gert hjá honum að sleppa með að tapa bara einni skák í fyrri hlutanum á móti Heimi í fjórðu umferð.

Í seinni hlutanum tefldi Hilmir Freyr af öryggi og vann allar skákirnar og landaði sigrinum af öryggi. Í öðru sæti varð Svandís Rós Ríkharðsdóttir með 5,5v og 25 stig. Svandís tefldi vel í þessu móti og vann ýmsa góða skákmenn í mótinu og stöðvaði m.a. sigurgöngu Heimis í 6 umferð, þegar fátt virtist geta stoppað hann eftir tvo sigra gegn stigahæstu mönnum mótsins þeim Hilmi Frey og Vigni Vatnari.

Þriðji var Felix Steinþórsson með 5,5v og 24 stig. Eftir tap í annari umferð og jafntefli í þeirri þriðju virtist Felix ekki líklegur til afreka en Monrad vindurinn bar hann skjótt upp og með góðum sigri í lokaumferðinni náði hann þriðja sætinu. Hildur Berglind Jóhannsdóttir varð stúlknameistari Hellis.

Lokastaðan:

• 1.   Hilmir Freyr Heimisson                     6v/7
• 2.   Svandís Rós Ríkharðsdóttir              5,5v     (25)
• 3.   Felix Steinþórsson                           5,5v     (24)
• 4.   Heimir Páll Ragnarsson                    5v 
• 5.   Vignir Vatnar Stefánsson                 4,5v
• 6.   Mikael Kravchuk                               4,5v
• 7.   Jakob Alexander Petersen               4v
• 8.   Óskar Víkingur Davíðsson                4v
• 9.   Jón Otti Sigurjónsson                      4v
• 10. Sindri Snær Kristófersson                4v
• 11. Hildur Berglind Jóhannsdóttir           3v
• 12. Jóhann Arnar Finnsson                    3v
• 13. Sigurður Kjartansson                       3v
• 14. Brynjar Haraldsson                         3v
• 15. Birgir Ívarsson                                3v
• 16. Alec Sigurðarson                              3v
• 17. Pétur Ari Pétursson                         2v
• 18. Halldór Atli Kristjánsson                  1,5v
• 19. Kristófer Stefánsson                       1,5v
• 20. Þorsteinn Magnússon                      1v 
• 21. Kjartan Helgi Guðmundsson            1v

Myndaalbúm (VÓV)