Íslandsmót skákfélaga: Pörun 5. umferðar í 3. og 4. deild

Búið er að para í 3. og 4. umferð Íslandsmóts skákfélaga sem fram fer 1. og 2. mars 2013.  Pörun í 4. deild er gerð með hefðbundnum fyrirvara um að öll liðin taki þátt í síðari hlutanum.  

Keppendur á Íslandsmóti skákfélaga eru hvattir til að skoða skráningu eigin úrslita í Chess-Results til að fyrirbyggja villur.

Pörunina og öll einstaklingsúrslit Íslandsmóts skákfélaga má nálgast á Chess-Results.

Skákdeild Fjölnis býður áhugasömum skákkrökkum upp á skákbúðir

Skákdeild Fjölnis, í samstarfi við Skákakademíu Reykjavíkur og Skákskóla Íslands, býður öðru sinni áhugasömum skákkrökkum upp á tveggja daga skákbúðir yfir eina helgi. Í fyrra tókst einstaklega vel til þegar Fjölnir stóð fyrir skákbúðum í sumarbúðum KFUM í Vatnaskógi. Nú verða skákbúðirnar í sumarbúðum skáta að Úlfljótsvatni helgina 20. - 21. október sem er vetrarleyfishelgi í flestum grunnskólum Reykjavíkur.

Boðið verður upp á skákkennslu á laugardegi og skákmót með fjölda vinninga á sunnudegi. Góður tími verður til leikja og frjálsan tíma í ævintýraveröldinni að Úlfljótsvatni og kvöldvöku með spilum og leikjum. Skákbúðirnar eru ætlaðar grunnskólakrökkum á öllum aldri sem búnir eru að nú undirstöðuatriðum skáklistarinnar.

Fyrir skákkennslunni fara þeir Helgi Ólafsson skólastjóri Skákskóla Íslands og Stefán Bergsson framkvæmdarstjóri Skákakademíunnar. Skákbúðastjórar verða þau Helgi Árnason formaður skákdeildar Fjölnis og Andrea Margrét Gunnarsdóttir frá Skákakademíu Reykjavíkur. Nemendum skákbúðanna verður skipt í flokka eftir getu og aldri og ætti því hver þátttakandi að fá kennslu við hæfi. Þátttökugjald verður 8000 kr og er fullt fæði, rútuferðir, skákkennsla, þátttaka í skákmóti og gjafir innifalið í verðinu.

Dagskrá og skipulag skákbúðanna liggur nú fyrir og verður kynnt á Íslandsmóti skákfélaga nú um helgina í Rimaskóla, á skak.is og Facebook auk þess sem tölvupóstur verður sendur til allra sem æfa skák með skákfélögum og skákskólum. Skráning fer fram á skrifstofu Skáksambandsins Faxafeni 12 í síma 568 9141 eða með tölvupósti [e-mail].

 

Íslandsmót kvenna hefst 19. október

Íslandsmót kvenna 2012 fer fram dagana 19. - 31. október nk. í húsnæði Skáksambands Íslands, Faxafeni 12, Reykjavík.  Að þessu sinni verður teflt í einum flokki, þ.e. opið öllum konum/stúlkum.

Tímamörk:   90 mín. + 30 sek. á leik.

Dagskrá:         

• Föstud., 19. okt., kl. 19, 1. umferð
• Mánud., 22. okt., kl. 19, 2. umferð
• Miðvikud., 24. okt., kl. 19, 3. umferð
• Föstud., 26. okt., kl. 19, 4. umferð
• Sunnud., 28. okt., kl. 13, 5. umferð
• Mánud., 29. okt., kl. 19, 6. umferð
• Miðvikud., 31. okt., kl. 19, 7. umferð

Verðlaun:       

• 1. 40.000.-
• 2. 25.000.-
• 3. 15.000.-

Tilkynna skal þátttöku til Skáksambands Íslands í síma 568 9141 eða í tölvupósti í netfangið [e-mail] fyrir 10. október nk.

Æfingar hefjast hjá Taflfélagi Akraness

Mánudaginn 15. október ætlar Taflfélag Akraness að byrja aftur með skákæfingar eftir gott sumarhlé. Munu þær verða á mánudagskvöldum í vetur klukkan 20.00 í Fjölbrautarskóla Vesturlands. Það kostar ekkert að vera með en frjáls framlög eru auðvitað alltaf vel þeginn. Akurnesingar og nærsveitungar sem og aðrir landsmenn eru því hér með hvattir til að sýna sig og máta aðra á Akranesi í framtíðinni.

Fyrir hönd Taflfélags Akraness,

Valgarð Ingibergsson

Barna- og unglingaæfingar SA hefjast í dag

Æfingar í almennum flokki er nú að hefjast að nýju mánudaginn 8. október og verða framvegis á þeim degi kl. 16.30.

Framhaldsflokkurinn verður svo á miðvikudögum kl. 17.00.

Nokkrar aukaæfingar fyrir framhaldsflokk verða svo ákveðna sérstaklega.

Æfingagjöld á haustönn verða kr. 5000. Innifalið er ókeypis þátttaka í öllum mótum Skákfélagsins.

Myndaveisla frá Íslandsmótinu!

Hægt er að skoða fjölda mynda frá Íslandsmóti skákfélaga í albúmum hér á síðunni. Við hvetjum skákáhugamenn til að skoða myndirnar og dreifa þeim sem víðast, til dæmis á Facebook.

Þau sem eiga skemmtilegar myndir frá Íslandsmótinu, og vilja deila þeim með lesendum, eru hvött til að senda þær til ritstjóra á netfangið [e-mail].

Myndir I (HJ)

Myndir II (HJ)

Myndir III (HJ)

Myndir IV (HÁ og GB)

Myndir V (ESE)

Skákþáttur Morgunblaðsins: Gullið gekk Kínverjum úr greipum

Fyrir síðustu umferð ólympíumótsins í Istanbúl á dögunum áttu kínversku sveitirnar í opna- og kvennaflokknum góða möguleika á gullverðlaunum. Karlasveitin var jöfn Rússum og Armenum en með sigri í lokaumferðinni hefði sveitin staðið langbest að vígi þar sem allar niðurstöður hnigu í sömu átt; ef grípa þyrfti til stigaútreiknings myndi kínverska vinna. Reyndin varð sú að stigaútreikning þurfti til en þá þurfti með afar flóknu kerfi að gera upp á milli armensku sveitarinnar og þeirrar rússnesku. Kína tapaði nefnilega fyrir Úkraínu og endaði í fjórða sæti. Í kvennaflokknum fór einnig allt á versta veg, kínversku stúlkurnar, með heimsmeistarann Hou Yifan á 1. borði, unnu sína viðureign en við stigaútreikning reyndust keppinautar þeirra Rússar hafa betur. Þar er þó bættur skaðinn því kínverska kennaliðið hefur margsinnis unnið gull á ólympíumótum.

Vandinn liggur nefnilega hjá körlunum. Bíði maður nógu lengi við bakka Gula fljótsins er aldrei að vita nema lík óvinanna fljóti þar framhjá, segir kínverskt máltæki fornt. Einn góðan veðurdag munu fremstu skákmenn þeirra uppfylla væntingar alþýðulýðveldisins um fullnaðarsigur á vettvangi ólympíumótanna. Til þess hafa þeir a.m.k. nægan mannskap. Hljómfögur nöfn stórmeistara á borð við Liren Ding, Ni Hua og Xiangzi Bu kalla fram minningar um skæran bjölluhljóm sem ónefndur íslenskur skákmaður þóttist heyra þegar yfir menn dundu hinar frægu „kínversku drottningarfórnir" sem voru aðalsmerki frumherjanna sem tefldu í Buenos Aires 1978. Í dag er leiktækni sumra kínversku skákmannanna svo góð að minnir á vel þjálfaða borðtennisleikara. Og það var ekki hátt á þeim risið, andstæðingunum í lokaumferðinni, Úkraínumönnum. Ivantsjúk hafði orðið fyrir ýmsum skakkaföllum í Istanbúl og sumir aðrir langt frá sínu besta. Sigurstund Kínverja virtist ætla að renna upp - en þeir töpuðu 1:3! Ég hef dálítið verið að velta ástæðunni fyrir þessari kínversku „tregðu gagnvart gullinu". Niðurstaðan er ekki alveg komin. Þegar Mikhael Tal kom til Íslands árið til 1964 kjaftaði á honum hver tuska. Þó kom hann úr lokuðu samfélagi. Kínversku skákmennina er ekki hægt að nálgast á sama hátt:

ÓL 2012; 11. umferð:

Vasilí Ivantsjúk - Wang Hao

Nimzoindversk vörn

1. d4 Rf6 2. c4 e6 3. Rc3 Bb4 4. e3 0-0 5. Bd3 d5 6. Rf3 b6 7. a3 Bxc3+ 8. bxc3 c6?!

Sérkennilegur leikur. Sjálfsagt er 8.... dxc4 9. Bxc4 c5 ásamar - Dc7 o.s.frv.

9. cxd5 cxd5 10. Be2 Rc6 11. O-O Ra5 12. a4 He8 13. Re5 Re4 14. f3 Rd6

Vitaskuld ekki 14.... Rxc3 15. Dc2 og vinnur.

15. Ba3 Bb7 16. Bxd6 Dxd6 17. f4 g6 18. Dg4

Hvítur er búinn að byggja upp vænlega sóknarstöðu.

18.... Rc4 19. Dg3 Dc7 20. Bxc4 dxc4 21. f5 f6

Nú er afar freistandi að fórna manni. Til þess að dæmið gangi upp þarf að finna 26. leikinn.

22. fxg6! fxe5 23. Hf7 Dc6 24. gxh7+ Kxf7 25. Hf1+ Ke7

Ivantsjúk var búinn að sjá að valdið á e7-reitnum skiptir hér sköpum.

26. h8(D)! Hxh8 27. Dg7+ Kd6 28. dxe5+!

- og Wang Hao gafst upp. Framhaldið gæti orðið 28.... Kc5 29. De7+ Kd5 30. Hd1+ Ke4 31. Hd4+ Kxe3 32. Dg5+ Ke2 33. Dd2 mát.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 30. september 2012.

Skákþættir Morgunblaðsins

[Event "Chess Olympiad"] [Site "Istanbul TUR"] [Date "2012.09.09"] [EventDate "2012.08.28"] [Round "11.1"] [Result "1-0"] [White "Vassily Ivanchuk"] [Black "Wang Hao"] [ECO "E52"] [WhiteElo "2769"] [BlackElo "2726"] [PlyCount "56"] 1. d4 Nf6 2. c4 e6 3. Nc3 Bb4 4. e3 O-O 5. Bd3 d5 6. Nf3 b6 7. a3 Bxc3+ 8. bxc3 c6 9. cxd5 cxd5 10. Qe2 Nc6 11. O-O Na5 12. a4 Re8 13. Ne5 Ne4 14. f3 Nd6 15. Ba3 Bb7 16. Bxd6 Qxd6 17. f4 g6 18. Qg4 Nc4 19. Qg3 Qc7 20. Bxc4 dxc4 21. f5 f6 22. fxg6 fxe5 23. Rf7 Qc6 24. gxh7+ Kxf7 25. Rf1+ Ke7 26. h8=Q Rxh8 27. Qg7+ Kd6 28. dxe5+ Kd5 1-0

Eitt skemmtilegasta mót ársins: Geðheilbrigðismótið á fimmtudagskvöld

Fimmtudagskvöldið 11. október er komið að einu skemmtilegasta hraðskákmóti ársins: Alþjóðlega geðheilbrigðismótinu, sem nú er haldið áttunda árið í röð.

Teflt verður í höfuðstöðvum Taflfélags Reykjavíkur, Faxafeni 12. Telfdar verða 7 umferðir um 7 mínútna umhugsunartíma. Veitt eru vegleg bókaverðlaun frá Forlaginu í ýmsum flokkum.

Mótið er haldið í tilefni af Alþjóðlega geðheilbrigðisdeginum, og að því standa Skákfélag Vinjar, Taflfélag Reykjavíkur, Taflfélagið Hellir og Skákakademían.

Þrír efstu á mótinu fá vegleg bókaverðlaun frá Forlaginu, en auk þess eru veitt verðlaun fyrir bestan árangur kvenna, 18 ára og yngri, 12 ára og yngri og 60 ára og eldri.

Skákmótið hefst stundvíslega klukkan 20 á fimmtudagskvöldið og eru keppendur hvattir til að mæta ekki síðar en 19.45 í Faxafenið.

Skákáhugamenn á öllum aldri eru hvattir til að mæta og taka þátt í skemmtilegri skákveislu. Mótið er öllum opið og þátttaka er ókeypis.

Stofnuð hefur verið FACEBOOK-síða þar sem hægt er að skrá sig til leiks.

Bolvíkingar efstir eftir fyrri hlutann - fjögur lið með vinningsmöguleika

 

Taflfélag Bolungarvíkur leiðir eftir fyrri hluta Íslandsmóts skákfélaga sem fram fór um helgina í Rimaskóla.  Bolvíkingar sem lögðu Akureyringa í 4. umferð, 6,5-1,5, hafa 22,5 vinning.  Víkingaklúbburinn, sem vann sigur á b-sveit Bolvíkinga eru í 2. sæti með 22 vinninga, Taflfélag Reykjavíkur, sem vann 6-2 sigur á Goðum-Mátum eru í 3. sæti með 21,5 vinning og Eyjamenn sem unnu 6-2 sigur á Hellismönnum eru í fjórða sæti með 20,5 vinning.   Það má búast við æsispennandi baráttu í síðari hlutanum sem fram fer 1. og 2. mars í Hörpu, strax í kjölfar Reykjavíkurmótsins.

Staðan í fyrstu deild:

1. Taflfélag Bolungarvíkur a-sveit 22,5 v.
2. Víkingaklúbburinn 22 v.
3. Taflfélag Reykjavíkur 21,5 v.
4. Taflfélag Vestamanneyja 20,5 v.
5. Goðinn-Mátar 17 v.
6. Taflfélagið Hellir 13 v.
7. Skákfélag Akureyrar 7 v.
8. Taflfélag Bolungarvíkur 4,5 v.

Staða efstu liða í 2. deild:

1. Goðinn-Mátar b-sveit 16 v.
2. Taflfélag Reykjavíkur b-sveit 15,5 v.
3. Skákdeild Fjölnir 13 v.
4. Taflfélag Vestmannaeyja 13 v.

Staða efstu liða í 3. deild:

1. Víkingaklúbburinn 7 stig (16,5 v.)
2. Skákfélag Vinjar 6 stig (17 v.)
3. Taflfélag Akraness 6 stig (14,5 v.)

Staða efstu liða í 4. deild:

1. Briddsfjelagið 7 stig (17,5 v.)
2. Skákfélag Akureyrar 6 stig (16,5 v.)
3. Taflfélagið Hellir d-sveit 6 stig (15,5 v.)
4. UMSB (Borgarnes) 6 stig (15,5 v.)

• Chess-Results
• Myndaalblúm (GB og HÁ)
• Myndaalbúm (HJ)

Fimm lið enn í baráttunni um Íslandsmeistaratitilinn!

Að loknum þremur umferðum á Íslandsmóti skákfélaga er ljóst að fimm lið eiga enn möguleika á Íslandsmeistaratitlinum, en þrjú lið berjast í fallbaráttunni. Bolvíkingar, sem eru í efstu sæti og stefna að fimmta Íslandsmeistaratitlinum í röð, mæta Skákfélagi Akureyrar í 4. umferð, sem hefst kl. 11. Akureyringar hafa átt erfitt uppdráttar og eru í næstneðsta sæti með 5,5 vinning, en Bolar hafa rakað til sín 16 vinningum.

TR er nú í 2. sæti með 15,5 vinning. Andstæðingar þeirra í 4. umferð eru Goðinn-Mátar, sem eru í 3. sæti með 15 vinninga. TR hefur sýnt mjög góða takta á mótinu og sigrað bæði Víkingaklúbbinn og Vestmannaeyinga.

Víkingarklúbburinn er þó til alls líklegur, enda búinn að mæta tveimur efstu liðunum, en teflir við botnlið B-sveitar Bolvíkinga í fjórðu umferð.

Eyjamenn eru nú í 5. sæti með 14,5 vinning og mæta Helli í dag. Hellismenn hafa átt misjöfnu gengi að fagna og hafa 11 vinninga, og virðast líklegir til að sleppa við fall í 2. deild, þótt mikið sé eftir af þessu skemmtilega móti.

Óhætt er að segja að spennan hafi sjaldan eða aldrei verið meiri á Íslandsmóti skákfélaga!

• Chess-Results
• Myndaalblúm (GB og HÁ)
• Myndaalbúm (HJ)
• Myndaalbúm II (HJ)