Henrik í beinni frá Brønshøj

Stórmeistarinn Henrik Danielsen (2524) teflir um helgina í alþjóðlegu móti, BSF Cup, sem fram fer í Brønshøj í Danmörku.  Í fyrstu umferð, sem hófst fyrir skemmstu teflir Henrik við danska alþjóðlega meistarann Jacob Vang Glud (2520).

10 skákmenn taka þátt í a-flokknum og eru meðalstign 2467 skákstig.  Henrik er næststigahæstur keppenda.

Tefldar eru tvær skákir á dag alla daga nema fyrsta keppnisdag.  Umferðirnar hefjast kl. 8 og 13:30.

• Heimasíða mótsins
• Beinar útsendingar

 

GM-pistill Jóns Þorvaldssonar

Jón Þorvaldsson, liðsstjóri a- og b-sveita Goðans Máta hefur ritað pistil um framgöngu sveitanna á Íslandsmóti skákfélaga. Jón fer mikinn í pistilinum og er skáldlegur mjög eins og honum er einum lagið.

Í pistlinum segir meðal annars:

Þegar í Rimaskóla var komið gengum við fylktu liði og sperrtum brjóskassa inn í keppnissalinn, álíka upplitsdjörf og forfeður okkar og formæður þegar þau skunduðu á Þingvöll á söguöld, en þó vantaði litklæði Spiderman-búningsins í sýningu þessa. Reyndar var Hermanni formanni létt eftir á þegar hann áttaði sig á því að ef A-liðið hefði íklæðst Spiderman-búningnum og Goðinn-Mátar unnið stórsigur, hefði mátt bera okkur þeim sökum að Gawain Jones hefði teflt allar skákirnar.  

og 

Tæpast er unnt að lýsa þeirri stórkostlegu stemningu sem mætti okkur á skákstað. Loftið var mettað breiðu litrófi tilfinninga: tilhlökkun, vinarþeli, grimmd, sigurvilja, ótta, auðmýkt, hroka, háspennu, svekkelsi og sigurvímu. Mitt í þessu lævi blandna andrúmslofti lék mönnum þó bros á vör og það bros er ekta. Keppendum eru upp til hópa vel til vina og liðsstjórar líkjast bændum sem fylgjast hreyknir með gripunum sínum í réttunum. Stöku forvígismenn ofmetnast kannski um stund en sjá fljótlega að sér og verða sömu ljúfmennin og fyrr. Sérstaklega var gaman að sjá tvær af goðsagnapersónum íslenskrar skáksögu, þá Friðrik Ólafsson og Margeir Pétursson, setjast að tafli á ný. Þátttaka þeirra ein og sér lyfti þessum viðburði á hærra plan.  

Pistil Jóns má nálgast í heild sinni á heimasíðu Goðans.

Skákkynning og fjöltefli fyrir börn og ungmenni í Borgarbókasafninu á sunnudag

Skákakademían verður með skemmtilega skákkynningu fyrir börn og ungmenni á Borgarbókasafninu, Tryggvagötu 15, sunnudaginn 14. október milli kl. 15 og 16.30. Þar verður byrjendum boðið upp á leiðsögn um töfraheim skákíþróttarinnar og þau sem eru lengra komin geta spreytt sig í fjöltefli við meistara.

Skákakademían sinnir nú skákkennslu í fjölmörgum grunnskólum Reykjavíkur, auk þess að standa fyrir fjölda viðburða fyrir börn og fullorðna. Á skákkynningunni á sunnudaginn munu meistararnir Björn Þorfinnsson og Róbert Lagerman tefla við krakkana, en báðir eru þeir reyndir skákkennarar. Róbert hefur verið tilnefndur til samfélagsverðlauna Heimilis og skóla fyrir kennslu í leikskólum, og Björn hefur þjálfað mörg efnilegustu börn landsins.

Börn, unglingar og fjölskyldur þeirra eru velkomin á söfn Borgarbókasafns og þar er alltaf eitthvað um að vera. Fyrir utan allar bækurnar, bíómyndirnar, tónlistina allt hitt sem er hægt að fá að láni er hægt að skutla sér í næsta stól, FatBoy eða dýnu og láta fara vel um sig, spjalla eða glugga í bók eða blað.

Á laugardögum og sunnudögum yfir vetrartímann er boðið upp á dagskrá í Bókasafninu í Gerðubergi og aðalsafni fyrir börn og fjölskyldur þeirra og vikulega er boðið upp á fjölskyldumorgna í sömu söfnum fyrir fjölskyldur með börn á aldrinum 0-6 ára. Í samstarfi við skóla í hverfunum er boðið upp á heimanámsaðstoð í aðalsafni, Bókasafninu í Gerðubergi og í Kringlusafni einu sinni í viku. Fyrir utan þessa föstu dagskrá eru stórir og litlir viðburðir á söfnunum allt árið um kring.

Dagskráin í Borgarbókasafninu við Tryggvagötu er opin öllum börnum og ungmennum og er þátttaka ókeypis. Samhliða skákkynningunni mun safnið sýna skákbækur og skáktímarit úr fórum sínum.

Fjör og fjölmenni á Alþjóða geðheilbrigðismótinu: Jóhann Hjartarson sigraði

Jóhann Hjartarson stórmeistari sigraði á Alþjóða geðheilbrigðismótinu sem fram fór á fimmtudagskvöld. Keppendur voru tæplega 70 og heppnaðist framúrskarandi vel. Jóhann hlaut 6,5 vinning í sjö skákum, gerði aðeins jafntefli í síðustu umferð gegn Magnúsi Erni Úlfarssyni.

Lenka Ptacnikova stórmeistari varð í 2. sæti með 6 vinninga, og í 3.-6. sæti urðu Jón Viktor Gunnarsson, Davíð Ólafsson, Róbert Lagerman og Magnús Örn með 5,5 vinning.

Helgi Hjörvar alþingismaður lék fyrsta leikinn á mótinu fyrir Björgvin Kristbergsson gegn Jóhanni Hjartarsyni, og lýsti mikilli ánægju sinni með mótshaldið.

Efstu menn fengu vegleg bókaverðlaun frá Forlaginu og Sögum útgáfu, og sama gilti um sigurvegara í hinum ýmsu flokkum.

Lenka hlaut kvennaverðlaunin, auk silfurverðlauna á mótinu, en flestar bestu skákkonur landsins tóku þátt í mótinu. Guðlaug Þorsteinsdóttir varð næst kvenna með 5 vinninga og Sóley Lind Pálsdóttir varð þriðja með 4 vinninga.

Bragi Halldórsson varð efstur skákmanna 60 ára og eldri, hlaut 4,5 vinning.

Óliver Aron Jóhannesson varð efstur skákmanna 18 ára og yngri, hlaut 4,5 vinning.

Hilmir Freyr Heimisson varð efstur 12 ára og yngri, hlaut 3,5 vinning.

Síðast en ekki síst hlaut Björgvin Kristbergsson sérstök háttvísisverðlaun, sem nú voru veitt í fyrsta skipti.

Þetta var í níunda sinn sem Alþjóða geðheilbrigðismótið var haldið. Arnar Valgeirsson hefur löngum borið hita og þunga af skipulagningu mótsins, og var klappað hraustlega fyrir honum í upphafi mótsins.

Arnar gat nú leyft sér að einbeita sér að taflmennskunni, en að mótinu stóðu Skákfélag Vinjar, Taflfélag Reykjavíkur, Taflfélagið Hellir og Skákakademían.

Úrslit á Alþjóða geðheilbrigðismótinu (Chess results)

Myndaalbúm frá Alþjóða geðheilbrigðismótinu (Hrafn Jökulsson og Jóhann Hjartarson)

Skákbúðir Fjölnis fara fram 20. og 21. október

Skákdeild Fjölnis, í samstarfi við Skákakademíu Reykjavíkur og Skákskóla Íslands, býður öðru sinni áhugasömum skákkrökkum upp á tveggja daga skákbúðir yfir eina helgi. Í fyrra tókst einstaklega vel til þegar Fjölnir stóð fyrir skákbúðum í sumarbúðum KFUM í Vatnaskógi. Nú verða skákbúðirnar í sumarbúðum skáta að Úlfljótsvatni helgina 20. - 21. október sem er vetrarleyfishelgi í flestum grunnskólum Reykjavíkur.

Boðið verður upp á skákkennslu á laugardegi og skákmót með fjölda vinninga á sunnudegi. Góður tími verður til leikja og frjálsan tíma í ævintýraveröldinni að Úlfljótsvatni og kvöldvöku með spilum og leikjum. Skákbúðirnar eru ætlaðar grunnskólakrökkum á öllum aldri sem búnir eru að nú undirstöðuatriðum skáklistarinnar.

Fyrir skákkennslunni fara þeir Helgi Ólafsson skólastjóri Skákskóla Íslands og Stefán Bergsson framkvæmdarstjóri Skákakademíunnar. Skákbúðastjórar verða þau Helgi Árnason formaður skákdeildar Fjölnis og Andrea Margrét Gunnarsdóttir frá Skákakademíu Reykjavíkur. Nemendum skákbúðanna verður skipt í flokka eftir getu og aldri og ætti því hver þátttakandi að fá kennslu við hæfi. Þátttökugjald verður 8000 kr og er fullt fæði, rútuferðir, skákkennsla, þátttaka í skákmóti og gjafir innifalið í verðinu.

Dagskrá og skipulag skákbúðanna liggur nú fyrir og verður kynnt á Íslandsmóti skákfélaga nú um helgina í Rimaskóla, á skak.is og Facebook auk þess sem tölvupóstur verður sendur til allra sem æfa skák með skákfélögum og skákskólum. Skráning fer fram á skrifstofu Skáksambandsins Faxafeni 12 í síma 568 9141 eða með tölvupósti [e-mail].

 

Íslandsmót kvenna hefst 19. október

Íslandsmót kvenna 2012 fer fram dagana 19. - 31. október nk. í húsnæði Skáksambands Íslands, Faxafeni 12, Reykjavík.  Að þessu sinni verður teflt í einum flokki, þ.e. opið öllum konum/stúlkum.

Tímamörk:   90 mín. + 30 sek. á leik.

Dagskrá:         

• Föstud., 19. okt., kl. 19, 1. umferð
• Mánud., 22. okt., kl. 19, 2. umferð
• Miðvikud., 24. okt., kl. 19, 3. umferð
• Föstud., 26. okt., kl. 19, 4. umferð
• Sunnud., 28. okt., kl. 13, 5. umferð
• Mánud., 29. okt., kl. 19, 6. umferð
• Miðvikud., 31. okt., kl. 19, 7. umferð

Verðlaun:       

• 1. 40.000.-
• 2. 25.000.-
• 3. 15.000.-

Skráning fer fram hér á Skák.is.  Upplýsingar um skráða keppendur má nálgast hér.

Caruana og Carlsen efstir á Alslemmumótinu

Fabiano Caruana (2773) og Magnus Carlsen (2846) eru efstir og jafnir með 13 stig að lokinni áttundu umferð Alslemmumótsins sem fram fór í Bilbao í dag.  Öllum skákum dagsins lauk með jafntefli en í gær vann Carlsen Vallejo Pons (2697).

Í 9. og næstsíðustu umferð, sem fram fer á morgun, mætast m.a. Carlsen-Anand og Caruana-Aronian.

Staðan eftir 9 umferðr:

• 1. Caruana (2773) og Carlsen (2846) 13 stig
• 3. Aronian (2816) 10 stig
• 4. Anand (2780) 8 stig
• 5. Karjakin (2778) 6 stig
• 6. Vallejo (2697) 5 stig

• Heimasíða mótsins
• Beinar útsendingar (hefjast kl. 15)
  

Gallerý skák: Vignir Vatnar lék á als oddi

KAPPTEFLIÐ UM PATAGÓNINUSTEININN III - 6 kvölda mótaröð,  þar sem 4 bestu mót hvers keppenda telja til  GP stiga og vinnings,  hefst  í Gallerý Skák í  kvöld kl. 11. október, á geðheilbrigðisdaginn. Sigurvegari fyrri móta er hinn aldni senn áttræði meistari Gunnar Kr. Gunnarsson, sem enn tefldir eins og herforingi. 

Eins og áður hefur komið fram í pistlum þessum fellst mikil geðrækt í því að tefla sér til ánægju og hugarhægðar.  Alvarleg "skákdella"  fellur á fræðimáli geðlækna undir svokallaða "áráttupersónuleikastreyturöskun"  sem og hægt er að halda niðri með því "að sjást og kljást" við  verðuga andstæðinga við manntaflið annað slagið.   Með því er hægt að komast hjá ýmsum eftirköstum eins og "skákkvíðahliðrunarstreyturöskun", sem annars getur orðið mönnum þung í skauti og gert fólki gramt í geði.  Því er skákiðkun af hinu góða ekki aðeins fyrir viðkomandi heldur líka fyrir vini þeirra og vandamenn.

Sl. fimmtudagskvöld lék hinn ungi og upprennandi skáksnillingur Vignir Vatnar Stefánsson, nýorðinn 9 ára,  á als oddi í Gallerýinu og lék gamalreynda gamlingjana grátt sem og aðra þátttakendur.  Varð hin rísandi vonarstjarna í 2 sæti með 8 vinninga af 11 mögulegum.  Sigurvegari var hinn snjalli og eitilharði reynslubolti Ingimar Halldórsson, með 8.5 v. en hann lætur sjaldan deigan síga og gefur ekkert eftir þegar hann sest að tafli á annað borð  -hvort heldur er í Riddaranum, hjá Æsum eða KR -og er jafnan erfiður við að eiga og hann því sigursæll mjög.  Það vakti athygli "að enginn má sköpum renna", þeir sem oftast eru fyrstir verða stundum að bíta í það súra epli að verða síðastir, eins og sjá má á meðf. mótstöflu.   

 

Það fer vel á því að tefla sem víðast  á Alþjóðlega geðheilbrigðisdeginum sem að þessu sinni er helgaður geðheilsu barna og unglinga.  Aðaldagskráin hefst með "skemmtigeðgöngu" frá Skólavörðuholti kl. 16.30 en síðan verður hátíð í Gamla bíó kl. 17.30 og  stóra Alþjóðlega geðheilbrigðisskákmótið hefst svo í Faxafeninu kl. 20.

Í Gallerýinu verður hins vegar sest að tafli kl. 18 og tefldar 11 umferðir með 10 mín. umhugsunartíma. Lagt í púkk fyrir kaffi og matföngum. Næg bílastæði.  

www.galleryskak.net

Alþjóðlega geðheilbrigðismótið í kvöld!

Skákmenn á öllum aldri og öllum styrkleikaflokkum hafa boðað komu sína á Alþjóðlega geðheilbrigðismótið, sem fram fer í Faxafeni 12 í kvöld og hefst klukkan 20. Mótið er öllum opið og er þátttaka ókeypis.

Stigahæsti skákmaður Íslands, Jóhann Hjartarson, verður meðal keppenda sem og kempur á borð við Jón Viktor Gunnarsson, Sigurð Daða Sigfússon, Björn Þorfinnsson, Róbert Lagarman, Elvar Guðmundsson, Benedikt Jónasson, Gunnar Frey Rúnarsson og Tómas Björnsson.

Flestar sterkustu skákkonur okkar verða líka meðal keppenda, m.a. Lenka Ptacnikova, Elsa María Kristínardóttir, Hallgerður Helga Þorsteinsdóttir, Jóhanna Björg Jóhannsdóttir, Guðlaug Þorsteinsdóttir og Ingibjörg Birgisdóttir.

Heldri skákmenn láta sig heldur ekki vanta, með Finn Kr. Finnsson og Gunnar Gunnarsson í broddi fylkingar.

Börn og ungmenni eru sérstaklega hvött til þátttöku, enda gefst þeim færi á að spreyta sig gegn sterkum skákmönnum á skemmtilegu móti.

Tefldar verða 7 umferðir með 7 mínútna umhugsunatíma. Vegleg bókaverðlaun frá Forlaginu og Sögum útgáfu eru veitt fyrir þrjú efstu sætin, auk þess sem verðlaun eru veitt í ýmsum flokkum.

Mótið hefst klukkan 20, og eru keppendur hvattir til að mæta tímanlega. Hægt er að skrá sig til leiks hér á Skák.is eða á Facebook-síðu mótsins, með því að smella hér.

Alþjóðlega geðheilbrigðismótið er samstarfsverkefni Skákfélags Vinjar, Taflfélags Reykjavíkur, Taflfélagsins Hellis og Skákakademíunnar.

Ingimundur og Sigurður efstir á atskákmeistaramóti SSON

Ingimundur Sigurmundsson hefur tekið forystuna ásamt Sigurði H.Jónssyni í átskákmeistaramóti SSON, ljóst að Ingimundur ætlar sér ekki að láta titilinn af höndum sí svona.

13 keppendur skráðir til leiks, þar af 3 góðir félagar sunnan úr Keflavík og fastagestir á Selfossi, þeir Siggi H. Jóns, Einar og Pálmar sem láta 100 km. akstur þrjú miðvikudagskvöld ekki stöðva sig þegar baráttan við Caissu er í boði.

Tefldar voru 4 umferðir í gærkvöldi, helst bar til tíðinda að stigahæsti skákmaðurinn, Páll Leó tapaði fyrir áðurnefndum Ingimundi, Erlingur Atli náði góðum sigri gegn Einari en aðrar skákir voru nokkuð eftir bókinni þótt hart hafi verið barist eins og gengur.

Næstkomandi miðvikudagskvöld verða tefldar umferðir 5-9

• Heimasíða SSON
• Chess-Results