Bloggfærslur mánaðarins, ágúst 2010

16.8.2010 | 10:41

Hraðskákkeppni taflfélaga: Pörun 2. umferðar

Dregið var í aðra umferð Hraðskákeppni taflfélaga í morgun.

Pörunin:

Skákfélag Íslands - Taflfélag Reykjavíkur/Taflfélag Vestmannaeyja
Taflfélag Garðabæjar - Skákdeild Hauka
Taflfélagið Mátar - Taflfélagið Hellir
Skákdeild KR -Taflfélag Bolungarvíkur

Annarri umferð skal verið lokið 25. ágúst.

Heimasíða Hellis

Spil og leikir | Slóð | Facebook | Athugasemdir (0)

16.8.2010 | 08:52

Vin í dag: Skákskýringar, mót og afmæli í einum pakka

Skákfélag Vinjar og Hróksmenn halda skákmót á mánudaginn, 16. ágúst nk kl. 13:00. Er það til heiðurs sjálfum fyrirliða Vinjarliðsins, Hrannari Jónssyni. Hann átti semsagt afmæli drengurinn þann 9. ágúst.

Víkingaklúbbsrefurinn Óli B. Þórs ætlar að hefja partýið með skákskýringum á einni af sinni uppáhaldsskákum. Strax að því loknu verður rennt í fimm til sex umferða mót með sjö mínútna umhugsunartíma og ætla þeir Hrannar afmælisdrengur og varaforseti Hróksins, Róbert Lagerman, að sjá um mótshald, dómgæslu og til þess að þetta fari fram án mikilla illdeilna...

Boðið verður upp á ávexti og tékkneska randalín með kaffinu.

Geisladiskar fyrir efstu sætin og skákbækur í happadrættisvinninga.

Fer þetta alltsaman fram í Vin, athvarfi Rauða kross Íslands að Hverfisgötu 47.

Síminn þar er 561-2612, skráning á staðnum og allir velkomnir að sjálfsögðu.

Spil og leikir | Slóð | Facebook | Athugasemdir (0)

16.8.2010 | 07:17

Borgarskákmótið fer fram 19. ágúst - Borgarstjóri setur mótið

Borgarskákmótið fer fram fimmtudaginn 19. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa Reykjavíkurfélögin, Taflfélag Reykjavíkur og Taflfélagið Hellir, að mótinu, sem og síðustu ár. Borgarstjórinn í Reykjavík, Jón Gnarr, setur mótið og leikur fyrsta leikinn.

Gera má ráð fyrir að margir af sterkustu skákmönnum þjóðarinnar taka þátt í því. Skákmenn eru hvattir til að skrá sig sem fyrst. Mótið er öllum opið og er þátttaka ókeypis en skráning fer fram á hér á Skák.is. Hægt er að nálgast upplýsingar um skráða keppendur hér.

Einnig er hægt að skrá sig í í síma 866 0116. Tefldar verða 7 umferðir með 7 mínútna umhugsunartíma. Þetta er í 25. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Bragi Þorfinnsson, sem þá tefldi fyrir Egilssíld. Athyglisvert er að allir þeir sem hafa sigrað á mótinu frá upphaf eru nú ýmist stórmeistarar eða alþjóðlegir meistarar.

Verðlaun:

15.000 kr.
10.000 kr.
5.000 kr.

Spil og leikir | Slóð | Facebook | Athugasemdir (3)

15.8.2010 | 21:36

Guðmundur Kjartansson sigraði á Stórmóti Árbæjarsafns og Taflfélags Reykjavíkur

Stórmót Árbæjarsafns og Taflfélags Reykjavíkur fór fram í dag. Mótið hefur verið haldið annan sunnudag í ágúst undanfarin ár og markar upphaf nýs starfsárs hjá Taflfélagi Reykjavíkur eftir gott sumarfrí. Stórmótið er raunar tvískipt, því fyrst er tefld ein skák með lifandi taflmönnum úti á túni og síðan fer fram 7. umferða hraðskákmót.

Í dag kl.13 hófst "lifandi taflið". Það voru þeir Matthías Pétursson, 19 ára úr Taflfélagi Reykjavíkur og Svanberg Már Pálsson, 17 ára úr Taflfélagi Garðabæjar sem tefldu sýningarskákina. Þeir voru staddir innanhúss á 2. hæð við opnar svaladyr og fengu 15 sekúndur umhugsunartíma á leik. Bjalla var notuð til að gefa til kynna næsta leik og svo var leikurinn "kallaður" af svölunum niður á taflborðið niðri á túni.

Þetta var bæði löng og jöfn skák, en svo fór að Matthías, sem stýrði svörtu mönnunum, mátaði hvíta kóng Svanbergs þegar leiknir höfðu verið 84 leikir. En það var einmitt yngsta, svarta "peðið" sem mátaði hvíta kónginn á g2!

Bæði börn og fullorðir tóku þátt í lifandi taflinu og meira að segja erlendir ferðamenn létu ekki sitt eftir liggja að klæðast búningum og taka þátt í skemmtuninni.

Klukkan 14 fór svo fram 7. umferða hraðskákmót með 7. mín. umhugsunartíma. Þetta varð metþátttaka því 44 skákmenn voru skráðir til leiks! Það var þröngt á þingi en skákmenn létu ekki það á sig fá.

Mótið var mjög vel skipað og sterkt. Einnig var mikið af börnum og unglingum. Erlendu ferðamennirnir sem voru með í lifandi taflinu tóku einnig þátt, en það var fjölskylda frá Kanada sem ætlaði síðan að ná ferjunni á Bakka til Vestmannaeyja!

Keppnin var geysihörð og spennandi. Svo fór að Guðmundur Kjartansson, Taflfélagi Reykjavíkur, vann með fullu húsi, 7 af 7 og hlaut 10.000 krónur í verðlaun. 2. verðlaun, 5000 krónur, hlaut Hjörvar Steinn Grétarsson, Helli. 3. verðlaun, 3000 krónur, hlaut Jóhann H. Ragnarsson, Taflfélagi Garðabæjar.

Hraðskákmótið gekk vel fyrir sig enda þaulreyndur skákstjóri að störfum, Ríkharður Sveinsson. Aðstoðarskákstjóri og "kallari" í lifandi taflinu var Sigurlaug Regína Friðþjófsdóttir.

Taflfélag Reykjavíkur vill koma þökkum til allra sem tóku þátt í þessum skemmtilega viðburði á Árbæjarsafninu í dag.

Myndaalbúm mótsins

Heildarúrslit:

1   Guðmundur Kjartansson,                7
2   Hjörvar Steinn Grétarsson,            6
3   Jóhann H. Ragnarsson,                 5.5
4-7 Robert Lagerman,                      5
      Stefán Bergsson,                      5
      Jón Úlfljótsson,                      5
      Páll Sigurðsson,                      5
8-13 Eiríkur Örn Brynjarsson,              4.5
      Stefán Már Pétursson,                 4.5
      Örn Leo Jóhannsson,                   4.5
      Hallgerður Þorsteinsdótti,            4.5
      Páll Andrason,                        4.5
      Birkir Karl Sigurðsson,               4.5
14-21 Eiríkur Björnsson,                    4
      Kristján Örn Elíasson,                4
      Jóhanna Björg Jóhannsdótt,            4
      Örn Stefánsson,                       4
      Guðmundur Kristinn,                   4
      Guðmundur G. Guðmundsson,             4
      Atli Snær Andrésson,                  4
      Hrund Hauksdóttir,                    4
22-23 Svanberg Már Pálsson,                 3.5
      Ásgeir Sigurðsson,                    3.5
24-33 Sigurður E. Kristjánsson,             3
      Vignir Vatnar Stefánsson,             3
      Björgvin Kristbergsson,               3
      Birgir Berndsen,                      3
      Veronika Steinunn Magnúsd,            3
      Leifur Þorsteinsson,                  3
      Axel Bergsson,                        3
      Donika Kolica,                        3
      Sigurður Kjartansson,                 3
      Jakob Alexander Petersen,             3
34-36 Tara Sóley,                           2.5
      Jóhann Arnar Finnsson,                2.5
      Nancy Daviðs,                         2.5
37-40 Hannah Land,                          2
      Hildur Berlind Jóhannsdót,            2
      Hnikarr Bjarmi Franklínss,            2
      Bjarki Sigurðsson,                    2
41-43 Gabríela Íris Ferreira,               1
      Sam Lund,                             1
      Ethan Land,                           1
44   Fannar Sigurðsson,                    0

Spil og leikir | Breytt s.d. kl. 21:37 | Slóð | Facebook | Athugasemdir (0)

15.8.2010 | 21:16

Daði með jafntefli í áttundu umferð í Búdapest

Daði Ómarsson (2150) gerði jafntefli við Rússann Pavel Martynov (2190) í áttundu og næstsíðustu umferð First Saturday-mótsins sem fram fór í dag. Daði hefur 4 vinninga og er í 4.-7. sæti. Í lokaumferðinni sem fram fer á morgun teflir Daði við rússneska alþjóðlega meistarann Ruslan Kashanov (2319). Rússinn er langefstur, með sex vinninga, og hefur þegar tryggt sér sigur á mótinu

Skákir Daða úr 1.-6. umferð fylgja með fréttinni.

Alls tefla 10 skákmenn í flokki Daða og tefla þeir allir við alla. Meðalstig eru 2261 skákstig og til að ná áfanga að alþjóðlegum meistaratitli þarf 7 vinninga. Daði er næststigalægstur keppenda.

Heimasíða mótsins

Spil og leikir | Breytt s.d. kl. 21:17 | Slóð | Facebook | Athugasemdir (0)

15.8.2010 | 20:09

Skákþáttur Morgunblaðsins: Danir hylla Bent Larsen 75 ára

Á Politiken-mótinu í Kaupmannahöfn sem nú stendur yfir hylla Danir sinn fremsta skákmann, Bent Larsen sem varð 75 ára hinn 5. mars sl. Meðal atriða á dagskrá tileinkaðri honum er einvígi sem Peter Heine Nielsen teflir við Peter Svidler. Þeir tefla nokkrar stuttar skákir sem hefjast með hinni svonefndu Larsen-byrjun, 1. b3.

Larsen sló í gegn á Ólympíumótinu í Moskvu 1956 en þar náði hann bestum árangri 1. borðs manna og var þegar í stað útnefndur stórmeistari. Hann var lengi að gera upp við sig hvort hann ætti að leggja skákina fyrir sig en þegar sú ákvörðun var tekin héldu honum engin bönd; hann varð efstur með öðrum á millisvæðamóti í Amsterdam 1964 og gaf þá skýringu á frammistöðu sinni að fyrir mótið hafi flestir keppendur legið yfir nýjustu bókum Boleslavskís en hann hafi gramsað í skákum gömlu meistaranna og dregið úr pússi sínu ýmsar fornar byrjanir eins og t.d. Vínartafl. Á þessum árum var Bent einn harðvítugasti mótarefurinn og fyrir það afrek að vinna fimm mót í röð árið 1967 hlaut hann fyrstur manna Skák-Óskarinn.

Í Belgrad árið 1970 tefldi hann á 1. borði fyrir heimsliðið gegn Sovétríkjunum fyrir ofan Bobby Fischer sem eftir mikið japl, jaml og fuður gaf heiðurssætið eftir. Kom það mjög á óvart. Þó Larsen tapaði í aðeins 17 leikjum annarri skák sinni gegn þáverandi heimsmeistara Boris Spasskí var hann fljótur að jafna metin og lagði síðan Stein að velli þegar Spasskí tók sér frí í lokaumferðinni. Sovétmenn unnu þó 20½ : 19½.

Í júlí 1971 háði Larsen hið fræga einvígi við Fischer í Denver og tapaði 0:6. Var aldrei eftir það litli glaði drengurinn, eins og einhver orðaði það. Hann var aldrei með aðstoðarmann en treysti á mátt sinn og megin og fyrir vikið var hann dálítið brokkgengur í einvígjum á þessum árum. Vann þó nokkra góða sigra, t.a.m. yfir Portich '68 og Tal '69. Þriðja sigurinn á millisvæðamóti vann hann í Biel 1976.

Eftir Bent Larsen liggur frábært verk á sviði skákbókmennta. Í ritinu „50 valdar skákir" dró hann athygli lesenda að dálæti sínu á framrás kantpeðanna. Hann var geysilega sterkur í endatöflum og baráttuvilji hans var nánast ódrepandi. Vissulega tapa ég oft, sagði hann einu sinni, en ekki jafn mörgum hálfum vinningum eins og keppinautarnir, bætti hann við. Leikbragð eitt í miðtafli má rekja til Larsens og kemur það fram í eftirfarandi skák (og fyrir fróðleiksfúsa - gegn Van Scheltinga '64) þegar honum tekst að opna línu fyrir drottningu. Það hefst með leiknum 20. g4! og inniheldur m.a. hinn eitursvala varnarleik, 28. Ka1! Lokin eru snilldarleg. Larsen vann þetta mót - Friðrik varð í 2. sæti.

Lugano 1970:

Bent Larsen - Lubomir Kavalek

Larsens-byrjun

1. b3 c5 2. Bb2 Rc6 3. c4 e5 4. g3 d6 5. Bg2 Rge7 6. e3 g6 7. Re2 Bg7 8. Rbc3 O-O 9. d3 Be6 10. Rd5 Dd7 11. h5 f5 12. Dd2 Hae8 13. h5 b5 14. hxg6 hxg6 15. Rec3 bxc4 16. dxc4 e4 17. O-O-O Re5 18. Rf4 Hd8 19. Kb1 Bf7 20. g4 Rxg4 21. f3 exf3 22. Bxf3 Re5 23. Dh2 Bxc4 24. bxc4 Rxf3 25. Dh7+ Kf7 26. Rcd5 Hg8 27. Rxe7 Hb8 28. Ka1 Dxe7 29. Dxg6+ Kf8 30. Re6+ Dxe6 31. Bxg7+ Ke7

32. Bf8+ Hgxf8 33. Hh7+

- og Kavalek gafst upp. Eftir 33. ... Hf7 kemur 34. Hxf7+ Dxf7 35. Dxd6+ o.s.frv.

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í sunnudagsmogganum, 8. ágúst 2010.

Skákþættir Morgunblaðsins

Spil og leikir | Breytt s.d. kl. 20:17 | Slóð | Facebook | Athugasemdir (0)

15.8.2010 | 07:36

Hraðskákkeppni taflfélaga: Bolvíkingar lögðu Akureyringa

Taflfélag Bolungarvíkur vann öruggan sigur á Skákfélagi Akureyringa í viðureign félaganna í fyrstu umferð Hraðskákkeppni taflfélaga sem fram fór í gærkveldi í húsnæði SÍ. Vestfirðingarnir fengu 45 gegn 27 vinningum Norðlendinga. Staðan í hálfleik var 26,5-9,5. Magnús Pálmi Örnólfsson hlaut flesta vinninga Vestfirðinga eða 10 í 12 skákum. Halldór Brynjar Halldórsson og Stefán Bergsson fóru hins vegar fremstir í flokki Akureyringa og hlutu 6,5 vinning.

Árangur Bolvíkinga:

Magnús Pálmi Örnólfsson 10 v. af 12
Þröstur Þórhallsson 8 v.af 8
Bragi Þorfinnsson 6 v. af 6
Stefán Kristjánsson 6 v. af 7
Guðmundur Daðason 5,5 v. af 12
Halldór Grétar Einarsson 4,5 v. af 6
Stefán Arnalds 4 v. af 10
Gísli Gunnlaugsson 2 v. af 7
Daði Guðmundsson 1 v. af 4

Bestir Akureyringa voru:

Halldór Brynjar Halldórsson 6,5 v. af 12
Stefán Bergsson 6,5 v. af 12
Þór Valtýsson 5,5 v. af 12
Sigurjón Sigurbjörnsson 5,5 v. af 12

Dregið verður í 2. umferð á morgun, mánudag, en 2. umferð á að vera lokið 25. ágúst.

Heimasíða Hellis

Spil og leikir | Slóð | Facebook | Athugasemdir (0)

15.8.2010 | 07:25

Stórmót Árbæjarsafns og Taflfélags Reykjavíkur fer fram í dag

Stórmót Árbæjarsafns og Taflfélags Reykjavíkur fer fram sunnudaginn 15. ágúst. Teflt verður í Árbæjarsafni og hefst taflið kl. 14. Tefldar verða 7 umferðir með umhugsunartímanum 7 mín. á skák.

Á undan, eða kl.13, fer fram lifandi tafl, en lifandi taflið er fyrir löngu orðinn árviss og skemmtilegur viðburður í dagatali skákmanna.

Veitt verða verðlaun fyrir þrjú efstu sætin í Stórmótinu, 10.000 kr., 5.000 kr. og 3.000 kr.

Þátttökugjöld í Stórmótinu eru kr. 600 fyrir 18 ára og eldri, en ókeypis fyrir yngri en 18 ára og eru þátttökugjöld jafnframt aðgangseyrir í safnið.

Ekkert kostar að taka þátt í Stórmótinu fyrir þá sem taka þátt í lifandi taflinu.

Enn eru laus pláss í lifandi taflinu og leika peð, riddara, biskup, hrók, kóng eða drottningu. Áhugasamir hafi samband við Sigurlaugu Regínu í sigurlaug.regina@internet.is

Spil og leikir | Slóð | Facebook | Athugasemdir (0)

14.8.2010 | 22:51

Daði tapaði í sjöundu umferð í Búdpest

Daði Ómarsson (2150) tapaði fyrir Ungverjanum Zombor Erdelyi (2336) í sjöundu umferð First Saturday-mótsins sem fram fór í dag. Daði hefur 3,5 vinning og er í 4.-6. sæti. Í áttundu og næstsíðustu umferð, sem fram á morgun, teflir Daði við Rússann Pavel Martynov (2190)

Rússneski alþjóðlegi meistarinn Ruslan Kashanov (2319) er efstur með 5 vinninga.

Alls tefla 10 skákmenn í flokki Daða og tefla þeir allir við alla. Meðalstig eru 2261 skákstig og til að ná áfanga að alþjóðlegum meistaratitli þarf 7 vinninga. Daði er næststigalægstur keppenda.

Heimasíða mótsins

Spil og leikir | Breytt s.d. kl. 22:56 | Slóð | Facebook | Athugasemdir (0)

14.8.2010 | 07:50

Borgarskákmótið fer fram 19. ágúst

Borgarskákmótið fer fram fimmtudaginn 19. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa Reykjavíkurfélögin, Taflfélag Reykjavíkur og Taflfélagið Hellir, að mótinu, sem og síðustu ár. Gera má ráð fyrir að margir af sterkustu skákmönnum þjóðarinnar taka þátt í því. Skákmenn eru hvattir til að skrá sig sem fyrst. Mótið er öllum opið og er þátttaka ókeypis en skráning fer fram á hér á Skák.is. Hægt er að nálgast upplýsingar um skráða keppendur hér.

Einnig er hægt að skrá sig í í síma 866 0116. Tefldar verða 7 umferðir með 7 mínútna umhugsunartíma. Þetta er í 25. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Bragi Þorfinnsson, sem þá tefldi fyrir Egilssíld. Athyglisvert er að allir þeir sem hafa sigrað á mótinu frá upphaf eru nú ýmist stórmeistarar eða alþjóðlegir meistarar.

Verðlaun:

15.000 kr.
10.000 kr.
5.000 kr.

Spil og leikir | Slóð | Facebook | Athugasemdir (0)

Bloggfærslur mánaðarins, ágúst 2010

RSS-straumar

Erlendar vefsíður

Tenglar

Mót í gangi

Lykilvefir

Kennsluvefir

Íslensk taflfélög

Erlendir skákvefir

Almanök

Teflt á netinu

Færsluflokkar

Heimsóknir

Flettingar

Annað

Efni

Leita í þessu bloggi

Skákmót

Mótaáætlun SA (Prufa)

Mótaskráning

Fréttabréf SÍ

Fischer-setur

Auglýsing

Myndaalbúm

Eldri færslur

2018

2017

2016

2015

2014

2013

2012

2011

2010

2009

2008

2007

Innskráning

Innskráning: