Jón Viktor vann í 3. umferð - Dagur í hópi efstu manna.

Alþjóðlegi meistarinn Jón Viktor Gunnarsson (2462) sigraði kanadíska FIDE-meistarann Sylvain Barbeau (2357) í 3. umferð meistaramóts Quebec sem fram fór í Montreal í Kanada í gærkvöldi.  Dagur Arngrímsson (2396) gerði jafntefli við makedónska stórmeistarann Nikola Mitkov (2526).  Dagur hefur 2 vinninga og hefur teflt við stórmeistara í öllum umferðum.  Jón Viktur hefur 1,5 vinning og Björn Þorfinnsson (2395) tapaði fyrir stigahæsta keppenda mótsins, georgíska stórmeistaranum, Merab Gagunashvili (2575) og hefur hálfan vinning.

Í 4. umferð, sem fram fer í kvöld teflir Dagur við úkraínska stórmeistarann Yaroslav Zherebukh (2541), Jón Viktor við belgíska stórmeistarann Vladimir Malaniuk og Björn við Spánverjann Renier Castellanos (2453).

Skák Dags verður sýnd beint á vefsíðu mótsins og skákin kl. 22 í kvöld. 

Efstur með fullt hús er kanadíski stórmeistarinn Batoer Sambovev (2491) og annar með 2,5 vinning er makedónski stórmeistarinn Vladimir Georgiev (2540)

Alls tekur 21 skákmaður þátt í efsta flokki.  Þar af eru 10 stórmeistarar og alþjóðlegir meistarar.  Semsagt afar sterkt skákmót.

• Heimasíða mótsins
• Skákirnar í beinni

Dagur og Björn gerðu jafntefli í 2. umferð í Quebec

Alþjóðlegu meistararnir Dagur Arngrímsson (2396) og Björn Þorfinnsso (2395) gerðu báðir jafntefli í 2. umferð meistaramóts Quebec sem fór í dag.  Dagur við rússneska stórmeistarann Vadim Malakhatko (2570) og Björn við Sylvain Barbeau (2357).  Jón Viktor Gunnarsson (2462) tapaði fyrir stórmeistaranum Nikola Mitkov (2526).  Dagur er í beinni útsendingu og er hægt að fylgjast með skák beint á vefsíðu mótsins.

Dagur hefur 1,5 vinning og er í 2.-6. sæti, Jón Viktor og Björn hafa 0,5 vinning og eru 16.-20. sæti.

Í 3. umferð, sem nú er gangi teflir Dagur við Mitkov eins og áður sagði, Björn við stórmeistarann Merab Gagunashvili (2574) og Jón Viktor við Barbeau.  

• Heimasíða mótsins
• Skákirnar í beinni

Bragi með fullt hús eftir 3 umferðir á Politiken Cup

Alþjóðlegi meistarinn, Bragi Þorfinnsson (2377), Daði Ómarsson (2091), Ólafur Gísli Jónsson (1899) unnu allir sínar skákir í 3. umferð Politiken Cup.  Bragi er meðal þeirra 24 skákamanna sem hafa fullt hús vinninga.  Bjarni Jens Kristinsson (1985) gerði jafntefli og Atli Antonsson (1720) tapaði.

Í fjórðu umferð, sem fram fer á morgun, teflir Bragi við sænska stórmeistarann Jonny Hector (2554).  Skákin verður sýnd beint á vefsíðu mótsins og hefst kl. 11.

Staða íslensku skákmannana:

• 1.-24. Bragi Þorfinnsson 3 v.
• 47.-129. Daði Ómarsson og Ólafur Gísli Jónsson 2 v.
• 130.-177. Bjarni Jens Kristinsson 1,5 v.
• 264.-285. Atli Antonsson 0,5 v.

Alls taka 307 skákmenn þátt í mótinu og þar af 20 stórmeistarar, 14 alþjóðlegir meistarar og 17 FIDE-meistarar. 

• Heimasíða mótsins
• Skákirnar í beinn

Guðmundur með stórmeistaraáfanga!

In

FIDE-meistarinn Guðmundur Kjartansson (2356) gerði jafntefli við enska stórmeistarann Mark Hebden (2468) í níundu og síðustu umferð skoska meistaramótsins sem lauk í Edinborg í dag.  Þar með krækti Guðmundur sér í sinn fyrsta áfanga að stórmeistaratitli en hann fékk 6,5 vinning í 9 skákum og þar af 4,5 í 6 skákum gegn stórmeisturum og hækkar um 42 skákstig fyrir frammistöðu sína. Guðmundur endaði í 4.-8. sæti.

Stórglæsilegur árangur hjá Guðmundi sem fyrr í sumar náði sínum síðasta áfanga að alþjóðlegum meistaratitli.  Skammt stórra á högga á milli hjá Guðmundi!

Guðmundur hefur eftir mótin í sumar um 2380 skákstig og vantar því um 20 stig til viðbótar til að verða útnefndur alþjóðlegur meistari. 

Aron Ingi Óskarsson (1876) vann Skotann Andrew McHarg (1586) og hlaut 3,5 vinning.

Sigurvegari mótsins var indverski stórmeistarinn A. Arun Prasad (2556) sem fékk 7,5 vinning.  Tapaði aðeins fyrir Guðmundi!  FIDE-meistarinn Iain Gurley (2349) varð skoskur meistari en hann var efstur Skota.

Guðmundur er 13. stigahæsti keppandi á mótinu en alls tefla 88 skákmenn í efsta flokki.  Meðal annarra keppenda má nefna skosku stórmeistarana Jonathan Rowson (2591), Kati Arakhamia-Grant (2506), Paul Motwani (2503), Colin McNab (2474) og John Shaw (2462).  Alls taka 10 stórmeistarar þátt, 1 alþjóðlegur meistari og 8 FIDE-meistarar.

• Heimasíða mótsins
• Skákirnar í beinni

Dagur í beinni frá Quebec

Skák Dags Arngrímsson (2396) við rússneska stórmeistarann Vadim Malakhatko (2570) á Quebec-meistaramótinu er sýnd beint á vefsíðu mótsins.

Jón Viktor Gunnarsson (2462) teflir við Nikola Mitkov (2526) og Björn Þorfinnsson (2396) teflir við Sylvain Barbeau (2357).

• Heimasíða mótsins
• Skákirnar í beinni

Bragi með fullt hús eftir 2 umferðir á Politiken Cup

Bragi Þorfinnsson (2377) er meðal þeirra sem hafa 2 vinninga eftir 2 umferðir á Politiken Cup.  Auk Braga sigruðu Bjarni Jens Kristinsson (1985) og Ólafur Gísli Jónsson (1899) í sínum skákum og hafa 1 vinning ásamt Daða Ómarsson (2091) sem tapaði.  Atli Antonsson (1720) gerði jafntefli og hefur hálfan vinning.  Þriðja umferð fer fram síðar í dag.  

Alls taka 307 skákmenn þátt í mótinu og þar af 20 stórmeistarar, 14 alþjóðlegir meistarar og 17 FIDE-meistarar. 

Heimasíða mótsins

Dagur vann stórmeistara í fyrstu umferð í Quebec

Alþjóðlegi meistarinn Dagur Arngrímsson (2396) sigraði króatíska stórmeistarann Alojzije Jankovic (2549) í fyrstu umferð meistaramóts Quebec sem hófst í kvöld í Montreal í Kanada.  Jón Viktor Gunnarsson (2462) gerði jafntefli við, stigahæsta keppanda mótsins, georgíska stórmeistarann, Merab Gagunashvili (2574).  Björn Þorfinnsson (2395) tapaði fyrir úkraínska stórmeistaranum Yaroslav Zherbukh (2541).

Heimasíða mótsins

Guðmundur vann McNab!

FIDE-meistarinn Guðmundur Kjartansson (2356) heldur áfram að brillera á skoska meistaramótinu.   Í áttundu og næstsíðustu umferð, sem fram fer í dag, vann hann skoska stórmeistarann Colin McNab (2474) og hefur nú fengið 4 vinninga í sex skákum gegn stórmeisturum og er í 4.-5. sæti með 6 vinninga fyrir lokaumferðina sem fram fer á morgun.

Árangur Guðmundar samsvarar 2607 skákstigum sem samsvarar stórmeistaraáfanga og er 40 stigaplús fyrir lokaumferðina. 

Í lokaumferðinni mætir Guðmundur enska stórmeistaranum Mark Hebden (2468).  Skákin hefst kl. 13 og verður í beinni útsendingu á vef mótsins eins og skákir Guðmundar hingað til.   Geri Guðmundur jafntefli nær hann sínum fyrsta stórmeistaraáfanga samkvæmt lauslegri rannsókn ritstjóra.   

Efstir með 6,5 vinning eru indversku stórmeistarnir S. Arun Prasad (2556) og Magesh Chandran Panchanath (2493) og svo áðurnefndur Hebden. 

Aron Ingi Óskarsson (1876) gerði jafntefli við Skotann James Macrae (1876) og hefur 2,5 vinning.

Guðmundur er 13. stigahæsti keppandi á mótinu en alls tefla 88 skákmenn í efsta flokki.  Meðal annarra keppenda má nefna skosku stórmeistarana Jonathan Rowson (2591), Kati Arakhamia-Grant (2506), Paul Motwani (2503), Colin McNab (2474) og John Shaw (2462).  Alls taka 10 stórmeistarar þátt, 1 alþjóðlegur meistari og 8 FIDE-meistarar.

• Heimasíða mótsins
• Skákirnar í beinni

Bragi og Daði unnu í fyrstu umferð í Politiken Cup

Bragi Þorfinnsson (2377) og Daði Ómarsson (2091) unnu báðir sínar skákir í fyrstu umferð Politiken Cup sem fram fór í Kaupmannahöfn í dag.  Bjarni Jens Kristinsson (1985), Ólafur Gísli Jónsson (1899) og Atli Antonsson (1720) töpuðu hins vegar.   Mikill styrkleikamunur var í öllum viðureignum dagsins og því öll úrslitin eftir bókinni.

Tvær umferðir eru tefldar á morgun.

Heimasíða mótsins

Hannes vann í lokaumferðinni og endaði í 3. sæti

Stórmeistarinn Hannes Hlífar Stefánsson (2580) vann spænska alþjóðlega meistarann David Larion Nieto (2462) í níundu og síðustu umferð opins móts í Malaga á Spáni sem er að klárast.  Hannes hlaut 6½ vinningi og endaði í 3.-9. sæti og því 3. á stigum á en Spáni skiptast verðlaun ekki efstir stigum heldur fékk Hannes þau óskipt.   

Frammistaða Hannes samsvaraði 2532 skákstigum og lækkar hann um 2 stig á mótinu.  

Sigurvegerar mótsins eru serbneski stórmeistarinn Dragan Paunovic (2519) og spænski FIDE-meistarinn Jeses Garrido Dominguez (2301).

Alls tóku 104 skákmenn í mótinu og þar af 13 stórmeistarar og 8 alþjóðlegir meistarar.  Hannes var þriðji stigahæstur keppenda. 

• Heimasíða mótsins
• Chess-Results