Góð byrjun íslenskra keppenda í Sardiníu – alþjóðlegur meistari lagður – þrír í beinni í dag

Íslensku keppendurnir byrja flestir prýðilega á Porto Mannu-skákmótinu sem nú er í gangi á ítölskunni eyjunni Sardiníu. Sex íslenskir taka þátt auk þess sem yfirdómarinn er Ingibjörg Edda Birgisdóttir og er nú kölluð í daglegu tali – Inga yfir.  Svo fylgir með aukafólk svo íslenska sendinefndin er eitthvað á annan tuginn.

Vel fer um mannskapinn enda úrvalsastæður eru á skákstað. Maturinn er stórgóður en gisting með fullu fæði kostar um €63 eða tæplega 9.000. Búið er í húsum. Staðurinn er einnig úrvalsgóður fyrir fjölskyldufólk svo óhætt er að mæla með þessu móti fyrir þá sem vilja tefla og jafnvel að taka fjölskylduna með. En um mótið sjálft.  Fimm umferðum af níu er nú lokið.

Stefán Bergsson (1974) er efstur Íslendinganna með 3½ vinning, Gunnar Björnsson (2110), Baldur Teódór Petersson (2019) og Snorri Þór Sigurðsson (1953) hafa 3 vinninga, Þorsteinn Magnússon (1338) hefur 2 vinninga og Heimir Páll Ragnarsson (1575) hefur 1½ vinning.

Í gær var tvöfaldi dagurinn. Þá tefldi undirritaður eina allra mestu spennandi skák á ferlinum. Andstæðingurinn var ungur þýskur alþjóðlegur meistari, Jonathan Carlstedt (2466). Ég hafði nýlega setið á útitaflinu á Íslandi ásamt Stefáni, Birni Ívar og Agnari Tómas Möller. Þar fékk fimm mínútna fyrirlestur um hvernig ætti að tefla á móti Phildor-vörninni sem Agnar hafði beitt gegn mér. Ég notaði það setup og fékk afbragðstöðu úr byrjuninni og var Birni Ívari ákaflega þakklátur.

Sá þýski hleypti upp stöðunni með því að gefa 2 menn fyrir hrók og upp kom gríðarlega spennandi skák sem stal allri athygli nærstadda. Ég taldi mig vera með betra og tefldi til vinnings og ég hafði það á tilfinningunni að það gerði andstæðingurinn minn einnig. Ætlaði ekki að sætta sig við jafntefli við stigalágan andstæðing  Að lokum leystist upp staðan og upp kom endatafl með léttum köflum þar sem ég var peði yfir sem mér tókst að svíða í 96 leikjum!

Ótrúlega sætur sigur. Skákin hafði hins vegar tekið um 5½ klukkustund og minni en klukkutími í næstu skák. Búið var að loka matsölustaðnum og ekkert annað í boði en skófla í sig pizzusneiðum.  Í seinni skákinni tefldi ég við ítalska alþjóðlega meistarann Luca Moroni sem fórnaði á manni í byrjun skákar án þess að hugsa og átti ég aldrei nokkurn séns.  

Í dag verðum við þrír í beinni.  Stefán teflir við gríska alþjóðlega meistarann Georgios Souleidis (2419), ég tefli við rússneska stórmeistarann Sergei Beshukov (2372), sem var skella í sig staupum í gær og verður vonandi kolryðgaður, og Baldur við þýsku skákkonuna Zoya Schleining (2364) sem er stórmeistari kvenna.

Umferðin hefst kl. 13 og því um að ræða fína upphitun fyrir Íslandsmótið sem hefst kl. 15.

• Heimasíða mótsins
• Beinar útsendingar (hefjast kl. 13)
• Úrslitaþjónusta
• Myndaalbúm (GB)