Dagur 9 - Wesley So mætir á Reykjavíkurskákmótið 2015!

Úrslitin gegn Færeyjum sem og viðureignin hefur vakið nokkra athygli. Jafntefli varð 2-2 sem eru eðil málsins samkvæmt ekki góð úrslit. Ótrúlegt atvik átti sér stað í skák Guðmundar og Olafs Berg.

Wesley So staðfesti í morgun að hann yrði meðal keppenda á Reykjavíkurskákmótinu 2015 en hann hefur nú 2755 skákstig!

Vildi ekki drottninguna

Hannes Hlífar Stefánsson vann glæsilegan og öruggan sigur á Helga Dam Ziska á fyrsta borði. Hjörvar Steinn Grétarsson og Helgi Ólafsson gerðu jafntefli á 2. og 4. borði með svörtu og því var allt undir í skák Guðmundar Kjartanssonar og Olafs Bergs á þriðja borði.

Færeyingurinn leikur hins vegar af sér drottningunni í 30. leik. Skildi hana einfaldlega eftir oní riddara Guðmundar. Guðmundi var hins vegar fyrirmunað að sjá það - afþakkaði drottninguna og þurfti að gefast upp 10 leikjum síðar.

Jón L. og Helgi Áss horfðu á þetta gerast og gjörsamlega göptu af undrun þegar Gummi ákvað frekar að skipta upp á hrókum, eftir um hálfrar mínútu umhugsun, frekar en að drepa drottningu Olafs. Ótrúleg skákblinda af beggja hálfu.

Svekkjandi að gera 2-2 jafntefli við Færeyinga. Þrátt fyrir að þeim hafi farið mikið fram eigum við að öllu jöfnu að vinna þá.

Stelpurnar töpuðu 3½ - ½ fyrir Ísrael sem er í samræmi við styrkleikamun sveitanna en þær ísraelsku voru miklum mun stigahærri. Elsa María Kristínardóttir gerði jafntefli en Lenka Ptácníková, Hallgerður Helga og Tinna Kristín töpuðu sínum skákum

Leiðindaatvik kom upp í þeirri viðureign en við urðum vitni af íþróttamannslegri hegðun af hálfu liðsstjóra Ísraelsmanna. Ingvar fjallar um það í pistli sínum. Liðsstjórinn sá er gamall kunningi frá frá EM taflfélaga 2001 en virtist vera glaðvakandi eftir tímahrakið en sama átti ekki við í byrjun umferðar.

Spennandi toppbarátta

Aserar og Kúbumenn eru efstir í opnum flokki með 11 stig.  Tíu þjóðir hafa 10 stig. Þar á meðal eru Rússar, Kínverjar og Armenar.

Í kvennaflokki leiða svo Rússar og Kínverjar með fullt hús. Pólverjar eru í þriðja sæti með 11 stig.

Árangur Íslendinganna

Ísland er nú í 50. sæti en fyrirfram var liðinu raðað í 43. sæti. Séu skákstigin skoðuð kemur í ljós að Hannes, Þröstur og Hjörvar eru í stigagróða, Helgi á sléttu og Gummi í smá mínus.

Stelpurnar eru í 74. sæti en var fyrifram raðað í það 64. Þar gildir það sama. Þrjár eru í gróða (Tinna, Elsa og Hallgerður) en Lenka og Jóhanna eru í mínus.

Ég sé að menn eru að kvarta yfir frammistöðunni á Fésbókinni en samt er það þannig að liðin bæði eru í stigaplús. Eðlilega eru menn samt mjög svekktir með úrslitin í gær.

Norðmenn í stuði

Ólympíuskákmótið í Noregi vekur gríðarlega athygli. Beinar útsendingar eru alla daga í norska ríkissjónvarpinu og fjölmiðlalætin fara ekki framhjá neinum. Sterkustu skákmenn Norðmanna eru skyndilega orðnir vel þekktir einstaklingar í heimalandi sínu og margir þeirra vinna við norska fjölmiðla í kringum mótið.

Miklar kröfur eru gerðar til Norðmanna og virðast þeir ætla að standa undir þeim. Í gær unnu þeir Ítali 3-1 sem verða að teljast afar góð úrslit. Heimsmeistarinn í skák, Magnus Carlsen, vann Ítalann unga Fabiano Caruna, sem margir telja munu verða helsta andstæðing Magnúsar á komandi misserum.

Magnus lætur ekki skákina duga sér því hann er duglegur að spila fótbolta á kvöldin - meðal annars við íslensku keppendurna.

Rymur í rússneska birninum

Það vakti athygli í aðdraganda mótsins þegar rússneska kvennaliðinu var meinuð þátttaka á mótinu. Það var gert vegna þess að skráning þess barst ekki í tæka tíð. Skýringin var að Rússarnir voru að bíða eftir því að ríkisfang Katharyna Lagno frá Úkraínu yfir til Rússlands gengi í gegn.Þegar það loks gekk í gegn hjá alþjóðlega sambandinu voru ríkisfangsskipti hennar undirrituð af sjálfum Vladimir Pútín!

Norðmenn gáfu eftir og leyfðu rússneska kvennaliðinu að taka þátt sem og öðrum þjóðum sem ekki skráðu sig í tíma. Rússarnir láta hins vegar ekki þar við sitja og hafa kært mótshaldarana fyrir norskum yfirvöldum og krefja þá um 1,2 milljónir norskra króna eða um 22 milljónir íslenskra króna! Þeir segja það eingöngu vera fyrir lögfræðikostnaði og áskilja sér rétt til að koma með frekari kröfur síðar.

Kæra þessi veldur eðlilega mikilli gremju og reiði meðal Norðmannanna.

Friðrik styður Kasparov

Í dag birtist yfirlýsing Friðriks Ólafssonar, fyrrverandi forseta FIDE, á heimasíðu Kasparovs. Friðrik lýstir þar stuðningi við Kasparov með þeim orðum að hann voni að skákheimur eigi eftir að upplifa Kasparov sem forseta FIDE. Kosningarnar fara fram 11. ágúst.

Yfirlsýsinginuna er hægt að finna hér.