Tveir góðir sigrar í dag - Íslendingar efstir Norðurlandanna - Tékkar unnu Rússa - Carlsen tapaði

Það gekk afar vel hjá íslensku liðunum í sjöundu umferð Ólympíuskákmótsins í dag. Í opnum flokki vannst sannfærandi 3½-½ á Pakistönum og eftir umferð dagsins eru Íslendingar efstir á "Norðurlandamótinu". Kvennaliðið vann sveit Mexíkóá 2½-1½ þrátt fyrir að vera á veikari á pappírnum. Stærstu tíðindi dagsins voru 3-1 sigur Tékka á Rússum og það að Magnus Carlsen (2877) tapaði fyrir þjóðverjanum Arkadij Naiditsch (2707).

Umferð dagsins

Sigurinn á Pakistönum var afar sannfærandi. Hannes Hlífar og Helgi unnu mjög góða sigra en Hjörvar Steinn þurfti að hafa meira fyrir hlutunum. Þröstur gerði jafntefli á mikilvægum punkti til að tryggja sigurinn í viðureigninni.

Sigurinn á Mexíkó var enn betri. Þar vann Elsa María mjög góðan sigur á fjórða borði sem og Lenka á fyrsta borði. Hallgerður Helga gerði jafntefli en Jóhanna Björg tapaði. Afar góður sigur.

Toppbaráttan

Tékkar unnu Rússa afar sannfærandi 3-1. Enn einu sinni virðast Rússar sitja eftir með öngulinn í rassinum á Ólympíuskákmóti. 

Eftir umferð dagsins eru Íslendingar efstir Norðurlandanna í 28. sæti með 9 stig. A- og b-lið Noregs hafa einnig 9 stig.

Aserar, sem unnu Kúbumenn, eru efstir með 13 stig. Kínverjar, Tékkar, Búlgarar og Rúmenar hafa 12 stig. Rússar eru aðeins í 16. sæti. 

Rússar sem unnu Kínverja eru efstir í kvennaflokki með fullt hús stiga. Kínverjar, Ungverjar og Pólverjar hafa 12 stig. Íslendinga eru í 55. sæti með 8 stig.

Morgundagurinn 

Á morgun teflum við í Skota í opnum flokki og við Tékka í kvennaflokknum.Nánar um þær viðureignir á morgun. 

• Heimasíða mótsins
• Beinar útsendingar
• Chess-Results (opinn flokkur)
• Chess-Results (kvennaflokkur)
• Myndaalbúm (Facebook)