NM Skólaskák 2014 pistill fjórðu umferðar

Úrslit okkar manna í fjórðu umferð:

A-flokkur
Mikael Jóhann Karlsson (2057) – Alberto Politi, Finnland (1641) 1-0
Nökkvi Sverrisson (2081) – Stian Johansen, Noregur (2099) 1-0

B-flokkur
Oliver Aron Jóhannesson (2104) – Eero Valkama, Finnland (1993) 0-1
Högni Egilstoft Nielsen, Færeyjar (2141) - Dagur Ragnarsson (2073) ½-½

C-flokkur
Jón Kristinn Þorgeirsson (1844) – David Bit-Narva, Svíþjóð (1882) ½-½
Dawid Kolka (1748) – Alfons Emmoth, Svíþjóð (1660) 0-1

D-flokkur
Toivo Keinänen, Finnland (1740) -Hilmir Freyr Heimisson (1761) 1-0
Felix Steinþórsson (1536) – Ng Klemens, Svíþjóð (1620) ½-½

E-flokkur
Gabriel Nguyen, Svíþjóð (1535) – Vignir Vatnar Stefánsson (1800) ½-½
Filip Boe Olsen, Danmörk (1876) – Mykhaylo Kravchuk (1453) 1-0

Drengirnir í A-flokki héldu uppi heiðri landans í kvöld.  Mikael átti fína skák gegn Alberto frá Finnlandi, tók fljótlega völdin í miðtaflinu og uppskar fínan sigur.  Góður dagur hjá Mikael og tvær afar vel tefldar skákir.  Nökkvi tefldi við Stian frá Noregi sem reyndi að rugla Nökkva í ríminu í byrjuninni en það eina sem Nökkvi skildi ekki var hvers vegna andstæðingurinn tefldi svona veikt.  Nökkvi tefldi skákina mjög vel og uppskar tiltölulega áreynslulausan sigur.  Mikael er með þrjá vinninga í öðru til þriðja sæti og Nökkvi hefur tvo vinninga í fimmta til áttunda sæti.  Það virðist sem Martin frá Svíþjóð stefni að sigri í þessum flokki en hann hefur teflt afar sannfærandi á mótinu og leiðir mótið með fullu húsi.  Íslensku strákarnir eru báðir búnir að tefla við hann og því eiga þeir báðir fínustu möguleika á verðlaunasæti og ef Svíinn tekur upp á því að hiksta á morgun þá á Mikael ágætis möguleika á að vinna flokkinn.

 

Í B-flokki tefldi Oliver við Eero frá Finnlandi. Oliver valdi rangt plan úr byrjuninni og Eero tók hraustlega á móti og fórnaði manni fyrir þrjú peð og svo öðrum manni síðar í skákinni sem endaði með því að Oliver gat ekki varist öllum þessum peðum og tapaði.  Dagur tefldi við Högna frá Færeyjum og sömdu kapparnir um jafntefli eftir fremur tíðindalitla skák.  Staðan í þessum flokki er að Dagur er með tvo og hálfan vinning í þriðja til fimmta sæti og Oliver er með tvo vinninga í sjötta til níunda sæti.  Johann-Sebastian frá Noregi leiðir þennan flokk með þrjá og hálfan vinning en flokkurinn er galopinn ennþá.

Í C-flokki tefldi Jón Kristinn við David frá Svíþjóð.  Jón sótti að andstæðingnum allan tímann og gerði hvað hann gat til að vinna skákina.  Andstæðingurinn varðist vel en gerði ekki miklar tilraunir til að vinna og var greinilega sáttur að ná jafntefli á móti Jóni.  Dawid tefldi við Alfons frá Svíþjóð og tefldi skákina mjög vel framan af og saumaði að andstæðingnum.  Dawid varð því miður fyrir því að reikna aðeins vitlaust eftir að hafa verið kominn með hartnær unna stöðu þannig að andstæðingurinn var skyndilega með tvo menn á móti hrók í endatafli sem ómögulegt var að verja.  Óheppilegt tap en Dawid er engu að síður að tefla vel.   Jón hefur þrjá vinninga og er í fyrsta til þriðja sæti og Dawid hefur einn og hálfan vinning og er í níunda sæti.  Það stefnir því í afar spennandi dag í þessum flokki á morgun.

 

Í D-flokki tefldi Hilmir við Toivo frá Finnlandi.  Eftir mikla baráttu missteig Hilmir sig í flækjunum og fékk slæma stöðu.  Toivo urðu engin mistök á í úrvinnslunni og kláraði skákina örugglega.  Í síðasta pistli sagði ég að Felix hefði fundið sjálfstraustið í dag.  Ég hafði greinilega rétt fyrir mér í þvi þar sem Felix gerði hvað hann gat til að hrista upp í jafnteflislegri stöðu og fórnaði meðal annars skiptamun fyrir praktíska sénsa en allt kom fyrir ekki skákin leystist einfaldlega upp í jafntefli.  Fínasta skák hjá Felix sem getur verið stoltur af hugrekki sínu við að reyna að koma stöðunni úr jafnvægi.  Í þessum flokki stefnir allt í að andstæðingur Hilmis frá í dag, Toivo, vinni flokkinn en hann leiðir með fullu húsi.  Hilmir hefur tvo og hálfan vinning og er í öðru til sjötta sæti og Felix hefur einn og hálfan vinning og er í sjöunda til tíunda sæti.  Það er semsagt allt galopið fyrir þá félaga í þessum flokki. 

Í E-flokki tefldi Vignir við Gabriel frá Svíþjóð.  Skákin leystist upp í leiðindastöðu og þrátt fyrir að Vignir reyndi að hrista upp í þessu eins og hann gat var drepleiðinlegt jafntefli staðreynd.  Mykhaylo tefldi við Filip frá Danmörku og eftir að hafa teflt skákina vel urðu honum á ein mistök sem sterkur andstæðingurinn nýtti sér til sigurs.  Vignir hefur þrjá vinninga og er í fyrsta til þriðja sæti og Mikhaylo hefur tvo og hálfan vinning og er í fjórða til fimmta sæti.  Þessi flokkur er því galopinn og getur allt gerst á morgun.

Fjórða umferðin er rýrasta uppskera okkar hingað til, fjórir vinningar af tíu mögulegum.  Það stefnir í skemmtilegan dag á morgun þar sem margir flokkarnir eru afar spennandi.  Einnig stefnir í spennandi landskeppni en staðan þar er eftirfarandi:

1.       Ísland 23,5 vinningar
2.       Danmörk 23 vinningar
3.       Svíþjóð og Finnland 21,5 vinningar
5.       Noregur 20,5 vinningar
6.       Færeyjar 10 vinningar

Fimmta umferð hefst í fyrramálið klukkan 9 að Íslenskum tíma.  Þá tefla okkar menn við:

A-flokkur
Erik Rönka, Finnland (2154) - Mikael Jóhann Karlsson (2057)
Elise Forså, Noregur (1854) - Nökkvi Sverrisson (2081)

B-flokkur
Dagur Ragnarsson (2073) – Oliver Aron Jóhannesson (2104)

C-flokkur
Sondre Merkesvik, Noregur (2022) - Jón Kristinn Þorgeirsson (1844)
Bjarki Bertholdsen, Færeyjar (1081) - Dawid Kolka (1748)

D-flokkur
Andreas Garberg Tryggestad, Noregur (1878) - Hilmir Freyr Heimisson (1761)
Janus Skaale, Færeyjar (1343) - Felix Steinþórsson (1536)

E-flokkur
Vignir Vatnar Stefánsson (1800) – Mykhaylo Kravchuk (1453)

Skákir í beinni
Heimasíða mótsins
Facebook síða mótsins
Bein útsending frá skákstað
Staða, úrslit og pörun (Chess-results)
Myndir

Davíð Ólafsson