Rimaskólasveitin tryggði sér sigur á NM grunnskóla í fjórðu umferð

Skáksveit Rimaskóla hefur nú þegar tryggt sér sigur á Norðurlandamóti grunnskólasveita í Tampere í Finnlandi eftir að sveitin lagði örugglega norsku meistarana frá Blokkhaugen skólanum í Bergen 3,5 - 0,5. Þessir tveir skólar voru langefstir fyrir umferðina.

Líkt og í fyrri umferðum komu íslensku krakkarnir einbeittir og sókndjarfir til leiks og náðu þægilegum stöðum á öllum borðum. Það var aðeins Dagur á 1. borði sem gaf eftir góða byrjun og náði að lokum jafntefli í maraþonskák á móti Mathias Sætre sem teflt hefur mjög vel á 1. borði norsku sveitarinnar.

Það er greinilegt að mikil reynsla, góðar æfingar og skýr fyrirmæli liðstjórans Davíðs Kjartanssonar sem vega þungt á þessu móti og orðið til þess að flest hefur gengið Rimaskólakrökkum í haginn. Rimaskóli hefur nú þegar hlotið 14,5 vinning, norsku og sænsku skólarnir 9,5 vinninga og sá sænski 9 vinninga.

Sigurinn er því nú þegar í höfn og bara spurning hvort met verður slegið í vinningafjölda á morgun þegar skáksveit Rimaskóla mætir dönsku sveitinni í lokaumferð. Verðlaunaafhending hefst kl. 13:30 eða kl. 10:30 á íslenskum tíma og þá fagna Rimaskólakrakkar þriðja árið í röð Norðurlndameistaratitli. 

Myndaalbúm (HÁ)