Ólympíulið Íslands

Eins og kunnugt er urðu breytingar á íslenska ólympíuliðinu á síðustu stundu. Héðinn Steingrímsson fór úr liðinu og við sæti hans tók Dagur Arngrímsson.

Ástæða þessarar breytingar er sú að upp var kominn ósættanlegur ágreiningur innan íslenska liðsins sem ekki reyndist unnt að leysa með svo skömmum fyrirvara.

Það var sameiginleg niðurstaða landsliðsþjáfara og landsliðsnefndar að þetta væri besta mögulega ákvörðun með hliðsjón af hagsmunum íslenska ólympíuliðsins í opnum flokki.

Nú þegar á hólminn er komið er þess óskað að íslensku ólympíuliðin fái fullan frið til að einbeita sér að taflmennsku á meðan mótið er í gangi.

Héðni er þökkuð þátttaka hans í sameiginlegum undirbúningi íslenska ólympíuliðsins.

Með skákkveðju,

Gunnar Björnsson, forseti SÍ 

Jón Gunnar Jónsson, formaður landsliðsnefndar SÍ

Athugasemdir

[Torfi Kristján Stefánsson (IP-tala skráð) 28.8.2012 kl. 13:17]

Hvað þýðir þetta: "fullan frið til að einbeita sér" að taflmennsku á mótinu?

Þýðir þetta að ekki megi gagnrýna Skáksambandsforystuna fyrir það hvernig hún tók á þessu máli - eða ræða það sín á milli á vettvangi skákáhugamanna, Skákhorninu?

Ef einhver ókunnugur les þetta þá vil ég upplýsa hann um að Héðni Steingrímssyni var vísað úr Ólympíuliðinu degi fyrir brottför, að kröfu annars landsliðsmanns, Hjörvars Steins Grétarssonar.

Skáksambandið hefur greinilega metið það svo að betra væri að hafa Hjörvar í liðinu en Héðinn, sbr.: "að þetta væri besta mögulega ákvörðun með hliðsjón af hagsmunum íslenska ólympíuliðsins í opnum flokki."

Ekkert bendir þó til þess að Héðinn hafi sett fram svipuð skilyrði fyrir þátttöku sinni - og því furðulegt að farið var að kröfu Hjörvars.

Það kann aldrei góðri lukku að stýra að láta svona eftir duttlungum ungs manns.