Björn í 1-2.sæti á Atskákmóti í Alimini

Björn Þorfinnsson deildi efsta sæti í atskákmóti sem fram fór í lok skákhátíðarinnar í Alimini Village. Björn fékk sex vinninga af sjö mögulegum ásamt serbneska stórmeistaranum Sinisa Drazic, sem var útskurðaður sigurvegari á stigum.

Lokaumferð mótsins var dramatísk. Björn tefldi á 1.borði gegn hinum unga og efnilega Nicola Altini sem var efstur með 5,5 vinninga og hafði lagt kempur á borð við Conquest og Drazic að velli og haldið jöfnu gegn ítalska stórmeistaranum Godena. Skákin var löng og ströng en að lokum tókst Birni að svíða barnið í riddaraendatafli og tryggja sér þar með að minnsta kosti hlutdeild í fyrsta sætinu. Á 2.borði háðu Godena og Drazic mikla baráttu og var Godena með harnær unnið tafl alla skákina en Drazic varðist afar vel. Skákin endaði með því að Godena lék peði sínu fram til c8, ýtti á klukkuna og gaf til kynna að hann sætti sig við þar með við jafnteflið enda átti Drazic bara riddara eftir og sá riddari varð að enda ævi sína með því að fórna sér á c8. Drazic kom hinsvegar auga á besta leikinn í stöðunni og krafðist vinnings á þeim forsendum að Godena hafði ekki fengið sér drottningu á c8 heldur stæði þar bara aumt peð. Eftir smá þras ákváðu skákstjórarnir að dæma Drazic í vil og náði hann þar með Birni að vinningum. 

Lokastaðan:

1-2.sæti: Sinisa Drazic og Björn Þorfinnsson - 6 vinningar
3.sæti: Nicola Altini - 5,5 vinningar
4-6.sæti: Michele Godena, Stuart Conquest og Igor Naumkin - 5 vinningar

Þátttakendur voru tæplega 40 talsins og þar af 6 stórmeistarar.