Birkir Ísak efstur á unglingalandsmóti UMFÍ

Unglingalandsmót UMFÍ fór fram um helgina á Fljótdalshéraði. Teflt var í skák í gær og tóku alls 27 ungir skákmenn þátt. Teflt var í einum flokki en svo veitt verðlaun í aldursflokkum. Birkir Ísak Jóhannsson fékk fullt hús á mótinu en tefldar voru 7 umferðir. Arnar Ágúst Kristjánsson hlaut 6 vinninga og Jökull Ingi Kristjánsson hlaut 5,5 vinninga.

Sverrir Gestsson var mótsstjóri og skipulagði mótið. Davíð Kjartansson, Guðmundur Ingvi Jóhansson og Sigfús Guttormsson voru skákstjórar. 

Verðlaunahafar

Yngri flokkur 11-14 ára:

Stúlkur (1 þátttakandi)

1) Þóra Björg Yngvadóttir (2 vinningar)

 

Drengir (16 þátttakendur)

1) Jökull Ingi Kjartansson (5,5 vinningar)

2) Ágúst Ívar Árnason (5 vinningar)

3) Sveinbjörn Fróði Magnússon (4 vinningar)

Tveir aðrir voru með jafnmarga vinninga en lægri á stigum.

 

Eldri flokkur 15-18 ára

 

Stúlkur (1 þátttakandi)

1) Aðalheiður Ósk Kristjánsdóttir (4,5 vinningar)

 

Drengir (9 þátttakendur)

1) Birkir Ísak Jóhannsson (7 vinningar)

2) Arnar Ágúst Kristjánsson (6 vinningar)

3) Snorri Bjarnason (5 vinningar)

 

Einn annar keppandi var með 5 vinninga en var lægri á stigum.

Lokastaðan á Chess-Results.

Stórmót Árbæjarsafns og TR fer fram sunnudaginn 20. ágúst

Stórmót Árbæjarsafns og Taflfélags Reykjavíkur fer fram sunnudaginn 20. ágúst.

Þetta skemmtilega mót í sögulegu umhverfi er fyrir löngu orðinn fastur viðburður í skákdagatalinu.

Teflt verður í Árbæjarsafni og hefst taflið kl. 14. Tefldar verða 8 umferðir með umhugsunartímanum 4 mín á  skák auk 2 sek á hvern leik (4+2).

Veitt verða verðlaun fyrir þrjú efstu sætin, 15.000 kr., 10.000 kr. og 5.000 kr.

Þátttökugjald er 1500 kr. fyrir 18 ára og eldri, en ókeypis er fyrir yngri en 18 ára og er þátttökugjald jafnframt aðgangseyrir í  safnið. Þeir sem fá ókeypis aðgang í safnið, t.d. eldri borgarar og öryrkjar, borga ekkert þátttökugjald.

Þátttökugjald er greitt við inngang Árbæjarsafns.

Mótið verður reiknað til alþjóðlegra (Fide) hraðskákstiga. Skráning fer fram í gegnum hlekkinn hér að neðan.

Skráningarform

Skráðir keppendur

Borgarskákmótið verður haldið mánudaginn 14. ágúst

Borgarskákmótið fer fram mánudaginn 14. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa  Taflfélag Reykjavíkur og Skákfélagið Huginn, að mótinu, eins og þau hafa gert síðustu ár. Gera má ráð fyrir að margir af sterkustu skákmönnum þjóðarinnar taki þátt í því. Skákmenn eru hvattir til að skrá sig sem fyrst eftir að opnað verður fyrir skráningu. Mótið verður reiknað til hraðskákstiga og er öllum opið og er þátttaka ókeypis en skráning fer fram á Skák.is

Einnig er hægt að skrá sig í í síma 866 0116 (Vigfús) og 862 0099 (Kjartan). Skráningu á skákstað verður lokað kl. 15:50 fyrir mótið. Tefldar verða 7 umferðir með umhugsunartímanum 4 mínútur + 2 sekúndur á leik. Þetta er í 32. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Helgi Áss Grétarsson, sem þá tefldi fyrir Suzuki bíla.

Verðlaun:

1. 30.000 kr.
2. 20.000 kr.
3. 10.000 kr.

Upplýsingar um þegar skráða keppendur má finna hér.

MVL vann Carlsen - Frakkinn einn efstur

Franski stórmeistarinn Maxime Vachier-Lagrave (2789) vann heimsmeistarann Magnus Carlsen (2822) í fjórðu umferð Sinquefield Cup-mótsins í gærkveldi. Heimsmeistarinn hafði sótt fast að Frakkanum en lék af sér 48. leik og mátti sætta sig við tap 34 leikjum síðar. MVL er efstur á mótinu með 3 vinninga. Caruana (2751) er annar með 2,5 vinninga. Nepomniachtci (2751) vann áreynslulítinn sigur á Nakamura (2751).

Ítarlega frásögn af gangi mála má lesa á Chess24.

Fimmta umferð hefst nú kl. 18. Þá teflir Carlsen við Wesley So (2819) og MVL við Aronian (2799).

Myndir Lennart Ootes (af Chess24).

• Heimasíða mótsins
• Beinar útsendingar (hefjast kl. 18)

Skákþáttur Morgunblaðsins: Að tapa í 19 leikjum kemur fyrir bestu menn

Nú liggur fyrir að Magnús Carlsen verður meðal keppenda á heimsbikarmótinu sem hefst í Tiblisi í Úkraínu 2. september nk. en Jóhann Hjartarson vann sér sæti á mótinu með frammistöðu sinni á Norðurlandamótinu sem fram fór í Svíþjóð á dögunum. Skipuleggjendur heimsbikarmótsins áttu ekki von á þátttöku heimsmeistarans en þegar hún lá fyrir voru rifjuð upp þau ummæli hans að fyrirkomulag heimsmeistarakeppninnar væri úr takt við tímann og ætti að byggjast á því að allir geti verið með jafnvel þótt leiðin að titlinum sé löng og ströng. FIDE starfaði áður með svæðamótum, millisvæðamótum og áskorendakeppnum en síðustu áratugi hefur elo-stigakerfið verið allsráðandi. Magnús lýsti einnig aðdáun sinni á mótum með útsláttarfyrirkomulagi og eins og til að fylgja ummælum sínum eftir skráir hann sig nú til leiks. Í Tiblisi verða keppendur 128 talsins og viðureignir fyrstu umferðanna samanstanda af tveim kappskákum, verði jafnt er gripið til skáka með styttri umhugsunartíma.

Jóhann Hjartarson hefur undanfarna daga setið við taflið á Xtracon- mótinu í Helsingör sem áður hét Politiken cup. Ekki er hægt að draga miklar ályktanir af taflmennsku hans hingað til; andstæðingar hans hafa verið á stigabilinu 1892-2330 elo, þar af nokkrir kornungir skákmenn. En öryggið sem einkenndi framgöngu hans í Svíþjóð er til staðar þó að hann hafi tapað fremur slysalega í 7. umferð og hann er með 5 vinninga. Baadur Jobava og Nigel Short eru efstir með 6 ½ vinning af sjö mögulegum en þar á eftir koma ellefu skákmenn með 6 vinninga. Tefldar verða tíu umferðir og lýkur mótinu um helgina.

Aðrir íslenskir þátttakendur eru Hilmir Freyr Heimisson og Magnús Magnússon sem báðir eru með 3 ½ vinning og Hörður Garðarsson er með 2 vinninga. Gunnar Björnsson, forseti SÍ, leit inn á skákstað og á skak.is gerði hann samanburð á Reykjavíkurmótinu og Xtracon-mótinu. Gunnar benti á að keppendur í Helsingör væru talsvert fleiri, 433 á móti 260, en sterkustu keppendurnir væru áhugaverðari í Reykjavík og aðstæður á keppnisstað í Hörpu væru mun betri.

Í Helsingör tefla Norðmenn fram stórmeisturunum Simen Agdestein og Frode Urkedal sem skaust á toppinn með því að vinna fimm fyrstu skákir sínar og á þeirri leið lagði hann Ivan Sokolov að velli í aðeins 19 leikjum. Byrjunina gerþekkir Ivan og hefur sjálfur teflt ótal sinnum með hvítu. Hann valdi fremur sjaldséða leið en lenti snemma í ógöngum:

Frode Urkedal – Ivan Sokolov

Nimzoindversk vörn

1. d4 Rf6 2. c4 e6 3. Rc3 Bb4 4. Dc2 Rc6 5. Rf3 O-O 6. Bd2 d6 7. a3 Bxc3 8. Bxc3 He8 9. Hd1 De7 10. e3 e5 11. d5 e4?!

Vafasamur leikur. Eftir 12. ... Rb8 er svarta staðan vel teflanleg.

12. dxc6 exf3 13. gxf3 bxc6 14. Hg1 Rh5 15. De4!

Snjall leikur sem byggist á hugmyndinni 15. ... Dxe4 16. fxe4 Hxe4 17. Be2. Samt ætti svartur að velja þessa leið því eftir 17. ... Hh4 er engan rakinn vinning að finna í stöðunni þó að g7-peðið falli.

15. ... Hb8 16. Be2 Be6 17. f4 Rf6?

Eini leikurinn var 17. ... f5. Nú vinnur hvítur með einfaldri fléttu.

18. Hxg7+ Kxg7 19. Dg2+

- og Ivan gafst upp. Hann sá fram á að eftir 19. ... Kf8 20. Dg5 er hann algerlega varnarlaus. Lét þetta tap þó ekki slá sig út af laginu og vann tvær næstu skákir.

Helgi Ólafsson [e-mail]

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 22. júlí 2017

Skákþættir Morgunblaðsins

Evrópurmeistaramót skákmanna 50 ára og eldri

Eftir rúma viku hefst í Barcelona Evrópumeistarmót skákmanna 50 ára og eldri og 65 ára og eldri. Tefldar verða 9 umferðir. Tveir íslenskir skákmenn eru meðal keppenda en Fidemeistarinn Þorsteinn Þorsteinsson (2279) tekur þátt í flokknum 50 ára og eldri og Bragi Halldórsson (2116) í eldri flokknum.

Í flokki Þorsteins eru þátttakendur 55, þar af 7 stórmeistarar. Þorsteinn er í 14. sæti í stigaröðinni. Í flokki Braga eru keppendur 66, þar af 4 stórmeistarar. Bragi er í 25. sæti á stigum í sínum flokki.

Hér má finna nánari upplýsingar um mótið: https://info64.org/european-senior-50

 

Carlsen vann Karjakin - efstur ásamt Caruana og MVL

Önnur umferð Sinquefield Cup fór fram í St. Louis í gær. Heimsmeistarinn Magnus Carlsen (2822) sýndi snilldi sína þegar hann lagði Sergey Karjakin (2773) að velli. Mótð byrjar hressilega en Caruana (2807) vann Aronian (2799)  í maraþonskák og Wesley So (2810) hafði sigur á Ian Neopmniachtci (2751) og hefur skorið 5-0 á Rússann í kappskák. Öðrum skákum lauk með jafntefli.

Heimsmeistarinn er efstur ásamt Caruana og MVL (2789) sem gerði jafntefli við Anand (2783).

Þriðja umferð fer fram í kvöld og hefst kl. 18.  Þá teflir Carlsen við Anand. Bandarískur toppslagur verður því So og Nakamura (2792) mætast. 

Ítarlega frásögn af gangi mála má lesa á Chess24.

Myndir Lennart Ootes (af Chess24).

• Heimasíða mótsins
• Beinar útsendingar (hefjast kl. 18)

Aðeins vika í Baccalá bar mótið!

Minnt er aftur á þeta glæsilega mót sem hefst á Hauganesi næsta föstudag, 11. ágúst kl. 15. Glæisleg verðlaun og frábært mót, eins og þeir sem voru með í fyrra muna vel. Ítarlegri auglýsingu má finna á heimasíðu SA.

Nú eru 28 keppendur skráðir á mótið, hámarksfjöldi er 30. Sjá keppendalistann á chess-results.

Sinquefield Cup: Aronian, MVL og Karjakin unnu í fyrstu umferð

Fyrsta umferð Sinquefield-mótsins í St. louis í Bandaríkjunum fór fram í gær. Mótið byrjaði hressilega en MVL (2789), Aronian (2799) og Karjakin (2773) unnu allir sínar skákir Frakkinn vann Wesley So (2810), Armeninn lagði Nepo (2751) að velli og Svidler (2773) tapaði fyrir landa sínum Karjakin (2773). Caruana (2807) og Magnus Carlsen (2822) gerðu jafntefli í fjörugri skák. Það var aðeins jafnteflisskák Anand (2783) og Naka (2792) sem olli vonbrigðum.

Önnur umferð fer fram í kvöld kl. 18. Heimsmeistarinn teflir þá við áskorendann fyrrverandi Karjakin. Aronian mætir Caruana.

Ítarlega frásögn af gangi mála má lesa á Chess24.

Myndir Lennart Ootes (af Chess24).

• Heimasíða mótsins
• Beinar útsendingar (hefjast kl. 18)

Íslandsmót kvenna fer fram 25.-27. ágúst

Íslandsmót kvenna fer fram helgina 25.-27. ágúst í húsnæði Skákskóla Íslands Faxafeni 12. Tefldar verða fimm umferðir eftir svissneska kerfinu. Teflt verður í einum flokki, þ.e. mótið opið öllum konum/stúlkum.

Þátttökugjöld: Engin.

Umferðarfjöldi: Fimm umferðir

Tímamörk: 90 mín. + 30 sek. á leik 

Dagskrá:  

• 1. umferð, föstudaginn, 25. ágúst, kl. 19:30
• 2. umferð, laugardaginn, 26. ágúst, kl. 11:00
• 3. umferð, laugardaginn, 26. ágúst kl. 17:00
• 4. umferð, sunnudaginn, 27. ágúst, kl. 11:00
• 5. umferð, sunnudaginn, 27. ágúst, kl. 17:00

Verðlaun: 

1. 75.000.-
2. 45.000.-
3. 30.000.-

Verðlaun skiptast jafnt séu konar jafnar í verðlaunasætum. Teflt verður til úrslita um Íslandsmeistaratitilinn með styttri umhugsunarhtíma verði fleiri en ein efst.  

Skráning fer fram hér á Skák.is (guli kassinn efst).

Upplýsingar um þegar skráða keppendur má finna hér.

Mótið á Chess-Results.