Hannes endaði með 6 vinninga í Rúmeníu

Stórmeistarinn Hannes Hlífar Stefánsson (2521) endaði með 6 vinninga í níu umferðum á Arad-mótinu í Rúmeníu. Ekki gekk vel í lokaumferðunum þremur en í þeim kom 1½ í hús gegn stigalægri heimamönnum. Niðurstaðan varð 20.-51. sæti og lækkar Hannes um 13 stig fyrir frammistöðu sína.

Sigurvegari mótsins varð úkraínski stórmeistarinn Alexander Zubov (2614) en hann hlaut 7½ vinning.

245 skákmenn frá 17 löndum tóku þátt í mótinu og þar af 15 stórmeistarar. Hannes var númer átta í stigaröð keppenda. 

• Heimasíða mótsins
• Chess-Results
• Beinar útsendingar (hefjast kl. 13)

 

MVL sigurvegari Sinquefield-mótsins - Kasparov teflir á morgun

Maxime Vachier-Lagrave (2789) sigraði á Sinquefield-mótinu sem lauk í St. Louis um helgina. Fyrir lokaumferðina voru MVL, Aronian (2799) og Anand (2783) eftir hálfum vinningi á undan Carlsen (2822) og Karjakin (2773). MVL vann Nepo (2751) á meðan Aronian tapaði fyrir heimsmeistaranum og Anand gerði jafntefli við Wesley So (2810). MVL var því einn efstur hálfum vinningi á undan Carlsen og Anand. Stærsti sigur Frakkans á ferlinum og sá eini á ofurmóti. Frakkinn viðkunnanlegi er nú kominn í annað sætið á heimslistanum (live rating).

Mótið tókst vel og var fjörlega teflt. Slakt gengi heimamanna olli þeim vonbrigðum en Kanarnir þrír enduðu í neðstu sætunum ásamt Nepo. Sér í lagi var gengi Wesley So slakt en hann datt niður í áttunda á heimslistanum úr því öðru. 

Á morgun hefst hrað- og atskákmót í St. Louis þar sem sjálfur Garry Kasparov verður meðal keppenda. Nánar verður sagt frá því móti hér á Skák.is á morgun. 

Ítarlega frásögn af gangi mála má lesa á Chess24.

 

Myndir Lennart Ootes (af Chess24).

• Heimasíða mótsins
• Beinar útsendingar (hefjast kl. 18)

Stórmót Árbæjarsafns og TR fer fram sunnudaginn 20. ágúst.

Stórmót Árbæjarsafns og Taflfélags Reykjavíkur fer fram sunnudaginn 20. ágúst.

Þetta skemmtilega mót í sögulegu umhverfi er fyrir löngu orðinn fastur viðburður í skákdagatalinu.

Teflt verður í Árbæjarsafni og hefst taflið kl. 14. Tefldar verða 8 umferðir með umhugsunartímanum 4 mín á  skák auk 2 sek á hvern leik (4+2).

Veitt verða verðlaun fyrir þrjú efstu sætin, 15.000 kr., 10.000 kr. og 5.000 kr.

Þátttökugjald er 1500 kr. fyrir 18 ára og eldri, en ókeypis er fyrir yngri en 18 ára og er þátttökugjald jafnframt aðgangseyrir í  safnið. Þeir sem fá ókeypis aðgang í safnið, t.d. eldri borgarar og öryrkjar, borga ekkert þátttökugjald.

Þátttökugjald er greitt við inngang Árbæjarsafns.

Mótið verður reiknað til alþjóðlegra (Fide) hraðskákstiga. Skráning fer fram í gegnum hlekkinn hér að neðan.

Skráningarform

Skráðir keppendur

Skákþáttur Morgunblaðsins: Jobava sigraði á Helsingjaeyri

Georgíumaðurinn Baadur Jobava stóð uppi sem sigurvegari á Xtracon-mótinu á Helsingjaeyri sem lauk um síðustu helgi. Jobava fékk 8½ vinning úr tíu skákum en fast á hæla honum komu átta skákmenn með átta vinninga en af þeim voru þekktustu nöfnin Nigel Short, Krishnan Sasikiran og Nikita Vitiugov. Jóhanni Hjartarsyni gekk ekki vel á lokasprettinum og endaði með 6½ vinning. Jafn honum að vinningum varð hinn 15 ára gamli Hilmir Freyr Heimisson sem vann þrjár síðustu skákir sínar.

Sigurvegarann Baadur Jobava má telja einn litríkasta stórmeistara heims. Hann þolir ágætlega samanburð við Mikhael Tal og tilþrifin oft með þeim hætti að óhugsandi er að hann hafi ekki kynnt sér rækilega skákir töframannsins frá Riga. Eitt besta dæmið um hæfni hans á Xtracon-mótinu kom í viðureigninni við enska stórmeistarann Nigel Short. Þegar skákin fór fram í 8. umferð sátu þeir tveir í efsta sæti með 6½ vinning. Um byrjun skákarinnar er það helst að segja að meðhöndlun Shorts var ekki góð og frumkvæðið kirfilega í höndum Jobava. Það var þó ekki fyrr en í 23. leik sem Short fór endanlega út af sporinu, í stað 23.... Rc4 gat hann leikið 23.... Rd7 og hefði þá ekki verið langt frá því að jafna taflið. Upp frá því þjarmar Jobava að Short og með nokkrum snjöllum peðsleikjum, 25. a4, 32. f4 og 38. e6, þokast hann nær sigri og óskiptu efsta sæti. Hinn bráðsnjalli 40. leikur hans sýnir vel hvílíkur hæfileikamaður hér er á ferðinni:

Xtracon-mótið; 2017; 8. umferð:

Baadur Jobava – Nigel Short

Katalónsk byrjun

1. c4 e6 2. g3 d5 3. Bg2 Rf6 4. Rf3 Be7 5. 0-0 0-0 6. Dc2 b6 7. cxd5 Rxd5 8. Rc3 c6 9. Hd1 Bb7 10. d4 Rd7 11. e4 Rxc3 12. Bxc3 Dc7 13. Bf4 Bd6 14. e5 Be7 15. h4 Hf8 16. h5 b5 17. h6 g6 18. Rh2 Rb6 19. Rg4 c5 20. Rf6+ Bxf6 21. exf6 Dc8 22. Bxb7 Dxb7 23. dxc5 Rc4 24. Bd6 Df3 25. a4 bxa4 26. Hd4 Ra5 27. Hf4 Db7 28. Hb4 Dd7 29. Dxa4 Rc6 30. Hab1 Hec8 31. Hb7 De8 32. f4 Kh8 33. De4 Kg8 34. Da4 e5 35. fxe5 De6 36. Db3 Dxb3 37. H1xb3 Ra5 38. e6 Rxb3 39. exf7+ Kh8 

Og þá vaknar spurningin: Hvað gerir þú í þessari stöðu, lesandi góður? Það blasir við að eftir 40. Hxb3 (eða 40. f8(D)+) hefur hvítur alla þræði í hendi sér og þegar baráttan um efsta sætið er í algleymingi er stundum vissara að hafa vaðið fyrir neðan sig. En Jobava lét sem þessi riddararæfill á b3 kæmi sér ekki við og lék...

40. He7!! Rd2 41. He8+! Hxe8 42. fxe8(D)+ Hxe8 43. f7! 

 

Og hér er hugmyndin komin fram. Hróknum er um megn að valda bæði f8- og e5-reitinn. Short hefði getað gefist upp en fannst viðeigandi að verða mát.

43.... He1+ 44 Kg2 He2+ 45. Kh3 Hf2 46. Be5+ Hf6 47. Bxf6 mát. 

Stórmótið í Saint Louis hafið

Skákmiðstöðin í Saint Louis í Missouri er í dag helsti vettvangur stórmóta í Bandaríkjunum og á miðvikudaginn hófst Sinquefield cup, nefnt eftir aðalkostanda miðstöðvarinnar, Rex Sinquefield. Þarna er rekið fræðslusetur, og safn, sem m.a keypti á uppboði taflmennina úr 3. einvígisskák Fischers og Spasskís sem tefld var í borðtennisherbergi Laugardalshallar. Eitt sterkasta mót ársins hófst þar sl. miðvikudag og dregur til sín heimsmeistarann Magnús Carlsen, So, Caruana, Aronjan, Nakamura, Vachier-Lagrave, Anand, Karjakin, Nepomniachtchi og Svidler.

Helgi Ólafsson [e-mail]

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 5. ágúst 2017

Skákþættir Morgunblaðsins

Flott mót á Hauganesi - Hjörvar Steinn öruggur sigurvegari!

Baccalá bar mótið á Hauganesi var háð í gær, 11. ágúst, í annað sinn. Mótshaldari er Elvar Reykjalín framkvæmdastjóri Baccalá Bar og Ektafisks en frumkvöðull mótisins er Dr. Ingimar Jónsson, fyrrverandi forseti SÍ. Þrjátíu keppendur mættu til leiks. Stórmeistarinn Hjörvar Steinn Grétarsson vann mótið með yfirburðum í þetta sinn, lagði alla andstæðinga sína að velli. Annar varð kollega hans úr stórmeistarastétt, Þröstur Þórhallsson. Verðlaun voru veitt fyrir 12 efstu sætin, alls kr. 150.000. Efstu menn:

Hjörvar Steinn Grétarsson	11
Þröstur Þórhallsson	8,5
Vignir Vatnar Stefánsson	8
Guðmundur Gíslason	7,5
Rúnar Sigurpálsson	7,5
Stefán Bergsson	6,5
Áskell Örn Kárason	6,5
Símon Þórhallsson	6
Sigurður Eiríksson	6
Haraldur Haraldsson	6
Stefán Arnalds	6
Smári Ólafsson	6
Ólafur Kristjánsson	6

Öll úrslit á chess-results.com

Skákstjóri var Áskell Örn Kárason. 

Myndina með fréttinni tók Kristinn P. Magnússon og sýnir hún sigurvegarann (í miðið) milli mótshaldarans (t.v.) og skákstjórans. Allir eru þeir harla ánægðir á svip!

Ráðast úrslitin í kvöld á Sinquefield-mótinu - Fimm skákmenn geta unnið mótið

Sergey Karjakin (2773) vann Wesley So (2810) í áttundu og næststíðu umferð Sinquefield-mótsins í gær. Öðrum skákum lauk með jafntefli. Aronian (2799), MVL (2789) og Anand (2783) eru efstir og jafnir fyrir lokaumferðina sem fram fer í kvöld. Carlsen (2822) og Karjakin eru þar hálfum vinningi á eftir. 

Ítarlega frásögn af gangi mála má lesa á Chess24.

Lokaumferðin verður án efa spennandi. Carlsen teflir við Aronian, MVL við Nepo (2751) og Anand við So sem hefur verið heillum horfinn á mótinu og hefur dottið úr öðru sæti niður á það áttunda á lifandi stigalistanum .

Myndir Lennart Ootes (af Chess24).

• Heimasíða mótsins
• Beinar útsendingar (hefjast kl. 18)

Tækni og skák: Íslenskt skákforrit

Tækni og skák:

Hjá okkur í HR er hægt að prófa fyrsta skákforritið í heiminum, sem nýtir augnhreyfingar. Fengum til okkar þrjár stelpur í fyrradag, allar landsliðskonur, og fimm stráka í gær. Við tökum vel á móti áhugasömum núna næstu vikuna. Erum sveigjanleg með tímasetningu, þó best sé að koma á dagvinnutíma. Endilega líta við.

Erum einnig með mobile app fyrir smart síma og spjaldtölvur. Skólar og taflfélög, sem hafa áhuga á að vinna með okkur og nýta nútíma tækni við að efla kennsluna er velkomið að hafa samband.

[e-mail] og 8465500

 

Hannes vann í gær - hálfum vinningi frá efsta sætinu

Stórmeistarinn Hannes Hlífar Stefánsson (2521) vann rúmenska FIDE-meistarann Alexandru-Bogdan Banzea (2283) í sjöttu umferð Arad Open í Rúmeníu í gær. Hannes hefur 4½  vinning og er í 10.-38. sæti aðeins hálfum vinningi á eftir efstu mönnum. 

Sjöunda umferð fer fram í og dag og hefst kl. 13. Þá teflir Hannes við rúmenska kandídatameistarann (CM) David Alexandru-Vasile (2390).

245 skákmenn frá 17 löndum taka þátt í mótinu og þar af 15 stórmeistarar. Hannes er númer átta í stigaröð keppenda. 

Ekki gekk vel hjá Braga Þorfinnssyni á alþjóðlega mótinu í Riga í gær. Hann tapaði báðum sínum skákum og hefur 3½ vinning eftir sex umferðir. 

• Heimasíða mótsins
• Chess-Results
• Beinar útsendingar (hefjast kl. 13)

 

Borgarskákmótið fer fram á mánudaginn

Borgarskákmótið fer fram mánudaginn 14. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa  Taflfélag Reykjavíkur og Skákfélagið Huginn, að mótinu, eins og þau hafa gert síðustu ár. Gera má ráð fyrir að margir af sterkustu skákmönnum þjóðarinnar taki þátt í því. Skákmenn eru hvattir til að skrá sig sem fyrst eftir að opnað verður fyrir skráningu. Mótið verður reiknað til hraðskákstiga og er öllum opið og er þátttaka ókeypis en skráning fer fram á Skák.is

Einnig er hægt að skrá sig í í síma 866 0116 (Vigfús) og 862 0099 (Kjartan). Skráningu á skákstað verður lokað kl. 15:50 fyrir mótið. Tefldar verða 7 umferðir með umhugsunartímanum 4 mínútur + 2 sekúndur á leik. Þetta er í 32. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Helgi Áss Grétarsson, sem þá tefldi fyrir Suzuki bíla.

Verðlaun:

1. 30.000 kr.
2. 20.000 kr.
3. 10.000 kr.

Upplýsingar um þegar skráða keppendur má finna hér.

Sumarsyrpa Breiðabliks hefst í dag

Sumarsyrpa Breiðabliks er með samskonar fyrirkomulagi og hin vinsæla Bikarsyrpa TR.

Mótið er ætlað börnum á grunnskólaaldri (fæddum 2001 og síðar) sem ekki hafa náð 1600 skákstigum. Mótið er reiknað til íslenskra og alþjóðlegra skákstiga.

Tefldar eru 5 umferðir eftir svissneska kerfinu. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Það margborgar sig að vanda sig og nota tímann, en samt má búast við því að margar skákir klárist á styttri tíma.

Veitt verða verðlaun í tveimur flokkum. Fyrir 12-16 ára og svo fyrir 12 ára og yngri. 

Dagskrá:

• Föstudagurinn 11.ágúst:  1 umferð klukkan 17:30
• Laugardagurinn 12.ágúst: 2 umferð klukkan 10:30
• Laugardagurinn 12.ágúst: 3 umferð klukkan 14:00
• Sunnudagurinn 13.ágúst: 4 umferð klukkan 10:30
• Sunnudagurinn 13.ágúst: 5 umferð klukkan 14:00

Teflt er í Glersalnum í Stúkunni við Kópavogsvöll. 

Skráning fer fram á Skák.is (guli kassinn). 

Upplýsingar um þegar skráða keppendur má finna hér.