Héðinn tapaði fyrir Volokitin

Héðinn Steingrímsson (2562) tapaði fyrir úkraínska stórmeistarann Andrei Volokitin (2686) í 10. umferð þýsku deildakeppninnar (Bundesliga) sem fram fór í dag.  Á morgun teflir Héðinn við mjög líklega við þýska stórmeistarann Daniel Fridman (2652), sem var í liði Evrópumeistara Þjóðverja á EM landsliða í Porto Carras sl. haust.  

Umferð morgundagsins hefst kl. 9.

• Heimasíða þýsku deildakeppninnar
• Beinar útsendingar

 

Fjarðarbyggð lagði Fljótdalshérað

Sveitakeppnin milli Fjarðabyggðar og Fljótsdalshéraðs fór fram 18. febrúar sl.  Fimm manna lið mættust og var tefld tvöföld atskákumferð með 20 mín. umhugsunartíma. Teflt var í Austrahúsinu á Eskifirði.
Fjarðabyggð fór með sigur af hólmi, hlaut 5½ vinning, en Fljótsdalshérað 4½.

Að lokum var tekin hraðskákkeppni, tvöföld umferð á 5 mín. Fjarðabyggð sigraði einnig í hraðskákinni.
Fjarðabyggð: 29½ vinning. Fljótsdalshérað: 20½ vinning.

Lið Fjarðabyggðar var þannig skipað: Viðar Jónsson, Rúnar Hilmarsson, Hákon Sófusson, Albert Geirsson og Jón Baldursson. Myndin sýnir sigurlið Fjarðabyggðar: Albert, Viðar, Jón, Rúnar og Hákon.

Lið Fljótsdalshéraðs skipuðu: Sverrir Gestsson, Magnús Valgeirsson, Guðmundur Ingvi Jóhannsson, Magnús Ingólfsson og Jón Björnsson.

Heimasíða SAUST

Héðinn í beinni frá þýsku deildakeppninni

Héðinn Steingrímsson (2562) er í beinni í dag frá þýsku deildakeppninni (Bundesliga).  Hann teflir við úkraínska stórmeistarann Andrei Volokitin (2686).  

Hægt er að fylgjast með skákinni beint hér.

Jón Þ. Þór vann

Hinn kunni skákmeistari og fræðaþulur Jón Þ. Þór vann FimmtudagsMenntuna í  Gallerý skák í gærkvöldi með 10 vinningum af 11 mögulegum og gekk sigrihrósandi á braut.   Guðfinnur R. Kjartansson staðarhaldari varð annar með 9 og hinn aldni heiðurmaður Kristinn Johnson með 8.5 vinning.

Annars var baráttan býsna jöfn og skemmtileg að vanda.

Ekki verður teflt í Gallerý Skák næsta fimmtudagskvöld þann 1. mars vegna Íslandsmóts Skákfélaga sem hefst á Selfossi daginn eftir.

 Meira á www.galleryskak.net

 

 

 

 

Skákþing Íslands - Áskorendaflokkur

Stjórn Skáksambands Íslands hefur ákveðið að keppni í áskorendaflokki 2012 fari fram dagana 30. mars  - 8. apríl  nk.  Mótið mun fara fram í Faxafeni 12, Reykjavík.  

Efstu tvö sætin gefa föst sæti í Landsliðsflokki 2012 eða 2013.   Tveir efstu menn í áskorendaflokki nú geta valið þar á milli.  Fyrirkomulag landsliðsflokks má finna hér.

Dagskrá:

• Föstudagur, 30. mars, kl. 18.00, 1. umferð
• Laugardagur, 31. mars, kl. 14.00, 2. umferð
• Sunnudagur, 1. apríl, Frídagur
• Mánudagur, 2. apríl, kl. 18.00, 3. umferð
• Þriðjudagur, 3. apríl, kl. 18.00, 4. umferð
• Miðvikudagur, 4. apríl, kl. 18.00, 5. umferð
• Fimmtudagur, 5. apríl, Frídagur
• Föstudagur, 6. apríl, kl. 11.00, 6. umferð
• Föstudagur, 6. apríl, kl. 17.00, 7. umferð
• Laugardagur, 7. apríl, kl. 14.00, 8. umferð
• Sunnudagur, 8. apríl, kl. 14.00, 9. umferð

Umhugsunartími: 90 mín. + 30 sek. til að ljúka.

Verðlaun:

• 1. 50.000.-
• 2. 30.000.-
• 3. 20.000.-

Aukaverðlaun:            

• U-2000 stigum, 10.000.-
• U-1600 stigum, 10.000.-
• U-16 ára, 10.000.-
• Kvennaverðlaun, 10.000.-
• Fl. stigalausra, 10.000.-

Aukaverðlaun eru háð því að a.m.k. 5 keppendur séu í hverjum flokki og eingöngu er hægt að vinna til einna aukaverðlauna.  Reiknuð verða stig séu fleiri en einn í efsta sæti.  Stigaverðlaunin miðast við íslensk skákstig.

Þátttökugjöld:

• 18 ára og eldri             3.000.-
• 17 ára og yngri            2.000.-

 

Skráningu skal senda í tölvupósti á [e-mail] eða tilkynna í síma 568 9141 virka daga kl. 10-13.   Einnig verður hægt að skrá sig beint á Skák.is þegar nær dregur keppni. 

Reykjavik Barna Blitz 2012 - ( fyrir krakka fædda 1999 og síðar)

Undanrásir fara fram í taflfélögum Reykjavíkur

• Taflfélag Reykjavíkur laugardaginn 25. febrúar 14:00
• Skákdeild Fjölnis þriðjudaginn 28. febrúar 17:15
• Taflfélagið Hellir mánudaginn 5. mars 17:15
• Skákdeild KR miðvikudaginn 7. mars 17:30

Tveir efstu á hverri æfingu komast í úrslitin sem verða tefld í Hörpu meðfram Reykjavíkurskákmótinu.

Úrslitin í Hörpu

• Átta manna úrslit fimmtudaginn 8. mars 15:45
• Undanúrslit föstudaginn 9. mars 15:45
• Úrslit laugardaginn 10. mars  14:15

Nökkvi skákmeistari TV

Í fyrrakvöldi var tefld 9 og síðasta umferð Skákþings Taflfélags Vestmannaeyja.  Fyrr í vikunni tefldu Einar og Sverrir frestaða skák úr 8. umferð og lauk henni með sigri Einars. Því var ljóst að Nökkvi Sverrisson hafði sigrað á Skákþingi Vestmannaeyja fyrir árið 2012. Nökkvi tefldi af miklu öryggi í mótinu og var aldrei í taphættu og hefur aðeins gert eitt jafntefli þegar hann á eina skák óteflda.

Í skákum gærkvöldsins bar hæst viðureign Michal Starosta og Einars Guðlaugssonar. Michal sigraði eftir grófan afleik Einars og skaust með því upp í 3. sætið í mótinu. Flottur árangur á hans fyrsta kappskákmóti og gaman að fylgjast með taflmennsku hans því ekki hefur hann mikið fyrir að telja peðin heldur teflir allar stöður til sigurs.  Sverrir vann Stefán í lengstu skák kvöldsins og tryggði með því 2. sætið. Daði Steinn sigraði síðan Jörgen.  Tveimur skákum þurfti að fresta í 9. umferð og verða þær tefldar á næstu dögum.

Staðan

Sæti	Nafn	Stig	Vin	SB
1	Nökkvi Sverrisson	1930	7½	27,50	1 frestuð
2	Sverrir Unnarsson	1946	7	24,00
3	Michal Starosta	0	6	18,00
4	Einar Guðlaugsson	1928	5½	22,25
5	Daði Steinn Jónsson	1695	5	18,00
6	Karl Gauti Hjaltason	1564	4	13,50	1 frestuð
7	Kristófer Gautason	1664	3½	11,25	1 frestuð
8	Stefán Gíslason	1869	3½	7,25
9	Jörgen Freyr Ólafsson	1167	0	0,00	1 frestuð
	Sigurður A Magnússon	1367	0	0,00	2 frestaðar

• Heimasíða TV
• Chess-Results

Íslandsmót skákfélaga - síðari hluti

Dagana 2. og 3.  mars nk. fer fram seinni hluti Íslandsmóts skákfélaga 2011-2012. Teflt verður í húsnæði Fjölbrautarskóla Suðurlands á Selfossi.  Verðlaunaafhending verður á skemmtistaðnum Hvíta Húsið og hefst kl. 23.00.

Dagskrá:

• Föstudagur 2. mars                 kl. 20.00          5. umferð
• Laugardagur 3. mars               kl. 11.00          6. umferð
• Laugardagur 3. mars               kl. 17.00          7. umferð

Heimasíða Íslandsmóts skákfélaga

Tómas Veigar hafði sigur í fjórða móti TM-syrpunnar.

Fjórða mótið í TM-mótaröðinni var teflt í gærkvöldi.  Hart var barist að venju og úrslit sem hér segir:

 

1	Tómas V Sigurðarson	10
2-3	Sigurður Eiríksson	9
	Smári Ólafsson	9
4	Jón Kristinn Þorgeirsson	8
5	Sveinbjörn Sigurðsson	5½
6-8	Andri Freyr Björgvinsson	5
	Atli Benediktsson	5
	Haki Jóhannesson	5
9	Ari Friðfinnsson	4
10	Karl E Steingrímsson	3
11	Hreinn Hrafnsson	2
12	Bragi Pálmason	½

Með sigrinum komst Tómas upp að hlið Jóns Kristins og eru þeir tveir nú langefstir í heildarkeppninni þegar fjórum mótum er lokið af átta. Þeir hafa báðir nælt sér í 35 stig en næsti maður er ekki langt undan;  Sigurður Eiríksson með 31 stig. Haki Jóhannesson er fjórði 21 stig og spurning hvort Sigurður er að stinga hann af í baráttunni um bronsverðlaunin í röðinni. Er barátta þeirra um þau verðlaun í mótaröðinni sl. haust enn í minnum höfð. Næstur kemur Sigurður Arnarson lúpínuvinur og hefur 18,5 stig, en Smári Ólafsson kemur á hæla honum með 18. Aðrir hafa minna en gætu bætt sig í næstu mótum, einkum Sveinbjörn Sigurðsson, sem nú tók þátt í sínu fyrsta móti í langan tíma og sýndi að hann hefur engu gleymt.

15 mínútna mót er fyrirhugað nk. sunnudag og hefst kl. 13.

Elsa María sigraði á fimmtudagsmóti

Elsa María Kristínardóttir og Áslaug Kristinsdóttir urðu efstar og jafnar á fimmtudagsmóti vikunnar hjá T.R. Fyrir síðustu umferð var Áslaug efst með 5,5 v. en tapaði naumlega fyrir Elsu Maríu í síðustu umferðinni og náði Elsa María þar með líka 5,5 v. en eftir stigaútreikning var ljóst að Elsa María var sigurvegari kvöldsins og fékk hún glæsilegan verðlaunapening.

Karlmennirnir í mótinu röðuðu sér í 6 neðstu sætin. Í 3. sæti var Jon Olav Fivelstad með 5 vinninga, í 4. sæti Sigurjón Haraldsson með 4,5 v. Örn Stefánsson, Jón Úlfljótsson, Pétur Jóhannesson og Björgvin Kristbergsson fengu örlítið færri vinninga, en mótið var mjög jafnt og skemmtilegt.