HM áhugamanna 2012 - Porto Carras á Grikklandi - pistill Olivers Arons

Allar styrktarþegar hjá SÍ eiga að skila pistli um þau mót sem þeir fá almenna styrki á.  Oliver Aron hefur skrifað pistil um þátttöku sína á HM áhugamanna sem fram fór í vor í Porto Carras á Grikklandi

HM áhugamanna 2012 - Porto Carras, Grikklandi
Saga mín í mótinu

1 umferð:
Eftir mjög langt og erfitt ferðalag sem tók yfir 30 klst, þá þurfti ég að tefla fyrstu umferðina aðeins 2 tímum eftir að við komumst loks á áfangastað. Andstæðingurinn var Torill Skytte(1963) frá Noregi Þetta var ekki vel tefld skák af minni hálfu enda var ég orðinn mjög þreyttur og lúinn eftir ferðalagið.

2 umferð: Andstæðingur minn í þessari umferð var Iliana Kokana sem er 10 ára stelpa frá Grikklandi, Ég var með hvítt og vann frekar auðveldlega.

3 umferð:  Ég tefldi við Marin-Dumitru Fantana(1892) frá Rúmeníu.  Í þessari skák tefldi ég Paulsen afbrigðið í Sikileyjarvörn þar sem að hann veikti sig of mikið á svörtu reitunum og ég vann skiptamun eftir um 15 leiki og restin reyndist auðveld.

4 umferð: Í fjórðu umferð tefldi ég við Bhave Kausik(1897) sem er 15 ára strákur frá Indlandi. Þetta var fimm tíma skák og mjög erfið en í endann náði ég að vinna.

5 umferð: Í fimmtu umferð tefldi ég við Sawas Maneledis(1915) með hvítt. Þessi skák byrjaði í spænska leiknum en þróaðist einhvernvegin út í Kóngindverska vörn. Þetta var fjörug skák en ég hafði sigur að lokum.

6 umferð:Í Þessari umferð tefldi ég við Ioannis Minas(1930) frá Grikklandi en hann er þekktur fyrir að vera nokkuð aggressívur skákmaður. Ég tefldi Winaver afbrigðið í franskri vörn, staðan var mjög dýnamisk en í jafnvægi þegar hann fórnaði peði sem ég tók og náði svo að vinna hann seinna í endatafli.

7 umferð: Í sjöundu umferð tefldi ég við Alexander Liberman (1988) frá Rússlandi. Þetta var spennandi skák sem að ég vann að lokum. Ég ætla að skýra hana hér á eftir.

8 umferð:  Í þessari umferð tefldi ég við Claus Riemann stigalausan Þjóðverja sem að var efstur í mótinu fyrir þessa umferð. Eftir minna en 10 leiki byrjaði hann að hrista hausinn og féll svo niður í gólfið. Keppendur á staðnum sem voru læknar byrjuðu strax að fremja hjartahnoð sem og starfsmenn sem voru þarna. Það var kallaður til sjúkrabíll sem að flutti hann svo á sjúkrahús. Eftir langa umhugsun dómaranna var klukkan sett í gang og tíminn rann út.

9 umferð: Í þessari umferð tefldi ég við Haralambos Tsakiris (1956) sem er 16 ára strákur frá Grikklandi. Ég tefldi slavneska vörn en tefldi kannski of passívt og lenti fljótt í erfiðri vörn. Það skiptist fljótt upp í endatafl þar sem að hann var með betri stöðu en samt smá jafnteflis sjénsar fyrir mig. Við lentum báðir í tímahraki þar sem að hann náði að klára skákina nokkurn veginn.

Í endann var ég nokkuð sáttur við þriðja sætið.

Bestu kveðjur og þakkir fyrir stuðninginn
Oliver Aron Jóhannesson

Heimasíða mótsins

[Event "World Amateur Championship"] [Site "Neos Marmaras, Halkidiki"] [Date "2012.04.20"] [Round "7.2"] [White "Johannesson, Oliver"] [Black "Liberman, Alexander"] [Result "1-0"] [ECO "B01"] [WhiteElo "1677"] [BlackElo "1988"] [Annotator ",Lenovo"] [PlyCount "105"] [EventDate "2012.04.16"] [EventRounds "9"] [EventCountry "GRE"] 1. e4 d5 2. exd5 Qxd5 3. Nc3 Qa5 {Hann hafði alltaf teflt thetta afbrigði svo að ég hafði aðeins undirbúið mig.} 4. Bc4 Nf6 5. Nge2 Bg4 6. d3 c6 7. f3 Bh5 { Hérna ákvað ég að tefla agresívt} 8. h4 Bg6 9. Nf4 {Hérna var planið að leika g4 til að láta hann leika h peðinu sínu og drepa thá biskupinn hans.} Bf5 { Hann kom í veg fyrir thað} 10. Qe2 {Ég ætlaði bara að hrókera langt og halda svo áfram með sóknina á kóngsvæng.} Bd7 11. Bd2 Qc7 12. g4 e6 13. g5 Ng8 14. O-O-O {Hér var ég orðinn mjög ánægður með stöðuna mína} Bd6 15. Qe4 Ne7 16. h5 {Planið er að leika g6} b5 {Hann tharf að reyna að fá mótspil.} 17. Bb3 a5 18. a4 {Ég var að reyna að halda drottningarvængnum lokuðum} b4 (18... bxa4 19. Nxa4 {Ef hann hefði leikið thessu var ég ekki að sjá leið fyrir hann að halda einhverri sókn áfram.}) 19. Nce2 e5 20. Ng2 (20. g6 {var langbesti leikurinn t. d.} exf4 21. h6 gxh6 22. gxf7+ Kd8 23. Nxf4 Kc8 24. Rxh6 Kb7 25. Rh5 Rf8 {er tölvulína sem að tölvan metur unnið á hvítt}) 20... Na6 {Hérna var ég kominn með lítinn tíma og ákvað að leika g6 og sjá hvað gerist.} 21. g6 f5 $2 {betra var að} (21... fxg6 22. Qc4 Kd8 23. Bg5 Kc8 24. d4 exd4 25. Bxe7 Bxe7 26. hxg6 h5 {thar sem að hvítur stendur samt aðeins betur}) 22. Qc4 Nd5 23. h6 hxg6 24. hxg7 Rg8 25. d4 $1 {Ég ákvað að reyna að opna miðborðið thar sem að kóngurinn hans stendur illa thar} e4 26. Nef4 Rxg7 {Hérna var ég kominn í tímahrak og ákvað að leika einhverju öruggu.} 27. Nxd5 (27. Rh8+ $1 Bf8 28. fxe4 Nxf4 29. Bxf4 Qb6 30. exf5 Bxf5 31. Re1+ Kd7 32. Bh6 Rd8 33. Bxg7 Bxg7 34. Qf7+ {er varíantur sem að tölvan gefur, sem að var að sjálfsögðu gjörunnið}) 27... cxd5 28. Qxd5 O-O-O 29. fxe4 fxe4 30. Qa8+ {thessu lék ég bara til að fá auka tíma á klukkuna} Nb8 31. Qxe4 Re8 32. Qf3 Rf8 33. Qd3 Bf5 34. Qc4 {Ég ákvað að skipta uppá drottningum útaf tímapressunni} Qxc4 35. Bxc4 Rc7 36. b3 Be4 37. Rhg1 Bh2 38. Rh1 Bg3 39. Rh3 Bd6 40. Ne3 {Ég var bara að bæta stöðu kallanna} Nc6 41. Be6+ Kb8 42. Nc4 {Ég ákvað að fórna peði til baka} Nxd4 43. Rh4 Ne2+ 44. Kb2 Bf4 45. Bxf4 Nxf4 46. Rd4 g5 47. Rh6 Bf3 {thetta voru stór mistök sem að klúðruðu skákinni. Nú falla bæði peðin á dtrottningarvæng} 48. Nxa5 g4 49. Rxb4+ Ka8 50. Nc4 g3 {Hérna var ég orðinn mjög stressaður útaf peðinu hans en ég er samt kominn með gjörunnið} 51. Nb6+ Ka7 52. Nc8+ {Hérna tharf hann að drepa á c8 en hann tapar samt skiptamun á thvi} Ka8 53. Bd5+ {Hérna er hann óstöðvandi mát í nokkrum leikjum og hann féll á tíma hérna} 1-0

Skákhátíð á Ströndum: Hver hreppir silfurhring sigurvegarans?

Skákhátíð á Ströndum 2012 verður haldin nú um helgina og er efnt til fjölteflis á Hólmavík og skákmóta í Djúpavík, Trékyllisvík og Norðurfirði. Von er á stórmeisturunum Helga Ólafssyni, Jóhanni Hjartarsyni og Þresti Þórhallssyni, auk skákáhugamanna víða að. Þá munu mörg af efnilegustu skákbörnum landsins taka þátt í hátíðinni, sem er öllum opin. Fjöldi viðurkenninga og verðlauna eru í boði, m.a. munir eftir tvo af kunnustu handverksmönnum Strandasýslu, flugfarseðlar, sérsmíðaðir silfurhringir, silki frá Samarkand, bækur og peningaverðlaun.

Hátíðin hefst með fjöltefli á Hólmavík klukkan 16 á föstudaginn, þegar Róbert Lagerman, heiðursgestur hátíðarinnar, teflir fjöltefli. Róbert sem verður fimmtugur nú í sumar er sá skákmeistari sem tekið hefur þátt í flestum skákviðburðum á Ströndum sl. ár. Á föstudagskvöld klukkan 20 verður tvískákarmót í Hótel Djúpavík og á laugardag klukkan 13 hefst Afmælismót Róberts Lagerman í samkomuhúsinu í Trékyllisvík. Heildarverðlaun á mótinu verða rúmlega 100 þúsund krónur, en að auki gefa fjölmörg fyrirtæki og einstaklingar verðlaun. Á sunnudag kl. 13 verður svo hraðskákmót í Kaffi Norðurfirði, sem markar lok Skákhátíðar á Ströndum 2012.

Til mikils er að vinna á hátíðinni. Sigurvegarar í Trékyllisvík og Norðurfirði fá muni eftir Guðjón Kristinsson frá Dröngum og Valgeir Benediktsson í Árnesi. Þá mun sigurvegarinn á Afmælismóti Róberts fá sérsmíðaðan silfurhring, smíðaðan af Úlfari Daníelssyni silfursmið. Á hringinn er greypt með rúnaletri kjörorð skákhreyfingarinnar: Við erum ein fjölskylda.

Útlit er fyrir góða þátttöku í hátíðinni, sem hefur unnið sér sess sem einhver skemmtilegasti skákviðburður ársins. Ýmsir kunnir skákáhugamenn hafa boðað komu sína, og má nefna Halldór Blöndal fv. forseta Alþingis, Magnús Matthíasson formann Vinafélagsins, Stefán Bergsson framkvæmdastjóra Skákakademíu Reykjavíkur, Ingibjörgu Eddu Birgisdóttur fv. Íslandsmeistara kvenna, Gunnar Finnsson fv. skólastjóra í Trékyllisvík og Gunnar Björnsson forseta Skáksambandsins. Þá munu heimamenn að vanda taka virkan þátt í skákhátíðinni.

Helstu bakhjarlar Skákhátíðar á Ströndum 2012 eru Brim hf. menntamálaráðuneytið, Skáksamband Íslands, Flugfélagið Ernir, Kaupfélag Steingrímsfjarðar, Sögur útgáfa, forlagið, Íslenskt grænmeti, Securitas, Jóhanna Travel o.fl.

Allir eru velkomnir, og verður efnt til ýmissa viðburða fyrir utan skákina, m.a. haldin grillveisla í Trékyllisvík og ,,landsleikur" í fótbolta milli gesta og heimamanna í UMF Leifi heppna. Það er von mótshaldara að sem flestir leggi leið sína á hátíðina um helgina, og komist í snertingu við stórbrotna náttúru og auðugt mannlíf Strandasýslu.

Skákhátíð á Ströndum hefur stofnað Facebook-síðu, en einnig er hægt að skrá sig hjá Hrafni [e-mail] , Róbert í [e-mail] Andreu [e-mail], sem einnig veita frekari upplýsingar um ævintýraferð á Strandir.

Sumarsólstöðumót hjá Vin í dag

Miðvikudaginn 20. júní verður sumarsólstöðumót í Vin, Hverfisgötu 47 og hefst það klukkan 13:00.

Treyst er á að það sé alltaf gott veður á Sumarsólstöðum! Ekki verra ef hægt væri að skella nokkrum borðum út í garð.

Tefldar verða sex umferðir með sjö  mínútna umhugsunarfresti og það er um að gera að líta á þetta sem hressandi undirbúning fyrir Strandir.

Bókavinningar fyrir efstu sætin og happadrætti. Glæstar kaffiveitingar í hléi og allir hjartanlega velkomnir í Vin.

Magnus Carlsen sigurvegari Tal Memorial

 

Magnus Carlsen (2835) sigraði á Tal Memorial sem lauk í dag í Moskvu.  Carlsen vann McShane (2706) í níundu og síðustu umferð.  Næststigahæsti skákmaður heims, Aronian (2825) gerði Carlsen mikinn greiða þegar hann vann Caruana (2770) sem var efstur fyrir lokaumferðina.  Caruana varð í 2.-3. sæti ásamt Radjabov (2784).   Fjörlega var teflt á mótinu rétt eins og ávallt á Tal Memorial.  

 

Úrslit 9. umferðar:

Levon Aronian	1-0	Fabiano Caruana
Hikaru Nakamura	½-½	Teimour Radjabov
Ev. Tomashevsky	½-½	Alexander Grischuk
Luke McShane	0-1	Magnus Carlsen
Vladimir Kramnik	½-½	Alex. Morozevich

Lokastaðan:

• 1. Carlsen (2835) 5,5 v.
• 2.-3. Caruana (2770) og Radjabov (2784) 5 v.
• 4.-7. Morozevich (2769), Aronian (2825), Kramnik (2801) og Grischuk (2761) 4,5 v.
• 8.-9. Nakamura (2775) og McShane (2706) 4 v.
• 10. Tomashevsky (2738) 3,5 v.

Mótið var ægisterkt en meðalstig eru 2776 skákstig. 

• Heimasíða mótsins
• Beinar útsendingar
• Beinar myndútsendingar
• ChessBomb

Sumarsólstöðumót í Vin

Miðvikudaginn 20. júní verður sumarsólstöðumót í Vin, Hverfisgötu 47 og hefst það klukkan 13:00.

Treyst er á að það sé alltaf gott veður á Sumarsólstöðum! Ekki verra ef hægt væri að skella nokkrum borðum út í garð.

Tefldar verða sex umferðir með sjö  mínútna umhugsunarfresti og það er um að gera að líta á þetta sem hressandi undirbúning fyrir Strandir.

Bókavinningar fyrir efstu sætin og happadrætti. Glæstar kaffiveitingar í hléi og allir hjartanlega velkomnir í Vin.

Skákhátíð á Ströndum um næstu helgi!

Fjórir stórmeistarar eru skráðir til leiks á Skákhátíð á Ströndum 2012: Helgi Ólafsson, Jóhann Hjartarson, Stefán Kristjánsson og Þröstur Þórhallsson. Að auki eru mörg af efnilegustu ungmennum landsins og skákáhugamönnum úr öllum fjórðungum á leið á Strandir.

Hátíðin hefst með fjöltefli á Hólmavík klukkan 16 á föstudaginn, þegar Róbert Lagerman, heiðursgestur hátíðarinnar, teflir fjöltefli. Á föstudagskvöld klukkan 20 verður tvískákarmót í Hótel Djúpavík og á laugardag klukkan 13 hefst Afmælismót Róberts Lagerman í samkomuhúsinu í Trékyllisvík. Heildarverðlaun á mótinu verða rúmlega 100 þúsund krónur, en að auki gefa fjölmörg fyrirtæki og einstaklingar verðlaun. Á sunnudag kl. 13 verður svo hraðskákmót í Kaffi Norðurfirði, sem markar endalok Skákhátíðar á Ströndum 2012.

Tveir af helstu handverksmönnum og listasmiðum Árneshrepps, Valgeir Benediktsson í Árnesi, og Guðjón Kristinsson frá Dröngum, leggja til verðlaunagripina á Skákhátíð á Ströndum 2012. Báðir hafa þeir, á undanförnum árum, lagt hátíðinni lið með margvíslegum hætti.

Valgeir Benediktsson hefur ásamt fjölskyldu sinni í Árnesi byggt upp Minja- og handverkshúsið Kört í Trékyllisvík. Þar er hægt að kynnast sögu þessarar einstöku sveitar, og fólkinu sem þar bjó. Óhætt er að segja að Valgeir og fjölskylda hans hafi bjargað frá glötun ómetanlegum heimildum um búsetu við nyrsta haf. Þar fyrir utan er Valgeir einhver snjallasti handverksmaður landsins, og býr til stórkostlega muni úr rekaviði, m.a. hina rómuðu penna sem notaðir hafa verið í verðlaun á skákhátíðum undanfarinna ára.

Guðjón Kristinsson er Strandamaður í húð og hár, alinn upp á Seljanesi og Dröngum. Hann er eftirsóttur hönnuður og handverksmaður, enda hefur hann tileinkað sér hina merku list forfeðra okkar við húsbyggingar og hleðslu. Að auki smíðar Guðjón leiktæki og listmuni, og er tvímælalaust í hópi áhugaverðustu listmanna landsins.

Gripurinn frá Valgeiri verður handa sigurvegaranum á Afmælismóti Róberts Lagerman í samkomuhúsinu í Trékyllisvík laugardaginn 23. júní, en daginn eftir verður keppt um ,,Krumlu Strandamannsins", skúlptúr Guðjóns úr rekaviði, á mótinu í Kaffi Norðurfirði.

Fyrir utan listgripi á Ströndum munu keppendur á skákhátíðinni keppa um peningaverðlaun og marga aðra vinninga. Mikil áhersla er lögð á verðlaun fyrir börn, enda liggur fyrir að mörg efnilegustu skákbörn landsins mæta á Strandir, auk harðsnúins heimavarnarliðs af ungu kynslóðinni. Börnin sem taka þátt í hátíðinni munu öll fá verðlaun og viðurkenningar.

Meðal keppenda á Skákhátíð á Ströndum 2012 verða sumir af bestu og efnilegustu skákmönnum landsins. Í þeim hópi eru stórmeistararnir Jóhann Hjartarson, Helgi Ólafsson og Stefán Kristjánsson. Af öðrum kunnum köppum má nefna Róbert Lagerman, Sævar Bjarnason, Stefán Bergsson, Hrannar Jónsson, Magnús Matthíasson, Heimi Páll Ragnarsson, Hilmi Frey, Heimisson, Ingibjörgu Eddu Birgisdóttur, Vigni Vatnar Stefánsson og Gunnar Björnsson.

Einnig er von á góðum hópi úr Skákfélagi Vinjar, auk þess sem vonast er til að hinir öflugu skákmenn Akureyrar og nærsveita fjölmenni. Þá tefla Strandamenn að vanda fram öflugum fulltrúum

Margir gistimöguleikar eru í Árnheshreppi og skal sérstaklega vekja athygli á góðu tilboði sem Hótel Djúpavík gerir gestum skákhátíðarinnar.

Hótel Djúpavík gerir gestum Skákhátíðar á Ströndum gott boð: Gisting í 2 nætur í tveggja manna herbergi, tveir kvöldverðir og tveir morgunverðir fyrir 16.000 krónur. Netfang: [e-mail] Sími: 451 4037.

Gistiheimilið í Norðurfirði býður uppá svefnpokapláss eða uppábúin rúm í vistlegum húsakynnum. Netfang: [e-mail] Sími: 554 4089.

Gistiheimilið Bergistanga býður upp á svefnpokapláss fyrir einstaklinga og hópa, með eldunaraðstöðu. Einnig notaleg herbergi með uppábúnum rúmum. Sími: 451 4003.

Finnbogastaðaskóli. Svefnpokapláss fyrir einstaklinga og fjölskyldufólk. Mjög góð hreinlætis- og eldunaraðstaða. Fín aðstaða á tjaldstæðum við skólann.

Skákhátíð á Ströndum hefur stofnað Facebook-síðu, en einnig er hægt að skrá sig hjá Hrafni [e-mail] , Róbert í [e-mail] Andreu [e-mail], sem einnig veita frekari upplýsingar um ævintýraferð á Strandir.

Skákþáttur Morgunblaðsins: Að tefla eins og Tal

Stigahæsti skákmaður heims, Norðmaðurinn Magnús Carlsen er meðal þátttakenda á Tal-mótinu sem hófst í Moskvu á fimmtudaginn. Eins og áður á þessum minningarmótum sem byrjuðu árið 2006 gefst gott tækifæri til að rifja upp skákir og feril snillingsins frá Riga sem lést fyrir 20 árum 55 ára að aldri.

Tal varð heimsmeistari aðeins 23 ára gamall en hélt titlinum í ekki nema eitt ár. Sigurganga hans og tilþrif voru slík að enginn komst undan áhrifum hans. Eftir áskorendamótið í Júgóslaviu árið 1959 kvaðst Tigran Petrosjan hafa gengið um stræti og torg og ekki getað hugsað um annað en taflmennsku Tal. Hann gerði ýmsar breytingar á varfærnislegum stíl sínum og varð heimsmeistari árið 1963.

Og greinarhöfundur hélt því blákalt fram við Bobby Fischer að Tal hlyti að hafa haft mest áhrif á hann. Robert James jánkaði því en argfjaðraðist svolítið út af hinu baneitraða augnaráði „töframannsins" þegar þeim laust saman í áskorendamótnu ´'59. Þeir tefldu saman á fjórum mótum á árunum 1958-'61 og Tal varð efstur í þeim öllum.

Tal tók fram í bók, sem hann skrifaði um ævi sína og feril, að hann hefði alltaf lagt meira upp úr innsæi en flóknum útreikningum. Það skýrði samt ekki nema að hluta þann sérstaka ævintýraljóma sem stafaði af taflmennsku hans. „Eigum við ekki að bæta inn í þessa stöðu dálitlum „hooligan-isma" sagði hann stundum og setti allt í bál og brand. Í grein í Huffington Post nýlega benti Lubomir Kavalek á „Tal-áhrifin" í einni skák sem Bobby Fischer tefldi við Ludek Packman í Chile árið 1959. Sennilega hefur Fischer komist að þeiri niðurstöðu eftir þessa bráðskemmtilegu skák með öllum sínum skrítnu myndum, að rólegri og rökréttari nálgun félli betur að skapgerð hans:

Santiago 1959:

Ludek Pachman - Bobby Fischer

Nimzoindversk vörn

1. Rf3 Rf6 2. c4 e6 3. d4 d5 4. e3 Rc6 5. Rc3 Bb4 6. Bd2 O-O 7. a3 Bxc3 8. Bxc3 Re4 9. Dc2 a5 10. b3 b6 11. Bb2 Ba6 12. Bd3 f5 13. Hc1 Hc8 14. O-O Hf6 15. Hfd1 Hh6 16. Bf1 g5!

Blæs til sóknar. Upp úr þessar óvenjulegu byrjun sem minnir á „grjótgarðs-afbrigðið" í hollenskri vörn hefur svartur náð vænlegum færum.

17. cxd5 g4!?

„Tal-áhrifin. Hæpinn leikur því svartur átti 17. ...Bxf1 og hvort sem hvítur velur 18. dxe6, 18. Dxc6 eða 18. dxc6 getur svartur ávallt leikið 18. ... Bxg2! og eftir 19. Kxg2 kemur 19. ... g4 með sterkri sókn.

18. Bxa6 gxf3 19. gxf3!

Betra en 19. Bxc8 Dg5 20. g3 Hxh2! og svartur vinnur.

19. ... Dg5+ 20. Kf1 Hxh2 21. fxe4 Hf8!

Snilldarleikur sem Pachman hafði sést yfir.

22. e5 f4! 23. e4 f3 24. Ke1

Sjá stöðumynd

24. ...Dg1+?

„Að skáka er eins og að spila út trompi," sagði Ingi R. Jóhannsson einhverju sinni. Eftir þennan leik er svarta staðan töpuð. Af mörgum álitlegum kostum var 24. ... exd5! bestur. „Silikonvinurinn" Houdini fullyrðir að þá sé svarta staðan unnin því að eftir 26. exd5 kemur hinn eitursvali 26. ... Re7!

25. Kd2 Dxf2 26. Kc3 Dg3 27. Dd3 exd5 28. Hg1

Frá og með þessum eik er taflmennska Pachman nánast óaðfinnanleg.

28. .. Hg2 29. Hxg2 Dxg2 30. Df1 dxe4 31. Dxg2 fxg2 32. Hg1 Hf2 33. Bc4 Kf8 34. Bd5 Hf3 35. Kc4 b5 36. Kc5 Re7 37. Hxg2 Rxd5 38. Kxd5 Hxb3 39. Kxe4 b4 40. axb4

og svartur gafst upp.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 10. júní 2012.

Skákþættir Morgunblaðsins

[Event "Santiago Rd: 6"] [Site "Santiago Rd: 6"] [Date "1959.??.??"] [EventDate "?"] [Round "?"] [Result "1-0"] [White "Ludek Pachman"] [Black "Robert James Fischer"] [ECO "E10"] [WhiteElo "?"] [BlackElo "?"] [PlyCount "80"] 1. Nf3 Nf6 2. c4 e6 3. d4 d5 4. e3 Nc6 5. Nc3 Bb4 6. Bd2 O-O 7. a3 Bxc3 8. Bxc3 Ne4 9. Qc2 a5 10. b3 b6 11. Bb2 Ba6 12. Bd3 f5 13. Rc1 Rc8 14. O-O Rf6 15. Rfd1 Rh6 16. Bf1 g5 17. cxd5 g4 18. Bxa6 gxf3 19. gxf3 Qg5+ 20. Kf1 Rxh2 21. fxe4 Rf8 22. e5 f4 23. e4 f3 24. Ke1 Qg1+ 25. Kd2 Qxf2+ 26. Kc3 Qg3 27. Qd3 exd5 28. Rg1 Rg2 29. Rxg2 Qxg2 30. Qf1 dxe4 31. Qxg2+ fxg2 32. Rg1 Rf2 33. Bc4+ Kf8 34. Bd5 Rf3+ 35. Kc4 b5+ 36. Kc5 Ne7 37. Rxg2 Nxd5 38. Kxd5 Rxb3 39. Kxe4 b4 40. axb4 axb4 1-0

Líf og fjör á útitaflinu 17. júní!

Útitaflið iðaði af lífi á þjóðhátíðardaginn þegar Skákakademían stóð fyrir fjöltefli Björns Þorfinnssonar skákmeistara. Margir notuðu líka tækifærið og tefldu á útitaflinu sjálfu, og var yngri kynslóðin sérstaklega spennt fyrir stóru taflmönnunum.

Skákakademían mun í sumar standa fyrir ýmsum viðburðum til að lífga upp á útitaflið, enda verða sumarnámskeið SR skammt frá. Þau hefjast á morgun, mánudag. Allar upplýsingar um sumarnámskeiðin er að finna á forsíðunni hér á skák.is!

Myndaalbúm frá útitaflinu (HJ)

Caruana efstur fyrir lokaumferð Tal Memorial

Caruana (2770) eru efstur að lokinni áttundu og næstsíðustu umferð Tal Memorial sem fram fór í dag.  Caruna vann Kramnik (2801).  Carlsen (2835) og Radjabov (2784) eru í 2.-3. sæti.  Caruna mætir Aronian (2825) í lokaumferðinni.

Úrslit 8. umferðar:

Fabiano Caruana	1-0	Vladimir Kramnik
Alex. Morozevich	0-1	Luke McShane
Magnus Carlsen	½-½	Ev. Tomashevsky
Alexander Grischuk	1-0	Hikaru Nakamura
Teimour Radjabov	½-½	Levon Aronian

Staðan:

• 1. Caruana (2770) 5 v.
• 2.-3. Carlsen (2835) og Radjabov (2784) 4,5 v.
• 4.-7. Morozevich (2769), Kramnik (2801), Grischuk (2761) og McShane (2706) 4 v.
• 8.-9. Nakamura (2775) og Aronian (2825) 3,5 v.
• 10. Tomashevsky (2738) 3 v.

Mótið er ægisterkt en meðalstig eru 2776 skákstig.  Taflmennskan hefst kl. 11 á daginn nema að lokaumferðin hefst kl. 9.  Frídagar eru 11. og 15. júní.

• Heimasíða mótsins
• Beinar útsendingar
• Beinar myndútsendingar
• ChessBomb

Útitaflið vaknar til lífsins - Björn með fjöltefli í dag

 

Skákakademían býður upp á taflmennsku á útitaflinu sunnudaginn 17. júní milli klukkan 14 og 17. Björn Þorfinnsson, margreyndur landsliðsmaður í skák, mætir og teflir við gesti og gangandi. Þátttaka kostar ekkert, og eru áhugasamir skákmenn á öllum aldri hvattir til að mæta.

Fjölteflið á þjóðhátíðardaginn markar upphaf að líflegu starfi á útitaflinu í sumar. Skákakademían mun verða með fjöltefli og útiskákmót á föstudögum.