Skák.is

Færsluflokkur: Spil og leikir

10.12.2012 | 23:31

Dagur endaði með 3 vinninga í Búdapest

Alþjóðlegi meistarinn Dagur Arngrímsson (2384) gekk illa í lokaumferðum First Saturday-mótsins sem lauk í dag í Búdapest. Dagur hlaut 3 vinninga og endaði í 9.-10. sæti.

Frammistaða Dags samsvaraði 2306 og lækkar hann um 9 stig fyrir hana.

Tíu skákmenn tóku þátt og voru meðalstig 2426 skákstig. Dagur var nr. 7 í stigaröð keppenda.

Heimasíða mótsins

Chess-Results

Spil og leikir | Slóð | Facebook | Athugasemdir (0)

10.12.2012 | 10:26

Hraðskákmeistaramót Víkingaklúbbsins fer fram á fimmtudag

Hraðskákmeistaramót Víkingaklúbbsins verður haldið fimmtudaginn 13. desember Í Víkinni Víkingsheimilinu og hefst taflið kl. 20.00. Tefldar verða 2x7 umferðir með fimm mínútna umhugsunartíma. Verðlaunagripir verða fyrir þrjú efstu sætin og einnig sérstök unglinga og kvennaverðlaun. Mótið er opið öllum skákmönnum og boðið verður upp á kaffi og léttar veitinagar á staðnum. Núverandi hraðskákmeistari Víkingaklúbbsins er Davíð Kjartansson.

Spil og leikir | Slóð | Facebook | Athugasemdir (0)

9.12.2012 | 21:42

London: Kramnik og Polgar unnu í dag - Carlsen með 2 stiga forystu fyrir lokaumferðina

Vladimir Krmanik (2795) og Judit Polgar (2705) voru sigurvegar dagsins í áttundu og næstsíðustu umferð London Chess Classic. Kramnik vann Gawain Jones (2644) en Polgar lagði Luke McShane (2644). Örðum skákum lauk með jafntefli. Carlsen (2848), sem sat yfir í dag, hefur 2 stiga forystu Kramnik en lokaumferðin fer fram á morgun og hefst fyrr en venjulega eða kl. 12.

Í lokaumferðinni mætir Carlsen heimsmeistaranum Anand (2775) en Kramnik teflir við Adams (2710).

Níu skákmenn taka þátt í mótinu og því situr alltaf einn yfir. Viðkomandi sér um skákskýringar í þeirri umferð. Veitt eru 3 stig fyrir sigur og 1 fyrir jafntefli.

Birkir Karl Sigurssðon (1725), sem tefldi í FIDE-flokki fetaði í fótspor sjálfs heimsmeistarans og gerði mikið að jafnteflum eða 7 jafntefli í 9 skákum og hlaut 3,5 vinning. Árangur hans samsvaraði 1910 skákstigum og hækkar hann um 28 stig. Birkir Karl tefldi við stigahærri keppenda í hverri einustu skák svo árangur hans er prýðisgóður.

Úrslit 8. umferðar:

Vishy Anand	½-½	Hikaru Nakamura
Luke McShane	0-1	Judit Polgar
Levon Aronian	½-½	Michael Adams
Vladimir Kramnik	1-0	Gawain Jones

Staðan:

1. Carlsen (2848) 17/7
2. Kramnik (2795) 15/7
3. Adams (2710) 12/7
4. Nakamura (2760) 10/7
5. Anand (2775) 8/7
6. Aronian (2815) 7/7
7.-8. McShane (2713) og Polgar (2705) 5/7
9. Jones (2644) 3/8

Spil og leikir | Slóð | Facebook | Athugasemdir (0)

9.12.2012 | 20:00

Skákþáttur Morgunblaðsins: Undirbúningur og úrslitaskákir

Klassíska skákin" leið undir lok við aldamótin 2000 og nýir spámenn hafa komið fram sem skara fram úr í því að nýta kosti tölvutækninnar: Kazimdsanov, Karjakin, Nakamura, Anand, Kramnik, Topalov og Frakkarnir. Þetta er umfjöllunarefnið öðrum þræði í nýrri bók úkraínska stórmeistarans Vladimirs Tukmakovs,Modern chess preparation.

Í fyrri helmingi bókarinnar dregur Tukmakov fram dæmi frá fyrri tíð sem kunna að hafa skotist fram hjá okkur: Pólverjinn Akiba Rubinstein var snjall í hróksendatöflum - það vissum við, en hann var líka að mati höfundar langt á undan sinni samtíð að flestu öðru leyti. Tvær heimsstyrjaldir léku hann grátt, sú fyrri hindraði einvígi við Emanuel Lasker um heimsmeistaratitilinn. Fengin reynsla og kunnátta gat verið dýru verði keypt í þá daga.

Nú eru leynivopn skákarinnar þaulprófuð með samkeyrslu fjölmargra forrita. Æfingaaðstaða heimsmeistarans minnir meira á tölvuver en nokkuð annað. Þrátt fyrir tæknina ráðleggur Tukmakov ungum skákmönnum að sundurgreina skákir og æfa sig án þess að hafa tölvu við höndina.

Í einum kafla bókarinnar fjallar hann um úrslitaskákir. Nokkur dæmi eru tekin til meðferðar og Tukmakov veltir við nokkrum steinum af skákferli Spasskís: fyrir lokaskákina í áskorendaeinvíginu við Paul Keres árið 1965 var Spasskí yfir, 5:4, og dugði jafntefli til að vinna einvígið. Ýmsar rólegar og traustar byrjanir virtust sniðnar til þess að ná þeim úrslitum. En þeir voru báðir komnir langt að og Spasskí vissi að upp var runnin ögurstund á ferli Keres. Hann ákvað að koma Eistlendingnum á óvart og tefla kóngsindverska vörn, afar krefjandi og flókna byrjun sem hann hafði sjaldan beitt áður. Við undirbúning fyrir skákina gat hann sér til um það afbrigði sem Keres valdi og sendi jafnframt inn þau skilaboð til hins vígmóða andstæðings að nú væru þrenn úrslit möguleg; sigur, tap eða jafntefli. Eins og 15. leikur hans leiðir í ljós fór Spasskí aldrei „úr karakter". Skákin sem hér fer á eftir er þrungin stigmagnaðri spennu:

Riga 1965:

Paul Keres - Boris Spasskí

Kóngsindversk vörn

1.d4 Rf6 2. c4 g6 3. Rc3 Bg7 4. e4 d6 5. f4 c5 6. d5 0-0 7. Rf3 e6 8. Be2 exd5 9. cxd5 b5!?

Þessi óvænti leikur byggist á hugmyndinni 10. Bxb5 Rxe4 11. Rxe4 Da5+ o.s.frv. Í dag er talið traustara að leika 9.... Bg4 eða 9.... He8.

10. e5 dxe5 11. fxe5 Rg4 12. Bf4

Skarpara er 12. Bg5 með hugmyndinni 12.... f6 13. exf6 Bxf6 14. Dd2.

12.... Rd7 13. e6 fxe6 14. dxe6 Hxf4 15. Dd5!

Hótar 16. Dxa8 og 16. e7+.

15.... Kh8!?

Gefur hrókinn. Hann gat leikið 15.... Bb7 16. Dxb7 Rb6 og staðan má heita í jafnvægi. Miðað við stöðuna í einvíginu hefði þetta verið eðlilegra framhald.

16. Dxa8 Rb6 17. Dxa7 Bxe6

Hvítur er skiptamun yfir en léttu menn svarts standa allir vel. „Houdini" metur stöðuna jafna.

18. 0-0 Re3 19. Hf2 b4 20. Rb5

Afturábak hentaði ekki við þessar kringumstæður, 20. Rd1var samt traustara.

20....Hf7 21. Da5 Db8!

Rólegu leikirnir eru oft erfiðastir í flóknum stöðum.

22. He1 Bd5 23. Bf1 Rxf1 24. Hfxf1 Rc4! 25. Da6 Hf6! 26. Da4 Rxb2 27. Dc2 Dxb5 28. He7

Eða 28. Dxb2 Hxf3! og vinnur.

28.... Rd3 29. De2 c4 30. He8 Hf8 31. Hxf8 Bxf8 32. Rg5 Bc5 33. Kh1 Dd7 34. Dd2 De7 35. Rf3 De3

- og Keres gafst upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 2. desember

Skákþættir Morgunblaðsins

Spil og leikir | Breytt 1.12.2012 kl. 19:03 | Slóð | Facebook | Athugasemdir (0)

9.12.2012 | 19:25

Friðrik tapaði í fórnarskák fyrir Taniu Sachdev

Friðrik Ólafsson (2419), sem teflir nú í keppni heldri skákmanna gegn skákkonunum, tapaði fyrir indversku skákdrottningunni Tania Sachdev (2400) í 2. umferð sem fram fer í dag. Öðlingum gengur ekki vel og hafa aðeins hlotið 2 vinninga gegn 6 vinningum kvennanna.

Friðrik teflir á morgun við rússnesku skákkonuna Alina Kashlinskaya (2344), sem er meðal keppenda á N1 Reykjavíkurskákmótinu.

Í liði heldri skákmanna eru auk Friðriks þeir Romanish (2530), Hort (2455) og Uhlmann (2310) en kvennaliðið skipa þær Gunina (2514), Sachdev (2400), Kaslinskaya (2344) og Havlikova (2310). Tefld er tvöföld umferð, þ.e. allir heldri skákmennirnir tefla tvisvar við hverja skákkonu.

Heimasíða mótsins
Beinar útsendingar (hefjast almennt kl. 14).

Spil og leikir | Breytt s.d. kl. 21:27 | Slóð | Facebook | Athugasemdir (0)

9.12.2012 | 18:42

Áskell vann forgjafarmót

Venju fremur var góðmennt á sunnudagsmóti Skákfélags Akureyrar að þessu sinni. Sex heiðursmenn mættu til leiks í forgjafar móti og var þar ekkert gefið eftir. Á klukkum sem stilltar voru sérstaklega fyrir þessar viðureignir sáust einkum tímamörkin 7-7, 8-6, 9-5 og 11-3! Samanlagður tími var sumsé 14 mínútur en skiptist misjafnlega eftir meintum styrkleika þátttakenda. Heiðursfélaginn Karl Egill byrjaði öðrum betur í þetta sinn og vann þrjár fyrstu en slakaði á eftir það og leyfði andstæðingum sínum að fá stig.

Alls voru sumsé tefldar fimm umferðir í sex manna móti og þegar upp var staðið mátti lesa þetta af töflunni:

Áskell Örn Kárason 3,5
Karl Egill Steingrímsson 3
Sigurður Eiríksson
Sigurður Arnarson
Haki Jóhannesson 2.5
Einar Garðar Hjaltason 1

Þannig fór um sjóferð þá

Spil og leikir | Breytt s.d. kl. 18:51 | Slóð | Facebook | Athugasemdir (0)

9.12.2012 | 18:05

Skákir úr Vetrarmóti öðlinga

Þórir Benediktsson hefur slegið inn skákir úr 1.-6. umferð Vetrarmóts öðlinga sem nú í fullum gangi. Sævar Bjarnason leiðir með 5 vinninga en lokaumferðin fer fram á miðvikudag.

Stöðu mótsins má finna hér. Röðun sjöundu og síðustu umferðar, sem fram fer á miðvikudagskvöld má finna hér.

Í lokaumferðinni mætast meðal annars: Halldór Pálsson - Sævar Bjarnason, Júlíus Friðjónsson - Gylfi Þórhallsson og Jóhann Ragnarsson (2081) - Júlíus Friðjónsson

Veljið skák (84 alls):

Spil og leikir | Breytt s.d. kl. 18:36 | Slóð | Facebook | Athugasemdir (0)

9.12.2012 | 14:03

Frábær skákheimsókn til Grænlands: Skákgyðjan hefur numið land í Nuuk

,,Skák er svo kúl!" sagði grænlensk grunnskólastúlka, eftir að hafa fengið að kynnast undraheimi taflistarinnar. Liðsmenn Hróksins, Henrik Danielsen og Hrafn Jökulsson, heimsóttu Nuuk, höfuðstað Grænlands, fóru í nokkra grunnskóla, leituðu uppi skákklúbb heimamanna, voru boðnir í fjölsmiðju fyrir unglinga og hittu borgarstjórann.

Ferðin var í alla stóði stórkostleg og Henrik sýndi enn og aftur hversu vel hann nær til krakka -- hvort sem þeir eru í Grænlandi, Íslandi, Færeyjum, Danmörku eða Afríku.

Heimamenn tóku liðsmönnum Hróksins tveim höndum. Hjónin Benedikte og Guðmundur Þorsteinsson höfðu skipulagt heimsóknina, en Benedikte var einmitt manneskjan sem átti allan heiður af skipulagningu sögufrægu heimsóknarinnar til Suður-Grænlands 2003, þegar skáklandnámið hófst hjá okkar góðu nágrönnum og vinum.

Skólastjórnendur og kennarar í Nuuk voru ánægðir með heimsóknir hinna íslensku sendiboða, og bæjarstjórinn, Asii Chemnitz Narup, tók afar vel í hugmyndir um að öll börn í Nuuk fengju að kynnast skákíþóttinni. Bæjarstjórinn hafði líka heyrt af jákvæðum áhrifum skákkunnáttu á námsárangur og félagslega færni barna, og hét fullum stuðningi við áframhaldandi skáklandnám.

Draumur Hróksmanna er að skipuleggja stórt alþjóðlegt atskákmót í Nuuk á næsta ári, í minningu Jonathans Motzfeldts, hins mikla landsföður leiðtoga Grænlendinga, sem einmitt tók þátt í fyrsta mótinu í Qaqortoq 2003, ásamt kempum á borð við Friðrik Ólafsson, Jóhann Hjartarson, Sævar Bjarnason, Ivan Sokolov, Reginu Pokorna, Predrag Nikolic, Róbert Lagerman, Stefán Kristjánjsson, Tomas Oral, Nick de Firmian -- og ótal íslenska og grænlenska skákáhugamenn.

Síðasta áratuginn hafa Hróksliðar einbeitt sér að starfinu á Austur-Grænlandi og haldið ótal skákhátíðir í Tasiilaq og litlu þorpunum þar um kring, auk þess að fara um hverja páska til Ittoqqortoormiit, sem er trúlega einangraðasta þorp á norðurhveli.

Drifkrafturinn á bak við landnám íslenskra skákmanna á Grænlandi eru einkunnarorð FIDE, alþjóðasambands skákmanna: Við erum ein fjölskylda.

Við trúum því líka að grannþjóðirnar í norðri eigi að hafa sem mesta samvinnu, og besta leiðin til þess er vitaskuld að ná til ungu kynslóðarinnar.

Það er ekki sjálfsagt að fara til Grænlands á jólaföstunni og færa gleði skákarinnar til okkar góðu granna. Henrik Danielsen sýndi enn einu sinni að hann er alltaf tilbúinn að leggja sitt af mörkum. Verkfræðifyrirtækið Mannvit hjálpaði okkur mikið, sem og okkar góðu vinir hjá Flugfélagi Íslands. Forlagið, Henson, Sögur útgáfa og Nói Sírus gerðu okkur kleift að færa börnunum margar góðar gjafir. Skáksambandið, Skákakademían og Skákfélag Vinjar létu taflbúnað af mörkum -- svo nú er hægt að tefla á mörgum borðum í Nuuk.

Nú er bara næsta mál á dagskrá: Að fá sem flesta íslenska skákáhugamenn til að taka þátt í Minningarmóti Jonathans Motzfeldts í Nuuk 2013.

Í millitíðinni gæti ég vel trúað því að Arnar Valgeirsson og fleiri góðir vinir skipuleggi enn eina skákhátíð á 70. breiddargráðu, því börnin í Ittoqqortoormiit vilja sína skák um páskana og engar refjar.

Djúpar þakkir til allra sem hjálpuðu við að gera þetta ævintýri að veruleika!

Myndir frá Nuuk HJ

Enn fleiri skemmtilegar myndir frá Nuuk

Facebook-síðan: Skák á Grænlandi

Spil og leikir | Breytt s.d. kl. 14:13 | Slóð | Facebook | Athugasemdir (0)

8.12.2012 | 21:29

Fjögur jafntefli í London

Öllum skákum sjöundu umferðar London Chess Classic lauk með jafntefli í kvöld. Þar á meðal gerði Carlsen (2848) jafntefli við Nakamura (2760). Carlsen, sem hefur 5 stiga forystu á Kramnik (2795), situr yfir á morgun.

Áttunda og næstsíðasta umferð fer fram á morgun. Þá mætast meðal Kramnik-Jones og Aronian-Adams.

Níu skákmenn taka þátt í mótinu og því situr alltaf einn yfir. Viðkomandi sér um skákskýringar í þeirri umferð. Veitt eru 3 stig fyrir sigur og 1 fyrir jafntefli.

Birkir Karl Sigurðsson (1725) gerði sitt sjötta jafntefli í átta skákum í opna flokknum. Hann hefur 3 vinninga en hefur teflt upp fyrir sig allt mótið.

Úrslit 7. umferðar:

Gawain Jones	½-½	Levon Aronian
Mickey Adams	½-½	Luke McShane
Judit Polgar	½-½	Vishy Anand
Hikaru Nakamura	½-½	Magnus Carlsen

Staðan:

1. Carlsen (2848) 17/7
2. Kramnik (2795) 12/6
3. Adams (2710) 11/6
4. Nakamura (2760) 9/6
5. Anand (2775) 7/6
6. Aronian (2815) 6/6
7. McShane (2713) 5/6
8. Jones (2644) 3/7
9. Polgar (2705) 2/6

Spil og leikir | Slóð | Facebook | Athugasemdir (0)

8.12.2012 | 19:15

Friðrik tapaði fyrir Evrópumeistaranum í dag

Friðrik Ólafsson (2419), sem teflir nú í keppni heldri skákmanna gegn skákkonunum tapaði fyrir Evrópumeistara kvenna og einum ólympíumeistara Rússa Valentina Gunina (2514) í fyrstu umferð, sem fram fór í dag í Podebredy í Tékklandi í dag. Heldri skákmönnum gegn reyndar illa í dag Romanishin (2530) sá eini sem náði jafntefli og lokatölur fyrstu umferðar því 0,5-3,5 konunum í vil.

Í 2. umferð, sem fram fer á morgun, teflir Friðrik við tékknesku skákkonuna Kristyna Havlikova (2310), sem er næststigahæsta skákkona Tékklands.

Í liði heldri skákmanna eru auk Friðriks þeir Romanish (2530), Hort (2455) og Uhlmann (2310) en kvennaliðið skipa þær Gunina (2514), Sachdev (2400), Kaslinskaya (2344) og Havlikova (2310).

Tefld er tvöföld umferð, þ.e. allir heldri skákmennirnir tefla tvisvar við hverja skákkonu.