Skákkrakkarnir söfnuðu meira en milljón fyrir Barnaspítala Hringsins!

Fimmtudaginn 13. desember klukkan 14.30 í Barnaspítala Hringsins munu liðsmenn Skákakademíunnar afhenda söfnunarfé úr skákmaraþoni barna og ungmenna, sem haldið var í Kringlunni um mánaðamótin. Alls söfnuðu krakkarnir yfir einni milljón króna, og lögðu fjölmargir sitt af mörkum í þágu þessa góða málstaðar.

Þegar er búið að afhenda fulltrúum skólans og leikstofunnar í Barnaspítala Hringsins tölvukost að andvirði um 300 þúsund krónur, sem fengust með mjög rausnarlegum afslætti hjá Tölvulistanum og Senu, en fyrirtækin gáfu auk þess tölvuleiki og kennsluefni. Þá gaf Hljóðbók.is fjölda hljóðbóka fyrir börn.

Við athöfnina á morgun mun Valgerður Einarsdóttir formaður Hringskvenna veita viðtöku 925 þúsund krónum, sem renna í Barnaspítalasjóð Hringsins, en úr sjóðnum eru veittir styrkir til kaupa á ýmiskonar búnaði og tækjum sem notuð eru til að veita veikum börnum á Íslandi nauðsynlega meðferð og aðhlynningu.

Krakkarnir sem tefldu í þágu Hringsins heita Óskar Víkingur Davíðsson, Jón Jörundur Guðmundsson, Aron Ingi Woodard, Hildur Berglind Jóhannsdóttir, Jón Trausti Harðarson, Hilmir Freyr Heimisson, Heimir Páll Ragnarsson, Gauti Páll Jónsson, Þorsteinn Magnússon, Veronika Steinunn Magnúsdóttir, Donika Kolica, Hrund Hauksdóttir, Elín Nhung, Vignir Vatnar Stefánsson, Oliver Aron Jóhannesson, Dagur Ragnarsson og Felix Steinþórsson.

Fjölmargir þjóðkunnir skemmtikraftar og listamenn, þingmenn og borgarfulltrúar, tóku virkan þátt í maraþoninu, m.a. Ragnheiður Gröndal, Bjartmart Guðlaugsson, Hermann Gunnarsson, Skoppa og Skrítla, og meira að segja Karíus og Baktus! Þá tefldu margir bestu skákmenn þjóðarinnar sem ,,leiguliðar" fyrir þá sem ekki áttu heimangengt eða treystu sér ekki til að tefla sjálf. Þessir meistarar voru Friðrik Ólafsson, Helgi Ólafsson, Jón L. Árnason, Jóhann Hjartarson, Hjörvar Steinn Grétarsson, Henrik Danielsen og Þröstur Þórhallsson.

Yfirskrift skákmaraþonsins í þágu Hringsins var ,,Við erum ein fjölskylda", sem eru einkunnarorð skákhreyfingarinnar. Skákakademían leggur áherslu á það í starfi sínu að allir geti teflt sér til ánægju, burtséð frá aldri, kyni eða líkamsburðum.

Liðsmenn Skákakademíunnar heimsækja leikstofu Barnaspítala Hringsins alla fimmtudaga og tefla við börn sem þar eru til lækninga.

Skemmtilegar myndir úr maraþoninu!

Enn fleiri skemmtilegar myndir úr maraþoninu...

HS Orka og Skákfélag Reykjanesbæjar gáfu töfl í allar sex sundlaugarnar á svæðinu

Nú er hægt að tefla skák í heita pottinum í öllum laugunum og er frábær viðbót við það skákstarf sem við erum að reyna endurvekja hjá Skákfélagi Reykjanesbæjar og gaman að HS Orka sé að hjálpa okkur við það. Það er skemmtilegt jólamót núna á laugardaginn 15. desember sem Samsuð og krakkaskák.is halda sameiginlega og við vonum að börnin muni betur eftir því eftir skólasundið sitt og sjái sér fært um að mæta til okkar klukkan 13:00 - 17:00. Það eru góð verðlaun og keppt í mörgum flokkum. Skráning fer fram á fjorheimar.is.

Skák er skemmtileg

Skákfélagið vantar sárlega fleiri félagsmenn og biður alla sem hafa áhuga fyrir skák að heimsækja sig í Framsóknarhúsið á Hafnargötu 62 klukkan 20:00 á mánudaginn 17. desember. Það verður kaffi með léttu spjalli og skák. Það er ekki skilyrði að kunna neitt fyrir sér í tafli. Það er alveg hægt að halda úti skákæfingum einu sinni í viku fyrir allan aldurshóp ef fólk hefur gaman að því að leika sér.  Ég veit að það eru margir að tefla í laumi og eiga gjöra svo vel að koma út úr skápnum núna og tefla í félaginu sér til skemmtunar.

Jólakveðja Siguringi Sigurjónsson.

Goðinn-Mátar og Velferðarsjóður Þingeyinga taka höndum saman og efna til fjársöfnunar á Skákdeginum 26. janúar

Í tilefni af Skákdeginum 26. janúar nk. mun Goðinn-Mátar og Velferðarsjóður Þingeyinga taka höndum saman og safna peningum fyrir sjóðinn.  Söfnunin fer þannig fram að félagsmenn Goðans-Máta munu vera í anddyri Kaupfélagshússins á Húsavík, framan við matvörubúðina Kaskó, með skákborð og skákklukku.Þar geta gestir og gangandi teflt við félagsmenn hraðskákir og greitt fyrir það að lágmarki 500 kr fyrir skákina. Eins geta þeir sem vilja greitt meira. Allt fé sem safnast með þessum hætti mun renna til velferðarsjóðsins.

Ef svo fer að einhver gestur vinni einhvern félagsmann verður viðkomandi umsvifalaust innlimaður í félagið og fær fyrsta árgjaldið að félaginu fellt niður. 

Nú þegar hafa Heimilistæki heitið á Kristinn Vilhjálmsson, hjá Víkurraf á Húsavík, 50.000 krónum ef hann teflir eina hraðskák við einhvern af félagsmönnum Goðans-Máta á Skákdeginum. 

Nánar á heimasíðu Goðans Máta

Friðriksmót Landsbandsbankans fer fram á sunnudag - sjö stórmeistarar skráðir til leiks!

Friðriksmót Landsbankans - Íslandsmótið í hraðskák fer fram í útibúi Landsbankans við Austurstræti 11 sunnudaginn 16. desember nk. Hér er á ferðinni langsterkasta hraðskákmót ársins enda eru sjö stórmeistarar skráðir til leiks.

Þau rúmlega 80 sæti sem voru í boði fylltust á á aðeins 14 klukkustundum. Hægt er að skrá sig á biðlista á mótið en upplýsingar um stöðu skráninga má finna hér. Skráðir keppendur, sem ekki geta verið með eru beðnir um að láta vita með tölvupósti í netfangið [e-mail] til að aðrir geti komist að.

Mótið hefst kl. 13 og stendur til kl. 16.30. Tefldar verða 11 umferðir með 7 mínútna umhugsunartíma.

Verðlaun eru sem hér segir:

• 1) 100.000 kr.
• 2) 60.000 kr.
• 3) 50.000 kr.
• 4) 30.000 kr.
• 5) 20.000 kr.

Aðalverðlaun skiptast séu menn jafnir að vinningum.  

Aukaverðlaun:

• Efsti unglingurinn 16 ára og yngri: 10.000 kr.
• Efsta konan: 10.000 kr.
• Efsti maður með 2200 stig og minna: 10.000 kr.
• Efsti maður með 2000 stig og minna: 10.000 kr.
• Útdreginn heppinn keppandi: 10.000 kr.

Aukaverðlaun eru miðað við nýjustu útgefin íslensk skákstig.   Reiknuð eru stig séu menn jafnir og efstir. 

Efsti keppandi mótsins verður Íslandsmeistari í hraðskák.   Verði tveir eða fleiri efstir ræður stigaútreikningur. 

Þetta er níunda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga. Margir af sterkustu stórmeisturum landsins hafa undanfarin ár teflt til heiðurs Friðriki.

Keppendalistinn

Fyrri sigurvegarar:

• 2011 - Henrik Danielsen
• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

 

 

Friðrik með góðan sigur í dag

Fyrsti stórmeistari Íslendinga, Friðrik Ólafsson (2419), teflir af miklum krafti í Tékklandi þar sem heldri skákmenn tefla við skákkonur. Í 4. umferð sem fram fór í dag vann Friðrik góðan og öruggan sigur á tékknesku skákkonunni Kristýna Havlíková (2310) í mjög vel tefldri skák. Í dag unnu loks öðlingarnar skákkonurnar en hinum skákunum lauk með jafntefli. Friðrik hefur ásamt Romanishin (2530) fengið flesta vinninga öðlinganna en þeir hafa 1,5 vinning. Frídagur er á morgun en á fimmtudag teflir hann við við Evrópumeistara kvenna, Valentina Gunina (2514).

Í liði heldri skákmanna eru auk Friðriks þeir Romanish (2530), Hort (2455) og Uhlmann (2310) en kvennaliðið skipa þær Gunina (2514),  Sachdev (2400), Kaslinskaya (2344) og Havlikova (2310). Tefld er tvöföld umferð, þ.e. allir heldri skákmennirnir tefla tvisvar við hverja skákkonu.

• Heimasíða mótsins 
• Beinar útsendingar (hefjast almennt kl. 14).

Jóhann Örn jólahraðskákmeistari hjá Ásum í dag

Það mættu þrjátíu og sex heldri skákmenn á Jólahraðskákmót Ása í dag. Margir rammsterkir Riddarar og skákæstir Ásar. Tefldar voru níu umferðir með sjö mínútna umhugsunartíma. Jóhann Örn Sigurjónsson var erfiður viðureignar eins og hann er alla jafna, og varð efstur með átta vinninga, Jóhann leyfði aðeins tvö jafntefli.

Í öðru sæti varð Friðgeir Hólm  með sex og hálfan vinning. Þótt Friðgeir sé ekki kominn á  þann aldur að geta talist eldri borgari þá fékk hann samt afhentan silfurpening, þetta var Jólahraðskákmót og þess vegna eru menn ekkert að velta sér uppúr smámunum.

Í þriðja sæti varð svo Sigurður Kristjánsson einnig með sex og hálfan vinning en aðeins lægri á stigum en Friðgeir.

Þegar  mótinu var lokið þá fengu menn sér kaffi í rólegheitum hjá Jóhönnu ráðskonu.

Síðan voru afhent verðlaun og dregið í jólahappdrætti þar sem allir fengu vinning.

Á nýju ári verður síðan byrjað að tefla þriðjudaginn 8 janúar.

Myndaalbúm (ESE)

Nánari úrslit á meðfylgjandi töflu.

 

 

 

Æsir halda jólahraðskákmót í dag

Æsir halda sitt Jólahraðskákmót þriðjudaginn 11. desember og hefst það kl. 13. Mótstaður er Stangarhylur 4. Tefldar verða níu umferðir með 7 mín. umh.t.

Þrír efstu fá verðlaunapeninga.

Síðan verður dregið í nokkurskonar happdrætti, þar sem allir þátttakendur fá einhvern vinning óháð því hvað marga vinninga þeir fá í mótinu.

Allir skákmenn 60+ hjartanlega velkomnir.

Carlsen vann London Chess Classic - í sérflokki ásamt Kramnik

 

Magnus Carlsen (2848) varð að sæta sig við jafntefli gegn indverska heimsmeistaranum Vishy Anand (2775) í lokaumferð London Chess Classic sem fram fór í dag. Nakamura (2760) vann McShane (2713) en öðrum skákum lauk með jafntefli. Carlsen hlaut 18 stig af 24 mögulegum eða 6,5 vinning í 8 skákum. Frábær árangur Kramnik (2795) fór einnig mjög mikinn og hlaut 16 stig, eða 6 vinninga sem öðru jöfnu ætti að duga til sigurs í svo sterku móti. 

 

Eftir mótið hefur Carlsen 2861 skákstig og slær þar 12 ára stigamet Kasparov frá 1999-2000 sem náði þá 2851 skákstigi. Carlsen, sem er aðeins 22 ára, hefur þegar stimplað sig inn sem einn allra besti skákmaður allra tíma. Kramnik nær öðru sætinu á listanum, með 2810 skákstig, fer upp fyrir Aronian sem náði sér aldrei á strik á mótinu.  Sjá nánar tifandi stigalistann.

Úrslit 9. umferðar:

Michael Adams	½-½	Vladimir Kramnik
Judit Polgar	½-½	Levon Aronian
Hikaru Nakamura	1-0	Luke McShane
Magnus Carlsen	½-½	Vishy Anand

Lokastaðan (eftir 8 skákir)

• 1. Carlsen (2848) 18
• 2. Kramnik (2795) 16
• 3.-4. Nakamura (2760) og Adams (2710) 13
• 5. Anand (2775) 9
• 6. Aronian (2815) 8
• 7. Polgar (2705) 6
• 8. McShane (2713) 5
• 9. Jones (2644) 3

• Heimasíða mótsins
• Beinar útsendingar

Friðrik með jafntefli við Kaslinskaya

Friðrik Ólafsson (2419), sem teflir nú í keppni heldri skákmanna gegn skákkonum, gerði jafntefli við rússnesku skákkonuna Alina Kashlinskaya (2344) í 3. umferð sem fram fór í dag. Sem fyrr gengur öðlingum illa og töpuðu nú þriðju umferðinni í röð, að þessu sinni 1,5-2,5 og hafa hlotið 3,5 gegn 8,5 vinningi.

Á morgun teflir Friðrik við tékknesku skákkonuna Kristyna Havlikova (2310)

Í liði heldri skákmanna eru auk Friðriks þeir Romanish (2530), Hort (2455) og Uhlmann (2310) en kvennaliðið skipa þær Gunina (2514),  Sachdev (2400), Kaslinskaya (2344) og Havlikova (2310). Tefld er tvöföld umferð, þ.e. allir heldri skákmennirnir tefla tvisvar við hverja skákkonu.

• Heimasíða mótsins 
• Beinar útsendingar (hefjast almennt kl. 14).

Landskeppni við Þjóðverja í bréfskák

Þýskaland, eitt af stórveldunum í bréfskák, hefur skorað á Ísland í landskeppni. Þessar þjóðir hafa aldrei áður mæst, en frammistaða íslenska landsliðsins í Evrópukeppninni hefur greinilega vakið athygli Þjóðverjanna.

Þetta er einstakt tækifæri fyrir íslenska bréfskákmenn og það kemur ekki á óvart að það stefnir í þátttökumet í þessari keppni.

Þátttaka er ókeypis og öllum opin, hvort sem þeir hafa teflt bréfskák áður eða ekki.

Keppnin hefst í lok janúar og hver liðsmaður teflir tvær skákir við sama andstæðing, aðra með hvítu og hina með svörtu.

Umhugsunartíminn er mjög rúmur þannig að þessi keppni hefur ekki áhrif á möguleika manna til að taka samhliða þátt í hefðbundnum skákmótum. Einnig geta keppendur tekið sér eins mánaðar frí meðan á skákunum stendur, annað hvort í einu lagi eða skipt því niður.

Bréfskákin er upplögð fyrir þá sem vilja fá tækifæri til að kafa djúpt í þau byrjunarafbrigði sem upp koma í skákunum og eins til þess að ná betri tökum á notkun skákreikna við rannsóknir á skákstöðum, en leyfilegt er að nota tölvur í skákunum.

Þátttöku má tilkynna með því að senda tölvupóst á [e-mail]. Skráningu lýkur laugardaginn 15. desember.