Gíbraltar: Guðmundur með sigur í dag

Alþjóðlegi meistarinn, Guðmundur Kjartansson (2408) vann Ítalann Marco Ferrante (2227) í sjöttu umferð Gíbraltar-mótsins sem fram fór í dag. Í gær tapaði hann hins vegar fyrir Nana Dzagnidze (2555) frá Georgíu, sem er fimmta stigahæsta skákkona heims. Guðmundur hefur 4 vinninga og er í 32.-63. sæti.

 

Í 7. umferð, sem fram fer á morgun, teflir Guðmundur við eistneska stórmeistarann Kaido Kulaots (2587).

Efstir með 5,5 vinning eru stórmeistararnir Liem Le Quang (2705), Víetnam, Nikita Vitiugov (2694), Rússlandi, Kiril Georgiev (2643), Búlgaríu.

246 skákmenn taka þátt í mótinu og þar af 48 stórmeistarar. Guðmundur er nr. 66 í stigaröð keppenda.

• Heimasíða mótsins
• Chess-Results

Skákþáttur Morgunblaðsins: Snilldartilþrif heimsmeistarans

Á skákhátíðinni í Wijk aan Zee í Hollandi sem stendur yfir þessa dagana beinist athyglin hér heima ekki síst að stórmeistaraflokki C þar sem Hjörvar Steinn Grétarsson hefur staðið sig prýðilega og er með 3 vinninga af fimm mögulegum í 13 umferða móti. Í A-flokki hefur heimsmeistarinn Wisvanthan Anand verið á miklu flugi. Eftir fimm umferðir er hann efstur ásamt Magnúsi Carlsen og Sergei Karjakin, allir með 3 ½ vinning.

Sá léttleiki sem einkenndi taflmennsku Indverjans alla tíð virtist alveg að hverfa en nú geta aðdáendur hans aftur tekið gleði sína. Lev Aronjan átti örugglega ekki von á þeim trakteringum sem biðu hans í 4. umferð þessa móts. Hér er komin einhver glæsilegasta skák sem sést hefur í langan tíma í þessum styrkleikaflokki:

Lev Aronjan - Wisvanthan Anand

Slavnesk vörn

1. d4 d5 2. c4 c6 3. Rf3 Rf6 4. Rc3 e6 5. e3 Rbd7 6. Bd3 dxc4 7. Bxc4 b5 8. Bd3 Bd6

Nýjasti snúningurinn í Meran-afbrigðinu, Anand vann Kramnik tvisvar með 8. ... a6 í HM-einvíginu 2008 en aðrir góðir leikir eru 8. .... Bb7 og 8. ... b4.

9. O-O O-O 10. Dc2 Bb7 11. a3 Hc8 12. Rg5

Aronjan sem er býsna hugmyndaríkur í byrjunum sínum hefur áreiðanlega ætlað að koma heimsmeistaranum á óvart með þessum leik sem býður upp á möguleikann 12. ... Bxh2 13. Kxh2 Rg4+ og getur þá svarað með 14. Kg1 Dxg5 15. f3! og síðar - e4 og - b4. En hann kemur ekki að tómum kofunum hjá Anand.

12. ... c5!

Hvað er nú þetta? B5-peðið er valdlaust og h7-peðið einnig. Anand hafði notað óvenjumikinn tíma á byrjunina. Var hann að rifja upp gamlar niðurstöður eða setti hann leikrit á svið til að blekkja Aronjan?

13. Rxh7

Best samkvæmt ofurforritinu „Houdini".

13. ... Rg4!?

Einu sinni voru svona leikir kallaðir sprikl. „Houdini" var lengi að samþykkja hugmyndina

14. f4!?

Betra er 14. h3 Bh2+! 15. Kh1 Dh4 (hótar 16. ... Dxh3) 16. d5! Hfd8 17. Be2 með flókinni stöðu. „Houdini" heldur áfram: 17. .... Bb8 18. bxg4 Re5 19. Bd1 b4! og staðan er í dínamísku jafnvægi.

14. ... cxd4 15. exd4?

Tapleikurinn. Hann varð að leika 15. Rxf8 Bxf8 16. h3 dxc3 17. hxg4 Rf6 og svarta staðan er ekki lakari. En nú kemur eftirminnilegur leikur.

15. ... Bc5!! 16. Be2

Það var úr vöndu að ráða, 16. Rxf8 gekk ekki vegna 16. ... Bxd4+ 17. Kh1 Dh4 og mátar og 16. dxc5 Rxc5 er heldur ekki gæfulegt.

16. .... Rde5!

Kynngimagnaður leikur sem byggist á hugmyndinni 17. fxe5 Dxd4+ 18. Kh1 Dg1+! 19. Hxg1 Rf2 mát. Þá dugar 17. dxc5 skammt vegna 17. .... Dd4+ 18. Kh1 Rf2+ 19. Hxf2 (eða 19. Kg1 Rh3+ 20. Kh1 Dg1+! 21. Hxg1 Rf2 mát) Dxf2 með óverjandi máthótun.

16. ... Rde5 17. Bxg4 Bxd4+ 18. Kh1 Rxg4 19. Rxf8 f5!

Enn einn snilldarleikurinn sem hótar 20. ... Dh4. Aronjan er varnarlaus.

20. Rg6 Df6 21. h3 Dxg6 22. De2 Dh5! 23. Dd3

Hann gat reynt 23. Hf3 en þá kemur 23. ... Rf2+! 24. Kh2 (ekki 24. Hxf2 Dxh3+ 25. Kg1 Dxg2 mát) 24. ... Bxf3 25. Dxf3 Dxf3 26. gxf3 Rd3 og endataflið er gjörtapað á hvítt.

23. ... Be3!

Línurof bætist hér við önnur stef. Aronjan á enga haldgóða vörn gegn hótuninni 24. .... Dxh3+ og gafst upp.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 20 janúar 2013.

Skákþættir Morgunblaðsins

[Event "Tata Steel"] [Site "Wijk aan Zee NED"] [Date "2013.01.15"] [EventDate "2013.01.12"] [Round "4"] [Result "0-1"] [White "Levon Aronian"] [Black "Viswanathan Anand"] [ECO "D47"] [WhiteElo "2802"] [BlackElo "2772"] [PlyCount "46"] 1. d4 d5 2. c4 c6 3. Nf3 Nf6 4. Nc3 e6 5. e3 Nbd7 6. Bd3 dxc4 7. Bxc4 b5 8. Bd3 Bd6 9. O-O O-O 10. Qc2 Bb7 11. a3 Rc8 12. Ng5 c5 13. Nxh7 Ng4 14. f4 cxd4 15. exd4 Bc5 16. Be2 Nde5 17. Bxg4 Bxd4+ 18. Kh1 Nxg4 19. Nxf8 f5 20. Ng6 Qf6 21. h3 Qxg6 22. Qe2 Qh5 23. Qd3 Be3 0-1

Oliver Aron hraðskákmeistari Reykjavíkur

Oliver Aron Jóhannesson er hraðskákmeistari Reykjavíkur en mótið fór fram í dag. Oliver var jafn Birni Freyr Björnssyni og Ögmundi Kristinssyni að vinningum en hlaut titilinn eftir stigaútreikning. 26 skákmenn tóku þátt í mótinu. Ólafur S. Ásgrímsson var skákstjóri.

Lokastaðan:

 1-3  Óliver Aron Jóhannesson,                   11       43.0
      Björn Freyr Björnsson,                     11       41.0
      Ögmundur Kristinsson,                      11       38.0
  4   Omar Salama,                               10.5     45.5
  5   Dagur Ragnarsson,                          10       34.0
 6-8  Mikael Jóhann Karlsson,                    8.5      46.5
      Vignir Vatnar Stefánsson,                  8.5      41.5
      Birkir Karl Sigurðsson,                    8.5      34.5
9-11  Arnaldur Loftsson,                         8        42.5
      Kristján Örn Elíasson,                     8        37.5
      Elsa María Kristínardóttir,                8        36.5
 12   Dagur Kjartansson,                         7.5      42.5
13-14 Gauti Páll Jónsson,                        7        44.0
      Sigurjón Haraldsson,                       7        29.5
15-16 Jakob Alexander Petersen,                  6.5      36.5
      Guðmundur Gunnlaugsson,                    6.5      30.5
17-20 Kjartan Másson,                            6        39.0
      Björn Hólm Birkisson,                      6        33.0
      Bárður Örn Birkisson,                      6        26.5
      Ísak Logi Einarsson,                       6        23.5
 21   Kristófer Ómarsson,                        5.5      36.0
 22   Andri Steinn Hilmarsson,                   5        32.5
 23   Bjarki Arnaldarson,                        4        30.0
 24   Sindri Snær Kristófersson,                 3.5      25.0
 25   Pétur Jóhannesson,                         2.5      26.5
 26   Ívar Andri Hannesson,                      0        27.0

 

Carlsen vann Wijk aan Zee með yfirburðum

Magnus Carlsen (2861) vann Tata Steel-mótið í Wijk aan Zee með miklum yfirburðum en mótinu er nú nýlokið. Carlsen hlaut 10 vinning í 13 skákum og fékk 1,5 vinningi meira en Aronian (2802) sem varð annar. Frammistaða Carlsen samsvaraði 2933 skákstigum og hækkar hann um 11 stig fyrir hana og er nú kominn í 2872 skákstig, 62 stigum meira en Kramnik sem er næststigahæstur. Anand (2772) varð þriðji með 8 vinninga.

Úrslit 13. umferðar:

Karjakin, S. - van Wely, L.	1-0
Hou, Y. - Leko, P.	½-½
L'Ami, E. - Sokolov, I.	½-½
Wang, H. - Anand, V.	1-0
Nakamura, H. - Harikrishna, P.	½-½
Giri, A. - Carlsen, M.	½-½
Caruana, F. - Aronian, L.	½-½

 
Lokastaðan:

 

Nr.	Skákmaður	Vinn	Stig	TPR
1	Carlsen, M.	10,0	2861	2933
2	Aronian, L.	8,5	2802	2837
3	Anand, V.	8,0	2772	2816
4	Karjakin, S.	8,0	2780	2816
5	Leko, P.	7,5	2735	2789
6	Nakamura, H.	7,0	2769	2758
7	Harikrishna, P.	6,5	2698	2735
8	Giri, A.	6,0	2726	2704
9	Wang, H.	6,0	2752	2702
10	van Wely, L.	6,0	2679	2707
11	Hou, Y.	5,5	2603	2685
12	Caruana, F.	5,0	2781	2642
13	L'Ami, E.	4,0	2627	2599
14	Sokolov, I.	3,0	2667	2526

 

 Í a-flokki voru meðalstigi 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)

Hjörvar endaði með 50% vinningshlutfall

Alþjóðlegi meistarinn Hjörvar Steinn Grétarsson (2516) endaði með 50% vinningshlutfall í c-flokki Tata Steel-mótsins sem lauk í dag í Wijk aan Zee. Hjörvar hlaut 6,5 vinning í 13 umferðum endaði í áttunda sæti.

Frammistaða hans samsvaraði 2473 skákstigum og lækkar hann því eitthvað á stigum.

Í gær tapaði hann fyrir brasilíska stórmeistarann Krikor Mekhitarian (2543) en í dag gerði hann jafntefli við rússnesku skákkonuna Alexandra Goryachkina (2402), sem er stórmeistari kvenna.

Ítalski stórmeistarinn Sabino Brunello (2572) vann c-flokkinn en hann hlaut 11 vinninga. Argentíski stórmeistarinn Fernardo Peralto (2617) varð svo annar með 10,5 vinning.

Í c-flokki voru meðalstigin 2476 skákstig en 14 skákmenn tefldu þar allir við alla. Hjörvar var nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

Skákdagurinn á Siglufirði

Skákdagur Íslands er haldinn víða um land í gær og með ýmsu móti. Skákfélag Siglufjarðar gaf af því tilefni Sundhöll Siglufjarðar taflsett til að nota í lauginni eða heita pottinum, allt eftir því hvað best á við hverju sinni. Sundskák var fyrst tefld árið 2011, þegar Laugardagslaug í Reykjavík eignaðist samskonar taflsett, en síðan hefur þetta nýja form breiðst út víðar.

Það voru Marlís Jóna Karlsdóttir og Mikael Sigurðsson, nemendur í 3. bekk Grunnskóla Siglufjarðar, sem tefldu fyrstu skákina, og síðar var öðrum hleypt að borðinu.

Skákkennsla hófst í 1.-4. bekk við Norðurgötu á Siglufirði í lok síðasta árs og í janúar á þessu ári hefur verið kennt í 1.-7. bekk í húsakynnunum við Tjarnarstíg í Ólafsfirði. 

Seinnipartinn í febrúar verður aftur kennt í mánuð hér í bæ og svo í Ólafsfirði í jafn langan tíma. 

Undanfarið hefur skák aukinheldur verið kennd sem valgrein í unglingadeildinni við Hlíðarveg á Siglufirði. 

Sjá líka frétt hér á vefnum 22. nóvember 2012.

Sjá nánar á vef Siglfirðings en þar má finna fjölda mynda.

Sundskákarsett vígt í Árbæjarlaug

Nú er hægt að tefla í Árbæjarlaug. Um það var fjallað í Mbl.is í gær en í fréttinni þar sagði:

Skáklistina þarf ekki að iðka innan fjögurra veggja heldur getur taflið tekið á sig ýmis form líkt og sást í heitum potti Árbæjarlaugarinnar í dag. Þar voru ný fljótandi taflborð vígð í tilefni Skákdags Íslands í dag.

Viðburðir af ýmsu tagi eru um allt land í dag í tilefni Skákdagsins, sem er nú haldinn í annað sinn á afmælisdegi Friðriks Ólafssonar, fyrsta stórmeistara Íslands í skák.

Þar á meðal var vígsla skákborðsins í Árbæjarlaug, en sambærileg skákborð hafa stundum flotið um í heitum pottum Laugardalslaugar og notið vinsælda enda fátt betra en að þjálfa hugann yfir tafli á meðan slakað er á kroppnum í heita pottinum.

Þeir Veronika Steinunn Magnúsdóttir og Danika Kolica tefldu eina skák í heita pottinum í dag og Stefán Bergsson hjá Skáksambandi Íslands fygldist með, en ekki fylgdi sögunni hvernig leikar fóru.

Myndin er frá Ómar Óskarssyni, ljósmyndara hjá Morgunblaðinu.

 

KORNAX-mótið: Uppgjör ritstjóra heimasíðu TR

Þórir Benediktsson heldur uppi öflugum fréttaflutningi á heimasíðu TR. Í gær birti hann góðan lokapistil um mótið sem hér birtur orðréttur.

KORNAX mótinu - Skákþingi Reykjavíkur lauk í gærkvöldi þegar spennandi lokaumferð fór fram í félagsheimili Taflfélags Reykjavíkur. Fyrir umferðina höfðu Fide meistarinn Davíð Kjartansson og Omar Salama 1,5 vinnings forskot á næstu keppendur en báðir höfðu þeir unnið allar sínar viðureignir utan innbyrðis viðureignarinnar sem lauk með skiptum hlut.  Þeir höfðu því 7,5 vinning eftir að hafa verið í nokkrum sérflokki en næstir á eftir þeim með 6 vinninga komu Fide meistarinn Einar Hjalti Jensson og hinn ungi og efnilegi Mikael Jóhann Karlsson.

Í lokaumferðinni stýrði Omar hvítu mönnunum gegn Mikaeli en Davíð hafði svart gegn Þór Má Valtýssyni. Greinilegt var að spenna var í loftinu því sviptingar urðu töluverðar og svo fór að Mikael gerði sér lítið fyrir og sigraði Omar eftir að kóngur þess síðarnefnda var orðinn full berskjaldaður og Mikeal náði frumkvæði sem dugði til sigurs.  Á sama tíma leit út fyrir að Davíð væri í vandræðum gegn Þór sem var skiptmun yfir en slæm peðastaða Þórs kom í veg fyrir sigur og jafntefli varð niðurstaðan.

Þar með lauk Davíð leik með 8 vinninga og er því Skákmeistari Reykjavíkur í annað sinn en hann hlaut titilinn einnig 2008.  Omar varð annar með 7,5 vinning en Mikael nældi í þriðja sætið með 7 vinninga eftir frábæran endasprett þar sem hann sigraði Lenku Ptacnikovu í næstsíðustu umferðinni og, sem fyrr segir, Omar í þeirri síðustu.  Árangur Davíðs samsvarar 2420 Elo stigum og hækkar hann um 19 stig, Omar hækkar um 13 stig og Mikael um heil 30 stig og er stigakóngur mótsins.

Að öðru leyti var ekki mikið um óvænt úrslit í lokaumferðinni en þó má nefna sigur hinnar ungu og efnilegu Sóleyjar Lind Pálsdóttur á Árna Thoroddsen en Sóley hefur verið á góðri siglingu að undanförnu og hækkar töluvert á stigum nú.

Baráttan um stigaverðlaunin var ekki síður hörð en utan verðlaunasætanna þriggja var hægt að vinna til fjögurra verðlauna í viðbót.  Bestum árangri keppenda undir 2000 stigum náði norðlendingurinn reyndi Þór Már Valtýsson en hann hlaut 6 vinninga.  Þrír keppendur komu jafnir í mark með 5,5 vinning í flokki keppenda undir 1800 stigum en það voru Hilmar Þorsteinsson, Jón Úlfljótsson og Hrund Hauksdóttir.  Hilmar varð efstur eftir stigaútreikning og hlýtur því verðlaunin.  Hinn ungi og efnilegi Dawid Kolka varð einn efstur með 5,5vinning í flokki keppenda undir 1600 skákstigum og í flokki stigalausra varð Andri Steinn Hilmarsson hlutskarpastur með 4,5 vinning.  Miðað er við íslensk skákstig við ákvörðun stigaverðlauna.

Að vanda var mótahald til fyrirmyndar og umgjörðin öll hin glæsilegasta. Skákstjórn var í höndum hinna margreyndu Ólafs S. Ásgrímssonar og Ríkharðs Sveinssonar og Birna Halldórsdóttir sá um veitingar af sinni alkunnu snilld.  Jóhann H. Ragnarsson tók myndir og þá er einnig fjöldi mynda, sem Gunnar Björnsson tók, aðgengilegur á fréttavefnum skak.is.  Sex viðureignir voru sendar út á vefnum í hverri umferð og hafði Ríkharður umsjón með þeim.  Skáksamband Íslands fær þakkir fyrir að leggja  búnaðinn til og Omar Salama og Halldóri G. Einarssyni er þakkað fyrir aðstoð í kringum útsendingarnar.  Þá sá Jóhann um innslátt skáka.

Að lokum þakkar Taflfélag Reykjavíkur KORNAX fyrir öflugt samstarf fjórða árið í röð.

Verðlaunasæti

• 1. Davíð Kjartansson 8 vinningar
• 2. Omar Salama 7,5v
• 3. Mikael Jóhann Karlsson 7v

Besti stigaárangur

• U2000: Þór Már Valtýsson (1971) 6v
• U1800: Hilmar Þorsteinsson (1776) 5,5v
• U1600: Dawid Kolka (1528) 5,5v
• Stigalausir: Andri Steinn Hilmarsson 4,5v

Mestu stigahækkanir

• Mikael Jóhann Karlsson 30 stig
• Vignir Vatnar Stefánsson 25
• Davíð Kjartansson 19
• Sóley Lind Pálsdóttir 19
• Þór Már Valtýsson 17
• Óskar Long Einarsson 17
• Felix Steinþórsson 15

• Úrslit, staða og pörun
• Dagskrá og upplýsingar
• Skákmeistarar Reykjavíkur
• Mótstöflur síðustu ára
• Myndir (JHR)
• Skákir

Gallerý Skák - Keppteflið um Friðrikskónginn - Harvey vann fyrsta mótið

Kappteflið um FriðriksKónginn II hófst í Gallerý Skák sl. fimmtudagskvöld sem liður í dagskrá „Íslenska Skákdagsins" sem haldinn er hátíðlegur í dag,  26. janúar ár hvert,  á afmælisdegi Friðriks, með skákviðburðum og taflmennsku um land allt. Þetta var  fyrsta mótið af fjórum í mótaröðinni.

Þátttaka var góð - á þriðja tug keppenda voru mættir til að tafls og til þess að sýna skáklistinni þjóðhollustu í leiðinni með þátttöku sinni, eins og hvatt var til af forystumönnum skákhreyfingarinnar. Setja varð upp aukaborð á ganginum framanvið aðalkeppnissalinn, svo sumir fengu að prófa hvernig það er að  tefla „hinumegin". Er þeir komu svo aftur fílefldir „að handan"  stóðust þeim fáir mátið.

Jafnan er mikil áhersla á það lögð í SkákGallerýinu að keppendur tefli vandað. Engu að síður var taflmennska sumra að þessu sinni ekki upp á marga fiska eins og gengur. Annað slagið brá þó fyrir að menn tefldu með listrænu ívafi eins og hæfir listasmiðjunni, vettvangi mótsins. Var það ekki síst fyrir það að skákkóngurinn sjálfur kempan Friðrik Ólafsson var mættur á vettvang til að leika fyrsta leikinn og hvetja menn til dáða.  

Friðrik tefldi síðan nokkrar skákir í viðlögum sem afleysingamaður við góðan orðstír, var skipt inn á fyrir Guðfinn Err gegn Magnúsi Pé, hins áttræða seggs, aldurforseta mótsins, fyrir Einar Ess gegn Páli Gé  og  Guðmund Err, afmælisbarn dagsins gegn  Þórarni (TéTé), sem allir fengu þannig dýrmætan vinning á silfurfati upp í hendurnar. Komu Friðriks og viðveru var sjálfsögðu fagnað mjög. Enginn hefur borið hróður lands og þjóðar jafn vel og víða á alþjóðavísu á skáksviðinu sem hann. Það er afar veltilfundið og fallið að halda sérstakan skákdag og helga hann honum til heiðurs. Og vekja þannig athygli og áhuga á mikilvægi skákiðkunar til uppbyggingar og viðhalds andlegs atgerfis ungs fólks á öllum aldri og almennu félags- og listagildi manntaflsins.        

Þegar á leið mótið fór kynngimögnuð djúphyggja og  fláræð dulhyggja að setja mark sitt á taflstíl sumra keppenda í meira mæli en annarra - einkum Harveys Georgsonar Tausignant, hins ólseiga gamalreynda skákgúrús, sem síðan vann mótið með 8 vinningum af ellefu.  Að sama skapi fór óheft bitlaus og allt að því taumlaus keppnisharka og  glórulaus barátta að bera suma keppendur ofurliði ásamt klukkunni sem reyndist óvinur margra. Þannig töpuðust skákir sem menn töldu sig vera með unnar fyrir lítið, m.a. missti Þórarinn laxabani einn af önglinum í gjörunninni skák og átti þá bara eftir einn leik til að máta.  

Svona skakkaföll geta eins og áður hefur verið að vikið og tíundað leitt til alvarlegra „bráðaskákáfallastreyturöskunartaugastrekkingstilfella" ef einhverjir eru ekki nálægir til að veita viðkomandi „skyndiáfallastyrkingarviðlagahjálp" á staðnum með því að taka um axlir, slá á bak og  stuttri bænastund þar sem bölvað með honum í hljóði. Sem betur fer eru þó flestir hinir eldri og keppnisreyndari orðnir öllu vanir í þessum efnum og láta lítt á sig fá þótt gramir séu, einkum við sjálfan sig, þó yngstu keppendur séu stundum gráti næst.

 

Þetta er þriðja mótið af fjórum sem Harvey vinnur í Gallerýinu. Þegar orrahríðinni lauk kom í ljós að Friðgeir Hólm hafði hafnað í öðru sæti með 7.5 vinning og svo einir þrír með 7 vinninga, þeir Jon Olav, Guðfinnur og Gunnar Ingi með fjóra niður og loks einir fimm með 6.5 vinning.  Jafnara gat það varla orðið og stigareikningur réði um sætaröð og stigagjöf.  

 

Mótaröðin heldur svo áfram næstu þrjár vikurnar á sama tíma. Allir taflfærir velkomnir - óháð þátttöku í kappteflinu mikla.

Nánari úrslit má sjá á meðf. mótstöflu og vettvangsmyndir í myndasafni.

 

 

 ESE -Skákþankar 26.01.13

Bíó-skákmót Fjölnis. Hart barist um að fá miða í bíó

Um 30 þátttakendur voru á fyrsta BÍÓ-skákmóti Fjölnis sem haldið var í Rimaskóla á Skákdegi Íslands. Keppendur voru á öllum aldri og greinilegt í upphafi mótsins að menn myndu selja sig dýrt til að ná einu af 10 verðlaunasætum mótsins. Oliver Aron Jóhannesson hefur verið einstaklega sigursæll á öllum Fjölnismótum síðasta árið og hann gerði enga undantekningu þar á.

Hann sigraði BÍÓ-skákmótið og hlaut 5,5 vinninga af 6 mögulegum. Félagi hans Dagur Ragnarsson varð í öðru sæti með 5 vinninga og tapaði aðeins fyrir Oliver Aroni. Í 3. sæti varð svo þriðji Norðurlandameistarinn frá Rimaskóla, Nansý Davíðsdóttir með 4,5 vinninga. Hún gerði jafntefli við Oliver Aron í lokaumferðinni. Aðrir sem unnu sér inn bíómiða í Laugarásbíó voru þau Sigríður Björg Helgadóttir, Þorsteinn Magnússon, Jóhann Arnar Finnsson, Hilmir Hrafnsson, Joshua Davíðsson, Róbert Orri Árnason og Alexandra Kjærnsted sem öll hlutu 4 vinninga. 

Tveir bíó-boðsmiðar voru síðan dregnir út og þar duttu tveir Rimaskólastrákar í lukkupottinn, þeir Hákon Garðarsson og Mikael Maron Torfason sem báðir hafa verið duglegir að mæta á skákæfingar Fjölnis í vetur. Þrátt fyrir spennandi keppni þá var léttur og skemmtilegur andi svífandi yfir vötnum og er frábært að sjá hversu vel yngri og eldri krakkar ná saman í kringum skákina, allir virðast fá að njóta sín í hópnum. Boðið var upp á bíó-nammi í skákhléi og tekið í fótboltaspil og borðtennis undan og eftir mótið.