Fjársöfnun Goðans-Máta fyrir Velferðarsjóð Þingeyinga

Íslenski skákdagurinn var haldinn hátíðlegur um allt land í gær. Félagar í Goðanum-Mátum blésu til fjársöfnunar fyrir Velferðarsjóð Þingeyinga á Húsavík og gekk hún ágætlega. Hápunktur söfnunarinnar var þegar Kristinn Vilhjálmsson, starfsmaður Víkurrafs á Húsavík, tefldi eina hraðskák við Sigurbjörn Ásmundsson gjaldkera Goðans-Máta. Heimilstæki hf. höfðu heitið 50.000 krónum í söfnunina ef Kristinn tefldi eina skák og vék hann sér ekki undan því. 

Kristinn Vilhjálmsson að tafli við Sigurbjörn Ásmundsson. Sighvatur Karlsson fylgist með. 

Kristinn stóð lengi vel í Sigurbirni en varð að láta í minni pokann fyrir rest. Nokkrir aðrir tefldu skákir og gáfu fé til söfnunarinnar. Þeirra á meðal var sýslumaður Þingeyinga, Svavar Pálsson. Svavar gerði sér lítið fyrir og vann Hermann Aðalsteinsson formann Goðans-Máta. Svavar var þar með umsvifalaust skráður í félagið, enda var það mönnum metið til tekna að vinna einhvern félagsmann skákfélagsins og ekki verra að vinna sjálfan formanninn.

Páll Svavarsson að tafli við Sigurbjörn Ásmundsson. 

Söfnunni lauk klukkan 16:00 og þá afhenti Hermann Aðalsteinsson formaður Goðans-Máta Þórhildi Sigurðardóttur hjá Velferðarsjóði Þingeyinga, það fé sem safnast hafði yfir daginn. 

 

Hermann Aðalsteinsson formaður Goðans-Máta afhendir Þórhildi Sigurðardóttir söfnunarféð. Mynd: Hafþór Hreiðarsson.

Myndaalbúm á heimasíðu Goðans-Máta

Tinna Kristín héraðsmeistari UMSB

Héraðsmeistari UMSB varð Tinna Kristín Finnbogadóttir eftir einvígi við Bjarna Sæmundsson. Hún varð einnig kvennameistari, en Bjarni varð efstur heimamanna. Í unglingaflokki sigraði Ingibergur Valgarðsson. Alls tóku 6 manns þátt í mótinu og var tefld 2föld umferð. 

• Myndaalbúm (Páll Sigurðsson)
  
• Chess-Results

 

Óliver Ísak og Jón Kristinn sigruðu á Skákdagsmóti SA

Alls tóku 24 krakkar þátt í Skákdagsmóti Skákfélags Akureyrar í gær. Teflt var í tveimur aldursflokkum, þ.e. börn fædd 2000 og síðar í yngri flokki og 1999 og fyrr í þeim eldri.

Úrslit í eldri flokki:

1. Jón Kristinn Þorgeirsson                      5 v.
2. Andri Freyr Björgvinsson                     4
3. Símon Þórhallsson                                3
4. Logi Rúnar Jónsson                              2
5. Aðalsteinn Leifsson                               1
6. Benedikt Stefánsson                             0

 Úrslit í yngri flokki:

1. Óliver Ísak Ólason                                7
2. Tinna Ósk Ompi Rúnarsdóttir               6
3. Ísak Svavarsson                                   5
4. Gunnar Aðalsteinn Arason                    4
5. Guðmundur Aron Guðmundsson           4
6. Auðunn Elfar Þórarinsson                     3,5
7. Dagur Smári Sigvaldason                      3,5
8. Ninna Rún Vésteinsdóttir                      3,5
9. Michael Adam Amador                        3
10. Roman Darri Stevensson Bos                3
11. Alfa Magdalena Jórunnardóttir              3
12. Gabríel Máni Arason                            3
13. Sunna Dís Sigvaldadóttir                       2,5
14. Gunnar Breki Gíslason                          2
15. Helga Sóley Guðjónsdóttir                    2
16. Kristján Örn Tómasson                        2
17. Stefán Thorbeinsson                             2

Fjölmörg verðlaun voru veitt á mótinu. Sigurvegararnir í yngri og eldri flokki hlutu bókaverðlaun frá Eymundsson. Í yngri flokki fengu þessi verðlaun fyrir bestan árangur á hverju aldursári:

• 7 ára    Stefán Thorbeinsson    
• 8 ára    Ísak Svavarsson
• 9 ára    Auðunn Elfar Þórarinsson
• 10 ára  Óliver Ísak Ólason
• 11 ára Gunnar Aðalsteinn Arason
• 12 ára  Tinna Ósk Ompi Rúnarsdóttir

Einnig voru veitt nokkur útdráttarverðlaun, m.a. fengu tveir keppendur bókina „Við skákborðið í aldarfjórðung" með 50 skákum afmælisbarnsins, Friðriks Ólafssonar. 

Jón Arnljótsson efstur á Atskákmóti Skákfélagi Sauðárkróks

Eftir 5 umferðir af 7 er Jón Arnljótsson efstur á Atskákmóti Skákfélags Sauðárkróks, sem haldið er í tilefni af Skákdeginum. Jón hefur 4 vinninga, en Unnar Ingvarsson er næstur með 3,5, þrír skákmenn koma síðan með 3 vinninga. Alls taka 8 skákmenn þátt í mótinu, en fyrir hugað er að því ljúki á þriðjudagskvöldið. 

Heimasíða Skákfélags Sauðárkróks

Skákþing Goðans fer fram 8.-10. febrúar

Skákþing Goðans Máta 2013 verður haldið í 10. sinn, helgina 8-10 febrúar nk. í sal Framsýnar-stéttarfélags að Garðarsbraut 26 á Húsavík. Mótið er öllum opið.

Tefldar verða 7 umferðir eftir swissneska-kerfinu,(swiss-manager) 4 atskákir og 3 kappskákir. Mótið verður reiknað til Íslenskra og fideskákstiga.  

Dagskrá:

Föstudagur   8. febrúar  kl 19:30  1-4 umferð.   (atskák 25 mín )
Laugardagur  9. febrúar  kl 11:00  5. umferð.     (90 mín +30 sek á leik)
Laugardagur  9. febrúar  kl 19:30  6. umferð.       -------------------
Sunnudagur  10. febrúar  kl 11:00  7. umferð.       -------------------

Verðlaun verða með hefðbundnu sniði. 3 efstu í fullorðins flokki og 3 efstu í 16 ára og yngri.Farandbikar fyrir sigurvegarann í báðum flokkum. Aðeins félagsmenn í Goðanum-Mátum geta unnið til verðlauna.  

Þátttökugjald er 2000 krónur fyrir fullorna og 1000 krónur fyrir 16 ára og yngri. 

Skráning í mótið fer fram hér alveg efst á síðunni á sérstöku skráningarformi

Skákmeistarar Goðans-Máta frá upphafi:

2004    Baldur Daníelsson.
2005    Ármann Olgeirsson
2006    Ármann Olgeirsson       
2007    Smári Sigurðsson         
2008    Smári Sigurðsson 
2009    Benedikt Þorri Sigurjónsson
2010    Rúnar Ísleifsson
2011    Jakob Sævar Sigurðsson
2012    Rúnar Ísleifsson
2013     ?   

ATH. Mögulegt verður að flýta einhverjum skákum í 6. umferð og eins verður mögulegt að flýta skákum í 7. umferð henti það einhverjum

Hraðskákmót Reykjavíkur fer fram í dag

Hraðskákmót Reykjavíkur verður haldið í félagsheimili Taflfélags Reykjavíkur að Faxafeni 12 sunnudaginn 27. janúar kl. 14.

Tefldar verða 2x7 umferðir eftir Sviss Perfect kerfi. Umhugsunartími verður 5 mínútur á skák.

Þátttökugjald er kr. 500 fyrir 16 ára og eldri en frítt fyrir 15 ára og yngri.

Þrenn verðlaun í boði.  

Eftir Hraðskákmótið fer fram verðlaunaafhending fyrir  KORNAX mótið 2013 - Skákþing Reykjavíkur.

Núverandi hraðskákmeistari er Davíð Kjartansson.

Friðrik heimsótti Morgunblaðið í gær - blaðinu þakkað fyrir skákumfjöllun í heila öld

Morgunblaðið fjallar ítarlega um Skákdaginn í umfjöllun í laugardagsblaðinu. Hluti þeirrar umfjöllunar má finna á heimsíðu blaðsins. Þar segir:

Skákdagur Íslands er haldinn í dag á afmælisdegi Friðriks Ólafssonar, fyrsta stórmeistara Íslendinga og fyrrverandi forseta alþjóðaskáksambandsins FIDE. Af því tilefni verður efnt til fjölda skákviðburða víða um land frá því í byrjun þessarar viku og standa hátíðarhöldin fram á mánudag.

Morgunblaðið fékk í gær viðurkenningu fyrir skákumfjöllun, en fyrsta skákfréttin birtist í blaðinu fyrir 100 árum, þann 9. nóvember 1913 réttri viku eftir að blaðið hóf göngu sína. Síðan hefur mikið verið fjallað um skák í Morgunblaðinu. Gunnar Björnsson, forseti Skáksambands Íslands, þakkaði Morgunblaðinu, fyrir hönd skákhreyfingarinnar, fyrir að hafa fjallað um skák í heila öld og færði blaðinu sem þakklætisvott tölvudiska með 1.411 skákum Friðriks Ólafsson sem tefldar voru á árunum 1950-2012.

Skákiðkun barna fer vaxandi

Gunnar kvaðst bjartsýnn á framtíð skákarinnar og sagði að áhugi barna hefði verið að aukast. Mikið skákstarf er nú í grunnskólum, t.d. í Reykjavík, Kópavogi, Akureyri og Vestmannaeyjum. Hann nefndi einnig skákstarf á meðal barna á Hellu, Hvolsvelli og Sauðárkróki og eru skákhátíðir á öllum þessum stöðum í tengslum við skákdaginn. Nýlega var skipaður starfshópur, undir forystu Guðfríðar Lilju Grétarsdóttur, um eflingu skákkennslu í öllum grunnskólum landsins.

„Skákin er fyrir alla aldurshópa. Þeir tefldu nýlega á sama móti Vignir Vatnar, níu ára, og Magnús Pétursson sem er áttræður. Svona þekkist nánast ekki í öðrum íþróttagreinum," sagði Gunnar. 

Teflt hefur verið í grunnskólum, sundlaugum, fyrirtækjum og á netinu. Friðrik Ólafsson stórmeistari heimsótti Morgunblaðið í gær og tefldi þar fjöltefli við tíu starfsmen blaðsins og þrjú börn sem unnu til verðlauna á Íslandsmóti barna í skák 12. janúar síðastliðinn. Friðrik sigraði í 8 skákum og gerði 5.  

Á heimasíðu Mbl.is má einnig finna myndband frá fjölteflinu.

Í sjálfu Morgunblaðinu má svo finna heilsíðuumfjöllun um Skákdaginn. 

Íslandsmótið í ofurhraðskák fer fram í kvöld

Lokaviðburður skákdagsins til heiðurs Friðriki Ólafssyni verður íslandsmótið í ofurhraðskák fer fram, laugardaginn 26. janúar á ICC og hefst kl. 21.00. Mótið er öllum opið og er teflt er einum flokki.  Skráning fer fram á Heimasíðu Hellis.

Allt skráningarferlið er sjálfkrafa og eina sem þátttakendur þurfa að hafa í huga er að vera mættir tímanlega á ICC eða eigi síðar en kl. 20:50.   Tímamörk eru 2 mínútur á skák og tefldar verða 15 umferðir.     

Þeir sem ekki eru skráðir á ICC geta skráð sig á vef ICC en ekki þarf að greiða fyrir fyrstu vikuna. Að því loknu er hægt að skrá sig á heimasíðu Hellis.  Þeir sem ekki hafa hugbúnað til að tefla geta halað niður þar til gerðu forriti (mælt er með Blitzin eða Dasher).   Einnig er hægt að tefla í gegnum java-forrit.  Þar sem allir keppendur þurfa að vera á svokallaðri Íslands-rás er æskilegt að menn slái inn "g-join Iceland" við næstu/fyrstu innskráningu á ICC.

Fyrirspurnir sendist til Omars Salama, umsjónarmanns mótsins í netfangið [e-mail].

Verðlaun:

1. kr. 5.000 
2. kr. 3.000 
3. kr. 2.000

Síðasta sýningarhelgi sýningarinnar Einvígi aldarinnar - Fischer og Spassky - 40 ár

Um helgina lýkur sýningunni  Einvígi aldarinnar. Fischer og Spassky-40 ár sem staðið hefur frá því

3. mars 2012 í Þjóðminjasafni Íslands. Skákeinvígið sem kallað hefur verið „einvígi aldarinnar" var háð í Reykjavík sumarið 1972. Þar tókust á fulltrúar risaveldanna á tímum „Kalda stríðsins", Bandaríkjamaðurinn Bobby Fischer og sovéski heimsmeistarinn Boris Spassky.

Sýningin var unnin í samvinnu við Skáksamband Íslands í tilefni af því að liðin voru 40 ár frá einvíginu. Á sýningunni eru munir og myndir sem tengjast skákeinvíginu 1972.

Fyrsta skák einvígisins var tefld í Laugardalshöll þann 11. júlí 1972,  en 1. september gaf Spassky 21. skák einvígisins og Fischer var nokkrum dögum síðar krýndur heimsmeistari. Lokatölur urðu 12½ vinningur á móti 8½ vinningi. Þar með lauk einvígi sem vakti meiri athygli en nokkur annar skákviðburður fyrr og síðar. Atburðarás einvígisins var fréttaefni sjónvarpsstöðva og dagblaða um allan heim.

Um einvígið hafa verið skrifaðar fleiri en 140 bækur og gerðir ótal sjónvarpsþættir.

Friðrik heimsækir unglingaæfingu TR í dag á afmælis(skák)daginn sinn

Afmælisbarnið, TR-ingurinn, stórmeistarinn og fyrrverandi forseti FIDE Friðrik Ólafsson kemur á Laugardagsæfingu í Taflfélagi Reykjavíkur í dag.

Skákæfingin er frá 14-16 í TR, Faxafeni 12.