Guðmundur með 2,5 vinning eftir 4 umferðir í Katalóníu

Alþjóðlegi meistarinn Guðmundur Kjartansson (2453) hefur 2,5 vinning að loknum 4 umferðum á alþjóðlegu skákmóti Katalóníu en hann er í skákvíking á Spáni. Í 3. umferð tapaði hann fyrir FIDE-meistaranum Erik Martinez (2306) og í gær vann hann Spánverjann Joan Martorell (2179).

Guðmundur hefur 2,5 vinning og er í 21.-39. sæti. Í dag mætir hann indverska stórmeistaranum R.R. Laxman (2397).

101 skákmaður frá 18 löndum tekur þátt í mótinu. Þar af eru 19 stórmeistarar og jafnmargir alþjóðlegir meistarar. Guðmundur er nr. 25 í stigaröð keppenda.

Ekki er að sjá að það séu beinar útsendingar frá mótinu né virðast skákir mótsins vera aðgengilegar.

Ef einhver veit betur þá má hafa samband við ritstjóra sem er ekki sleipur í spænsku og enn síður sleipur í spænskum heimsíðum.

• Heimasíða mótsins
• Chess-Results

Lenka með 5 vinninga eftir 7 umferðir - verður í beinni í dag

Lenka Ptácníková (2255) er í 4.-7. sæti með 5 vinninga á alþjóðlegu móti í Prag. Í fyrradag tapaði hún fyrir Jiri Kociscak (2407) og í gær vann hún Jiri Fiser (1962).

Í dag, í áttundu og næstsíðustu umferð, mætir hún svo Þjóðverjanum Peter Schnitzer (2185).  Skákin verður sýnd beint og hefst kl. 14.

Árangur Lenku á mótinu má finna hér.

76 skákmenn frá 11 löndum taka þátt í flokki Lenku og þar af eru 2 stórmeistarar. Lenka er nr. 8 í stigaröð keppenda.

• Heimasíða mótsins
• Beinar útsendingar (hefjast almennt kl. 14)
• Chess-Results

Mjóddarmót Hellis fer fram í dag

Mjóddarmót Hellis fer fram laugardaginn 29. júní í göngugötunni í Mjódd.  Mótið hefst kl. 14 og er mótið öllum opið. Góð verðlaun í boði.  Á síðasta ári sigraði Hjá Dóra ehf en fyrir þá tefldi Davíð Kjartansson.  Tefldar verða sjö umferðir með sjö mínútna umhugsunartíma.  Skráning fer fram í síma 866-0116 og á heimasíðu Hellis: http://hellir.blog.is.  Hægt er að nálgast upplýsingar um þegar skráða keppendur hér.

 

Þátttaka er ókeypis!

Verðlaun eru sem hér segir:

• 1. 10.000
• 2.   6.000
• 3.   4.000

Skráning:

• Heimasíða Hellis: http://hellir.blog.is
• Sími: 866 0116

Tveir sigrar Henriks í dag

Það gekk vel hjá Henrik Danielsen (2508) í 4. og 5. umferð Visma-mótsins sem fram fóru í Växjö í Svíþjóð í dag. Hann vann báðar skákir dagsins gegnum sænskum alþjóðlegum meisturum. Fórnarlömbin voru Victor Nithander (2455) og Erik Blomquist (2483).

Öllu ver gekk hins vegar í gær en þá tapaði Henrik báðum skákum dagsins fyrir alþjóðlegum meisturum. Annars vegar fyrir Dananum efnilega Mads Andersen (2477) og hins vegar fyrir hinum sænska Daniel Semcesen (2431). Henrik er semsagt að koma sterkur til baka eftir vonda byrjun.

Henrik hefur 2 vinninga og er í 6.-7. sæti. Sænski stórmeistarinn Jonny Hector (2524) er efstur með 4,5 vinning.

Á morgun teflir Henrik við lettneska stórmeistarann Normunds Miezis (2548) og sænska alþjóðlega meistarann Axel Smith (2461).

Um er að ræða 10 manna alþjóðlegt mót þar sem allir tefla við alla. Meðalstig mótsins er 2471. Henrik er nr. 3 í stigaröð keppenda. Tvær umferðir eru tefldar á dag.

• Heimasíða mótsins
• Chess-Results
• Beinar útsendingar (hefjast almennt kl. 8 og 13:30)

Kryvoruchko skákmeistari Úkraínu

Stórmeistarinn og TR-ingurinn Yuriy Kryvoruchko (2659) er skákmeistari Úkraínu en mótinu lauk í Kiev í gær. Kryvo varð efstur ásamt Ruslan Ponomariov (2743) en fékk titilinn eftir stigaútreikning.

Í hinu mikla skáklandi, Úkraínu, er engin aukakeppni verði tveir eða fleiri efstir og jafnir, ekki einu sinni "snubbótt".

Anton Korobov (2715), fráfarandi skákmeistari Úkraínu, varð svo þriðji. Pavel Eljanov (2707), sigurvegari N1 Reykjavíkurskákmótsins, mátti sætta sig við 7.-9. sæti.

Lokastaðan:

1-2. Kryvoruchko Yuriy 2659 og Ponomariov Ruslan 2743 - 7,5
3. Korobov Anton 2715 - 7,0
4-5. Alexander Areshchenko 2708 og Moiseenko Alexander 2711 - 6,5
6. Efimenko Zahar 2651 - 6,0
7-9. Volokitin Andrei 2687, Pavel Eljanov 2707 og Bogdanovich Stanislav 2567 - 5,5
10. Kravtsiv Martyn 2626 - 4,5
11. Baryshpolets Andrey 2547 - 3,0
12. Neverov Valeriy 2515 - 1,0

Heimasíða mótsins

Riddarinn - myndskreyttar mótatöflur

Gamalmenni á öllu aldri hittast vikulega til tafls á miðvikudögum hverju sem gengur í Riddaranum - skákklúbbi eldri borgara á höfuðborgarsvæðinu. Þar er hart tekist á og ekkert gefið eftir. Úrslitin eru því stundum óvænt og óvægin og menn skiptast á um að skipa efsta sætið þegar upp er staðið og ró færist yfir að loknum 11 umferðum.

Meðf. eru úrslit úr Riddaraslögum júnímánaðar til fróðleiks fyrir skákfréttaþyrsta. /ESE  

 

Björgvin nýr formaður SSON

Aðalfundur SSON fór fram í gærkvöldi á heimili tilvonandi fyrrverandi formanns, Magnúsar Matthíassonar

1. Formaður flutti skýrslu sína, fór yfir starf félagsins á liðnu starfsári.  Félagið stendur traustum fótum, mótahald hefur verið með ágætum.  Félagsmenn eru duglegir að mæta á vikulegar skákæfingar auk þess sem þeir hafa tekið þátt í ýmsum viðburðum utan félags. 

Formaður leit síðan yfir farin veg en hann hefur leitt félagið í fimm ár.  Á þessum árum hefur öflug stjórn staðið fyrir ýmsum skemmtilegum viðburðum, þar ber helst að telja:

* Árleg vinamót við Skákfélag Íslands, við Skákfélag Vinjar, við Laugdæli, við Skákfélag Reykjanesbæjar.

* Suðurlandsmótið í skák var endurvakið árið 2009 og hefur unnið sér sess í skákflórunni

* Íslandsmót skákfélaga var haldið á Selfossi árið 2012 með tæplega 400 keppendum

* Félagið hefur komið að undirbúningi Fischerseturs sem opnar hinn 11.júlí nk.

* Félagið hefur síðan að auki alltaf tekið þátt í Hraðskákkeppni skákfélaga, Íslandsmóti skákfélaga og Íslandsmóti íþróttafélaga, auk þess sem félagsmenn hafa teflt á Öðlingamótum, Reykjavíkurmótum o.s.frv.

* Meistaramót, atskákmeistaramót og hraðskákmeistaramót SSON hafa farið fram reglulega að hausti undanfarin ár.  Auk þess má nefna árleg Jóla- og Páskamót, Ofuratskákmót, Vetrarsólstöðumót, Sveitakeppni HSK, Þorramót og Öskudagsmót svo nokkur séu nefnt.

Formaður talaði síðan um bloggsíðu félagsins, en hún fór í loftið í desember 2009 og hefur formaður á þessum tíma skrifað 438 færslur sem eru ágætis heimild um starf félagsins.

Formaður þakkaði að lokum félögum sínum í stjórn fyrir þeirra góða starf og lýsti því síðan yfir að hann myndi ekki gefa kost á sér til formennsku áfram.

2. Síðan tók gjaldkeri félagsins, Ingimundur Sigurmundsson, til máls og fór yfir fjárhagsstöðu félagsins, segja má að hún sé með ágætum þótt gjaldkeri hafi séð sig knúinn til að áminna félagsmenn um að greiða félagsgjöld. Ljóst er þó að á næsta starfsári þarf félagið á auknu fé að halda enda mun kostnaður vegna leigu hækka nokkuð en á móti kemur náttúrulega að aðstaða mun stórbatna.  Ákveðið var að ganga til viðræðna við bæjaryfirvöld varðandi aukna aðkomu þeirra nú þegar félagið siglir inn í nýja spennandi tíma.

3. Fischersetur.  Formaður og gjaldkeri sögðu frá því undirbúningsstarfi sem fram hefur farið undanfarna mánuði.  Fjöldi einstaklinga hefur komið að undirbúningi og sér nú loksins fyrir endann á starfinu þegar Fischersetur á Selfossi opnar hinn 11.júlí, einu ári eftir að viljayfirlýsing um stofnun var undirrituð og 41 ári eftir að fyrsta einvígisskák Bobby Fischer og Boris Spassky í heimsmeistaraeinvíginu var tefld.

4. Næst á dagskrá var umræða um Landsmót, en eins og flestum er kunnugt fer það fram á Selfossi aðra helgi.  Félagið mun hafa forgöngu um að senda tvær sveitir til leiks auk þess sem félagsmenn munu sjá um skipulagningu mótsins.  Formaður tjáði fundarmönnum að honum væri  sem umsjónarmanni skákar á landsmóti í sjálfsvald sett hvenær skráningarfrestur rynni út, hann gengur út frá því það verði sólarhring fyrir upphaf fyrstu umferðar sem er föstudaginn 5.júlí kl 13:00.  Eins og staðan er í dag hafa 8 sveitir skráð sig til keppni.

5. Kosning stjórnar.  Eftirfarandi skipa stjórn SSON fyrir starfsárið 2013-2014:

                               Formaður: Björgvin Smári Guðmundsson
                               Ritari: Úlfhéðinn Sigurmundsson
                               Gjaldkeri: Ingimundur Sigurmundsson
                               Meðstjórnendur: Erlingur Jensson, Magnús Matthíasson

6. Mótahald.  Vísað til fyrsta fundar nýkjörinnar stjórnar.

7. Önnur mál.  Teflt var hraðskákmót, nýkjörinn formaður hafði sigur og veit það á gott.

Heimasíða SSON

Mjóddarmót Hellis á laugardag

Mjóddarmót Hellis fer fram laugardaginn 29. júní í göngugötunni í Mjódd.  Mótið hefst kl. 14 og er mótið öllum opið. Góð verðlaun í boði.  Á síðasta ári sigraði Hjá Dóra ehf en fyrir þá tefldi Davíð Kjartansson.  Tefldar verða sjö umferðir með sjö mínútna umhugsunartíma.  Skráning fer fram í síma 866-0116 og á heimasíðu Hellis: http://hellir.blog.is.  Hægt er að nálgast upplýsingar um þegar skráða keppendur hér.

 

Þátttaka er ókeypis!

Verðlaun eru sem hér segir:

• 1. 10.000
• 2.   6.000
• 3.   4.000

Skráning:

• Heimasíða Hellis: http://hellir.blog.is
• Sími: 866 0116

Guðmundur með jafntefli í annarri umferð

Alþjóðlegi meistarinn Guðmundur Kjartansson (2453)gerði jafntefli við Indverjann Sardana Rishi (2308) í 2. umferð alþjóðlegs móts í Katalóníu. Á morgun teflir hann við spænska FIDE-meistarann Ramirez Erik Martinez (2306).

101 skákmaður frá 18 löndum tekur þátt í mótinu. Þar af eru 19 stórmeistarar og jafnmargir alþjóðlegir meistarar. Guðmundur er nr. 25 í stigaröð keppenda.

Ekki er að sjá að það séu beinar útsendingar frá mótinu né virðast skákir mótsins vera aðgengilegar.

Ef einhver veit betur þá má hafa samband við ritstjóra sem er ekki sleipur í spænsku og enn síður sleipur í spænskum heimsíðum.

• Heimasíða mótsins
• Chess-Results

Henrik tapaði í fyrstu umferð

Stórmeistarinn Henrik Danielsen (2508) stendur í ströngu þessa dagana. Aðeins degi eftir þátttöku í alþjóðlegu móti í Osló er hann kominn til Växjö í Svíþjóð þar sem Visma-mótið hófst í dag. Þar tapaði hann fyrir finnska FIDE-meistaranum Vilka Sipila (2410) í fyrstu umferð.

Á morgun fara fram tvær umferðir. Í þeirri fyrri mætir Henrik danska alþjóðlega meistaranum Mads Andersen (2477) og í þeirri síðari sænska alþjóðlega meistaranum Daniel Semcesen (2431).

Um er að ræða 10 manna alþjóðlegt mót þar sem allir tefla við alla. Meðalstig mótsins er 2471. Henrik er nr. 3 í stigaröð keppenda. Tvær umferðir eru tefldar á dag.

• Heimasíða mótsins
• Chess-Results
• Beinar útsendingar (hefjast almennt kl. 8 og 13:30)