Smámeistaraklúbburinn 1963-2013

50 ára Afmælismót Smámeistara fór fram laugardaginn 28. september í Baðstofunni, Prestastíg 7 í Grafarholti.

Keppendur voru tíu talsins; átta innvígðir Smámeistarar og  tveir gestir.

Smámeistararnir voru Bragi Halldórsson,Guðjón Magnússon, Gunnar Birgisson, Gunnar Finnsson, Harvey Georgsson, Helgi Hauksson, Snorri Þorvaldsson og Sverrir Agnarsson.

Jón Kristinsson Hólmvíkingur, tvöfaldur Íslandsmeistari og Jónas Þorvaldsson, kóngabani, félagi Jóns í Ólympíuliði Íslendinga í Varna, Búlgaríu 1962 og Tel Avív, Ísrael 1964 voru gestir mótsins.

Skákstjóri var Sigtryggur Sigurðsson fyrrverandi glímukappi, Smá- og málarameistari.

Tefld var tvöföld umferð;  með 5 og 7 mínútna umhugsunartíma.

Jón Kristinsson bar sigur úr býtum, hlaut 14½ vinning í 18 skákum.  Hann tefldi firna vel og sannaði rækilega að lengi lifir í gömlum glæðum.

Annar í röðinni varð hinn eitilharði skákmeistari Gunnar Birgisson með 14 vinninga og þriðja sæti hreppti kempan síunga Bragi Halldórsson með 12½ vinning.

Aðrir fengu minna þrátt fyrir snilldarleg tilþrif á köflum!

Smámeistaraklúbburinn var stofnaður á Barónsstíg 49 og Melhaga 9 í ágúst-september 1963.  Stofnfélagar voru Gunnar Birgisson, Gunnar Finnsson, Jóhannes Björn Lúðvíksson, Jón Guðmar Jónsson, Sigtryggur Sigurðsson og Snorri Þorvaldsson.

Smámeistarar héldu 10 skákmót á árunum 1963-1970 og bættust nokkrir félagar í hópinn á þeim tíma.

Starfsemi klúbbsins lá að mestu niðri í 33 ár en  þá var Smámeistaraklúbburinn endurvakinn og síðustu tíu ár hafa verið haldin ein átta mót. Smámeistarar hafa fullan hug á því að halda áfram að tefla og efna til fleiri skákmóta í framtíðinni!

NB  Félagar í Smámeistaraklúbbnum eru nítján talsins.  Einn er fallinn frá, Sigfús Jónsson, hinn snjalli hraðskákmaður.

Stórmeistaramót Taflfélags Reykjavíkur hófst í dag

Klukkan fimm í dag hófst sterkasta skákmót sem haldið hefur verið á Íslandi í áraraðir, lokað tíu manna alþjóðlegt stórmeistaramót Taflfélags Reykjavíkur.  Það var formaður T.R., Björn Jónsson, sem hóf dagskrána með beittri setningarræðu en Björn á veg og vanda af mótinu og hefur sannarlega lyft grettistaki í aðdraganda þess.

Í ræðu sinni vék Björn meðal annars máli sínu að því hversu sárlega slík alþjóðleg mót hefur vantað í íslenskt mótahald undanfarin ár. Hann benti á að skákmenn margir hverjir hafi réttilega bent á þessa staðreynd í gegnum tíðina en lítið hafi verið að gert og þegar hugmyndir hafi verið viðraðar á aðalfundum forystu skákhreyfingarinnar hafi undirtektir verið dræmar.

Í ræðu formanns kom aukreitis fram hversu kjörið tækifæri mót sem þetta er fyrir innlenda skákmenn að spreyta sig gegn fyrnasterkum erlendum skákmeisturum og ná sér þannig í dýrmæta reynslu að ógleymdum möguleikanum á að vinna sér inn áfanga að stórmeistaratitili eða alþjóðlegum meistaratitli.  Skortur á alþjóðlegum mótum innanlands gerir íslenskum skákmönnum mjög erfitt um við að næla sér í umrædda titla.

Formaðurinn fór yfir hið öfluga barna- og unglingastarf félagsins en uppgangur þess hefur sjaldan verið eins mikill og þessi misserin. Yngstu iðkendur félagsins munu ekki fara á mis við komu erlendu meistaranna því á meðal hliðarviðburða meðfram aðalmótinu er fjöltefli úkraínska ofurstórmeistarans Mikhailo Oleksienko (2608)  við nemendur Taflfélags Reykjavíkur.

 

Því næst kynnti Björn keppendurna tíu til leiks áður en Illugi Gunnarsson menntamálaráðherra steig í pontu og hélt stutta tölu.  Því næst var mótið formlega sett og menntamálaráðherra lék fyrsta leiknum í viðureign úkraínska ofurstórmeistarans Sergey Fedorchuk (2656) og alþjóðlega meistarans Arnars E. Gunnarssonar (2441).

Það má með sanni segja að Arnar, sem snýr nú aftur eftir alltof langt hlé frá kappskákmótum, hafi fengið ærið verkefni þegar hann settist anspænis úkraínska skákmeistaranum í hlutverki svörtu mannanna. Fedorchuk hefur nefnilega áberandi gott vinningshlutfall með hvítu, svo gott að sjaldgæft er að sjá slíkt hlutfall hjá skákmönnum.  Af tæplega 530 skákum sem skráðar eru á Fedorchuk samkvæmt vef Fide hefur hann sigrað í 64% þeirra og aðeins tapað 6%.

 

Tefldur var ítalskur leikur og svo fór að Arnar játaði sig sigraðan eftir 37 leiki en Fedorchuk hafði frumkvæði alla skákina og líklega hefur Arnar teflt full rólega gegn hinum fyrnasterka Sergey.  Næststigahæsti keppandi mótsins, úkraínski ofurstórmeistarinn Mikhailo Oleksienko (2608) mátti hafa sig allan við þegar hann sigraði Fide meistarann Sigurbjörn Björnsson (2395) en Sigurbjörn hefur verið í töluverðri framför síðastliðin 2-3 ár.

Stórmeistarinn Henrik Danielsen (2501) vann síðan nokkuð öruggan sigur á færeyska alþjóðlega meistaranum Helga Dam Ziska (2485) og enn og aftur sýndi Henrik með sínum sérstaka skákstíl hversu sterkur hann er í skákum sem einkennast af stöðubaráttu.  Alþjóðlegu meistarinn Guðmundur Kjartansson (2447) laut í gras fyrir danska alþjóðlega meistaranum Simon Bekker-Jensen (2420) og þá gerðu Þorvarður Fannar Ólafsson (2266) og alþjóðlegi meistarinn Bragi Þorfinnsson (2483) jafntefli í mikilli baráttuskák.

 

Önnur umferð fer fram á morgun miðvikudag og hefst kl. 15 en þá mætast m.a. Bragi og Oleksienko sem og Henrik og Fedorchuk.  Teflt er í húsnæði Taflfélags Reykjavíkur við bestu aðstæður.  Hægt er að fylgjast með öllum viðureignunum á stóru tjaldi og þá eru skákskýringar á skákstað en meðal skákskýrenda má nefna stórmeistarana Jón L. Árnason og Þröst Þórhallsson.  Það eru því kjöraðstæður fyrir áhorfendur en aðgangur er ókeypis.  Þá er vert að nefna sérlega glæsilegar veitingar sem í boði eru en við setningu mótsins er ekki orðum aukið að tala um hlaðborð af dýrindis tertum og meðlæti.

Texti og myndir af heimasíðu TR.

• Chess-Results
• Vefur mótsins
• Myndir (ÁK)

EM ungmenna: Vignir Vatnar, Jón Kristinn og Dawid unnu í dag

Þriðja umferð EM ungmenna fór fram í dag í Budva í Svartfjallalandi í dag. Vignir Vatnar Stefánsson (U10), Jón Kristinn Þorgeirsson (U14) og Dawid Kolka (U12) unnu í dag en aðrar skákir töpuðust. Vignir Vatnar er efstur íslensku keppendanna hefur 2,5 vinninga, Óskar Víkingur (U8) hefur 2 vinninga, Jón Kristinn 1,5 vinning en aðrir hafa færri vinninga.

Úrslit annarrar umferðar:

Name	FED	Rtg	Result	Name	FED	Rtg
Davidsson Oskar Vikingur	ISL	1379	0 - 1	Sibashvili Davit	GEO	0
Stefansson Vignir Vatnar	ISL	1782	1 - 0	Pedoson Georg Aleksander	EST	1607
Chukavin Kirill	EST	1887	1 - 0	Heimisson Hilmir Freyr	ISL	1742
Acs Marton	HUN	1780	1 - 0	Steinthorsson Felix	ISL	1513
Vaitsiakhouski Yauheni	BLR	1550	0 - 1	Thorgeirsson Jon Kristinn	ISL	1824
Schweighoffer Martin	SUI	1894	0 - 1	Kolka Dawid	ISL	1666
Karlsson Mikael Johann	ISL	2068	0 - 1	Kadric Denis	BIH	2470
Altshul Limor	ISR	1832	1 - 0	Magnusdottir Veronika Steinun	ISL	1577

 

Staða íslensku keppendanna:

 

SNo	Name	RtgI	Pts.	Rk.	Group
12	Davidsson Oskar Vikingur	1379	2.0	22	Open8
12	Stefansson Vignir Vatnar	1782	2.5	14	Open10
72	Heimisson Hilmir Freyr	1742	1.0	79	Open12
108	Steinthorsson Felix	1513	0.0	117	Open12
88	Thorgeirsson Jon Kristinn	1824	1.5	61	Open14
108	Kolka Dawid	1666	1.0	99	Open14
57	Karlsson Mikael Johann	2068	0.5	65	Open18
59	Magnusdottir Veronika Steinun	1577	0.0	64	Girls16

 

Mikael Jóhann teflir í flokki 18 ára og yngri, Jón Kristinn og Dawid í flokki 14 ára og yngri, Hilmir Freyr og Felix í flokki 12 ára og yngri, Vignir Vatnar í flokki 10 ára og yngri, Óskar Víkingur í flokki 8 ára og yngri og Veronika Steinunn í flokki stúlkna 16 ára og yngri. Fararstjórar og þjálfarar eru Helgi Ólafsson og Hjörvar Steinn Grétarsson.

• Heimasíða mótsins
• Facebook-síða íslenska hópsins
• Chess-Results (úrslit Íslendinga)
• Bloggsíða Óskars Víkings

Þór sigraði hjá Ásum í gær

Enn hittust Æsir í Stangarhyl 4 og tefldu sem áður á þriðjudagsmótum félagsins. Þar eru margir kallaðir, nokkrir útvaldir en dagsformið er misjafnt. Fremstu menn dagsins voru

1. Þór Valtýsson sem tefldi af miklu öryggi og náði 8,5 vinningum.
2. Þorsteinn K Guðlaugsson var í öðru sæti með 7,5 vinninga.
3. Magnús V Pétursson var þriðji með 7,0 vinninga.
4. Össur Kristinsson var fjórði með 6,5 vinninga.
5. Haraldur A Sveinbjörnsson var fimmti með 6,5 vinninga.

Aðrir keppendur áttu ekki eins góðan dag sjá töflu hér á eftir.

Alls tóku 22 keppendur þátt í móti dagsins, þó keppnisskapið sé drjúgt hika menn ekki við að hrista fallegar fléttur fram úr erminni.Ekki skiptir máli  þó aðeins sé 10 mínútna umhugsunarfrestur á skák. Á keppnisdögum má oft sjá glæsileg tilþrif og glæsilegar fléttur.

Full ástæða er til að hvetja þá sem eru orðnir 60+ að mæta sér til skemmtunar í Stangarhyl 4 en byrjað er að tefla stundvíslega kl 13.00.

Þá minnum við á félaga okkar í Hafnarfirði sem tefla á miðvikudögum kl 13.00,  þar er ekki síður tekið vel á móti áhugasömum skákmönnum.

 

 

Stórmeistaramót TR hefst kl. 17:30

 

Stórmeistaramót TR hefst í dag kl. 17:30. Mótið verður sett kl. 17. Mótið er 10 manna alþjóðlegt lokað 10 manna stórmót verða haldið í skákhöll Taflfélags Reykjavíkur. Mótið verður geysiöflugt og meðal þátttakenda eru þrír stórmeistarar og fimm alþjóðlegir meistarar.

Aðstæður verða eins og best verður á kosið, bæði fyrir keppendur og áhorfendur.  Allar skákir mótsins verða sýndar beint á netinu, en auk þess verður hægt að fylgjast með þeim á stóru tjaldi á keppnisstað. Reiknað er með að skákskýringar verði á mótsstað í hverri umferð, og svo síðast en ekki síst verða hinar rómuðu veitingar í boði sem ætíð fylgja mótum félagsins.

Aðalviðureign fyrstu umferðar verður að teljast skák úkraínska stórmeistarans Sergey Fedorchuk og Arnars Gunnarssonar.

Beinar útsendingar frá fyrstu umferð má finna hér.

Röðun fyrstu umferðar:

Bo.	Rtg		Name	Result		Name	Rtg
1	2266		Olafsson Thorvardur		IM	Thorfinnsson Bragi	2483
2	2485	IM	Ziska Helgi Dam		GM	Danielsen Henrik	2501
3	2667	GM	Fedorchuk Sergey A.		IM	Gunnarsson Arnar	2441
4	2434	IM	Kjartansson Gudmundur		IM	Bekker-Jensen Simon	2420
5	2395	FM	Bjornsson Sigurbjorn		GM	Oleksienko Mikhailo	2608

• Heimasíða mótsins
• Chess-Results

Barnaskákmót Víkingaklúbbsins

Barnaskákmót Víkingaklúbbsins verður haldið í Víkinni, Vìkingsheimilinu miðvikudaginn 2. október kl. 17.00 Allir krakkar 6. ára og eldri velkomin. Tefldar verða 6. umferðir með 10. mínútna umhugsunartíma og það kostar ekkert að vera með. Núverandi barnaskákmeistari Víkingaklúbbsins er Jón Hreiðar Rúnarsson.

Meistaramót Víkingaklúbbsins í atskák fer fram á morgun

Meistaramót Víkingakllúbbsins í atskák verður haldið í Víkinni Víkingsheimilinu, miðvikudaginn 2. október kl. 20.00. Tefldar verða 6. umferðir með 15. mínútna umhugsunartíma. Núverandi atskaḱmeistari Víkingaklúbbsins er Ólafur B. Þórsson. 

Gagnaveitumótið: Einar Hjalti með fullt hús eftir sigur á stórmeistaranum

FIDE-meistarinn Einar Hjalti Jensson (2305) er í miklum ham um þessar mundir. Hann sigraði á Framsýnarmótinu um síðustu helgi og vann stórmeistarann Stefán Kristjánsson (2491) í fimmtu umferð Gagnaveitumótsins - Haustmóts TR í frestaðri skák sem fram fór í kvöld. Einar Hjalti hefur fullt hús rétt eins og Jón Viktor Gunnarsson (2409). Stefán er þriðji með 3,5 vinning og nafni hans Bergsson (2131) er fjórði með 3 vinninga eftir jafntefli við Gylfa Þórhallsson (2154) í frestaðri skák sem fram fór einnig í kvöld.

B-flokkur:

Tvær frestaðar skákir voru tefldar í kvöld. Ingi Tandri Traustason (1817) og Jón Trausti Harðarson (1930) eru efstir með 4,5 vinning. Enn eru tvær skákir ótefldar og Hallgerður Helga Þorsteinsdóttir (1949) getur náð þeim að vinningum.

C-flokkur:

Elsa María Kristínardóttir (1787) er efst með 3,5 vinning. Fjórir skákmenn hafa 3 vinninga. Engar frestanir!

D-flokkur:

Sóley Lind Pálsdóttir (1412) og Haukur Halldórsson (1539) eru efst með 4 vinninga. Pörun liggur ekki fyrir þar sem ein skák er ókláruð.

 

 

• Heimasíða TR
• Chess-Results 
• Myndaalbúm (GB)

EM ungmenna: Óskar Víkingur og Hilmir Freyr unnu í 2. umferð

Önnur umferð EM ungmenna fór fram í dag í Budva í Svartfjallalandi í dag. Óskar Víkingur Davíðsson (U8) og Hilmir Freyr Heimisson (U12) unnu sínar skákir. Óskar Víkingur hefur byrjað afskaplega vel og unnið báðar sínar skákir. Vignir Vatnar Stefánsson (U10) og Mikael Jóhann Karlsson (U18) gerðu báðir jafntefli. Vignir Vatnar hefur 1,5 vinning.

Bent er sérstaklega á skemmtilegt blogg Óskars Víkings sem fjallar einnig um aðstæður á skákstað.

Því miður eru fréttir takmarkaðar frá skákstað en netið virkar ekki ekki nógu vel á skákstað.

Úrslit annarrar umferðar:

 

Name	FED	Rtg	Result	Name	FED	Rtg
Lominadze Giorgi	GEO	0	0 - 1	Davidsson Oskar Vikingur	ISL	1379
Helmer Jan	GER	1575	½ - ½	Stefansson Vignir Vatnar	ISL	1782
Steinthorsson Felix	ISL	1513	0 - 1	Psyk Radoslaw	POL	1752
Heimisson Hilmir Freyr	ISL	1742	1 - 0	Pannwitz Kai	SCO	1522
Thorgeirsson Jon Kristinn	ISL	1824	0 - 1	Fedotov Nikita	RUS	2048
Kolka Dawid	ISL	1666	0 - 1	Tifferet Shaked	ISR	1866
Tairi Krenar	MKD	1864	½ - ½	Karlsson Mikael Johann	ISL	2068
Magnusdottir Veronika Steinun	ISL	1577	0 - 1	Thode Gilda	SUI	1880

Staða íslensku keppendanna:

SNo	Name	RtgI	Pts.	Rk.	Group
12	Davidsson Oskar Vikingur	1379	2.0	4	Open8
12	Stefansson Vignir Vatnar	1782	1.5	31	Open10
72	Heimisson Hilmir Freyr	1742	1.0	67	Open12
108	Steinthorsson Felix	1513	0.0	115	Open12
88	Thorgeirsson Jon Kristinn	1824	0.5	87	Open14
108	Kolka Dawid	1666	0.0	105	Open14
57	Karlsson Mikael Johann	2068	0.5	57	Open18
59	Magnusdottir Veronika Steinun	1577	0.0	63	Girls16

 

Mikael Jóhann teflir í flokki 18 ára og yngri, Jón Kristinn og Dawid í flokki 14 ára og yngri, Hilmir Freyr og Felix í flokki 12 ára og yngri, Vignir Vatnar í flokki 10 ára og yngri, Óskar Víkingur í flokki 8 ára og yngri og Veronika Steinunn í flokki stúlkna 16 ára og yngri. Fararstjórar og þjálfarar eru Helgi Ólafsson og Hjörvar Steinn Grétarsson.

• Heimasíða mótsins
• Facebook-síða íslenska hópsins
• Chess-Results (úrslit Íslendinga)
• Bloggsíða Óskars Víkings

Nýtt fréttaskeyti Skákakademíunnar

Nýtt Fréttaskeyti Skákakademíunnar er komið út. Meðal efnis er stórskemmtilegt viðtal við alþjóðlega meistarann Guðmund Kjartansson sem og yfirheyrslan yfir Birni Jónssyni formanni TR.

Fréttaskeytið fylgir með sem viðhengi.

Skrár tengdar þessari bloggfærslu:

• Fréttaskeyti Skákakademíunnar - 29. september 2013