Hjörvar með yfirburði - hefur þegar tryggt sér sigur á Wow air Vormóti TR

Hjörvar Steinn Grétarsson (2511) heldur áfram ótrúlegri sigurgöngu sinni á Wow air Vormóti TR. Í sjöttu umferð, sem fram fór í gær, vann hann Guðmund Kjartansson (2441). Hjörvar hefur fullt hús og hefur tveggja vinninga forskot á næstu menn. Magnús Pálmi Örnólfsson (2156) hefur vinningsforskot í b-flokki fyrir lokaumferðina.

Stórmeistararnir Hannes Hlífar Stefánsson (2541) og Þröstur Þórhallsson (2435) sem og Dagur Ragnarsson (2105) eru í 2.-4. sæti með 4 vinninga. Hannes vann Dag Arngrímsson (2382), Þröstur hafði betur gegn Ingvari Þór Jóhannessyni (2377) og Dagur vann Stefán Kristjánsson (2503) í ótefldri skák.

Í lokaumferðinni sem fram fer nk. mánudagskvöld mætast meðal annars Hjörvar - Þröstur og Dagur - Hannes.

B-flokkur:

Magnús Pálmi Örnólfsson (2156) er efstur í b-flokki með 5 vinninga eftir jafntefli við Kjartan Maack (2121) í gær. Magnús hefur vinningsforskot á næstu menn sem eru Kjartan, Hrafn Loftsson (2184), sem vann bróður sinn, Arnald (2078), í gær, og Vignir Vatnar Stefánsson (1844) sem vann Loft Baldvinsson (2007). 

Gauti Páll Jónsson (1618) átti góða skák þegar hann vann Sverri Örn Björnsson (2126) í gær.

Í lokaumferðinni mætast meðal annars: Magnús Pálmi - Vignir Vatnar og Hrafn-Kjartan. Magnúsi Pálma dugar jafntefli til að tryggja sér sigur í flokknum en aðrir þurfa sigur til að ná Magnúsi.

 

• Heimasíða TR
• Chess-Results (a-flokkur)
• Chess-Results (b-flokkur)

Sumarskákmót Fjölnis fer fram í dag

Nú styttist í hið árlega Sumarskákmót Fjölnis sem haldið verður í tíunda sinn á vegum Skákdeildar Fjölnis. Mótið fer fram í hátíðarsal Rimaskóla og hefst nákvæmlega kl. 17:00. Reikna má að mótinu ljúki kl. 19:15. Tefldar verða 6 umferðir og umhugsunartíminn er 6 mínútur. Verðlaunað verður í þremur flokkum; eldri flokk, f. 1998-2002, yngri flokk 2002-2007 og í stúlknaflokki. Í skákhléi verður boðið upp á pítsur og drykk frá Ölgerðinni. 

Að venju er fjöldi áhugaverðra verðlauna: Pítsur, og bíómiðar í Sambíóin og Laugarásbíó, samtals 15 aðalvinningar. Skráning á staðnum og eru þátttakendur beðnir um að mæta tímanlega til skráningar. Í fyrra mættu 58 krakkar til leiks og baráttan var hörð en skemmtileg.

Skákstjórar verða þeir Helgi Árnason formaður Skákdeildar Fjölnis og Stefán Bergsson frá Skákakademíunni. Heiðursgestur mótsins verður Gylfi Magnússon skákáhugamaður og félagi í Rótarýklúbb Grafarvogs. Rótarýklúbburinn gefur að venju alla verðlaunabikara til mótsins. Þátttökugjald með veitingum er 200 kr. fyrir Fjölniskrakka, 400 kr. fyrir aðra skákkrakka.

Foreldrar og aðrir gestir geta keypt sér pítsu fyrir 200 kr og þegið ókeypis kaffi á staðnum. Sumarskákmót Fjölnis er lok vetrarstarfs Skákdeildar Fjölnis sem fagnar 10 ára afmæli nú í maímánuði.

Vormót Víkingaklúbbsins fer fram á miðvikudaginn

Síðasta barnaæfing vetrarins verður miðvikudaginn 14 maí.  Í tilefni þess að nú skal haldið í sumarfrí, þá verður haldið Vormót Víkingaklúbbsins.  Tefldar verða 5. umferðir með 7 mínútna umhugsunartíma á mann og hefst mótið kl. 17.15. Allir krakkar eru velkomnir og þátttaka er ókeypis.   Keppt verður tveim flokkum: Flokki fæddra 1998-2004 og flokki fæddra 2005 og yngri.   Bikar verður í verðlaun fyrir efsta sæti í hvorum flokki, en verðlaunapeningar verða fyrir annað og þriðja sætið.

Skákstjórar verða þeir Sigurður Ingason og Gunnar Fr. Rúnarsson, sem eru nýútskrifaðir úr skákstjórnarnámskeiði Skáksambands Íslands nú um helgina.

Skráning á mótið fer m.a fram á netfangið:  vikingaklubburinn(hjá)gmail.com   

Tilgreina skal nafn og fæðingarár.  Við vonumst til að sjá sem flesta.

Heimilisfang hér: 

Knattspyrnufélagið Víkingur
Traðarlandi 1, 108 Reykjavík

Meðal þeirra sem hafa skráð sig til leiks eru þeir Guðmann Brimar Bjarnason og Adam Ómarsson sem eru báðir fæddir árið 2007.





Dagskráin fram á vor:  

• 14. maí.  Sumarmót Víkingaklúbbsins.  Víking kl. 17.15
• 16. maí Íslandsmót Víkingaskákfélaga. Víkin. kl. 20.00.  (NÅ· dagsetning)
• 14. maí - 1. júní.  Íslandsmótið í skák (landsliðsflokkur & áskorendaflokkur).  Margir Víkingar taka þátt.
• 4. júní.  Firmamót Víkingaklúbbsins.    Víkin.  kl.  18.00.  (Nýtt)

Hraðskákmót öðlinga fer fram á miðvikudagskvöldið

Hraðskákmót öðlinga fer fram næstkomandi miðvikudagskvöld í félagsheimili T.R. að Faxafeni 12. Mótið hefst kl. 19.30 og er opið fyrir alla 40 ára (á árinu) og eldri. Tefldar verða 7 umferðir með 7 mín. umhugsunartíma.  Í lok mótsins fer fram verðlaunaafhending fyrir Hraðskákmótið sem og Skákmót öðlinga sem lauk s.l. miðvikudagskvöld með sigri alþjóðlega meistarans Sævars Bjarnasonar. Þátttökugjald er kr. 500 og er í því innifalið kaffi og góðgæti. Skákmenn 40+ eru hvattir til að fjölmenna!

Núverandi Hraðskákmeistari öðlinga er Róbert Lagerman.

• Skákmót öðlinga 2014
• Hraðskákmót öðlinga 2013

Huginn nýtt nafn í stað GM Hellis

Skákfélagið GM Hellir hefur hlotið nýtt heiti og nefnist héðan í frá Skákfélagið Huginn. Nafnið var valið á nýafstöðnum aðalfundi félagsins 2014, eins og kveðið var á um í samrunasamningi skákfélaganna Goðans-Máta og Hellis haustið 2013. Fyrri nafngift félagsins, skammstöfunin GM Hellir, var hugsuð til bráðabirgða og var sérstakri nafnanefnd falið skömmu eftir sameininguna að leggja fram tillögur um endanlegt heiti. Áhersla var lögð á að nafnið væri á góðri íslensku, sérstætt, þjált og nothæft alþjóðlega.  

Huginn var nafn á öðrum hrafna Óðins. Hrafninn er viskufugl enda sendi Óðinn hrafna sína, Hugin og Munin, til að leita þekkingar. Merking nafnsins Huginn er hugur, hugsun; áræði sem fellur vel að skákiðkun og forsendum árangurs á því sviði. Indóevrópsk rót orðsins er „keu", sem merkir að huga að eða skynja. Beyging: Huginn-Hugin-Hugin-Hugins.  

Hermann Aðalsteinsson, formaður Hugins: „Það er ánægjuefni að félaginu hefur verið fundið þetta fagra og rismikla nafn sem ég hef trú á að venjist vel. Segja má að þar með sé sameiningarferli félaganna endanlega lokið í huglægri merkingu. Hið nýja félag er sprottið upp af þremur sterkum rótum og hefur því ákveðna hefð að byggja á, en á líka sjálft eftir að skapa nafninu sínu orðspor af eigin verðleikum. Ég treysti Huginsmönnum, konum og körlum, vel til þess uppbyggingarstarfs."  

Fram undan er það verkefni að setja nýja nafnið í réttan búning og leggja línur að framtíðarásýnd félagsins. Stefnt er að því að opna vef Hugins í öndverðum júní og verður nýtt kennimark félagsins kynnt um leið. Lén Hugins, skakhuginn.is, verður jafnframt tekið í gagnið á sama tíma.

Sumarskákmót Fjölnis fer fram á morgun

Nú styttist í hið árlega Sumarskákmót Fjölnis sem haldið verður í tíunda sinn á vegum Skákdeildar Fjölnis. Mótið fer fram í hátíðarsal Rimaskóla og hefst nákvæmlega kl. 17:00. Reikna má að mótinu ljúki kl. 19:15. Tefldar verða 6 umferðir og umhugsunartíminn er 6 mínútur. Verðlaunað verður í þremur flokkum; eldri flokk, f. 1998-2002, yngri flokk 2002-2007 og í stúlknaflokki. Í skákhléi verður boðið upp á pítsur og drykk frá Ölgerðinni. 

Að venju er fjöldi áhugaverðra verðlauna: Pítsur, og bíómiðar í Sambíóin og Laugarásbíó, samtals 15 aðalvinningar. Skráning á staðnum og eru þátttakendur beðnir um að mæta tímanlega til skráningar. Í fyrra mættu 58 krakkar til leiks og baráttan var hörð en skemmtileg.

Skákstjórar verða þeir Helgi Árnason formaður Skákdeildar Fjölnis og Stefán Bergsson frá Skákakademíunni. Heiðursgestur mótsins verður Gylfi Magnússon skákáhugamaður og félagi í Rótarýklúbb Grafarvogs. Rótarýklúbburinn gefur að venju alla verðlaunabikara til mótsins. Þátttökugjald með veitingum er 200 kr. fyrir Fjölniskrakka, 400 kr. fyrir aðra skákkrakka.

Foreldrar og aðrir gestir geta keypt sér pítsu fyrir 200 kr og þegið ókeypis kaffi á staðnum. Sumarskákmót Fjölnis er lok vetrarstarfs Skákdeildar Fjölnis sem fagnar 10 ára afmæli nú í maímánuði.

Næstsíðasta umferð Wow air-mótsins fer fram í kvöld

Næstsíðasta umferð Wow air Vormóts TR fer fram í kvöld. Hjörvar Steinn Grétarsson (2511) er í vænlegri stöðu og sigur gegn Guðmundi Kjartanssyni (2441) mynd tryggja sigur á mótinu. Hjörvar hefur fullt hús og Guðmundur er annar með 3½ vinning.

Með 3 vinninga hafa Dagur Ragnarsson (2105), Hannes Hlífar Stefánsson (2541), Dagur Arngrímsson (2382), Stefán Kristjánsson (2503), Ingvar Þór Jóhannesson (2377) og Þröstur Þórhallsson (2435).

Í umferð kvöldsins mætast meðal annars.

• Guðmundur (3½) - Hjörvar (5)
• Hannes (3) - Dagur A. (3)
• Stefán (3) - Dagur R. (3)
• Þröstur (3) - Ingvar Þór (3)
• Friðrik (2½) - Guðmundur G (2)

Helstu viðureignir kvöldsins verða sýndar beint á heimasíðu TR og verður tengill á beina útsendingu virkur rétt fyrir umferð.

B-riðill

Fléttukóngurinn Magnús Pálmi Örnólfsson (2156) er efstur með 4½ vinning og annar er Kjartan Maack (2121). Fimm skákmenn hafa 3 vinninga en það eru Torfi Leósson (2175), Arnaldur Loftsson (2078), Hrafn Loftsson (2184), Örn Leó Jóhannsson (1999) og ungstirnið Vignir Vatnar Stefánsson (1844).

Í umferð kvöldsins mætast meðal annars:

• Kjartan (3½) -Magnús (4½)
• Hrafn (3) - Arnaldur (3)
• Torfi (3) - Örn Leó (3)
• Vignir Vatnar (3) - Loftur (2½)

 

• Heimasíða TR
• Chess-Results (a-flokkur)
• Chess-Results (b-flokkur)

Guðmundur Ingvi og Magnús skákmeistarar Fljótdalshéraðs

Skákþingi Fljótsdalshéraðs lauk fyrir skemmstu. Þátttakendur voru 5 og var teflt tvöfalt mót, alls 10 umferðir. Tími var 75 mín. á mann og bónus 15 sek. á leikinn leik. Efstir og jafnir urðu Magnús Valgeirsson og Guðmundur Ingvi Jóhannsson með 6 vinninga. Þeir voru einnig jafnir að stigum og innbyrðis viðureignir jafnar, svo að ákveðið var að báðir skyldu teljast sigurvegarar.

Þeir geta því skiptst á um að geyma hrókinn góða, sem er farandverðlaunagripur í þessu móti og sést hann hér til hægri.

Í þriðja sæti varð Magús Ingólfsson með 4½ vinning og í 4. sæti Einar Ólafsson með 3½ vinning. Lestina rak svo Jón Björnsson, en hann sigraði í þessu móti í fyrra, og sýnir það hve jafnir þátttakendur eru. Menn skiptast á um að sigra.

Mótstöflu má finna á heimasíðu SAUST.

Skákþáttur Morgunblaðsins: Nansý Davíðsdóttir Norðurlandameistari stúlkna

Nansý Davíðsdóttir vann gullverðlaun í yngsta aldursflokki á Norðurlandamóti stúlkna á Bifröst um síðustu helgi. Nansý hlaut 4 ½ vinning af fimm mögulegum en hún vann helsta keppinaut sinn í c-flokki mótsins með svörtu í næstsíðustu umferð. Íslendingar voru nálægt því að hreppa einnig gullið í b-flokki og segja má að einungis tæknileg atriði við jafntefliskröfu hafi komið í veg fyrir að Sóley Lind Pálsdóttir myndi sigra þar en í úrslitaskák hennar í fjórðu umferð kom sama staðan upp þrisvar, en Sóley ógilti kröfuna með því að leika fyrst og krefjast síðan jafnteflis en reglur FIDE gera ráð fyrir að fyrst sé leikur skráður, klukkan stöðvuð og síðan kallað á dómara. En Sóley Lind tefldi skák mótsins í 2. umferð en meðal áhorfenda að þeirri viðureign var Illugi Gunnarsson menntamálráðherra sem kom á laugardagsmorguninn til að heilsa upp á keppendur:

Sóley Lind Pálsdótir - Brandy Paltzer (Svíþjóð)

Sikleyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 a6 6. Be3 Rc6 7. Rb3 g6 8. Be2 Bg7 9. Dd2 Be6 10. f3 O-O 11. O-O-O Re5 12. Bh6 Bxh6?!

Það er alltaf varasamt að taka strax á h6. Þar er drottningin stórhættuleg en hvítur hefur sparað sér tíma miðað við þekkt afbrigði með því að staðsetja biskupinn á e2 en ekki b3.

13. Dxh6 Hc8 14. h4 Dc7?

Annar slakur leikur. Fórnin á c3, 14. ... Hxc3! 15. bxc3 Dc7 er eina leiðin til að skapa mótspil.

15. h5 Rxh5 16. g4 Rf6 17. Hh2!

Útsmoginn leikur sem villir sýn á aðalhluverki hróksins sem er að valda c2-peðið!

17. ... Hfd8 18. g5 Rh5 19. f4 Rg4 20. Bxg4 Bxg4 21. Rd5 Dd7

Meira viðnám, veitti 21. ... Dc4 en eftir 22. Rxe7+ Kh8 23. He1! stendur hvítur til vinnings. En nú kemur glæsileg leikflétta.

22. Hxh5! Bxh5 23. Rf6+! exf6 24. gxf6 Hxc2+ 25. Kb1! Hc1+ 26. Hxc1 De8 27. Dg7 mát.

Hjörvar efstur á Wow air-mótinu

Hjörvar Steinn Grétarsson hefur unnið allar skákir sínar á Wow air-móti Taflfélags Reykjavíkur. Hann vann Hannes Hlífar Stefánsson í 4. umferð og hefur vinningsforskot á næsta mann sem er Dagur Arngrímsson. Þeir tefla saman í fimmtu umferð. Allar líkur benda til þess að Hjörvar komist upp fyrir Hannes Hlífar og Héðin Steingrímsson á næsta stigalista FIDE. Skák Hjörvars og Hannesar lauk eftir aðeins 25 leiki en baneitraður 20. leikur Hjörvars gerði í raun út um taflið:

Hjörvar Steinn Grétarsson - Hannes Hlífar Stefánsson

Drottningarindversk vörn

1. d4 Rf6 2. c4 e6 3. Rf3 Bb4 4. Bd2 Bxd2 5. Rbxd2 d5 6. g3 O-O 7. Bg2 c6 8. O-O Rbd7 9. Dc2 b6 10. e4 Rxe4 11. Rxe4 dxe4 12. Dxe4 Bb7 13. Hfd1 Dc7 14. Re5 Rxe5 15. Dxe5 Hac8 16. c5 Hfd8 17. b4 Ba6 18. Hac1 Bb5 19. De3 a5 20. d5

20. ... bxc5 21. dxe6 cxb4 22. Bh3 Hb8 23. e7 Hxd1 24. Hxd1 c5 25. Df4!

- og Hannes gafst upp.

Enn sigrar Magnús Carlsen

Skákheimurinn rak upp stór augu þegar Magnús Carlsen tapaði tveim skákum í röð í fyrri helmingi minningarmótsins um Vugar Gashimov í Aserbaídsjan. En í seinni hlutanum vann hann strax tvær skákir með svörtu og knésetti helsta keppinaut sinn, Ítalann Caruana, í lokaumferðinni:

Lokaniðurstaðan: 1. Magnús Carlsen 6 ½ v. (af 10) 2. Caruana 5 ½ v. 3.-5. Karjakin, Nakamura og Radjabov 5 v. 6. Mamedyarov 3 v.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 4. maí 2014

Skákþættir Morgunblaðsins

[Event "Nordulandamot"] [Site "?"] [Date "2014.04.25"] [Round "2.6"] [White "Pálsdóttir, Sóley Lind"] [Black "Paltzer, Brandy"] [Result "1-0"] [ECO "B90"] [WhiteElo "1449"] [BlackElo "1553"] [PlyCount "53"] [EventDate "2014.??.??"] [TimeControl "6000+780"] [WhiteClock "0:30:06"] [BlackClock "0:48:05"] 1. e4 c5 2. Nf3 d6 3. d4 cxd4 4. Nxd4 Nf6 5. Nc3 a6 6. Be3 Nc6 7. Nb3 g6 8. Be2 Bg7 9. Qd2 Be6 10. f3 O-O 11. O-O-O Ne5 12. Bh6 Bxh6 13. Qxh6 Rc8 14. h4 Qc7 15. h5 Nxh5 16. g4 Nf6 17. Rh2 Rfd8 18. g5 Nh5 19. f4 Ng4 20. Bxg4 Bxg4 21. Nd5 Qd7 22. Rxh5 Bxh5 23. Nf6+ exf6 24. gxf6 Rxc2+ 25. Kb1 Rc1+ 26. Rxc1 Qe8 27. Qg7# 1-0

[Event "WOW Air A-flokkur"] [Site "Reykjavik (Faxafen)"] [Date "2014.04.25"] [Round "4.10"] [White "Gretarsson, Hjorvar S"] [Black "Stefansson, Hannes H"] [Result "1-0"] [WhiteElo "2511"] [BlackElo "2541"] [ECO "C07b"] [LiveChessVersion "1.4.2"] 1.d4 Nf6 2.c4 e6 3.Nf3 Bb4+ 4.Bd2 Bxd2+ 5.Nbxd2 d5 6.g3 O-O 7.Bg2 c6 8.O-O Nbd7 9.Qc2 b6 10.e4 Nxe4 11.Nxe4 dxe4 12.Qxe4 Bb7 13.Rfd1 Qc7 14.Ne5 Nxe5 15.Qxe5 Rac8 16.c5 Rfd8 17.b4 Ba6 18.Rac1 Bb5 19.Qe3 a5 20.d5 bxc5 21.dxe6 cxb4 22.Bh3 Rb8 23.e7 Rxd1+ 24.Rxd1 c5 25.Qf4 1-0

Vel heppnað skákstjóranámskeið

Vel heppnað skákstjóranámskeið fór fram 8. og 9. maí sl. Námskeið var í höndum Omars Salama, Páls Sigurðssonar og Gunnars Björnssonar. Um það bil 15 manns sóttu námskeiðið báða daga.

Sem viðhengi má finna glærurnar frá námskeiðinu

•  Hlutverk skákstjóra (Gunnar Björnsson)
• Svissneska kerfið og Swiss Manager (Páll Sigurðsson)
• Skákklukkan, skáklögin og alþjóðleg skákstig (Omar Salama)

Skrár tengdar þessari bloggfærslu:

• Hlutverk skákstjóra (Gunnar)
• Svissneska kerfið (Páll)
• Klukkan, lögin og alþjóðleg stig (Omar)