Frábær Flugfélagssyrpa Hróksins: Fullt hús hjá Þresti á fjórða mótinu - Héðinn efstur í heildarkeppninni

Stórmeistarinn Þröstur Þórhallsson (2432) var í banastuði á 3. mótinu í Flugfélagssyrpunni, sem fram fór í hádeginu á föstudag í Pakkhúsi Hróksins. Þröstur sigraði í öllum skákum sínum, hlaut 5 vinninga, en með 4 vinninga komu Helgi Áss Grétarsson (2488), Dagur Arngrímsson(2400), Héðinn Steingrímsson (2543) ogIngvar Þór Jóhannesson (2349).

Héðinn hefur forystu í heildarkeppninni, þegar þremur mótum af fimm er lokið, en allt getur ennþá gerst. Sigurvegari er sá sem nær bestum heildarárangri í þremur mótum. Héðinn er kominn með 13,5 vinning en Helgi Ólafsson,Hjörvar Steinn Grétarsson og sigurvegari dagsins eiga allir möguleika á að skáka Héðni á endasprettinum. Til mikils er að vinna: Ferð fyrir 2 til Grænlands með Flugfélagi Íslands.

Keppendur voru 27 og var mótið bráðskemmtilegt og spennandi. Greinilegt er að skákmenn kunna vel að meta að geta tekið þátt í skemmtilegum og snaggaralegum hraðskákmótum í hádeginu.

Næsta mót í Flugfélagssyrpunni fer fram föstudaginn 3. október.

Nánar á heimasíðu Hróksins (fjöldi mynda) 

Kennsla hafin í Fischer-setrinu

Skákskóli Íslands, Fischer-setrið á Selfossi og Skákfélag Selfoss á nágrenni hafa síðustu misserin staðið fyrir skáknámskeiðum í Fischer-setrinu fyrir börn og unglinga. Nýtt námskeið hófst síðasta laugardagsmorgun. Kennt er frá 11:00 - 12:30 og telur námskeiðið alls tíu skipti. Aðalkennari er Helgi Ólafsson og honum til aðstoðar Björgvin S. Guðmundsson. Stefán Bergsson leysti Helga af í fyrsta tímanum síðasta laugardag þar sem Helgi fylgir Vigni Vatnari á HM barna og unglinga og mun leysa Helga af í einhver fleiri skipti.

                Í tímann mættu tólf krakkar sem var skipt í tvo hópa. Átta nemendur sem voru lengra komnir hlustuðu á fyrirlestur Stefáns og fjórir byrjendur voru hjá Björgvini. Aðstaða til kennslu í Fischer-setrinu er til fyrirmyndar en þar má bæði finna gamalt og gott sýningarborð sem og skjái sem tengja má við tölvu og nýta í hópkennslu. Allur annar kostur er einnig til fyrirmyndar.

Huginn og TR mætast í úrslitum á sunnudaginn

Úrslitaviðureign Hraðskákkeppni taflfélaga fer fram á sunnudagskvöldið. Það eru Skákfélagið Huginn og Taflfélag Reykjavíkur sem mætast í úrslitum. Búast má við harðri og spennandi viðureign en flestir telja að einmitt þessi tvö félög berjist um Íslandsmeistaratitil skákfélaga.

Viðureignin fer fram í húsnæði SÍ og hefst kl. 20. Gestir og gangandi að sjálfsögðu velkomnir en auk þess verða úrslitin uppfærð reglulega á Chess-Results.

 

Skemmtikvöld hjá TR í kvöld

 

Þá er komið að öðru skemmtikvöldi Taflfélags Reykjavíkur í vetur! Föstudagskvöldið 26. september fer fram þemamót þar sem tefldar verða stöður úr skákum Alexanders Morozevich.  Þær eru oft á tíðum alls ekki fyrir hjartveika, og íslenskir pósameistarar gætu þurft að endurskoða plön sín.

 

Fyrirkomulagið verður eftirfarandi:

1. Tímamörk eru 3 mínútur auk 2 sekúndna viðbótartíma á hvern leik.
2. Tefldar verða stöður úr skákum Morozevich.  
3. Tefldar verða 12 skákir.
4. Accelerated Swiss pairing.  Keppendur tefla innbyrðis eina skák með hvítt og eina skák með svart. (2. skáka viðureign milli keppenda)
5. Tvær stöður úr skákum Moro verða í boði í hverri viðureign.  Sá sem stýrir svörtu mönnunum í hvorri skák velur hvor staðan er tefld!  Hvítur á alltaf fyrsta leik í stöðunum.
6. Önnur af stöðunum sem hægt er að velja úr í hverri umferð verður gerð opinber á morgun, og keppendur geta því undirbúið sig og valið þá stöðu þegar þeir fá svart, ..eða ekki.
7. Stöðurnar geta bæði verið úr þekktum byrjunum eða úr einhverju epísku Móra sulli.
8. Gerð verða tvö hlé til Billjardbarsferða meðan á mótinu stendur.
9. Verðlaun:
   1.sæti 8000 króna úttekt á billjardbarnum í formi veitinga.
   2.sæti 5000 króna úttekt á Billjardbarnum í formi veitinga.
   3.sæti 2000 króna úttekt á Billiardbarnum í formi veitinga.
10. Þátttökugjald er 500 krónur
11. Aldurstakmark er 20 ár og rétt er að geta þess að áfengisbann ríkir í húsakynnum Taflfélagsins.
12. Sigurvegarinn hlítur nafnbótina Mórinn 2014
13. Er óhappatala.  Tómt*

Skemmtikvöld Taflfélags Reykjavíkur hafa notið mikilla vinsælda og eru frábær skemmtun! Tilvalin upphitun fyrir úrslitin í hraðskákkeppni taflfélaga!

Verið velkomin.

Vignir vann í sjöundu umferð

Vignir Vatnar Stefánsson (1963) vann suður-afríska FIDE-meistarann Paul Gluckman (1702) í sjöundu umferð HM ungmenna sem fram fór í dag í Durban. Vignir hefur 4,5 vinning og er í 21.-28. sæti. Í áttundu umferð, sem fram fer á morgun, teflir hann við Búlgarann Matey Petkov (1912).

Vignir Vatnar er nr. 30 í stigaröð 105 keppenda. Taflfélag Reykjavíkur, Skáksamband Íslands, Skákskóli Íslands, Skákdeild KR, Gallerý Skák, Skákstyrktarsjóður Kópavogs, Rótarýklúbbur Kópavogs og Jói Útherji styðja við þátttöku Vignis á mótinu.

• Heimasíða mótsins
• Chess-Results
• Heimasíða TR
• Beinar útsendingar

Davíð efstur á Haustmóti TR

Fjórða umferð Haustmóts Taflfélags Reykjavíkur fór fram í gær. Davíð Kjartansson (2331) sem vann Þorvarð F. Ólafsson (2213) er efstur á mótinu með 3,5 vinning. Oliver Aron Jóhannesson (2165) er annar með 3 vinninga og Þorsteinn Þorsteinsson (2242) og Þorvarður eru í 3.-4. sæti með 2,5 vinning.

Úrslit 4. umferðar

Round 4 on 2014/09/24 at 19.30
Bo.	No.	Rtg		Name	Result		Name	Rtg	No.
1	10	2092		Hardarson Jon Trausti	0 - 1	IM	Bjarnason Saevar	2095	7
2	8	2121		Thorhallsson Gylfi	1 - 0		Halldorsson Jon Arni	2170	6
3	9	2131		Maack Kjartan	½ - ½		Johannesson Oliver	2165	5
4	1	2331	FM	Kjartansson David	1 - 0		Olafsson Thorvardur	2213	4
5	2	2154		Ragnarsson Dagur	½ - ½	FM	Thorsteinsson Thorsteinn	2242	3

Stöðuna má nálgast á Chess-Results.

B-flokkur

Staðan í b-flokki er jöfn og spennandi. Björn Hólm Birkisson (1655) er efstur með 3 vinninga. í 2.-4 sæti, með 2,5 vinning, eru Damia Benet Morant (2058), Ólafur Kjartansson (1997) og Christopher Vogel (2100).

Stöðu mótsins má nálgast á Chess-Results.

C-flokkur

Bárður Örn Birkisson (1636), bróðir Björns Hólms, er efstur með fullt hús. Felix Steinþórsson (1549) er annar með 3,5 og Hörður Jónasson (1570) er þriðji með 3 vinninga.

Stöðu mótsins má finna Chess-Results.

D-flokkur:

Staðan í d-flokki er nokkuð óljós vegna ólokinna skáka.

Alex Cambrey Orrason (1580) er efstur með fullt hús. Ólafur Evert Úlfsson (1430), Tryggvi K. Þrastarson (1130) og Aron Þór Mai (1274) eru í 2.-4. sæti með 3 vinninga. Ólafur á til góða frestaða skák.

Stöðuna má finna á Chess-Results.

• Heimasíða TR
• Chess-Results

Friðrik mætir til leiks í Flugfélagssyrpunni: Þriðja mótið í hádeginu á föstudag

Goðsögnin Friðrik Ólafsson mætir til leiks á 3. Flugfélagsmóti Hróksins sem fram fer í hádeginu á föstudag í Pakkhúsi Hróksins við Geirsgötu 11. Alls eru mótin 5 og fær sigurvegari heildarkeppninnar ferð fyrir 2 til Grænlands. Aðrir keppendur geta einnig unnið slíkan vinning í happdrætti Flugfélagssyrpunnar.

Héðinn Steingrímsson stórmeistari er efstur í heildarkeppninni með 9,5 vinning, eftir að hafa sigrað á báðum fyrstu mótunum. Meðal annarra meistara sem taka þátt í Flugfélagssyrpunni eru stórmeistararnir Jóhann Hjartarson, Helgi Ólafsson, Hannes H. Stefánsson, Hjörvar Steinn Grétarsson og Helgi Áss Grétarsson.

Mótin eru opin öllum skákáhugamönnum og er þátttaka ókeypis.

Pakkhús Hróksins er í vöruskemmu Brims hf. við Reykjavíkurhöfn. Það stendur við Geirsgötu 11, gegnt DV. Nóg er af bílastæðum kringum bygginguna. Mótið hefst kl. 12:10 og eru tefldar 5 umferðir með 5 mínútna umhugsunartíma. Ef keppendur eru seinir fyrir, geta þeir komið inn í mótið í 2. eða 3. umferð.

Skráið ykkur hér!

Arionbankamótið - Haustmót SA hefst í dag

Haustmót Skákfélags Akureyrar - hið árlega meistaramót félagsins hefst í næstu viku. Mótið er að þessu sinni haldið í samvinnu við Arion banka og ber því nafnið Arionbankamótið

Dagskrá:

• Fimmtudagur 25. september kl. 20.30         1-2. umferð
• Föstudagur 25. september kl. 18.00             3. umferð
• Laugardagur 25. september kl. 13.00           4.umferð
• Sunnudagur 25. september kl. 13.00            5. umferð

(Hlé vegna Íslandsmóts skákfélaga)

• Laugardagur 11. október kl. 13.00                6. umferð
• Sunnudagur 12. október kl. 13.00                 7. umferð

Fyrirkomulag mótsins er áformað þannig, að fyrst verða tefldar tvær atskákir, en síðan fimm skákir með umhugsunartímanum 90 mínútur á skákina, auk þess sem 30 sekúndur bætast við fyrir hvern leik.

Athygli þáttakenda er vakin á því að fjöldi umferða gæti tekið breytingum þegar endanleg þátttaka liggur fyrir. Ákveðið er að umferðir með kappskákfyrirkomulagi verða ekki færri fimm, en hugsanlegt að atskákum fjölgi.    

Skráning er hjá varaformanni félagsins í [e-mail], eða á skákstað, í síðasta lagi 15. mínútum fyrir upphaf fyrstu umferðar. 

Þátttökugjald á mótið er kr. 3.000 fyrir félagsmenn, kr. 4.000 fyrir aðra. Eins og áður eru þeir unglingar sem greiða æfingagjald undanþegnir þátttökugjaldi.

Verðlaunafé alls kr. 42.000 og skiptist sem hér segir:

• 1.      sæti     18.000
• 2.      sæti     12.000
• 3.      sæti       6.000
• Stigaverðlaun (1799 stig og minna) 6.000

Núverandi Skáksmeistari SA er Sigurður Arnarson

Björgvin með fullt hús hjá Ásum í gær

Björgvin Víglundsson leyfði engin frávik í Ásgarði í gær þar sem tuttugu og átta eldri skákmenn skemmtu sér við skákborðin. Hann vann alla sína tíu andstæðinga eins og hann hefur stundum gert áður.

Annars má segja eins og einu sinni var sagt einhversstaðar.

" Í góðmennsku þeir vega þar hvern annan"

Auðvitað eru menn misjafnlega tapsárir eins og gengur.

Í öðru til þriðja sæti urðu tveir jafnir með átta vinninga, þeir Jóhann Örn Sigurjónsson og Guðfinnur R Kjartansson, Jóhann örlítið hærri á stigum.

Garðar Guðmundsson sat við stjórnvölinn í gær.

Sjá nánari úrslit á meðf. töflu:

 

 

 

Íslandsmót skákmanna sem eru 50 ára + og 65 ára + verður haldið í haust

Íslandsmót skákmanna sem eru 50 ára + og 65 ára + verða haldin í fyrsta skipti nú í haust. Fyrri hluti mótsins verður haldinn 16.-19. október í Reykjavík og sá síðari á Hótel Selfossi 14.-16. nóvember. 

Fyrirkomulag

Tefldar verða sjö umferðir eftir svissneska kerfinu. Tímamörk eru 90 mín. + 30. sek. viðbótartími á hvern leik.

Flokkaskipting

Teflt verður í tveimur flokkum 50 ára + (1964 og fyrr) og 65 ára + (1949 og fyrr). Þeir sem eru 65+ geta valið um í hvorum flokkum þeir tefla.  

Verði skráðir keppendur í öðrum hvorum flokknum færri en 12 verði teflt í einum flokki en engu að síður teflt um tvo Íslandsmeistaratitla

Verði tveir eða fleiri efstir og jafnir verður stigaútreikningur látinn ráða.

Dagskrá mótsins

Fyrstu fjórar umferðir mótsins verða haldnar í Reykjavík.

• 1. umf., fimmtudaginn 16. október, kl. 19
  3. umf., laugardaginn, 18. október, kl. 13
  4. umf., sunnudaginn, 19. október, kl. 13

• 4. umf., fimmtudaginn, 13. nóvember, kl. 19

Síðustu þrjár umferðir mótsins verða haldnar á Hótel Selfossi.

• 5. umf., föstudaginn, 14. nóv., kl. 19
  6. umf., laugardaginn, 15. nóv., kl. 13
  7. umf., sunnudaginn, 16. nóv., kl. 13

Tilboð frá Hótel Selfossi

 Hótel Selfoss býður keppendum upp á fæði og gistingu á eftirfarandi verði:

• Tvíréttaður hádegisverður frá 2.800- kr
• Þriggja rétta kvöldverður pr. skipti. 6.100.- kr
• Þriggja rétta hátíðarkvöldverður. 7.200.- kr.

Gisting á föstudegi     10.500 tveggja manna herbergi
                                      8.500 eins manns herbergi

Gisting á laugardegi   18.000 tveggja manna herbergi
                                   16.000 eins manns herbergi

Nánari upplýsingar og pantanir sendist í [e-mail].

Verðlaun

• Fyrstu verðlaun í hvorum flokki eru 50.000 kr. styrkur á HM eða EM öldunga
• 2.-3. verðlaun - gripir
• Einnig gripir í flokkum 70+, 75+ og 80+

Þátttökugjöld:

6.000 kr. fyrir alla. Kaffi innifalið í verði.

Skráning

www.skak.is eða hér.