Nóa Siríus mótið: Þröstur efstur með fullt hús - Mikið af óvæntum úrslitum

Það var sannarlega nóg af flugeldasýningum í umferðinni og má sem dæmi nefna örfáar skákir:

Hallgerður Helga Þorsteinsdóttir (1992) vann glæsilegan sigur með góðri riddarafléttu gegn Óliver Aroni Jóhannessyni (2170).

Skákkennarinn og höfundur Gulu bókarinnar,Siguringi Sigurjónsson (1969) átti magnaðann sprett gegn IM Björgvin Jónssyni (2353) og vann örugglega!

Hallgerður lagði Óliver með glæsilegri riddarafléttu!

Dagur Ragnarsson gerði jafntefli við IM Jón Viktor Gunnarsson (2433) eftir þétta sókn – en þetta var í annað skiptið sem þeir tefla kappskák í vikunni!

IM Karl Þorsteinsson (2456) blés í herlúðra og steinlímdi stöðu hvíts gegn Mikael Jóhanni Karlssyni (2077)
Mikael 0 – 1 Karl

Af öðrum úrslitum er meira en nóg að taka. Í ekki svo mörgum orðum voru úrslit umferðarinnar nokkuð óvænt; stigalægri menn fóru mikinn og nokkrir eru nú í hópi efstu manna.

Stóru tíðindi Dagsins voru helst:

• Tröllið og Víkingurinn Gunnar Freyr Rúnarsson (2045) vann FM Halldór Grétar Einarsson(2187)
• Hallgerður Helga Þorsteinsdóttir (1992) lagði Óliver Aron Jóhannesson (2170) með glæsilegri riddarafléttu!
• Skákkennarinn Siguringi Sigurjónsson (1969) vann IM Björgvin Jónsson (2353) með talsverðum tilþrifum
• Björn Hólm Birkisson (1911) vann Sverri Örn Björnsson (2117)
• Gauti Páll Jónsson (1871) vann Helga Brynjarsson (1978)

• Dagur Ragnarsson gerði jafntefli við IM Jón Viktor Gunnarsson (2433) eftir þétta sókn.
• Örn Leó Jóhannsson (2048) gerði jafntefli við ísfirðinginn ískalda Guðmund St. Gísason(2315)

Sem sagt, allt að gerast í súkkulaðiverksmiðjunni, Nói Siríus.

Pörun 4. umferðar verður birt kl. 16 n.k. laugardag!

Efstu menn eftir þrjár:

• Heimasíða mótsins
• Mótið á Chess-Results
• Myndagallerí (GB)

Tvö stúlknaskákmót fara fram um mánaðarmótin

Íslandsmót grunnskólasveita 2015 - stúlknaflokkur

Íslandsmót grunnskólasveita 2015 - stúlknaflokkur fer fram laugardaginn 31. janúar nk. í Rimaskóla, Reykjavík.

Hver skóli má senda fleiri en eina sveit. Hver sveit er skipuð fjórum keppendum (auk varamanna).  Mótið hefst kl. 12  og tefldar verða 7 umferðir með 10 mínútna umhugsunartíma.

Veitt verða sérstök verðlaun fyrir sveitir sem eingöngu hafa á skipa nemendum úr 1.-3. bekk. Mæti a.m.k. fjórar slíkar sveitir tefla þær í sér flokki.

Þátttökugjöld eru 5.000 kr. per sveit en þó að hámarki kr. 10.000 per skóla.  

Skráning fer fram á Skák.is. Upplýsingar um skráðar sveitir má nálgast hér.

Íslandsmót stúlkna 2015 - einstaklingskeppni

Íslandsmót stúlkna 2015 - einstaklingskeppni fyrir stúlkur á grunnskólaaldri fer fram, sunnudaginn 1. febrúar, í Rimaskóla og hefst kl. 11.

Veitt verða þrenn verðlaun í öllum flokkum en teflt er fimm flokkum.

• 8.-10. bekkur (1999-2001)
• 5.-7. bekkur (2002-2004)
• 3.-4. bekkur (2005-2006)
• 1.-2. bekkur (2007-2008). (Jafnframt mega yngri stelpur tefla.)
• Peðaskák (leikskólaaldur og fyrir þær sem ekki treysta sér ekki í hefðbundna skák)

Tefldar verða 10 mínútna skákir - umferðafjöldi fer eftir fjölda þátttakenda.

Samhliða mótinu verður tefld Peðaskák sem er ætlað ungum keppendum sem hafa nýlega byrjað að tefla.

Allir keppendur fá Prins Póló í lok mótsins!

Þátttökugjöld eru 500 kr. á keppenda. Systur greiða þó ekki meira en 750 kr.

Skráning fer fram á Skák.is. Upplýsingar um skráðar keppendur má nálgast hér.

Skráningar í bæði mót þurfa að berast í sl. 29. janúar nk.

Stórmeistari, alþjóðlegur meistari, FIDE-meistari og einn titillaus efstir á Skákþingi Reykjavíkur

Fjórir skákmenn eru efstir og jafnir með 5 vinninga að lokinni sjöttu umferð Skákþings Reykjavíkur sem fram fór í gær. Það er stórmeistarinn Stefán Kristjánsson (2492), alþjóðlegi meistarinn Jón Viktor Gunnarsson (2433), FIDE-meistarinn Guðmundur Gíslason (2315) og hinn titillausi Oliver Aron Jóhannesson (2170). Dagurinn í gær var ekki góður dagur fyrir þá Dag og Dag sem efstir voru fyrir umferð gærdagsins. 

Í gær unnu almennt hinir stigahærri þá stigalægri á efri borðum mótsins og virðist kenningin "stig tefla" eiga ágætlega við. Á þessu voru þó nokkrar undantekningar. Óvæntustu úrslitin gærdagsins voru sigur Harðar Jónassonar (1541) á Lofti Baldvinssyni (1987) og Dawid Kolka (1829) á alþjóðlega meistaranum Sævari Bjarnasyni (2114). Mikael Jóhann Karlsson (2077) gerði sér svo lítið fyrir og vann Þorvarð F. Ólafsson (2245). 

Fimm skákmenn eru í 5.-9. sæti með 4½ vinning. Það eru þeir nafnar Dagur Arngrímsson (2368) og Ragnarsson (2059), Björn Þorfinnsson (2373), Mikael Jóhann og Bjarni Sæmundsson (1895).

Sjöunda umferð fer fram á sunnudag.

• Heimasíða TR
• Chess-Results
• Myndaalbúm (GB)

Magnus Carlsen aðeins með jafntefli við Ivanchuk - hefur vinnings forskot

Sigurgöngu Magnusar Carlsen (2862) lauk í gær þegar hann gerði jafntefli við Ivanchuk (2715) í níundu umferð Tata Steel-mótsins í Sjávarvík. Áður hafði Norðmaðurinn ungi unnið sex skákir í röð. Úkraínumaðurinn tefldi stíft til jafnteflis með hvítu mönnum og var þráteflt snemma tafls. Mikið var um jafntefli í gær og röð efstu manna að mestu leyti óbreytt. Frídagur er í dag en lokaumferðirnar þrjár verða tefldar föstudag-sunnudag.

Staða efstu manna:

• 1. Carlsen (2862) 7½ v.
• 2.-3. Wesley So (2762) og Maxime Vachier-Lagrave (2757) 6½ v.
• 4.-7. Ivanchuk (2715), Giri (2784), Caruana (2820) og Ding Liren (2732) 6 v.

Wei Yi (2675) og David Navara (2729) eru eftir í b-flokki með 8 vinninga. 

Góðar útsendingar eru frá skákstað í umsjón Yasser Seirawan.

 

• Heimasíða mótsins
• Beinar útsendingar

Carlsen með sjöttu sigurskákina í röð!

Magnus Carlsen (2862) heldur áfram ótrúlegu rönni á Tata Steel-mótinu sem er í gangi í Wijk aan Zee. Í níundu umferð, sem fram fór í dag, vann hann Radjabov (2731) og var það sjötta vinningsskák hans í röð. Á morgun mætir hann Ivanchuk (2715). Vinnur hann þá sjöundu skákina í röð og endurtekur þar með ævintýri Caruana frá Sinqenfeld Cup frá í haust?

Staða efstu manna:

• 1. Carlsen (2862) 7 v.
• 2.-3. Wesley So (2762) og Maxime Vachier-Lagrave (2757) 6 v.
• 4.-5. Ivanchuk (2715)og Ding Liren (2732) 5½ v.
• 6.-7. Giri (2784) og Caruana (2828) 5 v.

David Navara (2729), sem verður meðal keppenda á Reykjavíkurskákmótinu er efstur í b-flokki með 7½ vinning.

Góðar útsendingar eru frá skákstað í umsjón Yasser Seirawan.

 

• Heimasíða mótsins
• Beinar útsendingar

Björgvin með öruggan sigur í Stangarhyl.

Þrjátíu kátir skákkarlar mættu í Stangarhyl í dag og skemmtu sér við skák í þrjá og hálfan tíma. Björgvin Víglundsson var öryggið uppmálað eins og hann er oftast og varð efstur með 9½ vinning. Stefán Þormar var sá eini sem náði jafntefli við hann í dag. Guðfinnur R Kjartansson og Ingimar Halldórsson urðu svo jafnir í öðru til þriðja sæti með 7 ½ vinninga en Guðfinnur var hærri á stigum.

Sæbjörn Larsen var einn í fjórða sæti með 6 ½ vinning. Magnús V Pétursson sá óútreiknanlegi skákmaður blandaði sér í hóp efstu manna í dag og varð í fimmta til áttunda  sæti með 6 vinninga ásamt Stefáni Þormar, Gunnari Finnssyni og Páli G. "Magggi er sterkur" eins og hann segir okkur sjálfur.

Við minnum á Toyotaskákmótið sem verður haldið 30 janúar í söludeild Toyota. Við biðjum væntanlega þátttakendur að forskrá sig í netföngin [e-mail]  og í [e-mail] eða í síma 8931238  og 8984805

Það eru nú þegar 14 búnir að skrá sig til þátttöku. Verður auglýst nánar þegar nær dregur. 

Sjá nánari úrslit dagsins í töflu og myndum frá ESE

 

 

Tvö stúlknaskákmót um mánaðarmótin

Íslandsmót grunnskólasveita 2015 - stúlknaflokkur

Íslandsmót grunnskólasveita 2015 - stúlknaflokkur fer fram laugardaginn 31. janúar nk. í Rimaskóla, Reykjavík.

Hver skóli má senda fleiri en eina sveit.  Hver sveit er skipuð fjórum keppendum (auk varamanna).  Mótið hefst kl. 12  og tefldar verða 7 umferðir með 10 mínútna umhugsunartíma.

Veitt verða sérstök verðlaun fyrir sveitir sem eingöngu hafa á skipa nemendum úr 1.-3. bekk. Mæti a.m.k. fjórar slíkar sveitir tefla þær í sérflokki.

Þátttökugjöld eru 5.000 kr. per sveit en þó að hámarki kr. 10.000 per skóla.  

Skráning fer fram hér. Upplýsingar um skráðar sveitir má nálgast hér.

Íslandsmót stúlkna 2015 - einstaklingskeppni

Íslandsmót stúlkna 2015 - einstaklingskeppni fyrir stúlkur á grunnskólaaldri fer fram, sunnudaginn 1. febrúar, í Rimaskóla og hefst kl. 11.

Veitt verða verðlaun í tveimur flokkum.

Fæddar 1999-2001.

Fæddar 2002 og síðar.

Tefldar verða 10 mínútna skákir - umferðafjöldi fer eftir fjölda þátttakenda.

Samhliða mótinu verður tefld Peðaskák sem er ætlað ungum keppendum sem hafa nýlega byrjað að tefla.

Skráning fer fram hér. Upplýsingar um skráðar keppendur má nálgast hér.

Skráningar í bæði mót þurfa að berast í sl. 29. janúar nk. fyrir hádegi.

Skákdagurinn framundan

Skákdagurinn verður haldinn hátíðlegur um land allt mánudaginn 26. janúar. Friðrik Ólafsson fyrsti stórmeistari Íslendinga og þjóðhetja á þá stórafmæli, en hann stendur á áttræðu. Feril Friðriks þekkja flestir. Hann varð Íslandsmeistari 1952 þá sautján ára gamall, tefldi frægt einvígi við Bent Larsen 1956 og var næstu árin meðal allra bestu skákmanna heims. Friðrik gegndi embætti forseta FIDE 1978-1982 og átti farsælan feril sem skrifstofustjóri Alþingis um árabil.

Taflborðin verða tekin upp í skólum, taflfélögum, fyrirtækum og víðar á Skákdaginn og munu landsmenn þannig heiðra afmælisbarnið í verki. Þegar eru allmargir viðburðir fyrirhugaðir. Eldri skákmenn í Reykjavík munu halda áfram baráttunni um Friðrikskónginn þar sem Gunnar Gunnarsson hefur titil að verja. Gunnarar hafa reyndar unnið Friðrikskónginn síðustu þrjú ár! Taflið hefst 19:30 og er teflt um Friðrikskónginn í skákherberginu í KR-heimilinu.

Friðrik hefur verið félagi í Taflfélagi Reykjavíkur allan sinn feril. Taflfélagsmenn munu heiðra þennan helsta félaga sinn með Frikkanum 2015, en um þann titil verður teflt á næsta skemmtikvöldi Taflfélagsins sem verður haldið föstudagskvöldið 30. janúar.  Tefldar verða stöður upp úr skákum Friðriks. Auk þess er Skákþing Reykjavíkur sem nú er í gangi honum til heiðurs.

Vinaskákfélagið og Skákfélagið Hrókurinn standa fyrir Friðriksmóti í Vin á mánudaginn.

Skákfélagið Huginn mun að kvöldi Skákdagsins standa fyrir hraðkvöldi í félagsaðstöðu sinni í Mjóddinni.

Lágafellsskóli í Mosfellsbæ er mikill skákskóli. Þar sinnir Ingibjörg Rósa Ívarsdóttir kennari við skólann skákkennslu í fullu starfi. Hjörvar Steinn Grétarsson stórmeistari mun tefla fjöltefli í skólanum morguninn eftir Skákdaginn. Fjöltefli verða einnig haldin í Kerhólsskóla, Hvolsskóla Hvolsvelli og víðar.

Taflfélögin út á landi láta ekki sitt eftir liggja og verður Hugin með opið hús um kvöldið á Húsavík og Skákfélag Akureyrar higgur á skákmót í verslunarmiðstöðinni Glérártorgi. Þá hefur heyrst af skákviðburðum á Blönduósi og Patreksfirði.

Skáksundlaugarsett verða vígð víða um land, m.a. á Ólafsvík, Ólafsfirði og Seltjarnarnesi.

Frekar upplýsingar um Skákdaginn er að vænta í vikunni og má senda upplýsingar um viðburði á stefan@skakakademia eða [e-mail].

               

Dagur og Dagur í forystu á Skákþingi Reykjavíkur

Margar spennandi viðureignir voru í 5.umferð Skákþings Reykjavíkur sem tefld var síðastliðinn sunnudag. Hart var barist á toppnum sem fyrr og urðu tveir titilhafar að játa sig sigraða.

Á 1.borði mættust alþjóðlegi meistarinn Dagur Arngrímsson (2368) og FIDE meistarinn Guðmundur Gíslason (2315) í hörkuskák. Í þessari orrustu um toppsætið mættust stálin stinn og varð eitthvað undan að láta. Svo fór að lokum að Ísfirðingurinn knái, Gummi Gísla, lagði niður vopn eftir harða rimmu og nokkra vel útfærða leiki Dags. Afar mikilvægur og sterkur sigur hjá Degi í toppbaráttunni.

Á 2.borði mættust TR-ingurinn síungi Þorvarður Fannar Ólafsson (2245) og Rimaskólaundrið Dagur Ragnarsson (2059). Báðir höfðu þeir náð góðum úrslitum fyrr í mótinu og báðir voru þeir taplausir fyrir þessa viðureign. Eftir heiðarlegan bardaga var það Dagur sem vann skákina og trónir hann nú á toppnum ásamt nafna sínum Degi Arngrímssyni. Í þessu samhengi er athyglivert að rifja upp þungbæra kennslustund Dags Ragnarssonar á Evrópumóti ungmenna í Batumi í Georgíu síðastliðið haust þar sem hann varð að gera sér að góðu að skilja 122 skákstig eftir í Batumi. Slík reynsla hefur bugað margan skákmanninn, en Dagur er með höfuðið skrúfað rétt á og hefur honum tekist að vinna með þessa erfiðu reynslu á uppbyggilegan hátt. Afraksturinn er augljós nú eftir fimm skákir í Skákþinginu því piltur hefur 4¹/2 vinning sem skipar honum á bekk með efsta manni mótsins og skilar honum 72 skákstigum.

Á 3.borði börðust Suðurnesjatröllið Jóhann Ingvason (2126) og Grafarvogsstjarnan Oliver Aron Jóhannesson (2170). Margir reiknuðu vafalítið með sigri Olivers í ljósi hraustlegrar framgöngu hans í mótinu til þessa, en Jóhann er sýnd veiði en ekki gefin. Auk þess berast nú þær fregnir úr undirheimunum að Jóhann sé í stífum æfingum hjá ónefndum stórmeistara. Svo virðist sem þær æfingar séu að skila sér því Jóhann gerði jafntefli við Oliver og hefur því nælt sér í 1¹/2vinning í síðustu tveimur skákum gegn tveimur ungum og afar efnilegum skákmönnum.

Á 4.borði stýrði sonur Suðurnesjatröllsins, Örn Leó Jóhannsson (2048), hvítu mönnunum gegn stórmeistaranum Stefáni Kristjánssyni (2492). Það er ljóst að þrátt fyrir örlítið hikst í stórmeistaravélinni í 3.umferð að þá mætir Stefán einkar vel undirbúinn til leiks í Skákþingið. Á kaffistofunni veltu menn því fyrir sér hvort Stefán væri að beita heimabrugguðum launráðum í þessari skák gegn Erni Leó. Ekki verður úr því skorið hér en hitt er ljóst að Stefán vann skákina eftir nokkrar sviptingar. Er Stefán sterklega grunaður um að hafa fínpússað byrjanir sínar áður en Skákþingið hófst.

Fullyrða má að Akademíuforinginn Stefán Bergsson (2085) hafi farið eilítið aðra leið en stórmeistarinn í sínum byrjanaundirbúningi fyrir Skákþingið. Erfitt er að finna orð til að lýsa því nánar en ljóst er að orðið fínpússning væri nokkuð villandi í því samhengi. Stefán stýrði svörtu mönnunum gegn stjórnarmanni Taflfélags Reykjavíkur, Þóri Benediktssyni (1895). Þórir lék 1.e4 og Stefán svaraði með 1...f5. Var það mál manna á kaffistofunni að 1...f5 væri að öllum líkindum versti mögulegi svarleikur svarts gegn 1.e4. Enda fór það svo að Þórir vann skákina.

Óvænt úrslit voru framleidd á 6.borði hvar Bjarni Sæmundsson (1895) stýrði svörtu mönnunum til sigurs gegn alþjóðlega meistaranum Sævari Bjarnasyni (2114). Bjarni á það til að ganga berserksgang á skákborðinu og er besta dæmið um það er hann lagði titilhafana Róbert Lagerman (2320) og Dag Arngrímsson (2367) að velli í Reykjavíkurskákmótinu árið 2011, líkt og skákáhugamönnum er vafalítið enn í fersku minni. Sævar fékk nú að finna fyrir vélabrögðum Bjarna sem er til alls líklegur í þessum ham.

Af öðrum úrslitum bar hæst að skákþjálfarinn dagfarsprúði Björn Þorfinnsson (2373) lagði kollega sinn, skákþjálfarann Loft Baldvinsson (1987), að velli á rétt rúmum klukkutíma. Staunton-sérfræðingurinn Jón Viktor Gunnarsson (2433) vann landsliðskonuna geðþekku Hallgerðu Helgu Þorsteinsdóttur (1992) og byrjanaprófessorinn Daði Ómarsson (2256) er aftur kominn á beinu brautina eftir sigur á Dawid Kolka (1829).

Línur eru teknar að skýrast í Skákþinginu. Dagur Arngrímsson og Dagur Ragnarsson leiða mótið með 4¹/2 vinning en í humátt á eftir þeim með 4 vinninga koma Guðmundur Gíslason, Oliver Aron Jóhannesson, Stefán Kristjánsson, Jón Trausti Harðarson, Jón Viktor Gunnarsson, Bjarni Sæmundsson og Þórir Benediktsson. Aðrir hafa minna.

Í 6.umferð verður risaslagur á 1.borði hvar Stefán Kristjánsson hefur hvítt gegn Degi Arngrímssyni. Á 2.borði er ekki síðri bardagi þar sem Dagur Ragnarsson hefur hvítt gegn Jóni Viktori Gunnarssyni. Athygliverð rimma er jafnframt á 4.borði en þar mætast Rimaskólabræðurnir Oliver Aron Jóhannesson og Jón Trausti Harðarson í baráttu um Grafarvogskrúnuna. Það mun eitthvað ganga á í skáksal Taflfélags Reykjavíkur þegar 6.umferð verður tefld og mörgum spurningum ósvarað þar til þá. Munu nafnarnir halda toppsætinu eða er Dagur að kveldi kominn? Mun nýr Dagur upp rísa? Hvaða afbrigði verður fínpússað á eldhúsborði stórmeistarans fyrir umferðina? Verður Grafarvogur samur eftir slag Olivers og Jóns Trausta? Hvað leikur Akademíuforinginn í 1.leik?

Ekki missa af fjörinu. Klukkur verða ræstar á slaginu 19:30 á miðvikudagskvöldið næstkomandi.

• Heimasíða TR
• Chess-Results

Norðurorkumótið - Skákþing Akureyrar 2015 hófst í gær

Norðurorkumótið, Skákþing Akureyrar 2015 hófst í gær með 10 skákum. Hart var barist á öllum borðum og engin skák endaði með jafntefli. 21 keppandi er skráður til leiks. Þar á meðal eru margir reyndir kappar, ungir og efnilegir drengir og kempur sem hafa ekki teflt kappskák á Akureyri í langan tíma. Ungu, óreyndu drengirnir stóðu sig vel en máttu sín lítils gegn reynsluboltunum. Þeirra tími mun koma.

Á fyrsta borði áttust við Sveinbjörn Sigurðsson og Áskell Örn Kárason. Skákinni lauk eftir 38 leiki þegar Sveinbjörn féll með erfiða stöðu.

Á öðru borði vann Ólafur Kristjánsson glæsilegan sigur á Kristjáni Hallberg í aðeins 19 leikjum. Tvímælalaust glæsilegasta skák kvöldsins.

Á þriðja borði mættust Ulker Gasanova og Jón Kristinn Þorgeirsson. Langt er síðan Ulker hefur teflt á skákmótum á heimavelli og gaf hún ungstirninu ekkert eftir. Jón tók það til bragðs að skipta upp í seinnihluta miðtaflsins og Ulker sat uppi með erfiða stöðu og lék af sér. Hún gafst upp eftir 35 leiki.

Á fjórða borði áttust við Smári Ólafsson og Logi Jónsson. Smári tefldi djarft og fórnaði tveimur peðum fyrir frumkvæðið. Seinni peðsfórnin var vafasöm. Í kjölfarið lék Smári illa af sér og Logi náði að króa drottningu Smára inni. Smári gafst þá upp.

Á fimmta borði mætti Hreinn Hrafnsson ungstirninu Símoni Þórhallssyni. Símon saumaði jafnt og þétt að hreini og vann hann í vel tefldri skák í 26 leikjum.

Á sjötta borði mætti Haraldur Haraldsson Eymundi Eymundssyni sem ekki hefur teflt mikið að undanförnu. Eymundur fékk þrönga stöðu og vann Haraldur nokkuð örugglega. Eymundur gafst upp eftir 34 leiki eftir að hafa leikið af sér skiptamun í erfiðri stöðu.

Á sjöunda borði mættust Haki Jóhannesson og Sigurður Eiríksson. Haki hefur í mörg ár haft hægt um sig í kappskákum í heimabænum. Þetta var spennandi skák þar sem Sigurður reyndi að herja á hálfopna a-línu en Haki lagði undir sig opna c-línu. Opna línan reyndist happadrýgri og Haki bætti stöðu sína jafnt og þétt uns Sigurður þurfti að gefa drottningu sína fyrir riddara og hrók. Þær bætur reyndust ekki nægar þrátt fyrir kröftuga taflmennsku svarts og Haki hafði að lokum sigur eftir laglegan lokahnykk í 50. leik.

Á áttunda borði stóð hinn reynslulitli Benedikt Stefánsson vel í sveitunga sínum úr Hörgárdalnum, Hjörleifi Halldórssyni. Svo fór að lokum að reynslan lagði æskuna af velli í endatafli eftir 36 leiki.

Á níunda borði var hinn ungi Oliver Ísak Ólafsson óheppinn að ná ekki að halda heldur verra hróksendatafli gegn Jakobi Sævari Sigurðssyni. Jakob nýtti reynslu sína og vann í 45 leikjum.

Á tíunda og neðsta borði tefldi Gabríel Freyr Björnsson sína fyrstu kappskák gegn kennara sínum, Andra Frey Björgvinssyni. Gabríel átti erfitt uppdráttar og mátti játa sig sigraðan eftir 35 leiki.

Karl Egill Steingrímsson sat yfir í fyrstu umferð.

• Heimasíða SA
• Chess-Results