Skákdeild KR - Fréttir af vesturvígstöðvunum

HÖRÐUR ARON KOM SÁ OG SIGRAÐI

Skákkvöldin í KR-heimilinu standa jafnan vel fyrir sínu þó þátttaka í vetur hafi verið breytileg rétt eins og veðrið.  Þar geysa jafnan stormar á skákborðinu og þátttaka því ekki heiglum hent. 

Það er ávallt gaman þegar ungir skákmenn og upprennandi koma í heimsókn, sína snilli sína og  ná að láta ljós sitt skína. Svo var á mánudaginn var þegar glaðbeittir KR-ingar komu saman til að fagna góðum árangri í nýafstaðinni Deildakeppni þar sem skáksveit þeirra náði skipa sér á ný í röð fremstu taflfélaga landsins með því að ávinna sér rétt til að keppa í fyrstu deild í haust með glæsilegri frammistöðu.

Fjölnismaðurinn slyngi Hörður Aron Hauksson blandaði sér í hópinn og gerði sér lítið fyrir og varð efstur  ásamt heimamanninum Gunnari Skarphéðinssyni með 12 vinninga af 13 mögulegum. Jón Þór Bergþórsson fylgdi fast á hæla þeim með 11 v. en eftir það fór að teygast úr lestinni eins og sjá má á meðf. mótstöflu.

ÁRDEGISMÓT Á LAUGARDÖGUM

Undanfarna laugardaga hafa verið haldin þar í samstarfi KR og Gallerý Skákar  Árdegismót fyrir árisula ástríðuskákmenn sem vilja hrista af sé slenið eftir að hafa fengið sér sundsprett í Vesturbæjarlauginni.  Þar hafa þeir Guðfinnur R. Kjartansson og Þórarinn Sigþórsson staðið sig fádæma vel að formanninum Kristjáni Stefánssyni og öðrum minni spámönnum ólöstuðum. Mótin hefjast kl. 11 f.h. og eru öllum opin, jafnt ungum sem öldnum og jafnan heitt á könnunni.

SAMBÓ PÁSKAKAPP&HAPP OG GUNNARASLAGUR 

Í kvöld, mánudaginn 30. apríl,  verður mikið um dýrðir í vestur þar í SkálkaSkjóli, skáksal KR sem svo hefur verið nefndur,  þegar SAMBÓ risapáskaeggja- og súkkulaðiboltamótið fer þar fram.  Allir taflfærir Gunnarar eru sérstaklega hvattir til að mæta því sérstök verðlaun verða veitt þeim sem leggur flesta skákmenn með því herskáa nafni að velli og einnig þeim Gunna sem vinnur flesta nafna sína.

Dregin verða út risastór ljúffeng og lokkandi páskaegg og boltar auk þeirra sem veitt verða í verðlaun til þeirra sem efstir verða í mótinu sem er öllum opið. Það hefst kl. 19.30 eins og venjulega og tefldar verða 13 umferðir með 7 mín. uht.  

Grænlandsmót í Vin í dag: Allir velkomnir!

 

Vinaskákfélagið og Hrókurinn halda hraðskákmót í Vin, Hverfisgötu 47, mánudaginn 30. mars klukkan 13. Mótið er haldið í tilefni af páskaferð Hróksmanna til Ittoqqortoormiit, þar sem mikil hátíð verður haldin fyrir börn og ungmenni í afskekktasta þorpi Grænlands.

Á Grænlandsmótinu í Vin á mánudaginn verða tefldar sex umferðir með 7 mínútna umhugsunartíma. Skákmenn á skólaaldri eru sérstaklega boðnir velkomnir á mótið, enda komnir í frí og verða páskaegg í verðlaun fyrir þá keppendur 16 ára og yngri sem bestum árangri ná.

Vinaskákfélagið stendur fyrir vikulegum æfingum í Vin á mánudögum, en þar er teflt alla daga og reglulega slegið upp stórmótum. Félagið var stofnað að frumkvæði Hróksmanna sumarið 2003, um svipað leyti og skáklandnám Hróksins á Grænlandi hófst.

Heiðursgestur á Grænlandsmóti Hróksins og Vinaskákfélagsins á mánudaginn er Kristín Hjálmtýsdóttir framkvæmdastjóri Grænlensk-íslenska viðskiptaráðsins. Kristín var nýlega kjörin formaður Reykjavíkurdeildar Rauða krossins sem annast rekstur Vinjar.

Allir eru hjartanlega velkomnir á Grænlandsmótið í Vin. Þátttaka er að venju ókeypis og boðið verður upp á ljúffengar veitingar.

Facebook-síða Hróksins.

Heimasíða Hróksins.

Hraðkvöld hjá Hugin í kvöld

Hraðkvöld Hugins verður mánudaginn 30. mars nk.  og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hugins í Álfabakka 14a í Mjóddinni. Í vetur verða svo hraðkvöldin fyrsta og síðasta mánudaga í hverjum mánuði að því undanskildu þegar mánudag ber upp á stórhátíð.

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Tómas Veigar vann páskaskákmót Hugins á Húsavík

Tómas Veigar Sigurðarson vann öruggan sigur á páskaskákmóti Hugins sem fram fór á Húsavík í gærkvöld. Tómas hafði mikla yfirburði á mótin og lagði alla andstæðinga sína að átta að tölu (Rp 2416).

Smári Sigurðsson varð í öðru sæti með 7 vinninga og Rúnar Ísleifsson varð þriðji með 5,5 vinninga.

Níu keppendur tóku þátt í mótinu og voru tímamörkin 10 mín á mann að viðbættum 5 sek á leik.

Mótið á chess-results

Lenka og Oliver efst í áskorendaflokki - mikið um óvænt úrslit

Áskorendaflokkurinn hefur hafist með miklum látum og hafa óvænt úrslit sett mikinn svip á mótið. Þegar þremur er lokið eru Lenka Ptácníková (2242) og Oliver Aron Jóhannesson (2212) efst með fullt hús. Fimm keppendur koma humátt á eftir með 2,5 vinning. Hlé er nú á mótinu fram á þriðjudag.

Tvær umferðir voru tefldar í gær. Í annarri umferð bar það til tíðinda að Eiríkur Björnsson (1961) vann Dag Ragnarsson (2347), Elvar Örn Hjaltason (stigalaus) hafði betur gegn Stefáni Bergssyni (2063), Andri Freyr Björgvinsson (1764) lagði Halldór Pálsson (2021) að velli. Stórmeistarinn Hjörvar Grétarsson (2554) tók yfirsetu þar sem umferðin rakst á próf.

Í þriðju umferð urðu sannkölluð óska(rs)úrslit. Óskar Long Einarsson (1574) vann Dag Ragnarsson (2347) en stigamunurinn er nálægt 800 stigum! Óskar Víkingur Davíðsson (1454) gerði svo jafntefli við Vigni Vatnar Stefánsson (1909). Jón Trausti Harðarson (2170) gerði einnig jafntefli við Davíð Kjartansson (2364). 

Staða efstu manna:

• 1.-2. Lenka Ptácníková (2242) og Oliver Aron Jóhannesson (2212) 3 v.
• 3.-7. Jón Trausti Harðarson (2170), Davíð Kjartansson (2364), Eiríkur Björnsson (1961), Elsa María Kristínardóttir (1875) og Guðmundur Gíslason (2321)

Tvö efstu sætin gefa keppnisrétt í landsliðsflokki að ári.

Staðan á Íslandsmóti kvenna:

• 1. Lenka Ptácníková (2242) 3 v.
• 2. Elsa María Kristínardóttir (1875) 2,5 v.
• 3.-4. Tinna Kristín Finnbogadóttir (1950) og Veronika Steinunn Magnúsdóttir (1571) 1 v.

Staða efstu manna í opnum flokki:

• 1. Stefán Orri Davíðsson (1038) 3 v.
• 2.-5. Birkir Ísak Jóhannsson (0), Freyja Birkisdóttir (1000), Nikulás Ýmis Valgeirsson (1000) og Pétur Jóhannesson (1023) 2 v.

Fjórða umferð hefst á þriðjudagskvöld kl. 18. Þá mætast meðal annars: Lenka-Oliver, Eiríkur-Davíð, Jón Trausti-Elsa og Hjörvar-Ingvar Örn.

• Heimasíða Skáksambands Íslands
• Chess-Results
• Myndaalbúm (GB)

Lokamót Páskaeggjasyrpu TR fer fram í dag

 

Nú styttist í eina af skemmtilegustu mótasyrpum ársins! Páskaeggjasyrpa Nóa Síríus og Taflfélags Reykjavíkur sló rækilega í gegn í fyrra þegar vel á annað hundrað krakkar tóku þátt í þremur mótum syrpunnar. Í ár endurtökum við leikinn og með þessu framtaki vill T.R. í samstarfi við Nóa Síríus þakka þeim gríðarlega fjölda sem sótt hefur barna- og unglingaæfingar félagsins í vetur.

Frábærar aðstæður eru hjá Taflfélagi Reykjavíkur, margir reyndir þjálfarar og félagið býður eitt félaga upp á ítarlegasta námsefni sem völ er á hér á landi. Allar æfingar og allt námsefni er frítt, það þarf bara að mæta og taka þátt í þessum stórskemmtilegu æfingum!

Mótin í ár verða reiknuð til alþjóðlegra hraðskákstiga og glæsileg verðlaun eru í öllum mótunum, sem og fyrir samanlagðan árangur úr þeim öllum. Í hverju móti verður síðan dregin út glæsileg DGT Easy skákklukka handa einum heppnum þátttakanda.

Páskaeggjasyrpan mun samanstanda af þremur skákmótum sem haldin verða þrjá sunnudaga fyrir páska í skákhöll Taflfélags Reykjavíkur að Faxafeni 12:

1. NÓA KROPP PÁSKAEGGJAMÓTIÐ. Sunnudaginn 15. mars kl. 14

2. NIZZA LAKKRÍS PÁSKAEGGJAMÓTIÐ. Sunnudaginn 22. mars kl. 14

3. NIZZA HRÍSKÚLU PÁSKAEGGJAMÓTIÐ. Sunnudaginn 29. mars kl.14

• Keppt verður í tveimur flokkum, 1-3 bekk (og yngri) og 4-10 bekk.
• Sex umferðir verða tefldar í hverju móti með 10 mínútna umhugsunartíma á mann.
• Glæsileg verðlaun eru í boði fyrir alla hressu skákkrakkana sem taka þátt í syrpunni!
• Verðlaunapeningar fyrir þrjú efstu sætin í hvorum flokki á hverju páskaeggjamóti.
• Stór páskaegg fyrir þrjú efstu sætin samanlagt úr mótunum í hvorum flokki (misstór eftir sætum)
• Allir sem taka þátt í minnst tveimur af þremur mótum í syrpunni fá lítið páskaegg í verðlaun fyrir þátttökuna og verða þau veitt í lok þriðja mótsins í syrpunni.
• Dregin verður út ein stórglæsileg DGT Easy skákklukka handa heppnum skákkrakka á hverju páskaeggjamóti!

Skráning fer fram hér og lista yfir skráða keppendur má sjá hér.

Taflfélag Reykjavíkur og Nói Síríus hlakka til að sjá ykkur áPÁSKAEGGJASYRPUNNI 2015!

Skákþáttur Morgunblaðsins: "Peðin er sál skákarinnar"

Við óperuhúsið í París stendur meðal fjölmargra minnismerkja brjóstmynd af Francois André Philidor einu helsta tónskáldi Frakka á 18. öld. Þessum franska aðalsmanni var margt til lista lagt en í dag er hann sennilega þekktastur fyrir afrek sín á skáksviðinu. Um miðja 18. öld var hann langfremsti skákmaður heims og er stundum talinn í hópi hinna óopinberu heimsmeistara ásamt Paul Morphy og Adolph Andersen – þeim er tefldi „Ódauðlegu skákina“. Árið 1749 kom út eftir Philidor-bókin Skákrannsóknir. Nokkrar stöður sem hann tók til meðferðar í bókinni segja heilmikið um dýpt athugana hans t.d. er vinningsleið í endataflinu kóngur, hrókur og biskup gegn kóng og hrók ekkert minna en tær snilld.

„Peðin eru sál skákarinnar,“ er frægasta setning bókarinnar. Orð voru dýr í þá daga. Ritskoðunarmenn töldu að þessi lína væri dulbúin hvatning til uppreisnar gegn Loðvík fimmtánda og Philidor var rekinn frá óperuhúsinu. Byltingin kom 40 árum síðar en þá var Philidor staddur í London og þrátt fyrir setninguna um peðin var hann settur á dauðalista nýrra stjórnvalda.

Þegar greinarhöfundur var að labba um ganga Hörpu á meðan á Reykjavíkurmótinu stóð tók ég eftir því að Henrik Danielsen, sem stóð sig einna best íslensku keppendanna, tefldi nokkrum sinnum upp þá einu byrjun sem ber nafn Philidor. Hún hefur aldrei notið mikilla vinsælda en Henrik hefur náð góðum tökum á henni og vann með henni hinn öfluga tékkneska stórmeistara David Navara:

Reykjavíkurskákmótið 2015; 10. umferð:

David Navara – Henrik Danielsen

Philidors-vörn

1. e4 d6 2. d4 Rf6 3. Rc3 e5 4. Rf3 Rbd7 5. Bc4 Be7

Hér er komin fram eitt helsta afbrigði Philidor varnarinnar. Ein leið sem ti boða stendur er 6. Bxf7++!? Kxf7 7. Rg5+ Kg8 8. Re6 De8 9. Rxc7 Dg6 og svartur heldur velli.

6. a4 0-0 7. 0-0 c6 8. He1 exd4 9. Rxd4 Re5 10. Ba2 He8 11. h3 a5 12. Be3 Bf8 13. Dd2 Rg6 14. f3 Be6 15. Rxe6 fxe6 16. f4 Kh8 17. f5 exf5 18. exf5 Re5 19. Bd4

Navara sem er geysisterkur í byrjunum hefur byggt upp vænlega stöðu þó varnir svarts séu traustar.

19.... Red7 20. Hxe8 Dxe8 21. He1 Dh5 22. Be6 d5 23. De3

Eðlilegra er að stilla drottningunni upp á f2 en Navra vildi hafa vald á h3-peðinu.

23.... Dh4 24. g4

Þetta var hugmyndin. Hvítur hótar 25. g5. En Navara var grandalaus um hætturnar sem leynsast í stöðunni.

– sjá stöðumynd

24.... Bc5! 25. He2??

Gerir illt verra. Hann varð að leika 25. Bxc5 Rxc5 26. He2 eða 25. Hd1. Í báðum tilvikum er svarta staðan betri.

25.... Rxg4! 26. f6 Dxf6!

Vitaskuld ekki 26.... Rxe3 27. fxg7+ mát! Nú hrinur hvíta staðan til grunna.

27. Bxf6 Rgxf6 28. Bxd7 Rxd7 29. Dxc5 Rxc5 30. He7 Kg8 31. Re2 Kf8 32. Hc7 He8 33. Kf1 He3 34. c3 Hxh3 35. b4 axb4 36. cxb4 Rxa4 37. Hxb7 Hh4 38. Kf2 Rb2 39. Kf3 Rd3

- og Navara gafst upp. 

Úrslit á Íslandsmóti skákfélaga ráðast um helgina

Skákfélagið Huginn, Taflfélag Reykjavíkur og Taflfélag Vestmannaeyja eiga í harðri baráttu um sigurinn á Íslandsmóti skákfélaga en seinni hluti keppninnar hófst í Rumaskóla á fimmtudagskvöldið. Huginn var fyrir lokasprettinn með 28 ½ vinning í efsta sæti, TR er með 28 vinninga og TV er í 3. sæti með 27 ½ vinning. Langt er í fjórða lið en Fjölnir situr þar með 23 vinninga. Meira um keppnina síðar.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 21. mars 2015.

Skákþættir Morgunblaðsins

[Event "Reykjavik Open"] [Site "Reykjavik ISL"] [Date "2015.03.18"] [EventDate "2015.03.10"] [Round "10.6"] [Result "0-1"] [White "David Navara"] [Black "Henrik Danielsen"] [ECO "C41"] [WhiteElo "2736"] [BlackElo "2514"] [PlyCount "78"] 1. e4 d6 2. d4 Nf6 3. Nc3 e5 4. Nf3 Nbd7 5. Bc4 Be7 6. a4 O-O 7. O-O c6 8. Re1 exd4 9. Nxd4 Ne5 10. Ba2 Re8 11. h3 a5 12. Be3 Bf8 13. Qd2 Ng6 14. f3 Be6 15. Nxe6 fxe6 16. f4 Kh8 17. f5 exf5 18. exf5 Ne5 19. Bd4 Ned7 20. Rxe8 Qxe8 21. Re1 Qh5 22. Be6 d5 23. Qe3 Qh4 24. g4 Bc5 25. Re2 Nxg4 26. f6 Qxf6 27. Bxf6 Ngxf6 28. Bxd7 Nxd7 29. Qxc5 Nxc5 30. Re7 Kg8 31. Ne2 Kf8 32. Rc7 Re8 33. Kf1 Re3 34. c3 Rxh3 35. b4 axb4 36. cxb4 Nxa4 37. Rxb7 Rh4 38. Kf2 Nb2 39. Kf3 Nd3 0-1

Samferða skáksögunni í 50 ár - viðtal við Helga Ólafsson

• Helgi Ólafsson stórmeistari hefur tekið saman sögu Reykjavíkurskákmótsins í hálfa öld
• Fyrra bindi af tveimur komið út 
• Reykjavík mikilvægur áfangastaður fyrir alla skákmenn

Viðtal: Stefán Gunnar Sveinsson ([e-mail])

„Hugmyndin á bak við verkið var sú, að þegar fimmtugsafmælið kom í fyrra, þá var ekki til neitt um mótin nema í gömlum skáktímaritum á timarit.is eða gömlum plöggum,“ segir Helgi Ólafsson, stórmeistari í skák, en hann er nýbúinn að gefa út fyrra bindið af tveimur um sögu Reykjavíkurskákmótsins í fimmtíu ár, en þar fer hann yfir framvinduna á fyrstu fjórtán mótunum, sem haldin voru annað hvert ár á árunum 1964 til 1990, en ráðgert er að seinna bindið komi út á næsta ári.

„Sagan er merk og markmiðið því fyrst og fremst að draga þetta saman á einn stað,“ segir Helgi, en hann segir gamlar skákir gjarnan týnast á netinu. Hann segir margar merkilegar skákir hafa verið tefldar á mótunum og þær skipi auðvitað stóran sess í bókinni. „En hitt er ekki síður merkilegt að fara yfir þátttakendalistann á mótunum, því að eitt af því sem kemur í ljós er hvað við höfum verið samferða skáksögunni í þessi fimmtíu ár,“ segir Helgi. 

Tal og Friðrik gáfu tóninn

Hann bendir á að Reykjavíkurmótið hafi frá upphafi verið vel sótt af erlendum stórmeisturum. „Við höfum fengið hingað heimsmeistara, bæði verðandi og fyrrverandi,“ segir Helgi. Þess má geta að á fyrsta Reykjavíkurmótinu 1964 var það „töframaðurinn frá Riga“, Mikhaíl Tal, sem kom, sá og sigraði, en hann var þá tiltölulega nýbúinn að vera heimsmeistari frá 1960-1961, en Helgi segir Tal hafa gefið fyrsta Reykjavíkurmótinu mikið vægi. „Taflmennska hans var stórglæsileg og það var hver snilldin á fætur annarri, sem gaf mótunum byr undir báða vængi,“ segir Helgi.

En hvers vegna vildi þetta einvalalið alþjóðlegra skákmanna koma til Reykjavíkur? „Skákin hefur alltaf verið langt á undan sinni samtíð hérna,“ segir Helgi, og segir að hugsanlega megi þakka það því forskoti sem Íslendingar hafi fengið í fræðilegum bakgrunni með bókagjöfum Daniels Willards Fiske um aldamótin 1900. „Íslendingar gátu því aflað sér þekkingar sem var ekki á almannafæri.“

Helgi nefnir einnig að Reykjavíkurskákmótið 1964 sé fyrsti alþjóðlegi viðburðurinn sem nefndur er eftir borginni. „Mér þykir það mikil framsýni og eftir heimsmeistaraeinvígið 1972 verður eyjan nokkurs konar tákn,“ segir Helgi og nefnir að einn keppandinn í fyrra hafi komið hingað í hálfgerða pílagrímsför. „Hann vildi vitja leiðis Fischers og forseti evrópska skáksambandsins sagði að Reykjavík væri einn af þessum áfangastöðum skáklistarinnar sem allir vildu koma til, þó ekki væri nema einu sinni.“

Þá var það einnig mikill kostur í fyrstu Reykjavíkurmótunum að við áttum hér okkar eigin stórmeistara í Friðriki Ólafssyni, sem gat haft í fullu tré við hina erlendu meistara, og hafði alþjóðlega reynslu sem aðra íslenska skákmenn skorti á þeim tíma. „Friðrik varð hin stóra viðmiðun fyrir íslenska skákmenn í upphafi. Ef einhver Íslendinganna náði að vinna hann þótti það stórsigur, en það var erfitt því hann var svo öflugur,“ segir Helgi, sem bætir við að Friðrik hafi átt sér stóran stuðningshóp hér á Íslandi, sem hafi fylgt Friðriki og hvatt hann til dáða.

Byggt á eigin reynslu

Helgi segir að í frásögninni hafi hann byggt nokkuð á sinni eigin reynslu af mótunum. En var erfitt fyrir Helga að skilja á milli skákskýrandans og þátttakandans þegar kom að sögurituninni? „Ég hef reyndar komið mér upp fyrir löngu nokkuð góðu kerfi til að aðgreina þessa tvo þætti. Þetta eru tveir aðilar sem talast ekki endilega mikið við meðan á þessu stendur,“ segir Helgi. „Hluti af því að taka þátt í þessum mótum er að fylgjast með því sem er að gerast,“ segir Helgi, sem lýsir í bókinni nokkrum atvikum sem hann sjálfur varð vitni að.

Helgi segir einn styrk mótanna þann hversu margir hafi komið að þeim í gegnum tíðina. Hann segir að eftirminnilegasti skákstaðurinn hafi verið þegar mótin voru haldin á Hótel Loftleiðum um tíu ára skeið, en nú sé mjög vel búið að mótinu í Hörpunni. „Hún vekur mikla athygli keppenda, og hefur gengið alveg prýðilega þar,“ segir Helgi.

Of langt milli Riga og Reykjavíkur

 

Tal fórnaði drottningunni Í bók Helga er að finna margar skemmtilegar lýsingar á því sem fram fór á Reykjavíkurmótunum, í bland við greiningar á helstu skákum sem tefldar voru á hverju móti fyrir sig.

Í fyrstu skákinni sem Helgi rekur í bókinni um Reykjavíkurskákmótin er fjallað um fræga skák á milli Jóns Kristinssonar og Mikhaíls Tals, fyrrverandi heimsmeistara, en hún var tefld í fimmtu umferð mótsins, en Jón hafði þar hvítt. Tal tefldi Taímanov-afbrigði af Sikileyjarvörn, en gaf Jóni færi á að fórna manni í 13. leik og virtist sem eina leiðin úr stöðunni fyrir Tal væri sú að stýra skákinni í jafntefli með þrátefli, en í Morgunblaðinu birtist 31. janúar myndaröð á baksíðu, með myndatextanum: „Loks þurfti Tal að hugsa.“

Þegar Tal lýsti skákinni hins vegar eftir á, sagði hann: „En það er of langt á milli Riga og Reykjavíkur til að gera jafntefli í 15 leikjum,“ og fórnaði drottningunni í skiptum fyrir sókn, en fórnin gaf Tal mun lakari stöðu. Jón náði hins vegar ekki að nýta sér tækifærið og neyddist á endanum til þess að gefa skákina. Svo fór að Tal vann allar skákir sínar á fyrsta mótinu nema eina, gegn Guðmundi Pálmasyni, sem náði jafntefli við heimsmeistarann fyrrverandi.

Grein þessi eftir Stefán Boga Sveinsson birtist í Morgunblaðinu 26. mars 2015. Hægt er að skrá sig fyrir bókinni hér.

Afar óvænt úrslit í fyrstu umferð áskorendaflokks

Fimmtíu manns tóku þátt Íslandsmótinu í skák sem hófst í gær í félagasheimili TR og þarf 39 í áskorendaflokki. Það urðu strax afar óvænt þegar Bárður Örn Birkisson (1839) gerði jafntefli við stórmeistarann Hjörvar Stein Grétarsson (2554).Stigamunurinn þeirra á millum er 715 skákstig! 

Það voru ekki einu óvænt úrslit. Norðanpeyinn Andri Freyr Björgvinsson (1764) gerði það sama á móti Guðmundi Gíslasyni (2321). Hjálmar Sigur0valdason (1450) náði einnig fram sömu úrslitum gegn Halldóri Pálssyni (2021). Að lokum má nefna að á neðsta borði hin stigalausi Elvar Örn Hjaltason jafntefli við Björn Hólm Birkisson (1845). 

Óvenjumikið um óvænt úrslit í fyrstu umferð.

Tvær umferðir eru tefldar í dag. Sú fyrri kl. 10 og sú síðari kl. 16. 

Ellefu skákmenn hófa þátt í opnum flokki. Þar verða tefldar sjö umfeðrir.

• Heimasíða Skáksambands Íslands
• Chess-Results
• Myndaalbúm (GB)

Lokamót Páskaeggjasyrpu TR fer fram á sunnudag

 

Nú styttist í eina af skemmtilegustu mótasyrpum ársins! Páskaeggjasyrpa Nóa Síríus og Taflfélags Reykjavíkur sló rækilega í gegn í fyrra þegar vel á annað hundrað krakkar tóku þátt í þremur mótum syrpunnar. Í ár endurtökum við leikinn og með þessu framtaki vill T.R. í samstarfi við Nóa Síríus þakka þeim gríðarlega fjölda sem sótt hefur barna- og unglingaæfingar félagsins í vetur.

Frábærar aðstæður eru hjá Taflfélagi Reykjavíkur, margir reyndir þjálfarar og félagið býður eitt félaga upp á ítarlegasta námsefni sem völ er á hér á landi. Allar æfingar og allt námsefni er frítt, það þarf bara að mæta og taka þátt í þessum stórskemmtilegu æfingum!

Mótin í ár verða reiknuð til alþjóðlegra hraðskákstiga og glæsileg verðlaun eru í öllum mótunum, sem og fyrir samanlagðan árangur úr þeim öllum. Í hverju móti verður síðan dregin út glæsileg DGT Easy skákklukka handa einum heppnum þátttakanda.

Páskaeggjasyrpan mun samanstanda af þremur skákmótum sem haldin verða þrjá sunnudaga fyrir páska í skákhöll Taflfélags Reykjavíkur að Faxafeni 12:

1. NÓA KROPP PÁSKAEGGJAMÓTIÐ. Sunnudaginn 15. mars kl. 14

2. NIZZA LAKKRÍS PÁSKAEGGJAMÓTIÐ. Sunnudaginn 22. mars kl. 14

3. NIZZA HRÍSKÚLU PÁSKAEGGJAMÓTIÐ. Sunnudaginn 29. mars kl.14

• Keppt verður í tveimur flokkum, 1-3 bekk (og yngri) og 4-10 bekk.
• Sex umferðir verða tefldar í hverju móti með 10 mínútna umhugsunartíma á mann.
• Glæsileg verðlaun eru í boði fyrir alla hressu skákkrakkana sem taka þátt í syrpunni!
• Verðlaunapeningar fyrir þrjú efstu sætin í hvorum flokki á hverju páskaeggjamóti.
• Stór páskaegg fyrir þrjú efstu sætin samanlagt úr mótunum í hvorum flokki (misstór eftir sætum)
• Allir sem taka þátt í minnst tveimur af þremur mótum í syrpunni fá lítið páskaegg í verðlaun fyrir þátttökuna og verða þau veitt í lok þriðja mótsins í syrpunni.
• Dregin verður út ein stórglæsileg DGT Easy skákklukka handa heppnum skákkrakka á hverju páskaeggjamóti!

Skráning fer fram hér og lista yfir skráða keppendur má sjá hér.

Taflfélag Reykjavíkur og Nói Síríus hlakka til að sjá ykkur áPÁSKAEGGJASYRPUNNI 2015!